Архивы айдар рәкыйпов - Tatar Today - татар яңалыклары.

Айдар Рәкыйповның никахына кемнәр килгән, зур тортны кемнәр ашаган?

Р Л — Sat, 10 May 2025 06:37:09 +0000

Җырчы Айдар Рәкыйповның өйләнүе Гүзәл белән никах укытуы турында хәбәр иткән идек. Никах ничек узган?

Бәйрәмдә гармунчы һәм җырчы Айдар – Алмаз Юнысовлар чыгыш ясаган. Алар татарча көйләр уйнаганда, Айдар Рәкыйпов сыздырып биеп күрсәткән. «Айдар Рәкыйпов буйдак тормышы белән хушлаша», – дип язалар әлеге кадрлар янына.

Мәҗлесне шагыйрь, алып баручы Ренат Галиәскәр алып барган. Яшьләрне котларга Айдарның укытучысы Венера Ганиева да килгән. Бәйрәмнән видеоларны сез дә карагыз.

Запись Айдар Рәкыйповның никахына кемнәр килгән, зур тортны кемнәр ашаган? впервые появилась Tatar Today - татар яңалыклары..

Җырчы Айдар Рәкыйпов өйләнгән!

Р Л — Fri, 02 May 2025 19:12:17 +0000

Җырчы Айдар Рәкыйпов өйләнгән. Аның кәләше белән никахы узган.

«Тормышыбызның яңа этабы», — дип яза Айдар социаль челтәрдә.

Ике ел элек Айдар Бу хакта ул «Туган тел» каналындагы «Сер итеп» тапшыруында өйләнергә теләвен әйткән иде.

«Кызлар күп язамы?» – дип сораган аннан алып баручы Роза Хәйруллина.
«Кызлар да, апалар да күп яза», – дигән Айдар.

«Димәк, сөйгән ярың юк. Кызлар язуларын дәвам итсеннәр?» – дигән аңа алып баручы.

«Әлбәттә. Языгыз, аралашырбыз. Мин барыгызның да язганнарын укып торам», – дип җавап кайтарган буйдак егет.

Сөйгән яры нинди буырга тиешлеге турында ул: «Элек күз алдымда бер фотосурәт бар иде. Яшь барган саен ул рамкалар юкка чыкты. Иң мөһиме – аңлый белә торган кыз булсын, шул җитә», – дигән.

Күрәсең, Айдар шундый кызны тапкан. Котлыйбыз!

ТАТАР ТУДЕЙ ТЕЛЕГРАМ КАНАЛЫ - https://t.me/tatartoday

Запись Җырчы Айдар Рәкыйпов өйләнгән! впервые появилась Tatar Today - татар яңалыклары..

Моңа хәзер кеше ышанмас та – Айдар Рәкыйповның кечкенә чагындагы төс-кыяфәтенә бәйле хатирәсе

Alfia — Fri, 18 Oct 2019 12:22:38 +0000

// Татар Тудей // Татар Бүген //

Ныклы адымнар белән эстраданы яулачы, шушы көннәрдә “Хыял балкышы” дип исемләнгән яңа җырын тәкъдим иткән Айдар Ракипов сәхнәдә кабатланмас тавышы белән генә түгел, озын буйлы булуы белән дә аерылып тора. Бу, үз чиратында, җырчыга төрле образларда, үзенчәлекле күлмәк-костюмнарда чыгыш ясарга мөмкинлек бирә һәм Айдар моның белән бик оста куллана.

Нихаять, татар эстрадасында да озын буйлы егет пәйда булуы берәүләрне сокландырса (Айдарның буе 188 сантиметр), икенчеләрдә сораулар уята. Укучыларыбыз да Айдар кемгә охшап төз, дөрес пропорцияләрдә бирелгән озын буйда икән, дип кызыксына. Чыннан да Айдар белән аралашканда үзеңне уңайсызрак хис итәсең, аны буена җитәр өчен, ирексездән аяк очынарак басып карыйсы килә башлый.

Буйга кагылышлы сорауларга ачыклык керту өчен, без Айдарның үзе белән аралаштык. Баксаң, Айдарның кечкенә чагында, яшьтәшләре белән чагыштырганда, буе кыска булган икән.

