Архивы Минтатарчасойлэшэм - Tatar Today - татар яңалыклары.

Elvin Grey’ны нигә “Мин татарча сөйләшәм”гә чакырмаганнар? [акция]

Гузель — Fri, 28 Apr 2017 17:40:43 +0000

26 апрельдә Казанның Бауман урамында “Мин татарча сөйләшәм” акциясе үтте. 2005 елда яшь татар галимнәре һәм иҗадый интеллигенция вәкилләре оештырган “Үзебез” яңа буын хәрәкәте тәкъдиме белән барлыкка килгән проект быел уникенче тапкыр уздырылды. “Инде бөтен нәрсә дә төгәл бер калыпка салынган булса да, һәр елны ниндидер яңалык кертергә тырышабыз”, дип белдерә чараның оештыручылары. //Tatar Today//

Быелгы акциянең иң зур үзенчәлеге һәм яңалыгы булып чарада яшь архитекторлар – киләчәктә шәһәр йөзен булдыручылар катнашуы тора. Быел “Мин татарча сөйләшәм” КГАСУ студентлары белән дуслашкан. Утызлап чыгарылыш курс студенты “Ә” хәрефе стилендә төрле архитектура әйберләре, ART-җайланмалар проектларын тәкъдим иткәннәр.

“Металлдан төрле арт-объектлар ясау хәзер модада”, дип белдерә чараның оештыручысы Ленария Мөслимова. “Татар форумының девизы: “Татар әйберсен актуальләштерәбез, актуаль әйберне татарчалаштырабыз. Зур шәһәрләрдә хәзер арт-җайланмалар киң таралган икән, без Бауман уртасына өч метрлык тимер “Ә” хәрефен урнаштырабыз”, ди ул.

Быел иң яхшы проект авторы дип Гадел Фәхретдинов танылды. “Qullar” студиясе ярдәмендә яңа форматта, тимердән һәм орнамент белән бизәлгән инсталляция янында Казан халкы һәм кунаклары мәш килде. Чарада катнашучыларның, үтеп баручыларның күбесе “Ә” хәрефе янында фотога төште.

26 апрель “Мин татарча сөйләшәм” үткәргән чараларга нәтиҗә ясау көне дә. Нәкъ менә бу көнне “Тяжело с татарским” антипремиясе хуҗалары билгеләнде. Татар теленең кулланылышы быел Казан муниципалитеты комитетлары һәм башкала район хакимиятләрендә тикшерелгән иде. Нәтиҗәдә, Казанның Төньяк вокзалында татар телен санга сукмау өчен РЖД корпорациясенә һәм “Содружество” акционерлык җәмгыятенә антипремия тапшырылды. Ә икетеллелекне хөрмәт итүче “Гыйлем” белем порталына һәм “Лента” гипермаркетлар челтәренә, киресенчә, рәхмәт хатлары бирелде.

Татар телен саклап калудан тыш, чараның тагын бер максаты – яшь, кызыклы җырчыларны, музыкантларны табу һәм таныту. Берничә башкаручыны быел социаль челтәрдәге бәйге нәтиҗәсендә сайладылар. Алар: Адилә Заһидуллина, Рамилә Галәветдинова, Радик Мусин. Яшь җырчылар белән беррәттән “Мин татарча сөйләшәм” сәхнәсен инде танылып өлгергән инди-рокер Рәдиф Кашапов, Oscar c7c5 төркеме, Yummy Music Band (K-Ru, Ittifaq, Илгиз Шәйхразиев) та чыгыш ясадылар. Шулай ук, чарада яңа төркем – The CheekLaWeek белән бергә Yummy Music лейблы резиденты Зәрина Вилданова һәм соңгы вакытта татар гына түгел, рус телле интернет аудиториясендә дә киң танылып киткән инди-фолк проект Juna да катнашты.

