Архивы Башкортсан - Tatar Today - татар яңалыклары.

Башкортстан РКБ-сында табиблар бер-берсенә вирус күчергән диме? Гауга чыккан… [видео]

Лейла — Fri, 10 Apr 2020 15:20:10 +0000

Башкортстаннан юрист Тимур Уразмәтов Уфадагы Куватов исемендәге республика клиник хастаханәсе табибларының оешмада коронавирус таралу очрагы сәбәпле прокуратурага мөрәҗәгать итәчәген белдерә. Бу турыда ул Русия кеше хокуклары шурасы әгъзасы һәм журналист Леонид Никитинга язган хатында хәбәр итә. Хат “Эхо Москвы в Уфе” сайтында дөнья күргән.

Уразмәтов үзенең Куватов хастаханәсе табибы Римма Камалованың улы булуын яза. Ревматология бүлеге мөдире Камалова 9 апрельдә Эхо Москвы радиосында һәм Idel.Реалиига хастаханәдә коронавирус таралу очрагы турында сөйләгән иде.

Тимур Уразмәтов Куватов хастаханәсенең корнавирус учагы булып китүен “коточкыч ахмаклык, җавапсызлык” дип атаган. Ул кешеләрне куркыныч астына куйган бу хәлләрнең килеп чыгуында Башкортстан сәламәтлек саклау министры Максим Забелин һәм аның такымын, шул исәптән хастаханәнең баш табибы Эльза Сыртланованы гаепли. “Алар берничә ай эчендә республиканың сәламәтлек саклау системын җимерде”, дип яза Уразмәтов.

Юрист сүзләренчә, Куватов исемендәге хастаханәдә респиратор авырулар саны арта барса да, ул очракларга “хастаханәдән читтә башланган үпкә ялкынсынуы” дип диагноз куйганнар, COVID-19 тесты ясаудан баш тарканнар. Табиблар яңа авыруларны кабул итүдән туктарга сораса да, җитәкчелек, хастаханә керемнәре кимүдән куркып, моны эшләмәгән. Табибларга шәхси саклану чаралары (битлекләр, саклану киемнәре) бирелмәгән.

Уразмәтов хастаханәдә чынлыкта 9 гына түгел, күбрәк кеше коронавирус белән авырый дип яза. “Кичә ревматология бүлегеннән коронавируслы 23 пациент чыгарылды, нейрохирургия бүлегеннән 18 кеше, башка бүлекләрдә дә шул чама. Ягъни авырулар арасында коронавирус йоктыру очраклары йөзләгән, ә табиблар арасында – дистәләгән. Бу бит алдан язылып килгән кешеләр, алар ниндидер чирләрен табибка күрсәтергә теләгән, һәм хастаханә җитәкчелеге җавапсызлыгы аркасында коронавирус йоктырган”, дип яза Уразмәтов.

Чыганак: чит ил агентлыгы

Запись Башкортстан РКБ-сында табиблар бер-берсенә вирус күчергән диме? Гауга чыккан… [видео] впервые появилась Tatar Today - татар яңалыклары..

Татарстан мөфтие Башкортстанда: “Хыянәтче булмагыз!”

Alina — Fri, 06 Mar 2020 18:09:24 +0000

6 март Татарстан мөселманнары башлыгы, мөфти Камил хәзрәт Сәмигуллин Уфаның «Ихлас» мәчетендә җомга намазын алып барды. Әйтергә кирәк, мөфти хәзрәтләре Башкортстан башкаласына шушы мәчет имам-хатыйбы Мөхәммәд хәзрәт Галләмов чакыруы белән килде. Бу хакта ТР Диния нәзарәтенең матбугат хезмәте хәбәр итә.

Җомгага җыелган милләттәшләр һәм башкорт кардәшләр алдында кунак булып килгән мөфти ике тугандаш халык арасында татулык, туган тел, милли үзаң турында вәгазь сөйләде. Аерым алганда, хәзрәт татар һәм башкорт милләтләре арасындагы туганлык җепләрен, кардәш һәм күрше хакларын, гаиләдә һәм өммәттә дини һәм милли гореф-гадәтләрне сакларга өндәде.

