Мин аны бу юлдан елып калырга бик күп тырышлыгымны куйдым, әмма барысы да юкка булып чыкты. Тугыз ел инде кызым белән икәү генә яшибез. Аңарга хәзер унбер яшь. Мин әти кеше булсам да, кызыма әти дә, әни дә булдым һәм алга таба да бу вазыйфамнан кире чигенмәячәкмен.

Мин бар эшкә дә җаваплы караучан, кыенлыклардан курыкмыйм, барлык мәсьәләләрне дә сабырлык белән чишеп барам, Аллага шөкер! Эшем бар, аны һәрвакыт тәэмин итергә әзер. Бу тормыш миңа җиңел бирелмәде, барысын да әйтеп бетереп булмый. Никадәр сынаулар узсам да, Аллаһы Тәгаләгә булган инануым үсә генә бара. Хатын-кызларыбыз үзләренең төп бурычларын онытып, юлдан язып йөрмәсеннәр иде. Тормышның тоткасы хатын-кызларда дип әйтсәләр дә, кайчакта бөтенләй киресенчә килеп чыга.

Рифат

Запись “Дингә килеп, намаз укый башлармын дигән хатыным кире юлдан китте… Эчә башлады” впервые появилась Tatar Today - татар яңалыклары..

Беркөн маллар су кырыена туплангач, өйгә кайтып килергә уйладым. Берәр сәгать үткәндер. Төшсәм, бер мал да юк. Велосипедыма атланып, таллыкка мендем. Маллар юк. Аста зирек агачлары янындагы аланлыкта 3-4 сыер күреп алдым. Барсам, алты сыер, калганнары юк. Сыерларны болынга куып чыгардым да үзем кире аланлыктан эчкә кереп киттем. Керерлекме соң, биек кара әрем, кычыткан, печән чабучы булмагач, басуларны мал ашамый торган үлән баса. 50 метр кердем. Бер мал да тапмыйча чыктым шушы алты сыерым янына. Еларга җитеп басып торам каян карарга инде дип.

Шушы алты сыер арасыннан берсе аерылды да урман кырыена карап басып мөгрәп җибәрде. Эндәшүче юк. Өч тапкыр кычкырды да эндәшүче, чыгучы булмагач, урман эченә үзе кереп китте. Мин йөргән сукмактан түгел, ә аланлыкның икенче агачлар кырыннан. Баксаң, аларның үз сукмаклары бар. Сыерның үзенең ияртеп йөри торган бозавы (тана инде ул) юк икән бит. Сыер алдан, мин артыннан укый-укый барам. Бер километр кергәнбездер – аланлык. Калган бар сыер, сарыклар шунда. Көтүемне куып алып чыккач, Аллаһы Тәгаләгә рәхмәт әйтеп, бер утырып еладым.

Икенче юлы көндезге намаз вакыты иде. Сөннәтен укыганда, сыерларым басуга таба китә башладылар. Сөннәтен укып бетергәч, сыерларны алып килдем. Намазымны укып бетерә язганда, сарыкларым китә башлады. Китсәгез китәрсез, барыбер укып бетерәм, дим. Намазымны укып төгәлләгәндә, сарыклар шактый ерак киткәннәр иде инде. Каяндыр килеп, миннән 300 метр чамасы еракта балыкчылар балык тотып утыра. Күз ачып йомган арада өермә килеп чыкты да, балык тотып утыручы хатынның пакетын күтәреп алып, сарыклар өстендә бөтерә башлады. Киткән сарыкларым куркышып сыерлар янына килеп кушылды. Йа Раббым, могҗизаларың чиксез, бәндәләреңне рәхмәтеңнән ташлама дип, дога кылдым.

Нәгыймә САДЫЙКОВА.

Тукай районы, Иске Теләнче авылы.

Запись “Алты сыер арасыннан берсе аерылды да, урман кырыена карап мөгрәп җибәрде…” [сәер хәл] впервые появилась Tatar Today - татар яңалыклары..

18 көн – ярыйсы вакыт: ял итәргә килүчеләрнең һәрберсенең исемен, каян килүен, хәтта нинди чир белән чирләвенә кадәр белеп бетердек. Китап укып кына ятып булмый, коридорга да чыгып утырасың. Анда, берничә генә канал булса да, телевизор күрсәтә. Янга ир-атлар килеп утыра. Шаярткалап, сүз башлыйлар. Ярар, шаяртсыннар да ди.

