“Татар җыры – 2019” пресс-конференциясендә халык артисты Хәмдүнә Тимергалиева Татарстанның атказанган артисты Фирдүс Тямаевка шелтә белдереп, аны “буш башак” белән чагыштырган иде. Татар Тудей бу вакыйгага карата татар эстрадасы йолдызларының мөнәсәбәтен ачыклады.

Запись “Пычрак ату кирәк түгел” – Хәмдүнә Тимергалиева Фирдүс Тямаевка “буш башак” дияргә хаклымы? [видео] впервые появилась Tatar Today - татар яңалыклары..

14 декабрь Казанның Пирамида залында “Болгар радиосы” Милли музыкаль премиясен тапшыру тантанасы үтте. Бу чарада Филүс Каһиров катнашмады. Моның сәбәбен белер өчен, Татар Тудей җырчы һәм “Болгар радиосы” белән элемтәгә керде.

– Филүс, нигә “Болгар радиосы”ның милли музыкаль премиясендә катнашмадыгыз? Ялгышмасак, “Болгар радиосы” оештырган быелгы концертларда гомумән күренмәдегез, ТНВның Яңа ел бәйрәме тамашасы төшерүләрендә дә булмадыгыз кебек?

– “Болгар радиосы” премиясенә, дөресен генә әйткәндә, белмим, ни өчен чакырмаганнардыр. Ул көнне мин катнаша ала идем. Ләкин чакыру килмәде. Бу сорауны “Болгар радиосына” бирергә кирәк дип уйлыйм, бәлки катнаштырасылары килмәгәндер. Ә ТНВ Яңа ел съемкасында булдым.

“Болгар радиосы” премиясендә генә катнашмадым. Дөресен генә әйткәндә, премиядә генә түгел, “Болгар радиосы” үткәргән чараларда соңгы мәлләрдә катнашканым юк. Чакырулар килми, белмим, бәлки мин ул программаларга сыя алмыймдыр, бәлки җырчыларның яхшыраклары бардыр, диде Татар Тудей порталына Татарстанның атказанган артисты Филүс Каһиров.

2017 елгы фото, “Болгар радиосы” студиясендә 

View this post on Instagram

A post shared by Филюс Кагиров (@kagirov_filyusfun_official)

Безнең сорауга “Болгар радиосы”ның баш мөхәррире, радио продюсеры Илфар Кәримов аңлатма бирде:

– Без Филүс белән хезмәттәшлек итәбез. Әлбәттә, ул концертларның бер бизәге. Ләкин быел ул яңа җырлары белән әллә ни сөендермәде. Бәлки әле яңа җырларының эфир өчен әзерләнгән варианты гына юктыр. Ә “Болгар радиосы” эфирында бүгенге көндә барган җырлары инде “Болгар радиосы” Милли музыкаль премиясенә лаек булган иде.

Запись Филүс Каһиров нигә “Болгар радиосы” концертларында, “Милли премия”дә катнашмый әллә катнаштырмыйлар? впервые появилась Tatar Today - татар яңалыклары..

– Илфар, «Болгар радиосы» Милли музыкаль премиясе бүгенге заман татар эстрадасын популярлаштыру һәм үстерүдә нинди роль башкара?

• «Болгар радиосы» Милли музыкаль премиясен тапшыру тантанасы – ул нәтиҗә ясау. Ләкин бу бөтен татар эстрадасына нәтиҗә ясау түгел. Бу – “Болгар радиосы”ның һәм “Болгар радиосы” тыңлаучыларының фикере. Һәрбер җырчы, һәрбер иҗатчы өчен бу премия стимул булып тора, чөнки иң яхшылары гына әлеге премиягә лаек була. Һәркайсы үзенә күрә тырыша, халык яраткан темаларга җырлар иҗат итә. Болар барысы да татар эстрадасының үсешенә этәргеч булып тора. Шуңа күрә без азмы-күпме үз өлешебезне кертәбез дип уйлыйм.

– «Болгар радиосы» Милли музыкаль премиясен алу җырчылар өчен никадәр мөһим? Бу аларның иҗат тормышында әһәмиятле баскычмы, яки башка җырчылар алдында масаюмы?