“Әйе, буем бик кечкенә, үзем таза идем. Мәктәптә укыганда физкультура дәресендә иң азакта басып тордым. Уфада 1 нче курска укырга кергәч, кисәк кенә буйга үстем һәм ябыктым, моның өчен махсус берни дә эшләмәдем.

Безнең әти яклап та, әни яклап та нәселдә барсы да озын буйлы, тазарак гәүдәлеләр. Шуңа күрә, минем ябык булуны да вакытлыча, өйләнгәнче, диеп шаярталар”.

Шунсын да әйтеп үтик, Айдар кечкенәдән актив рәвештә спорт белән шөгыльләнә. Ул сайлаган йөзү һәм волейбол спорт төрләре дә озын буйлыларны ярата. Әллә, киресенчә, нәкъ менә бу спорт төрләре озын буйлы булырга ярдәм итә микән?

Запись Моңа хәзер кеше ышанмас та – Айдар Рәкыйповның кечкенә чагындагы төс-кыяфәтенә бәйле хатирәсе впервые появилась Tatar Today - татар яңалыклары..

Айдар Рәкыйпов клипта төшкән кайсы кызны ошаткан? [видеоинтервью]

Alfia — Fri, 04 Oct 2019 22:19:12 +0000

Татар Тудей // Татар Бүген

Соңгы арада Айдар Рәкыйпов яшен тизлеге белән татар эстрадасын яулап килә. Иҗаты, кызлары, планнары турында без җырчы белән аралаштык, кызыксындырган сорауларыбызны бирдек.
– Ярты ел эчендә бик актив иҗат юлына бастың, моңа нәрсә этәргеч бирде? Каян көч, акча, вакыт табасың?

– Әйе, мондый активлашу минем февраль аенда “Minstar” продюсерлык үзәге белән килешү төзүгә бәйле. Шушы ярты ел дәвамында 16 дан артык җыр язылды, 4 клип төшерелде һәм иҗат итүдән туктарга җыенмыйбыз. Тамашачыларыбызның артуы, халыкның эшебезгә карата фикерләр җиткерүе, безне тагын да илһамландыра, көч бирә, чөнки без алар өчен эшлибез.

– Клипларга зур игътибар бирәсез? Бу сине күбрәк белсеннәр, танысыннар өчен эшләнеләме?

– Миңа калса, һәрбер җырчының үз җырына карата башта ниндидер сурәт барлыкка килә һәм шул сурәтне, әйтәсе килгән фикерен ул клиплар аша халыкка җиткерергә тели. Мәсәлән, “Бәхетемне килә табасым” җырын күзаллау безнең чынга ашты, без аны халыкка тәкъдим иттек. Башка клиплар белән дә шулай.

– Татар клипларында ясалмалык күп, креативлык юк диләр. Синең “Бәхетемне килә табасым” клибына да мактау сүзләре белән бергә безнең Инстаграмда ясалма клип, уйный белмәүче кызлар дигән тәнкыйди сүзләр булды, бу фикерләр белән килешәсеңме?

– Бу җырга башкача стильдә клип төшерү күз алдына да килмәде, чөнки җыр гади, халыкчан. Кызларга килгәндә, монда актрисаларны махсус чакырмадык, чөнки алар уйный, килештерә белә. Кызларның шул мизгелдә, шул вакытта булган чын тойгыларын күрсәтәсе килде.

– Күп кызлар катнаштыру идеясе синеке идеме? Кастинг үткәрдегезме, ничә кешедән ничәсе сайланды?

– Күп кызлар төшерү идеясен безгә сценаристлар тәкъдим итте. Бу идеяне бик ошаттык. Клипта катнашырга кызлар кирәклеген үзебезнең социаль челтәрләрдә урнаштырдык. Әлбәттә, араларында күптән дус, таныш кызларым да бар.

– Кызлар канәгать иде кебек бу процесстан, син канәгать калдыңмы?

– Авыл егете буларак, минем бик тә авылны күрсәтәсе килде. Әлбәттә, без бу процесстан бик канәгать. Катнашучылар да: “Тагын клип төшерсәң, мөрәҗәгать итәрсең”, дигән теләктә калды. Кем белә, бәлки, бу клипның да дәвамы булыр.

