«Кадерле дуслар! Гаиләбез өчен кайгылы бу көннәрдә безгә Сәкинә Шакир кызы вафаты сәбәпле йөзләгән телеграммалар килде. Бөтен республикадан, Россия Федерациясенең, якын һәм ерак чит илләрнең төрле почмакларыннан, безнең гаилә белән шәхсән таныш һәм таныш булмаган кешеләр кайгыбызны уртаклашты. Сәкинә Шакировна турында җылы истәлекләр, ихлас сүзләр массакүләм мәгълүмат чараларында да, социаль челтәрләрдә дә күп булуын беләбез. Сәкинә кешеләрне ярата иде, ул гел изгелек кылырга тырышты һәм Татарстан кешеләренең үзенә карата игелекле мөнәсәбәтен югары бәяләде.

Шушы авыр вакытта безгә карата игътибарлы булып, кайгыбызны уртаклашканыгыз өчен, ярдәмегез өчен барыгызга да чын йөрәктән тирән ихтирамыбызны һәм олы рәхмәтебезне белдерәбез.

Барыгызга да сәламәтлек һәм бәрәкәт телибез. Үз туганнарыгызның һәм якыннарыгызның кадерен белегез һәм саклагыз», – дигән ул.

Фото: rbc.ru

Запись Минтимер Шәймиев Сәкинә Шәймиева вафатыннан соң белдерү ясый впервые появилась Tatar Today - татар яңалыклары..

Җырчы Сәкинә Шакир кызыннан: “Әгәр бөтен дөньяда ил башлары булып хатын-кызлар гына торса, дөнья күпкә үзгәрер идеме?” дип сорый.

“Хатын кыз – тормыш чыганагы, ана, тәрбияче, гаилә нигезе. Әгәр дә барлык хатын-кызларыбыз шушы табигый бурычларын җиренә җиткереп башкарсалар, аларның җәмгыяттә тоткан урыны президентлар хезмәтеннән дә ким булмаячак дип саныйм”, дип җавап бирә Асаф Вәлиевка Сакинә Шәймиева.

 

Посмотреть эту публикацию в Instagram

 

Тормышта хатын-кызнын табигый миссиясе президент хезмэтеннэн ким тугел дип эйткэн иде бервакыт Сэкинэ ханым Шэймиева. Ул узе бу бурычны жиренэ житкереп башкарды. Без аны президентнын узен хормэт иткэн кебек ярата идек. (Однажды Сакина ханум Шаймиева сказала, что предназначение женщины в обществе не менее значимо, чем президентская служба. Сама она эту миссию выполнила сполна. Народная любовь к ней была сравнима с уважением к нашему президенту.)

Публикация от АСАФ ВАЛИЕВ (@asaf_valiev_official) 18 Ноя 2018 в 7:32 PST

Запись Асаф Вәлиев Сәкинә Шәймиева белән төшкән видеосын күрсәтә впервые появилась Tatar Today - татар яңалыклары..

– Юк, сеңлем, бер генә, ул – Президент хатыны. Сөй­лим әле сиңа, тыңлап кара, калганын үзең хәл итәрсең, – диде.

Бисмилләсен әйтеп, бик матур итеп сөйләп китте. Мин, кымшанырга да куркып, дөньямны онытып тың­ла­дым. Бик матур вакыйга, булган хәл.

Ул елны Хәбирә апаның бик тә корбан чаласы килгән. Акчасы да булган, корбанлык кына таба алмаган. Хәзер инде, корбанлык таба алмаган, дигән сүзгә кеше ышанырлык түгел. Ә бит бар иде шундый еллар, йә акча җыештырып бетереп булмый, йә корбанлык булмый иде. Аз, санаулы кешеләр генә корбан чала иде.