Вәгазен тәмамлап, Камил хәзрәт туган телнең Аллаһ Тәгаләдән бирелгән әманәт икәнен әйтә: «Әманәт итеп безгә тапшырылган туган телебезне югалту — Аллаһ әмерен үтәмәү ул. Әгәр туган телләребезне онытсак, оныкларыбыз безне дә онытачак. Туган телегезне өйрәнегез, кадерле дин кардәшләрем! Өйрәнү, белем алу — мөселманның иң зур бурычларның берсе ул. Туган телегезне һәм милләтегезне сатмагыз — бабаларыгызга хыянәтче булмагыз!».

Вәгазьдән соң Камил хәзрәт җомга намазын алып барды. Аңа ияреп Башкортстанда яшәүче 400дән артык мөселман гыйбадәт кылды.

Мәгълүмат Татар-Информ

Запись Татарстан мөфтие Башкортстанда: “Хыянәтче булмагыз!” впервые появилась Tatar Today - татар яңалыклары..

“Үпкәгезне төкереп чыгарасыгыз килсә, монда килегез. Коточкыч хәл!” Башкортстанда халыкка битлекләр тарата башлаганнар

Гузель — Sat, 19 Jan 2019 17:01:29 +0000

Башкортстанның Сибай шәһәрендә һавага зарарлы матдәләр таралу турында хәбәрләр узган ел ахырында килә башлады. Шул сәбәпле җирле халыкка битлекләр һәм күмер тарата башлаганнар, дип яза Azatliq radiosi. Бу хакта шимбә көнне узган брифингта шәһәр идарәсе һәм гадәттән тыш хәлләр комитеты белгечләре белдергән, дип хәбәр Башинформ агентлыгы.

Шәһәр идарәсе сайтында әйтелгәнчә, битлек һәм күмер алу өчен паспорт күрсәтү кирәк.

“Шулай ук мәктәп балаларына сөт бирергә тәкъдим ителгән. Бу мәсьәлә Роспотребнадзор белгечләре белән килештерелгән. Сөт дүшәмбедән [21 гыйнвар] башлап бирелә башлый” дип хәбәр итте шәһәр башлыгы Рөстәм Афзалов.

Җомга көнне Сибайга Башкортстан башлыгы Радий Хәбиров белән Кырым башлыгы Сергей Аксенов белән булып киттеләр. Сибайның 500ләп баласы Кырымдагы шифаханәләргә җибәреләчәк дип хәбәр ителде.

Моннан тыш, Рөстәм Афзалов сүзләренчә, 40 бала Баймактагы “Талкас” шифаханәсенә һәм тагын 30 бала җирле профилакторийга урнаштырылачак.

Мәхкәмә (суд) приставлары “Сибай бораулау реагентлары корылмасы”ның эшчәнлеген туктаткан иде. Мәхкәмә ачыклавынча, завод һавага зарарлы матдәләр чыгарган һәм шәһәрдә күкерт исе чыганагы булган. Тикшерү корылмадан чыккан истә углерод оксидының 4,1 тапкыр артык булуын күрсәткән.

Завод җитәкчесенә зарарлы матдәләр чыгаручы корылмаларны 90 көнгә туктатып торырга һәм хилафлыкларны төзәтергә кушылды.

Сибай халкы начар искә узган елның ноябрендә зарлана башлады. Әлеге хәлне тикшерү өчен махсус комиссия булдырылды. Элегрәк Сибай тирәсендә ташландык карьерда мәгъдән яна, шуның исе чыга дип белдерелгән иде.