– Ул кызлар арасында чын-чынлап сине гашыйк итәрлеге бар идеме? Хәтта ул кыз сине каушаткандыр да, клибыңдагы кебек.

– Соңгы арада бу бик актуаль сорау. Кайда гына барсам да: “Кайчан өйләнәсең? Кемне яратасың? Кемгә гашыйксың?”, дип сорыйлар. Бу сорауны мин ачык калдырам, чөнки бүгенге көндә аңа җавабым юк.

– Синең хыялыңдагы кыз нинди? Ул нинди сыйфатларга ия булырга тиеш?

– Шуны аңларга кирәк, базарга барып, тотып карап, сайлап ала торган нәрсә тугел, Ходай ниндине насыйп иткән иде.

– Ни өчен нәкъ менә Василий, аны клипка чакыру идеясы каян килде? Ни өчен Кукмарада, Василий эшләгән авылда ук, тракторлар темасына клип төшермәдегез?

– Василийның тормышка, эшенә карата булган мөнәсәбәте, яшәү рәвеше, тулаем образы безнең клипка бик яхшы туры килер, дип уйладык. Үзебезнең идеябезне аңа тәкъдим иткәч, бик теләп ризалашты. Җырны тыңлаган булсагыз, ул мәхәббәт темасына кагылган, халыкчан җыр. Василий авылында, трактор темасына төшерсәк, урынлы булмас иде кебек.

– Алга таба планнарыгыз зурдан кебек, артислар, группа җыясыз. Бу нинди максаттан, сез Элвин Грей лейблы кебек зураячаксызмы әллә? Зураеп гастрольләргә чыгарга әзерләнәсезме?

– Әйе, дөрес әйттең, чыннан да зурдан. Быел декабрь аенда Казанда иң беренче сольный концертым узачак. Мин моңа ничә еллар килдем һәм бүгенге көндә бу вакыйгага әзермен, чөнки җырларым, халыкка әйтәсе, җиткерәсе килгән фикерләрем тупланды. Әлбәттә, гастрольләргә чыгуны да планлаштырабыз.

Запись Айдар Рәкыйпов клипта төшкән кайсы кызны ошаткан? [видеоинтервью] впервые появилась Tatar Today - татар яңалыклары..

Җырчы Айдар Ракипов яңа җырларын чит илдә яздыра?

Лейла — Mon, 23 Sep 2019 18:00:49 +0000

22 сентябрьдә кич белән җырчы Айдар Ракипов Казан аэропортыннан Инстаграмда туры эфирга чыкты.
Язылучылары белән аралашу барышында җырчы Казахстанга очуы хакында әйтте һәм анда барып яңа җырлар яздырачагын белдерде. Бу хакта тулырак белешер өчен без җырчы белән элемтәгә кердек. Әлеге карарның нәрсәгә бәйле икәнлеген ачыкладык.

“Әйе, без чыннан да Нур-Солтан (Астана) шәһәренә очтык, монда 25нче сентябрьгә кадәр булачакбыз.
Нур-Солтанга килүебез – җырларыбызны тыңлаучыларга яңа форматта, яңа яңгырашта җиткерәсе килү белән бәйле, чөнки җырчы буларак сәхнәгә чыккач, сыйфатлы иҗат белән аерылып торасы килә”, дип уртаклашты Айдар Ракипов.

Сүз уңаеннан, 23 сентябрьдә кич белән Айдар Инстаграмда кабаттан туры эфирга чыгачак һәм язылучылары белән Нур-Солтан шәһәреннән аралашачак.

Запись Җырчы Айдар Ракипов яңа җырларын чит илдә яздыра? впервые появилась Tatar Today - татар яңалыклары..

Артистлар кыйммәтле бүләкләр уйнатканда, җырчы Айдар Ракипов менә нәрсә эшләгән

Гузель — Wed, 14 Aug 2019 16:52:09 +0000

//Tatar Today//

Артистлар инстаграмда язылучыларын арттыру максатыннан кыйммәтле бүләкләр уйнатканда, Айдар Ракипов #безбулышабыз исеме астында хәйрия марафонын башлап җибәргән. Бу хакта ул үзенең инстаграмында хәбәр итеп, видео урнаштырган. Марафонны дәвам итүне Гүзәл Уразова, Илсөя Бәдретдинова, Филипп Киркоров, Максим Галкинга тапшырган.

