Ул үзенә тиешле препаратны ала алмавын, шунлыктан хәле начарланганын, урын өстендә генә ятып торганын җиткергән иде. Изге күңелле кешеләр ярдәме белән бер көн эчендә 600 мең сумнан артык акча җыелган. Изге эштә “ВТ” укучыларының да өлеше бар. Дәниф Шәрәфетдиновка ярдәм кулы сузган барлык кешеләргә рәхмәт җиткерәбез. Ул үзе дә барлык булышучыларга рәхмәтен җиткерә.

Җырчыга әле дә ярдәм итеп була. Андыйлар 89370423783 номерына беркетелгән Саклык банкына акча күчерә ала.

27 апрельдә исә Чаллы шәһәрендә Дәниф Шәрәфетдиновка ярдәм йөзеннән Сара Садыйкова исемендәге концертлар залында хәйрия чарасы уза.

Гөлгенә ШИҺАПОВА

Чыганак: "Ватаным Татарстан"

Запись Дәниф Шәрәфетдиновка бер көндә 600 мең акча җыелган! впервые появилась Tatar Today - татар яңалыклары..

– 2006 елдан бирле авырыйм бит инде. Табиблар язып биргән укол белән генә яшәдем. Быел исә аны бирми башладылар. Кая гына язмадым, кемгә генә мөрәҗәгать итмәдем. Файдасы булмады. Миңа беркем берни әйтми. Яңа елдан соң уколымны бирми башладылар. Сатып алсаң бар ул. Тик аена 60 мең кирәк. Җырчыларга чарасызлыктан хәбәр бирдем, – ди Дәниф. – Моңарчы уколым булганда, концертларда да чыгыш ясый идем. Даруны бирми башлагач, йөрүем начарланды. Күзләремә дә зыян килде. Алар начар күрә башлады. Мин хәзер ятып кына торырга мәҗбүр.
Дәниф Шәрәфетдиновка дарулар өчен 150 мең сум акча кирәк.

Ярдәм итәргә теләүчеләр 89370423783 номерына беркетелгән Саклык банкы картасына акча сала ала.

Гөлгенә ШИҺАПОВА

Чыганак : "Ватаным Татарстан"

Запись Дәниф Шәрәфетдинов: «Кирәкле препаратны бирмиләр, мин хәзер ятып кына торырга мәҗбүр» впервые появилась Tatar Today - татар яңалыклары..

Чыганак: "Шәһри Казан" сайты

Запись Җырчы Дәниф Шәрәфетдиновка ярдәм кирәк! впервые появилась Tatar Today - татар яңалыклары..

Еллар үткән саен тамашачыларның яраткан җырчысына әйләнгән автор-башкаручы, композитор Дәниф Шәрәфетдинов Татар Тудей сорауларына җавап биреп, бүген ничек иҗат белән яшәвен, гастрольләрен, Казанга беренче килгән вакытларын, Чаллыдагы тормышын нигә Казанныкына алыштырмаячагын, “Бәйрәм” ансамбле, аны Иркә җитәкләвенә фикерләрен сөйләде.

– Яшьлектә эшләнелмичә калган эшләр бармы?

– Күп кенә яңа җырлар калды эшләнә алмыйча. Иске җырлар дигән төшенчә юк минем өчен. Бар күңелгә якын җырлар. Шуларны кабаттан чыгарасы бар. Ел ахырыннан эшли башлаган идем, шуны дәвам итәсе иде.

– “Бәйрәм” ансамбле хәзер җырчы Иркә белән чыгыш ясый. Бу хакта халык тарафыннан күп фикерләр әйтелде. Кемдер моңа Хәния апаның рухын саклау, дип караса, кемдер аннан башка әлеге ансамбльнең булуы мөмкин түгел, дигән уйда. Сезнең моңа шәхси фикерегез нинди?

