Архивы фажига - Tatar Today - татар яңалыклары.

«Машина җиргә сеңгән, әтинең, абыстайның карар җире калмаган, «фарш» булганнар»

Чулпан — Tue, 24 Oct 2017 06:00:34 +0000

10нчы октябрь көнне Зәй районында коточкыч һәлакәт булды. 11нче модельле «Лада» автомобиле ике йөк машинасы арасына кысылып, бер йөк машинасының арбасына төягән тимер торбалары астында калды. Фаҗига кичке якта, сәгать бишенче яртылар тирәсендә булган. Социаль челтәрләрдә бу авариянең видеоязмасы да пәйда булды. Аннан күренгәнчә, ВАЗ-2111не, юл бирмәве аркасында, башта чөгендер төягән «КамАЗ» бәрдерә. Аннары йөк машинасы җиңел машинаны этеп барып, каршы як полосага чыга, ә ул яктан «МАЗ» йөк машинасы килгән була. ВАЗ-2111 тагын бер бәрелеш ала. Шулвакыт җиңел машина өстенә зур тимер торбалар коела… //Безнең гәҗит//

Бу куркыныч һәлакәт аркасында, «11»ле машинасының йөртүчесе – 80 яшьлек ир һәм аның пассажиры – 65 яшьлек ханым вафат була. «МАЗ»ның 21 яшьлек шоферы, «КамАЗ»ның 38 яшьлек йөртүчеләре исә реанимациягә эләгә.

«ӘТИ – БИК ХӨРМӘТЛЕ КЕШЕ ИДЕ…»

Мөхәмәдиевлар гаиләсе әле дә булган хәлләргә ышанып бетә алмый. Югыйсә, июль аенда гына Альберт абыйның 80 яшьлек юбилеен уздырганнар, ул үзенең өч улына, өч килене һәм алты оныгына кадерле кеше булып, тагын озак еллар яшәр кебек тоелган. Туган көнендә дә якыннары аңа нәкъ шундый теләкләрен теләгән. Ә өч айдан соң, сау-сәламәт ир-атның кара җир куенына кереп ятасын уйлаучы булмагандыр.

80 яшендә дә сау-сәламәт булган, дип, кабатлап әйтәм. Мәрхүмнең килене Лилия ханым Мөхәмәдиева: «Әтинең әле 32 теше дә исән иде», – дип сөйли.

Июль аенда гына мәрхүмнең 80 яшьлек юбилеен уздырган булганнар

– Әти үзенең сәламәтлеген һәрвакыт сакларга тырышты. Ул 3 яшендә полиомиелит (инфекцияле вирус авыруы, кече яшьтәге балаларга йога һәм нерв системасын какшата, бала параличланырга да мөмкин – А. З.) белән чирләгән булган, шунлыктан аның ике аягы да зәгыйфьләнеп калган. Әтинең беренче төркем инвалидлыгы бар иде. Таяк белән йөрде. Шуңа күрә ул эчү-тарту белән мавыкмады, бик чиста булды, һәр көнне иртән үк торып кырыныр, хушбуйларын сөртер, чиста күлмәкләрен алып кияр иде. 80 яшендә дә егетләр кебек иде, аңа ул яшьне бирерлек тә түгел. Үзен саклагангамы, «бу җирем авырта», «теге җирем кадый», дип зарланганы булмады…

Лилия ханым кайнатасының авылдагы бик хөрмәтле кеше булуы турында сөйли. Олысы да, кечесе дә аннан киңәш сорарга килгән, аның бик зур ярдәме белән Зәйдә мәчет салынган, үзе дә мәчеткә йөргән.