Айдар үзе командасы белән Анжела Вавилова исемендәге Хосписка тәм-томнар, кирәк-яраклар илткән, Кан тапшыру үзәгендә кан биргән.

Шулай ук җырчы игелекле эшләр марафонына һәр кешенең дә кушыла алуын искәрткән. Моның өчен яхшы эшләр башкарып, инстаграмга #безбулышабыз хештегы куеп, фото-видеолар кертергә кирәк. Изге эшләрнең эзсез калмавын тели җырчы.

Сүз уңаеннан, Айдар актив рәвештә иҗатын да баета. Күптән түгел “Йөрәгем урладың” исемле өр яңа җырын чыгарды, шушы көннәрдә исә “Бәхетемне килә табасым” җырының клибын тәкъдим итте.

Запись Артистлар кыйммәтле бүләкләр уйнатканда, җырчы Айдар Ракипов менә нәрсә эшләгән впервые появилась Tatar Today - татар яңалыклары..

Җырчы Айдарның шау-шу куптарган сәхнә киемен күрдегезме?

Гузель — Fri, 26 Jul 2019 10:40:53 +0000

//Tatar today//

Айдар (Айдар Ракипов) июль аенда “Болгар радиосы” оештырган ачык һавадагы концертларда чыгыш ясады. Аны сәхнәдә сыйфатлы җырлар башкаручы, моңлы тавышлы җырчы буларак тәкъдим иттеләр. Бар җирдә дә җырчының чыгышын бик җылы каршыладылар, тамашачылар рәхәтләнеп биеде, ахырдан дәррәү килеп кул чапты.

Апаста узган концертта Айдар стилле, өр яңа киемнән чыкты. Җырчы моңа кадәр дә үзенчәлекле сәхнә киемнәре белән башкалардан аерылып тора иде, хәзер тагын да кискен үзгәрешләр керткән. Бу исә, үз чиратында, тамашачыларда шау-шулы фикерләр уятты.

Сүз уңаеннан, Айдар 30 августта Пирамида күңел ачу үзәгендә “Болгар радиосы” концертында чыгыш ясаячак. Анда нинди киемдә чыгар, оештыручылар әлегә сер итеп саклый.

Җырчы ныклы, ышанычылы адымнар белән эстрадада үз урынын яулый, яңа җырлар яздыра, клиплар төшерә.

Айдар июль ае дәвамында ТНВ телеканалында барган “Кайнар хит” хит-парадында “Син минем теләгем” җыры белән беренчелек өчен көрәшә. 27 июль (шимбә) көнне туры эфирда хәлиткеч ярыш булачак. Иң күп тавыш җыеп, Айдар җиңә калса, ул ел ахырында дәрәҗәле “Болгар радиосы” премиясен алачак. Бу җиңүгә үз өлешегезне Сез дә кертә аласыз. Шимбә көнне Мәскәү вакыты белән сәгать 10:00-11:00 вакыт аралыгында 8(843)2215832 номеры буенча шалтыратып, тавыш бирү мөхим. Шалтыраткач, берни әйтергә кирәкми. Автоҗавапкайтаргыч тавышыгыз кабул ителү турында үзе хәбәр итәчәк. Шалтыратулар саны чикләнмәгән. Бушлай.

Запись Җырчы Айдарның шау-шу куптарган сәхнә киемен күрдегезме? впервые появилась Tatar Today - татар яңалыклары..

Айдар Рәкыйпов: “Ул минем минем беренче мәхәббәтем иде… Аерылышуыбызның сәбәбе – …” [әңгәмә]

Гузель — Sun, 21 Jul 2019 09:44:07 +0000

Яңа буын татар-башкорт җырчысы Айдар Рәкыйпов Татарка, Лейна иҗатларына әллә ни исе китмәвен әйтә. Ул үз иҗатында кавказ халкы биюләренә аерым урын бирә, бала чагындагы җанисәпне хәтерли.