– Халык сүзенә барыбер колак салырга кирәк. Әле аларның чыгыш ясаганын күргәнем юк. Әгәр дә алар һәрбер концертта Хәния апаны искә алып, “Бәйрәм” ансамбле үз рухын саклый, аның җырлары яңгырый икән, мин каршы түгел.

Запись Дәниф Шәрәфетдинов бүгенге иҗаты, тормышы, “Бәйрәм” ансамбле, Иркә турында [видео] впервые появилась Tatar Today - татар яңалыклары..

ТНВ каналында “Адәм белән Һава” тапшыруының ябылуы тамашачыларны борчуга салды. Күп тамашачы үз тарафыннан, телеэкраннарда дәрәҗәле урын алган әлеге тапшыруның ябылуына каршы булуын белдерде. “Адәм белән Һава”  тапшыру гына түгел, ә зәвыклы концерт-тамаша да. Казанның Филармония залында 9 гыйнвар узган әлеге концерт, тапшырудагы кебек үк кеше белән бер элемтәдә, интерактив форматында узды, һәм хәтта, эстрададан югалып торган, ләкин тамашачы күңелен яулаган артистларны да халык хозурына чыгарды.

Концертта чыгыш ясаган артистларның бөтенесе диярлек “Адәм белән Һава” тапшыруының геройлары. Сәхнәгә халык күңелен күптәннән яулаган, әмма соңгы арада эстрадада сирәк күренгән җырчылар да катнашты. Алар арасында Асылъяр һәм Дәниф Шәрәфетдинов иде. Моның өчен тамашачы оештыручыларга аерым рәхмәт сүзләрен белдерде. Асылъяр исә, Ләйлә Дәүләтова әйдәп барган тапшыруда катнашмаган бердәнбер җырчыдыр мөгаен:

— Ләйлә белән без күптәннән таныш. Баштан, аның турында, әлбәттә, шигырьләренә язылган җырларны тыңлап белдем, аннан үзе белән танышып аралаша башладык. Бүгенге көндә мин башкарган бер генә җырыбыз бар, ул да булса “Мәхәббәт көче” дип атала, алга таба тагын уртак иҗат җимешләребез булыр дип өметләнәм. Ләйлә оештырган концертта җырлау бик рәхәт, чөнки ниндидер бер табигый, иркен нотада уза тамаша, дип сөйләде Асылъяр.

Сүз уңаеннан, җырчы “Адәм белән Һава” тапшыруын бик рәхәтләнеп караганын әйтте, һәм аның ябылуы хакында Татар тудей хәбәрчеләреннән генә белгән икән. Асылъяр бу күренешкә үз фикерен белдерде.

— Бу тапшыруны гаиләбез белән карыйбыз һәм аның ябылуы хакында сездән  беренче ишетәм, һәм әйтәсем килә, андый тапшыру бетәргә тиеш түгел. Гомүмән, һәр милләттә гаилә кыйммәте-иң төп кыйммәтләрнең берсе, ә татарда инде ул бигрәк тә. Гаиләле кешегә бөтенләй икенчерәк караш бит бездә, гаиләле-төпле кеше димәк дип карыйлар бит. Милли кыйммәтләребезнең төп нигезләренең берсе-гаилә, минемчә. Шуңа күрә, мондый тапшыру булырга тиеш. Беренчедән, ул тапшыру тамашачыга гаилә кыйммәтләренең әһәмиятен күрсәтсә, икенчедән, татар телебезне саклауда һәм үстерүдә зур ярдәм куя, чөнки бүгенге көндә телебез бетте диярлек, бары тик аһәңнәре генә калды. “Адәм белән Һава” телне саклауның бер юнәлеше иде. Мондый тапшырулар булырга тиеш, чөнки анда төрле гаиләләрне күрсәтәләр, гаилә булгач балаларга да сораулар бирәләр, фикерләрен беләләр. Тапшыруны бит олылар гына түгел, балалар да карый, ә телевизордан, интернеттан күрсәткән күренешләр популяр дип санала. диде җырчы.