– Әтине бик ярата иде халык. Аны яратмаслык та түгел. Бу гаиләгә килен булып төшүемә егерме ел булды, бер мәртәбә дә «килен» дигән сүз ишетмәдем. «Кызым», – дип кенә йөртте ул мине. Ачык йөзле, шаян иде. Әнигә дә аның белән гомер итүе бик җиңел булгандыр, дип уйлыйм. Аларның яшь аермалары 15 ел. Ике чакрым ераклыктагы авылларда яшәгәннәр, әтигә 35 яшь тулгач, ул 20 яшьлек әнине урлап алып кайткан. Бик матур яшәделәр. Өч малай тәрбияләп, аларны кеше иткәннәр. Беркайчан да ызгышканнарын күргән-ишеткән булмады, бер-берсенә «сандугачым», дип кенә эндәшәләр иде…

Лилия ханым әйтүенчә, беренче төркем инвалидлыгы булуга да карамастан, Альберт абый машина йөртергә бик яраткан. Физик кимчелекләрен исәпкә алып көйләнгән машинасында әллә кайлардан исән-имин урап кайткан булган, югыйсә…

– Бөтен Русияне айкап чыккан иде. Самара шәһәрендә апасы яши, әле бер ай да юк, шунда барып кайтканнар иде. Минем улым армиядә хезмәт итеп кайтты. Аның янына да Саратовка барды. Әтинең юлда йөрергә яратканын белеп, уллары гел машинасының төзеклеген тикшереп кенә тордылар. Ә үзе ул бик сак һәм яхшы йөртә иде. Ләкин менә 10нчы октябрьдә нәрсә булгандыр – беребез дә аңламый. Ни өчен әти йөк машинасына юл бирмәгән, әллә аны күрми калганмы? Әллә соң кинәт кенә йөрәге чәнчеп куйганмы икән? Алай дисәң, әйтәм бит, аның беркайчан да «авырта» дип зарланганы булмады.

Һәлакәт урыныннан фото: җиңел машина авыр тимер торбалар астында калган

«ТОРБА АРАСЫННАН МАШИНАНЫҢ НОМЕРЫ ГЫНА КҮРЕНГӘН»

Лилия ханым әйтүенчә, алар гаиләсе өчен октябрь – югалтулар ае. Бу айда бик күп туганнары вафат булган аларның. Шуларның рухына дога кылыр, мәрхүмнәрне искә алып узар өчен 10нчы октябрь көнне Зәйдә Коръән ашы үткәрергә ниятләгәннәр.

Бик күп туганнары, әбиләр җыелган. Аш тәмамлангач, Альберт абый Иске Зәйдә яшәүче абыстайны – 65 яшьлек ханымны һәм Тынычлык бистәсендә яшәүче тагын бер апаны машинасында өйләренә илтеп кайтырга ниятләгән.

– Әни аңа шулкадәр әйтте: «Барып йөрмә, әйдә таксига акча гына бирәм, өйдә бул», – диде. «Юк, үзем илтәм, савап булыр!» – дип, әти барыбер чыгып китте. Тынычлык бистәсендә яшәүче апаны өендә калдырганнар да, Иске Зәйгә юл тотканнар. Ул апа сөйли хәзер: «Шундый күңелле итеп сөйләшеп барган идек, көлешә-көлешә кайттык юл буе», – ди. Тик аны калдырып бераз баргач та, һәлакәт булган. Әти белән бергә абыстай да үлде, ноябрь аенда зурлап 65 яшен үткәрергә тиеш иде. Әтинең машинасы төпчек улы исеменә рәсмиләштерелгән. Ул үзе Чаллыда яши. Авария булгач та, ЮХИДИ хезмәткәрләре машинаның дәүләт номеры аша төпчек малайга шалтыратканнар. Төпченеп аңлатып тормаганнар, машинагыз бәрелешкән генә дигәннәр. Аннан соң энебез безгә шалтыратты. Тотындык әтигә шалтыратырга. Телефонын алмый гына бит! Иремә әйтәм: «Бар әле карап кайт һәлакәт урынын, әти ник хәбәргә чыкмый икән?» – дим. Без бит аны җиңелчә генә бәрелешкәндер, дип уйлаган идек. Ирем фаҗига урынына баргач, ике йөк машинасын гына күргән, торбалар астында калган булгач, әтинең автомобилен табалмаган. ЮХИДИ хезмәткәрләреннән: «Кайда соң безнең машина?» – дип барып сораган да әле. Аны якынрак алып килеп күрсәткәннәр. Торбалар астыннан автомобильнең дәүләт номеры гына күренеп торган, карарлык әйбер бөтенләй калмаган, машина изелеп җиргә сеңгән, әтинең дә, абыстайның да карар җире калмаган иде, «фарш» булганнар, – дип сөйли Лилия Мөхәмәдиева.