Татар эстрадасында юлын Гөлназ Шакирова белән дуэт буларак башлап, “Мәхәббәтем” клибы аша күпләргә таныш булган Айдар Рәкыйпов хәзерге вакытта шәхси иҗатын үстерә, татар һәм башкорт телләрендә җырлар яздыра, клиплар төшерә. Азатлык хәбәрчесе җырчы белән очрашып, халык санын алуга, Татарка клипларына мөнәсәбәте, иҗат иреклеге хакында сөйләште.

– Айдар, сез татармы, татар-башкортмы? 2020 елда халык санын алганда кем булып язылачаксыз?

– Исемдә, мәктәптә укыган вакытта, халык санын алуда, татар булсаң да, “башкорт” дип язып китәләр иде. Мин үземне татар дип саныйм. Кәгазьгә нәрсә генә язылса да, өйдә ничек сөйләшәсең, туганнарың белән ничек аралашасың, нинди телдә уйлыйсың, шул милләткә керәсең. Минемчә, нинди генә милләт дип язсалар да, бар яхшы кеше, бар начар кеше – мин шуны гына аерам.

https://www.instagram.com/p/Bt5XjJOgOu4/

– Сезнең кебек яңа буын татар җырчыларына халык санын алуда татарларның күп булуы мөһимме?

– Җырчы буларак кына түгел, ә Русия ватандашы буларак, халык санын арттырып язып кына әллә ни эшләп булмый дип уйлыйм. Бүгенге көндә халыкка моны эшлә, тегене эшлә дип кенә булмый, чөнки халыктан да зур, көчле нәрсә юк, иң мөһиме – тату яшәү. Чөнки сугышалар, халык, җир бүләләр. Татармы ул, урысмы, башкортмы, илебез тыныч, күгебез аяз булсын.

– Татар-башкорт киемнәре белән клип төшердегезме әле?

– Әлеге вакытка кадәр андый клип төшергән булмады. Бәлки киләчәктә эшләрбез дә, чөнки элекке киемнәрдә милләтнең, халыкның мәдәнияте сакланган. Без алар белән горурланырга, сакларга тиешбез.

– Айдар, “Бәхет телим, шатлык телим” җыры клибында кавказ биюләрен, тау халкын күрсәттегез. Нинди максаттан?

– Бу җырның көе кавказ мотивында булгач, монда башка бию кую урынлы да түгел. Ә нигә көе кавказча дигәнгә килсәк, иҗатка, музыкага карата ниндидер чикләүләр булырга тиеш түгел дип саныйм. “Бәхет телим, шатлык телим” җырын мондый стильдә башкару – минем өчен яңалык. Мөмкинлек булганда, без аны эшләп карарга тиеш дип уйладым. Һәрбер җырым үзенчәлекле, аларны үзем аша үткәрәм, югары дәрәҗәдә башкарырга тырышам. Ә кайсысы яхшырак, көчлерәк икәнен халык үзе хәл итә.

– Кавказ халыклары вәкилләре ирекле, кыю. Алар татарларга үрнәк була аламы?

– Милләтләрне чагыштыру дөрес түгел дип саныйм. Чөнки һәр милләтнең үз тарихы, йоласы, теле, тәрбиясе. Нинди генә милләт вакиле булуга карамастан, горурланырлык яхшы эше булсын.

– Бәлки үзегез дә шундый кыю, ирек сөючән җырчы булырга телисездер?

– Чыннан да, минем иҗатымда ниндидер чикләүләр юк. Булдыра алганча төрле телләрдә, стильләрдә җырлап, яңалык кертә алсам, мин аны эшләячәкмен.

– Татар яшьләре арасында телне ничек пропагандалап була? Сез бу эштә катнашыр идегезме?

– Әлбәттә, әби-бабаларыбыздан калган телебезне, җырларыбызны, без саклап, киләсе буынга тапшырырга тиешбез. Кешегә барып: “Син татарча сөйләшергә тиеш”, дип әйтеп кенә пропаганда эшләү, әлбәттә, дөрес түгел. Аның өчен телне дөрес кулланып, шул ук иҗат, музыка аша дөрес реклама эшләргә кирәк. Мәсәлән, Казакъстанда, Америкада дусларым яши, алар телне, илне бик сагына, шуңа күрә, пропаганда буларак, шул чит илләргә дә татар җырларын, моңнарын алып барып җиткерү – минем өчен зур бәхет булыр иде.