Ис киткән нәрсә – аларның өс-башы булды. Кешене киеменә карап каршылыйлар, акылына карап озаталар, дигән әйтем бар бит. Тир исе килеп торган кытай футболкасын атна буе салмаган, трикосының тезе олы туп кебек чыгып торган ир-ат күпме генә акыллы сүз сөйләсә дә, аны бик тыңлыйсы килми инде. Бер тыңлыйсың, бетте. Аннан: “Хатын-кыз янына килеп сүз башлаганчы, өстеңне кара инде әзрәк”,– дип әйтәсе килә башлый.

Бу ирләрнең өйдә бер дә кадерләре юк микәнн, нишләп хатыннары карамый жибәргән, дип уйлыйсың. Иртән ашарга төшкәндә дә, дәвалану кабинетларында, физкультура уйнаганда, кичен дә – өстә шул бер кием.

Ял итү урыны булгач, поселоктан, шәһәрдән артистлар концертлар да куеп киттеләр. Безнең “джентельменнар” анда да караватларында аунаган футболка, триколарыннан кереп утырдылар. Өйләрендәге кухняга чәй эчәргә чыкканнармын! Кыскасы, хатыннар, ирләрегезне ял итәргә җибәрсәгез, әзрәк киендерегез! “Акыллы башларыгыз” кеше арасында бер бичара булып йөрмәсеннәр. 

Ләйсәнә.

Запись “Хатын-кыз янына килеп сүз башлаганчы, өстеңне кара инде әзрәк…” [мөнәсәбәтләр] впервые появилась Tatar Today - татар яңалыклары..

Атнасына ике яки өч көннең кичендә урам әйләнеп керәләр, болай көн дәвамында берничәшәр кат шалтыратышып торалар. Улым бездән берни дә яшерми. Көне ничек узганын, кемнәр белән аралашканын һәрдаим сөйләп тора. Мин аны кечкенәдән үзем шулай өйрәттем. Башкаларның аналары балаларына: “Өйгә кеше ташыма! Эштә дә гарык мин. Өйдә иркенләп ял итәсе килә!” – дип әйтсә, мин, киресенчә, улымның өйгә дус-ишләрен алып кереп, күпмедер вакыт утыруларына беркайчан да каршы түгел идем.

Мәктәптә укыганда да, хәзер дә шулай. Ничек кенә арыган булсам да, елмаеп каршы алам, булганын ашатам, алар белән чәй эчәм. Кунакчыллыгымнан да түгел ул. Мин баламның кемнәр белән дуслашып йөргәнен, ни турында сөйләшкәннәрен белергә тиеш. Бөтен сәбәп шул гына. Кемнең кемлеген аңлар өчен кешенең күзенә карап, берничә сүз сөйләшү дә җитә бит.

Адилә белән дуслыклары турында да улым яшермичә сөйләде. “Әйбәт кыз, тәмәке тартмый, сүгенми”, – диде ул беренче тапкыр аның турында сөйләгәндә. Очрашалар икән, очрашсыннар. Тикшерәм дип, мин артыгын сораштырмадым инде улымнан. Тәртипсезләнеп кенә йөри күрмәсеннәр, миңа иң мөһиме әнә шул. Улым белән ул хакта да сөйләшәбез. Кыз баланы рәнҗетә күрмә дип, гел әйтеп торам мин аңа. “Син нәрсә инде, әни. Минем акылым һәрвакыт үзем белән!” – ди.

Менә шушы Адилә туган көн уздырасы итте. Үзебездә түгел, Казанда йөрик, дип тәкъдим иткән. Алар болай да Казанда укып йөри безнең. Шуңа күрә улымны чыгарып җибәрергә курыкмадым. Шәһәрдә матур урыннар күп бит, йөрсеннәр, карасыннар. Уку көннәрендә барыбер иркенләп йөри алмыйлар бит алар. Туган көн – менә дигән сәбәп. Кызның күңелен күрергә дип, улыма 3 мең сум бирдем. Шуннан бүләген дә алырсың, берәр кафега кереп ашап-эчеп алырга да калсын, дидем.