Һәлакәт булганнан соң, мәрхүмнәрнең гәүдәләрен торбалар астыннан кичке тугызларда гына, ягъни дүрт сәгать вакыт узгач кына чыгара алганнар.

– Алдан сизенү дә, әти үләр, дигән куркыныч уй да булмады. Ул гел шулай яшәр, безнең белән булыр, елмаеп каршы алыр, әни белән көлешеп чәй эчәрләр, төсле иде. Аны күмәргә бик күп кеше җыелды, барыбыз да шок хәлендә. Аеруча әни. Ул әле дә булган хәлләргә ышанмый. Авыр вакытында әнигә терәк булырга тырышабыз, без аның янында, – ди мәрхүмнең килене. – Хәзер әтине төштә генә күрергә кала. Узган атнада гына Коръән ашын уздырган идек, менә бу атнада әтинең җидесен үткәрәчәкбез. Октябрь ае быел да безгә зур югалтуы белән килде…

Айгөл ЗАКИРОВА

Запись «Машина җиргә сеңгән, әтинең, абыстайның карар җире калмаган, «фарш» булганнар» впервые появилась Tatar Today - татар яңалыклары..

«Адмирал» фаҗигасында улын югалткан Миңниса апа: «Биш бала арасында бердәнбер малай иде»

Чулпан — Sat, 24 Jun 2017 10:58:53 +0000

Казанда «Адмирал» базары янганнан соң, бу фаҗига корбаннарының берсе – Яшел Үзән районы Урысбага авылы егете Айзат Фәсхетдинов турында язып чыккан идек. Шул якларга командировкага барып, Айзатның әнисе Миңниса апа белән кабат очрашкач, йомшак күңелле бу хатынның көчле рухлы булуына, сабырлыгына тагын бер кат сокландык. //Шәһри Казан//

Биш бала арасында бердәнбер малай булса да, иркә үсми Айзат.
– 27 яшендә гүр иясе булды Айзатым. Нинди эшкә тотынсам да, аның өчен дип эшлим. Бөтен нәрсә аны хәтерләтә. Ишегалдына чыксаң да, өйгә керсәң дә, аның кулы тимәгән нәрсә юк, алтын куллы иде улым, – ди әңгәмәдәшем.

Миңниса апа озак еллар мәктәптә китапханәче булып эшли, технологиядән укыта. Көне укучылар белән мәктәптә уза. Балаларны төрле эшләнмәләр ясарга өйрәтә. «Хәзерге заманда оекбаш бәйләтеп кенә укучыны технологиягә тартып булмый», – дигән иде бер хезмәт укытучысы. Миңниса апа да, балаларны кызыктырыр өчен, ниләр генә уйлап чыгармый. V сыйныфта тамбур җөе белән шәмаил чигүдән башлыйлар. Балалар шулай ук флешка савытлары, энә кадый торган мендәрчекләрне дә яратып чигә икән. Миңниса апа үзе исә шәмаилләрне төрле техникада: хаҗсыман, тамбур җөй, алтын җеп белән чигә. Үз балаларына да кием-салымны, мәктәп формаларын, хәтта пәлтәләргә кадәр тегеп кидертә торган булган.

Күңел тынычлыгын Миңниса апа яраткан эшендә һәм диндә тапкан. Аның бабасы да 95 яшенә кадәр намазын укып, уразасын калдырмый яшәгән. Бабайның Коръәне Кырымда яшәүче кызы Рүзикамал апада бүген дә саклана ди. Баксаң, бу изге китапның тарихы бик тә гыйбрәтле икән. Бабай ул Коръәнне сугыштан алып кайткан булган.

