21 апрель Төркиянең Анталья шәһәреннән юлчылар белән тулы очкыч Казанга кайтты. Очкычта 171 кеше, шул исәптән, 24 бала иде. Аларны Яшел Үзән районының “Васильево” шифаханәсенә 14 көнгә мәҗбүри карантинга яптылар. Һиндстанның Гоа төбәгеннән кайтучылар да шунда урнаштырылды. 22 апрельгә каршы төндә Гоадан Казанга кайткан 171 туристның 76сы татарстанлы иде.

Төркиядән кайтып “Васильево” шифаханәсенә обсервациягә ябылган Татарстан егете Азатлыкка андагы шартларның начар булуын хәбәр итте. Ул исемен күрсәтмәүне сорап, яшәү шатрлары һәм кешеләргә карата мөнәсәбәт турында сөйләде.

Сүз уңаеннан, бүген аларга тестларның барысы да тискәре булуын, коронавирус булмавын хәбәр иткәннәр.

— Сезне ничек каршы алдылар Казанда?

— Без Анталья–Казан рейсы белән иртәнге бишенче яртыда кайттык. Роспотребнадзордан кешеләр керде дә һәрберебезгә хөкүмәт карарын өләште. Аннан без “Васильево” шифаханәсендә обсервация үтәчәкбез дип ризалык бирдек, кәгазьләр имзаладык. Ул кәгазьләрне тутырмыйча, чикне чыгып булмый, чик саклаучылар мөһер сукмый. Карарның бер күчермәсе үзеңдә, икенчесе Роспотребнадзор кешесендә кала.

Очкыч тулы иде. Температураны да тикшерделәр. Авыручылар юк иде, шөкер. Дүрт сәгатьлек рейста беркем төчкермәде, беркемнең дә температурасы күтәрелмәде, беркем дә хәленә зарланмады.

— Бу махсус рейс идеме?

— Бу Төркиядән Русия ватандашларын чыгаручы очкыч иде. Аны бушлай дип уйлыйлар. Билетның бәясе бер якка гына 200 еврога төште. Мин “Төрек һава юллары” белән Казаннан Истанбулга һәм кире Казанга 25 мең сумга сатып ала идем. Ә монда “Урал һава юллары” очкычы, ашатмыйлар да, анысын уйламыйсың инде, имин генә кайтып җитсә ярар иде дип утырдык.

Багажны обсерваторда алырсыз, шунда китерәләр диделәр. Барыбызны да шифаханәгә автобуста илттеләр. Юлчылар арасында Татарстан кешеләре генә түгел, анда Идел буе төбәкләреннән дә кешеләр бар иде. 171 кеше идек. Башкортстан, Удмуртия, Пермь крае, Самар һәм Ульян өлкәсе вәкилләре иртәнге ашны ашады да, аларны алырга килгән автобусларга утырып киттеләр. Үзләрендә обсерваторда утырачаклар.

— Сезне нинди бүлмәләргә, ни рәвешле урнаштырдылар?

— Нинди принцип белән урнаштырдылар – белмибез. Бер бүлмәдә икешәр кеше. Бүлмәләре таушалган. Ятаклар арасында ара — 10-15 см гына. Кешеләр бер-берсенә бик якын ята. Бүлмәләр кысан. 2 метр социаль араны саклагыз дип әйтәләр, ләкин монда андый нәрсә мөмкин түгел. Бүлмәдә телевизор тора, ләкин ул эшләми. Суыткыч бар, әмма ул янып чыккан. Шөкер, хет электр чәйнек эшли! Душ бик пычрак, чәчләр тыгылган, күгәрекләр… Күргәч, бик җирәндем. Кайнар да, салкын суы да бар, бәдрәфе эшли.

“Васильево” шифаханәсе. Обсервация

Урын-җир әйберләре бик пычрак һәм ертылып беткән. Ничектер хайванга, халык дошманына кебек карыйлар дигән хис туды.

— Тагын нинди уңайсызлыклар бар?

— Телефон бик начар тота. Wi-Fi бөтенләй юк. Бөтен территория буйлап полиция, Росгвардия вәкилләре уратып алган, тегендә-монда йөриләр. Беркемне урамга чыгармыйлар. Урамга түгел, коридорга да чыгарга ярамый. Бүлмәгездә генә утырыгыз, борыныгызны да чыгармагыз дип әйттеләр.

— Бүлмәләрдә балкон бармы?

— Балкон бар. Ләкин ул да куркыныч хәлдә. Андагы тоткыч тегендә-монда уйнап йөри. Теләсә-кайсы вакытта төшеп китәрсең кебек. Имин түгел. Чыкмау хәерлерәк.

Безне 4 майда чыгарачаклар. Ничек түзәсе икән дип аптырап утырам. Мондый шакшылыкны күргәнем булмады бер дә. Бу, чыннан да, төрмә төсле. Ашарга заказ ясап булмый. Кибеттән дә берни китертеп булмый. Алар ашаргә нәрсә бирә, шуннан башка берни юк.

