Кем дус, кем дошман…

– Винарис, эстрадада дуслык юк дип әйтәләр. Тегесе моның белән сөйләшми, бу – тегесе белән. Сезнең бүтән бизнес, бүтән өлкә дә бар. Чагыштырып карый аласызмы – эстрада ул елан оясымы?

– Ул – гаилә. Гаиләдә дә кемдер әрләшә, кемдер кемнедер ярата. Мин барысы белән дә дус. Бар бер-ике кеше, мин әйтмим. Бар иде бер кеше… Мин аны барыбер минем дошман димим. Хәзер без дошманнар түгел. Аралашмасак та, күрешәбез – “Сәлам-сәлам”.

– Конкуренция, көнләшү эстрадада көчлерәкме?

– Ул бөтен профессиядә бар. Кайда көчлерәк, кайда әзрәк дип әйтеп булмый. Ул сәламәт конкуренция булырга тиеш.

– Эстрадада сәламәтме соң?

– Нормаль. Атып йөрмиләр бит.

– Астан гынамы?

– Әйе… Сүз җибәреп… Мәгълүмати сугыш артистларда.

– Анысы түзәрлекме?

– Түзәрлек… И минем турында ни генә язмадылар! Әй Ходаем! Әни укый иде. “И, балам, шулай әйтәләр!.. Пофиг, мин сине барыбер яратам!” Чөнки ул әни.

“Әниеңне яратмасаң, бу дөньяда бернине дә яратмыйсың…”

– Әниегезгә өйләнү сәбәпле, әтиегез туганнары белән аралашмаган икәнен сөйләгән идегез.

– 52 ел торды әни белән, бер туганы белән дә – апасы, энесе, туганнан туган энеләре белән дә сөйләшмәде. Миңа да тыйды.

– Аралашмау сәбәбе аның ислам диненә килүе дип аңлыйм, дөресме?

– Юк. Татарлар белән кушылуы аркасында. Мөселман дине булганы өчен дә түгел. Аның апасы: “Татарлар сине кылыч белән чабып үтерәләр”, дип әйтә иде.

– Совет заманында интернациональлек булган, милли каршылыклар булмаган дип сөйлиләр бит инде.

– Әтинең гаиләсе чын яһүдиләр иде. Бу – Менделеевлар ыруы. Чын яһүдиләр. Әтинең апасы Биробиджанда университет ректоры булган. Аларны бит шунда сөргәннәр. Сугыш вакытында әтиләре белән әниләре һәлак була. Балаларны детдомга алалар. Апалары әтине карап үстерә. Аларның шундый милләтчелек бар иде.

– Ярты гасыр буе аралашмаслык дәрәҗәдәме?

– Юк. Алар соңыннан аралашырга теләде. Шалтыратып, хатлар язып… Миңа әни сөйли иде – хатлар килә, әти аларны укымыйча да ерта торган булган.

– Нигә алай итте икән? Беләсезме сәбәбен?

– Беләм. Чөнки алар әнигә өйләнүен тыйганнар. Өйләнсәң, без синнән баш тартабыз дигәннәр. Минем әти бик үзсүзле кеше иде, сүзен әйтсә – шул сүздә тора. Дәү әни әйтә әтигә – Ефим, Маһирәгә өйләнсәң, ислам динен кабул ит, татар телен өйрән, ди. Әти бер ел эчендә татарчага өйрәнә, ислам динен кабул итә. Шулай гына Маһирә аңа чыга.

– Шулкадәр мәхәббәт булды микәнни?

– Бик, бик. Алар күгәрченнәр кебек гөрләшеп утыралар иде олыгайгач та. Әти әнигә багышлап шигырьләр сөйләп, җырлар җырлап… Яраттылар инде, сүз дә юк.

– Ә сез әтиегезнең туганнары белән аралашасызмы?

– Юк, әти миңа үләр алдыннан әйтте: “Аларның берәрсе белән аралашсаң, мин сиңа теге дөньядан кирәгеңне бирәм”, дип йодрыгын күрсәтте. Ул кешеләр әниеңне, дәү әниеңне кабул итмәде. Кабул итмәгәч, син булмас идең. Минем яраткан кешемне кабул итмәгән кешеләрне ничек кабул итәсең, ди иде. Яшь вакыт – әни әтинең туганнары турында сөйли иде. Мәскәүдә “Жди меня” дигән киосклар ачылган вакыт. Мин шунда хат яздым – әтинең туганнарын эзлим дидем. Ярты елдан соң табылдылар. Ул вакытта Пермьдә яшибез – хат килгән. Мин университеттан кайттым, әти миңа усал карый. Әни әтигә күрсәтә. Нәрсә булды соң, дим. Әти минем белән сөйләшми. Әни белән кухняга кердек. Кая хат яздың, ди. Нинди хат дим. Кемне эзләдең, ди. Мин инде онытканмын – кая, нинди хат, кемне эзләдем, дим. “Жди меня”дан хат килде, ди. Аннары гына искә төште. Туганнар эзли, табарга телиләр безне, ди. Залга кердем. Әти әйтә – нәрсә, туганнар җитмиме сиңа, ди. Әти миңа шундый лекция укыды. Ул сволочьларны эзләсәң, мин сине каргыйм, диде. Усал булган минем әти. Хәмдүнә апа усал дибез. Вәт минем әти усал булган! Әмма мине ярата иде ул, иң яраткан улы мин идем.

– Винарис, сез әниегезне шулкадәр яратып сөйлисез, әниегезнең исемен дә мәңгеләштердегез, “Маһирә” дигән банкет залы ачтыгыз. Шулкадәр ярата идегезме әниегезне?

– Әниемне дә, әтиемне дә. Чөнки миңа тормыш биргән кешеләр бит инде алар. Минем туганнар да әйтә иде – “Син маменькин сыночек”. Әйе, мин “Маменькин сыночек”. Әниеңне яратмасаң, бу дөньяда башка бернине дә яратмыйсың. Минемчә, әнисенә хыянәт иткән кеше – иң гөнаһлы кеше һәм теге дөньяда аңа тәмуг. Бернинди акча белән дә гөнаһыңны ярлыка алмыйсың. Чөнки ул изге сүз – әни. Ул бит изге исем, шулай бит. Балалар да булырга мөмкин, хатын да… Ә әни – бердәнбер. Калган барысы да була һәм үтә ала торган әйбер.

– Балалар дамы?

– Балалар да. Чөнки балалар хыянәт итәргә мөмкин. Әни  беркайчан сатмаячак.

– Әниегез бик авыр киттеме?