View this post on Instagram

A post shared by Руфина Шагапова (@rufinashagapova)

Чит ил агетлыгы "Azatliq radiosi" -агентлыгы
https://www.azatliq.org/a/29719372.html

Запись “Үпкәгезне төкереп чыгарасыгыз килсә, монда килегез. Коточкыч хәл!” Башкортстанда халыкка битлекләр тарата башлаганнар впервые появилась Tatar Today - татар яңалыклары..

«Гаиләсен үз куллары белән башкага биреп җибәрде. Сугыша да, әрләшә дә алмады!»

Чулпан — Fri, 18 Aug 2017 10:00:02 +0000

Балачактан ук әни сүзеннән чыкмаска өйрәнгәнбез. Ул ничек әйтсә, ничек өйрәтсә, шулай эшлибез. Язмышын, Зәлирә кебек, әнисе – Наилә апа кушканча коручылар һәр адымда очрамыйдыр. //Кызыл таң//

…Наилә апа гомере буе фермада эшләде. Ул елларда колхозларда терлекчелек гөрләп тора иде. Савым сыерлары күп, бозаулар үстерелеп сатыла. Ферма көтүләрен алмашлап икешәр кеше атка атланып көтә иде. Яздан ук ферма маллары урман авызындагы аланлыктагы җәйләүгә күчерелә. Көненә ике тапкыр йөк машинасына төялеп савымга китәләр, җырлый-җырлый, көлешә-көлешә баралар. Җиләк пешкәндә эш бетү белән дәррәү тауга юнәләләр, печән чорында печәнлекләргә сибеләләр. Сыер саву – авыр эш, ләкин әллә яшьлек белән, әллә туктаусыз мәшәкатьтән арынмаганга, зарланырга вакыт калмый. Аннары бит романтика! Урман эчендә 15тән артык сыер сау әле! Черки-кигәвен талаудан башкасы бары да тик уңай тәэссоратлар гына калдыра. Күп ферма эшчеләренең бала-чагасы да үзе белән ияреп йөри, кайсы ярдәмләшә, кемдер вакыт кына үткәрә. Арада Фәрит исемле малай башта әнисенә ярдәм итәргә барса, аның вафатыннан соң, үзе генә килеп, савучыларга булыша торган булды. Кызганып, җылы сөт белән сыйлыйлар иде аны.

— Бигрәк акыллы бала шушы Фәрит, шундый киявең булсачы, — ди торган иде Наилә апа, әллә чынлап, әллә юри.“Юраган юш килә”, диләр. Наилә апаның кызы Зәлирә белән Фәрит бер сыйныфта укыды. Өлкәнрәк була барган саен Фәрит гел Зәлирә тирәсендә бөтерелде. Кыз гына аны бар дип тә белмәде. Армиягә китәр көнне егет, бөтен батырлыгын җыеп, озата килсә дә, әллә ни өзгәләнмәде кыз. Көтәргә дә вәгъдә бирмәде, егетнең хисләрен аңлатырга тырышуыннан көлде генә. Ни арада бу хакта әнисе Наилә апа белеп алган диген. Иртә таңнан кызыннан сорау алды. Кызы теләмәсә дә, аннан армиядәге Фәриткә хатлар яздырды. Бердәнбер көнне башкалада һөнәрчелек училищесында укып йөргән кызы кайтып төште.

— Әни, мин кияүгә чыгам. Минем сөйгәнем бар – күрше авыл егете Рәмис. Иртәгә әти-әнисе белән кулымны сорарга килә, — дип әйтеп салмасынмы?!

Наилә апаның коты очты:

— Син нәрсә, юләркәй! Ә Фәритне кая куясың? – дип кычкырды.

— Фәриткә мине синең генә бирәсең килде, мин яратмыйм бит аны, – дип җаваплады кызы, үзе әнисенең ачулы йөзеннән куркып, күз яшьләренә күмелде….

