Архивы алып баручы - Tatar Today - татар яңалыклары.

Айваз Садыров кызына нинди исем сайлаган?

Алсу Мансурова — Thu, 25 Feb 2021 06:44:53 +0000

Танылган алып баручы Айваз Садыров күптән түгел генә әти булган иде. Ул хатыны белән кызына нинди исем сайлаулары хакында хәбәр итте.

“Кызыбызга Газизә дип исем куштык. Гарәп исеме. Мәгънәсе – бик кадерле, кыйммәтле, газиз, хөрмәтле, данлы, көчле, сирәк, бәһале, изге? Шушы исемне сайлавыбызның берничә сәбәбе бар:

Беренчедән, исем мәгънәсе ягыннан да, яңгырашы ягыннан да икебезгә дә ошый иде.
Икенчедән, минем әтинең әбисе дә Газизә исемле булган.

Берничә исем арасында сайланганда сеңлем төш күргән: имеш кечкенә кызым безнең өйдә утыра икән. Кем соң син? – дип сорагач, «мин Газизә!» – дип җавап кайтарган сабый.

Балага исемне дә үзем кушасы килү теләге бар иде миндә. Шуңа күрә, өйгә кайткач, шартларын туры китереп, үзем башкарып чыктым әлеге йоланы, Аллага шөкер”, – дип язган Айваз.

Запись Айваз Садыров кызына нинди исем сайлаган? впервые появилась Tatar Today - татар яңалыклары..

“Башваткыч” тапшыруында яңа алып баручы! Кастингта кемнәр катнашты?

Лейла — Fri, 11 Sep 2020 13:12:41 +0000

Яңа сезонда «Татарстан Яңа Гасыр» каналының “Башваткыч” тапшыруы алып баручысы алышына. Әлеге тапшыру эфирда 2011 елдан бирле чыгып килә һәм шул вакыт эчендә тамашачы мәхәббәтен яуларга өлгерде. Аны Җәвит Шакиров, аннары Зөлфәт Зиннуров алып бардылар. Ә 3 октябрь экраннарда тамашачыны яңа алып баручы сәламлиячәк!

Кастингта катнашучылар татар дөньясында инде үз исемнәрен булдырган, татар телендә камил сөйләшә һәм алып бару тәҗрибәсе булган шәхесләр: Татарстанның халык артисты Фердинанд Сәлахов, театр һәм кино актеры Илфак Хафизов, Татарстанның атказанган артисты Азат Зарипов, җырчы Рафил Җәләлиев, теле-радио алып баручы Айваз Садыйров, алып баручы Ильмир Ямалов. Алар кастинг таләпләре буенча үзләренә бирелгән сценарий белән чыгыш ясадылар!

Рафил Җәләлиев, җырчы: “Теләк булганга килдем. “Мин “Башваткыч” тапшыруының алып баручысы булырга тиеш” дип әйтә алмыйм, ул бит читтән караганда тулаем “кәртинкә” килеп чыгарга тиеш. Үземне яхшы алып баручы дип саныймдыр, ә менә кадрдан караганда туры килмәскә мөмкинмен яки киресенчә, мин шушы кадр кешеседер.

“Башваткыч” алып баручысы алдан ук кемнәрнең кунак буласын белеп, өйдә әзерләнеп, һәрбер сорауга җавапны белеп, хәтта аны тулыландырып сөйләрлек дәрәҗәдә мәгълүмат туплап килергә тиеш дип уйлыйм. Ул әдәби, матур, милли тапшыру”.

Ильмир Ямалов, мәҗлесләр алып баручы: “Миңа 5 ел элек Зөлфәтнең сары пиджәге ошап киткән иде, шуңа бүген дә уңышлы булыр дип шулай киенеп килдем (көлә). Алып баручы булыр өчен, беренчедән, кешене яратырга, икенчедән, дикция яхшы булу һәм матур кыяфәткә ия булу кирәк дип саныйм”.

Азат Зарипов, Татарстанның атказанган артисты: “Мин үзем катнаштым “Башваткыч”та, беренчелекне бирдем. Откан блендер һаман да эшли әле (көлә). Нинди генә тапшыру алып барсаң да, син аның турында тәгаен белергә тиеш. Алайса әңгәмә корганда сорау да, җавап та бирә алмыйсың. Һәм алып баручы җор телле булырга тиеш дип уйлыйм”.