Төш вакыты үткәч чыгып киткәннәр иде, кичке уннарда гына, кызны өенә кадәр озатып куйгач кайтып керде улыбыз. Кәефе әйбәт иде. Кайда йөргәннәрен сөйләде, фотоларын күрсәтте. Ярый, берничә көннән соң сизәм: нидер булган улыма. Теге кыз белән дә шалтыратышмый, кәефе дә юк сыман. Ике көнләп күзәткәннән соң түзмәдем, ни булды дип сорыйм моннан. Баксаң, Адилә үзенең дус кызлары арасында сүз тараткан: “Ярый инде, гел булмаганда йөреп торсаң була”, – дигән минем улым хакында. Сүз тиз йөри бит инде, хуҗасына да барып җиткән.

Нәрсә ошамаган Адиләгә, һич аңламыйм. 19 гына яшендә егетең 3 меңлек бүләк ясый алган икән, әйбәт бит инде. Әллә ул үзен алтынга күмгәнен көтте микән? Улым бүләккә зур ак аю алган, чәчәк бәйләме, аның яраткан конфетларын алган. Калган акчасына кафега кереп утырганнар, Казанга бару-кайтуларны да улым түләгән. Үз баламны яклап әйтүем дә түгел, әмма туган көн өчен менә дигән бүләк бит инде!

Ирем шундый бүләк ясаса, мин чын күңелдән рәхмәтле булыр идем. Бүләгеннән бигрәк, кеше сиңа тулы бер көнен дә багышлаган бит әле. Анысы әллә бүләк түгелме? Безнең хәтерне калдырган нәрсә: ул да булса Адиләнең шулай дип сүз йөртүе булды. Егет ошамаса, матур гына әйт инде син, кешечә аңлат. Ник шулай башка кызлар аркылы сөйләшеп йөрергә? “Гел булмаганда ярый инде”, – дип мыскылларга. 19 яшь – зур бит инде ул, сөйләшкән сүзләрең, кылган гамәлләрең өчен җавап бирерлек вакыт. Шушы сүзләре өчен улым белән минем дә йөрәгем янды.

Бик күп хатыннар ирләренең начарлыгы турында сөйләргә ярата, тәртипсезлектә гаепли. Эшләми, аралаша белми диләр. Әйтмим, андыйлар да күптер. Ләкин, кеше гадәттә юктан гына зарланып, тавышланышып яши торгандыр. Бүгенге кызлар – булачак хатыннар бит инде алар. Яшьтән нинди тәрбия бирелгән, зур тормышта шул чагылачак. Безнең кызларыбыз юк, икесе дә малай.

Күпчелек гаиләләрдә кызларны патшабикәгә тиңләп тәрбиялиләр төсле тоела. Белмим, миңа гына шулай тоеламы соң ул? Күпчелеге үзләрен әллә кемгә куя бит алар! Алар өчен иң зур дәрәҗә – яңа кием киеп, авызларын бүлтәйтеп селфи төшү. Яисә буялган тырнакларын фотога төшереп социаль челтәрдәге битенә урнаштыру. Рәттән бөтенесе шулайдыр дип гаепләргә җыенмыйм. Арада төрлесе бардыр инде. Әмма менә шушындый кызлардан җүнле хатыннар чыгуына шикләнәм мин. Ата-ананың бурычы матур киендереп, тәмле ашату яисә үзен-үзе фотога төшереп йөрсен өчен кредитка кыйммәтле телефон алып бирү генә түгел бит әле ул. Булачак хатыннарны яисә ирләрне кечкенәдән тәрбияләргә кирәк.
Зәмирә , Лаеш.

Запись “Ярый инде, гел булмаганда йөреп торсаң була”, дигән ул минем улыма…” впервые появилась Tatar Today - татар яңалыклары..

Алар яратмый торган фразалар

• “Әйдә сөйләшәбез”, “Берәрни сөйлә әле”, — Ирләр- төгәл максат белән яшәүче конкрет кешеләр. Нәфис затларның “һавада очуы” аларны чыгырыннан чыгарырга мөмкин. Көчле затның сезнең белән сөйләшүен телисезме? Аңа кызык булган теманы тәкъдим итегез.