Оештыручылардан еш кына нигә Elvin Grey’ны чакырмыйсыз дип сорыйлар икән. Аларга Ленара Мөслимова: “Ул үз сәхнәсендә җырласын, ә бу Бауман уртасындагы сәхнә альтернатив җанлы музыка, тере тавыш өчен”, дип җавап бирә.

Быел чарага чит республикалардан, хәтта чит илләрдән дә килгәннәр. Чара белән аеруча да Марий Эл яшьләре һәм Казахстанда яшәүче татарларның яшь буыны кызыксынган.

Тамашачылар арасында Һиндстаннан килүчеләр дә бар иде. Казан медицина университетында укучы егетләр бу чарага махсус килмәгәннәр, Бауманнан үтеп барышлый гына тукталганнар. Шулай да чараны ахыргача карап бетерергә теләкләре барлыгын әйттеләр алар. Соңыннан исә: “Концерт ошады”, дип белдерделәр.

Чыннан да, “Мин татарча сөйләшәм” концертына халык күп җыелды. Полиция хезмәткәрләре хәбәр итүенчә, акция вакытында Бауман урамы аша җиде меңгә якын кеше уза икән. Петербургта булган теракттан соң, “Мин татарча сөйләшәм”не оештыручылар да борчуга калган булган. Әмма бәхеткә каршы ул яктан чара бик тыныч узды, тәртип бозучылар да күренмәде.

Раилә Вәлиуллина

Запись Elvin Grey’ны нигә “Мин татарча сөйләшәм”гә чакырмаганнар? [акция] впервые появилась Tatar Today - татар яңалыклары..

“Мин татарча сөйләшәм” концертында катнашучы йолдызлар исемлеге билгеле [видео]

Гузель — Wed, 26 Apr 2017 07:17:14 +0000

26 апрель Казанда “Мин татарча сөйләшәм” чарасының гала-концерты уза. Азатлык анда катнашачак башкаручылар белән таныштыра.

Танылган музыкантлар һәм төркемнәрдән тыш чарада яшь башкаручылар да катнаша. Чараның максатларыннан берсе нәкъ яшь, кызыклы җырчыларны һәм музыкантларны табу һәм таныту. Яшьрәк башкаручыларны бәйге нәтиҗәсендә сайладылар: Аделя Заһидуллина, Рамилә Галәветдинова, Радик Мусин.

Аделя Заһидуллина – Петербурдан кайтып биредә Abadeli исемле төркем оештырган яшь җырчы. Сәхнәдә композитор Миләүшә Хәйруллина белән бергә чыгыш ясаячак. Аделя интернет аудиториясенә “Грибы – Тает лед” хитына ясаган татарча каверы белән танылды.

Бәйгедә аның белән тамашачы тавышлары өчен көрәш алып барган Рамилә Галәветдинова – классикага тартылучы яшь башкаручы. Мисал өчен, аның репертуарында Эльмир Низамов көенә һәм Ренат Харис сүзләренә язылган җыр бар.

Радик Мусин – шулай ук Петербурдан кайткан рәссам. Аның Сергей Шнуров белән уртак проектлары булган. Музыкада Мусин блюзга тартыла. Казанда ул Oscar c7c5 төркеме җырчылары белән чыгыш ясаячак.

Инди-рокер Рәдиф Кашапов үз чыгышында майда чыгачак альбомыннан кайбер җырларын тәкъдим итәчәк. “Әссәләмү галәйкем”, “Велосипедлар” кебек хитлары да яңгырамый калмас.

Oscar c7c5 төркемен “татарча инди-рок” дип игълан итәргә яраталар, гәрчә аның музыкасы күбрәк Мумий Троль сыман рус рок-музыкасына тартым. Оскар майда чыгачак альбомындагы җырлары белән таныштырачак.

Yummy Music Band (K-Ru, Ittifaq, Илгиз Шәйхразиев) яңа такым белән чыгыш ясый. Төркемгә Фәрхәт һәм Фәрхәд проектыннан танылган алып баручы, музыкант, грув-бокс остасы Ислам Вәлиев кушылды.