– Ул киткәндә авыр китмәде. Ул җиде көн эчендә янып бетте. Ул бик озак авырды, әмма урында ятмады. 8 ел онкология, аннары коронавирус… Без аны дәваларга бик озак тырыштык. Ул авырый иде инде, әмма бик нык азапланып ятмады. Без бит онкологияне дәвалап бетердек кенә дигәндәй иде. Бик күп чыгымнар тоттык – аларын уйлаган юк инде. Табиблар сорады кайда дәваландыгыз дип. Кайтты гына – коронавирус. Мин аның янына беркемне дә җибәрмәгән идем – каян эләктергән ул аны? 1 июньдә, Балалар көнендә. Шулай истә калды.

– Еладыгызмы?

– Еладым. Мин әле дә искә төшерәм дә елыйм… Минем өчен әни белән әти – бик якын кешеләр.

– Винарис, гафу, ә сезнең балаларыгыз бармы?

– Юк, минем рәсми рәвештә балаларым юк.

– “Балалар хыянәт итәргә мөмкин”, дигәннән әйтәм.

– Андый хәлләр булганы бар бит.

«Хайп – ыштан төшерү түгел»

– Сәхнәдәге хайпка ничек карыйсыз? Җырчыга килешәме ул?

– Заманасы шул бит инде. Килешәдер дип уйлыйм. Бөтен җырчы хайпует хәзер. Хайп нәрсә соң ул?

– Мәсәлән, аерылышты бер җырчы. Икенче бер җырчы әйтә – ул аерылышмады, популярлык килсен өчен генә аерылышкан кыяфәт чыгарды, ди.

– Ыштан төшерергә үк кирәкми. Авыру, аерылышуны… Безнең Лилия белән өйләнешүне хайп диделәр. Ул хайп түгел. Мин Лилиягә тәкъдим ясадым, Алсу Фаракшина аны видеога төшергән, куйган соцчелтәргә. Без иртән тордык Лилия белән, ул әйтә – “Без йолдызлар”, ди. Син карале, ди. Ә миңа 200 кеше шалтыраткан. “Без нәрсә эшләдек”, ди. Ә нәрсә эшләдек соң дим. “Син миңа тәкъдим ясадың, менә кара хәзер”, ди. Миллионлаган карау. Бу хайпмы?

– Күпмедер дәрәҗәдә, әйе. Чөнки тәкъдим кеше күз алдында эшләнгән.

– Без Лилия белән халык алдында йөри торган кешеләр бит.

– Бу матур вакыйга бит инде, халык яраткандыр.

– Анда да күпме яздылар – бу пиар. Нинди пиар – Лилия 30 ел сәхнәдә, мин – 25 ел. Безгә өйләнешеп пиар ясарга кирәкме.

– Кирәктер инде.

– Юк, миңа кирәк булмады. Мин нигә тәкъдим ясадым? Олыгайган көндә ялгызым калмас өчен. Ә Лилиягә мин ышанам. Аның белән мин гомеремнең калган өлешен уздыра алам. Күпме калган анда – 45… Лилия бит инде миннән 8 елга өлкәнрәк. Лилиягә әйтәм – күрәзәче миңа 92гә кадәр яшисең, диде дим. “Ул чакта бит инде миңа 100 була”, ди. Мин әйтәм – “Мин 93кә кадәр яшәргә телим бит”, дим. Лилия әйтә – “Юк, җаным, анысы инде миннән башка гына яме”, ди. Лилия бик акыллы, аның тормыш тәҗрибәсе зур. Минеке дә, әмма аныкы минеке кадәр генә түгел.

– Сез шулкадәр яратып сөйлисез…

– Лильканымы? Ничек яратмыйсың инде? Яратмасам, мин аның белән тормышымны бәйләмәс идем. Мин 45 ел ялгызым гына бәхетле яшәдем. Ә хәзер бит мин шул 45 елыма караганда да бәхетлерәк хис итәм үземне.

– Хайпка килгәндә. Бервакыт сез бит сәхнәдә егылдыгыз. Шуны да әйттеләр хайп, махсус егылган дип.

– Нинди хайп булсын! Мин чынлап егылдым. Мин аякны ерттым – аны тектеләр, җөе әле дә калды, ышанмаган кешеләргә күрсәтә алам. Бу хайпмы? Ай-һай.

– Мин видеоны карадым – анда чынлап егылган кебек.

– Чынлап егылдым мин. Ул концертның башында гына иде. Аяк яраланган килеш концертның азагына кадәр йөрдем. Аннары юбилей концертлары булды – барысын да барып эшләдем.

– Шулкадәр бирелеп биемәскә иде алайса!

– Сәхнәгә яки биреләсең, яки бөтенләй бирелмисең. Сәхнәгә бирелми торганнар – тулы бер эстрада.

– “Һәр җырчының үз тыңлаучысы барыбер була” дигәнне ишеткән бар. Нота белмәсә белмәсен, барыбер үз җырчысын таба ул, дип уйларга буламы?

– Юк. Нотаны белмәгән җырчылар сәхнәгә бөтенләй менәргә тиеш түгел. Профессиональ сәхнәгә диюем. Минемчә, диплом булырга тиеш. Кайсы профессиональ җырчының дипломы булмаган? Әлфия Авзалованың бар. Ул укыды. Хәмдүнә апаныкы бар. Тямаевның бар. Училище – ул шулай ук белем. Ә кайберәүләрнең училище да юк. Ә алар профессиональ сәхнәдә. Мин моның белән килешмим.

– Бу нәрсәгә китерә?

– Эстраданың таралуына китерә.

– Шуннан нәрсә була?

– Белмим.

“Безнең Мәдәният министрлыгы бар бит…”

– Эстрадада шундый зур чыгымнар дисез, ә анда керергә теләүчеләр чират тора.

– Безнең Мәдәният министрлыгы бар. Алар моны карарга тиеш. Шуны аңларга кирәк. Хәзер Мәдәният министрлыгының берни роле юк. Эстрада өчен бернинди әһәмияте юк. Бик үкенечле хәл.

– Ә нишләргә тиеш алар?

– Элек бер филармониядә берничә бүлек бар иде. Эстрада, академия, джаз, фольклор… Мин Казанга килгәч, мине эстрада бүлегенә алдылар. Хәмдүнә апа эстрадада иде, мине аның төркеменә алдылар, антураж җырчы буларак. Анда эләгү мөмкин түгел иде! Анда эләгергә хакың барлыгын исбатларга кирәк иде. Мин бер ел эшләдем бушка диярлек – ставкам биш сум иде. Ә хәзер филармониядә бернәрсә дә юк. Фольклор һәм джаз – бетте-китте. Анда бер Лилия Әхмәтова. Эстрада, халык төркемнәре, музыкантлар юк. Элек һәр бүлекнең музыкантлары бар иде, биючеләр. Хәмдүнә апа төркемендә бар иде ике баянчы, гитарачы, клавишник, бас-гитарист, барабанчы. Бөтенесенә дә хезмәт хакы түлиләр иде. Хәзер юк бит ул! Бөтен кеше үзе теләгәнчә яши.