– Бабай Ерак Көнчыгыш, аннары көньяк фронтларында хезмәт иткән. 1944 елны чечен халкын депортацияләү операциясендә катнашкан булган. Берсендә алар чечен авылына киләләр. Бер рус солдаты белән чечен йортына килеп керәләр. Анда ап-ак сакаллы чечен карты Коръән китабы укып утыра икән. Бабай, сөенеп, мөселман кешесе икән дип: «Әссәламегаләйкем», – дип эндәшкән. Ә рус солдатының моңа ачуы чыккан. Ул картның китабын тартып алып, беренче битен ертып, шуның белән тәмәке төргән. Ахырдан чечен карты, җаен табып, китапны бабайның түшенә кыстырып җибәргән. «Ул көнне чәчем яртылаш агарды.

Чечен халкын ничек итеп кыйный-кыйный машинага төяүләре күз алдымнан китми», – дип сөйләгән бабай. Ул китапны кечкенә генә мендәрчек эченә теккән. Коръән китабын саклаганга да, туган ягына исән-имин әйләнеп кайткандыр бабаем. Ничек кенә булмасын, догаларның көче зур, – ди Миңниса апа. – Бала югалтудан да зуррак хәсрәт юктыр бу дөньяда. Улымның күңеле изге иде, Аллаһ кушканнарны үтәп, тыйганнардан тыелып яшәргә тырышты. Авыл зиратларын җыештыру өмәләрен оештырды, ярдәм сорап килгән кешене беркайчан да борып җибәрмәде – матур исемен калдырды, шөкер. Аллаһы Тәгалә изге җаннарны, бу фани дөньяда гөнаһка батмасыннар дип, үз янына иртәрәк ала икән. Балама бүгенге көндә миннән дога гына кирәк. Мин баламнан мең риза, Аллаһы Тәгалә дә аңардан риза булса иде, улымның рухы шат булса иде дип дога кылам. Ананың баласы өчен кылган догасы пәрдәсез кабул булыр диелгән Пәйгамбәребез хәдисләренең берсендә. Шуңа өметләнәм…

Запись «Адмирал» фаҗигасында улын югалткан Миңниса апа: «Биш бала арасында бердәнбер малай иде» впервые появилась Tatar Today - татар яңалыклары..

Исмәгыйль Шәрәфиевның кызы: «Әти җан биргәндә тәрәзәбезгә азан тавышы керә иде»

Чулпан — Fri, 23 Jun 2017 10:35:30 +0000

Бүген кич, кояш баткач, ифтарлар узгач, татар дөньясы кайгылы хәбәр алды – “Татарстан яшьләре” газетасының баш мөхәррире, күп татар журналистларының остазы, татар матбугаты үсешенә искиткеч өлеш керткән күренекле шәхес Исмәгыйль Шәрәфиев каты авырудан соң арабыздан киткән. Аңа 66 яшь иде.//Интертат//

Исмәгыйль Шәрәфиевның вафаты турындагы хәбәрне “Татар-информ” агентлыгына озак еллар аның урынбасары булып эшләгән Атлас Гафиятов хәбәр итте. Шулай ук без Исмәгыйль аганың кызы Айгөл белән элемтәгә кердек, ул әтисен озату иртәгә, 23 июнь көнне, 8.30 минутта Салмачы бистәсендә булуын әйтте. Исмәгыйль Шәрәфиев туган ягы Әтнәдә җирләнәчәк.

Айгөл Шәрәфиева әтисенең соңгы айлары, авыруы турында сөйләде.

“Әтинең ямам шеш белән авыруы соң, инде берничек тә ярдәм итеп булмаган стадиядә ачыкланды. Гәрчә әти алданрак медицина тикшеренүе үткән булса да, табиблар аңарда авыру барын күрмәгәннәр. Әти, диагнозын белгәч, тыныч кабул итте. Һәм башы белән хезмәткә чумды. Бары хезмәт, бары хезмәт… Иң беренче секундтан соңгы көнгә кадәр.