– Филүс Каһиров Америкага концертлар белән барып кайтты, аннан Ришат Төхвәтуллин да Азатлыкка шулай ук чит илгә барырга теләген белдерде. Сездә андый планнар бармы?

Айдар Рәкыйпов

– Беренчедән, мин аларның икесе белән дә аралашып торам. Алар минем өчен үрнәк, акыллы, тәрбияле дуслар, чөнки әйткән сүзләре, теләкләре чын күңелдән. Икенчедән, татар җырчысының чит илгә барып концерт куюын горурлык дип саныйм, мин моңа бик шатмын. Әлбәттә, һәрбер җырчының андый теләге бардыр. Мин дә баш тартмыйм, бәлки без дә оештыра алырбыз. Әлегә алдан нидер ышандырасым килми. Ходай насыйп итсә, барырбыз.

– Әлегә экраннарга чыкмаган яңа клибыгызны татар авылында төшердегез, ни өчен анда, авыл темасы искерде түгелме?

– Авыл кешесе буларак, минем авыл тормышын, экраннар аша күрсәтү теләге бар иде. Бүгенге көндә авылларның әһәмияте бик зур, клип сюжеты аша без шуны да җиткерергә теләдек.

– Ул клипта татар кызлары нинди итеп сурәтләнәчәк, авыл кызлары образы әле дә элеккеге кебекме, әллә башкамы инде?

– Мин үзем ясалма әйбер яратмагач, һәр күренешнең кызлар тарафыннан да чынлап эшләнүен теләдем. Алар тирестә дә аунады, печән дә чапты, утын да ярды. Монда кызларның кирәк икән, иң авыр авыл эшен дә башкарганлыгын, кирәк икән, матур да була алганлыгын күрсәттек.

– Өчпочмак кебек милли атрибутлар күренде, алар нигә керде, миллилекне күрсәтүме бу, әллә хайпмы?

– Бар милли әйберләр дә авылдан килә, шуңа күрә аларның бу клипта булуын мөһим дип санадык.

– Яңа заман татар кызы образын клип аша тудырып була дип уйлыйсызмы?

– Төгәл генә әйтә алмыйм, без андый максат куймадык. Монда һәр кешенең күз аллавыннан, карашыннан тора. Татар кызы кем өчендер ул авылда сыер савып, ашарга пешереп, балалар караган, кемгәдер матурлык бәйгесендә җиңгән кыз булырга мөмкин. Без бу клипта гади авыл кызы образын гына күрсәттек.

– Җиде ел элек сез Гөлназ Шакирова белән дуэт буларак таныла башлаган идегез, клипларыгыз чыкты. Нигә кинәт сезнең дуэт таркалды, Гөлназ Шакирова белән ник аерылыштыгыз?

– Без Казан мәдәният һәм сәнгать университетында укып кына йөри идек. Клип төшерү тәкъдиме Гөлназ ягыннан булды. Анда ясалма, уйлап чыгарылган түгел, саф хисләр күрсәтелде, чын күңелдән төшерелде. Үзенчәлекле, яхшы сыйфатлы клип чыкты дип уйлыйм. Чөнки ул вакытта андый клиплар юк иде. Озынлыгын гына алсаң да, 5 минуттан артык. Ялгышмасам, аңа кадәр телевидениегә мондый озын клипларны алганнары булмаган. Ләкин безгә шалтыратып, клибыгыз ошады, дип ТНВ, “Мәйдан” каналлары сорап алды.

Хәзер кемне дә булса гаепләп утырасым килми, аерылышу яки кавышуны егет белән кыз үзе хәл итә. Шулай булды һәм шулай булырга тиеш булгандыр. Сәбәбе – безнең икебезнең арада гына, шунда калсын. Халыкның үз проблемнары да җитәрлек. Аңа продукт кирәк. Безнең яхшы продукт килеп чыкты, бу очракта экран артындагысын сөйләү – дөрес түгел дип саныйм.

– Әлеге клипка хәзер мөнәсәбәтегез нинди, дуэт таркалгач бетереп ату теләге тумыймы?