– Ул әйбәт диләр бит инде. Министрлык тыгылмый икән – әйбәт.

– Нәрсәсе әйбәт аның? Мин дөрес түгел дип саныйм. Нигә алайса Мәдәният министрлыгы кирәк?

– Мактаулы исемнәр бирәләр. Дәүләт бәйрәмнәре уздыралар.

– Мактаулы исемгә кул куярга да – бетте-киттеме? Бу дөрес түгел дип уйлыйм. Килешмим. Дәүләт бәйрәмнәре – елына ун меропориятиеме? Элек бар кеше дә рәсми рәвештә эшли иде.

– Шундый фикер бар – дәүләт тыгыла башлый икән, кешеләрне кыса башлыйлар, әйбәт булмый, дигән.

– Мәдәният министрлыгында да профессионаллар эшләргә тиеш. Һичьюгы мәдәнияткә катнашы булган кешеләр. Хәзер бит бөтен җирдә икътисадчылар. Яки авыл хуҗалыгы хезмәткәрләре. Элек булган Тархановларның мәдәнияткә катышы бар иде. Ә хәзер бит юк.

– Менә бу нәрсәгә китерә?

– Китерде бит инде ул. Эстрада көнбатышка иярде, бу татар мәдәнияте түгел. Татар җыры юк хәзер. Мин дә попсага керә башладым, чөнки мине укытучы, миңа үсеш бирүче юк. Халыкка якын булырга юк күрсәтүче юк. Элек мине Хәмдүнә апа өйрәтте. Хәзер бит андый бернәрсә юк. Безнең профессионаллар бар бит – Римма Ибраһимова, Георгий Ибушев. Элек җырлаган җырчылар, алар әле исән. Аларга татар җырын дөрес җырларга өйрәтү мөмкинлеге бирегез. Күрсәтегез – ничек җырларга. Өйрәтеп булмый икән – тотып атыгыз. Мин китәм! Миңа син туры килмисең диләр икән – нишләп мин комачаулап йөрергә тиеш? Ә карыйсың – шундый матур тавышлы җырчылар бар, алар чыга алмый, акчалары юк. Бердәнбер дип әйтерлек Вадим Захаров бар, ул чыга алды ничектер, акчасыз. Аның чыннан да табигать биргән таланты бар. Үз вакытында аңа Винара Ганиева ярдәм күрсәтте. Ул бердәнбер. Калганнарга юк бит. Шул ук Гөлсирин Абдуллина – Ваһапов фестивале белән ничектер ярдәм күрсәтелә, әмма чыга алмыйлар. Күп андый матур тавышлы җырчылар. Чыга алмыйлар.

– Сезгә үпкәләмәс микән кайбер җырчылар, безне бу исемлеккә кертмәде дип?

– Мин бер кешене дә төшереп калдырмадым. Илсөяне, Фирдүсне төшереп булмый, алар топчиклар. Әмма алар татарча җырламый. Барысы да попса. Заманча, көнбатышча. Мин үзем “Тәртип ФМ” яратам, анда элекке матур җырлар.

– Рамштайн немецча җырлап танылды, Милен Фармер – французча, Таркан – төрекчә. Сез ничек уйлыйсыз, татарча җырлап дөнья сәхнәсенә чыгып буламы?

– Була. Элек Нурәхмәт Мөхәммәтҗан бар иде. Ул рус конкурсында татарча җырлап Алтын медаль алган бердәнбер татар җырчысы. Шулай ук – аңа кем юл бирмәде? Үзебезнекеләр, татарлар! Ярдәм итәсе, теләктәшлек күрсәтәсе бит инде. Юк. Ул конкурстан кайтты – исем дә бирмәделәр, фатир да юк. Ул үзе шәхсән сөйләде – филармониядән куганнар. Менә министрлык ни өчен кирәк – күрергә, ярдәм итәргә, ияртеп алып барырга. Җырчылар шундый кешеләр – аларны җитәкләп алып барырга кирәк. Ә рус җырчыларының продюсерлары бар. Артист анда кая нәрсә түлисен уйламый. Безнең эстрадада андый продюсерлар юк. Илсөягә бәхет елмайды – аның бер дигән продюсеры, администраторы, директоры Гүзәл. Ул талантны күргән, эшли.  Илсөя акча бирә алмаганда Гүзәл биргән. Менә Илсөя чыкты. Гүзәл профессиональ директор. Фирдүс үзе шундый. Мишәр, үтеп керә торган. Бетте.

– Менә сез сөйләп утырасыз татарлар шулай иткән бер-берсенә каршы дип. Димәк, әтиегез туганнары хак булган булып чыга бит инде.

– Мин Нурәхмәт турында әйткәндә татар халкы турында әйтмәдем. Бу безнең Мәдәният министрлыгы булышырга тиеш иде. Татар халкы түгел. Нәрсәгә кирәк соң ул министрлык алайса? Мактаулы исемнәр бирер өчен генәме? Ә кайда үсеш? Безнең нормаль оркестрлар да калмады бит инде. Шутиковныкын да таратмакчы булалар әнә… Башка оркестр юк. Дәүләт ансамбле, “Казан” – бу тиешле дәрәҗә түгел.  Мин хәтерлим Дәүләт ансамблендә Лима Кустабаева булган вакытны. Вәт анда программа иде! Хәзер кайда ул дәүләт ансамбле? Беркайда да юк. Алар ишетелми дә хәтта. Алар бит элек бөтен дөньяны шаулата иде. Ә хәзер? Шаулап бетерде.

“Татар булды, бар һәм булачак”

– Җырчылар күп кешеләр белән аралаша. Пессимистик фикерләр әйтелә соңгы елларда – татар халкы бетә, әз генә калды…

– Килешмим. Татар булды, бар һәм булачак. Татарча сөйләшә торган бер кеше булса – татар бар дигән сүз. Җырчылар күп дибез. Димәк, аларга кызык. Бу, билгеле, уңай күренеш. Нәрсә начар – әйткәнемчә, үсеш юк аларның. Үсәргә ирек бирелми. Әмма, ни генә булса да, татарлар булачак. Без дөньяның горурлыгы. Без татарлар. Без үзебезне яратабыз. Мин үземнән чыгып әйтә алам – мин татар булуым белән бик горурланам. Әтием “мин яһүди татары” ди торган иде. Мин – татар.

Мин үзем Лаундж-бар ачтым. Монда берничә кафе бер урында дигән сүз. Монда кухня да, бар да, балалар өчен уен бүлмәсе, вип-бүлмә бар, кальян. Татарча кичәләр уздырабыз. Проектлар күп. Милли кухня да бар. “Үзебезнекеләр” дип атала – “Свои”. Туган көннәргә бүләкләр ясыйбыз. Пушкин урамы, 60А. Казан үзәгендә! Монда сез мәшһүр татар җырчыларын күрә аласыз. Блогерларны җыябыз. Җыелышып мафия уйныйбыз. Бик күңелле – килегез!

