Татарстанда 1 сентябрьдә республика халкын гриппка каршы бушлай прививка ясый башларга ниятлиләр. Бу хакта Роспотребнадзорның ТР буенча идарәсе җитәкчесе урынбасары Любовь Авдонина сөйләде.

• Без вакцинаны августның 20нче саннарында көтәбез, шуңа күрә 1 сентябрьдән прививкалар ясау компаниясе эшли башлаячак. Быел бөтен кешене гриппка каршы прививка ясарга чакырабыз, бүгенге көндә ул бик кирәк, – дип ассызыклады ул.

Татарстан сәламәтлек саклау министрлыгы һәм Роспотребнадзор Казанда метро станцияләре янында мобиль пунктлар урнаштыру һәм зур предприятиеләрдә күчмә вакцинация оештыру мөмкинлеген карый. Грипп һәм коронавирусның катнашуы инфекцияләрнең төрле зарарлану төркемнәре булуы белән куркыныч. Аларның берсе таралган чорда халыкның бер өлеше генә авырса, киләсе сезонда авыручылар саны артырга мөмкин.

Фото: Яндекс Дзен

Чыганак: KazanFirst

Запись Кайчаннан Татарстанда гриппка каршы түләүсез вакцинация башланачак? впервые появилась Tatar Today - татар яңалыклары..

Аның сүзләренә караганда, вакцинациядән соң ук кешеләрнең препаратка реакциясе барлыкка килгән, тик ул бер тәүлектән дә артмаган. Бу теләсә кайсы прививка өчен хас күренеш:  иньекция кадаган урынның кызарып торуы, температураны күтәрелүе, кайчагында баш авырту.

«Хәзерге вакытта вакцина казатучыларның хәле яхшы, нинди дә булса шикаятьләр юк, барлык тормыш өчен мөһим функцияләре нормада»,-диде Смолярчук.

Сеченов исемендәге университетта вакцинаның клиник сынаулары июнь уртасында башланды. Ирекле кешеләрнең беренче төркеме өч атна элек, икенчесе ике атна элек препарат алган. Июль урталарында аларны хастаханәдән чыгарырга ниятлиләр.

Чыганак: Ватаным Татарстан 

Запись Үзләре теләп коронавирустан прививка ясатучыларның аны ничек кичерүләре билгеле булды впервые появилась Tatar Today - татар яңалыклары..

Австралия балалар фәнни институты галимнәре коронавирусны дәвалауның яңа ысулын сыный башлыйлар. Галимнәр фикеренчә, барыбызга таныш булган, туберкулездан салына торган прививка COVID-19тан саклап калырга мөмкин.
Учреждение сайтында билгеләнгән: тикшеренүчеләр фикеренчә, вакцина кешенең иммунитетын ныгыта, бу авыруның симптомнарын йомшартырга мөмкинлек бирә. Шул рәвешле, фәнни хезмәткәрләр коронавируска каршы дарулар эшләү өчен күбрәк вакыт булачак.
Бу сынау COVID-19 симптомнарына каршы вакцинаның нәтиҗәлелеген тиешле дәрәҗәдә тикшерергә мөмкинлек бирәчәк һәм безнең герой-медхезмәткәрләребезнең тормышын саклап калырга ярдәм итә ала, – дип сөйләде профессор Кетрин Норт.

Мәгълүмат News.ru

Запись Туберкулездан салына торган прививка коронавирус инфекциясеннән саклап калырга мөмкин впервые появилась Tatar Today - татар яңалыклары..

Коткы таратучыга – штраф

Соңгы елларда табибларның вакциналарның әһәмияте турында сөйләгән сүзе көчен югалта төште. Моңа дәлил – прививкадан баш тартучылар саны арта. Кай­бе­рәүләр үзенә ясаткан сурәттә дә, баласына ясатмый. Шул ук вакытта әллә кайчан юкка чыккан чирләр яңадан баш калкыта. Узган ел Чаллыда берничә кешедә кызамык чире табылды. Шуннан соң ул чиргә каршы вакцина ясатучылар да кисәк арткан.