– Дөресен әйткәндә, кире кайта торган гадәтем юк, нәтиҗә ясыйм да, алга таба эшлим. Ә ул клипны һаман да “Мәйдан” каналы күрсәтә, ялгышмасам. Күргәндә, киресенчә, рәхәт тойгылар урап ала, күңелләр күтәрелеп китә, Чөнки Гөлназ минем беренче мәхәббәтем иде. Ул тормышымда, йөрәгемдә якты хатирә булды һәм шулай булып калачак та. Мин моңа бик шатмын.

– Сезне Ришат Төхвәтуллин белән чагыштыралар кайвакыт тавышларыгызны бутыйлар дип ишеттек. Бу чынмы?

– Ришатка килгәндә, без аның белән күптәнге дуслар, кечкенә чакта конкурсларда күрешә идек, шуннан бирле аралашабыз. Иҗатта ул миңа киңәшләрен бирә, һәрвакыт ярдәмгә әзер. Җырдан тыш безне волейбол бәйли, чөнки икебез дә бу спорт төрен яратабыз.

Тавышларга килсәк, чыннан да халыкның андый сүзләр язганы бар, “Сылукай” җыры чыккач, репетиция вакытында: “Нигә кеше җырын җырлыйсың?”, дип килеп әйткәннәре дә булды. Ләкин алар охшаш түгел дип уйлыйм, чөнки һәр кешегә үзенә генә хас моң, кабатланмас тавыш бирелә. Ә чагыштыру һәрвакытта да булган һәм булачак. Бәлки чагыштырмасалар, җырчылар башкалардан аерылып торырга тырышып, үз өсләрен яхшыртмаслар иде.

– Бу җәйдә Татарка исемле дөньякүләм популяр башкаручы Чаллы кызы “Ау” дигән татарча клип чыгарды, Лейна исемле Кукмара кызы да татарча-урысча клибы белән танылу алды, сез аларны карадыгызмы? Кайсы күбрәк ошады?

– Минем интернетка кереп, махсус кемнең нәрсә эшләгәнен, нинди клип төшергәнен карап утырганым юк. Миңа ул кызык та түгел, чөнки үз планнарым, эшләрем, максатларым бар, ләкин бу клипларның икесен дә күрдем. Мин ошады дип тә, ошамады дип тә әйтә алмыйм. Бармы? Бар.

– Лейна, мәсәлән, татарча-урысча, күбрәк урысча җырлап, бераз татар сүзләре кыстырып күп карау, тиз популярлык алырга тели дигән хис калмыймы сездә?

– Эстрадада мондый җырларга да урын бар дип уйлыйм. Безнең бер җирдә дә татар кешесе татарча гына, урыс кеше урысча гына җырларга тиеш дип язылмаган. Татар телен пропагандалау ягыннан карасак, бу дөрес адым, чөнки аны татар кешеләре генә түгел, интернетка кергәч, төрле телдә аралашучылар карый, тел белән дә кызыксына, хәтта кабатлап җырлап йөри башлый. Бу начар түгел.

– Мондый иҗат татар телен ваклый, боза, “солянка” (урысча-татарча) телгә әйләндерә дип уйламыйсызмы?

Айдар Рәкыйпов

– Телне “солянкага” дөрес тәрбия бирмәү әйләндерә. Татар кешесенең өйдә урысча сөйләшеп, балаларын шул телдә тәрбияләве, җәмгыятьтә урысча аралашуы, телне күберәк боза. Бүгенге көндә без сөйләшкән телне саклап, үзебезнең балаларга җиткерә алсак, бу бик яхшы булачак.

– Татар эстрадасында иҗат иреге бармы?

– Бар. Безнең эстрадада төрле стильләр, юнәлешләр бар. Ләкин шул иректә үзебезнең халык җырларын да онытмаска тиешбез, аларны саклап калу да безнең бурычыбыз. Аларны саклаган очракта гына, сәнгатебез үсәчәк. Элекке җырларның бит тирән мәгънәсе, тарихы бар. Башкорт халык җырларын җырлап үсеп, аларның тарихын өйрәнгәннән әйтәм. Әлеге вакытта җыр язу берни тормый. Миңа шундый җыр кирәк дип шалтыратасың да, язып бирәләр. Шуңа күрә, кайбер заманча җырлар бер көнлек, ә халык җырлары мәңгелек дип саныйм.