Көненә өч тапкыр ашаталар. Бүлмәгә китерәләр. Нәрсә бирәбез, шуны ашыйсыз диделәр. Мин шәхсән хәләл ризык сорадым. Әйе, хәләл диделәр. Моны раслаучы документлар бармы дип сорагач, “юк” дип әйттеләр. Мин аларга ничек ышана алам? Хәләл түгел дип уйлыйм. Хәләл булса, раслаучы документлары булыр иде. Иртәнге ашка ботка, кәтлит, диңгез кәбестәсеннән салат, кабартма, ике кисәк ипи бар иде.

— Башка кешеләр белән аралашасызмы? Алар шифаханәдәге шартлар турында нәрсә сөйли?

— Без күбрәк Telegram аша аралашабыз. Очкычта ук төркем булдырган идек. Гоадан килгән кешеләр төркемен табып аралаша башладык. Монда беркемгә дә ошамый. Әйтәм бит, төрмә сыман.

— Шартлар турында җитәкчелеккә җиткердегезме?

— Монда кичә урнаштык. Кешеләр төне буе талашып, үз хәлләрен яхшыртырга теләде. Шуннан соң сүгә-сүгә, көч белән бүлмәләргә куып керттеләр. Иртәнге биштә Гоадан килүчеләрне урнаштырдылар. Алар белән дә шул ук хәл булды. Тавыш купса, бөтен җиргә ишетелә.

— Берәр төрле үзгәрешләр булачагы турында әйттеләрме?

— Юк, әйтелмәде.

— Истанбулда калу мөмкинлеге бар идеме? Ни өчен кайтырга булдыгыз? Мондый шартларда яшәячәгегезне алдан уйламадыгызмы?

— Мин обсервациягә ябачакларын белә идем. Әмма мондый шартларда, мондый сыйфатта булачагын күз алдына да китерә алмадым. Татарстанда мондый урыннар була алганы һаман да башыма сыймый.

Мин һәр җәйне Казанга кайтам. Халыкара рейслар август-сентябрьдә генә ачылачак. Кайтмасам, мин бөтен җәйне Төркиядә уздырырга тиеш булыр идем, соңрак кайта алмасмын, хәзер кайтырга кирәк дип юлга чыктым. Ватаныма кайттым, әмма шундый мөнәсәбәт көтмәдем.

Чагыштыру өчен

Круиз лайнерында эшләп сәяхәт иткән һәм сәфәренең кызыклы мизгелләрен Азатлык укучылары белән уртаклашып барган Наилә Хисамова дөнья тирәли сәяхәтен тәмамлап, Мәскәүгә кайтып төште һәм шулай ук Мәскәү янындагы бер шифаханәгә обсервациягә ябылды. Андагы яшәү шартлары бераз башка.

Чыганак: чит ил агентлыгы

Запись “Ничектер хайванга кебек карыйлар”: Татарстанга читтән кайтучылар карантин шартларына зарлана [фото] впервые появилась Tatar Today - татар яңалыклары..

Газ, су, утны да өзеп китмәячәкләр. Хәтта исәпләгеч ватылып, вакытында күрсәткечләрне тапшырмасагыз да, артык акча түләргә туры килмәячәк. Әлеге кичектереп түләү мөмкинлеге кешеләрнең өйдән чыгып йөрмәвен һәм күпләрнең интернет аша түли алмавын, кайберәүләрнең эшсез калып, акчасыз утыруын күз алдына тотып эшләнә. Түли алмаучыларның 2021 елның гыйнварына кадәр вакыты бар.

Бу хәбәргә ачыклык кертү өчен Татарстанның төзелеш, архитектура һәм торак-коммуналь хуҗалыгы министрлыгының матбугат үзәге җитәкчесе Гөлназ Миңнеханова белән элемтәгә кердек.

– Дөрестән дә үзизоляция вакытында коммуналь хезмәтләр өчен пеня исәпләнмәячәк. Димәк, быелның апрель аеннан түләмәгән очракта артык акча бирәсе булмый. Идарәче оешмалар берничек тә пеня өстәргә тиеш түгел. Әгәр дә инде “намуссыз”лар табылып, квартплатаны арттырып түләтәләр икән, бу очракта дәүләт торак фондына мөрәҗәгать итәргә кирәк, – ди ул. – Үзизоляция вакытыннан чыккач, барыбер бурычларны кайтарырга кирәк булачак. Әгәр күрсәтелгән вакытка кадәр түли алмасагыз, аннан соң да хәлегез авыр икән, бу очракта идарәче оешмага барып реструктизация яки гади генә итеп әйткәндә түләүне килешеп, яңа график алырга кирәк булачак. Әмма түләмәсәң була дигән сүзгә карап бурыч җыймаска тырышыгыз. Соңыннан берничә ай өчен түләү авыр булачак.

Мәгълүмат Ватаным Татарстан

Запись “Түләмәсәң була дигән сүзгә карап, бурычлы булып калмагыз!” впервые появилась Tatar Today - татар яңалыклары..

Россия Президенты Владимир Путин ил хөкүмәте белән коронавируска бәйле санитар-эпидемиологик хәл буенча уздырган телеконференция форматындагы киңәшмәдә сүз нәрсә хакында барган?

Владимир Путин әйтүенчә, әлегә Россия авыруның югары ноктасына килеп җитмәде. Чирне авыррак кичерүчеләр саны да арткан. Шушы атналар ил өчен хәлиткеч булачак. Куркыныч янаган территорияләргә Мәскәү, Мәскәү өлкәсе һәм халкы миллионнан арткан шәһәрләр керә. Шуңа да, Президент фикеренчә, җитәкчелек тарафыннан кертелгән кисәтү чараларын акларга да була. Катлаулы, гадәттән тыш хәлгә дә әзер булырга кирәген искәртте Владимир Путин.