Россия Сәламәтлек саклау министрлыгы шушы көннәрдә вакцина ясатуга каршы юнәлдерелгән язма чыгарган массакүләм мәгъ­лүмат һәм интернет басмалар җә­засын алырга тиеш, дигән тәкъдим белән чыкты. Җәза дигәндә, министрлык андый шик-шөбһә тудыручыларны штрафка тартуны, кайбер интернет басмаларны яптыруны күз уңында тота. Сәламәтлек саклау министры урынбасары Татьяна Яковлева: “Мәгълүмат, мәгълүмати техно­ло­гияләр һәм мәгълүматны яклау турында”гы, “Массакүләм мәгъ­лүмат чаралары турында”гы, “Йогышлы авыруларны иммунопрофилактикалау турында”гы Законнарга үзгәрешләр кертергә чакыра. “Массакүләм мәгълүмат чаралары, интернет басмалар һәм дини секталар аша вакциналарга кагылышлы дөрес булмаган хәбәр­ләр таратыла, шулар халыкның әлеге чарага карата ышанычын киметә”, – ди ул.

Рәсми мәгълүмат җитми

Тик тыю, чикләү, ябу юлы белән нәрсәгә ирешерләр? Ул хакта бе­лешү өчен Дәүләт Думасы депутаты Айрат Фәррахов белән элемтәгә кердек.

– Кешенең вакцинациядән качарга тырышуы, прививка ясатырга бармавы зур проблема тудыра, – ди депутат. – Ни өчен дигәндә, әллә кайчан юкка чыккан инфекцияләр кире кайта башлады. Бер мисал китерәм: балалар бакчасында егерме сабыйның бишесе ясаткан, унбише юк, ди. Ул җирлектә, әлбәттә, инфекция таралу куркынычы бар. Әйтик, кызамык чире бө­тенләй беткән иде. Йогышлы чирне ил күләмендә күмәк рәвештә вакцина ярдәмендә җиңдек. Ул чагында, ясатмыйм, дип каршы чыгучылар булмады. Соңгы елларда яңадан шуның белән авыру очраклары күбәя. Бу нилектән болай булды? Җа­вабын да әллә каян эзлисе түгел. Файдасына караганда зыяны күб­рәк, дип сөй­ләп йөрүчеләр халык фикерен барлыкка китерә. Прививка ясаткач, өзлегүләр килеп чыккан, фәлән кадәр кеше үлгән, инвалид калган дигән сүзләрне ишетәбез. Кем чыгара ул хәбәр­ләрне, алар бит берсе дә рәсми мәгълүмат түгел! Ул хәбәрләрнең ялган икәнен раслау өчен рәсми саннарны булдырасы иде. Сәла­мәт­лек саклау министр­лыгының вакцина кертүгә каршы чыгучы сайтларны ябарга, оешмаларны штрафка тартырга кирәк, дигән фикере белән килешәсе килми, бүген берсен ябарлар, иртәгә – икенчесен. Кызыксынган кеше бү­тән сайтларда казыначак һәм те­ләгәнен табачак. Интернет чел­тә­рендә тискәре мәгълүмат күп.

Айрат Фәррахов бу җәһәттән Россия Дәүләт Думасына закон проекты керткән. Ул нәрсәдән гыйбарәт соң? Вакцинацияләү кампаниясе өчен җаваплы булган Сәламәтлек саклау министрлыгы һәм Роспотребнадзор идарәсе вәкилләре ел саен икенче кварталда прививка эше буенча хисап тотарга тиеш. Кайсы вакциналарны күпме кеше ясаткан, күпмесе баш тарткан, сәбәбен ничек аңлаткан, өзлегүләр булганмы, кайсы очракта? Барысы турында да ачыктан-ачык сөйләячәкләр. Бәйсез экс­пертларның, галимнәрнең фикере дә исәпкә алыначак.