Yummy Music лейблы резиденты Зәрина Вилданова яңа төркем – The CheekLaWeek белән чыгыш ясаячак. Ул да майда яңа җырлар чыгара.

Juna соңгы вакытта татар гына түгел, рус телле интернет аудиториясендә дә киң танылып киткән инди-фолк проект. Күбесенчә кызлардан торган төркем Азат Миргаязов белән бергә иҗат ителгән яңа җыр башкарачак. Рус телле тыңлаучы вокалист кызның көчле акцентын сизмәскә һәм игътибар итмәскә мөмкин, ләкин 26 апрельдә төркемне меңләрчә татар тыңлаячак. Акцентны шомарту эше алып барылганмы? Күрербез.

Һәм дә Al’tan – хәзерге вакытта актив иҗат итүче рэп-төркем.

Запись “Мин татарча сөйләшәм” концертында катнашучы йолдызлар исемлеге билгеле [видео] впервые появилась Tatar Today - татар яңалыклары..

“Мин татарча сөйләшәм” чарасы оештыручылары “татар телен иң санга сукмаучы”ларны атады [видео]

Гузель — Mon, 24 Apr 2017 11:23:11 +0000

24 апрелдә 12 тапкыр үткәрелә торган “Мин татарча сөйләшәм” чарасы турында матбугат очрашуы узды. Очрашуда Бөтендөнья татар яшьләре форумы рәисе Тәбрис Яруллин, журналист, җәмәгать эшлеклесе Римма Бикмөхәмәтова журналистлар биргән сорауларга җавап тотты. //Azatliq.org, Tatar Today//

Оештыручыларның берсе Римма Бикмөхәмәтова әйтүенчә, “Мин татарча сөйләшәм” чарасы кысаларында гадәттәгечә “Тяжело с татарским” антипремиясе тапшырылачак. Быел татар теленең кулланылышы Казан муниципалитеты комитетлары һәм башкала район хакимиятләрендә тикшерелгән.

Казан башкарма комитетына караган барлык 29 комитет, идарә һәм район хакимиятләре тишкерелгән. Сайлап алу кысалары дүртәү. Беренчесе –элмә такталарның татар телендә хатасыз булуы. Икенчесе – ике дәүләт телендә хезмәт күрсәтү. Өченчесе – комитетларның сайтларында татарча мәгълүмат булу-булмау, аның вакытында яңартылуы. Дүртенчесе –карарларның, боерыкларның һәм башка норматив актларның татар телендә дә булуы.

Антипремиянең кемгә ташырылачагы 26 апрельдә билгеле булачак. Шулай да кайбер нәтиҗәләр билгеле. Район хакимиятләре арасында “татар телен иң санга сукмаучы” дип Совет районы хакимиятен атадылар.

Сайтлар да күпчелеге урыс телендә, татар телендә актуаль мәгълүмат юк дәрәҗәсендә, диде форум вәкилләре. Норматив документларның да берничәсе генә татарчага тәрҗемә ителгән.

Яхшылар рәтендә Казан шәһәре думасы, Яңа Савин, Вахитов, Идел-буе районнары хакимиятләре аталды.

Татар телен санга сукмаучылар рейтингын 26 апрельдә bez.tatar сайтында да күрергә мөмкин булачак.

Оештыручылар сүзләренә караганда, башка елларда антипремия белән бүләкләнгән оешма вәкилләренең сәхнәгә менеп бүләкләрен алучылар булмаган. Алар “Мин татарча сөйләшәм” чарасына чакыруга битараф калган. Шул ук вакытта әлеге премияне алучы оешма-идарәләрдә уңай якка үзгәрешләр булуын да билеләп уздылар. Былтыр татар теле кулланылышы Татарстан министрлыклары арасында тикшерелгән иде. 2016 елгы антипремия интернетта эшчәнлекне ике дәүләт телендә алып бармаган Татарстан Үзәк сайлау комиссиясенә бирелде.

