Архивы марат шайбаков - Tatar Today - татар яңалыклары.

Җырчы Марат Шәйбәков “очып” йөри башлаган. Сәбәбе…

Гузель — Thu, 11 Apr 2019 07:21:55 +0000

//Tatar today// Гүзәл Гыйбадуллина

Бу елгы сезонда Татарстанда уңышлы концертлар куйган Марат Шәйбәков “YouTube”та үзенең каналын булдырган. Анда җырчының барлык чыгышлары, концертлары, клиплары тупланган. Җырчыны нәрсә илһамландыра соң? Яз ничек тәэсир итә? Концерт сезонын кайчан тәмамлый? Яңасына әзерлек башлаганмы? Әлеге сорауларны Башкортстанның атказанган артисты Марат Шәйбәковның үзенә бирдек.

“Чыннан да яз, көннәр кояшлы, матур, нык яратам яз килгәнен, үләннәр чыкканнын, бала чакларны искә төшерә. Шундый күтәренке кәефләр белән “очып” йөрим хәтта. Яз бик илһамландыра, рәхәт миңа. Бу сезонны апрель азагында себер якларындагы гастрольләребез белән тәмамлыйбыз. 1 нче майга өйгә кайтабыз, Алла бирса.

Яңа сезонга инде җырлар әзерли башладык. Бик күп җырлар алдым. Матур итеп яздырып, шуларны эшләргә кирәк хәзер. Яңа сезон алдыннан, җәй көне авылда ял итәбез, җылы якларга да барырбыз бәлки, әле планлаштырмадык. Шундый уйлар белән ятабыз. Сабантуйларга Екатеринбург якларына чакырдылар. Аннан Башкортстанда булабыз, бәлки Татарстанга да чыгарбыз. Әлегә билгесез”, дип уртаклашты җырчы Марат Шәйбәков.

Запись Җырчы Марат Шәйбәков “очып” йөри башлаган. Сәбәбе… впервые появилась Tatar Today - татар яңалыклары..

Марат Шәйбәков: “Алдыңда елмаеп, матур сөйләшеп, артыңнан төкереп калганнар бар” [видео]

Гузель — Fri, 29 Mar 2019 07:58:39 +0000

//Tatar today//

Шушы көннәрдә Татарстан буенча гастрольләрен төгәлләп, “Хатын-кызлар мәхәббәте”н яулап, TMTV премиясен алган Марат Шәйбәков апрельдән чыгышларын Башкортстанда дәвам итәчәк. Аның җырларының популярлыгы, кайсы авторлар белән эшләве, татар эстрадасыннан кемнәр белән аралашуы хакында без җырчы белән әңгәмә кордык.

Тамашачы аның лирик җырларын да йотылып тыңлый, көчле кул чабып, яхшы кабул итә. Җырчы фикеренчә, җырларының популярлыгы – көе, мәгънәсе, сүзләреннән тора. Талгын җырмы, дәртле җырмы, аерма юк.

Авторларга килгәндә, Марат Шәйбәков Зифа Нагаева, Айгөл Вәлиуллина, Радик Хәкимҗановлар һәм бик күпләр белән эшли. Татар эстрадасыннан Рөстәм Закиров, Рәсим Низамов, Илназ Минвәлиев, Илназ Бах, Ризат, Зинира Рамазановлар, Алсу, Азат Фазлыевлар белән аралаша. “Кешеләрдә мин гадилек, якты йөзлелекне хөрмәт итәм. Алдыңда елмаеп, матур сөйләшеп, артыңнан төкереп калганнар бар”, дип уртаклашты Башкортстанның атказанган артисты Марат Шәйбәков.

Запись Марат Шәйбәков: “Алдыңда елмаеп, матур сөйләшеп, артыңнан төкереп калганнар бар” [видео] впервые появилась Tatar Today - татар яңалыклары..