Тамаша җырлар белән генә чикләнмәде, сәхнәдән пародияләр дә яңгырады. Халык тарафыннан аерым җылы кабул ителгән һәм алкышларга күмелгән чыгышларның берсе Фирдүс Тямаев һәм Русия президенты Владимир Путинга ясалган пародия иде. Пародияләрне, концертны алып барган Айнур Сөләйманов башкарды. Путинга ясалган пародиядә “Адәм белән Һава” тапшыруы ябылуы телгә алынды. Имеш тә нәкъ менә шул сәбәпле Путин бирегә килгән һәм әлеге мәсьәләне чишәргә җыена.

Популяр җырчы Дәниф Шәрәфетдиновның сәхнәгә чыгуы тамашачыларның күңелен тагын да күтәрде. Җырчының эстрададан югалып торуы халыкны борчуга салган булган. Искәртеп үзганча, тамаша интерактив рәвештә барды, тамашачылар Дәниф Шәрәфетдиновка сораулар яудырып, аның сәламәтлеге хакында, кайчан концертлары башлануы хакында сорашты һәм концертны оештыручы Ләйлә Дәүләтовага мондый артистларны күрергә мөмкинлек биргән өчен олы рәхмәтләрен белдерде.

Тамашада катнашкан популяр инстаблогер, инвалид арбасында булган Миләүшә Зарипова “Адәм белән Һава” тапшыруы аның тормышын ничек үзгәрткәне турында сөйләде.

— Бер көнне кибеттә булган вакытта “Эх, “Адәм белән Һава” тапшыруында катнашсам иде” дип хыялланып алдым. Ышанасызмы, биш минут та үтми Ләйлә Дәүләтова “Миләүшә, сезне тапшыруымда катнашырга чакырмакчы идем”, дип шалтырата. Чын могҗиза булды бу. Ул вакытта нәкъ инстаграмымны үстергән чакларым иде, шушы тапшыруда катнашканнан соң, бик күп кеше минем белән кызыксына, таный башлады. Шуның өчен мин Ләйлә Дәүләтовага бик рәхмәтлемен. Ул артистларны гына түгел, безнең кебек, әйтик мөмкинлекләре чикле булган, кешеләрне дә чакырып халыкка таныта. Бу бик мөһим һәм әлеге тапшыруның әһәмияте дә шунда иде. Инде тапшыру ябыла дигәч мин үзем дә бик борчылдым. Миңа калса, тапшыруны бетерергә ярамый, һәм Ләйлә моңа юл да куймас, ул барыбер берәр җаен табып тапшыруны алга таба да дәвам итәчәк дип өметләнәм, диде безгә Миләүшә ханым.

Әйе, дөрестән дә, тапшыруның авторы һәм алып баручысы Ләйлә Дәүләтова тапшыруны ябарга җыенмый. Барлык нечкәлекләрен безгә сөйләмәсә дә, тапшыруның һичшиксез дәвамы булачагы турында әйтте.

— Концертта катнашкан барлык артистларга да зур  рәхмәт, чакырганнары да, чакырмаганнары да килде. Ә тапшыруга килгәндә, кайгырырга кирәк түгел. Әйе, ул ябылды, ләкин халыкның моңа карата булган көчле реакциясе, үземә зур көч өстәде һәм, Аллаһ бирсә, ачырбыз дип уйлыйм. Төп төгәл ничек һәм кайчан икәнен әлегә әйтә алмыйм, ләкин “Адәм белән Һава” алга таба да тамашачыны яңа геройлар белән сөендерәчәк һәм тагын да яхшырак һәм кызыклы булачак. Тапшыруның форматын үзгәртәсем, яңалык өстисем килә. Әлегә шул үзгәртү өстендә эш алып барабыз. Камиллекнең чиге юк, шуңа күрә тагын да кызыграк итеп эшләргә ният, чөнки кеше нәрсә карарга тели -аңа шуны бирергә кирәк, дип әйтте Татар тудейга шагыйрә Ләйлә Дәүләтова.