Мәскәүдән үрнәк алыр чак түгел: төбәкләр әлегә башкаладан 3-4 атнага арттарак калып бара. Димәк, тиешле чараларны күрергә вакытлары бар дигән сүз. Россия Президенты бу вакытны бушка уздырмаска өндәде. Владимир Путин коронавируска бәйле фаразларны, вазгыятькә карап, көн дә яңартып торырга кушты.
— Барлык техник, административ мәсьәләләр җиренә җиткереп хәл ителергә тиеш.

Күптән түгел Россия субъектлары башлыклары белән киңәшмә булды. Чаралар вакытында күрелмәсә, моны вазгыятькә карата җинаятьчел салкын караш буларак кабул итәчәкмен, – дип кисәтте ул.
Табибларга аеруча эш күп. Киңәшмәдә Путин бу сорауга да тукталды. “Мәскәүдә һәм башка төбәкләрдә табибларга зур йөк төште. Медицина оешмасының һәм уку йортларының кадрлар потенциалын мөмкин булганча җәлеп итәргә, хастаханәләргә нагрузканы рациональ бүләргә кирәк.

Сүз саклану чаралары һәм ИВЛ (үпкәне ясалма вентиляцияләү) аппараты белән тәэмин ителеш турында бара. Мохтаҗлык кичергән төбәкләргә алар барып җитәргә тиеш”, – диде ул.
Киңәшмәдә Россия хөкүмәте рәисе урынбасары Татьяна Голикова ил буенча статистика мәгълүматлары белән таныштырды. Аның әйтүенчә, Россия буенча авыручылар күрсәткеченең үсеше 16 мартта башланган. Барлык төбәкләрдә дә үзизоляция кагыйдәләрен төгәл үтиләр дип әйтеп булмый. Коронавирус белән авыручыларың 72,3 процентны – Мәскәү һәм Мәскәү өлкәсендә.

− Россиядә коронавируска бәйле 10 тест-система теркәлде, 254 лабораториядә тест уздыралар, 18е – шәхси лабораторияләр. Барлыгы 1360000 тикшерү оештырылды. Яңа иммуннофермент анализ өчен тест-системалар иң элек Мәскәүгә кайтарылачак. Россия буенча 95 мең ятак урын әзерләнәчәк. Шуның 40 меңе инде әзер, − диде вице-премьер.

Мәгълүмат Ватаным Татарстан

Запись Владимир Путин уздырган телеконференция форматындагы киңәшмәдә сүз нәрсә хакында барган? впервые появилась Tatar Today - татар яңалыклары..

Камка авылында моңа кадәр бер кеше коронавирус йоктырган иде. Беренчел анализлар 12 кешедә вирус булмавын күрсәткән, ә өч кешедә COVID расланган.

Мәгълүмат чит ил агентлыгыннан

Запись Камка авылында тагын COVID-19 расланганмы? впервые появилась Tatar Today - татар яңалыклары..

Русия президенты Владимир Путин 13 апрельдә коронавируска каршы көрәш турында киңәшмә уздырды. Онлайн-киңәшмәдә вице-премьер Татьяна Голикова, Роспотребнадзор җитәкчесе Анна Попова, сәламәтлек саклау министры Михаил Мурашко, Мәскәү мэры Сергей Собянин катнашты.

Мәгъдүмат Ватаным Татарстан

Запись Владимир Путин “иң катлаулы хәлләргә” дә әзер булырга чакырды впервые появилась Tatar Today - татар яңалыклары..

— Лилия, сез хәзер Татарстандамы, Мәскәүдәме?

— Мин инде Мәскәүдә, кайтып җиттем.

— Әниегезне эзләү ничек булып бетте?

— Әни бездә Мәскәүдә кунакта булган иде, 17 мартта кайтып китте. Икенче көнне урамда җылы дип яланөс көенчә кер элгәндә салкын тидергән.

— Сүз уңаеннан, әниегезгә ничә яшь?

— Илле тугыз. Ике көн өйдә прополис белән дәваланган. Хәле начарайгач, үпкәсен тыңлауны сорап, авыл фельдшерына шалтыраткан, анысы килмәгән. Энекәш әнине Әлмәт үзәк хастаханәсенә алып киткән, анда бар да яхшы дип кайтарганнар. Ике көннән тагын бер мәртәбә барган, өченче мәртәбә дә барган. Шимбә 21 март хәтта кизү торган табибка да туры килгән. Анысы да барысы да яхшы дип кайтарып җибәргән. Әлмәттә яшәгән сеңлем, аптырап, авылга ашыгыч ярдәм чакырган. Алары да әнинең исән икәнен күреп, бернинди рентгенга да җибәрмичә, кайтып киткән. Бөтенләй хәле начарайгач, әни үзе ашыгыч ярдәм чакырган, хастаханәгә алып китегез, рентген сурәте ясагыз, дигән. Рентген ясагач, ике яклы үпкә ялкынсынуы, дигәннәр, терапия бүлегенә салганнар. Кичтән үк антибиотиклар кадый башлаганнар. Иртәнгә хәле яхшырган. Ул анда бер тәүлек яткан, өч тапкыр антибиотик кадаганнар. Ул кемгәдер Мәскәүдә булганын әйткән, һәм шунда кинәт башланган хәлләр: коронавируска тест билгеләгәннәр, кич исә алдап Чаллыга алып киткәннәр.