Автор: Рәмис Латыйпов

ТАТАР ТУДЕЙ ТЕЛЕГРАМ КАНАЛЫ - https://t.me/tatartoday

Запись Винарис Ильегет: “Хәмдүнә апа шундый бер сүз әйткән иде…” впервые появилась Tatar Today - татар яңалыклары..

“Бу – табигатьтән. Мин күзне махсус ачмыйм…”

Зур күзле караш, популяр җырлар, Винарис – кем ул?

– Винарис, сезгә бер сорау бирим әле. Үпкәләтә күрсәм – гафу итегез. Минем әни әйтә – ул Винарисның күзләре нигә шундый зур, ди. Чыннан да, сез кайчак сәхнәгә чыккач шундый итеп карыйсыз, күзләр орбитадан чыгып төшә кебек. Бу бер сәхнә ысулымы соң?

– Бу – табигатьтән. Мин күзне махсус ачмыйм, шулай килеп чыга ул минем.

– Менә хәзер күрсәтә аласызмы?

– (Ачып күрсәтә). Монысы – юри. Сәхнәдә үзе килеп чыга ул.

– Сез үзегезнең иң популяр җырыгыз нинди дип уйлыйсыз?

– Анысын халык кына әйтә аладыр.

– Мин халык Яндекс аша нәрсә эзләгәнен караган идем, “Син булганда”, “Туган көн” һәм “Мөкәррәмә”. Бу сезнең өчен яңалыкмы?

– Алар социаль челтәрләргә кертелгән җырлар. Тамашачы мине күбрәк “Килеп китсәң, ни була”, “Чиялектә” җырлары аша белә, алар анда юк. “Мөкәррәмә” – Хәмдүнә апа җыры. Тегеләре – минем җырлар. “Чиялектә”не мин беркая да кертмәдем.

“Мин аны йөз тапкыр сөйләдем инде…”

Милләт, исем, башка дингә күчү

– Винарис, ә үзегез турында ни эзлиләр дип уйлыйсыз, беләсезме?

–…

– Милләт.

– Әй, милләт! Мин аны йөз тапкыр сөйләдем инде. Әнием – татар, әтием – яһүд, исемем – Блехер Виталий Ефимович, мулла кушкан исемем – Винарис Ильегет. Ильегет әнинең кыз фамилиясе Ильзигитовадан. Анысы Хәмдүнә апа идеясе. Ильзигит булмый, татарча кирәк, Ильегет диде.

– Шул сорау булгач, әйтегез инде – сез үзегезне кайсы милләт вәкиле дип хис итәсез?

– Татар.

– Сез бик үзенчәлекле кеше татар сәхнәсендәге – Блехер Виталий Ефимович, татарча җырлый.

Аллага шөкер. Минем әти татарча миннән яхшырак сөйләшә иде. Мөселман динен алган, татарча сөйләшкән. 52 ел әнием белән торды.

– Һәм тагын бер сорау – сезнең динегезне алыштыруыгызны еш телгә алалар. Мин сәбәпләрен сорамыйм инде…

– Сәбәпләрен әйтәм. Православие – миңа якынрак булган дин. Мин теләсә кайсы динне хөрмәт итәм.

“Бер җырчы да юк түләмәгән”

Эстрада бәясе: “300-400 мең чыгарасың…”

– Телевидениегә түләргә күп кирәк дидегез. Җырчы булам дип йөрсәң, күпме чыга?

– Аена иң аз дигәндә бер 300-400 мең чыга инде.

– Акчаң булмаса, үзалдыңда җырлап йөрисең инде?

– Әйе… Бер җырчы да юк түләмәгән. Башта мин дә түләдем, хәзер инде түләмим, кеше инде болай да белә, йөриләр.

– Бу түләнгән акчалар кире кайтамы соң җырчыга?

– Кемгә ничек. Миңа кайта иде. Хәзер түләмим, күп эшләмим дә. Хәзер башка бизнес бар.

– Бу түләүне гадел дип уйлыйсызмы? Әйтергә мөмкиннәр бит – радионың да, телевидениенең дә яшисе бар, аларга да акча кирәк.

– Безнең бит хөкүмәт бар! Шулаймы? Алар аны карарга тиеш. Артистлар түгел. Элекке җырчылар бит бер тиен дә түләмәгән.

– Әмма бит элек җырчылар алай күп булмаган, бөтен кешене кертеп булмый.

– Шуңа күрә бөтен артистны кертергә дә кирәкми. Мин беренче тапкыр радиога килгәндә, Вафирә Гыйззәтуллина эшли иде. Утызлап җыр биргән идем – өч җырны гына алды. Хәзер теләсә кайсы җырны алып киләсең, акчаңны түлисең дә – пожалуйста! Җырла! Элек алай түгел иде, “иләп” калдыралар иде. Теләсә кем керми иде.

– Худсоветта “шәхси фактор” дигән әйбер булган, диләр. Сине шәхсән яратмаган кеше була икән – ул кертми.

– Анда бит бер генә кеше түгел, утызлап кеше утыра иде. Хәзер худсоветта бер-ике кеше. Чөнки акча түлиләр. Дөрес җырлыймы, грамотасы бармы, җырлый беләме – барыбер. Хәзер бит компьютер заманы. Ә без үзебез җырлаган буын.

– Винарис, ә менә теге чакта 30 җырыгызның берсен дә алмаган булсалар?

– Китәр идем! Үзем өчен генә, банкетларда гына җырлар идем. Мин 8 ел укыдым үземне сәхнәдә ничек тотарга дигәнне. Хәзер бит беркайда укымыйлар, бернәрсә аңламыйлар, нота дигән нәрсәне дә белмиләр. Һәм җырлап йөриләр! Шунысы әйбәт түгел.

– Җырлар кабатлана дигәч, бер җырчы “ноталар 7 генә бит, кабатланмый нишләсеннәр” дигән иде.

– Ноталар җиде генә, әмма тавышлар бит күп!

– Сезнең нинди белем бар?

– Мин Пермьдә малайлар өчен хор мәктәбендә 7 ел укыдым, академик вокал бүлегендә. Пермьдә культпросвет училищесына кердем, аны укып бетермәдем, аннары мәдәният институтына кердем, режиссура бүлегенә.

“Хәмдүнә апа өйрәтте мине сәхнәдә тотарга”

Сәхнәдәге остаз – Хәмдүнә Тимергалиева

– Сезнең сәхнәдә үз-үзегезнең тотышы үзенчәлекле. Сезгә моны укыттылармы? Кешене укытып, аны харизмага өйрәтеп буламы?