– Алга таба нинди стильдә үсәргә телисез? Урысча-татарча җырлар идезме?

– Стильга килгәндә, бер яктан, бездә татарча гына, татар мотивы белән җырларга кирәк, урысча җырларга кирәкми, диләр. Кайбер вакытта чит телдә җырласаң да көләләр. Ләкин вокалның нигезе Италиядән килә. Бу җырлар тавышны үстерә һәм музыка өлкәсендә белемне арттыра. Бүгенге көндә үземә чикләр куям дип әйтә алмыйм. Мин башка телләрдә дә җырлый алам. Шуңа күрә, булдыра алсам, кирәк булса, башка телдә дә җырлармын дип өметләнәм. Ләкин мин җырчы һөнәренә укыган кеше буларак, ул җырны аерым йә татар, йә урыс, йә башка телдә башкарачакмын.

Чит ил агентлыгы Azatliq.radiosi сайтыннан алынды

Запись Айдар Рәкыйпов: “Ул минем минем беренче мәхәббәтем иде… Аерылышуыбызның сәбәбе – …” [әңгәмә] впервые появилась Tatar Today - татар яңалыклары..

“Бал кортлары чагып бетерде, кызлар тирестә аунады”: җырчы Айдарга нинди клип төшерәләр? [видеорепортаж]

Гузель — Fri, 21 Jun 2019 08:19:18 +0000

//Tatar today// Гүзәл Гыйбадуллина//

Шушы көннәрдә җырчы Айдарның “Бәхетемне килә табасым” җырына клип төшерү эшләре бара. Съемкалар барган урыннарның берсендә без дә булып кайттык, Айдарның үзе, клипта катнашучылар, төшерүчеләр белән аралаштык. Бу күңелле мизгелләрне, эш барышының берничә өлешен, Айдар белән әңгәмәне безнең репортаждан карый аласыз.

Авылда клип төшерү – Айдарның күптәнге хыялы булган икән, шуңа күрә, бу сюжетка бик теләп ризалашкан. Ә сюжет буенча ул кызлар гына яшәгән авылга рәис булып кайта һәм аларны үзенә гашыйк итә. Бу кызлар арасында егет йөрәгендә урын өчен көрәш башлана.

Сүз уңаеннан, клипка кызлар эзләве хакында Айдар Инстаграмында хәбәр иткән иде. Шуңа күрә актрисаларның күбесен Айдар үзе сайлаган.

Клип кызыклы, көтелмәгән күренешләр белән баетылган. Аларны уйлап чыгаручылар, фото-видеога төшерү белән шөгыльләнүче – Alfavizion group төркеме егетләре.

Запись “Бал кортлары чагып бетерде, кызлар тирестә аунады”: җырчы Айдарга нинди клип төшерәләр? [видеорепортаж] впервые появилась Tatar Today - татар яңалыклары..

Бар да бик җитди: җырчы Айдар кызлар эзли [видео]

Гузель — Sun, 16 Jun 2019 08:55:19 +0000

//Tatar today//

Җырчы Айдар (Айдар Рәкыйпов) Инстаграмында клипта төшү өчен кызлар эзләве турында хәбәр итте. Аның сүзләренчә, “Бәхетемне килә табасым” җырына төшереләчәк клип өчен 19-30 яшьтәге, буе якынча 165-190 сантиметр булган, камера каршында үзләрен иркен тоткан кызлар чакырыла.

Әлеге клипка съемкалар 18-19 июньдә Казаннан ерак булмаган бер авылда үтәчәк. Катнашу өчен монда басып, Айдарның үзенә язарга була.

Исегезгә төшерәбез, әлеге җыр моңа кадәр татар телендә сөйләүче радиолардан гына ишетелсә, күп санлы сораулар буенча, шушы көннәрдә ул интернет челтәрләрендә дә чыкты һәм күпләрнең яраткан җырына әйләнергә өлгерде.

Запись Бар да бик җитди: җырчы Айдар кызлар эзли [видео] впервые появилась Tatar Today - татар яңалыклары..