— Ничек инде алдап?

— Инфекция бүлегенә күчерәбез дип, машинага утыртканнар, машинасы да ашыгыч ярдәмнеке түгел, ниндидер катафалка. Әлмәттән чыга башлагач, ул “мине кая алып барасыз” дип сораган. “Чаллыга, анда коронавируслылар өчен хастаханә бар”, дип аңлатканнар. Тест уңай булдымыни, дигәч, әлегә берни билгеле түгел, дип аңлатканнар. Әнинең температурасы 39, утырырга да хәле юк, ә аны ике сәгать алып барганнар, дүртенче катка җәяү алып менгәннәр — “мин тирләгән көе, бөтен яктан җил, анда да өстәлгәндер”, ди әни. Аны Чаллыдагы инфекция хастаханәсенә алып киләләр (Мәскәү проспекты, 85). Беренче көнне, 29 мартта, табибә аңа барысын да аңлата, дәвалаячакбыз, ди, уколлар билгели, дарулар яза. Беренче ике көнне аны шулай дәвалыйлар. Сишәмбе, 31 март көнне кич әнигә инфекцион хастаханәнең реанимация бүлегенә күчерәбез дип хәбәр итәләр. “Сине кислород астына яткырабыз, телефонны сүндерергә кирәк” дип кисәтәләр. Әни безне дә кисәтеп куйды, “мине кислородка кушачаклар, чөнки хәл авыр” диде дә телефонын сүндерде. Әни ничек күчергәннәрен дә сөйләде — бер кат юрганга төреп, инвалид арбасына утыртып, шәфкать туташы аны урам аша икенче бинага илтә. Әни урамда өши, ә реанимациядә аны тулысынча чишендереп, берүзен ябып куялар, телефонын алалар, көненә ике тапкыр кына керәләр, ләкин дәваламыйлар. Әнинең болай да ике яклы пневмония, хәле начарайганнан-начарая, игътибар итүче юк. Ютәлдән кан басымы күтәрелә, 180гә җитә. “Ишекне шакыйм, ярдәм итегез дип чакырам, ә алар кулларын җәеп тик торалар”, дип сөйләде әни. “Гафу итегез, безнең киемнәр махсус эшкәртүдә, өстәмә кием юк”, дип аңлаталар. Әни әйтә — алар минем янга килергә куркалар, ди. Мин аңлыйм — табиблар әзер түгел, ләкин сез бит беренче чиратта табиблар!

— Вәгъдә ителгән кислород булганмы соң?

— Юк, кислород булмаган. Алар бары тик аны күчергәннәр һәм бикләп куйганнар. Әни инде “мине биредә үтерәчәкләр, коронавирусның чираттагы корбаны булачакмын”, дип уйлый. Ул вакытта әле анализлар да булмый, алар каядыр килгәнме-юкмы — белмим. Әни анда өч көн бикләнеп яткан, бернинди дәваланусыз.

Җомга көнне аңа Чаллының 2нче поликлиникасына күчерәбез дип хәбәр итәләр, янәсе 2нче поликлиника коронавируска каршы җиһазланган. Шәфкать туташы “телефоныңны алырга онытма”, дип телефонын кертеп бирә. Әни сеңлемә шалтыратырга җитешә, “мине дәваламыйлар, хәтта яныма кермиләр”, дип хәбәр итә. Әнидә ике яклы пневмония булгач, ул үпкә кабаруыннан да үлә ала. Сеңлем миңа шалтыратты. Мин җомга буе нишләргә белмәдем, инфекция бүлегенең реанимация табибына шалтыратам, ә миңа “хәле тотрыклы” диләр дә трубканы ташлыйлар. Мин кабат шалтыратам, “Мин яздырам, бөтен сорауларыма да җавап бирегез”, дим. Ник телефонын алдыгыз, дигән сорауга “мәгълүмат читкә чыкмасын өчен” ди. “Сезнең яшерердәй әйберегез бармы, нишләтәсез сез аны? Әнине ничек дәвалыйсыз?” дип сорыйм, “антибиотиклар бирәбез, вируска каршы дарулар бирәбез” ди. “Вируска уңай тесты бармы? Ни өчен сез аны берүзен ябып куйдыгыз да янына берегез дә керми?” дим. “Кем сезгә алай дип әйтте?” ди. “Мин барысын да беләм, дим, ник дәваламыйсыз?” дим. Дәваларга 2нче поликлиникага күчереләчәк, дип аңлатты табиб.