– Юк, харизма я бар, я юк. Минем әни дә, әти дә эмоциональ кеше иде. Сәхнәдә үземне тотарга мине Хәмдүнә апа өйрәтте. Шуңа күрә миндә Хәмдүнә апа чалымнары бар, дип уйлыйм – сәхнәдә тотышта, җырлауда, энергетика бирүдә… Институтта да укыттылар, режиссерлык бүлегендә актерлык осталыгы бар иде. Анда сәхнә бизәлеше дә бар иде. Кешегә биреп була нәрсәнедер, әмма һәр кешенең үз мөмкинчелекләре, ул холыкка да бәйле. Мәсәлән, мин сәхнәдә үземне шат тотам.

– Сез Хәмдүнә апа белән ничек шулай дуслашып киттегез?

– Миңа 18 яшь чагында ул Пермьгә үзешчәннәр конкурсына жюри рәисе булып килде. Хәмдүнә апа шунда мине күрде дә: “Малай, сиңа җырларга кирәк”, – диде. Татарча! Ә мин татар телен аңламый да идем. Әмма татар җырлары ошый иде, чөнки әни дә татарча җырлый, дәү әни дә җырлый, гармунда уйный… Хәмдүнә апа Казанга чакырды, мин килдем һәм өч ел аның янында яшәдем, аннары ун ел буе төркемендә эшләдем.

– Сезгә кем дип дәшә иде?

– Еврейчик дип әйтә иде ул мине, “Винчик” дип, “Еврейчигым”, дия иде.

– Ә сез? Хәмдүнә апа?

– “Түтәй”.

– Хәмдүнә апа белән бәйле кызыклы истәлек тә сөйләгез әле?

– Алар беләсезме күпме булды!.. Без ничектер 3 ел Хәмдүнә апа белән бөтенләй сөйләшмәдек. Бер җырчы, әллә нәрсә сөйләп, безнең араны бозды. Өч елдан соң Хәмдүнә апа үзе шалтыратты да әйтте: “Еврейчик, еврейлар күп. Әмма синең кебек еврей точно юк. Иди мой воздушный пилотка ко мне”, – диде. Аннары мин аның янына килдем һәм без, дуслар буларак, тагын аның белән аралашып яшәдек. Эшләмәдек, әмма дуслар булдык.

– Хәмдүнә апа белән сездә чыннан да уртак чалымнар бар…

– Халыкчан җырлыйбыз.

– Әйе, сез аның кебек сәхнәдә ут уйнатасыз.Холыклар туры килгәндер?

– Без ярты сүздән бер-беребезне аңлый идек. Ул миңа әйтергә дә өлгерми иде – мин аны аңлый идем. Ул да шулай. Ул минем икенче әни булган. Авыр чакта да, рәхәт чакта да ул янәшә иде. – Гаиләләр белән дус булдык, минем әти-әни аның белән аралашты. Гел кунакка чакыралар иде аны.

– Хәмдүнә апа бик усал иде, диләр…

– Юк. Аның йөрәге олы иде. Мәсәлән, миңа аның начар сүз дә әйткәне булмады. Без сугышып йөрмәдек. Дөрес, әйтсә каты әйтә иде. Хаклы булмасаң, әйтә иде. Ул әрләшә иде, әмма өйрәтеп. “Паразит!” дип тә әйтә ала иде.

– Миңа бер тарих сөйләгәннәр иде – ул концерт белән килешкә клуб директоры исерек килеш бүлмәсендә утыра икән, каршы да алмаган. Ул аны җилтерәтеп чыгарып аткан…

– Ул каты итеп әйтергә дә, килеп башына биреп алырга да мөмкин иде. Әмма безгә ул алай итмәде. Ул безне – Илһам Шәриф, Илназ Минвәлиев, мине – балалары кебек күрә иде. “Өч малаем” дия иде. Бик карады ул безне. Аеруча Илһамны. Мин – кече улы кебек. Киендерә, ашата иде. Гастрольләрдә – гел безнең белән. Килә минем өйгә – анда бардак. Ул, пирчәткәләр киеп, җыештыра. Әни кебек булган ул безгә.

“Эстрада – үзе бер гаилә”

Гаилә, дуслар, Лилия белән мәхәббәт тарихы

– Винарис, ничек уйлыйсыз? Эстрадада булганнарның гаилә бәхете бик юк. Ни белән бәйле икән ул? Ир җырчыларның бар әле гаиләләре, хатын-кыз җырчыларга авыррак сыман… Тормыш үзгәрдеме?

– Эстрада ул үзе бер гаилә. Без барыбыз да туганнар кебек. Минем өчен шулай. Кемдер дус, кемдер дошман, әмма ул гаилә.

Мин мәсәлән 45 яшькә кадәр бәхетле булмадым дия алмыйм. Бөтен нәрсәм бар иде тормышымда. Менә хәзер Лилия белән кавыштык. Хәзер минем өчен икенче тормыш башланды.

– Моңа ышанып та бетмәүчеләр булды инде, хайп дип тә әйттеләр.

– Ышанмыйлар, язалар… Язсыннар! Илһам абый әйтмешли, әйтсеннәр, сөйләсеннәр – минем өчен популярлык кына….

– Шуның өчен генә оештырылган дип яздылар диюем.

– Юк инде. Без Лилия белән 25 елдан артык дус. Дус булып йөрдек-йөрдек тә, менә шул хәлгә килеп җиттек. Пиар түгел ул.

– Анысын аңлыйм, әйтүгә ничек карыйсыз?

– Әйтсеннәр. Миңа п… Шулай дип әйтим әле?

– “Ир белән хатын-кыз арасында дуслык була алмый” дигәннең дәлиле булдымы инде бу?

– Бар ул. Без 25 елдан артык дуслар булдык.

– Әмма бит ахыры…

– Гафу итегез, ничек бар – шулай килеп чыкты инде. Без бит икебез дә олыгайдык. Балалар үсте. Үзебез өчен дә яшәргә кирәк бит. Лилия дә лаеклы аңа, мин дә. Лилия дә матур сәхнәне күрде, мин дә. Хәзер, тагын да матуррак булсын дип, бергә инде. Безгә чыннан да рәхәт. Без нәрсә телибез – шуны эшлибез. Нәрсә телибез – шуны ашыйбыз.

– Лилия дә туктап торды…

– Әйе, мин аңа әйткән идем – җитте сиңа өйдә ятарга, әйдә, дидем.

– Сез чыгардыгызмы аны кабат сәхнәгә?

– Мин үз көчемне керттем. Яңа җырларны яздырабыз. Лилия ул шундый кеше – аңа әз генә ярдәм итеп, күңелен күтәреп җибәрергә кирәк.

– Лилия орышмыймы соң хәзер хәзер Хәмдүнә апа кебек?