– Каяндыр китермәс­ләр­ме дип, мәчет, кибет, базар тирәләрен өч көн урадым, – ди Хәбирә апа. – Үзем дә чала алмадым, чалучылар да бер калҗа ит бирмәде, – ди. – Күңелем тулды, кесәм­дәге акчамны учлап мәчет тарт­масына салдым да елый-елый кайтып киттем. Шатланырга да белмим, кайгырырга да. Өем мәчеттән шактый читтә, юл буйлап акрын гына елый-елый кайтам. Бер зур, биек, ялтырап торган машина, әкренәеп, әйләнеп узды да нәкъ барасы юлыма килеп басты. Әй, Раббым! Миңа юлымны бүләргә шул машина гына җитми иде, дим. Шул урында кире борылдым да килгән ягыма киттем. Кинәт артымнан ишетелгән ягымлы сүзгә борылып карасам, ниндидер бик ягымлы матур хатын миңа эндәшә, миңа таба атлый. Мин дә аңа каршы киттем, без күптәнге танышлар кебек бер-беребезне кочаклап алдык. Аллаһының сә­ламнәрен, рәхмәтләрен җиткерешеп, Корбан бәй­рәм­нәре белән котлаштык. Ул арада шоферы аңа зур бер пакет китереп тоттырды. Корбан ите. Мин югалып калдым: “Болай күп булмый бит ул”, – дидем. Ул тагын шоферына эндәште, тагын берне яныма китереп куйдылар. Телем аңкавыма ябышты, көчкә-көчкә: “Син кем кызы?” – дидем. Ул: “Мин – Сә­кинә Шакир кызы, каенатам Шә­рип атлы”, – диде. Бернәр­сә аңламадым, шулай да исемен истә калдырасы бар, дога кылырга тиешмен бит әле. Ярый әле авызым сүз ясады: “Син – Аллаһының илчеседер, фә­рештәседер”, – дидем. Кем икәнен белмәдем, ул арада кузгалып та китте­ләр. Тагын шулай зиһенемне җыя алмыйча күпме басып торган булыр идем, машинасыннан күрше малаеның: “Хәбирә апа, син кайтасың­мы?” – дип кычкырганыга ай­нып киттем. Күршем машинасына үзе күтәреп куймаса, мин күтәрә алмас идем. Үзе үк өемә дә кертеп бирде: “Хә­бирә апа, корбан чал­дыңмы әллә?” – диде. “Ми­нем өчен чалганнар”, – дидем. Яшьләр укымышлы, белемле шул, бер дә ишет­кәнем юк иде, тиз генә сөйләп алды: “Хә­бирә апа, беләсеңме, Пәй­гамбәребез Мөхәммәд Мос­тафа сал­ләл­лаһу галәйһи вә сәлләм дә корбан чаласы килеп тә, чала алмый калганнар исеменнән Аллаһ ризалыгы өчен корбан чала торган булган. Синең исемең­нән дә корбан чалганнар булып чыга бит. Яныңа Президент машинасы туктаган иде. Әйе, бу шул үзе – Сәкинә ханым, мин аның сайлауга килгәнен телевизордан күргән идем”.

Ул елны корбан чалырмын да, корбан ашлары, Коръ­ән мәҗлесләре үткә­рермен дип адарынган, әзер­ләнеп куйган идем. Ул итләр­нең, алып куйган ризык­лар­ның бәрәкәтен күрсәгез иде. Өч табын мәҗлес үткәрдем. Беренче – ир-атлар, икенче – хатын-кызлар, өченчесе – яшь­ләр, тирә-күршегә, туганнарга, бала-чагаларга да җитте. Әй, сеңлем Фәния, шуларга бер рәхмәт яз инде, – диде дә елап җибәрде.

Мин дә кушылдым. Тынычландырырга теләп:

– Һичшиксез язачакмын, Хәбирә апа, ләкин бүген-ир­тәгә генә түгел, – дидем.
Минем шуңа охшаш хәл­ләрне тирә-күрше авыл, бис­тәләрдә ишеткәнем, Сә­кинә ханымга рәхмәт язуымны сораган кешеләрне оч­ратканым булды. Хәбирә апага сүз бирсәм дә, өстемә зур васыять алсам да, язганым булмады.

Тыйнак кешеләрне мактап та, кәефләрен бозарга мөмкин икәнен беләм. Кылган изгелекләренең савабын киметермен дип курка идем. Гаҗәп дәрәҗәдә сабыр, акыл­лы, сөйкемле ханым, ханбикә иде ул. Мөселман йөзле, нур бөркелеп тора торган сөйкемле хатын иде. Татар хатыны нинди була, нинди булырга тиеш дигән сорауларга тулы бер җавап ул. Татар театрын, Камал театрын ярата иде алар. Әгәр парлап килеп керсәләр, тамашачылар, дәррәү кузгалып, кул чабарга тотыналар иде. Ә бит театрга премьераларга аны күрер өчен барган, хат, үтенеч, сораулар тап­­шырган, аларның уңай хәл ителгәннәрен дә белә, күрә идек.