• Монда барысы да бардыр. Һәр иҗатчы өчен, беренче чиратта, иң мөһиме – иҗатыңны бәяләү, күрә белү. Җырчы җырны халык өчен иҗат итә. Әгәр синең иҗат җимешең танылып китә, өстәвенә премияләргә лаек була икән, икеләтә канатланып эшләргә стимул булып торадыр. Ә җырчы өчен бу премия – ул дәрәҗә дә, чөнки радио һәм тамашачы тарафыннан сиңа игътибар дигән сүз. «Болгар радиосы» Милли музыкаль премиясенең дәрәҗәсе елдан-ел арта. Зур концертларда да җырчыларны сәхнәдә игълан иткәндә, «Болгар радиосы» Милли музыкаль премиясе лауреатлары дип чыгаралар.

– Бу синең катнашыңдагы ничәнче премия? Синең күзәтүләрең буенча, «Болгар радиосы» Милли музыкаль премиясенең дәрәҗәсе үсәме?

• Бу премиянең җидесенең дә шаһиты булдым. Соңгы дүртесен үземә оештырырга туры килде. Үсеш бар дияр идем. Беренче еллар белән чагыштырганда, җырчыларда, җырларның сыйфатында, сәхнә бизәлешендә, ут куелышында – һәр яклап үсеш бар. Гел бер урында таптанып торабыз икән, бу эшне башкаруның кирәге дә булмас иде. Камиллеккә омтылырга кирәк. Без тыңлаучыларга, тамашачыларга сыйфатлы продукт тәкъдим итәргә тырышабыз. Бу сыйфатлы продуктка сыйфатлы җырлар, сыйфатлы башкаручылар, сыйфатлы сәхнә бизәлеше, ут куелышы керә. Без ел саен тамашачыларга яңалык тәкъдим итәргә тырышабыз. Үсеш юк дию дөрес булмас иде.

– «Болгар радиосы» Милли музыкаль премиясе – җырчылар белән бергә авторларны да бүләкләүче бердәнбер тантана. Әмма бу яңалык та күптән түгел генә барлыкка килде. Ни өчен моңа кадәр авторларны бүләкләү булмады?

• Бу – «Болгар радиосы» Милли музыкаль премиясенең төп үзенчәлекләренең берсе. Җыр җырчы тарафыннан гына тумый. Башта шигырь языла, аннан көй иҗат ителә. Җыр җырчыга килеп эләккәч, җырга аранжировка ясала. Әзер продуктны җырчы тамашачыга тәкъдим итә. Җырны әзерләүдә бик күп кешенең өлеше керә. Шуңа күрә без моны читләтеп уза алмадык, җырның сүз һәм көй авторына да премия тапшырабыз. Дөрестән дә, элекке елларда авторларны бүләкләү юк иде. Ләкин тора-бара шундый нәтиҗәгә килдек. Башта “Кайнар хит” җиңүчеләренең җыр авторларын гына бүләкли идек. Әлеге проектта нәкъ менә җыр җиңеп чыга, халык җыр өчен тавыш бирә. Ә җыр җиңеп чыга икән, димәк, җырчы гына түгел, ә җырны иҗат итүчеләр дә җиңүче дигән сүз. Соңыннан башка җырчылар ни өчен “Кайнар хит” җырларының гына авторлары бүләкләнүе, ә аларныкы читтә калуы турында сорый башлады. Шуңа күрә аеру булмасын, һәркем тигез дәрәҗәдә булсын дип, премиягә лаек булган һәр җырның авторын бүләкләргә, дигән карарга килдек. Миңа калса, бу – дөрес һәм гадел.

• Елның мөһим һәм грандиоз чарасына әзерләнгәндә иң катлаулысы нәрсә?

• Иң катлаулысы – оештыру эшләре. Бу чараның продюсеры буларак, минем өстә бик күп вазыйфа ята. Җырчылар туплау, сценарий, алып баручылар, килешүләр төзү өчен җаваплы, кыскасы, барысын да күз уңаенда тотарга кирәк. Әлбәттә, мин үзем генә түгел, без бер команда булып эшлибез, фикерләшәбез, аралашабыз. Кайвакыт фикерләр туры килмәгән вакытлар була. Сценарий язылганда, номинацияләрне тәкъдим иткәндә, сәхнә бизәлешен уйлаганда, фикер каршылыгы булырга мөмкин. Ләкин иҗат кешеләре арасында андый әйберләр булырга тиеш тә ул. Шуңа күрә иң авыры – барысын да оештырып, сыйфатлы продукт тәкъдим итү.

– Җитәкче буларак, үзеңне ни дәрәҗәдә җаваплы тоясың?