“Мин татарча сөйләшәм”нең йомгаклау чарасы быел да 26 апрельдә Бауман урамында сәгать янында узачак. Ул кичке дүрттә башланып, кичке җидегә кадәр дәвам итәчәк.

Биредә ирекле татар музыкантлары концерты әзерләнә, татар телен хөрмәт иткән оешмаларга рәхмәт хатлары тапшырылачак, төрле бәйгеләр дә каралган.

Дөнья татар яшьләре форумы җитәкчесе Тәбрис Яруллин Азатлыкка чараның быелгы иң төп үзенчәлеге дип яшь архитекторларның “Мин татарча сөйләшәм”дә катнашуын атаган иде.

Запись “Мин татарча сөйләшәм” чарасы оештыручылары “татар телен иң санга сукмаучы”ларны атады [видео] впервые появилась Tatar Today - татар яңалыклары..

“Мин татарча сөйләшәм”нең “кухня”сы нинди? [яшьләр акциясе]

Гузель — Fri, 21 Apr 2017 13:51:27 +0000

19 апрельдә Бөтендөнья татар конгрессы бинасында чара активистлары белән очрашу узды. “Мин татарча сөйләшәм” акциясенә әзерлек гөрләп бара. //Tatar Today//

Тарихи чарада катнашырга килгән яшьләрнең саны быел 30га җиткән. Шунысы куанычлы: элек акциядә катнашырга дип, күбрәк татар теле һәм әдәбияты, тарихы, татар журналистикасы факультетларыннан килсәләр, быел КАИ, КНИТУ, КФУның математика һәм механика институты студентлары да чараны оештыруга үз өлешләрен кертергә теләгәннәр.

Активистларның барысы да татарлар. Бөтендөнья татар яшьләре форумы рәисе Тәбрис Яруллин белдерүенчә, бу бер яктан бик әйбәт. Ләкин шул ук вакытта алар арасында чит ил, хәтта күрше Башкортстаннан да килүчеләр булмавы бераз кәефне төшерә икән.

Очрашу барышында киләсе җиде көн эчендә активистлар алдында торачак максатлар билгеләнде. Беренче эш итеп егетләр һәм кызлар Казанда ике теллелек сакланамы, яисә юкмы икәнлеген тикшерергә тиеш. Шәһәр урамнарындагы игълан такталарында русча белән беррәттән татарча мәгълүмат та бармы? Булса, хаталы түгелме? Акция нәтиҗәләре 26 апрельдә билгеле булачак, “җиңүче”гә исә “Тяжело с татарским” антипремиясе биреләчәк.

Шулай ук, “Мин татарча сөйләшәм” акциясе активистларын шәһәр урамнарында да күреп булачак. Тиздән алар башкала халкының татар телен белү, белмәүләрен тикшерәчәкләр. Әгәр кеше ике телне, ягъни рус телен дә, татар телен дә камил белә икән, аңа бүләк биреләчәк. Ә татарча белмәүче, әмма өйрәнергә теләүчеләргә махсус буклетлар таратылачак. Оештыручылар казанлыларны һәм башкала кунакларын чарада актив катнашырга һәм үзләренең белемнәрен сынап карарга чакыра.

Исегезгә төшерәбез: 26 апрельдә сәгать 16:00 Казанның Бауман урамында “Мин татарча сөйләшәм” акциясенә нәтиҗәләр чыгарылачак һәм татар музыкасының яңа буын башкаручылары, төркемнәре гала-концертта чыгыш ясаячак.

Раилә Вәлиуллина

Запись “Мин татарча сөйләшәм”нең “кухня”сы нинди? [яшьләр акциясе] впервые появилась Tatar Today - татар яңалыклары..