Вакциналарга кагылышлы фи­керләр, чыннан да, каршылык­лы. “Иртәгә мәктәптә балаларга прививка ясарга киләләр. Ясатыйммы, юкмы?” – дип безнең редак­циягә шалтыратучы ата-аналар да була. Ник шулай икеләнеп калдыгыз, дип сорагач, зыяны хакында дус кызлардан, танышлардан ишеткән идем, диләр, ләкин төгәл дәлил ки­терә алмыйлар. Юкса иң әүвәл медицина хезмәткәре белән ки­ңә­шер­гә кирәк. Бала белән берәр нәрсә булса, алар янына йөге­рә­сең, дус-ишләр дә, интернет сайтлары да медицина ярдәме күр­сәтмәячәк.

Кайчан ясатырга ярамый?

Кешенең хроник авырулары көчәйгән чагы икән, температурасы күтәрелсә, эче китсә, ясатырга ярамый. Терелгәч, бер айдан ясатырга мөмкин. Вакцина төрле мат­дәләрдән тора, шуның берәр­сен­нән аллергия булса, шулай ук вакцина ясамыйлар.

Казан дәүләт медицина университетының балалар йогышлы авырулары кафедрасы доценты Халит Хәертдинов:

– Россия Федерациясендә 12 йогышлы чиргә каршы мәҗбүри вакцина ясала. Алар илкүләм календарьга кертелгән һәм ясалу вакыты билгеләнгән. Вакциналарның файдасы зур, аларны ясый башлагач, күп кенә йогышлы чирләр юкка чыкты. Әйтик, җил чәчәге авыруын шундыйлар рәтенә кертергә мөмкин. Шуңа күрә 1980 еллардан башлап аңа каршы вакцина ясау тукталды. Вакцинация үткәрелгәч, полиомиелит, дифтерия, кызамык, кызылча чирләре кимеде. Соңгы берничә ел дәвамында Татарстанда кызылча авыруы килеп чыкканы юк. Берара В гепатитының көчле формасы белән авыручылар күбәйгән иде. Вакцинация эшенә керешкәч, аны да җиңә алдык. Хәзер ул сирәк очрый. Кайчакта республикага Таҗикстаннан, Үзбәкстаннан, башка төбәкләрдән килгән кешеләрдә табыла. А гепатитына каршы вакцинаны ясату мәҗбүри түгел. Берәр кеше авырып китсә, аның белән якыннан аралашучыларга вакцинаны кертү тәкъдим ителә. Тиздән җәйге яллар башлана, чит илләргә чыгулар арта. Африкага, Төньяк Америкага баручыларга сары бизгәк чиренә каршы вакцина ясату начар булмас. Язгы чорда талпаннар активлаша, алар да энцефалит, боррелиоз чирләре китереп чыгарырга мөмкин. Тик Татарстанда ул җәһәттән вәзгыять кискен тора дип әйтә алмыйбыз. Әлеге чирләр Себер зонасында киң та­рал­ган. Республика халкы урманга, болынга барганда үзе талпаннан саклык ча­расы күрсә, шул җитә, аңа каршы күмәк рәвештә вакцина ясатырга киңәш ителми. Чит илләргә барыр алдыннан поликлиника табиблары белән ки­ңәшеп чыгу комачауламас. Хаҗга барырга җыенучыларга менингококк инфекциясенә каршы прививка кертәләр. Балалар арасында авыз куышлыгы вирусы инфекциясе киң таралган. Аңа каршы ясатырга мөмкин. Ул күбрәк салкын вакытта очрый, җәй көне кими. Җәйге вакытта энтеровирус ин­фекциясе килеп чыга, ә аңа каршы вакцина әлегә юк.