“АДӘМ БЕЛӘН ҺАВА”НЫҢ УЗГАН ЕЛГЫ КОНЦЕРТЫ

Запись “Адәм белән Һава” концертында тамашачылар, җырчылар ТНВда тапшыруның ябылуына каршылык белдерде [видео] впервые появилась Tatar Today - татар яңалыклары..

Җыр Дәниф Шәрәфетдинов хәзер үз аягы белән йөри ала икән. “Бехтерев авыруы” дигән куркыныч диагноз белән дә Аллаһка шөкер итеп, һәр көнгә сөенеп яшәргә өйрәнгән! Без бу хакта  ТНВ каналында Ләйлә Дәүләтова алып барган “Адәм белән Һава” тапшыруының шушы көннәрдә эфирга чыккан яңа чыгарылышыннан белдек.

Дәниф нигә халык артисты Хәния Фәрхидән китүен, аның без белмәгән якларын, кайчаннан авырый башлавын, 8 мең пенсия алып, өстәмә иҗади эшләр белән шөгыльләнүен сөйләде. Сүзгә тормыш иптәше дә кушылды.

View this post on Instagram

A post shared by ⚡️TATAR TODAY агентлыгы⚡️🌍 🔊📺 (@tatar_today)

ТАТАР ТУДЕЙДА ДӘНИФ ТУРЫНДА АЛДАН БАСЫЛГАН ЯЗМА МОНДА – > Дәниф Шәрәфетдиновның хәле ничек? Әнисе, үзе сөйли, Хәния Фәрхи истәлеге, сынаулар…

Запись Дәниф Шәрәфетдинов “Адәм белән Һава”да куркыныч авыруы, нигә Хәния Фәрхидән китүен сөйләде [видео] впервые появилась Tatar Today - татар яңалыклары..

Җыйнак кына йорт. Өй тү­рен­дә япма белән ябылган гармун тора. Радиодан акрын гына музыка агыла, кемдер өзгәләнеп озын көй уйный… Өйгә коймак исе таралган. Сигезенче дистә­сен ваклаган Зәмфирә апа өй эчендә бөтерчектәй бөтерелә. Әле аш-суын кайгырта, шул арада хәл-әхвәл белешеп, сорауларга җавап бирергә дә җай таба.

– Җыр ул нәрсә дисеңме? Сөяксез тел күп сөйләсә дә, күңел түрендәге хисләрне, сер­ләрне әйтеп җиткерә алмый бит. Менә шунда җыр ярдәм итә дә инде. Дәниф авылга кайтса, кулына гармун алмыйча калмый. Мин аның халәтен күңеле сайлаган көйләр аша аңлыйм. Кеше моң­ланганда акыл артка чигенә. Син ярамый дигәнне читкә куеп торасың, күңел капкалары киң итеп ачыла. Улың күңелен ачкан икән, син ничек түзеп торасың инде?! Аңа кушылып җырлый башлыйм. Күздән яшьләр акканчы, күңел керләреннән арынганчы җырлыйбыз. Аннан икәү чәй эчәбез. Бер атналык көч тупладым, әни, дип китә балакаем. Дә­ниф теле ачылганнан бирле җыр­лап үскән бала шул ул, – ди ул.

Ана чәй ясаган арада төп­чегенең балачагына кайтып ки­лә. Аның бик сөйкемле, акыллы бала булуын телгә ала. Көче җитмәгәнне күтәрә, булдырмас­тайны булдырырга тырыша дип искә ала. Әллә шуның белән өзлектеме икән, дип берара тын кала.