– Лилия бик чисталык ярата. Ул өйне тәртиптә тота, мин дә тәртип яратам.

– Хәзер тормышлар әйбәтләнеп киттеме соң?

–Ул бөтенләй башка тормыш. Ялгызлык ул – ялгызлык. Өйгә кайтасы килеп тора, өйдә сине кемдер көтә… Привет сүзен дә ишетүе рәхәт. Кич утырабыз, чәй эчәбез, Лилия бик тәмле пешерә, пешерергә ярата. Мин ашарга яратам, ашата ул мине… Тормышта ялгызың барганда авыр, кемдер янәшә булса – җиңелрәк. Ышаныч та күбрәк була. Мин үзем дә әйбәт яшәдем, хәзер күпкә җиңелрәк. Авырлыклар булса, киңәшәбез, Лилия бик акыллы, миңа киңәшләрен бирә. Мин аны тыңлыйм, беркайчан да юк димим.

– Китәм эстрададан дип куркыттыгыз әле. Лилия каладыр бит?

– Минем бизнес бар. Ул миңа күбрәк акча китерә. Ул җиңелрәк. Эстрадада хәзер бик авыр бит. Бик күп энергия ала ул. Лаундж-бар, кибет, банкет залы бар. Беркая йөрисе дә юк, шәһәрдә генә.

– Һәм акча түлисе дә юк…

– Һәр бизнесның үз чыгымнары бар инде. Лилия йөри, җырлый. Лилия ул миннән популяррак, ул миңа караганда мәгънәлерәк. Мин бит шаянрак җырчы, андыйлар да булырга тиеш. Мин Лилиягә мөмкинлек бирәм – җырласын гына.

“Бер җырчы да юк түләмәгән”

Эстрада бәясе: “300-400 мең чыгарасың…”

– Сез 300-400 мең түлибез дип шаккаттырдыгыз…

– Һәм, тагын да күбрәк түли топ-җырчылар. Аларның күпме китә. Безнең бер унлап тв, егерме радио.

– Түләмәсәң, берсе дә алмыймы?

– Алар ала, әмма алар җырны “әйләндерми”. Кайсы радио икәнен әйтмим – бер радиода җырны фонотекага алыр өчен 5-7 мең сум акча сорыйлар. Архивка алыр өчен! Мин түләмим. Аласызмы яңа җырны – аласыз. Алмыйсыз – ярар, кирәкми, димәк.

– Ә җырны яздыру күпмегә төшә? Әзер продукцияне дә бирәсез, акча да өстәп түлисез булып чыга бит.

– Клип белән бергә 300 меңгә төшә инде. Минимум. Көй язучыларга, җыр сүзләренә, аранжировка, музыкантларга, сведение, әзер җырга – клип, аны бирәсең. Иң арзан клип – 100 мең, андыйларны хәзер төшермиләрдер дә инде ул хәзер. 200-250 мең клип кына.

– Иң арзанлы җыр күпмегә төшә?

– 100 мең.

– Бер альбом ясыйм дисәң, күпмегә төшә инде?

– 16-17 җыр – чутла. Ике миллионга якын. Радиога ротациягә бирсәң, радио-телевидениегә…

– Безнең җырчылар шулай бай инде алайса, шундый акчалы бизнес. Күпме яшьләр килә бит шуңа күрә.

– Топ-җырчылар моны эшли ала. Атнада 5-6 концерт куйган җырчы эшли. Алар бөтен акчаны шушы рекламага тыга да инде. Безнең культура үсмәячәк тә. Чөнки без – җырчылар барысын да үзебез эшлибез. Безгә беркем булышмый. Булышмыйлар бит.

– Ничек булышырга?

– Мәсәлән, оркестр белән эшләргә мөмкинлек бирергә. Ниндидер белем алырга мөмкинлек бирергә. Чөнки җырчылар, теләгән очракта, акча түләп укый. Хәмдүнә апа әйтә иде – филармониядә фониатор, вокалист булган, алар ничек җырларга икәнен күрсәткән. Без, җырчылар, үз иркебездәге фахишәләр кебек. Кайда алалар – шунда барабыз.

Кем ничек булдыра, шулай җырлый. Халык төкеренә-төкеренә, әмма карый. Тамашачы кабул итә бит.

– Ә кая барсын?

– Тыңламасыннар. Элек теләмәгәндә тыңламаганнар бит. Йөриләр бит. Унбишәр көн куялар иде. Элек бит беркем дә алай эшләмәде. Ну Салават кына…

– Сез концертлар куюдан туктыйм димәгез инде.

– Юк, мин китәм димим. Минем күп эшлисем килми элекке кебек. Арыдым мин.

– Сәхнәдән?

– Юк, сәхнәдән түгел. Сәламәтлек ягыннан авыр.

– Сәхнәдә эшләү авырмы? Күпме яшьләр бара бит кызыгып.

– Беләсезме, миңа әти әйтә иде. Әй, эшмени ул, бар икътисад бүлегенә бар, укы, заводта эшләрсең дип, үзләре кебек. Казахстанга бардык 2001 елда. Әни барды минем белән гастрольгә. Ике атна йөрдек. Кайттык, әни әтигә әйтә: “Ефим, тагын бер тапкыр эш түгел ул дип әйтсәң, мин синең белән аерылышам”, ди. Ике атна ялсыз заводта эшләвең әйбәтрәк алай йөрүгә караганда диде. Ул җиңел эш түгел. Аннары гына әти белән әни аңладылар.

– Нәрсәсе авыр?

– Эмоциональ яктан, физик яктан. Менә ун сәгать автобуста бар да, 3 сәгатьлек концерт куй. Әле без тере тавышка җырлыйбыз. Фонограммага авыз ачып була, ә менә тере тавышка җырлап кара. Шуңа да мин аптырыйм Илсөягә, Фирдүскә, Ришатка. Алар ничек көн саен концерт куя. Шуңа күрә Илсөя дә хастаханәдән чыкмый, Фирдүс тә капельницада ята. Бу бит әйбәт түгел. Ә минем яшисе килә. Өстәвенә мин әле генә өйләндем.

– Халык аңламый да инде җырчыларның нинди корбаннарга барганын…

– Мин инфаркт алдым. Бөтен эмоцияне үзең аша уздырасың. Җырчыларның күбесе инсульт белән китә, инфаркт белән. Ашказаны җәрәхәтеннән дә китәләр анысы.

– Расписаниесез ашауданмы?

– Һәр җырда тема бар. Шул җырдагы теманы үзләре аша уздыралар. Ә язва – моннан (Винарис иягенә чиртеп күрсәтте).

– Әй, нигә булмасын. Һәр концерттан соң өстәл… Анда барыбер шешә була. Менә шулай.

– Ә сез ул чирдән ерак калдыгыз?