Җомга көнне күчерелмәгән иде әле. Шимбә көнне кабат шалтыратам, әнигә телефонын бирегез, миңа аның белән сөйләшергә, хәлен белергә кирәк, дим. Җавап юк. Бүтән монда шалтыратмагыз, ди табиб. Ә әни һаман шунда! Көндезге икеләрдә, инде унынчы тапкыр шалтыратуыма табиб “Бүтән миңа шалтыратмагыз, без аны шәһәрнең 2нче хастаханәсенә күчердек”, диде. Ул хастаханәнең номерын сорагач, бездә юк, дип җавап бирде. Ә мин әнинең хәле начарайганын беләм, ул сеңлемә “ята да алмыйм, утырып кына торам” дип зарланган булган. Мин инде башкача көтеп утыра алмадым, машинага утырып, Чаллыга кузгалдым, ә үзем Мәскәү өлкәсендә яшим.

Якшәмбе төш вакытына килеп җиттек. 2нче хастаханә тирәли йөрим, кертмиләр, мин инде тәрәзәдән берәр табиб йә шәфкать туташын күрмәмме дип карап йөри башладым. Ахырда беренче каттагы бер шәфкать туташы күреп алды. “Шундый-шундый авыру килдеме сезгә?” дип сорыйм, әйе, бездә ята, ди. Ни өчен телефонсыз? дим, ә бездә телефон ярамый, без телефонын алдык, ди. Ничек элемтә тотарга, дип сорагач, табибка шалтыратырга кушты. Икенче шәфкать туташын чакырды, анысы баш шәфкать туташы булды, ахры, миңа ординатура номерын бирде. Анда шалтыратып, дәвалаучы табиб белән таныштым, әни турында сорый башладым. Анысы “Мин сезгә берни әйтә алмыйм, хәле авыр” диде. Ник телефонын алдыгыз, дигәч, табиб “ул безгә телефонсыз килде”, ди. “Ялган бу, шәфкать туташы телефонын алдык дип әйтте”, дим. “Ярый, ачыкларбыз”, ди. “Мин — аның кызы, стационар картасы белән танышасым килә. Коронавируска тесты уңай икәнен күрсәтегез, икенчедән, сез аны ничек дәвалыйсыз, инфекцион хастаханәдә аны бөтенләй дәваламадылар, шуңа хәле начар”, дим. Ул миңа “моңа беркемнең дә хакы юк”, ди. “Мин үзем онкология хастаханәсе стационарында эшләдем, хокукларымны беләм, мин аның картасы белән танышырга, копия яки фото ясарга хокуклы”, дим, миңа әнинең хәлен аңларга кирәк. Моңа ул “баш табиб белән сөйләшергә кирәк”, дип җавап бирде. Мин беркая да китмәячәкмен, әнигә телефонын биргәнче, шушында тәрәзә астында торачакмын, дидем.

Егерме минуттан әнинең телефоны кушылды. “Тәрәзәгә кил, күрен” дим. Култык астыннан тотып алып килделәр. “Хәлем авыр, сулау кыен, кан басымым күтәрелде”, дип ишарәләп аңлата. Кабат табибка шалтыратып “әнинең кан басымы күтәрелгән, ул кардиограмма ясауны сорый, йөрәге авырта, ахры”, дим. “Мине өйрәтергә кирәкми, минем шәфкать туташлары бар, алар барысын да тапшырыр”, ди. Мин бу сөйләшүдән соң интернетка кереп карадым — ул анестезиолог-реаниматолог булып чыкты. Мин бик гаҗәпләндем — мондый табиблар коронавирусны ничек дәвалый? Мин генә аңламыйммы. Әнигә шалтыратып, “хәзер сиңа кәгазь-каләм бирәчәкләр, миңа синең кәгазьләреңне карарга рөхсәт итеп, ышаныч кәгазе язып бир” дим. Табибка шалтыраткач, ул кәгазь-каләм илтеп бирергә ризалашты. Әнигә кире шалтыратсам, аңа нидер кадаганнар — ул инде берни аңламый, алар бит анестезиолог-реаниматологлар, кешене ничек оетырга икәнен беләләр. Мин елыйм, әни йокылы тавыш белән “курыкма, барысы да яхшы булачак”, ди. Телефонын сүндереп куйдылар. Хәзер искә алуы гына мәзәк, ул вакытта бик куркыныч иде. Тәки бернигә ирешмичә, бер тәүлеккә алган фатирга кунарга киттем. Миңа бөтенесе шалтыратырга тотынды: санэпиднадзор, полиция, авылдагы участок инспекторы.

— Алар сездән нәрсә теләделәр?

— Кайда кунуымны сорыйлар. Ни өчен кирәк андый мәгълүмат, дим. Контроль өчен, ди. “Сез Мәскәүдән килдегез, анда киеренке вазгыять, анда бөтенесе дә авырый, сез хәзер бөтен шәһәргә йоктырып бетерәчәксез”, диләр. Нәрсәне тикшерәсе — мин сау-сәламәт, минем өйдә ике бала, дим. Ун тапкыр шалтыратканнардыр, сеңлемә дә шалтыратканнар. Ә сеңлем белән энем әнине Чаллыга алып киткәннән бирле өйдә бикләнгән килеш — аларның икесенә дә өйдән чыкмаска, диелгән, чөнки алар әни белән контактлы исәпләнә.

— Алар Әлмәттәме?

— Сеңлем Әлмәттә, энекәш авылда — ул әни янында яши иде. Сеңлемә волонтерлар ашамлыклар китереп торыр дип сүз биргәннәр, чөнки аның ике баласы бар.

— Алып киләләрме соң?