Марат Шайбәков Казандагы концертыннан соң: “Бу кадәр үк булыр дип көтмәгән идем”

Гузель — Mon, 18 Mar 2019 18:34:11 +0000

//Tatar today// Эльвира Шакирова//

14 март көнне Казанның Ленин исемендәге мәдәният сараенда Башкортстанның атказанган артисты Марат Шайбәковның тәүге концерты булды. Яңа программа “Көткән кешең булганда” дип атала.

Дөресен генә әйткәндә, Марат бу концертка күптәннән әзерләнде, дулкынланып көтте. Бу программа белән ул Татарстанның кайбер районнарында булып өлгерде. Моннан берничә ел элек Уфада күрешкән чакта: “Казан – минем хыял ул”, – дигән иде. Ниһаять, Алла кушып, ул көн килеп тә җитте. Әллә казанлылар белән очрашуны зарыгып көткәнгәме, Марат башкаладагы тәүге концертында һич кенә дә дулкынланмады. Һәрхәлдә без – тамашачы моны сизмәде. Әйтерсең лә, бу сәхнәгә беренче генә чыгуы түгел.

Концерт программасы төгәл уйланылган. Артык һәм тузга язмаган сүзләр булмады. Шуны әйтергә кирәк: Марат тыйнак егет булса да, тапкыр телле булып чыкты. Шул арада үзе белән булган кызыклы хәлләрне дә сөйләп алды. Концерт тәнәфескә бүленмичә генә бер сулышта узды. Программаны җор телле Рөстәм Шакиров алып барды. Ул алып баруы белән генә түгел, моңлы тавышы, сәнгатьле итеп укылган эчтәлекле шигырьләре белән дә шаккатырды. Уфадан килгән Айрат Галиев өздереп баянда уйнады, Башкортстан кызы Инзира Гыйздәтуллина да чыгыш ясады. Якташыбыз Сөмбел Билалова концертның махсус кунагы булды.

Марат үзен тамашачы белән гади һәм ихлас тота. Берничә тапкыр залга төшеп, һәммәбезгә таныш булган җырларны тамашачы белән бергә башкарды. Программага кертмәгән булса да, халык соравы буенча “Юатмагыз, юаналмыйм” җырын баянга гына кушылып җырлады. Ә бит кайбер артистлар “бу җыр быелгы программада юк”, – дип “котыла”. Баян дигәннән, Марат ул – беренче чиратта баянчы. Иҗат юлын баянчы булып башлаган. Концертта гармунда уйнап Казан халкын да гөрләтте, биетте!

Тамашада бик күп җырлар яңгырады. Ә шулай да иң күңелгә үтеп кергәне “Бәхет телим кызыма” җыры булды. Мин бу җырны беренчеләрдән булып ишеттем дип горурланып әйтә алам. Бервакыт төн уртасында коеп яңгыр яуганда Уфага килеп төштем. Шул вакытта Марат өенә алып кайтты. Хатыны Ләйсән белән табын корып, зурлап кунак итте. Аннары Марат баянда уйнады, матур итеп кич, дөресрәге төн утырдык. Шунда Марат миңа: “Эльвира, бер җыр яздырдым. Кызыма багышладым. Тыңлап кара әле”, – дип “Бәхет телим кызыма” җырын тыңлатты. “Бу җыр һичшиксез үз тыңлаучысын табачак!” – дидем. Шуңа да бу җырны мин аеруча көтеп алдым.

Беләсезме, Марат Шайбәков юкка борчылган бит! Казан тамашачысы аны бик яратты, җылы алкышлады! Күптән киләсе булган икән лә Казанга! Артист үзе дә тәүге концертыннан канәгать булуын белдерде. “Бу кадәр үк булыр дип көтмәгән идем! Рәхәт булды! Матур кабул иттеләр!” – диде. Без дә Маратның тавышы, моңы, халыкчанлыгы белән барлык татарстанлыларның мәхәббәтен яулавын телибез!

Тиздән Марат Шайбәковның Караидел, Чишмә төбәкләрендә, Екатеринбург шәһәрендә концертлары булачак. Килми калмагыз!

