Мөхәммәт пәйгамбәр бу төндә «Хәрам» мәчетеннән «Акса» мәчетенә күчә, шунда башка пәйгамбәрләр белән намаз укый. Ул «Акса»дан Аллаһы Тәгаләнең хозурына җиде кат күк аша үтә. Шуның аша үткән вакытта, күкнең һәрбер катында олуг пәйгамбәрләр белән очраша. Алар белән очрашканда Мөхәммәд пәйгаибәр күкнең һәрбер катында фәрештәләрнең аерым-аерым гамәлләрен күрә. Кайбер фәрештәләр фәкать сәҗдәдә генә, икенчеләре рөкугъта булуына игътибар итә.

Tatar-islam.ru язуынча, бу кичәдә Пәйгамбәребез Мөхәммәд пәйгамбәр Аллаһы Тәгаләнең хозурына килеп, Аның белән сөйләшә. Аллаһы Тәгалә белән Пәйгамбәребез арасында булган сүзләр «Әттәхият»тә бар.

Шушы Мигъраҗ кичәсендә Мөхәммәдкә (с.г.в.) җәннәт һәм җәһәннәм күрсәтелә, Аллаһы Тәгалә мөселманнарга намазны фарыз итә.

Мигъраҗ кичәсен мөселманнар гадәттә гыйбадәттә, изгелектә үткәрә. Бу көнне укылган намазлар, тотылган ураза аеруча саваплы булып санала.

Көндезен ураза тотып, кичен намаз кылу тагын да саваплырак. Мигъраҗ кичәсе намазы шушы рәвешчә кылыныр: ястү намазыннан соң төннең теләсә кайсы вакытында ике рәкәгатьтә бер сәлам бирү белән 12 рәкәгать намаз кылыныр. Һәр рәкәгатьтә “Фатиха”дан соң сүрә укылыр. Белгән кешеләргә “Исра” сүрәсеннән аятьләр уку бик яхшы дип санала.

Чит ил агентлыгы Азатлык радиосы архивыннан алынды
8 июль 2010 ел