Озак сөйләштеләр, кычкырыштылар, елаштылар. Ахырда Зәлирә әнисен көчкә күндерде. Кичкә таба иртәгә киләчәк кунакларны каршыларга әзерләнә башладылар: өйне, ишек алдын тәртипкә китерделәр, табын хәстәрләргә керештеләр.Озакламый, никах укытып, яшьләр егет авылына күченде. Ел эчендә уллары Нәфис дөньяга килде. Наилә апага сирәк кенә килгәндә дә ана кешенең күңеле сизенде: кызы әле үз кешесен тапмаган. Болай тыныч кына күренгән Рәмис улы, хатыны өчен ут йотып тора сыман, Зәлирә генә сула барган чәчәкне хәтерләтә. Егерме яшьтә алай ук булмый ич инде!

Шуңа да Наилә апа тынычлыгын җуйды. Кызы белән җитди сөйләшү булды, танышларының язмышларын искә алдылар, чагыштырдылар. Үзенекен дә хәтергә төшерми калмады әни кеше. Ике егет арасында бәргәләнүен, кайсын сайларга белми аптыравын тәфсилләп сөйләп бирде кызына. Ире, эчкегә сабышып, 40 яшьтә гүр иясе булгач кына ничек ялгышуын аңлавын әйтте.Зәлирә уйга калгандай булды, тик үз тормышында хафаланырлык җитди берни дә тапмады. Ире әйбәт, эшли, тырыш, гаилә дип өзгәләнеп яши. Ник әнисе аның өчен шулай өзгәләнәдер?…Шулай яшәп ятканда, Зәлирәләр ихатасына солдат киемендәге бер егет килеп керде. Җәйге кич иде. Һәркем үз эше белән мәшгуль: Зәлирә бакчада түтәл утый, Рәмис сарай буенда сәнәк саплый, печән өсте якынлаша ич, ә кечкенә Нәфис арбасында тыныч кына изрәп йокыга талган.

— Исәннәрмесез! Ни хәлләрдә яшәп ятуда? – дип эндәште кергән егет.

— Минем авылдаш Фәрит түгелме соң? – дип бакчадан күренде Зәлирә, юеш кулларын сөртә-сөртә.

Рәмис аның турында белми иде, шуңа бик исе китмәде. Бергәләп кайнар чәй эчтеләр, көлешә-көлешә балачак, мәктәп елларын искә төшерделәр. Фәрит нык үзгәргән! Чибәрләнгән! Басынкы, оялчан егет кыю лачынга әйлән-гән. Үз дигәнен ычкындырмаячагына Зәлирә дә төшенде бугай. Тик Рәмис кенә берни сизмәде. Тагын бер-ике килеп киткән Фәрит аның Зәлирәсе күңелен тәмам яулаганын ул аларны үз авылларына алып кайтып киткәч кенә аңлады. Бөтенләйгә! Мондый ирләрне “бозау” диләр. Гаиләсен үз куллары белән башкага биреп җибәрде. Сугыша да, әрләшә дә алмады!

Язмышындагы бу борылыштан Зәлирәнең башы күккә тиде. Ул уйлаган дөрескә чыга түгелме? Әллә соң ана йөрәге баштан ук сизенгән булдымы? Моны инде киләчәк күрсәтер….

Бу хәлләрдән соң инде 10 еллап вакыт узды. Фәрит белән Зәлирәнең кызы һәм уллары дөньяга килде. Әти-әни нигезен бик матур тергезеп җибәрде алар. Фәрит эшчән, машинасы белән район үзәгенә эшкә йөри. Йортта да тик торганы юк. Күпләп кош-корт, мал асрыйлар. Зәлирә әлегә бала карап, йорт мәшәкатьләре белән мәшгуль. Рәмис ара-тирә Нәфисне үзе белән алып китә. Аның да барысы да яхшы: гаиләсе, ике улы бар. Наилә апа да кызына килгәләп, хәлләрен белеп китә. Ул кызының гаиләсеннән бик канәгать. Баласының тормышы яхшы булса, әти-әни һәрчак бәхетле бит.

Әлфия ШӘЙХЛИСЛАМОВА.