— Килгәннәр ди. Юк, бернинди волонтерлар ярдәме дә булмады. Сеңлем шалтырата торгач, ахырда санэпиднадзор башлыгы аның телефонын кара исемлеккә кертеп куйган, трубканы алмый башлаган.

— Табиблар киләме алар янына?

— Карантин игълан иткәндә генә махсус костюмнар белән санэпидстанция хезмәткәрләре килгән. Ә карантин вакытында бары полиция хезмәткәрләре генә көн саен килеп тикшереп тора.

— Хәлимә апа белән бу хәлләр башлангач, авылдашларыгыз тарафыннан караш үзгәрдеме?

— Әлбәттә. Хәтта туганнар да “Ник Мәскәүдә генә калмаган?” дип орышкан. Мин кайткач та “ник зәхмәт алып кайтып йөрисең” дип язучылар булды.

— Интернетта яздылармы?

— Әйе. Анда гомумән ярдәм тәкъдим итеп язучылар күбрәк булды — җиде йөзләп хат килгәндер. Алар миңа бик ярдәм итте — кемдер бу хәлне яктырта, видеоны тарата, кемдер ниндидер контактлар табып бирә. Мин беренче видеоны, юкка чыксам, кайда икәнемне белеп торсыннар дип, дусларым өчен генә яздырган идем, ул видео беркая да чыгарга тиеш түгел иде. Ләкин аны кемдер тараткан. Икенче видеоны инде баш табиб белән күрешкәч, әнине тапкач яздырдым — анда тәрәзә аша әни дә күренә.

— Әлмәт хастаханәсендә коронавируслы авыру турында аудиохәбәр тараткан кешене штрафка тартканнар. Сезнең видеогыз таралгач, басым ясаучылар булмадымы?

— Юк, ул видео киресенчә бик ярдәм итте. Мин бик фейк таратмадым, барысы да ничек бар, шулай яздырылган.

— Беренче көнне хастаханәгә үтә алмадым дисез, икенче көнне баш табиб янына ничек уздыгыз соң?

— Беренче көнне керергә теләгәндә шәфкать туташы уздырмады, полиция чакырам, диде. Чакыруы да хактыр — мин машинамда утырганда полиция машинасы килеп туктады, алар хастаханәгә кереп китте. Икенче көнне поликлиниканың кабул итү системы аша кердем — комплекслы булгач, поликлиниканың төрле аерым биналары бар, башка бүлекләр авыруларны кабул итүен дәвам итә. Мин баш табибка уздым, сөйләшергә биш минут бирделәр. Ул дәвалау булачак, безнең эшкә комачауламагыз, диде.

— Әниегезнең диагнозы ачыкландымы соң?

— Әйе. Коронавируска тесты тискәре булып чыкты. Әлмәт мэры бу турыда 7 апрель, сишәмбе көнне туры эфирда “сөенечле хәбәр” дип игълан итте, аңа кадәр үк билгеле булган инде. Нәтиҗәдә әнидә ике яклы пневмония булып чыкты. Чаллының 2нче хастаханәсендә дәвалана, ул хастаханәдән бик канәгать, анда шәфкать туташлары бик игътибарлы ди.

— Ул хастаханә коронавируска каршы җиһазланган дидегез. Анда бу чир белән авыручылар бармы?

— Ул комплекслы хастаханә, бер бинасында коронавирус дип шикләнгән авыруларны кабул итәләр. Әни тискәре тест биргән бер авыру, һәм тагын уңай тестлы бер авыру ята, диде. Алар, әлбәттә, һәрберсе изоляцияләнгән.

— Энегез һәм сеңлегез карантиннан чыктымы?

— Әйе. Сеңлемә мэр (Тимур Нагуманов – ред.) үзе шалтыратып, өйдән чыга аласыз, кирәк җирегезгә бара аласыз, дигән.

— Аларга тест ясаттылармы?

— Энемә ясатканнар. Аның нәтиҗәсе тискәре булып чыккан.

— Әниегез белән булган бу хәлләрнең сәбәбе ни дип уйлыйсыз? Дәваламыйча гына, коронавируска сылтарга теләүме бу?

— Юк, алай дип уйламыйм. Аларны гаеплисем дә килми. Табибларның куркуы бу. Бары шул.

— Сезнең үзегезнең дә медицина белемегез бар, шулаймы?

— Минем белемем генә бар түгел, мин инде унбиш ел медицина өлкәсендә эшлим. Мәскәүдә коронавирусның учагы, анда бөтенесе дә авырый дию хак түгел — минем, мәсәлән, бу авыруны йоктырган бер танышым да юк. Хәзер бөтен тын юлы авыруларын коронавируска сылтарга була.

Мәгълүмат чит ил агентлыгыннан

Запись “Аны тулысынча чишендереп, берүзен ябып куялар, телефонын алалар…” – Әлмәттә эпидемиологик ситуация контрольдән чыга впервые появилась Tatar Today - татар яңалыклары..

Түбән Новгород өлкәсе Сергач районының карантинга ябылган Камка авылында да тормыш тамырдан үзгәргән. Татар авылына Мәскәүдән кайтмагыз дигән кисәтүләр ясалган, әмма аңа колак салучы булмаган. Азатлык Камкада яшәүче татарлар белән аралашты.