Айваз Садыйров, теле-радио алып баручы: “Башваткыч” тапшыруына минем күптән эләгәсе килеп йөри. Монда ике генә юл: тамашачы һәм катнашучы буларак. Программага алып баручы буларак эләгергә булдым. Шуңа менә бу сценарийны өйрәнеп, үземне тәкъдим итеп карасам, зәңгәр экраннардан алып баручы буларак сәлам юллармын дигән өмет бар”.

Исегезгә төшерәбез, “Башваткыч”ның яңа сезоны 3 октябрь башланып китәчәк! Яңа алып баручы, яңа кунаклар, яңа сораулар белән тамашачыларыбызны телеэкраннарда көтеп калабыз!

Чыганак: ТНВ

Запись “Башваткыч” тапшыруында яңа алып баручы! Кастингта кемнәр катнашты? впервые появилась Tatar Today - татар яңалыклары..

Алып баручы Гөлназ Сәфәрованың портреты буенча фикер алышалар: кемгә охшатканнар?

Гульназ Рашитова — Thu, 20 Aug 2020 09:32:10 +0000

//Татар Тудей// Татар Бүген//

Гөлназ Сәфәрова инстаграм битенә портретын куйган. «Миңа портрет ошаган сирәк очрак. Миңа охшаганмы?» — дип язган ул.

Алып баручыны кемгә генә түгел, нәрсәгә дә охшатканнар: «Сөембикә ханбикә шундый булгандыр», «Фиргавен кызы Клеопатра», «Тимер ханым», «Аватар», «Тэ 3000» модельле робот, «Бу бит җырчы Алсу», «Юлия Началова дип карадым», «Цилиндрдагы пешкәк кебек күренәсең».

Шагыйрә Сания Әхмәтҗанова: «Сөембикә диюләре ошады», — дип язган.

«Бу портретыгыз бик шәп чыккан. Ниндидер көч беркелә»

«Сезнең кабатланмас булуыгызны чагылдыра»

«Бик шәп булган», – дип язган инстачылар.

Портретны ошатмаучылар да бар.

View this post on Instagram

A post shared by Gulnaz Safarova (@saffarka)

Чыганак: Гөлназ Сәфәрова инстаграмыннан

Запись Алып баручы Гөлназ Сәфәрованың портреты буенча фикер алышалар: кемгә охшатканнар? впервые появилась Tatar Today - татар яңалыклары..

Альбина Апанаева: «Күпме акча бетергәнебезне санадым… Санамасам, яхшырак булыр иде»

kadria — Thu, 09 Jul 2020 12:56:05 +0000

Альбина Апанаеваның төгәл нинди булуын аңлап бетермәдем. Хәтта сорауларга төгәл итеп җавап бирмәде кебек. Әллә ялгыш берәр сүз әйтергә курыкты шунда. Әңгәмәбезнең башында ул миңа: «Интевьюлар бирергә яратмыйм. Бирсәм дә, бик сирәк», – диде. Шулай да укып карагыз әле.

«Мин — танылган җырчы һәм алып баручы»

Альбина, эстрадага аяк баскан елларыңны искә төшерик әле.

Тәәк, 2004 елда Мәдәният һәм сәнгать институтын тәмамлагач, татар эстрадасы сәхнәсендә әкренләп таныла башладым. Ул елларда «Барс Рекордс» һәм «Оскар рекордс» бар иде. Мин «Оскар рекордс»та идем.

Менә шушы «Барс» белән «Оскар» турында тулырак сөйләшикче. Белүемчә, башта «Барс рекордс» бар иде. Соңыннан «Оскар»ы барлыкка килгәч, сине шунда «җибәрәләр».

Мин менә шушы нечкәлекләр турында бер дә уйламый идем. Хәзер дә анда нәрсә булганына төшенәсем килми. Бәлки сиңа журналист буларак кызыктыр ул, әмма миңа бер дә кызык түгел. Бүлделәр, димәк, шулай кирәк булган. Минем өчен җырлау, иҗат итү беренче урында тора иде. Җитәкчелек эшчәнлеге белән мин бер дә кызыксынмый идем, хәзер дә кызыксынмыйм.