Туймазы районы, Кандра авылы

Запись «Гаиләсен үз куллары белән башкага биреп җибәрде. Сугыша да, әрләшә дә алмады!» впервые появилась Tatar Today - татар яңалыклары..

Башкортстандагы фаҗига: «Күз яшьләренә тулып, йорты янып беткәнне карап торды»

Чулпан — Wed, 16 Aug 2017 08:46:21 +0000

Бөре районының Үгез авылында 7 августта килеп чыккан янгынның сәбәпләре билгеле. Бу янгында 9 кеше һәлак булды, шул исәптән 5 бала. //Интертат//

Фаҗига чыккан йортта 71 яшьлек Фатыйма Сәгыйтовна улы Рамил һәм килене Вероника, аларның өч балалары: башлангыч сыйныф укучылары Виктория һәм Разил, ике яшьлек Арслан белән яшәгән була. Вероника авыл җирлегендә эшли, Рамил эшмәкәр була.

Мәскәүдән 8 яшьлек һәм 12 ае тулмаган балалары белән Мәскәү югары уку йортларының берсендә укыткан 32 яшьлек кызы Гөлшат һәм армия хезмәтен тәмамлаган туганы Владик кунакка кайткан була.

Гөлшатның Мәскәүгә китүе сәбәпле, туганнар җыелып, бәйрәм итә. Гаиләгә кунаклар килә – Үгез авылында яшәүче 82 яшьлек апасы Әнисә, күрше авылдан 71 яшьлек туганнан туган абыйсы Фазыл.

Йортта булган барлык балалар – биш бала һәм дүрт өлкән кеше һәлак булалар. Фатыйма Сәгыйтовна, өч бала анасы Вероника һәм бер туганы гына исән кала, фаҗига вакытында алар өйнең беренче катында булалар.

Берничә ай элек кенә – апрель аенда әлеге гаилә турында районның “Победа” газетасы мәкалә язган була. “Тәртипле, тормыш сөючән гаилә, бар авыл өчен үрнәк”, – дигән сүзләр белән, авыл җирлеге башлыгы Разиф Рәхмәтуллин бу гаиләгә бәя биргән була.

Искәртеп үтик, тикшерүчеләр фаразы буенча, янгын электр үткәргечләренең төзексезлеге аркасында килеп чыккан. Фаҗига буенча Тикшерү комитеты җинаять эше ачты.

Дүшәмбе, 7 август көнне Башкортстанда, янгын сәбәпле, матәм көне дип игълан ителде.

БСТканалы фаҗига шаһитенең сүзләрен китерә:

– Мин уянганда өй яна иде инде, икенче кат, түбә яна иде, якын килерлек түгел. Үзебез дә шок хәлендә идек, нәрсә эшләргә белмәдек. Хуҗабикә: “Балаларны коткарырга кирәк”, – ди. Ул үзе тәрәзә аркылы чыккан булырга тиеш, чөнки тәнендә киселгән эзләр бик күп иде. Килене Вероника пластик тәрәзәне ваткан… Бөтенебез дә шок хәлендә. Уйламаганда – кичә генә уйнап, йөгереп йөргән балалар үлде, 9 кеше, бу бик зур фаҗига.

Фатыйма апа сөйләвенчә, ул уянганда төтен каплаган була, ул икенче катка менә алмый. “Тарттырылган түшәм эреп, тамчылап тамып тора иде, менә алмадым”, – ди. Янган йорт янына барып, кул белән генә су сибеп, кул астындагы әйберләр белән генә сүндерелек түгел иде. Ялкын бик көчле иде, хәзер бит бөтен төзелеш материаллары пластиктан, өйнең эче дә тышы да пластик белән тышланган, бик көчле янды. Ярый әле җил булмады.