Киров, гомумән, җырлы-моң­лы авыл ул. Әле берничә ел элек кенә Киров халык театры “Идел-йорт” фестивалендә гран-при алды. “Гөргөри кияүләре”н тәкъ­дим итте кировлар, җырга оста икәнлекләрен дә күрсәттеләр. Шуларны хәтердән үткәреп, Зәмфирә апага, театр дигән булып, эш калдырып йөри инде халык дим, уенын-чынын бергә кушып. Ул сынын турайтып берара сынап карап тора да, битәрләсәң яхшы түгел, яхшылык белән сеңдерим дигәндәй, салмак кына сөйләп китә:

– Үз гомеремдә кайда гына эшләмәдем, кызым. Пилорамда да, төзелештә дә, колхозда да. Биш ел сөт җыйдым. Миңа авыл­ның чабышкы атын бирделәр. Акыллы, әмма дуамал иде, бахыркаем. Сабан туе җитәрәк, дәртен тыя алмый, баскан урынында биеп тора, бөтен сөтне чайпалдырып, түгеп бетерә иде. Халык театрына аяк баскан кеше дә нәкъ шундый халәт кичерә. Аның спектакльләрдә катнашасы, катнаша алмый икән инде, авылдашларының уенын барып күрәсе килә. Менә мин хәзер катнашмыйм, барып карыйм. Җан рәхәтлекләре алып кайтам. Дә­ниф тә шулай. Аның җырлыйсы, концертлар куясы килә. Тик сәламәтлеге генә чамалы шул…

Зәмфирә апа биш бала тәр­бияләп үстергән. Бер баласын, ирен салкын гүргә иңдерергә, бала хәсрәтләрен күтәрергә дә язган аңа. Абыйсының үлем хә­бәрен әйтергә дип авылга кайтканда Дәнифе дә һәлакәткә тарыган. Шуннан бирле сәламәтлеккә мантымый, дип өзгәләнә ул.

Бу гаиләдә бөтен кеше җыр­лый, Дәниф аеруча моңлы икән. Ләкин әти-әни башта балала­рының бу шөгылен бик кабул итеп тә бетерми. “И, бала, юрган асларына качып гармун тарткан була, җырлаган була, таланты юк бит инде”, – ди бер көнне Зәм­фирә апа иренә. Дәниф моны ишетә. Шушы сүзләрне әле дә онытмый, ди ана.

Кызыксынып китеп, Дәниф Шәрәфетдинов белән элемтәгә кердек. Чыннан да хәтерли икән әнисенең әлеге “диагноз”ын:

– Минем башта табиб булырга дигән уем бар иде. Шуңа күңеле төште бугай әти-әнинең. Уйлап баксаң, тумыштан җырчы булырга язгандыр инде миңа. Чөнки әти дә, әни дә бик матур җырлый. Шуңа күрә укытучылар кечкенәдән сәхнәгә тартты. Халык җырларына мөкиббән идем. Иртәнге алтыда Башкортстан радиосын тыңлап була. Кинәнә идем башкорт җырларын тың­лап! Дүртенче сыйныфта укыгандамы икән, Актанышта фестиваль узды. Анда авылыбызның фольклор ансамбле белән чыгыш ясадым. Шунда Миңгол Галиев күреп алган, сиңа бу тавышны әрәм итәргә ярамый, Казанга укырга кил, диде. Шулай итеп Казан мәктәбе укучысы булып киттем. Өч атна түздем дә, сагынып, кире авылга кайттым. Шуннан бирле гел сәхнәдә мин. Күбрәк юмористик номерлар белән чыгыш ясадым. Хәтта музыка көл­лиятенә укырга кергәч тә, баянчы булу турында уйладым. Ак­рын­лап җырлый башладым. Берзаман авылга концерт куярга кайттык. Концерттан соң әнидән, йә, әни, бармы талантым, дип сорадым. Аркамнан какты. Безнең әни мактый да, мактана да белә торган кеше түгел. Мин дә шулай. Кайчак, Актаныш кешесе түгел­сеңдер лә син, дип тә әйтәләр…