– Аллага шөкер, юк. Мин эчәм! Мин нормаль кеше. Миңа беркайчан тыю булмады. Хәзер дә без берәр кая кунакка барсак, без тотып куябыз. Лилия бер ике рюмка эчәргә мөмкин, мин рәхәтләнеп эчәм. Яратам ул әйберне.

– Ярамый дисез бит.

– Чамасын белеп, көн саен түгел.

– Рәхәтләнеп булгач, чамасын белеп буламыни.

– Аена бер-ике тапкыр эчәм, миңа рәхәт. Миңа җитә ул. Һәр көн түгел бит инде.

Автор: Рәмис Латыйпов

Винарис белән интервьюның дәвамын якын арада Татар-Тудей каналында укый аласыз.

ТАТАР ТУДЕЙ ТЕЛЕГРАМ КАНАЛЫ - https://t.me/tatartoday

Запись Винарис Ильегет: “Без, җырчылар, үз иркебездәге фахишәләр кебек” впервые появилась Tatar Today - татар яңалыклары..

«Менә минем соңгы туганнан туган абыем вафат булды. Озак вакытлы авырудан соң, Алик Хуҗагулов «китте». Хәзер икетуганнарым арасыннан беркемем дә калмады. Барлык апаларым (әнинең апа-сеңелләре), аларның балалары – барысы да «китте». Мин апаем Света белән икәү генә калдык. Алик, авыр туфрагың җиңел булсын!

Калган якыннарыма һәм туганнарыма, шулай ук һәркемгә ныклы сәламәтлек телим», – дип язган җырчы абыйсының фотосын куеп.

ЧЫГАНАК - https://intertat.tatar/news/vinaris-ileget-kaigy-kicera-5872809
ТАТАР ТУДЕЙ ТЕЛЕГРАМ КАНАЛЫ - https://t.me/tatartoda

Запись Винарис Ильегет зур югалту кичерә впервые появилась Tatar Today - татар яңалыклары..

Чыганак: Шәһри Казан

Запись Җырчысы Винарис Илъегет коронавирус белән чирләгәннән соң, тавышын югалткан? впервые появилась Tatar Today - татар яңалыклары..

“Ул китте…. минем Бәгърем, Алтыным, Кадерлем🙏😢 Сызылып таң атканда, табигать уянганда, тормышымның кояшы сүнде…. Әнием, җаным минем, ничекләр яшим мин синсез, кояшсыз? Син безнең иң кадерле кешебез, Изге Махирә! Дусларың, якыннарың сине нәкъ шулай атый иде! Бу чыннан да шулай!

Син чын мәгънәсендә изге идең! Балаларың өчендә, дуслар-туганнарың  өчен дә! Син безнең куңелдә мәңге исән! Соңгы сулышыма кадәр минем йөрәгем сине сагынып тибәчәк! Урының җәннәт түрендә булсын Бәгърем! Рәнҗеп китмә. Тыныч йокла. Туган авылың туфрагында.

Хушлашу, иртәгә 2 июнь сәгать 10 да Кояново авылында булачак, ( Пермь өлкәсе) Советская урамы, 195.”- дип яза Винарис.

View this post on Instagram

A post shared by Ведущий свадеб Казань (@vinaris_ilyeget)

Татар Тудей коллективы Винарис Ильегетнең авыр кайгысын уртаклаша.

Запись Винарис Ильегет гаиләсендә зур кайгы впервые появилась Tatar Today - татар яңалыклары..

Запись Винарис Илъегет “Болгар радиосы” Милли музыкаль премиясендә җиңү яулауга ничек ирешкән? [фото-видео] впервые появилась Tatar Today - татар яңалыклары..

Винарис Илъегетнең 11 октябрь Казанның УНИКС залында үткән концерты истә калырлык мизгелләргә бай булды. Шуларның берсе җырчының ике әнисенә дә үзенең изге теләкләрен юллап, рәхмәт сүзләре җиткерүе иде. Әйе, Винарисның ике әнисе бар.

Аның берсе Винариска гомер бүләк итеп, аны үстергән, кеше иткән әни. Җырчы әнисен туган көне белән котлап, концертта аңа чәчәк бәйләме бүләк итте. “Озак яшә, әни! Беләсеңме, мин синән башка яши алмыйм”, – диде Винарис.Ә икенче әнисе җырчыга иҗатында үз юлын ярырга булышкан – Хәмдүнә Тимергалиева. Бу турыда Татар Тудейга биргән интервьюсында Винарис Илъегет сөйләгән иде. “Хәмдүнә Тимергалиева – минем икенче әнием. Ул мине үзенә сыендырды, авыр чакта булышты”, – дип искә алган иде җырчы. Концертта да ул бу сүзләрне тамашачылар алдында Хәмдүнә Тимергалиевага җиткереп, аңа рәхмәт сүзләрен әйтте. “Рәхмәт сиңа, балам, минем бөтен ышанычымны аклаганың өчен. Сәхнәләләрдә матур итеп эшләвең, талантлы булуың, тырышлыгың – минем өчен шул синең рәхмәтең. Каты өйрәттем мин аны, әле юньләп татарча да сөйләшә белми иде”, – диде Хәмдүнә Тимергалиева.

Ә Мәскәүдән килгән тамашачының сәхнәдә Винарисның ике әнисенә дә рәхмәт әйтүе бу күренешне тагын да тулыландырып җибәрде. “Шундый талантлар үстереп, яшәү көче өстәп, кеше итүегез өчен рәхмәт!” – диде ул.

Запись Винарисның ике әнисе бар? [фото-видео] впервые появилась Tatar Today - татар яңалыклары..

“Йолдызлы хит-парад” проектын оештыручы, җырчы Винарис Ильегет тамашачыларын кызыксындырган сорауларга ачыклык кертте. Бу әңгәмәне укыганнан соң, күпләр Винарисны үзләре өчен башка яктан ачар, мөгаен. Ул әнисендә яман авыру булса да, позитив булып иҗат итә, гастрольләргә чыга, Казанда концертын куярга җыена.

View this post on Instagram

A post shared by Ведущий свадеб Казань (@vinaris_ilyeget)

– Концертың нигә “Килеп китсәң ни була?” дип атала?

– “Килеп китсәң ни була?” ул минем җыр сүзләре. Ләкин без концертыбызны «Ни була» фразасына яраклаштырып төзибез.

– Хәмдүнә апа белән 1нче тапкыр кайда күрештегез, сез хәзер җан дуслармы?

