Архивы Башваткыч - Tatar Today - татар яңалыклары.

“Башваткыч” тапшыруында яңа алып баручы! Кастингта кемнәр катнашты?

Лейла — Fri, 11 Sep 2020 13:12:41 +0000

Яңа сезонда «Татарстан Яңа Гасыр» каналының “Башваткыч” тапшыруы алып баручысы алышына. Әлеге тапшыру эфирда 2011 елдан бирле чыгып килә һәм шул вакыт эчендә тамашачы мәхәббәтен яуларга өлгерде. Аны Җәвит Шакиров, аннары Зөлфәт Зиннуров алып бардылар. Ә 3 октябрь экраннарда тамашачыны яңа алып баручы сәламлиячәк!

Кастингта катнашучылар татар дөньясында инде үз исемнәрен булдырган, татар телендә камил сөйләшә һәм алып бару тәҗрибәсе булган шәхесләр: Татарстанның халык артисты Фердинанд Сәлахов, театр һәм кино актеры Илфак Хафизов, Татарстанның атказанган артисты Азат Зарипов, җырчы Рафил Җәләлиев, теле-радио алып баручы Айваз Садыйров, алып баручы Ильмир Ямалов. Алар кастинг таләпләре буенча үзләренә бирелгән сценарий белән чыгыш ясадылар!

Рафил Җәләлиев, җырчы: “Теләк булганга килдем. “Мин “Башваткыч” тапшыруының алып баручысы булырга тиеш” дип әйтә алмыйм, ул бит читтән караганда тулаем “кәртинкә” килеп чыгарга тиеш. Үземне яхшы алып баручы дип саныймдыр, ә менә кадрдан караганда туры килмәскә мөмкинмен яки киресенчә, мин шушы кадр кешеседер.

“Башваткыч” алып баручысы алдан ук кемнәрнең кунак буласын белеп, өйдә әзерләнеп, һәрбер сорауга җавапны белеп, хәтта аны тулыландырып сөйләрлек дәрәҗәдә мәгълүмат туплап килергә тиеш дип уйлыйм. Ул әдәби, матур, милли тапшыру”.

Ильмир Ямалов, мәҗлесләр алып баручы: “Миңа 5 ел элек Зөлфәтнең сары пиджәге ошап киткән иде, шуңа бүген дә уңышлы булыр дип шулай киенеп килдем (көлә). Алып баручы булыр өчен, беренчедән, кешене яратырга, икенчедән, дикция яхшы булу һәм матур кыяфәткә ия булу кирәк дип саныйм”.

Азат Зарипов, Татарстанның атказанган артисты: “Мин үзем катнаштым “Башваткыч”та, беренчелекне бирдем. Откан блендер һаман да эшли әле (көлә). Нинди генә тапшыру алып барсаң да, син аның турында тәгаен белергә тиеш. Алайса әңгәмә корганда сорау да, җавап та бирә алмыйсың. Һәм алып баручы җор телле булырга тиеш дип уйлыйм”.

Айваз Садыйров, теле-радио алып баручы: “Башваткыч” тапшыруына минем күптән эләгәсе килеп йөри. Монда ике генә юл: тамашачы һәм катнашучы буларак. Программага алып баручы буларак эләгергә булдым. Шуңа менә бу сценарийны өйрәнеп, үземне тәкъдим итеп карасам, зәңгәр экраннардан алып баручы буларак сәлам юллармын дигән өмет бар”.

Исегезгә төшерәбез, “Башваткыч”ның яңа сезоны 3 октябрь башланып китәчәк! Яңа алып баручы, яңа кунаклар, яңа сораулар белән тамашачыларыбызны телеэкраннарда көтеп калабыз!

Чыганак: ТНВ

Запись “Башваткыч” тапшыруында яңа алып баручы! Кастингта кемнәр катнашты? впервые появилась Tatar Today - татар яңалыклары..

Зөлфәт Зиннуров: “Бу бүләкнең бер файдасы юк”

Лэйсирэ — Fri, 08 Mar 2019 05:59:38 +0000

Superjob порталы уздырган тикшерү нәтиҗәләренә ышансаң, хатын-кызлар бәйрәменә бүләк алу өчен, һәр ир-ат 2800 сум чамасы акча тотарга җыена. Чәчәккә 2200 сум сарыф ителәчәк. Ир-атларның күбесе гүзәл затларны котларга җыена, әлбәттә. Ә менә 26 проценты моны эшләмәячәк икән.