Түбән Новгород өлкәсе Сергач районының Камка авылы узган атна карантинга ябылды. Сәбәбе – монда яшәүче бер кешегә COVID-19 вирусына ясалган тест уңай булып чыккан. Авылга керү юлларында полиция патруле кизүдә тора, медицина хезмәткәре авылга кергән һәрбер кешенең температурасын тикшерә. Кибеткә икедән артык кеше керергә тиеш түгел дигән игъланнар эленгән. Урамга битлексез чыгу тыела. Шундый ук хәлләр Өчкүл авылында да.

Ике авылда да изоляция режимы игълан ителгәч, Мәскәүдән күпләп кешеләр кайткан. Бүген Камканың һәр йортында диярлек Мәскәүдән кайткан туганнары, якыннары бар. Авыл халкы мәскәүләргә кайтмаска дигән кисәтү ясаган, әмма бу кайтучылар ташкынын киметмәгән. Бүген ике авылга вирус йоктырган ике кеше бар. Авыл кешеләре хәзер чир таралыр дип хафага калган.

Азатлык Камкага Мәскәүдән ялларга кайткан Наил әфәнде (аның турында мәгълүмат редакциядә бар – ред.) белән сөйләште. Аның сүзләренә караганда, коронавируслы кешеләргә янаулар да булган. Күрше авылларда авыл кешеләре Мәскәүдән кайтучыларга каршы сугышкан очраклар да булды дип сөйләде ул. Камка авылында чирле кешеләргә янауларны туктату өчен инициатив төркем дә булдырылган.

“Берничә кешегә тест ясалды, шуларның икенче тест нәтиҗәсен көтәбез. Беренчеләре тискәре дип күрсәтте, шөкер анысына. Хәзер ул авырган кеше кемнәр белән элемтәдә булган, кайда, кемгә йоктыра алганы тикшерелә, шул кешеләрдән анализ алалар. Якынча 20 кеше. Үзем ул чирләп киткән кеше белән, аның гаиләсе белән элемтәдә булмадым. Алар болай да аралашмый торган кешеләр, безнең урам аша уза инде алар. Карт әби белән урамда йөриләр, һава сулап. Туктамыйлар, берсе белән дә сөйләшмиләр. Әмма аларга кереп йөргән күршеләре бар. Безнең йорт аша яшәүче күршебез, мисал өчен, алар белән элемтәдә тора. Ул апа безгә дә сугылды… Аны ябып куйдылар, аның да анализларын көтәбез. Ул йорт саен йөри торган апа. Котыбыз очып тора инде менә! Үзебез дә беркая чыгып йөрмибез, бикләнеп утырабыз.

“Авыл чатында ул иргә ябырылдылар, абзарын яндырабыз дип янадылар”

Ул мескен чирләп киткән кеше турында әллә нинди имеш-мимешләр йөри. Чыгышы белән безнең авылдан да түгел ул. Хатыны безнең авылныкы. Үзе түгел, ә кияве Италиядән кайткан дип әйттеләр. Аның коронавирус диагнозы булган, әмма ул дәваланып чыккан дип тә сөйлиләр. Авылга кайткач сырхаулаган.

Ул кайткан иргә ябырылдылар, авылның WhatsApp чаты бар, мин дә бар анда. Язгаладылар төрлесен. Абзарын яндырабыз дип тә әйттеләр. Наданнар! Әмма күбесе каршы төште аңа, ирләр җыелышып әйтте, аңлаттык. Шулай да күбесе яхшы мөнәсәбәттә. Кешеләр аларны кызгана. “Туган як” гәзите комментарларында үртиләр, ямьсез сүзләр әйтәләр. Соң, кеше авырганын каян белсен? Дөнья буйлап бара бит бу хәлләр. Әйе, Мәскәүдә дә утырып торып була иде, әмма менә без дә кайттык бит Камкага!

Авыл төркемнәрендә әбиләрне үтерергә кайтасыз, Мәскәүдә генә торыгыз дип күп яздылар. Барыбер кайттым инде

Мәскәүдән бик күп кеше кайтты, бик күп. Хәзер барысын да гаепли башласаң?.. Күрше авылда Мәскәүдән кайтучылар белән хәтта сугышканнар. Бездә булмады андый хәлләр. Бездә мәскәүләр күбрәк, сугыша алмый. Авыл төркемнәрендә, әбиләрне үтерергә кайтасыз, Мәскәүдә генә торыгыз, дип күп яздылар. Барыбер кайттым инде, балаларны каникулга кайтарырга билетлар алынган иде. Хатын соңрак кайтты, поезд белән. Купеда берүзе булган, кайтучылар азайды. Кайтасылары кайтып бетте бугай инде.

Авылда урамда берсе дә йөрми. Үзем менә әти-әнигә барам, алар карт, бераз булышырга кирәк, урамнан барам, урам буш. Эт тә йөрми. Сәлам бирү дә ерактан гына, дистанцияне сакларга тырыша кешеләр, чыккан кешеләрнең барысында да битлек. Кибеткә керешкә игълан тора, ике кешедән артык кермәскә дип кисәтеп куйдылар. Авылдан ике чыгыш юл бар, бер ягын, шул Мәскәү юлы инде ул, зур таш белән ябып куйдылар. Патруль машинасы тора, ул документларны тикшерә, ә медицина хезмәткәре авылга керүчеләрнең температурасын үлчи. Мәскәүләрне кертәләр әлегә, керү ябык түгел. Әмма авылда карантин инде. Мәскәүдән кайткан туганнар бар, алар белән күрештем, алар беркая бармыйбыз, 10 көн өйдә утырабыз диделәр. Кагыйдәләрне үтиләр инде, бозарга ярамый!