• “Ни турыда уйлыйсың?” — Бәлки, сез аның: “Әлбәттә, синең хакта, кадерлем,”— диюен котәсездер. Һич юк! Алай сорамагыз! Чөнки болай сорау- аның уйларын да контрольдә тотарга җыенганны аңлата, һәм мондый соравыгыз күп ирләргә ошамаячак! Ирләр хатын- кызларга караганда, сөйгәне турында азрак уйлый. Ә менә “акылсыз” соравыгызга: “Мин “Спартак” командасының яхшырак уйнавын көткән идем,”- дигән ихлас җавабы сезгә бер дә ошамаска мөмкин.

• “Син миндә үзгәреш сизмисеңме?” – Ирләр чынлап та хатын- кыздагы вак-төяк үзгәрешләргә игътибар итми, чөнки алар гүзәл затны тулы бер образ аша кабул итә һәм ярата.

• “Кибеткә барыйк әле! Әйдә, һавага! Минем иптәш кыз килә, аның алдында төксе йөрмә!” — Ирләр команда биреп сөйләшкәнне җене сөйми. Шушы ук фикерләрне матур итеп: “Минем синең белән кибетләргә барасым килә! Бүген дус кызым киләчәк, ә мин аңа сине “ачык йөзле, киң күңелле,”- дип мактадым,”— дип әйтеп карагыз әле, нәтиҗәсе үзен сиздерми калмас.

• “Син хәзерге минутта кая йөрисең?Кайчан кайтып җитәсең?” — ирләр мондый сорауларны ирекләрен кысу дип кабул итәчәк. “Кадерлем, эштә бик арытмадымы? Әгәр кичке ашны сәгать сигезгә әзерләп куйсам, син кайтуга суынмасмы икән?”— дип сорап карагыз әле.

• “Гүзәл бәхетле- аңа ире шәп машина алган. Ә менә Алсуның ире шундый оста бии! ”— Үз файдасына булмаган теләсә нинди чагыштыруга ирләрнең хәтере кала. Өстәвенә сезнең хакта: “Ул мине хөрмәт итми, бәяләми, яратмый,”- дип уйлый башларга мөмкин.

• “Ир була бел инде: шкафны күчер, акча тап!”— бу — аны бик зур түбәнсетү! Димәк сез аның баһадирлыгыннан шикләнәсез.

• “Син мине яратасыңмы?”— ул үзен сорау алудагы кебек хис итәчәк. Ирләрнең күпчелеге өчен хис, ярату сүз белән түгел, эш- гамәл белән “үлчәнә”. Әгәр ул сезнең янда, янәшәдә икән, димәк хисләрен исбатлатып, тагын сорау- урынсыз.

Ирләрнең йөрәген әсирлеккә ала торган тылсымлы фразалар

• “Син чын баһадир! Батырым минем!”— бу сүзләр ирләрне канатландыра. Бөтен көчле затлар да үзен баһадир итеп санауларын тели.

• “Синең янәшәңдә мин бик бәхетле!”— Бу ирләрнең мин- минлегенә бәлзәм кебек!

• “Ничек барысын да оста башкарып чыктың?”— Аның сәләтенә, булдыклылыгына соклануыгыз сөйгәнегезне сезгә тагын да якынайтачак.

• “Синең янәшәңдә миңа шулкадәр рәхәт! Үземне таш дивар артындагы кебек тоям,” – Ирегезгә үзен яклаучы итеп тоярга бер шанс бу!

• “Бары син генә миңа ярдәм итә алачаксың. Моңа кадәр ничек синсез яшәгәнмен? Син мине күп нәрсәләргә өйрәттең”— Сез аның уңай сыйфатларын санап, сөендерәчәксез. Ирләр мондый сүзләрне үлеп ярата.

• “Син шундый тәмле ипи алгансың!”— Кибеттән гади генә ипи алу, мөһим түгел, әмма аларга булдыклы туендыручы роле бик ошый.

• “Мин сине шундый сагындым! Син шулкадәр кайгыртучан!”— Ирләр янәшәсендә үзенең хисләрен тойган, бәяләгән хатын кызны тагын да ныграк ярата.