Дәниф Шәрәфетдинов – иң популяр чагында сәхнәдән юкка чыгуы белән дә истә калган җырчы. Сүз уңаеннан бу хәлләр турында да сораштык. Ул болай җавап бирде:

– Кызыксынган кеше белә инде аны. 2003 елга кадәр җыр­ла­дым. Аннан соң Себергә киттем, Нижневартовск шәһәрендә ярты елдан артыграк Милли мәдәни үзәктә эш­ләдем. Нишләп киттемме? Хез­мәт хакы бик аз вакыт иде ул. Мин училище дипломы белән генә калган җырчы, гаиләле булгач, вузда укуны дәвам итү мөмкинлеге булмады. Дуслар, музыкант кирәк, дип чакырды да тәкъдимне кабул иттем инде. Салкын тидереп, күңел төшен­келеге белән кайттым. Яңа елда 52 градус салкын булуы истә. Без бит андый шартларга ияләш­мәгән. Кайту белән хастаханә юлын таптау башланды. Диагноз куя алмыйлар гына бит. Ике ел шулай үтте. Гәүдәм авырлыгы 68 килограмм иде, 38гә калды. Аңа кадәр машина белән һәлакәткә очраган идем. Күрәсең, вакытында бөтен җәрәхәтне дә күреп бетерә алмаганнардыр. Чөнки һәлакәттән соң “Бәйрәм” ансамб­лендә дә эшләдем, үз төркемем белән дә концертлар куеп йөр­дем. Сызлансам да, хәл түзәрлек иде. Баксаң, умыртка сөягендә өч җирдә җәрәхәт булган икән. Мин шул килеш эшләп йөргән­мен. Әти-әни, хатыным, балала­рымның миңа мөлдерәп карап торулары ихтыяр көчен арттырды. Акрынлап тормышка кайта башладым. Барысын да яңадан өйрәнергә туры килде.

Дәниф Шәрәфетдинов узган елны Чаллыда Хәния Фәрхи истә­легенә багышланган концертта чыгыш ясады. Моңы белән бөтен халыкны тетрәндер­де ул. Сабан туйларында да бик катнашасы килә дә, быел янә өзлегеп киткән икән. Авырлык­лар бар, Алла боер­са, аларны җиңәм дә, җыр­лыйм әле мин, ди, ышандырырлык итеп. Сабан туе дигәннән. Моннан берничә ел элек Зәм­фирә апа Сабан туенда җырлаган икән. “Озата барма” – иң яраткан җырым, шуны сайлаган идем, ди. Янымда Дәниф басып торса гына җырлыйм, дигән шарт та куйган булган. Улы янына чыккан. Без дә шушы җырны җырлавын үтен­дек. Зәмфирә апа ялындырып тормады, ләкин җырлап бетерә алмады. Дәни­фем янымда булмаса, тавышым өзелә шул, ди ана.

Ватаным Татарстан газетасы язмасы  һәм фотосы

Запись Дәниф Шәрәфетдиновның хәле ничек? Әнисе, үзе сөйли, Хәния Фәрхи истәлеге, сынаулар… впервые появилась Tatar Today - татар яңалыклары..

Тавышы гына матурдыр дисәм, уйлары, фикерләре дә башкаларныкына охшамаган, үзгә икән. Тормышчан. Фәлсәфи. Ә ихласлыгы! Якын кешең, дустың төсле рәхәтләнеп көлә-көлә сөйләшүе тәмам әсир итә.