• Мондый зур эшкә алынганда, команда булу бик мөһим. Үзең генә бу эшне башкарып чыгу мөмкин түгел. Мине “Болгар радиосы”ның баш мөхәррире һәм продюсеры итеп билгеләгәч, концертларга үзем генә алынган идем. Минем өчен бу, гомумән, яңалык иде. Килешүләр төзүдән башлап, җырчыларны туплау, репертуар барлау кебек эшләргә кадәр башкарырга туры килде. Мин моны энәсеннән җебенә кадәр өйрәндем. Хәзер исә бергә эшләгән командага “менә моны болай эшләргә кирәк” дип әйтү җиңелрәк. Хәзер инде бу эш җайга салынган. Ләкин җаваплылык хисе беркайчан да кимеми. Тиешле дәрәҗәдә башкарыламы, юкмы дип күзәтәм. Сценарист белән дә эшләгәндә, җырчыларны сәхнәгә чыгу тәртибен язганда, матбугат очрашуын оештырганда киңәшләшәбез. Башта мең төрле фикер, иң мөһиме – фикерләр чуалмаска һәм үз командаңнан ни көткәнеңне син анык белергә тиеш.

– Бер елны «Болгар радиосы» Милли музыкаль премиясен тапшыру тантанасы Мәскәүдә узган. Ни өчен бу эш туктатылды һәм киләчәктә әлеге тантананы Мәскәүдә оештыру теләге бармы?

• Әйе, үземнең катнашым булмаса да, Мәскәүнең Кремль залында узган тантанага әзерлекне күзәтергә туры килде. Оештыру эшләре зурдан башкарылды, иң затлы җырчылар чыгыш ясады. Ләкин, минемчә, ул елны премияне башта Казанда оештырырга кирәк иде. Ләкин бер ел узганнан соң, ул Мәскәүдә концерт буларак оештырылды. Ә Казанда аны телевизион вариантта гына эшләделәр. Бу «Болгар радиосы» Милли музыкаль премиясенең бренд буларак үсешенә киртә кебек тоелды. Хәзер декабрь ае җиттеме, «Болгар радиосы» Милли музыкаль премиясен тапшыру тантанасы була. Халык та бу вакыйганы көтеп ала. Ләкин Мәскәүдә үткәрелгән елны өзеклек килеп чыкты. Минемчә, безнең төп тамашачыбыз һәм тыңлаучыбыз биредә яши. Без алар өчен эшләргә тиеш. Ә Мәскәүдә гала-концерт кебек оештырырга кирәк дип уйлыйм. Киләчәктә Мәскәүгә бару теләге бар.

– «Болгар радиосы» Милли музыкаль премиясенең үзенчәлеге һәм популярлык сере нәрсәдә?

• Әйткәнемчә, без авторларны да билгелибез. Икенчедән, без премия исемендәге “милли” сүзенә тәңгәл. Милли дигәч тә, сәхнәгә читек киеп чыгу дигән сүз түгел. Миллилек алып баручылар телендә, сценарийда чагыла. Мәзәкләр һәм шаяртулар урынлы булырга тиеш. Сөйләм әдәби телдә булсын дип тырышабыз. Киемнәрдә милли элементларны чагылдырырга телибез. Биюләр әзерләнгәндә дә миллилеккә өстенлек бирәбез. Тагын бер миллилек – тантананың пафоссыз, ләкин шул ук

вакытта югары дәрәҗәдә узуы. Без алтын урталыкны сакларга тырышабыз.

– «Болгар радиосы» VII Милли музыкаль премиясен тапшыру тантанасында тамашачыны ниләр көтә?

• Хәзер халыкны шакаттыру кыен. Тамашачы концертка нәрсәгә дип килә? Беренче чиратта, бу тантананың шаһиты булырга. Шуңа күрә төп бурычыбыз – тамашачыга сыйфатлы продукт тәкъдим итү. Вакыйга “Пирамида”ның фойесында ук башланып китә. Тамашачыларны музыка белән каршы алып, бүләкләр тапшырачакбыз. Менә инде ничәнче ел рәттән тамашачыларга йолдызлар бүләк итәбез. Быелның тагын бер үзенчәлеге – теләгән һәркемгә бушка фотомагнитлар өләшәчәкбез. Фойеда куелачак фотозоналарда фотога төшү мөмкинлеге булачак. Әзер фотомагнитларны антракт вакытында алырга мөмкин. Миңа калса, моңа кадәр мондый әйбернең беркая да булганы юк әле. Концерт залында исә ут куелышы дисеңме, сәхнә бизәлешеме – биредә башка төрле дәрәҗә. Бу гадәти генә концерт түгел. Гадәттә, Яңа елны яки Сабан туен сагынып көтәләр. Ә җырчылар «Болгар радиосы» VII Милли музыкаль премиясен дә көтеп ала. Бу алар өчен, чын мәгънәсендә, ел вакыйгасы. Бирегә килү тамашачыларның да күркәм традициясенә әверелсен иде.