Бик яхшы гаилә иде, мул тормыш белән яшәделәр, тату иделәр, күптән түгел генә йорт салдылар, әйбәт яшәделәр. Бик ярдәмчел булдылар, Вероника администрациядә эшләде, нинди сорау булса да ярдәм итә. Хәзер Фатыйма апа белән Вероника гына калды, ирсез, балаларсыз, бик авыр очрак. Шулай ук, Фатыйма апаның Мәскәүдәге кызы да ике баласы белән кунакка кайткан иде. Зур малаена 8 яшь, кечесенә 1,2 яшь. Аларны алырга, Мәскәүгә кайтырга ярдәм итәргә армиядән кайткан энесе дә килгән иде. Барысы да һәлак булды: биш бала һәм дүрт олы кеше. Кечкенә авыл өчен бу бик зур фаҗига.

Исән калганнарны сырхауханәләргә алып китәләр. Аңына килүгә үк, Вероника үзен өенә җибәрүләрен сорый. “Күз яшьләренә тулып, йорты янып беткәнне карап торды”, – диләр аның турында. Янгын вакытында һәлак булганнарны танырлык булмый. Гөлшатның бер яшьлек баласын аякларыннан гына аералар – күз яшьләренә тулган ана күмергә әйләнгән баласын соңгы мизгелләргә кадәр кочагыннан аермаган була.

Запись Башкортстандагы фаҗига: «Күз яшьләренә тулып, йорты янып беткәнне карап торды» впервые появилась Tatar Today - татар яңалыклары..

Башкортстанлылар 100 урланган казны ашап бетергән

Редактор1 editor1 — Mon, 15 Aug 2016 06:09:33 +0000

Башкорстанда яшәүчеләр йөзгә якын урланган каз ашап бетергәннәр.

Әбҗәлил районында кошчылык фабрикасы хуҗасы казларның санын алганда 200ләп казның юкка чыгуын абайлап алган. Ир-ат полициягә мөрәҗәгать иткән.

Тикшерү барышында фермер хуҗалыгында эшләүче берәүнең берничә ай эчендә кошларны берәмләп урлавы һәм күрше авылда сатуы ачыкланган. Ул 200ләп каз урлавын яшермичә сөйләп биргән.

Башкортстан республикасы Эчке эшләр министрлыгы матбугат хезмәте хәбәр иткәнчә, ир-атка карата “Урлашу” статьясы буенча җинаять эше кузгатылган. Полиция хезмәткәрләре урланган казларның яртысын диярлек җирле халыктан җыеп алып, кире кошчылык фабрикасына тапшырганнар. “Ә күпме каз ашалып беткәнен әйтү кыен”, – дигәннәр.

Татар-информ

Запись Башкортстанлылар 100 урланган казны ашап бетергән впервые появилась Tatar Today - татар яңалыклары..

Башкортстан юлларында тулы бер гаиләнең гомере өзелгән [видео]

Редактор1 editor1 — Fri, 29 Jul 2016 06:12:58 +0000

Башкортстанда юл-транспорт һәлакәте булу нәтиҗәҗесендә тулы бер гаиләнең гомере өзелгән.

Һәлакәт Башкортстанның Мелеузовск районында була. Ford машинасы каршы юлга чыгып, маневрны тәмамлап өлгермичә, маңгайга-маңгай авыр йөк машинасы белән бәрелешә. Нәтиҗәдә машиналар трассаның төрле якларын оча, ә җиңел машина яна башлый.

Шаһитлар тиз арада автомобильдә булучыларны чыгара, әмма ашыгыч ярдәм килеп җиткәнче аларның гомере инде өзелә. Әлеге машинада дүрт кеше була: 23 яшьлек Ләйсән Шәйбакова, ире Ираклий Сария, аларның кызлары София һәм гаилә дусты Жора Ертания. Кечкенә София әле 1 июльдә туган гына була. Гаилә Ләйсән туган ягына кунакка кайта торган булган.

Мәгълүмат Комсомольская правда сайтыннан алынды

Запись Башкортстан юлларында тулы бер гаиләнең гомере өзелгән [видео] впервые появилась Tatar Today - татар яңалыклары..