Гомеремнең бер чорында мин ат чабышлары, машина ярышларына йөри, телевизордан уллары Айрат бе­лән Радикның машина узышларын күрә идем дә, бу Сә­кинә ханымның йөрәге ничек чыдый икән, дип куя идем. Аңа бу дөньяда беренче Пре­зидентның хатыны булу бер дә җиңел булмагандыр. Ул үзе дә туктаусыз хәрәкәттә, борчуда булгандыр. Күп еллар элек Минтимер Шәри­повичтан: “Сезнең хезмәт­челәрегез бармы?” – дип сораганнар иде. Ул рәхәт итеп көлеп җибәрде: “Әгәр хез­мәтче алсак, Сәкинә апагыз аңа да хезмәт итә башлаячак”, – диде. Шулайдыр, аның аш-су тирәсенә чит кешене катнаштырмаганын да ишет­кәнем бар. Павлюхин почмагындагы урам чатында авыл кешеләре сатып торган базардан яшел үләннәр, кү­кәй алып торганын күр­гәнем бул­ды. Анда да ул матур, яшел җирлеккә ак борчак төшкән, килешле крепдешин күлмәк, аягына ак босоножка кигән, кешеләр белән елмаеп сөй­ләшә, ягымлы, сөй­кемле иде.

Алар матур, тигез, бә­хет­ле пар, яр булып, 57 ел гомер иттеләр. Килгәннәр китә, беркемне дә бернәрсә дә алып кала алмый, 79 яше тулгач, Сәкинә апа да мәңгелек сәфәренә кузгалды, гамәл дәфтәре ябылды. Аллаһ аны ишетте. Хушлашу җеназа­сында Минтимер агай: “Сә­кинә, кеше җомга көнне вафат булса, бу кеше изге булган, җомга көнне китте, дия иде”, – диде. Әйе, Сәкинә ханым нәкъ Рәшидә абыстай кебек җомга көнне вафат булды, җомга көнне гүр куенына иңдерелде. Аны Тукай, Мәрҗани (күп инде алар), күп галимнәр, яхшы кешеләр, хәзрәтләр яткан татар зиратына җирләделәр. Ул вафаты, җирләнгән урыны белән дә зур сабак биреп, Минтимер агайга тау кадәр эш калдырып китте. Моннан соң татар зираты бу хәлдә була ал­мый, аны карыйсы, тө­зек­ләндерәсе, чистартасы бар. Агаебызның нинди эш­ләргә сәләтле икәнен күреп бе­ләбез. Аннан соң да ул мондый эшләрдә ялгыз тү­гел, уллары, без, Хәбирә апалар, татар халкы бар. Инде әллә ничә кеше: “Сәкинә Шакир кызы рухына Коръән чыга башладым, 40 Йәсин укыйм”, – дип шылтыраттылар. Аллаһ күрүче, Аллаһ бе­лүче, “Изге эшләрдә ярышыйк”, һәр барчабызга да мөселман булып кубарылырга язсын.

(Фәния ХУҖАХМӘТ, “Ватаным Татарстан”, /№ 167, 20.11.2018/)

Запись “Минтимер агайга тау кадәр эш калдырып китте” [Сәкинә Шәймиева истәлегенә] впервые появилась Tatar Today - татар яңалыклары..

Көз көнендә яшен сукты
Татарстан күген.
Алсу таңда якты, нурлы
Йолдыз сүнде бүген.

Йолдыз юлыннан сызылып
Зәңгәр нурлар калды,
Безнең йомшак күңелләргә
Әрнү, моңнар салды.

Авыр хәбәр җиткерделәр
Җәяү искән җилләр,
Каеннар да, башын иеп
“Иртә киттең”, – диделәр.

Ышанасым килми бер дә,
И, Син, яшьлек дустым!
Яшисе дә яшисе бит
Иде әле бергә.

Күптән түгел, без бит әле,
Яп-яшь кенә идек.
Безнең гомер, безнең яшәү –
Мизгел генә икән бит ул.

Бәхет орлыклары чәчеп
Калдырдың Син җирдә.
Изге исемең мәңге яшәр
Халкың күңелендә.

Сагынырбыз Сине һәрчак.
Оныталмабыз бер дә, тыныч йокла.