– Быелгы «Болгар радиосы» VII Милли музыкаль премиясенә ничә җырчы лаек булачак? Белүемчә, монда төрле яшьтәге артистлар катнаша.

• Быел 30дан күбрәк номинация булачак. «Болгар радиосы» VII Милли музыкаль премиясенең үзенчәлеге шунда – биредә яшь башкаручылар да, тәҗрибәле, өлкән буын вәкилләре дә катнаша. Безнең радиода алар да яңгырый, алар да иҗат итә. Аларны төшереп калдырып, яшьләргә генә борылсак, дөрес булмас иде. Ел саен “Татар эстрадасы легендасы” дигән номинация тапшырабыз. Алдагы елларда әлеге номинациягә Хәмдүнә Тимергалиева, Флера Сөләйманова кебек олпат шәхесләребез лаек булган иде. Быел бу номинациянең кемгә тапшырылачагы әлегә сер. Тамашачылар аның исемен 14 декабрь көнне генә белә алачак. Ул шулай ук хөрмәткә лаек өлкән җырчыбыз.

– Телевизор экраннарында һәм социаль челтәрләрдә булачак лауреатлар белән видеочакырулар урнаштырылган. Ни өчен аларны тамашачыга алдан ук күрсәтәсез?

• Бездә булачак лауреатларны халык сайлый. Ә халык сайлаган җырчыларны ни өчен сер итеп сакларга? Мин моның кирәген тапмыйм. Артистларны сер итеп саклау – ул ясалма рәвештә интрига тудыру. Унике ай дәвамында “Кайнар хит” проектында җиңгән 12 кеше болай да билгеле, аларны халык сайлый. Алар автомат рәвештә «Болгар радиосы» Милли музыкаль премиясенә эләгә. Моннан тыш, ел дәвамында күзәтү алып барабыз. Хатларда, смсларда, сайтта, социаль челтәрләрдә халык тарафыннан еш соралган җырларны барлыйбыз. “Болгар радиосы” алып баручылары белән җыелышларда фикерләшәбез, айның аеруча популяр булган җырын билгелибез. Төп интрига шунда, җырчыларның кайсы номинациядә җиңүе билгеле түгел. Аларны 14 декабрьдә генә игълан итәчәкбез.

– Синең тәҗрибәңдә артистның үз номинациясе белән килешмәү очраклары булдымы?

• Беркайчан да җырчыларның андый сүз әйткәне булмады. Ул номинацияләр һавадан алынмый, җырчының иҗаты, аның эшчәнлеге өйрәнелә. Менә әйтик, Ришат Төхвәтуллин «Болгар радиосы» Милли музыкаль премиясен җиденче тапкыр алачак. Бер елны без аның үзенә генә түгел, иҗат төркеменә дип тапшырдык. Ул елны Ришат гастрольләрдә күп йөрде һәм, чынлап та, аның төркеме бик көчле, биюче-музыкантлары югары дәрәҗәдә. Ришат шушы командасы белән дә үзенә тартып торадыр. Бер җырчының да “нигә миңа бу номинацияне бирдегез?” дип дәгъва белдергәне булмады.

– Ел саен «Болгар радиосы» Милли музыкаль премиясен төрле йөзләр алып бара. Ни өчен алып баручылар һәрдаим алышынып тора? Быелгы тантананы кемнәр алып барачак?

• Безнең төп максат – “Болгар радиосы” алып баручыларын чыгару. Беренче тапкыр оештырганда шулай эшләдек тә, барлык алып баручылар да сәхнәгә чыкты. Ләкин сәхнәдә алып баручыларның күп булуы ниндидер буталчылыкка китерә дип уйлыйм. Шуңа күрә соңгы елларда төп алып баручылар Рөстәм Гайзуллин белән мин. Быел да тамашаны бергә алып барачакбыз. Ләкин алып баручы кызыбыз тагын үзгәрде. Ул – ТНВда эшләүче коллегабыз. Аның исеме дә интрига булып калсын әле.