Авыру белән ярты ел көрәште ул. Чын көрәшче булды! Авыруны баса торган даруларда гына яшәсә дә, бер тапкыр да авыртудан, хәле булмаудан зарланмады. Авыртып интеккәнен сизсәк, “Мөгаен, укол ясарга вакыттыр”, дип кенә әйтә иде.

Соңгы көнгә кадәр сәламәт кеше кебек яшәдә – бакчада эшләде, җиләк утыртты. Йорт-хуҗалык эшләрен дә алып барды, квартплата түләү дисеңме, лампочканы алыштырумы, бакчага яңа көрәк алумы, барысын да эшләде һәм бер дә авыртуга зарланмады. Ул авыру турында сөйләшергә дә рөхсәт итми иде.

Соңгы арада әти “Татарстан яшьләре” өчен юмористик хикәяләр тәрҗемә итте. Бары тик көлдергеч юмористик хикәяләр генә. Бик күп хикәяләр әзерләде. Кайберләрен безгә сөйләп, көлдерә иде.

Әти бүген кич, кояш батканда, азан вакытында дөньядан китте. Ул җан биргәндә тәрәзәбезгә азан тавышы керә, кояшның соңгы нурлары карый иде”…

Исмәгыйль Шәрәфиев 1950 елның 12 ноябрендә Казанда туа, 1973 елда Казан дәүләт университетын тәмамлый. “Татарстан яшьләре” газетында эшчәнлеген ул тәрҗемәче буларак башлый, аннары хатлар бүлеге җитәкчесе, җаваплы сәркатип, редактор урынбасары була. “Идел” журналының җаваплы сәркатибе булып эшли. 1990 елда “Татарстан яшьләре”нең баш мөхәррире итеп билгеләнә.

Быел Татарстан матбугаты көнендә узган “Бәллүр каләм” чарасында Исмәгыйль Шәрәфиевка күпъеллык нәтиҗәле хезмәте өчен Гран-при бирелгән иде. Ул үзе хастаханәдә булу сәбәпле, бүләккә бирелгән “Лада Калина” автомобиле ачкычлары аның кызы Айгөлгә тапшырылды.

Алсу ИСМӘГЫЙЛЕВА

Запись Исмәгыйль Шәрәфиевның кызы: «Әти җан биргәндә тәрәзәбезгә азан тавышы керә иде» впервые появилась Tatar Today - татар яңалыклары..

Илфак Шиһапов белән язышкан кыз Назгөл кайбер серләрен ачты

Чулпан — Thu, 22 Jun 2017 11:24:55 +0000

Күренекле журналист, продюсер Илфак Шиһаповның безнең арадан китүенә бер ай була. Ул Рамазан аеның өченче көнендә – 30 майда вафат булган иде. //Интертат//

Шушы бер ай эчендә Илфак телләрдән төшмәде. Радио-телевидение тапшыруларын аңа багышладылар, ифтар мәҗлесләрендә дә искә алдылар.

Илфак Шиһаповның “Вконтакте” битен күзәтеп баручылар белә, ул еш кына диварына бер кыз сурәте элә һәм аның астына: “Якын кешем”, “Син бул гына”, “Син дә булмасаң, нигә миңа бу тормыш?” кебек сүзләр яза иде

Илфак әфәндене соңгы юлга озатырга да килгән иде Назгөл. “Аның миңа мәхәббәт хисләре булгандыр дип уйламыйм, без бер-беребезне “поддерживали”, – диде ул “Интертат”ка.