Запись Марат Шайбәков Казандагы концертыннан соң: “Бу кадәр үк булыр дип көтмәгән идем” впервые появилась Tatar Today - татар яңалыклары..

Марат Шайбаков: “Рәттән биш җырның сүзләрен оныттым. Көләсе дә, елыйсы да килә башлады”

Гузель — Wed, 13 Mar 2019 13:08:55 +0000

//Tatar Today// Гүзәл Гыйбадуллина//

Бу сезонда Марат Шайбаков Татарстан буйлап беренче концертларын куя. Районнарда җырчыны ничек кабул итәләр, нинди кызык хәлләргә очырый, Башкортстанның атказанган артисты сәхнәгә чыгар алдыннан борчыламы, концерт вакытында нинди эчемлекләргә өстенлек бирә? Әлеге сорауларны без Марат Шайбаковның үзенә бирдек.

“Быел Татарстанның бик күп районнарында булырга туры килде. Шулкадәр яхшы халык. Кая барсам да, бик матур итеп каршы алдылар, бәлешләр, Азнакайда хәтта казларга кадәр алып килгәннәр иде. Мин бит инде танышырга бардым, әле беренче генә концертларым, әмма бик шатланым кайттым”, дип сөйләде Tatar todayга Марат Шайбаков.

“Концертымнан соң да бик күп уңай фикерләр яздылар. Менә 14 мартта Казанда да беренче концертым узачак. Сәхнәгә чыгар алдыннан, әлбәттә, борчылам. Дулкынлану була, догалар да укып алам”, дип уртаклашты җырчы.

Гадәти көннәрне Марат Шайбаков чәй эчәргә ярата икән. “Кофе бик сирәк эчәм. Аена-елына бер тапкыр гына, дисәм була, ә концерт вакытында тамак кипсә, су эчәргә тырышабыз, су әйбәт”, дип уртаклашты Марат Шайбаков.

“Кызык микән, кызганыч микән. Татарстанда иң беренче Баулы шәһәреннән башлап җибәргән идем”, дип дәвам итте җырчы, бу елгы концерт белән бәйле берәр кызыклы хәлне сөйләвен сорагач.

“Рәттән 5 җырның сүзләрен оныттым. Көләсе дә килә, елыйсы да килә башлады. Залда катырак күзле кеше утырса, мин шуны сизәм. Әзрәк паника булып алды. Сүзләрне оныттым инде, искә төшми. Нишләргә белмәдем. Кызык та түгел инде. Менә шундый хәлләр дә булгалый”, дип сөйләде безгә Марат Шайбаков.

Запись Марат Шайбаков: “Рәттән биш җырның сүзләрен оныттым. Көләсе дә, елыйсы да килә башлады” впервые появилась Tatar Today - татар яңалыклары..

Марат Шайбаков: “Җырларга уемда да юк иде”

Гузель — Mon, 11 Mar 2019 19:21:27 +0000

//Tatar today//

Марат Шайбаков концерт турын дәвам итеп, тулы залларга чыгыш ясый. Баксаң, иҗат юлын ул җырчы түгел, баянчы һөнәреннән башлаган икән! “Мин — кечкенәдән баян-гармунга хыялланып үскән малай. Җырларга уемда да юк иде. Мин аккомпаниатор-баянист белгечлегенә укыдым. Аннан соң Филармониягә баянчы булып кердем”, дип сөйләде ул Tatar todayга.

Җырлау теләге Ризван Хәкимов төркемендә эшләгәндә барлыкка килә аның, ике җыр башкарып карарга була. “Җырлагач та, халык бертуктаусыз бик нык алкышлады. Минем өчен бу көтелмәгән хәл иде. Алып баручы Марат Кәбиров “аның башка җырлары юк!” дип халыкны тынычландырды. Шушы хәлдән соң җырлыйсы килә башлады. Мин шулай ук Фән Вәлиәхмәтов белән эшләдем. Әнвәр Нургалиев, Гүзәл Әхмәтова һәм мин – өчәү “Ихлас” төркемендә җырладык. Үз төркемем белән эшли башланганга 7-8 ел гына әле”, дип уртаклашты Марат Шайбаков.