– Быел җәй көне көтеп алынган вакыйга булды – син өйләндең, ә гаилә күп игътибар таләп итә. Шул ук вакытта радиода да җаваплы вазыйфа башкарасың, эшең өйгә ияреп кайта. Хатының моңа ничек карый?

• Электән эшнең өйгә кайтуын яратмый идем. Мин беренче һөнәри адымнарымны телевидениедә ясадым, атна саен “Яшьләр тукталышы” тапшыруын чыгара идек. Бер тапшыруны җыю өчен атна дәвамында сюжетлар төшерергә, өйгә кайткач та уйларга, кыскасы, гел иҗат итәргә туры килә иде. Студент булуымны да исәпкә алганда, бу миңа мораль яктан бик авыр иде. Аннан соң мин радиода эшли башладым. Туры эфирда эшли идем дә, өйгә эш кайтмый иде. Әмма хәзер алай түгел, өйдә дә эшләргә туры килә. Баш миен сүндереп куеп булмый, уйлыйм, язам, сызам, планлаштырам. Кайвакыт өйгә кайтып, чәй эчәргә утыргач та, без кызып-кызып эш турында сөйләшәбез. Берничә минуттан соң гына өйдә эш турында уйлавыбызны аңлап алабыз. Тик эшеңне ничек кенә яратсаң да, гаиләгә игътибарлы булырга кирәк. Хатыным мине аңлый, аның белән киңәшләшүе дә рәхәт. Эш буенча үпкәләшкән, талашкан юк.

– Синең өйләнүең безнең өчен көтелгән вакыйга һәм шул ук вакытта ул тиз арада булган кебек тоелды. Гөлинә белән күпме очрашып йөрдегез?

• Гөлинә ике ел элек радионың реклама бүлегенә менеджер булып урнашты. Эштә еш күрешә идек. Аннан соң мин аны күзәтеп йөри башладым. Уңган-булган кыз икән, дип үзем өчен нәтиҗә ясадым. Хисләр әкренләп уянды. Аралашып киттек, очраша башладык. Чынлап та, вакыйгалар тиз үрелеп барды, аңламыйча да калдым. Насыйп ярым янәшәмдә генә булган икән дим. Гаиләле булу теләге көчле булды, яшем дә бара иде. Дуслар да “кайчан өйләнәсең инде?” дип сорыйлар иде. Ләкин кирәк дип, беренче очраган кешегә өйләнеп булмый, ярату һәм хөрмәт хисе булырга тиеш.

– Хезмәттәшләрегез бу яңалыкны ничек кабул итте?

• Мин шәхси тормышым турында кычкырып йөрергә яратмыйм. Сөйгән ярымны очраттым, өйләнәм, дип рәсми рәвештә игълан итмәдем. Сөенгәне сөенгәндер, көенгәне көенгәндер.

– Туегыз ничек узды?

• Туйны 14 июльдә үткәрдек. Минем туйга җырчылар чакырып, шоу ясыйсым килмәде. Якыннар белән генә бәйрәм итәргә уйладык. Туй күңелле узды. Аллага шөкер, хатынымның туганнары ачык, рәхәт кешеләр. Мин аның әти-әнисенә “әби”, “бабай” дим. Безне мунча ягып, мул табын белән каршы алалар. Ике якны да тигез күреп яшибез, бер атнада безгә, икенче атнада алар ягына кайтабыз.

– Гөлинә – гаиләдә бердәнбер бала. Ул иркә кызмы?

• Алай дип әйтмәс идем. Ул – Балык Бистәсе кызы. Бәрәңгесен дә ала, печәнен дә чаба белә. Өйдә генә иркәләнеп ята торган кыз түгел, эш рәтен белә. Әмма кирәк вакытта иркәләнә дә белә.

– Һәрбер ир-атка хас булган ул үстерү, йорт салу, агач утырту теләге синдә дә бармы?

• Әлбәттә, ир-атның андый максаты булырга тиеш. Улыбыз булуын һәм үз йортыбыз белән яшәвебезне телим. Агачны үз гомеремдә күп утырттым инде. Ул утырткан агачлар өй салырлык булгандыр.

– Тормышыңны нәрсәдән башка күз алдына китерә алмыйсың?

• Туганнардан һәм якыннардан башка. Мин – туган җанлы кеше. Чит илгә китәргә тәкъдим булса, китә алыр идемме икән, дип уйлап куям. Күп очракта “юк” дигән фикергә киләм. Дуслар, туганнар белән аралашу, күрешү – минем өчен бик мөһим, миңа шулай җайлы, рәхәт. Яраткан эштән башка да яшәп булмый. Эшеңә яратып бармыйсың икән, бу – стресс, эшеңне дә сыйфатлы итеп башкара алмыйсың.