Татарстан Сәламәтлек саклау министрлыгы мәгълү­мат­лары буенча, баласына полиомиелит чиренә каршы вакцина ясатудан баш тартучы ата-аналар саны 7 мең 470кә җиткән. Коклюштан прививканы – 4,5 мең, кызамыктан – 8 мең 400, паротиттан – 8 мең 200, В гепатитыннан 10 мең кеше ясаттырмаган.

(Фәния Арсланова/“Ватаным Татарстан”, /№ 54, 12.04.2019/)

Фото: пиксабай

Запись Прививкалар тирәсендә янә җәнҗал чыкты впервые появилась Tatar Today - татар яңалыклары..

Сәла­мәтлек саклау министрлы­гының штаттан тыш эпидемиологы Наталья Ивойлова әйтүенчә, кайбер ата-аналар прививканы үзенә ясаткан очракта да, баласына ясатмау яклы. Ни өчен дип сорагач, сәбәбен аңлатып бирә алмыйлар. Моңа кадәр грипп­ка каршы вакциналар бе­лән дә шундый ук хәлләр килеп чыкты, әти-әниләр бел­­гечләрнең аңлатуын чын­га алмады.

Сабыйлар өлкәннәрнең ваемсызлыгы аркасында нин­­д­и генә чир корбанына әйләнми. Татарстанда яшь әни туберкулез белән авырып китә һәм чирне бер яшь тә сигез айлык нарасыена да йоктыра. Бу хакта журналистларга “Татар-Информ” мәгълүмат агентлыгында бул­ган матбугат конферен­циясендә сәла­мәт­лек саклау министры урынбасары Сергей Осипов җиткерде. Үп­кәсенә зыян килгәнгә, авырлык белән генә тын алган баланы хастаханәгә салалар. Әнисе прививка ясатуга каршы чыкканда, баласының шулай авырып китәсен күз алдына да китермәгән, күрә­сең. Өйдә саклык чараларын күрергә тырышсаң да, чирне көтмәгән җирдә эләктереп кайтырга мөм­кинсең. Әйтик, сәүдә үзәк­ләрендә, транспортта, башка җәмәгать урын­нарында йөргәндә… “Әйләнә-тирәң­дә барысы да сәламәт булу синең беркайчан да авыр­маячагың турында сөйләми әле”, – ди Сергей Альбертович.

Белгечләр кисәк килеп чыккан йогышлы авырулардан соң, вакциналарны планнан тыш ясарга мәҗ­бүр була. Авырулар белән бәйләнеше булган 69 балага, 34 медицина хез­мәт­кәренә туберкулезга каршы шундый чара күрелгән.

Бу көннәрдә Чаллы поликлиникаларында кызамыкка каршы вакцина ясатучылар күбәйгән. Ул җә­һәттән, белгечләр Балтач районын да мисалга китерде. Анда дистәгә якын кешедә сары авыруы (А гепатиты) табылгач, чир тиз арада башкаларга да таралмасын өчен, ашыгыч рә­вештә 395 кешегә вакцина ясыйлар. Шуларның 248е – балалар. Сергей Осипов әйтүенчә, плансыз рәвештә үткәрелгән чаралар республика казнасына зыян ки­терә, ул акчаны башка максатларда тота алыр идек. Плансыз рәвештә вакцина ясау чаралары өчен ярты миллион сумнан артык акча киткән. Ә йогышлы чир­ләрнең өзле­гүләр барлыкка китерүен дә исәпкә алсаң, кеше өчен ул ки­ләчәктә бик кыйммәткә чыгачак.

Фәния Арсланова, Ватаным Татарстан

Фото: https://pixabay.com

Запись “Әнисе прививка ясатуга каршы чыкканда, баласының шулай авырып китәсен күз алдына да китерми” впервые появилась Tatar Today - татар яңалыклары..