«Чын дустым» җыры «Оскар рекордс»та барлыкка килдеме?

Әйе, «Барс рекордс» аны башта чыгармады.

Нишләп чыгармадылар?

Әйтә алмыйм, искә дә төшерәсем килми. Соңыннан әлеге җыр эфирга чыкты, хит-парадка эләкте. Һәм бу җыр танылды.

Һәм башка танылган җырың булмады да бугай.

Мин әлеге җыр белән чыктым, аны һаман да беләләр. Популяр җыр — җиңел җыр булырга тиеш. Көе истә калса, сүзләре җиңел булса, җыр тиз арада таныла. Оскар Усмановка, Гөлсәрвәргә зур рәхмәт. Алар миңа гомерлек хит язып бирде.

Мин сорауны башкача куйган идем.

Татар эстрадасында үз урынымны тиз яуламадым. Соңыннан менә шушы җыр чыккач кына, радиоларда ротация баргач, мин танылып киттем.

Әйдә соравымны башкача куям. Син үзеңне популяр дип саныйсыңмы?

Әйе, мин — танылган җырчы һәм алып баручы.

Әллә ни «сольный» концертлар белән йөрмисең бугай?

Хәзер беркем дә концертлар куймый. Мине башкалар белән чагыштырырга кирәкми. Кемдер көн саен концерт бирергә әзер. Мин үзем гастрольләргә чыгарга яратам. Әлки районында бер концерттан соң бик озак вакыт автограф таратуымны хәтерлим. Популяр булганмын, димәк.

«Популяр булган идем» белән «мин хәзер дә популяр» дигән җөмләләр аерыла. Кайсы җырларың тагын популяр? «Гашыйклар җыры»?

Әйе, ул җыр бар иде. Аны да популяр түгел дип әйтеп булмый. Вакыт үзгәрә, хәзер мин ир хатыны, балам бар. Шулай ук музыка мәктәбендә дә укытам. Мин холкым буенча өй кешесе. Миңа әле кырык та юк бит. Һәр җырчының үз вакыты. Әле барысы да алда, Алинә!

«Мин артык тыйнак кешедер»

2011 елда син «Turk Vision» фестивалендә катнашкан идең. «Китәм, димә» җыры белән бугай? Менә бит җырлар бер-бер артлы чыга.

Әйе! Әлмәттә булачак концертыма әзерләнгәндә, миңа әлеге фестивальгә чакырылуым турында әйттеләр. Нәкъ менә шушы җыр белән чакырдылар. Әле һаман да анда баруымны хәтерлим. Анда барысы да «Евровидение» стилендә үтә. Бу җырны без төрек телендә дә җырлаган идек. Хәтта кинода төшәргә дә тәкъдим иткәннәр иде.

5-6 ел элек банкетларда син 15 мең эшләгәнсең. Хәзер ничегрәк?

Соңгы елларда барысы да үз урынында тора. Үзгәрешләр юк. Хәзер дә бәяләр әллә ни ерак китмәгән.

Татар эстрадасында синең җырчы буларак кадереңне белеп бетермәгәннәр дип уйламыйсыңмы? Яисә син үзең ахырына кадәр «басып бетермәдеңме»?

Авыр сорау. Бәлки мин үзем артык тыйнак, оялчан кешедер. Әмма үземне ялкау дип әйтә алыйм.

Илһам Шакиров сине «Шпанаева» дип йөрткән булган икән, әйеме?!

Әйе, кайдан таптың аны? Без Илһам абый белән бергә концертта катнашкан идек. Илһам абый мине гел мактый иде, сиңа җырларга кирәк, дия иде. Мин бит башка төрле идем. «Шпанаева» дип көлә генә иде ул, үпкәләтәм, дип әйтми иде. Беләсеңме нәрсә кызганыч, Илһам абый белән уртак фотоларыбыз юк. Алар мәңгелек кебек иде…

«Шпана» кебек подъезд төпләрендә эчеп, тартып йөргәнең булдымы?