Cүз уңаеннан, илдәге ир-атлар, хатын-кызларга бәйрәмгә бүләк алырга, дип 250 мең микрокредит рәсмиләштерә. Бу – ике миллиард сум чамасы акча дигән сүз. Ә Уфадагы ЮХИДИ инспекторлары исә бәйрәм көннәрендә хатын-кызлар рульгә утырып юлга чыкмас дип өметләнә. “Бу хакта һәр ир-ат хыяллана”, – дигән алар. Хатын-кызга нинди бүләк кирәк?

Ләйлә Дәүләтова, шагыйрә:

– Хатын-кызлар бәйрәмдә рульгә утырмасыннар дигәннәре белән бик килешеп бетмим. Юлдагы иминлек ир һәм хатынга карамый. Һәрберебезгә исән-сау йөрергә язсын. Бәйрәмнәр дигәндә, мин мөгаен, күңелем белән әле дә сабый бала булып калганмындыр. Һәр туган көннән ниндидер могҗиза, матур сүз көтәм. Әлбәттә, кемнәндер игътибар булу сөендерә. Ә мин күбрәк үзем кешеләрне сөендерергә яратам. Әниемне, кызымны, туганнарымны, дусларымны котлармын дип торам. Чәчәк, бүләк өләшү генә түгел, иң мөһиме: матур сүзләреңне, яратуыңны кызганмаска кирәк.

Рузилә Галләмова, “Гыйлем” китап нәшрияты директоры:

– Хатын-кызлар рульдә саграк йөри, гаиләсен уйлый, дигән караш яши. Ирләр арасында хатын-кыз йөртүчеләрне граната тоткан маймылга тиңләүчеләр дә аз түгел. Ирләрнең дә юлда тиз кызып китүчәннәре бар. Йөртә белмәү – бәхәсле мәсьәлә. 8 Март көнне исә асыл затлар өйдә ял итсә дә ярый. Уфадагы ЮХИДИ хезмәткәрләренең бәйрәм көнне нәфис затларны туктатасы килмәве генәдер бу. Быел гаиләдә бик күп бәйрәмнәр үткәрдек, бик күп чәчәкләр бүләк ителде. Аларны чыгарып ату кызганыч миңа. Акчаны исраф итү дип саныйм. Шуңа күрә гөл бүләк итсәләр, яхшырак. Бәйрәмгә бернинди бүләк тә көтмим. Энә дә – бүләк, дөя дә. Гаиләмдәге тыныч тормышка да ризамын. Әмма шул ук вакытта бирмәсәләр дә, күңелле булмас иде. Иремнең игътибарын тоеп яшим. Бәйрәмгә карамыйча бүләк итә ул. Кредитка кыйммәтле бүләк алуны бөтенләй аңламыйм.

Равил Халиев, Кукмара районы үзәк хастаханәсе баш табибы:

– Эштәге гүзәл затларга чәчәк бүләк иттек. Бүләк алганда һәркем акчаны үзенең хәленә күрә туздырадыр. Хатын-кыз яхшы сүзгә, игътибарга да эреп китә ул. Юктан да күңеле була, юктан да хәтере кала, дигән сүзләр дә аларга атап әйтелгән кебек. Алар күп эшли, бик активлар, аларны сакларга кирәк. Дөрес, хатын-кызлар ирләргә караганда, болай да ун ел озаграк яши. Тагын да күбрәк яшәсеннәр, ирләрен дә сакласыннар.

Фәния Җәләлиева, Казандагы “Гадел” мәчете мөгаллимәсе:

– Бу көннәрдә өсте өстенә бәйрәм әле, үземнең дә – юбилей көннәрем. Шул яшькә килеп җиттем дип куанам. Аллаһы Тәгаләгә шөкрана кылам. Рәгаиб кичәсенә олы Коръән мәҗлесе әзерлибез. Пәйгамбәребезнең әти-әнисе кавышкан көн бит инде. Без дә менә шундый олы бәйрәм ясыйбыз. Күрше-тирә авыллардан имамнарны җыябыз. Хатын-кызларга теләгем шул: барына риза булсаң, шуны сакласаң, бәхетле булырсың.