Запись Марат Шайбаков: “Җырларга уемда да юк иде” впервые появилась Tatar Today - татар яңалыклары..

Марат Шәйбәков хатыны Ләйсән турында: “Икәүләп йөреп булмый инде”

Лэйсирэ — Mon, 25 Feb 2019 12:06:09 +0000

//Tatar today// Эльвира Шакирова//

Башкортстанның атказанган артисты Марат Шәйбәков әкренләп Татарстан районнары буйлап гизә башлады. Үзе әйтүенчә, һәр район – халкы кебек үк үзенчәлекле һәм үзенчә кабул итә. Кайдадыр Маратны таныйлар, беләләр, сагынып көтеп алалар, ә кайбер районнарда Марат Шәйбәков – яңа исем!

– Марат, гомумән алганда, Татарстан турында фикерең нинди?

– Былтыр Татарстанның кайбер районнарында булдым. Әллә шуңа микән, ул районнар мине быел аеруча көтеп алды. Төрле районда төрлечә кабул итәләр. Кайбер районнар бик белеп бетерми. “Кем ул? Нинди җырчы ул?” диләр. Ләкин концертка килгән кеше бик ошатып китә. Сәхнәгә менеп, аркамнан сөеп рәхмәт әйтүчеләр дә бар.

– Ни сәбәпле Чистайдагы концертыңны куймаска булдың?

– Чистай шәһәрендә мине бөтенләй белмиләр, дигән нәтиҗәгә килдем әле. Ник дигәндә, анда билетлар бик аз сатылган. Шул сәбәпле Чистайдагы концертны үткәрмәскә булдык. Шулай да Чистайдан “Ник безгә килмисез?” дип язучылар булды. Төркемемдә җиде кеше эшли, аларның һәркайсына хезмәт хакы түләргә кирәк…

– Марат, төркемеңдә кемнәр эшли?

– Алып баручы Рөстәм Шакиров, баянист Айрат Галиев, бэк-вокалист, җырчы Инзира Гыйздәтуллина, җырчы Ләйсирә Ибраһимова һәм оператор егетләр. Һәр кеше үз вазыйфасын белә. Егетләр аппаратура, кызлар киемнәр белән шөгыльләнә. Сценарийны көз көне үк яздык, шул программаны тәкъдим итәбез.

– Кайбер артистларның хатыннары төркемдә администратор булып йөри. Ләйсәннең андый теләге юкмы?

– Ләйсәннең менә дигән эше бар, Аллага шөкер! Ул даруханәдә эшли. Икәүләп йөреп булмый инде, балаларны да карарга кирәк. Ә җырларны һәм костюмнарны сайлаганда, Ләйсән белән киңәшләшәм.

Марат Шайбәковның Казандагы концерты 14 мартта Казанның “Ленин” Мәдәният йортында узачак.

Запись Марат Шәйбәков хатыны Ләйсән турында: “Икәүләп йөреп булмый инде” впервые появилась Tatar Today - татар яңалыклары..

Ни өчен Марат Шәйбәков әле генә Татарстанга килә, моңа нәрсә этәрә? [интервью]

Гузель — Thu, 07 Feb 2019 19:37:17 +0000

//Tatar today//Эльвира Шакирова//

Башкортстанның атказанган артисты Марат Шәйбәков үзенең концертлары белән тәүге тапкыр Татарстанга җыена. 14 мартта Казанның “Ленин” мәдәният йортында Марат Шәйбаковның концерты көтелә. Ә аңа кадәр җырчы республика районнарына барырга ниятли.

Марат тумышы белән Башкортстанның Аскын районы Билгеш авылыннан. Туган авылында сигез еллык мәктәпне тәмамлагач, күрше Кашка авылында укый. Аннан соң булачак артист Стәрлетамак мәдәният техникумында белем ала.

– Марат, мин сине җырчы буларак беләм. Ә син бит иҗат юлыңны баянчы һөнәреннән башлагансың икән!

