Аның урынына 34 яшьлек Анна Кузнецова билгеләнде.
Русия президенты Владимир Путин Павел Астаховны балалар омбудсмены вазифасыннан алынуы турындагы фәрманга кул куйды. Балалар хокуклары вәкиле Павел Астахов үз теләге белән эшеннән китә дип хәбәр итә Кремльнең матбугат хезмәте.
Аның урынын «Покров» гаилә саклау оешмалары берлеге башлыгы һәм Гомумрусия халык фронтының Пенза бүлекчәсе җитәкчесе Анна Кузнецова билгеләнгән. Аңа 34 яшь. Владимир Путин Кузнецова белән Кремльдә сөйләшүләр уздырды, ди президент сүзчесе Дмитрий Песков.
Астахов Русиядә балалар хокуклары вәкиле вазифасын 2009 елдан бирле башкарды. Күптән түгел Карелиядә суга бату вакытында исән калган балалар белән очрашканда, Астахов: «Ну ничек йөздегез?» дигән сорау биреп җәмәгатьчелекне шаккаттырды. Шуннан соң интернетта Астаховны эшеннән алу петициясенә имза җыю башланды. Аны 150 мең кеше имзалады. Астахов чит ил кешеләре тарафынна Русия ятимнәрен уллыкка алуга чикләү кертүдә катнашкан кеше буларак та истә калачак.
Азатлык радиосы