Нәкирә Лутфрахманова (menzela, 16 ноябрь, 2018 ел).

Запись Нәкирә Лутфрахманова – “Якын дустым Сәкинә истәлегенә” впервые появилась Tatar Today - татар яңалыклары..

Ярдәм сораучыларны кире бормаган бу ханым турында әйтер сүзләр, чыннан да, күп икән. Җырчы Филүс Каһиров, мәсәлән, аның сәләтле кешеләргә хәер­хаһлы булуы турында әйтте. Күпләр, ир-атның уңы­шы – тылының ныклыгында, хатынының асыл сыйфатларында, диде. Әлеге сүзләрне раслар өчен, Сәкинә ханым­ның берничә истә­леген искә төшерик әле. “Ни­гездә, мине барысы да бик игелекле кеше диләр. Минем тормышның кыйбласы шул: бер яхшылык меңе белән кире кайтыр. Бер рәхмәт мең бәладән коткарыр, ди халык мәкале. “Иге­леккә ышаныр өчен аны эшли башларга кирәк”, – дигән Лев Толстой. Чыннан да, явыз­лык явызлык тудыра, ә игелек игелекне ишәйтә. Мин­тимер моны һәрчак ассызыклап тора. Миңа бик күп­ләр, ярдәм сорап, хат язалар. Кулымнан килгән кадәр яр­дәм итәргә тырышам, һәр­вакыт акылым һәм йөрәгем кушканча эшлим”, – дип яза ул “Минти­мернең хәләл җе­фете” дигән китабында. “Бервакытта да “беренче леди” булырга өйрәнмәдем. Укыганда этика, этикет дигән фән­нәр кермәде шул безгә. Өстәвенә, татар хатын-кы­зына тыйнак булу мәгъкуль”, – дип тә искәртә һәм ничек кенә кыен булмасын, теләсә нинди шартларда максаты – ирен карап-тәр­бияләп тору булганын бәян итә.

Җеназа намазы Мәрҗани мәчетендә узды. Намаздан соң хушлашу чарасы үткә­релде. Аны Татарстан Дәүләт Советы рәисе Фәрит Мөхәм­мәтшин алып барды. Алар күрше булып яшәгәннәр, ике гаилә шатлыкны да, кайгыны да бергә уртаклашканнар. “Сәкинә ханым иренең уң кулы, ышанычлы тылы, гаилә учагы сакчысы булды. Алар менә дигән ике ул һәм оныклар тәрбияләделәр”, – дип үзе һәм ватандашлар исе­меннән Шәймиевләр гаилә­сенең кайгысын уртаклашуын белдерде.

Минтимер Шәй­миев хә­ләл җефете белән үткәргән соңгы көн­нәрне искә алып, хушлашуы күңел­дә матур булып калды, диде:

– Сәкинәнең кешеләрне яратуы, хөрмәт итүенең иге-чиге юк иде. Авырганда да һәрвакыт эшкә ашатып-эчер­теп озатып кала иде. Кичә сөй­ләшеп, бер-беребезгә карашып утырдык. Бертуган сеңлесе, улларыбыз да хас­та­ханәгә килде. Без кер­гәч, кү­зен ачып: “Рәхмәт”, – дип әйтте. Саубуллаштык. Хуш­лашуы шулай күңелдә матур булып калды. Безгә, исәннәргә, сәламәтлекне сак­ларга, ха­тын-кызны бәяләр­гә, гаи­ләдә, бер-беребез бе­лән аңлашып, балалар тәр­бияләп яшәргә ки­рәк.

Ул кайгы уртаклашучыларга, хушлашырга килүче­ләргә рәхмәтен җиткерде, барыгыз алдында да баш иям, диде. Илбашы Сәкинә ханым­ның кешеләрне җомга көнне озатырга туры килсә, изге кеше икән, урыны оҗмахта булсын, дигән сүзләрен дә искә төшерде һәм хәләленә оҗ­мах бәхетләре теләде.

Сәкинә Шакир кызына 79 яшь иде. Алар Минтимер Шә­рип улы белән 57 ел бергә гомер иткәннәр.

Гөлинә Гыймадова, ВТ

Запись Минтимер Шәймиев: “Сәламәтлекне сак­ларга, ха­тын-кызны бәяләр­гә кирәк” впервые появилась Tatar Today - татар яңалыклары..