Камкада фельдшер бар, кешеләрне ул бага. Уразовка хастаханәсендә яткан кеше белән аралаштым, аның коронавирус табылды бит инде, ул үзе ышанмый. Ризык авылда бар, әмма кешеләр атнага бер тапкыр Сергачка бара. Без дә кичә Сергачка бардык. Аның өчен махсус рөхсәт алдык. Шәһәрдә дә тыныч, коткы юк алай кешеләрдә”, дип сөйләде Наил әфәнде.

_{Камка авылында 2010 елгы җанисәпкә караганда 700ләп кеше яши, татар авылы. Уразовкада 1600ләп кеше яши. Тарихчылар авылга нигез 1603 елда салынган дип саный. Камканың зиратында XV гасырга караган кабер ташлары бар дип яза фәлсәфә фәннәре докторы А. Орлов.}

Мәгълүмат чит ил агентлыгыннан

Запись “Әбиләрне үтерәсез, кайтмагыз авылга, калада калыгыз!” – Камка авылы впервые появилась Tatar Today - татар яңалыклары..

«Безгә бу хакта бик нык уйланырга кирәк, чөнки моны никадәр тиз үтүебез безнең һәрберебезгә бәйле. Дисциплиналы була алсак, үзебезгә һәм бүген үткәрелә торган тәкъдимнәргә колак салсак, бу хәлдән чыга алачакбыз һәм җәйгә бер-беребезнең кулларын кысачакбыз «, — дип саный Голикова.

Аның фикеренчә, Россия килеп туган эпидемиологик вәзгыятьне Җиңү көненә тулысынча җиңә алмаячак.

Мәгълүмат Ватаным Татарстан

Запись Вице-премьер Татьяна Голикова: “Россиянең үзизоляция режимыннан чыгуы җәйгә генә мөмкин” впервые появилась Tatar Today - татар яңалыклары..

11 апрель РКБ медицина хезмәткәре үзенең Инстагарамында шәфкать туташларының хезмәт хакларын киметүләре турында хәбәр итә. Көн-төн тир түгеп эшләп, үзләренең сәламәтлекләрен куркыныч астына куючыларга хезмәт хакларын күтәрер урынга, киресенчә азрак түли башлаганнар.

“Бүген хезмәт хакын аласы көн. Хәзмәттәшләремнең кәефләре төрле… Кемдер көлә, кемдер елый…

Бөтен бүлеккә бер үзе генә эшли торган пост шәфкать туташы аена 13 мең сум алды. Ә бит ул бер үзе күпме эш эшли. Бу ничек була соң инде? Бөтен массакүләм мәгълүмат чаралары медицина хезмәткәрләренә хезмәт хакларын күтәрәләр дип хәбәр итәләр. Әйе, окладны күтәрделәр, әмма өстәмә түләүләрне киметтеләр. Шуңа күрә без хәзер азрак акча алабыз! Коронавирус белән көрәшү өчен бик күп акча бүленеп бирелгән диләр. Әмма бу акчаларны безнең хезмәт хакыбыздан алалардыр төсле. Әйе, бөтен табиблар да госпитальләрдә эшләми, әмма без дә, үзебезнең сәламәтлегебезне куркыныч астына куеп, авырулар янында “бөтереләбез”. Ничек болай яшәргә? Нигә алдынгы сафларда эшләүчеләрне ялганнарга? Алга таба ничек яшәргә? Без бит эшебездән китәчәкбез генә…” дип, яза РКБда эшләүче Веронина Элина.

View this post on Instagram

A post shared by ⚡️TATAR TODAY агентлыгы⚡️🌍 🔊📺 (@tatar_today)

Мәгълүмат Веронина Элина Инстаграмыннан

Запись “Алга таба ничек яшәргә?” – медицина хезмәткәрләрен авыр хәлгә куялар впервые появилась Tatar Today - татар яңалыклары..

Авыручыларның дүртесе хастаханәгә озатылган, 19-ы өйдә дәвалана. Аларның тугызы Татарстанга Берләшкән Гарәп Әмирлекләреннән, Таиланд, Төркия һәм Франциядән кайткан, ә 14-е элек йоктырган кешеләр белән элемтәгә кергән.

Казанда 18 очрак теркәлгән, икесе — Чаллыда, берсе — Әлмәттә, Питрәчтә һәм Биектауда. 18 яшьтән кечерәк ике яңа авыручы, 18 дән 30 яшькә кадәр җиде, 30 дан 50 гә кадәр биш, дүртесе 50 дән 60 ка кадәр, өчесе 60 тан 70 кә кадәр һәм икесе 70 тән 80 гә кадәр.

Моннан тыш, бүген Татарстан хастаханәсеннән коронавирустан терелгән өч кеше чыгарылган.

Мәгълүмат Ватаным Татарстан

Запись Татарстанда Covid-19 йоктыруның яңа очраклары расланды впервые появилась Tatar Today - татар яңалыклары..