– Эштә булмаганда “Болгар радиосы”н тыңлыйсыңмы?

• Тыңлыйм. Машинада гел “Болгар радиосы” кушылган. Әлбәттә, чагыштырыр өчен башка татар һәм рус радиостанцияләрен дә тыңлап алам. Туган якларга кайтсак, өйдә көн дәвамында “Болгар радиосы” эшләп тора. Анда да колак салам, тыңлыйм.

Әңгәмәдәш – Эльвира Шакирова

Запись Илфар Кәримов “Болгар радиосы” Милли музыкаль премиясе турында: “Ул номинацияләр һавадан алынмый…” впервые появилась Tatar Today - татар яңалыклары..

“Болгар радиосы” хезмәткәрләре социаль челтәрләрдә Илфар Кәримовның шәхси тормышындагы зур яңалык белән уртаклаша.

“Бүген “Болгар радиосы”нда зур бәйрәм! Радионың баш мөхәррире, продюсеры, Саба егете Илфар Кәримов белән радионың реклама бүлеге менеджеры, күз явын алырлык чибәр коллегабыз, Балык Бистәсе кызы Гөлинә Габдрахманованың никахы!
Илфар, Гөлинә! Сезне чын күңелдән яңа тормышка аяк басуыгыз белән тәбрик итәбез. Бүгенге көнегез гүзәл, киләчәгегез тагын да матуррак, йөзегез кояштай нурлы, бәхет касәгез тулы, тормышыгыз матур җырларга тиң булсын. Йөргән юлларыгызны бәхет кояшы, сөю йолдызы яктыртсын, һәр туар таңнар иртәсе сезгә бәхет, шатлык алып килсен, йөрәгегездә мәхәббәт ялкыны мәңге сүнмәсен һәм сүрелмәсен!” – дип яза “Болгар радиосы” коллективы.

Мәгълүмат "Болгар радиосы" инстаграм битеннән

Запись “Болгар радиосы” коллективы Илфар Кәримовның шәхси тормышындагы зур яңалыгын хәбәр итә [Фото] впервые появилась Tatar Today - татар яңалыклары..

– Илфар, син нинди җитәкче? Усалмы, акыллымы, зирәкме?

– Мин усал түгел. Күп очракта усаллык җитеп тә бетмидер, чөнки заманасы шундый – әз генә тешләреңне дә күрсәтеп алырга кирәк. Әгәр гел яхшы гына булсаң, җилкәңә менеп атланып, башыңа сугарга да күп сорап тормыйлар. Әмма беренче чиратта кеше гадел булырга тиеш, кеше булып калырга.

– Җитәкче булу өчен нинди сыйфатлар кирәк?

– Үземне алай җитәкче дип кабул итмим, бу – радиода эшләү юлының бер этабы гынадыр, бәлки. Бөтен нечкәлекләрне белгәнгә баш мөхәррир итеп куйганнардыр.

– Син бик ихлас кеше, ихласлык каян иңде?

– Тәрбиядәндер, оясында ни күрсә, очканда шул була, диләр бит.

– Кайбер кешеләр зарлана: “Бертуктамый җыр бара, җырның авторларын әйтмиләр”, – диләр.

– Элек “Татарстан” радиосында бер сәгатьлек тапшыруда бер җыр яңгыраганда, әлбәттә, әйтәләр иде. Бүген һәрбер җырның да авторын әйтеп бетереп булмый шул, кызганыч. Җыр саен чыгып: “Авторлары шул булды”, – дип әйтсәң, икенче көнне үк радио тыңлаучылар: “Тыныч кына җыр тыңларга ирек бирегез әле, һаман җырны бүлдереп сөйләп утырмагыз”, – дип шалтырата башларга мөмкин. Без килеп кергән һәр яңа җырның авторын әйтергә тырышабыз.

– Эшең нидән гыйбарәт?