“Сәкинәнең кешеләрне яратуы, хөрмәт итүенең иге-чиге юк иде. Авырганда да һәрвакыт эшкә ашатып-эчертеп озатып кала иде”, – дип сөйләде бүген Минтимер Шәймиев Мәрҗани мәчетендә узган хушлашу чарасында. Татарстанның беренче Президенты, Дәүләт Киңәшчесе җеназа намазы алдыннан үзенең хәләл җефете белән үткәргән соңгы минутларын искә алды.

“Кичә сөйләшеп, карашып утырдык. Озак яши алмас, дидем. Кичә бертуган сеңлесе, улларыбыз да хастаханәгә килде. Без кергәч, күзен ачып: “Рәхмәт”, – сүзен әйтте. Саубуллаштык. Хушлашуы шулай күңелдә матур булып калды. Безгә – исәннәргә, сәламәтлекне сакларга, хатын-кызны бәяләргә кирәк, гаиләдә – бер-беребез белән аңлашып, балалар тәрбияләп яшәргә…”, – диде Минтимер Шәймиев.

Ул кайгы уртаклашкан, Мәрҗани мәчетенә хушлашуга җыелган кешеләргә рәхмәт сүзләрен җиткерде. “Барыгыз алдында да баш иям”, диде.

Сәкинә ханым турында Минтимер Шәймиев: “Кешеләрне соңгы юлга җомга көнне озатырга туры килсә, “Изге кеше икән, урыны оҗмахта булсын”, – дия иде”, – дип искә алды.

Татарстанның беренче Президенты, Дәүләт Киңәшчесе Минтимер Шәймиевнең хәләл җефете Сәкинә Шәймиева 79 яшендә, озакка сузылган авырудан соң бүген, 16 ноябрьдә вафат булды. Алар 57 ел бергә гомер иткәннәр. Мәрхүмәгә җеназа намазы Казанның Мәрҗани мәчетендә укылды.

Чыганак: tatar-inform

Фото: Бизнес Онлайн

Запись “Озак яши алмас, дидем” – Минтимер Шәймиев Сәкинә ханым белән хушлаша [фото] впервые появилась Tatar Today - татар яңалыклары..

Татарстан президенты Рөстәм Миңнеханов Шәймиевләр гаиләсенә кайгы уртаклашуын белдерде. Бу хакта президентның матбугат сәркатибе Эдуард Хәйруллин хәбәр итә.

Сәкинә ханыма Гали мәчетендә дога кылына, Мәрҗәни мәчетендә җеназа укыла. Васыяте – татар зиратына җирләнү була икән. Безнең чыганаклар Сәкинә Шәймиеваның хаҗ га да баруын әйттеләр, димәк Сәкинә ханым бу җирдән хаҗи булып китте. Урыны җәннәттә булсын!!!

 

Посмотреть эту публикацию в Instagram

 

Мәрҗани мәчетендә республиканың беренче Президенты Минтимер Шәймиевнең хатыны Сәкинә ханымны соңгы юлга озатып, җеназа укыдылар. #сакинашаймиева #минтимершаймиев #сәкинәшәймиева #сәкинәшәймиева #шаймиев #первыйпрезиденттатарстана

Публикация от Рамис Латыпов (@ramis_latipov) 16 Ноя 2018 в 3:07 PST

Запись Кайгылы хәбәр: Минтимер Шәймиевнең хатыны вафат [соңгы юлга озату фотолары] впервые появилась Tatar Today - татар яңалыклары..

Ул аңлатып бетереп булмый торган сөйкемле кеше иде. Нәкъ минем яныма килде һәм шунда ук биергә чакырды. Без икебез дә бик дулкынландык. Мин хәтта аның йөзенә туры карарга да оялдым.