Зөлфәт Зиннуров, “Башваткыч” тапшыруы алып баручысы:

– Минем өйдә кызлар күп бит әле. Бәйрәмнәргә чәчәк бүләк итәргә яратмыйм. Тиз сулалар, бер файдасы юк. Шуңа да күбрәк хатынымның нинди әйбере юк, шуны алам. Кызларым нәрсә көтәдер, әлегә белмим. Әмма бәйрәм көнне берсе дә бүләксез калмас дип торам.

Равия Мухина, Казан шәһәренең ревматология үзәге мөдире:

– Һәр хатын-кыз бәхетле булсын иде. Иң мөһиме – авырмасыннар. Безнең бүлектә сигез палатаның алтысында хатын-кызлар ята. Гүзәл затларыбыз сәламәтлеген кайгыртып торсын иде. Ревматологик чирләр кечкенәдән килә. Сабыйлар киләчәктә авырмасын өчен, бала тугач та, әниләре күкрәк сөтен кызганмасын иде. Авыруларга бирешмәс өчен, физик тәрбия дә, борчу-стрессларга каршы тора белү дә кирәк. Минем өчен, янәшәмдәге кешеләрнең авырмавы, пациентларның шатлыклы йөзләрен күрү – иң зур бүләк.

(“Ватаным Татарстан”, /№ 34, 08.03.2019/)

Запись Зөлфәт Зиннуров: “Бу бүләкнең бер файдасы юк” впервые появилась Tatar Today - татар яңалыклары..

ТНВ алып баручысы Зөлфәт Зиннуров туган көненә кадәр эшләп каласы эше белән уртаклаша

Редактор1 editor1 — Mon, 31 Oct 2016 07:49:31 +0000

“Ни хәлләрегез бар?” дигән сәхифә кысаларында шоумен,телевидение алып баручысы, җырчы Зөлфәт Зиннуровның хәлләрен белештек.

-Зөлфәт, ни эшләр бетереп ятасың?

– Мунча төзим. Бүгенге көндә бөтен хыялым, уем, акчам шунда. Ятсам да, торсам да, уйда – мунча, дигәндәй.

-Кайчан өлгертәсең? Ниндиерәк була ул?

-Үземнең туган көнгә өлгертергә исәп (Зөлфәтнең туган көне 19 ноябрь – Авт). Гаҗәеп бер электр миче алып кайттым.Төрле пар бирә торган, үзе температураны көйли торган. Кызларыма да, үземә дә бүләк буларак эшлим.

–Син “Яңа Гасыр” каналында “Башваткыч” тапшыруын алып барасың. Күп вакытыңны аламы?

-Хәзер өйрәнелде инде. Әзерләнәм,әлбәттә.Тапшыру минем үземә дә кызык.

–Соңгы вакытта яңа җырларың ишетелми.

-Йорт салып,тормыш мәшәкатләре белән ул өлкә аз гына арттарак калган иде. Хәзер яңадан ныклап тотындым. 3-4 яңа җыр яздырылган,тагын берничәсе әзерләнеп ята. Аларны озакламый радиодан ишетергә мөмкин булачак. Бер җырга клип төшерергә дип торабыз.

-Син әле туйлар, юбилейларны да бик кызыклы итеп алып баручы. Мәҗлесләрендә сине күрергә теләүчеләр күпме?

-Җәй көннәрендә атнага икешәр туй, бәйрәм яки юбилей алып барырга туры килә иде. Хәзер көзгә алар бераз кимеде, тик шоумен буларак эшсез торам дип әйтә алмыйм.

-Син бәхетлеме бүген?

-Әлбәттә.

Шәһри Казан

Запись ТНВ алып баручысы Зөлфәт Зиннуров туган көненә кадәр эшләп каласы эше белән уртаклаша впервые появилась Tatar Today - татар яңалыклары..