– Дәниф, тамашачы югалтты бит үзеңне. Хәтта “зарлы телефонга” шалтыратып кайдалыгыңны сораучылар бар…

– Күзләргә операция ясатып йөрим бит әле. Менә бер ел булды дигәндә, дүртесе көнне сул күземә ясадылар. Шушы арада тагын Казанга барам, икенче күзгә дә операция ясарга кирәк. Күзләр гел томаланып бетте. Хатыным җитәкләп кенә йөрде. Хәзер әкрен-әкрен генә үзем йөри башладым, Аллага шөкер. Бер күз азрак ачыла. Дөньялар ямьләнеп китте! Минем бит бер ел зәңгәр күк йөзе күргән юк иде…

– Нәрсә булды күзләреңә, һаман да шул авария нәтиҗәләреме әллә?

– Юк, аварияның катнашы юк. Сул күз алмасының челтәр катлавы аерылган. Ә уңда катаракта һәм тагын шул челтәр катлавы да түгел микән диләр.

– Җырламыйсың, концертлар белән йөрмисең инде алайса…

– Ноябрьнең дүртесендә бер ел була концертлар белән йөрүдән туктаганга. Соңгы концерт Башкортстанда, Бакалы районында узды. Шунда салкын тиеп, күзләрем начараеп китте. Аңа кадәр районнарда, авылларда гел чыгыш ясадым. Мөмкинлек булганда, чакырган җиргә барып җырлап кайтырга тырышам..

– Яңа җырлар яздырасыңмы?

– Күз күрмәү сәбәпле яздыра башлаганнары да тора хәзергә. Сүзләрен ятлый алмадым. Авторлар шалтыраталар инде, үпкәлиләр. Җырлар күп җыелды. Тагын бер-ике ай көтсәләр, яздырабыз. Каян җыр алыйм икән дип аптырап торган юк. Чөнки электән язган җырлар бүген дә рәхәтләнеп башкара торган. Шуңа күрә элек җырлаганнарына да аранжировкалар ясап, яңартырга ният бар. Күңелемә тия торган әйбер дә шул: концерт саен тоталар да яңа җыр җырлыйлар. Җырның кадере бетте хәзер. Радиодан да көн саен өр-яңа җыр!

– Тормышта нәрсә кирәк: әрсезлекме, тәвәккәллекме?

– Икенче бәхет диләр бит инде әрсезлекне. Ләкин минем әрсез булганым юк. Тәвәккәллек кирәк, минемчә. Аермасы бар инде аның. Ярдәм сораганда, эшли башлаганда кирәктер бераз әрсезлек тә. Чамасы белән генә. Ботканы май белән бозып булмый диләр. Ләкин артык майлы булса да тәмле булмый бит ботка.

– Ә эстрадада?

– Тәртип кирәк. Профессионаллар кирәк. Һәр кеше үз эшен белеп башкарырга тиеш. Тавыш операторы да, композитор да, җырчы да. Ә хәзер аппаратура сатып алалар да оператор булып йөриләр. Музыкаль белеме булмаган кешеләр композитор дип атыйлар үзләрен.

Без сәхнәгә ни өчен чыгабыз? Халыкка нидер бирергә, җиткерергә. Сәхнәгә чыкканмын икән, мин кешене яхшы гамәлләр кылырга әйдәргә тиеш. Алдап, начар үрнәк күрсәтеп йөрергә тиеш түгел. Мин үземне тамашачымның хезмәтчесе итеп күз алдына китерәм. Мин халыкка хезмәт итәм.

– Дәниф, күңел төшенкелегенә бирелмәс өчен ни эшләргә?

– Баштан үткән инде бу хәлләр. Ике-өч ел кеше белән аралашмыйча, хәтта өйдән чыкмыйча, гел сөяккә генә калып урын өстенә ятып беткән идем. Аралашырга кирәк! Сәламәт тормыш алып барырга, дөрес тукланырга кирәк.

– Хәзер күп кеше социаль челтәрләрдә аралаша.

– Юк, аралашу түгел бу. Бу “аралашу” дип үз-үзеңне алдау гына. Ак белән караны бутау! Социаль челтәрләргә мин үзем хатлар укып, үземә кирәк информацияне алу өчен генә керәм.