…Бу кичтә ул башка бер тапкыр да мине биергә чакырмады, һаман да дус кызым Рита белән биеде. Мин үпкәләдем: ул миңа бик ошады, ә мин аңа-юк. Клубтан соң, ул икебезне дә култыклап алды…һәм өйгә кадәр озата китте. Капка төбендә Рита белән саубуллашты, ә минем калуымны үтенде. Мин аңа үпкәмне белдереп: «Син ни өчен кич буена дус кызым белән биеп, мине калырга сорадың?»-дидем. Ә ул ачыктан-ачык, кич буена Ритадан минем тумышым белән кайсы яклардан булуымны, кайда эшләвемне, очраша торган кешем бармы икәнлеген сорашканлыгын сөйләде. Аннары шул билгеле булды: мин аның йөрәгендә шулай ук ут кабызганмын. Минтимер клубка килеп кергәч тә мине күреп алуы, ак кофта, кара сарафан кигән, чәче озын кара толымлы булган кызның кем икәнлеге белән кызыксынуы турында әйтте. Күрәсең, бер күрүдә гашыйк булу шулай була торгандыр…

Бу вакытта Минтимер үзенең туган районына диплом алды практикасын үтү өчен кайткан иде. Без аның белән һәркөнне очраштык. Практикасы тәмамлангач, ул Казанга кайтып китте. Без һәркөнне хатлар алыштык, телефоннан сөйләштек. Телефоннан аралашканда ул һәрвакыт: «Син бүген миңа хат яздыңмы?»-дип сорый иде. Аның мәхәббәте шулкадәрле көчле була иде, хәтта дуслары мин аны сихерләгәнмендер дигән сүзләр әйтәләр иде.

…Мөселманнар йоласына туры китереп, безгә Казанда никах укыдылар. Ә туй Минтимерның туган авылында узарга тиеш иде. Без ак пароходта юлга чыктык. Бу, мөгаен, безнең иң хыялый хатирәләребезнең берсе булгандыр. Безнең яшь, чибәр һәм бер-беребезгә гашыйк булган чаклар… Тирә ягыбызда Идел, Каманың гүзәл ярлары.

Еллар узганнан соң, бер журналист Минтимер Шәрип улыннан: «Сез үзегезнең иң бәхетле көнегезне хәтерлисезме?»-дип сорады. Ул: «Андый хәл бик күптән, Сәкинә белән Казаннан пароходта йөзеп кайтканда булды»,-дип җавап бирде.

Без Минтимер белән 1961 елның 7 июнендә язылыштык. Нәкъ 9 айдан, 1962 елның 7 мартында олы улыбыз Айрат туды…

Мин-аны яратучы һәм аның тарафыннан яратылучы хатын-кыз. Миңа Минтимерның күләгәсендә җылы һәм рәхәт», дип яза Сәкинә ханым.

1964 елда исә аларның икенче уллары Радик Шәймиев дөньяга килә.

“Татар-ислам” сайтыннан

Запись Сәкинә Шәймиева: “Мин хәтта аның йөзенә туры карарга да оялдым” впервые появилась Tatar Today - татар яңалыклары..

Forbesның Русиядә чыгучы журналы Татарстан Дәүләт киңәшчесе, элекке президент Миңтимер Шәймиев гаиләсенең керемен 2,48 млрд доллар дип бәяләгән. Басма язуынча, Радик һәм Айрат Шәймиевләр Татарстанның иң бай кешеләре, аларның һәркайсы ТАИФ төркеменең 19,5% хиссәсенә ия. Әлеге төркемгә “ТАИФ-НК” нефть эшкәртү, “Түбән Кама нефтехим”, “Казаноргсинтез” һәм ТГК-16 ширкәтләре керә. “Коммерсант” язуынча, аларның гомум кереме бер елда 300 миллион долларга арткан.

Радик Шәймиевнең кызы Камилә 2014 елның маена кадәр ТАИФның мөдирләр шурасына керә иде. 2015 елны ул кияүгә чыга һәм гаилә бизнесыннан китә. Хәзер ул Doc+ медицина стартапы белән шөгыльләнә.

Басма белдерүенчә, Айрат Шәймиевнең улы Тимур 2016 елны әтисе һәм әтисенең абыйсы белән берәттән җитәкләгән “МНКТ” ширкәтенең 30 процентына ия булган. Ширкәтнең 30 проценты – әтисе Айрат, 40 проценты абыйсы Радик кулында.

Русиядәге иң бай гаиләләр Forbes исемлегендә Шәймиевләр гаиләсе дүртенче урында тора. Алардан алда Михаил Гуцериев гаиләсе (5,97 млрд доллар), Ротенберглар гаиләсе (4,85 млрд доллар), Гапонцевлар гаиләсе (3,14 млрд доллар).

Азатлык радиосы язмасы (чит ил агентлыгы)

Запись Forbes: Шәймиевләр Русиянең иң бай гаиләләре бишлегендә впервые появилась Tatar Today - татар яңалыклары..