– Мин – “Болгар” радио­сының продюсеры. Минем вазыйфа: радиобызны киң аудиториягә таныту, тың­лаучы белән аралашу, алар белән эшләү. “Болгар” радиосының концертларын оештыра башладык менә: Казан, Чаллы, Әлмәттә. Җәй көне күп концертлар бушка уза: Насыйри урамында чәй фестивале, радио көненә багышланган фестиваль, тыңлаучылар белән күзгә-күз аралашу, радионың исемен ешрак ишеттерү… Баш мөхәррир киләсе елга нинди яңа тапшырулар ачарга икәнен дә планлаштыра. Бәлки кайсыларын ябарга да кирәктер. Нәрсә актуаль, нинди тема кызыклы? Бу тапшыруга кемне чакырырга, бу шәхесне кайсы тапшыруга чакырырга? Эфир барышы, музыка, нинди җырлар яңгырый – болар барысы да баш мөхәррир эшенә керә.

– Барысыннан да туеп, хәлдән таймыйсыңмы?

– Дөрес, тыгыз көннәр була, бернәрсәгә дә өлгерә алмам шикелле. Үзеңне кулга алырга тырышасың, җаваплылык дигән әйбер дә бар. Бу эшкә алынгансың икән, димәк, аны башкарып чыгарга тиешсең.

– “Без Татарстанда беренче!” – дисез, ул статистиканы кем алып бара?

– “Саир” социологик тикшеренү үзәгенә заказ бирәбез, алар төрле шәһәрләрдә, районнарда сораштыру үткәрәләр. “Без Татарстанда беренче!” – дип әйтү – без уйлап чыгарган әйбер түгел, бу – мәгълүматларга танып әйтелгән сүз.

– Нәрсә генә әйтсәң дә, күңелем барыбер ул мәгълүматларга ышанмый. “Татар радиосы” белән дошмани мөнәсәбәтләр юкмы?

– Юк. Булырга да тиеш түгелдер ул, миңа калса.

– “Тәртип” кайсы вакытларда керә, аларның хезмәткәрләрен кыерсытмыйсызмы, алар сезгә үги түгелме?

– “Тәртип” белән бер организмга әйләнеп беттек инде. Башта: “Ничек эш­ләрбез икән, икебез ике төрле радио бит”, – дип уйлаган идем. “Тәр­тип” иртәнге 5тән 7гә, 10нан 12гә, кичке 4тән 6га кадәр эшли, көнгә алты сәгать.

– Хезмәт хаклары күпме? Сезне бай яши диләр?

– Акча бит ул беркайчан да җит­ми, фәлсәфирәк җавап бирим инде. Бер миллион алып эшләсәң дә җитми, ихтыяҗ көннән-көн артачак кына. Нәфес үсә, булганына шөкер итә белергә дә кирәк. Безнең хезмәткәрләрнең күңелләре бик бай.

– Илфар, шаярттым, үзем дә радиода эшләгәч беләм бит инде, киресенчә, сездә хезмәт хаклары бик аз дип сөй­лиләр, шулаймы? Чыгарып сал дөресен.

– Журналистика өлкәсендә күпме соң ул хезмәт хакы? Уртача хезмәт хакыдыр дип уйлыйм.

– Радиога кеше акча эшләргә дип килә алмый, шулаймы?

– Монда үз эшләренең фанатлары эшли.

– Акча түләп җырларны әйлән­дерәләр. “ТНВ”да “Хит-парад”ка керер өчен айга 30 мең чыгарып саласы! Аннары, халык сайлап алды, диләр, дөрес түгел бит инде бу?

– Җырчы яңа җырын ешрак ишеттерергә теләсә, акча түли. Ә халык фикеренә без инде йогынты ясый алмыйбыз.

– Җырлый белми торган депутат яисә бай кеше килде, ди. Фәлән меңнәр тәкъдим итсә?!

– Хәзер худсовет бар. Теләсә нинди җырларны үткәрмибез.

– Әй, җаным, берәүне үткәр­дегез ич инде, җырының ата-анасы юк иде… Хәмдүнә сөй­ләгән иде, худсовет аның “Җом­га” җырын үткәрмәгән: “Бу – базар чатында җырлап тора торган җыр”, – дигәннәр… Заманында Маша Распутинага худсоветта: “Тебе противопоказано даже говорить”, – дигәннәр. Барыбер балкып чыкты бит. Худсовет та бит кешене 100% белеп бетерә алмый… Радиодагы азан әйтелеше бик ошый, кем әйтә?

– Без дә бик яратабыз азанны. Кирам абыйның абыйсы Әхтәм Сатиев, авылда мулла булып эшли.

– Сиңа ничә яшь?

– 32.

– Нишләп син ялгыз?

– Юк, мин ялгыз түгел, мин өйлән­мәгән генә.

Әңгәмәдәш: Габдерәхим

“Акчарлак” газетасының 13 нче санында чыкты, 4 апрель 2019 ел.