• “Ә син хаклы!”— Нинди очрак булу мөһим түгел, ир кеше белән килешегез. Һәм ул да сезнең фикерне ишетми калмас.

“Ярата? Яратмый?” – бу сорауны ромашкага бирегез.

Темага бер мәзәк:

Күз яшьләренә коенып елаучы хатын иренә:

— Син битараф, хәтта минем ни өчен елавым белән кызыксынмыйсың. Әйтимме ник елыйм?
— Юк! Барыбер минем ул кадәр акчам юк!

Запись “Син битараф, хәтта минем ни өчен елавым белән кызыксынмыйсың…” [мәхәббәт асылы] впервые появилась Tatar Today - татар яңалыклары..

Кызымның үзенең өе бар, улы белән бездән аерым яшиләр. Ул йортны ирем белән икәү салып бирдек, зур акчаларбыз шунда тотылды. Барысы да кызыбыз өчен, аның тыныч, имин тормышы өчен эшләгән идек. Ире белән шул йортта яши башлаганнар иде дә. Бик уңайлы, тормыш өчен менә дигән йорт гаиләләрен саклап кала алмады шул. Ире алимент та түләми хәзер. Килеп тә йөрми, бөтенләй чит шәһәрдә урнашты. Баланы үзенең янына бер-ике тапкыр алып киткәне бар.

Баласы белән булса да элемтәне югалтасы килмәгәч, гел беткән кеше түгел инде димәк.
Ләкин минем йөрәк әрни – шул зур өйдә кызым ялгызы гына гомер кичерә. Аның бәхет оясы булсын дип салган идек бит, ялгызлык оясына әверелде кебек. Өстәге кайбер бүлмәләре эшләнеп тә бетмәгән әле аның, мунчаларын да рәткә китереп бетерәсе бар. Тормышы җитеш инде, тик янында бер иптәше генә юк. Мин аны таныштырып та карар идем, ләкин ул үзе ризалашмый шул.

Ана кеше буларак, мин бик борчылам, кызыма ярдәм итәсем килә. Ләкин үзе теләмәмгәч, мәҗбүр итеп янына ир кертеп булмый бит инде. Йорты яхшы, аннан китәсе дә килми, ничек шундый яхшы йортны ташлап китәсең? Йортка чит ир кертергә ашкынып та тормый, хатын-кызга йортка кергән ир альфонс була бит ул ди. Авылга кайтырга риза түгел ул. Нишләргә дә белгән юк хәзер.

Өй салып бирүен бирдек тә, тик анда балабыз ялгыз яшәгәч, ул йортның ник кирәге булды соң? Йортсыз-җирсез булса, хатын-кыз өчен хәерлерәк кебек килеп чыга түгелме соң? Үзебез үлгәнче, кызыбызны җүнле кешегә тапшырып калдырасы килә дә, тик моңа шушы зур йорт киртә булып торган кебек хәзер.
Миңниса.

Запись “Бәхет оясы салган идек, ә хәзер ялгызлыкта кызым белән оныгым тилмерә” впервые появилась Tatar Today - татар яңалыклары..

View this post on Instagram

A post shared by Ильсия Бадретдинова (@ilsiiabadretdinova)

“Нишләптер авылда яшәгәндә бөтен нәрсәгә өлгерә идем мин! Иртән мәктәпкә киткәнче, идәннәрне юып китә идек. Савыт-сабаны ике зур савытка су җыеп, сода белән юа идек. Ә суны кышын да, җәен дә чишмәдән алып кайта идек. Мунчага суны чиләк белән ташып кара әле хәзер. Идәннәр буялмаган иде… Зәйнәп әби әз генә уксус кушкан су һәм мунчала белән ышкып-ышкып юдыра иде. Ә керләр? Мунча алдында юасың да, чишмәгә чайкарга алып китәсең. Суыкларда кер ката, чайкап булмый. Гәлүш эченә су тула. Йон оекбаш белән бергә ката. 20 сутый бәрәңге бакчасы, 10 сутый яшелчә бакчасы. Утырттык та, утадык та, суын да сиптек. Баз тутырып банкалар да яптык. Сыер, ике-өч үгез, сарыкның санын белгән кеше дә юк, тавыкныкын да… Аның өстенә үрдәк, каз. Печәнне дә чалгы белән чабып, сәнәк белән төяп кайта идек. Ярар сөйләгән сүз инде. Өлкәнрәк кешеләр мине аңларлар. 