Юк, мине күп тапкыр тартырга өйрәтеп карадылар. Мин сигарет исен яратмыйм. Ирем дә тартмый. Әти-әниләр миңа һәм апама яхшы тәрбия биргән. Аларга мең рәхмәт!

«Иремнең акчасына гына яшибез, дип әйтәсем килми»

Кияүгә 32 яшеңдә чыктың. Бу соң түгелме?

Юк, бер дә соң түгел дип уйлыйм. Бал бозылмый бит ул.

Ирең Рафаэль белән син 28-29 яшьтә таныштың. Аңа кадәр йөргән егетләрең булдымы?

Булды, әлбәттә. Әмма мин ачуланышып, талашып йөрми идем. Хәзер хәтта ул вакытта булган егетләр белән нигә аерылышуымны искә дә төшерә алмыйм. Мин беркайчан да нәрсәдер эшләгәнемә үкенмим.

Синең турында иреннән аерылган, диләр.

Моны мин дә ишеттем, шулай диләр шул. Әмма без ирем Рафаэль белән сигез ел бергә торабыз, Аллаһка шөкер. Мин шәхси тормышымнан фотоларымны социаль челтәрләргә дә куймыйм. Ирем бик тыныч кеше, ул кеше күп җыелган бәйрәмнәрне яратмый. Безнең кызыбыз бар, быел Миралия беренче сыйныфка бара, Аллаһ боерса.

Ирең гаиләгезне акча ягыннан тәэмин итәме?

Без икебез дә эшлибез. Иремнең акчасына гына яшибез, дип әйтәсем килми. Әмма мин берсендә ай эчендә күпме акча бетергәнебезне санаган идем. Санамасам яхшырак булыр иде, кәефем төшмәс иде. Акча күп китә, ипотекага да, машинага да җиткерергә кирәк.

Интервьюларыңның берсендә син туй көнең турында сөйләгәнсең. Ирең сине танымаган булганмы соң?!

Әйе, шундый кызык булган иде ул. Хәзер туй күлмәген кидем дә, шушы туй күлмәкләре сату салоныннан килеп алсын, дидем. Манекен урынына баскач, ул мине танымады, күз алдыңа китерәсеңме? Туебыз Уфада үтте. Күңелле иде дә соң! Көне нәкъ безнең өчен җылы иде.

Тагын бәбиләр кирәктер?

Кирәк! Киләсе елга мине декрет ялына җибәрерсез, Аллаһ боерса.

«Әтине югалттык»

Германиядә яшәвегезне ишетеп беләм.

Тумышым белән мин Чаллыдан. Миңа биш яшь тулгач, без гаиләм белән Германиягә киттек. Әтием хәрби кеше иде һәм аны чакырып алдылар. Мин шунда укыдым һәм 1991 елларда без кире Чаллыга кайттык.

Германиядә рәхәт идеме?

Рәхәт иде! Төрле курчаклар, тәмле-тәмле шоколадлар… Ул елларны Россиягә алар әллә ни күп алып кайтылмый иде. Анда яшәеш тә җиңелрәк. Немецлар белән аралаша идек дип әйтә алмыйм. Әмма Германиядә сугышның булуын теләмәгән гаиләдә үсүчеләр дә бар.

Мин көчле, дидең. Яшүсмер вакытыңда әтиеңне югалткансың. Болар үзара бәйлеме?

1995 елда без әтине югалттык. Аның йөрәге туктады… Мәңгегә. Әтине югалткач, мин үсеп киттем, көчле булдым. Әтигә багышлап шигырьләр яза идем. Ул үлгәч, бөтен яшәеш үзгәрде. Әтиемнең урыны оҗмах түрендә булсын!

Сине үпкәләтү җиңелме?

Мин һәрвакыт үземә: «Синең тормышыңа кемдер килгән икән, димәк, ул болай гына килмәгән», — дим. Әгәр миңа берәр начарлык эшлиләр икән, мин үзем өчен сүз әйтә алам. Әмма үзем кеше белән беркайчан да талашмыйм. Татар эстрадасында да мин барысы белән дә нормаль мөнәсәбәттә. Әмма миңа карата гаделсезлек кылынса, бик борчылам һәм хәтта еламсырап та алырга мөмкинмен.