Якын кешесен югалту ачысыннан, Назгөл Илфак Шиһаповка хат язган:

«Илфак… Илфак абый… Сиңа абый диеп тә дәшә алмый идем, безнең 28 ел арабызны уйламыйча, 18 яшьлек тиле кыз белән егет кебек аралаштык… Син еракта булсаң да, hәрвакыт янымда кебек идең. Идең түгел, юк, син әле дә янымда! Мин хисләремне кая куярга, кая барып бәрелергә белмичә, сиңа хат язам, ә син янымда утырып: “Ну, Назгөөөөөөл, ну булды, ну барысы да әйбәт бит, кызым!” – диясең кебек. Син менә бер язганда болай дигән идең: “Уйларым белән син йоклаганда яныңа килеп чүгәлим дә, озаклап синең сабыйларныкыдай иреннәреңә, мөләемлык, наз бөркелеп торган йөзеңә, зифа буй-сыныңа карап торам…” Әле дә шулай янымда, минем күздән яшьләремне сөртеп, карап утырасың сыман.

…Ноябрь ае… Авылга кайтканда, ялгыш кына синең социаль челтәрдәге битеңне күреп, язмаларыңны укып, “Бу нинди сәер кеше икән?!” – дип караганым әле дә хәтердә… Шулай тиеш булгандыр инде, язмыштыр… Шулвакыт әнием дә бүлмәгә килеп керде: “Кая, бу бит Илфак Шиhапов, мин дә карыйм әле, “Татарстан яшьләрендә” язган язмаларын мин бик яратып укый идем бит!” – диде. Укый, укый “Тишек” газетасын күрдек, әнием шул ук минутта: “Кызым, бу бит бик кызык газетага охшаган, яз әле, Башкортстанда бу газетаны алдырып буламы икән?” – диде. Мин: “Ярар, әнием, язармын, Уфага баргач язармын”, – дидем.

Шул ук көнне Уфага бардым, Илфак башымнан чыкмады, язаргамы икән, юкмы, бәлки анда башка билгеле кешеләрдәге кебек “йолдызлык чире” бардыр дип тә уйладым… Йоклап торгач, иртән, “Әй, җавап язмаса – язмас”, – дидем дә яздым.
“Исәнмесез, сезгә бер соравым бар иде: “Тишек” газетасын Башкортстанда яздырып буламы? Рәхмәт!” – диеп «смс» юлладым.

Озак та үтмәде, телефонда «смс» тавышы ишетелде: “Исәнмесез, Назгөл! Исемегез бигрәк матур! Кызганычка каршы, әлегә яздырып булмый, бик тиз арада языла алырсыз. Югалмагыз, мин хәзерге вакытта бер очрашуда, кич белән мин сезгә язармын”, – дигән. Минем аптыравымның чиге булмады.

“Сез кайдан буласыз? Исемегезне кем кушты, бигрәк матур!” – дип тагын язды. Менә шулай безнең язышу башланып та китте.

Көннәр буе языштык, төннәр буе языштык. Әле исемә төшерәм дә, ярар мин – бала-чага, ә бит син дә бала-чага кебек мин сөйләгән hәрбер сүзне тынладың, hәр көн иртән “Хәерле иртә!”, ә кич “Хәерле төннәр сиңа!” дия идең. Көн дә… Ә шуннан мин йокларга яткач, интернеттан чыккач, иртән торуыма миңа күңелле булсын дип матур шигырьләр, язмалар яза идең, иртән мин инде йоклап тора идем, ә син hаман ятмаган. 2 сәгать аерма булса да (Татарстан белән Башкортстан арасында), син соң ята идең шул… “Ничек кенә арыган булсам да, таң атканын көтәм” дия идең…

Тормышыңда булган нинди генә кызыклы хәлләрне сөйләмәдең, бөтен кайгы-хәсрәтләреңне, шатлыкларыңны яза идең бит…

Син үзең шундый зур, гел дә елмаеп торган булсаң да, күңелең бик нечкә иде шул. “Бу тормыш бит ул кызык, бер көн елмаясың, көләсең, икенче көнгә елыйсың, булыр-булмас, якын булмаган кешеләрнең әйткән сүзләрен бер дә күңелеңә якын итеп алма” дия идең…

Беләм, синең танышларын бик күп булса да, чын дусларың әз иде. Әле карыйм да, “Мин аның дусты идем, мин бик якын кешесе идем” – дип сойләгәннәр бик күп. Шулай шул, хәзер бернәрсә дә исбатлап булмый, кирәкмидер дә ул, барыбыз да Алла астында, ул күрә, ул белә…