Ә хәзер? Фатирда яшим! Салкын-кайнар су агып тора, юынгыч астындагы чиләк тулмый. Керләрне машина юып, корытып чыгара. Ашарга мультиварка пешерә. Идәннәрне ышкып торасы юк. Бакча юк, сыер юк… Ләкин бер әйбергә дә өлгереп булмый. Миндә генә шулаймы соң ул?”, дип тамашачыларына мөрәҗәгать итеп язган ул. 

Запись Илсөя Бәдретдинова: “Бакча юк, сыер юк, ләкин бер әйбергә өлгереп булмый” [артист тормышы] впервые появилась Tatar Today - татар яңалыклары..

//Безнең авыл гыйбрәте//

Иртән торып барысы да эшкә җыена башладылар. Мин анда фатирда утырып кала алмыйм бит инде. Алар белән торып, тиз-тиз җыенып чыгып китәргә туры килде. Шәһәр халкының иртән ашау гадәте дә юк икән. Үзем алып килгән күкәйне булса да кыздырып ашарга микән дип уйлаганчы, тегеләр берешәр йомры кофе йоттылар да, ишек буена барып бастылар. Янәсе, әйдә кыймшан тизрәк, сине генә көтәбез дигән кебек.

Нинди йомырка кыздыру кайгысы калсын инде, кеше өендә читен дә бит. Шулай итеп, тамагым туймыйча кайттым. Йөз күкәй алып барып, күпме расхутланып әйләнеп кайтып, җүнләп ашатучы да булмады үземне. Хатын белән яшәсәм – бер хәл, ялгыз ир мин, ә ялгызыма гына пешеренеп утырасым килми. Кунакка баргач, тамагым туеп кайтырмын хет дигән идем, анысы да барып чыкмады. Саранланмадым да югыйсә, ә ач кайттым! Кайтып ныгытып аш салып, пешереп ашадым. Хәзер кунакларга да бүтән әлләни чыгып йөрисем килми.

Исемемне язмагыз инде, читен бит.

Запись “Кунакка баргач, тамагым туеп кайтырмын хет дигән идем, ач кайттым!” [кызык-мызык] впервые появилась Tatar Today - татар яңалыклары..

Әни үзе генә яши алмый, 90га җитте. Сәгать саен кан басымын үлчәп, даруын каптырып торырга кирәк. Башка бертуганарыма кунакка баргач та, озак тормый, шундук әйдә кайтып киттек дияргә тотына. Дөрес, үзем генә булсам, авылда ятмаган да булыр идем дә бәлки, ләкин ияләнгән җирдән чыгып та китәсе килми шул.

Казаннан бер хатын белән танышкан идем. Ул хәтта авылга кунака кайтырга, күрешергә ризалашты. Мин әзерләнеп, яхшылап каршыладым үзен. Яшәп калыр дигән әлләни зур өметтә тормадым инде, ләкин шулай да…

Үзем төскә-биткә ямьсез түгел, холкым да начар булмагач, кем белә бит. Авылдан Сабага кадәр туганым белән машинага утырып төшеп, ул хатынны автобустан каршы алдык. Без көткән автобус та килеп җитте, теге хатын төште. Әле авылга да кайтасы бар бит, юлдагы кешенең тамагы кипкәндер дип, берәр кафега кереп, чәй эчеп алырга тәкъдим иттем моңа. Туганым безне икебезне генә калдырып китеп барды, кайтырга чыкканда шалтыратырмын дидем.

Шуннан соң без бу хатын белән якындагы кафега кереп киттек. Утыргач, уенын-чынын кушып: “Очрашу хөрмәтенә берәр кызыл нәрсәме, әллә коньяк алыйммы соң?” – дидем. Ул шундук җанланып китте дә: “О, юк, мин кызылны эчмим, алсаң акны гына ал”, – диде. Үземә дә, аңа да ак аракы салдырып килдем. Хәйран озак утырдык без анда, сүз иярә сүз чыга бит ул.