Балык Бистәсендә ата-анасы белән читтән күченеп кайткан кыз балага А гепатиты диагнозы куйганнар. Эпидемиолог, бездә гепатитның бу төре белән авыручылар аз дисә дә, соңрак узган елга караганда быел күбрәк булуын әйтте. Аның фикеренчә, мигрантларга хас чир бу, бигрәк тә Үзбәкстан, Таҗикстан кебек илләрдән килүче өлкән яшь­тәгеләрнең һәркайсы диярлек кайчан да булса А гепатиты белән авырырга өлгер­гән. Аңа каршы вакцина кешенең үз теләге яки кайбер авырулар вакытында табиб киңәше белән ясала. Россия гражданлыгы булмаганнар аны үз хисабына ясатырга тиеш.

А гепатиты – ашказаны-эчәк авыруы булса да, иң беренче бавырны зарарлый. Шуңа күрә кешенең йөзенә сары иңә. Аны икенче төрле сары авыруы дип тә йөртәләр. Ул ризык, су, пычрак куллар аша кешедән кешегә күчәргә мөмкин. Беренче билгеләре тирән сулыш юллары чир­ләренекенә охшаш. Балык Бистәсендәге кыз – мәктәп укучысы, бассейнга да йөргән. Сыйныфташлары арасында бүтән андый очрак булмаган. Бассейнны Роспотребнадзор хезмәткәрләре тикшерә.

Ә Чаллыдагы ике сабый кызамык белән авырый. Алар – төрле гаиләләрдән. Бер яшьтә җиде айлык бала шәхси бакчага йөргән, аның әти-әнисе вакцинадан баш тарткан булган. Икенчесе вакцина ясату яшенә җитмәгән әле. Кызамык (корь) чиренә каршы вакцинаны бер яшьлек балаларга ясыйлар һәм алты яшьтә яңадан кабатлыйлар. Соңгы елларда әти-әниләр әлеге вакцинадан баш тарта башлаган. “Биш ел элек кенә Россиядә кызамык белән авыручылар бөтенләй юк иде, – ди Наталья Ивойлова. – Хәзер алай дип өздереп әйтә алмыйбыз, чөнки чиргә каршы вакцина ясатмаучылар, мигрантлар һәм чит илләргә йөрүчеләр саны арта. Прививкасы булмаган кешегә ул бик тиз йога. Әлеге чирдән бары тик вакцина гына саклый ала”.

Кызамык та ОРВИ бил­геләре шикелле башланып китә, берничә көннән күз кызара һәм ут яктысында сызлый, битне, тәннең башка урыннарын кызыл тимгелләр баса. 1990 нчы елларда кызамык белән авыручылар кисәк артып киткән иде. Белгеч әйтүенчә, аның өзлегүләре куркыныч: йөрәк-кан тамырлары һәм бөер авырулары китереп чыгара. Балаларның әлеге чирләрне каян һәм кемнән ияртүе билгеле түгел. Шөкер, гомерләренә куркыныч янамый, алар табиблар күзәтүе астында тиешле дәва ала. Ә кызамыкка каршы прививка ясатмаган сабыйларны бу көннәрдә вакытлыча бакчага алмаска мөмкиннәр.

Фәния Арсланова, Ватаным Татарстан

Фото: https://pixabay.com

Запись Татарстанда куркыныч авыру: “Бары тик бер нәрсә генә саклый ала” впервые появилась Tatar Today - татар яңалыклары..

Кечкенә Артемга коклюш-дифтерия-столбнякка каршы прививканы нәкъ тиешле вакытында – 3 ай тулгач керткәннәр. Андый вакытта бала ике-өч көн тәне кызышып, температурасы күтәрелеп ала, аннары организм авыруга каршы торырга өйрәнә. Артем белән дә шулай булыр, дип уйлыйлар. Тик сабыйның температурасы тугыз көн буе югары килеш тора, аннары хәле тагын да начарая башлый.