Дилә Нигъмәтуллина белән сез бик яхшы дуслар.

Әйе, без инде институт бусагасыннан бирле бергә. Хәтта укыганда вакытлыча бергә яшәдек. Күпләр безне төрле, ди, әмма миңа аның белән рәхәт. Аңа шушы еллар дәвамында безнең арада булган дуслык өчен рәхмәт. Безнең арада беркайчан да җырчылар арасында барлыкка килә торган конкуренция булмады. Без, киресенчә, бер-беребезгә һәрвакыт ярдәм итә идек һәм ярдәм итәбез дә.

«Кибеттә сатучы булып эшли алмас идем»

Карантин вакытында ипотека түләү авыр булмадымы?

Әйткәнемчә, мин музыка мәктәбендә эшлим, шуңа күрә акчасыз калмадык, Аллаһка шөкер. Язмыш шундый кискен борылышлар куя инде ул. Шуңа һәрвакыт бары тик үзеңә генә ышанырга кирәк. Кем уйлаган җырчылар концерт куймас дип?!

Әгәр язмыш син сәхнәдән югалырлык берәр кискен борылыш ясаса, башка эшкә күчә алыр идеңме?

Җырчылар хәзер акча эшли алмыйм, шуңа күрә күбесе төрле эшләр эзли. Кемдер төзелешкә китте, кемдер башка эш белән шөгыльләнә. Гаиләне акча белән тәэмин итеп торырга кирәк бит. Мин дә башка эштә эшләр идем, әмма кибеттә сатучы булып эшли алмас идем. Бәлки массаж ясарга өйрәнер идем яисә тортлар пешерер идем.

Бәтәч, «сетевой маркетинг»та сатучы булып эшләмисең әллә?..

Әлеге өлкәдә мин әле бер ай гына эшлим. Аңа кадәр ул продуктны үзем куллана идем. Хәзер «сетевой маркетинг» та эшләү модага кереп китте. Күпләр безне кеше алдауда гаепли, ул алай түгел. Кайдадыр ишеткәнне сөйләргә кирәкми. Кулланып карагач кына үз фикереңне әйтергә кирәк.

Концертларның берсендә сине сәхнәгә чыгарганда алып баручы: «Ул җырлаганда, мулла азан әйтүеннән туктый, аның җыры радиодан яңгыраса, роддомда бала тапмый торалар», — дип синең җырлавыңны сандугачныкына тиңләгән иде. Билгеле бер шаярту. Әмма Арчадагы «сольный» концертыңда син җырлаганда бер хезмәткәрнең эпилепсия авыруы башланып егылган икән…

Нинди концертта мине шулай чыгардылар икән, хәтерләмим. Ә хезмәткәрнең хәле Арчадагы иң беренче үз концертымда начарланган иде. Мин җырлаганда нәрсәдер дөбер-шатыр килеп төште. Миңа башта нәрсә булуын әйтмәделәр. Ул абзый егылгач, ашыгыч ярдәм машинасын чакырып, аңа ярдәм күрсәткәннәр. Барысы да яхшы тәмамланды, Аллаһка шөкер.

Илһам Шакиров та сине кайчандыр мактаган булган, Альбина. Син ахырына кадәр «дожать» итеп бетереп, барлык мөмкинлекләреңне кулланмагансың, әйеме?

Алинәкәй, мин бит пенсиягә китмим. Әле барысы да булачак. Мин сәхнәдән китәргә җыенмыйм! Син шулай уйлыйсыңмы?

Бәлки син көннәр-төннәр буе гастрольләрдә йөрергә теләмәгәнсеңдер дә?

Юк, андый теләгем беркайчан да булмады. Алай йөрсәң, шәхси тормышыңа, башка эшләргә вакытың калмый бит. Мин күп очракта бер эш белән генә шөгыльләнүдән арыйм.

Кеше фикеренә ничек карыйсың? «Китәм, димә» җырының клибыннан соң сүктеләр ич сине.