Мин дә беләм, син бу хәлне күрсәң, көлеп кенә куяр идең. Синең чын дусларың тыныч кына, бик күп сүз сөйләмичә басып тордылар. Рәхмәт аларга, синең белән чын дуслыклары өчен рәхмәт. Аларның hәрберсе турында hәркөн саен тик яхшы нәрсәләр генә сөйли идең. Кеше турында начар сүзләр сөйләвеңне бер дә хәтерләмим! Сине җирләгән көнне шуларның hәрберсенә килеп синең исемеңнән, башымны иеп, рәхмәт әйтәсе килде.

Шуннан уйладым да, “Мин кем инде монда?!” – дидем. Әйе, бу сорауны күпләр бирде, интернетта да миңа күп яздылар, чөнки ул минем фотосурәтләремне үзенең челтәрдәге битенә көн дә диярлек куя иде. Чынлап, белмим, нигә куйгандыр…

Шулай көннәр, төннәр буе язышсак та, без синең белән бер дә күрешә алмадык…”Нигә?!” дигән сорауга шулай ук җәвап таба алмыйм… Күрешергә теләдек, тик… булмады… Шулай күкләр теләгәндер инде, күрәсең. Мин күкләргә мәңгелек рәхмәтле булып яшәрмен, шундый Кеше белән таныштырганнары өчен…

528 чакрым ара булсада, син монда яшәгән кешеләргә караганда 1000 тапкыр якынрак идең. Синең дөрес сүзләрең, синең киләчәктә нәрсәләр эшләргә кирәк, нәрсә эшләргә кирәкми дигәнең мәңгегә күңелемдә калыр… Син минем өчен Илфак Шиhапов – танылган кеше түгел идең, ә чын, нечкә күңелле, игелекле, зур хәрефтән Кеше идең.

Сиңа рәхмәт әйтәм… Рәхмәт әйткәнне син яратмый идең, “Ярый, булды инде, кирәкми, нәрсә өчен?” дия идең. “Сиңа рәхмәт, бу дөньяда булганың өчен! Миңа шундый тормышымның авыр чакларында ничә чакрым ераклыктан булышканың, дәртләндереп җибәргәнең өчен”, – дидең.

Аннары төгәлләп: “Тик син генә бул, миңа башка берни дә кирәкми” – дия идең бит… Барыбер сиңа рәхмәт, әйтеп бетерә алмаслык рәхмәт!

Тыныч йокла, кадерле кешем, син мәңгегә минем күңелемдә!

14.06.2017»

Запись Илфак Шиһапов белән язышкан кыз Назгөл кайбер серләрен ачты впервые появилась Tatar Today - татар яңалыклары..

Әлфия Авзалова турында: «Шул догаларны гына көтүе булган кебек – төнлә үлүе билгеле булды»

Чулпан — Thu, 15 Jun 2017 08:46:41 +0000

Татарның легендар җырчысы Әлфия Авзалова 84 яшендә вафат булды.//Татар – информ//

Казанның 7 нче хастаханәсендә яткан Әлфия Авзалованың хәле кичә начарайган. “Көндез кызы Зөлфия: “Әнинең хәле начарайды”, – дип шалтыратты, догалар укуыбызны сорады. Без догалар укыдык. Шул догаларны гына көтүе булган кебек – төнлә үлүе билгеле булды”, – ди Г.Тукай исемендәге Татар дәүләт филармониясе музей җитәкчесе Алсу Хәкимова.

Филармония көн саен Әлфия Авзалованың кызы Зөлфия белән элемтәдә торган. Хәтта моннан ике атна чамасы элек палатага телевизор да китереп куйганнар әле.

“Әлфия апа Авзалова, авыр хәлдә хастаханәдә ятканда да тормыштан аерылмады. “Әни музыка тыңлап ята”, – дигәч, филармония директоры Кадим Назирович үзе алып илтте”, – ди филармониянең матбугат җитәкчесе Земфира Гыйльметдинова.