“Ярты елдан Артем, сәламәт балалар шикелле авазлар чыгарып, сөйләшергә маташуыннан туктады. Тагын ярты елдан бары мөгерәгән тавышлар чыгара иде. Аннары әти-әнисе белән аралашмый башлады”, – дип сөйли Артемның әтисе Николай. Баласының көннән-көн начараюын күреп, әти кеше бар булган мәгълүмәтне укый, тикшерә, һәм шундый нәтиҗәгә килә: вакцина керткәннән соң Артемның баш мие нейроннарының җимерелү процессы башланган. “Бу процесс бик акрын бара – ел ярымнан алып ике елга кадәр дәвам итә”, – ди Николай.

Нәтиҗәдә табиблар балага аутик спектрның какшавы дигән диагноз куя. Авыруның шушы кәһәр суккан прививка аркасында килеп чыгуына Артемның әти-әнисенең иманы камил.

“Иммун системасы ныклы бер балага прививка ясадылар ди. Ул өч-дүрт көн температуралап, чирләп алыр да, иммунитеты барлыкка килер, антитәнчекләр эшләп чыгарылыр. Ә башка бала, иммун системасы зәгыйфьрәк булганга, вирус белән көрәшә алмый, һәм бик авыр хәлдә калачак. Ә балага вакцина кертергә ярыймы-юкмы икәнен аңлар өчен, аны башта тикшерергә кирәк. Аннары инде уйларга – прививка салыргамы бу сабыйга, әллә юкмы”, – ди Артемның әтисе.

АКДС һәм БЦЖ – бу вакциналар эчендә ниләр бар?

АКДС вакцинасы тирәсендә шау-шу, гауга чыгып кына тора. Безнең илдә кулланыла торган вакциналар арасында иң каршылыклы препарат шулдыр. АКДС “адсорбированная коклюшно-дифтерийно-столбнячная” дигәнне аңлата. Бер вакцинада берьюлы өч куркыныч авыруның вируслары бала тәненә кертелә. Ә инде БЦЖ – организмда туберкулезга каршы тору сәләте булдыра торган вакцина.

Бу вакциналарның икесе дә, табиблар билгеләп узганча, безнең илдә ярты гасырдан да артык вакыт дәвамында кулланыла.

Вакцина ике өлештән тора: антиген (вирус яки бактериянең бер өлеше, ул организмга антитәнчекләр эшләп чыгарырга стимул бирә), һәм консервантлар – болары вакцина бозылмасын һәм озак саклансын өчен кирәк.

«Вакцинада консервантлар күләме шулкадәр аз. Мәсәлән, бала көндәлек ашый торган сникерс кәнфитендәге консервантлар саны белән чагыштырырлык та түгел, анда бит Е дигәненең генә дә әллә нинди төрләре бар. Беркем дә бу турыда уйлап карамый”, – ди эпидимология табибы, Татарстан сәламәтлек саклау министрлыгының иммунопрофилактика буенча баш белгече, Республика иммунопрофилактика үзәге җитәкчесе Дмитрий Лопушов.

Ләкин ата-аналарны вакцина составындагы аерым бер матдә – тиомерсал дигән кушылма борчуга сала. Чөнки бу кушылма эчендә терекөмеш бар. Тиомерсал ялкынсынуларга каршы һәм гөмбәләр үрчемәсен өчен кулланыла.

«Бу матдә вакцинага бактерияләр белән пычрану булмасын өчен өстәлә. Бу кушылма организмда ике өлешкә таркала, алар икесе дә, тоткарланмыйча, организмнан чыгарыла, шуңа күрә вакцина керткәннән соң тәндә терекөмеш җыела дию гомумән нигезсез. Һәм градусниктагы терекөмеш белән вакцинадагы терекөмешне чагыштыру бөтенләй дөрес түгел. Мәсәлән, хлор – ул агу, натрий да саф матдә килеш алганда чиста агу, ә хлор белән натрийның кушылмасы, натрий хлориды – бусы гап-гади тоз, ул организмга кирәк, кеше аннан башка яши алмый”, – дип аңлата медик.