Аракыны тагын алып килдем, аннары тагын бер, ике арада йөреп кенә тордым. Үземнең аяклар бутала башлады инде, ә бу хатынга берни юк! Җибәрә дә, җибәрә. Авылга кайтып җиткәндә шактый исереп беткән идек инде, анда кич тә җитте. Бездә бер-ике кичне кунды да ул, кайтып китте.

Шактый сөйләштек без аның белән, ул да тормышны күп күргән, иреннән уңамаган. Үзе һаман эшләп йөри, балаларга ярдәм итәм дип каядыр заводта интегә. Бурычларын каплаша, туй үткәргән кредитлары да шактый зур ди әле.

Ул хатын артык юан да иде, шуңа күрә озатканда мин аңа берни дә әйтмәдем, кешенең йөзенә бәреп: “Син миңа ошамадың”, – дип әйтеп булмый бит инде. Ул да миңа бер сүз дә әйтмәде. Авылда яшисе килмәде инде аның. Югыйсә, авылда да хәзер шәһәрдә кебек яшибез: мал асраучылар сирәк, бәрәңге дә утыртмыйлар хәтта. Мин үзем эш булганда төрле шабашкаларга йөрим, әле түбәләр яба идек, бу арада эше дә юк. Тиз генә эшләп кайта торган эшләрдә йөрим, әнине ташлап китеп булмый.

Ихатада тавык ише вак-төяк кош-корттан башка нәрсә тотмыйм. Бакчага дүрт чиләк бәрәңге утыртсаң да, 25 чиләкне алам. Шул җитә безгә, артып та кала әле. Калганы барып үреп-череп кенә бетә аның. Монда безнең юллар асфальт, Тимершык юллары өр-яңа. Районы үзәгеннән 15 минутлык юл инде безнең авылга. Тормышны бергә алып барырдай хатын эзлим. Иренмәгәннәр шалтыратсыннар.

телефон редакция дэ: т. 8-9178557152 (Лилия), 8-9377717608 (Алсу).

Запись “Авылда канәгать булып, бергә тормыш итә торган хатын эзлим” [язмыш] впервые появилась Tatar Today - татар яңалыклары..

Менә шулай – барысын да килештереп, күлмәкләр әзерләнеп беткәч, егет ягы кире уйлады. Янәсе, хәзер вакыты ул түгел әле, инвалид абыйларын дәваларга акча күп кирәк, фәлән-төгән дип акланганнар. Бу сәбәпне эзләп, гаилә утырышында озак уйлашканнардыр инде. Тумыштан инвалид кешене нәкъ менә хәзер, никахка бер атна кала дәваламыйлар бит инде. Гомер буе утырган кеше хәзер генә йөгереп китмәс.

Монысы уйлап чыгарылган сәбәп кенә. Ә чын сәбәбе үзләрен югарырак бәяләү булгандыр инде. Куркак егет үзе килеп тә маташмаган. Кыз шалтыратмасын дип, бөтен телефоннарын блокка куеп бетергән, интернеттагы битен дә “бикләгән”. Чын кабахәт булып чыкты ул егет, менә кем белгән диген бит.

Танышларыбызның бик авыр чорлары булды инде ул. Кыз елады да, елады, әниләре куркып беттеләр. Берәр нәрсә эшли күрмәсен дип, гел саклап кына йөрделәр. Эштә чакта да кыз белән гел шалтыратышып кына тордылар. Бик яратышып йөргәннәр иде югыйсә.

Егет гел аларда ашап-эчеп ятты, тәмам үз кеше булып беткән иде инде. Әти-әнисе икесен парлап Төркияләргә алып бардылар. Рәхмәте шул булгандыр инде. Яраткан булса, алай эшләмәс иде. Мин хәерлегә генә булган дидем. Кызның андый куркак кешегә кияүгә чыкмавы чынлап та хәерлерәк. Егетләр дә әллә нинди китте хәзер. Кая ди ул элеккеге чын, сүзе сүз булган ир-егетләр! Югыйсә, егет сүзе бер булыр дип юкка әйтмәгәннәр бит.

Г., Чаллы шәһәре.

Запись “Никах алдыннан булса да, куркак егеттән вакытында котылдың, кызым!” [булган хәл] впервые появилась Tatar Today - татар яңалыклары..