Һәр кешенең үз фикере була. Бәлки ишетергә кирәктер ул кеше фикерен, әмма бары тик шушы фикер белән генә яшәргә кирәкми. Ул клипның булуына мин бер дә үкенмим. Әле, Аллаһ теләсә, оныгыма да күрсәтәчәкмен мин аны. Һәм үземнең кайчандыр шундый яшь булуыма сөенәчәкмен.

Яшь чагыңда, әле сәхнәгә күтәрелгәндә генә, бай абзыйларың акча тәкъдим итәләр идеме?

Төрлесе булды инде. Әмма мин беркайчан да ризалашмый идем. Бәлки тыйнак булганмындыр, алар мине кызыксындырмый иде.

Әгәр тыйнаклыгыңны онытып торсаң, хәзер танылган йолдыз булыр идең.

Бәлки, ләкин, әйткәнемчә, мин беркайчан да бернәрсәгә дә үкенмим. «Эх, менә шулай эшләр идем», — дип уйланып утырганым юк. Тагын бер әйтәм, һәр нәрсәнең үз вакыты.

Альбина Апанаева 1981 елның 21 маенда Яр Чаллы шәһәрендә туа. Бүгенге көнне аның өч альбомы бар: "Барыбер кадерле" (2005 ел); "Сине яратуларым..." (2007 ел); "Синең мәхәббәтең" (2013 ел). Альбина Апанаеваның "Чун дустым", "Гашыйклар җыры", "Китәм, димә" җырлары популяр. Альбина 2012 елда Рафаэль исемле Башкортстан егетенә кияүгә чыккан. Бүген аларның Миралия исемле кызлары бар.

Автор: Алинә Айдарова

Чыганак: Интертат

Запись Альбина Апанаева: «Күпме акча бетергәнебезне санадым… Санамасам, яхшырак булыр иде» впервые появилась Tatar Today - татар яңалыклары..

Алмаз Мирзаянов: “Алар хәзер барлык артистта да охшаш, үзләре шуңа шаккатмыймы икән?!”

Alfia — Thu, 07 Nov 2019 07:13:54 +0000

Шигърият белән авыл хуҗалыгын да үстерергә мөмкин. Алып баручы, җырчы Алмаз Мирзаянов шундый фикердә (хәер, ул үзен җырчы дип санамый). Аның концертларына килгән кешеләрнең, бигрәк тә ир-атларның, күңелләрендә туган якка, туган туфракка булган мәхәббәтләре уяна икән. Алмаз Мирзаянов белән шигърият, сәхнәдәге ясалма дуслык, Илфак Шиһапов турында сөйләштек.

– Алмаз, концертларыңда кешеләрнең нинди “авырткан ноктасы”на басам дип уйлыйсың?

– Шау-гөр, дөбер-дөбер килеп торган концертлардан соң, бераз ял итә торган тамаша да кирәктер инде. Безнең концертка тамашачы элегрәк караган тамашалардан соң күңелләрендә калган яраларын төзәтер өчен килә. Бездә төтеннәр дә,күзгә бәрә торган утлар да, дөбер-шатыр музыка да юк, кычкырмыйбыз да.Шуңа күрә генә дә без әйбәт дип әйтмим. Бәлки, кешенең күңел сандыгында яшеренгән, рәхәтлек китергән мизгелләрне искә төшерү дә тамашачыны безнең концертка тартып китерәдер. Аннан, кеше шигъриятне сагынган, моңа мин бик сөенәм. Концертларга әбиләр дә, кечкенә балалар да килә. Яшьләр, ир-егетләр дә шигъриятнең асылын аңлап тыңлый. Бигрәк тә туган җир, туган туфрак тематикасына багышланганнарын. Без бит бик уңдырышлы җирдә яшибез. Шул җирләрнең кайберләре кулланылышта түгел. Бәлки, менә шушы егетләр, шушы шигырьләр белән рухланып китеп, әлеге җирләрне кулланышка кертер һәм безнең Татарстаныбыз тагын да чәчәк атар дигән уйда йөрим әле. Ир-атларның концерттан соң килеп? “күңел тулды” дип әйткәннәре бар. Максатым кешене елату түгел, тик син иҗатың белән кешенең күңеленә үтеп керә алгансың икән, бу – иң зур бәянең берсе.