АКДС ≠ АУТИСТЛЫК

Табиблар әйтүенчә, АКДС вакцинасы яки башка вакциналар кертү белән аутистлык арасында исбатланган бәйләнеш юк. Алай гына да түгел, белгечләр фикеренчә, вакцина берничек тә аутизм китереп чыгара алмый.

«Гадәттә аутист бала үзен ике-өч яшьләргә белдерә башлый. Кызганычка каршы, бу вакытка әти-әниләр инде вакцинация зарары турында төрле имеш-мимешләрне күпләп тыңлап өлгергән була, ә чынлыкта исә бу авыру төрле сәбәпләрнең бер-берсенә өстәлеп килүе аркасында туа”, – дип искәртә Дмитрий Лопушов.

Белгеч сүзләренчә, кайсы вакцинаны гына алма, аның билгеле бер очракларда бала организмына килешмәве, зыянлы булу ихтималы бар. Нинди очракларда прививка ясарга ярамый – әти-әниләрне һәрвакыт кисәтәләр.

«Хроник авыруларның көчәеп киткән вакытында, кискен авыру булганда, йомырка сарысына аллергия булганда прививкалар ясалмый. Мисал өчен, БЦЖ ны авырлыгы ике килога җитмәгән балаларга ясамыйлар, бала әзрәк мантып киткәнне көтәләр. АКДС ны баланың нерв системасы зарарланганда ясамыйлар, әмма ул зарарлану прогрессиядә булганда гына. Ягъни даими рәвештә авыруның яңа симптомнары туып тора һәм сабыйның тормыш сыйфаты начарая бара. Калган очракларда вакцина ясалырга тиеш, аны баланың организмы торышын тикшереп, табиб рөхсәт биргәннән соң ясыйлар”, – дип аңлата Дмитрий Лопушов.

Әти-әниләр ни уйлый?

Кечкенә Артемның әтисе озак еллар буе табиблар фикерен, тикшеренүләрне, башка гаиләләрдә килеп туган шундый ук очракларны өйрәнгән дә, шундый фикергә килгән: вакциналар составына иммун системасын гына түгел, баш миенең кәүсә күзәнәкләрен дә җимерүче матдәләр керә.

«Баланы кинәт үлеп китүе синдромы дигән төшенчә бар (синдром детской внезапной смертности – ДВС – ред.). Табиблар баланың нидән үлүен аңлата алмаганда, шушы ДВС ка сылтыйлар. Ә мин мәсәлән шундый өч очрак таптым: балалар бер үк вакцинадан соң бер үк симптомнар белән прививка ясаганның өченче көнендә үлеп китә. Һәм беркем дә бу балаларны вакцинадан үлде дими, ә ДВС дип кенә әйтәләр”, – ди Николай.

Артемның әтисе фикеренчә, прививка ясату – үз балаңа үзең үк үлем хөкеме чыгару белән бер.

«Мин привикалар ясатырга кирәкми дип саныйм. Ләкин башка юл да бар – балаларны өч яшеннән соң вакцинацияләү. Бу вакытка баланың иммун системасы инде ныграк формалашкан була. Табиблар баланың кайбер ризыкларга аллергиясы бар икәнен белә. Баланың иммунитеты ни дәрәҗәдә көчле икәнен табиблар белеп тора”, – дип нәтиҗә ясый Николай.

Җиде яшьлек кыз бала тәрбияләүче Василиса прививкалар булмаса кешелекнең яртысы эпидемияләрдән һәм үлемнәрдән кырылып беткән булыр иде, дип саный.