Татарның легендар җырчысы Әлфия Авзалова инсульт белән апрель аенда халык телендә “обком больницасы” дип йөртелгән 2 нче республика клиник хастаханәсенә салынган иде. Соңрак Казанның 7 нче хастаханәсенә уңайлы палатага күчерелгән.

Татарстанның халык, Россиянең ятказанган артисты Әлфия Авзаловага 84 яшь иде.

Запись Әлфия Авзалова турында: «Шул догаларны гына көтүе булган кебек – төнлә үлүе билгеле булды» впервые появилась Tatar Today - татар яңалыклары..

Мәктәп балалары – наркоман… Тагын ни көтәргә? [әбине үтерә язган]

Гузель — Tue, 25 Apr 2017 16:08:45 +0000

20 апрельдә Казанда 14 яшьлек 7 сыйныф укучысы Фатыйх Кәрим урамында яшәүче 76 яшьлек күршесен үтерергә теләгән. Ул аның башына пычак белән суккан, ә аннары үзе балконнан барып төшкән. //ProKazan.ru//

Яшүсмернең наркотиклар куллануы мәгълүм булган. Ул пенсионер хатынның ишекне ачуын көтеп торган, башына пычак белән суккан. Хатын-кыз башын тотып акырып җибәргәч, аның оныгы йөгереп чыккан. Оныгы җинаять эшләгән малайны куркыткач, ул йөгереп киткән.

Шуннан соң, ул өенә йөгереп кереп, ялгыш балконыннан барып төшкән. 20 метр аска таба очканнан соң, яшүсмер карга килеп төшкәнлектән, исән кала. Укучыны оча башы сөяге сынган һәм эчке органнары зарарланган килеш хастаханәгә алып китәләр.

76 яшьлек ханымны, шулай ук табиблар карый. Ярасын дәвалаганнан соң, аны өйгә кайтарып җибәрәләр.

Яшүсмергә җинаять эшләү нәтиҗәсендә “гаепле” дигән карар чыгарыла.

Запись Мәктәп балалары – наркоман… Тагын ни көтәргә? [әбине үтерә язган] впервые появилась Tatar Today - татар яңалыклары..

Казанлылар Петербурдагы шартлау корбаннары истәлегенә чәчәкләр салды [видео]

Редактор1 editor1 — Tue, 04 Apr 2017 16:47:26 +0000

3 апрель Петербур метросында шартлау нәтиҗәсендә кимендә унбер кеше һәлак булды, дистәләрчә кеше җәрәхәтләнде. Казаннар корбаннар истәлегенә чәчәкләр салды. //Azatliq.org//

Запись Казанлылар Петербурдагы шартлау корбаннары истәлегенә чәчәкләр салды [видео] впервые появилась Tatar Today - татар яңалыклары..

Әгерҗедә яшүсмер ике поезд арасында калган

Редактор1 editor1 — Tue, 28 Mar 2017 17:51:17 +0000

26 март 18 сәгать 25 минутта колакчын киеп музыка тыңлап баручы 14 яшьлек малайны җәяүлеләр кичүендә йөк поезды имгәтә. //Татар-информ//

Яшүсмер белән янәшә баручы кечерәк иптәше сөйләвенчә, тимер юлны чыгар алдыннан алар як-яка карамаганнар. Аларга таба килгән составны соң гына күреп алганнар. Ике поезд арасында калу куркынычы бар дип, кире борылырга уйлаганнар. Иптәше йөгереп үтәргә өлгерә, ә өлкәнрәк малай хәрәкәт иткән составка эләгә.

Ашыгыч ярдәм бригадасы зыян күргән яшүсмерне Әгерҗе районы үзәк сырхауханәсенә илтә. Хәзерге вакытта малай авыр хәлдә.

Запись Әгерҗедә яшүсмер ике поезд арасында калган впервые появилась Tatar Today - татар яңалыклары..