– Концерт программасына шигырьләрне кем сайлый?

– Күңел. Шигырьне укыган чакта үземнең дә тамакка төер утыра икән, димәк, мин аны тамашачыга җиткерә алырмын шикелле. Авторына карап кына да сайламыйм. Шунысы куандыра: мин Әнгам Атнабаев шигырьләрен сөйли башлагач, бүтән артистлар да аңа игътибар итте, җитәкчеләр арасында да аның иҗатына тартылучылар бар икән. Теләчегә кайткач, китапханәгә кереп, Атнабаев китабын сораган идем, “җитәкче урынында эшләгән кеше алып чыгып китте әле” диделәр. Атнабаев кына популяр булып китмәсен, иҗатын халыкка күбрәк танытырга кирәк булган башка шагыйрьләребез дә бар әле. Нияз Акмал, Расыйх Шамский, Шәмсия Җиһангирова, Хәсән Туфан, Гөлнара һәм Эльмира Җәлиловалар – аларның шигъриятенә дә битараф түгелмен. Яңа концерт программасында Мөхәммәт Мәһдиевнең бик танылган әсәреннән өзек сөйләргә җыенам.

– Эстрадада нинди күренешләр ачуыңны чыгара?

– Сәхнәдә артистның сөйләме бик зур роль уйный. Тамашачы аны бит артист булуы өчен генә түгел, кеше буларак та ярата. Ә кеше буларак үзеңне күрсәтү сөйләм аша башкарыла. Мәсәлән, җырчылар: “Бу җырны бүген сезнең өчен махсус алып килдем”, – ди. Әйтерсең ул аны, иртән торып үтүкләгән, җилләтеп алган да, чемоданына тыгып, көчкә күтәреп алып килгән кебек. Артистлар үз фикерен әйтсен, тапталган, кемдер кулланган сүзләр сөйләмәсен иде. Мин акыл өйрәтүче түгел, әмма үземнең фикеремне әйтәм. Сәхнәгә урамда басып торган шикелле сөйләшүләрне алып менүне кызык дип табалармы инде – белмим. Чыктың – фикереңне әйт, юк икән – китаплар укы. Аннан, сәхнә бизәлеше... Алар хәзер барлык артистта да охшаш, үзләре шуңа шаккатмыймы икән?! Бөтенесендә дә – кыйбатлы утлар, экраннар, һәм менә шул җиһазлар, бернинди режиссурасыз, болай гына кулланыла кебек. Бик сирәк артистларда гына ул кыйммәтле аппаратура үз урынында һәм үз ролен үти. Ут-экраннар кирәк, әлбәттә, әмма аларны дөрес итеп куллана белергә дә кирәк бит әле. Сүз дә юк, бәлки, бу минем эчке көнчелегемдер, чөнки миндә андый утлар, экраннар юк. Әмма, Аллаһка шөкер, булганы белән дә тырышабыз әле.

– Көнләшү димәктән, эстрадада дуслыкка урын бармы? Хәзер бит барлык артистлар да бер-берсенә “брат” та “энекәш” дип кенә тора. Бу ясалмалык түгелме?

– Ясалмалык. “Брат” дип йөрүчеләр миңа беркем түгел. Бер өлкәдә эшләгәч, сәхнәгә чыкканчы ул синең “брат”ың була да, чыгып киткәч, бүтәне белән туганлаша. Миңа андыйлар белән дуслык кирәк түгел. Җыелма “солянка”ларда чыгыш ясауны бик ошатмыйм. Тизрәк барып, үзем чыгыш ясаган өлештә генә килеп кереп, җырлап, кире кайтып китәргә мөмкинлегем булса, шулай гына эшләр идем. Моны эреләнү дип кабул итәргә мөмкиннәр, әмма мин элек тә шундый идем. Бүген таяна алырлык, ышанычлы дус дип Рифат Зариповны, Илсөя Бәдретдинованы атый алам. Иң якын дустым – хатыным Зөлфирә Шәйдуллина (көлә).

– Хәзер социаль челтәрләр заманы. Син үзеңне блогер дип саныйсыңмы? Социаль челтәрләраша гына да акча эшләп була бит.

