Архивы Вил Усманов - Tatar Today - татар яңалыклары.

Вил Усманов: “Миңа аяк чалалар”

Р Л — Sat, 03 May 2025 11:59:37 +0000

Җырчы һәм көрәшче Вил Усманов “Ватаным Татарстан”га интервьюсында татар халкының көнчелек сыйфаты турында сөйләгән.

Вил Усманов эстрадада мактаулы исемнәрне аз билгеле җырчыларга да бирүгә каршы булмавын әйткән.

“Читтән караганда бөтен нәрсә ялтырый. Эчке кухнясын белгәннәр исә анда уңышка ирешер, димәк, ялтырар өчен күпме тир түгелгәнен белә. «Атказанган» алганы да, «халык артисты» исемен яулаганы да – шул үзебезнең татар егет-кызлары инде алар. Яхшымы ул, начармы – татарча җырлый, шушы сәнгатьтә кайный…

Әгәр безнең халыктагы көнчелекнең берничә процентын гына киметcәң, бездән дә яхшырак милләт булмас иде.

Көрәшне генә алыйк. Мин көрәшә башлаганда кайчандыр машина алырмын дип күз алдына да китермәгән идем. Көрәштем, чөнки ул миңа ошый иде. Һәр көнемне тренировкада үткәрдем. Кемнәрдер «салып», тәмәке тартып йөргәндә, мин һәр көнне шөгыльләндем. Әле ул елларда машина бүләк итү юк иде, көнкүреш техникасы, келәм бүләк иттеләр. Туксанынчы елларда машина бүләк итү китте. Бер машина алам, икенчене, шуннан көрәштермәскә, кертмәскә тырыша башлыйлар. Мин бит шуның белән яшим, шул ук көрәшне үстерәм, шушы җирне танытам, ә миңа аяк чалалар.

Миңа гына түгел, минем ишеләр күп анда. Хәзер дә шул әйбер бара. Менә шунысы күңелгә тия. Шул ук татарлар бит! Егетләрне мактар урынына, җитте аңа, дип кычкыралар. Кызганыч, сәнгатьтә дә шул ук хәл”.

Күпме машина откананын сорагач, ул “Бер унлап булды бугай инде. Зур машиналар түгел инде алар. «Ока», «шестерка»лар… Берничә мотоцикл, бер елны трактор отканым булды. Булды инде, булмады түгел. Әмма ул вакытта, берничә ел гына шулай булачагын аңламыйсың әле. Көрәшнең вакыты кыска”, – дип җавап биргән.

ЧЫГАНАК: https://intertat.tatar/news/sombel-zahidullina-minem-gena-parym-yuk-5872604

ТАТАР ТУДЕЙ ТЕЛЕГРАМ КАНАЛЫ - https://t.me/tatartoday

Запись Вил Усманов: “Миңа аяк чалалар” впервые появилась Tatar Today - татар яңалыклары..

“Шуннан да зур бәхет юк кебек”: Вил Усманов тормышында зур сөенеч бар – Президентка рәхмәт укый

Лэйсирэ — Fri, 22 Mar 2019 11:39:41 +0000

Җырчы Вил Усманов “Татарстан Республикасы халык артисты” мактаулы исеменә лаек булды. Ул бүген Казан Кремлендә ТР Дәүләт Советы Рәисе Фәрит Мөхәммәтшинның хезмәт алдынгыларына дәүләт бүләкләре тапшыру тантанасында бүләкләнде.

“Бик дулкынландыргыч тантана булды бу. Халык артисты исемен алу ул бер, аны әле лаеклы йөртү дә кирәк. Ел саен иҗатым белән бу исемгә тап төшерми, матур җырлар белән киләчәктә дә халыкка хезмәт итәргә язсын”, – дип җырчы “Татар-информ” хәбәрчесенә тәэсирләре белән уртаклашты.

Вил Усманов кайчан да булса халык җырчысы исеменә лаек булуын көткәнен яшермәде. “Нинди солдат генерал булырга хыялланмый дигән әйтем бар бит. Атказанган артист исеме булгач, шундый хыял барлыкка килә башлады инде. Президентыбызга шундый ышаныч күрсәтелгән өчен рәхмәт”, – диде.

“Иң уңышлы җырларымнан, соңгы елларда “Ак чәчәкләр” фильмына язылган көй өчен бик рәхмәтләр җиткерәләр. “Ике урам арасы”, “Юлымда синең эзләрең, суымда синең шәүлә” җырын инде кая барып төшсәм дә, 30 елдан артык җырлыйлар. “Сез һаман бергә икән” дә үзем иҗат иткән җыр. Концертта зал да минем белән җырлашып утыра, шуннан да зур бәхет юк кебек”, – диде Вил Усманов.