– Мин – кечкенәдән баян-гармунга хыялланып үскән малай. Җырларга уемда да юк иде. Мин аккомпаниатор-баянист белгечлегенә укыдым. Аннан соң Филармониягә баянчы булып кердем.

– Җырлау теләге ничек барлыкка килде?

– Ризван Хәкимов төркемендә эшләгәндә, ике җыр башкарып карарга булдым. Җырлагач та, халык бертуктаусыз бик нык алкышлады. Минем өчен бу көтелмәгән хәл иде. Алып баручы Марат Кәбиров “аның башка җырлары юк!” дип халыкны тынычландырды. Шушы хәлдән соң җырлыйсы килә башлады. Мин шулай ук Фән Вәлиәхмәтов белән эшләдем. Әнвәр Нургалиев, Гүзәл Әхмәтова һәм мин – өчәү “Ихлас” төркемендә җырладык. Үз төркемем белән эшли башланганга 7-8 ел гына әле.

– Марат, сәхнәдә шактый еллар иҗат итүеңә карамастан, ни өчен Татарстанга хәзер генә килергә булдың?

– Моңа кадәр Башкортстан, Екатеринбург, Себер якларында гына йөрсәм, быел Татарстанга килергә исәп иттем. Ярты ел элек җырларымны ротациягә бирдем. Сәбәбе шул – “Кайчан Татарстанга киләсез?” дип Татарстаннан бик күп хатлар килә башлады. Һәм менә вакыты җиткән, ахрысы. Җырларымны Татарстанга ишеттерергә телим. Былтыр кайбер районнарда булдым, ләкин быел республика буйлап гастрольләргә ныклап алындым.

https://www.instagram.com/p/BtkkTJ0gcvU/

– Билетлар сатыламы? Сатылмаган очракта, концерт куячаксыңмы?

– Билетлар төрлечә бара. Кайбер җирдә авырдан сатыла, кайбер якларда сатылып беткән. Мине белмәгән, күрмәгән тамашачыга үземне танытасым килә. Ләкин билетлар ничек сатылса да, мин барыбер барачакмын, концертларны биреп чыгачакмын, Алла боерса!

– Татарстан халкын нәрсә белән шаккатырырга җыенасың?

– Программа – үзенчәлекле, Аллага шөкер. Репертуарымдагы иң матур һәм хит җырларымны алып киләм. Баянга да җырлыйм, үзем дә баянда уйныйм, халык белән дә җырлыйм. Программа бик матур, күңелле. Без инде Баулы шәһәрендә булдык. Халык бик җылы кабул итте, күтәреп алды. Бик сөенеп кайттык, Аллага шөкер!

– Марат, белүемчә, син соңлап өйләндең. Тормыш иптәшең Ләйсәнне шәхсән беләм, ул – искиткеч зат. Сез шулкадәр пар килгәнсез! Соң өйләнүеңнең сәбәбе нидә?

– 30 яшемдә генә өйләндем. Ул вакытта көне-төне гастрольдә йөрдем. Әйтик, төнлә Филармониядән кайтып, иртән Ризван Хәкимов төркеме белән чыгып китә идем. Өйләнми йөрмәвемнең сәбәбе – мәхәббәтемне очратмавымда. Ә Ләйсәнне күрүгә, аның булачак тормыш иптәшем икәнен шундук сиздем. Озак очрашып йөрмәдек, тиз арада өйләнештек. Аллага шөкер, бүгенге көндә мәхәббәт җимешләребезне үстерәбез.

————————————————————————————————————————————————————————————

Tatar Today порталы җырчыларның концертларыннан фото-видео репортажлар, махсус видеотапшырулар ясый, яңалыклар яза.

Кем үзләрен күрергә тели шалтыратыгыз, элемтәгә керегез!

тел: 240-24-99

WhatsApp: +7966-240-24-99

Запись Ни өчен Марат Шәйбәков әле генә Татарстанга килә, моңа нәрсә этәрә? [интервью] впервые появилась Tatar Today - татар яңалыклары..