Йокларга ятар алдыннан компьютерда, интернетта утырырга ярамавы – расланган әйбер. Әгәр дә кич озаклап компьютерда утырасың икән, иртән башың тубал кадәр була. Иртәрәк тор син, сөеклең торганчы чәеңне кайнат, кофеңны ясап куй!

– Сезнең гаиләдә кем иртәнге кофены ясый соң?

– Ничек туры килә инде анысы… Мин иртә торам, дүртенче
яртыда аяк өстендә инде.

– Әти-әниләр ике яктан да исәнме? Кайтып йөрисезме?

– Әтиләр – мәрхүмнәр. Әниләребез, Аллага шөкер, исән. Айга бер булса да кайтып күрергә тырышабыз. Элегрәк атна саен кайта идек. Чаллыдан Актанышка китәбез, аннан Азнакайга… Ике якны да тигез күрәбез. Кодагыйлар да үзара гел шалтыратышып, чөкердәшеп кенә торалар, кунакларга йөрешәләр.

– Йолдызнамәләргә ышанасыңмы?

– Ышанмыйм. Тыңлаганым да юк. Без үзебез йолдызнамә. Иртән торып аякны идәнгә бисмилла әйтеп куеп, тәрәзәгә карасаң…Кояшлы көн булса да, яңгыры, кары яуса да шуның матурлыгына сокланып яшим.

– Ялгызлыктан куркасыңмы, Дәниф?

– Юк. Ялгызлык ул – күңел халәте генә. Кеше бит гел үзен жәлләтеп калырга тырыша. Авырлыкка түзә белергә кирәк. Гомер буе баш ияргә дигән сүз түгел бу. Сабыр булырга кирәк. Проблемалар эштә тә дә, дуслар белән дә булырга мөмкин. Ничек тә үткәрә белергә кирәк. Үзеңне жәлләтеп, кызгандырып йөрергә түгел.

Ялгызлыкны мин нәрсәдә күрәм: балаларыңны башлы-күзле итеп, аларга белем, тәрбия, фатирлар алып биреп, кабат берүзең картлар йортында яшәү. Менә монысы хак ялгызлык! Минем гел җаным әрни, күңел рәнҗи менә шушындый күренешкә.

– Ә якыннарың арасында сине аңлаучы, ишетүче булмаса?

– Аңламыйлар икән, димәк дөрес аңлата белмим. Үзем гаепле! Бары шулай гына. Бер кешене дә гаепләгәнем юк. Шул чагында гына алга таба барып була.

– Зәринә белән үпкәләшәсезме?

– Әйткәләшкән чаклар булгандыр инде ул, әмма гариза тотып судка аерылышырга йөгермәдек. Әти-әниләргә дә сиздермәдек бер-нәрсәне дә. Урамга да чыгып елап утырмадык. 2005 елда минем пенсия инвалидлык буенча 2700 сум иде. Хатынның хезмәт хакы 4 мең чамасы. Менә шушы акчага әле без кеше фатирына түләп тордык, һәм ике бала укыттык. Торырга фатирым да юк иде, быел гына ипотекага алдык әле. Бу – безнең баштан кичкән нәрсә. Яшәдек.

– Тормышта иң сагындырган хатирәләрең?

– Бәләкәй чакларым. Ретро җырлар тыңлаганда да, элекке кинолар караганда да әти исән чаклар, балачакларым бик нык сагындырып искә төшә.

Автор: Альбина Гайнуллина

Чыганак: Акчарлак
Фото: https://vk.com

Запись “Әкрен генә үзем йөри башладым”: Тамашачы югалткан Дәниф Шәрәфетдинов операция ясата – Акчарлак впервые появилась Tatar Today - татар яңалыклары..

Запись “Шәһри Казан” өеннән чыга алмый яткан җырчы Дәниф Шәрәфетдинов белән елатырлык әңгәмә яза впервые появилась Tatar Today - татар яңалыклары..