Җырчы бүген дә көйләр иҗат итү белән шөгыльләнгәнен әйтте. “Җырлар туа, Аллага шөкер. Яшьләр дә сорый. Киләчәктә композитор буларак иҗат кичәләремне үткәрермен дигән хыяллар белән дә яшибез”, – диде. Бүгенге көндә Вил Усманов 14 апрельдә филармониядә узачак концертына әзерлек алып бара.

Төп фото: соцсети

Запись “Шуннан да зур бәхет юк кебек”: Вил Усманов тормышында зур сөенеч бар – Президентка рәхмәт укый впервые появилась Tatar Today - татар яңалыклары..

Филармониядә үткән “Казан кичләре” концертында ЧП була, аздан гына янгын чыкмый кала [видео]

Эльвира Шакирова — Fri, 26 May 2017 10:56:54 +0000

Кичә Г.Тукай исемендәге татар дәүләт филармониясе залында “Казан кичләре” концерты барганда аппаратура сафтан чыгып, сәхнәдә тавыш һәм ут сүнгән. Бу хакта концертта булган тамашачылар җиткерде. Intertat.ru электрон газетасы концертлар залында концерт өзелү сәбәпләрен белеште.

Сәхнәдә ут сүнгәч, артистларның үз тавышын ишеттек – татар тамашачысы

“Филармония залында бераз форс-мажор булды. Концерт азагына таба – Вил Усманов җырлаганда ут сүнде. Без башта шулай уйланылган дип белдек, аннары аппаратура белән проблема булганын аңладык. Мондый хәлнең бер яхшы ягы бар – эстрада артистларының тере тавыш белән баянга җырлаганын ишеттек”, – ди тамашачы Ләйсән Сибгатуллина.

Үзе дә мәдәният хезмәткәре булган, татар концертларына бик яратып йөргән Гөлфия Сафина Татарстанның көзгесе булган филармония концертлар залында XXI гасырда шулай янып чыгарлык иске аппаратура булуына аптырый. “Болай булырга тиеш түгел, хөкүмәт ярдәме белән яхшырак аппаратура куелсын иде”, – ди. Ул артистларның югалып калмавын, Вил Усмановның да, Динә һәм Рафаэль Латыйповларның да гармун белән матур гына җырлап чыгуын әйтә.
Динә һәм Рафаэль Латыйповларны телетапшыруга төшерә алмый калдык – “Мәйдан” каналы җитәкчелеге

“Мәйдан” каналы директоры Дамир Дәүләтшин тамаша барганда аппаратура белән проблема килеп чыгуын раслап, филармониянең концертлар залында “Казан кичләре” проектының сезон ябылу концерты булуын әйтте. “Онлайн-трансляция булса, бөтенләй уңайсыз хәлдә каласы идек, бу проектта без концертны яздырып алып, бүлеп дүрт тапшыру эшлибез. Өч тапшырулык материал төшерелде, бу проблема аркасында дүртенчесен эшләп өлгерә алмадык”, – диде ул. Шулай итеп, концертның “кадагы” булырга тиешле Динә һәм Рафаэль Латыйповлар, махсус шушы тапшыру өчен әзерләнеп килсәләр дә, телевиениегә яздырыла алмый калганнар.
Ярый әле янгын чыкмады – Филармония җитәкчелеге

“Әйе, кичә ЧП булды шул – сәхнә концерт вакытында утсыз, тавышсыз калды, – дип килеп чыккан хәлгә ачыклык кертте Г.Тукай исемендәге Татар дәүләт филармониясе директоры Кадим Нуруллин. – Биш ел элек сатып алынган Кытай аппаратурасы белән эшлибез. Ул чакта яхшырагына акча җитмәде. Ул аппаратура бер-ике сезоннан артыкка чыдамый инде, без биш сезон эшләттек. Ярый әле, янгын чыкмады”.

Бу филармониядә беренче тапкыр булган хәл түгел. Быел март аенда аппаратура янып, Данир Сабиров концертын күчерергә дә туры килгән булган.

Филармониянең концертлар залын яхшы сыйфатлы яңа аппаратура белән тәэмин итү өчен 1 млн доллар акча кирәк, ди. Филармония җитәкчелеге бу проблеманы хәл итү өчен Татарстан хөкүмәтенә мөрәҗәгать итәргә җыена.

Рузилә МӨХӘММӘТОВА

Запись Филармониядә үткән “Казан кичләре” концертында ЧП була, аздан гына янгын чыкмый кала [видео] впервые появилась Tatar Today - татар яңалыклары..