– Хәмдүнә апа белән беренче тапкыр Казанда очраштык. Аңа мине җырчы буларак Фәрит Хатыйпов тәкъдим итте. Без аның белән 20 ел элек Пермьдә гастрольләрдә эшләдек. Хәмдүнә апа белән Химиклар мәдәният йортында ниндидер банкетта күрештек. Минем ул чакта бик авыр вакытлар иде. Урамда калдым дип әйтергә була, акча бетте. Без Хәмдүнә апа белән шалтыратыштык та, ул мине шул банкетта эшләргә чакырды. Артистлар өчен дә табын әзерләгәннәр иде, һәм шул вакытта Хәмдүнә апа минем ничек ашаганымны күзәтеп утырган. Әле ул чакта Хәмдүнә апа минем подъездда яшәгәнне белми иде. Яшәргә урыным юклыгын белеп алгач, ул мине үзенә чакырды, һәм мин аның йортында ике ел тордым. Хәмдүнә апа ул – минем икенче әни. Ул булмаса, мин кире Пермьга кайтып китеп, гади татар җырчысы булып яшәр идем.

– Ни өчен синең янда кызлар гына, әллә егет артислар синнән куркамы?

– Минем янда кызлар гына түгел, ир-атлар да бар. Алар минем алып баручы, ут куючы, тавыш көйләүче. Биюче егетләр бар.  Әгәр ир-атлар гына булса, көлке булып күренер иде. Ир-ат артистлар миннән курка дип уйламыйм. Гел ир-атлардан гына яисә хатын-кызлардан гына торган коллективларны аңлап бетермим. Мин оештырган “Йолдызлы хит-парад”та ир-атлар күп, ә сольный концертлар белән йөргәндә, янәшәмдә искиткеч матур хатын-кызлар гына. Ләйсән Мәхмүтова, Гүзәл Асылбаева, Лилия Хәмитова.

View this post on Instagram

A post shared by ⚡️TATAR TODAY агентлыгы⚡️🌍 🔊📺 (@tatar_today)

– Шәрәпов белән йөгерү челенджын ничек кабул иттең, йөгерергә гел чыгарга уйламыйсыңмы?

– Шәрәпов миңа инстаграмда эстафетаны тапшыргач, миңа бу кызык булып тоелды, алардан калышасым килмәде. Алар мине болай да авырлыгым белән шаяртып котыртып йөриләр.  Йөгерергә чыгуга килгәндә, мин бу эшем белән теләсә нинди спортсменнан да яхшырак йөгерәм.

View this post on Instagram

A post shared by ⚡️TATAR TODAY агентлыгы⚡️🌍 🔊📺 (@tatar_today)

– Гастрольләр вакытында авырлык үзгәрәме?

– Айга 20-25 концерт булганда, бик каты ябыгам, чөнки мин үз эшемә бирелеп эшлим, тамашачыга бар күңелемне бирәм. Кайвакыт концерт костюмнарын да кечерәйтергә туры килә.

– Гаиләң, әниең нихәлдә? Алар концертыңда булачакмы?

– Минем әниемдә онкология авыруы. 11 октябрь, әниемнең туган көнендә, минем концертым була. Мин ул концертны аңа багышлыйм. Бу куркыныч авыру белән озак еллар көрәшәбез, әниемә озын гомер телим. Аңа 77 яшь тула. Концертта ул, һичшиксез, булачак.

Винарисның әнисе

Запись “Куркыныч авыру белән көрәшәбез” – җырчы Винарисның иң газиз кешесенә ни булган? Алда концертлар! впервые появилась Tatar Today - татар яңалыклары..

Винарис Ильегет оештырган проект –“Йолдызлы хит-парад” турында язганыбыз бар иде инде.  “Йолдызлы хит-парад”  гастрольләргә кузгала. Концертлар Пермь крае, Башкортстан, Свердловск өлкәсе һәм дә инде Татарстанда узачак.

—“Йолдызлы хит-парад”  – яңа һәм бик кызыклы проект. Кешеләр бик теләп киләләр, концерт  программасын бик яратып кабул итеп алалар. Һәр артист үзенә бер төрле, һәрберсенең үз юнәлеше бар. Шунысын әйтергә кирәк: безнең концертлар –  ул төрле яшьтәге аудиторияга каралган. Яшьләр дә, өлкәннәр дә үз итеп кабул итәләр,” – ди Винарис Ильегет.

“Безнең грандиоз тамашабызга килеп, ял итеп, рәхәтәнеп көлеп, җаныгыз белән ял итеп кайтыгыз” – дип тә өсти җырчы.

View this post on Instagram

A post shared by ⚡️TATAR TODAY агентлыгы⚡️🌍 🔊📺 (@tatar_today)

Запись Винарис Ильегет зур тамашага чакыра: кайда? кайчан? нәрсә? [ФОТО] впервые появилась Tatar Today - татар яңалыклары..

Җәй айларында җырчы Винарис Ильегет ныклап үзенең сольный концертына әзерләнә. Әзерлекнең  ничек баруын, җырчының яңа сезонга нинди планнары булуын белешер өчен, җырчы белән элемтәгә кердек.

—Винарис, яңа сезонга әзерлек ничек бара?

— Әзерлек бик яхшы бара. Яңа афишалар, яңа костюмнар эзерлибез, иң мөһиме яңа җырлар язабыз. Күп-күп итеп билетлар ясыйбыз.

— Яңа сезонда кайларда чыгыш ясарга планлаштырасыз?

— Киләсе сезонда без “Йолдызлы хит-парад” белән генә түгел, үзебезнең сольный концертларыбыз белән дә чыгыш ясаячакбыз. Яңа сезонда  Башкортстанда, Пермь краенда, Татарстан, Свердловск, Самара, Пенза, Ульяновск өлкәләрендә концертларыбыз булуы көтелә.

View this post on Instagram

A post shared by Ведущий свадеб Казань (@vinaris_ilyeget)

— Яңа сезонда тамашачыны нәрсә белән шаккатырырга җыенасыз? Ни өчен халык концертларыгызгы килергә тиеш дип саныйсыз? Халыкны үз концертларыгызга ничек җәлеп итәргә уйлыйсыз?

— Гомумән, безнең концертлар бик күңелле үтә. Без бары тик тере тавышка җырлыйбыз. Яңа җырлар әзерләдек, һәм дә инде, сәхнә буйлап йөгереп йөргән, минем 150 килограммым да бик үк начар түгелдер диеп уйлыйм. (көлә) Кешеләр карый һәм кызыксына.

Тамашачыны җәлеп итәр өчен реклама ярдәм итә. Ә концертта матур костюмнар, сәхнә бизәлеше, профессиональ вакалистлар, музыкантлар һәм дә инде биючеләр  тамашачыны үзенә карата.

Иң мөһиме – яңа һәм яхшы концерт программасы. Киләсе сезонда Башкортстаннан, Татарстаннан да җырчылар булачак. Күңелле һәм дәртле квнщик, юморист Фаил Баязитов концерт программасын алып барачак.

Запись Винарис Ильегет тамашачыларны нәрсә белән шаккатырмакчы? впервые появилась Tatar Today - татар яңалыклары..