– Юк, санамый. Блогерлыкка тәүлекнең 24 сәгатен багышларга кирәк бит. Безгә – артист халкына шул ягы отышлы: бер концерт программасы белән елбуе йөрибез. Ә блогерга көн саен яңа программа төзергә кирәк. Блогер бер көнгә алдарак атлап барырга тиеш. Рекламага килгәндә, соңгы атнада миңа бик күп тәкъдимнәр килде. Моңа кадәр мин аларны җентекләп укып та тормый идем. Мактанып әйтүем түгел, мин менә болайрак эшлим. Миңа,“бу кешене видео аша котла әле”, дип тәкъдимнәр килә. Төшерәм, шул кешегә акча күчерү реквизитларын җибәрәм, видео ошаса, күпме булдыра аласыз, шул кадәр акча җибәрегез, дим. Ә бу реквизитлар минеке түгел. Бүген авыру балалар өчен акча җыю счетлары бик күп бит. Мин шуларның берсен алам да җибәрәм. Рекламаны әнә шундый максат белән дә кулланып була икән.Минем шәхси сәхифәм үзем өчен акча эшләү урыны түгел.

– Синең иҗатың турында сөйләшкәндә газетабызның дусты, мәрхүм Илфак Шиһапов турында да әйтми калу мөмкин түгел. “Түзәйөрәк сагышка” җыры – аның иҗат җимеше. Бу җыр белән танылып киттең дип әйтү дә ялгыш булмас…

– Илфак абый дигәч, капылт итеп бер вакыйга искә төште әле. Төш күрдем. Илфак абый “ВКонтакте”да яза, тавыш яздырып җибәргән. Исән икән, үлеме чын булмаган. “Белдем бит мин моны!” – дим, сөенәм, кешегә сөйлисе килә! Каяндыр кызы Зәринә килеп чыкты да, аңа бу хакта сөйләп бирдем. Аннан “ВКонтакте”дагы сәхифәмдә Илфак абыйдан килгән хатларны ачып кына җибәрүем булды, ул яздырып җибәргән хатларын “сөртеп” ташлады. Шуннан уянып киттем... Илфак абый турында мәрхүм дип әйтеп булмый. Ул яши. Аны күзәтеп, тәмәке тартып утыруын гына карап тору да рәхәт иде. Илфак абый бер эшне дә азагына кадәр башкармый иде: һәр яңа әйбергә тотына да, монысын эшләп карый, тегесенә алына. Бәлки, ул гомеренең кыскалыгын алдан сизеп, безгә юл күрсәтеп калдырырга теләгәндер. Аның җырларын башкарырга рөхсәт бирделәр, моның өчен балаларына рәхмәт. Бу сезонда Илфак абыйның язып бетермәгән бер куплетлы җырын башкарырга ният бар.

Чулпан Гарифуллина

Мәгълүмат: vatantat.ru

Запись Алмаз Мирзаянов: “Алар хәзер барлык артистта да охшаш, үзләре шуңа шаккатмыймы икән?!” впервые появилась Tatar Today - татар яңалыклары..

Танылган алып баручы Ләйсән Дусаева егетен җинаятьтә гаепли

Алина — Tue, 23 Oct 2018 15:25:10 +0000

Камал театрының элекеге актрисасы, «Эфир», ТНВ, «МИР» и «Все ТВ» телеканалларының алып баручысы һәм корреспонденты Ләйсән Дусаева егетен җинаятьтә гаепләп полициягә гариза яза.

Ләйсән тумышы белән Казаннан булган татар кызы. Ул 2016 елдан башлап “Звезда» телеканалында «Доброе утро” программасын алып бара. Ул үзенең элеккеге егетенә 45 мең сум акча биреп тора һәм аннан расписка алмый. Ир төрле сәбәпләр табып, бурычын кайтарырга ашыкмый. Нәтиҗәдә Ләйсән Дусаева полициягә ярдәм сорап мөрәҗәгать итә. Әлеге фактны тикшерү бара, дип хәбәр итә “Вести КАМАЗА”.

Запись Танылган алып баручы Ләйсән Дусаева егетен җинаятьтә гаепли впервые появилась Tatar Today - татар яңалыклары..