Хәзер бу тема кабат баш калкытты. Асафның “чынлап” өйләнүе турында халык арасында имеш-мимешләр йөри башлады. Хәер, Казанда узган бер концерттан соң җырчы бу хакта үзе дә әйтте. Эш шунда – “Рәвешләр” юмор театры Асафның буйдаклыгы темасына төрттереп, пародияләр күрсәтә. Концерт тәмамлангач, Асаф әфәнде сәхнә артына артистлар янына сугылды. “Сез минем өйләнү, өйләнмәвемне һәм шәхси тормышым турында бөтенләй сөйләргә тиеш түгел. Сез минем өйләнүемне белмисез, мин – өйләнгән кеше! Берегезнең дә ишек төбемдә басып торганы юк”, – диде концерттан соң Асаф Вәлиев. Шул рәвешчә ул “Рәвешләр”нең җырчыга күрсәткән пародиясеннән канәгать булмавын белдерде.

“Асаф Вәлиев өйләнгән” дигән сүз дөресме?” дигән сорауны артистның үзенә юлладык. Ул, үз чиратында, өйләнүен инкарь итмәде. “Папараццига кирәк әллә? Өйләнгәнче, үбешеп калып булмады…” – диде шаян телле Асаф Вәлиев.

Бервакыт алып баручы Гөлназ Сәфәрова концерт вакытында Асаф әфәндене һаман өйләнә алмаучы буйдак егет дип тәкъдим иткән. Артист Гөлназга да “кисәтү” ясаган булса кирәк. “Сәфәрова концертта мине өйләнгән дип әйткән”, дип сөйлиләр”, – диде Асаф Вәлиев.

Хәзер Асаф Вәлиев турында “өйләнмәгән”, буйдак егет” дигән сүзләр ишетелмәс, пародияләрдә дә яңгырамас. Асаф әфәндене өйләнүе белән тәбриклибез, гаилә бәхете телибез!

Асаф Вәлиевнең өйләнгән кеше булуына ышанмаган кешеләргә моны аның үз авызыннан ишетергә чакырабыз. “Рәвешләр” театрының ютуб каналындагы видеороликта бу мизгел 36 минут 30 секундта.

Һәм инде хәтерегездә Асаф Вәлиевнең иң популяр хитын – “Эх, сез матур кызлар!” җырын искә төшерик.

Сәхнәдә ут сүнгәч, артистларның үз тавышын ишеттек – татар тамашачысы

 “Филармония залында бераз форс-мажор булды. Концерт азагына таба – Вил Усманов җырлаганда ут сүнде. Без башта шулай уйланылган дип белдек, аннары аппаратура белән проблема булганын аңладык. Мондый хәлнең бер яхшы ягы бар – эстрада артистларының тере тавыш белән баянга җырлаганын ишеттек”, – ди тамашачы Ләйсән Сибгатуллина.

Үзе дә мәдәният хезмәткәре булган, татар концертларына бик яратып йөргән Гөлфия Сафина Татарстанның көзгесе булган филармония концертлар залында XXI гасырда шулай янып чыгарлык иске аппаратура булуына аптырый. “Болай булырга тиеш түгел, хөкүмәт ярдәме белән яхшырак аппаратура куелсын иде”, – ди. Ул артистларның югалып калмавын, Вил Усмановның да, Динә һәм Рафаэль Латыйповларның да гармун белән матур гына җырлап чыгуын әйтә.  
Динә һәм Рафаэль Латыйповларны телетапшыруга төшерә алмый калдык – “Мәйдан” каналы җитәкчелеге

“Мәйдан” каналы директоры Дамир Дәүләтшин тамаша барганда аппаратура белән проблема килеп чыгуын раслап, филармониянең концертлар залында “Казан кичләре” проектының сезон ябылу концерты булуын әйтте. “Онлайн-трансляция булса, бөтенләй уңайсыз хәлдә каласы идек, бу проектта без концертны яздырып алып, бүлеп дүрт тапшыру эшлибез. Өч тапшырулык материал төшерелде, бу проблема аркасында дүртенчесен эшләп өлгерә алмадык”, – диде ул. Шулай итеп, концертның “кадагы” булырга тиешле Динә һәм Рафаэль Латыйповлар, махсус шушы тапшыру өчен әзерләнеп килсәләр дә, телевиениегә яздырыла алмый калганнар.
Ярый әле янгын чыкмады – Филармония җитәкчелеге

“Әйе, кичә ЧП булды шул – сәхнә концерт вакытында утсыз, тавышсыз калды, – дип килеп чыккан хәлгә ачыклык кертте Г.Тукай исемендәге Татар дәүләт филармониясе директоры Кадим Нуруллин. – Биш ел элек сатып алынган Кытай аппаратурасы белән эшлибез. Ул чакта яхшырагына акча җитмәде. Ул аппаратура бер-ике сезоннан артыкка чыдамый инде, без биш сезон эшләттек. Ярый әле, янгын чыкмады”.

Бу филармониядә беренче тапкыр булган хәл түгел. Быел март аенда аппаратура янып, Данир Сабиров концертын күчерергә дә туры килгән булган.

Филармониянең концертлар залын яхшы сыйфатлы яңа аппаратура белән тәэмин итү өчен 1 млн доллар акча кирәк, ди. Филармония җитәкчелеге бу проблеманы хәл итү өчен Татарстан хөкүмәтенә мөрәҗәгать итәргә җыена.