«Баштан ук безнең гаиләдә беребезнең дә аллергияләре булмады. Кызыбызның да бернинди аллергик реакцияләре дә күзәтелмәде. Бала яхшы үсеш алды, барысы да норма кысаларында иде. Мин прививкалар турында мөмкин булган бөтен нәрсәне дә укып чыктым. Прививка ясатып, балалары авырган гаиләләр турында да укыдым, ләкин шул ук вакытта вакцинацияләү кешеләрне ничек коткарганы турында да белештем. Кайбер очраклар аеруча тетрәндерде. Мәсәлән, бер елны Таҗикстан хөкүмәте полиомиелиттан вакцина сатып алмаган, һәм киләсе елда авыручылар саны кискен арткан. Өйрәндем бу мәсьәләне, һәм ахырда, прививка ясатырга кирәк, дигән карарга килдем. Син бит, дөресен әйткәндә, ике куркынычның берсен сайлыйсың – прививкадан зыян күрү куркынычы да бар, йогышлы авыруларга тару куркынычы да. Прививка ясатып, без бит балаларыбызны коточкыч авырулардан коткарабыз”, – дип аңлата үз карарын яшь ханым.

Үзенең кызына Василиса туганнан алып бөтен привикаларны да ясатып килә. Бары АКДС урынына гына ул бу вакцинаның чит илдә чыгарыла торганын – «Пентаксим» ясаткан. Василиса әйтүенчә, ул вакытта аңа чит ил вакцинасы Россиядә чыкканыннан куркынычсызрак булып тоелган.

«Прививкалар турыда җитәрлек белмәгән килеш, аларны бетереп хурларга да, бик каты якларга да кирәкми. Һәр әйбернең үз аңлатмасы була, уйларга, фикер йөртергә кирәк, өйрәнергә бу мәсьәләне. Әлбәттә инде, баланың сәламәтлеген һәрвакыт күзәтеп торырга”, – дип өсти Василиса.

Привикаларны ясауның кирәклеге

Табиблар үзләре үк таныганча, бер генә вакцина да кешене вирус яки йогышлы авырудан 100 процент яклый алмый. Ләкин прививка ясалган бала авыруны күпкә җиңелрәк кичерәчәк һәм өзлегүләр (осложнениелар) булмаячак.

«Әлбәттә, күп кенә вакциналар буенча әти-әниләрнең баш тартуы теркәлә. Ләкин менә карагыз: хәзер прививкалар календарендә балага ике ай вакытында ясала торган пневмококк инфекциясенә каршы прививка бар. Әти-әниләр аннан баш тарта, гәрчә үпкә ялкынсынуы белән авырулар саны бик югары. Андый ата-аналарны аңлавы авыр, бу прививкадан баш тарту бит алар үзләре үк балаларының пневмония белән авырып китүенә риза дигән сүз. Авырса, төрле өзлегүләр дә алырга мөмкин, антибиотиклар белән дәваларга туры киләчәк, ә баласының интегүен күреп әти-әниләрнең өзгәләнүен әйтмим дә инде”, – дип искәртә ТР Сәламәтлек саклау министрлыгының иммунопрофилактика буенча баш белгече.

Бүген балаларны һәм олыларны вакцина ярдәмендә саклап кала торган күп инфекцияләр юкка чыкмаган, алар һәрвакыт әйләнә-тирә мохитта бар, бер китеп, бер кире кайтып тора.

«Прививкалар кеше организмы өчен бер төркем йогышлы чирләрдән ныклы калкан булып тора. Бу авыруларның кайберләре үлемгә китерә, мәсәлән, полиомиелит. Әлбәттә, көне-төне антибиотиклар эчеп яшәсәң дә була, тик организм шундый җәберләүгә түзәр микән? Ә болай – бер-ике тапкыр прививка салдырасың да, дифтерия, столбняк, корь кебек куркыныч чирләр барлыгын онытасың”, – дип нәтиҗә ясый Дмитрий Лопушов.

Фото: pixabay.com

Запись АКДСтан соң, аутизмнан авырган Артемның әтисе: “Прививка ясату – үз балаңа үлем хөкеме чыгару ул” впервые появилась Tatar Today - татар яңалыклары..