Запись “Хит-парад”ка керер өчен айга 30 мең чыгарып саласы!”: Илфар Кәримов җавап бирә впервые появилась Tatar Today - татар яңалыклары..

“Болгар радиосы” Татарстан китап нәшрияты белән һәрдаим хезмәттәшлек итә. Аудиокитапларны радио эфирында урнаштыру тыңлаучыларга кызык булыр дип уйладык, чөнки бүгенге көндә күпләрнең кулга китап алып укырга вакыты юк. Аудиокитапларны һәр шимбә көнне 16:00 сәгатьтә “Болгар радиосы” дулкынында тыңларга мөмкин”, – дип белдерде Илфар Кәримов.

Билгеле булганча, аудиокитап проектын Татарстан Президенты Рөстәм Миңнеханов ярдәме белән Татарстан китап нәшрияты тормышка ашыра. Татар халкының мәшһүр язучылары һәм шагыйрьләре иҗат иткән әсәрләрне Камал, Тинчурин театрлары артистлары, радио һәм телевидение дикторлары тавышландыра.

Тatkniga.ru сайтына урнаштырылган әлеге әсәрләрне шушы сайтта тыңларга һәм күчереп алырга мөмкин. Бүгенге көндә биредә Г.Тукай, М.Җәлил, Ф.Хөсни, Х.Туфан, Г.Ибраһимов, Ф.Әмирхан, А.Гыйләҗев, М.Галәү, Ә.Еники, Г.Исхакый, Һ.Такташ, Р.Вәлиев, М.Гафури һәм башка авторларның әсәрләре, Г.Кутуйның “Тапшырылмаган хатлар” повесте урын алган.

Запись Илфар Кәримов “Болгар радиосы”ндагы мөһим яңалыкны әйтә впервые появилась Tatar Today - татар яңалыклары..

Милләтебезгә якын булган, халкыбызның күңеленә кергән җырларны барлаучы “Болгар радиосы” еллык нәтиҗә ясый. “Алтын йолдыз” сынына халык сайлаган җырлар ия булачак. Еллар буе сыналып, милләтебезнең мәхәббәтен яулаган җырлар белән беррәттән 2018 елда иҗат ителгән һәм халык күңелендә үз урынын алган яңа җырлар бәяләнәчәк.

“Болгар радиосы” Милли музыкаль премиясенең максаты – халык күңелен яулаган җырларны барлау, аларны “Алтын йолдыз” сыны белән бүләкләү, җырчыларны һәм аларның иҗат җимешләрен алтын фондка кертү. Ә бу исә бик зур җаваплылык һәм чагыштыргысыз хезмәт таләп итә. Җыр-моңны үлчәүгә салып булмаганга, “Болгар радиосы” халкыбыз фикеренә таянып, иң яхшыларын гына барлый. Әле генә табадан төшкән җырларны, еллар белән сыналган сәнгать әсәрләре белән янәшә куеп, замананың алга барышын һәм халкыбызның бетмәс-төкәнмәс моң чишмәсен барлау нәтиҗәсе бу.

“Башка тантаналардан аермалы буларак, “Болгар радиосы” VI Милли музыкаль премиясе җырны башкаручыны, аны иҗат итүче шагыйрьләр һәм композиторларны да бәяләп үтә. Моннан тыш, эстрадабызның легендар җырчыларын, татар җыр сәнгате үсешенә зур өлешен керткән шәхесләрне дә билгеләп үтәбез. Төрле елларда иң яхшы продюсерга, аранжировка остасына, педагогларга да “Алтын йолдыз” сынын тапшырдык”, – дип белдерде “Болгар радиосы”ның баш мөхәррире-продюсеры Илфар Кәримов.

“Болгар радиосы” Милли музыкаль премиясе ел саен үзгәрешләр, үзенчәлекләр кертә. Әйтик, сценарий үзенчәлекләреннән башлап, аның зәвыклылыгы, алып баручыларның яңа образлары, җырчыларның һәрдаим эзләнүдә булуы, сәхнә бизәлеше төрлелеге, тантана саен яңа номинация барлыкка килү һәм иң мөһиме тамашачы белән бер дулкында тибрәлеп, милләтебезнең йөрәген яуларга теләү әлеге бәйрәмне яңа үрләргә күтәрә.

Запись Оештыручылар “Болгар радиосы” премиясенең башка фестивальләрдән аермасын 8 декабрь күрсәтмәкче впервые появилась Tatar Today - татар яңалыклары..