Зөлфәт Зиннуров укырга керергә дип, имтиханнар тапшыра [фото-видео]

Редактор1 editor1 — Fri, 12 Aug 2016 11:27:50 +0000

Җырчы һәм “Башваткыч” тапшыруның алып баручысы Зөлфәт Зиннуров, үзе кебек үк танылган дуслары белән, имтиханнар биреп йөри.

Укырга керергә нияте барлыгын ул инстаграм бите аша хәбәр итте. 12 августның иртәсендә, имтиханга керер алдыннан: “Аллага тапшырдык!” дип фотосын урнаштырды.

Аллага тапшырдык! #имтихан

Фото опубликовано Зульфат Зиннуров (@zulfat_zinnurov) Авг 11 2016 в 11:48 PDT

Әлбәттә, күпләрнең “укырга кая керәсез?” дигән сорау туды. Зөлфәтнең җавабы да озак көттермәде. Алып баручы Авыл хуҗалыгы университетына укырга керергә дип, имтиханнар биреп йөри икән.

Зөлфәт урнаштырган видеодан бик күпләр үзләре укыган аудторияне танып алдылар һәм барысына да уңышлар теләделәр.

Без әзер! Бугай… #имтихан

Видео опубликовано Зульфат Зиннуров (@zulfat_zinnurov) Авг 12 2016 в 12:09 PDT

Запись Зөлфәт Зиннуров укырга керергә дип, имтиханнар тапшыра [фото-видео] впервые появилась Tatar Today - татар яңалыклары..

Зөлфәт Зиннуров ВДВ көнен ничек бәйрәм иткән? [фото-видео]

Редактор1 editor1 — Wed, 03 Aug 2016 10:00:32 +0000

2 августта Һава десанты гаскәрләре көне билгеләп үтелә. Десантчылар да, гади халык та әлеге көннең шаулап-гөрләп үтәчәген көтеп ала.

Зөлфәт Зиннуров та Һава десанты гаскәрләрендә хезмәт иткән. Зөлфәт ел да дуслары белән әлеге бәйрәмне Зәй районының Бигеш һәм Кәрәкәс авылларында билгеләп үтә.

Елдагыча, ВДВ көнен уздырырга Зәй районы Бигеш һәм Кәрәкәс авылларына юл тоттык.

Фото опубликовано Зульфат Зиннуров (@zulfat_zinnurov) Авг 2 2016 в 4:12 PDT

Зәй районы Бигеш авылында ВДВ 2016. Бәйрәм белән!

Фото опубликовано Зульфат Зиннуров (@zulfat_zinnurov) Авг 2 2016 в 8:58 PDT

ВДВ 2016 Зәй районы Бигеш авылы.

Видео опубликовано Зульфат Зиннуров (@zulfat_zinnurov) Авг 2 2016 в 5:18 PDT

Запись Зөлфәт Зиннуров ВДВ көнен ничек бәйрәм иткән? [фото-видео] впервые появилась Tatar Today - татар яңалыклары..

Зөлфәт Зиннуров “Туган авылым” ресторанын нәрсәгә тәнкыйтьли? [фото]

Редактор1 editor1 — Mon, 01 Aug 2016 04:44:04 +0000

Зөлфәт Зиннуров алып баручы, җырчы булудан тыш, әле күңелле итеп туйлар да алып бара. Соңгы тапкыр Зөлфәт тамада булып “Туган авылым” ресторанында эшләгән һәм әлеге ял урынын бик нык тәнкыйтьләп чыккан.

Зөлфәт Зиннуров социаль челтәрләрдә бик актив кулланучы, шуңа да “Туган авылым” ресторанында булган кимчелекләр турында ул инстаграм битендә язып чыкты. “Бүген минем иң якын дустым – Вентилятор! “Туган авылым” ресторанында 2 нче катта туй бара. Кондиционерлары юк! Позор!!! Һава юк, ә тәнәфестә биегәннән соң кеше суына алмый интегә. Но кунаклар Саба белән Теләчедән. Аларны моның белән генә сындырып булмый, не дождешься, “Туган авылым” рестораны!!!”, дип фото да урнаштырган ул.

Мәҗлеснең кунаклары, бәйрәмнән бик канәгать калып, Зөлфәт Зиннуровка әлеге фото астында рәхмәт сүзләрен җиткергән. Күрәсең, Зөлфәт туйларны шуның хәтле күңелле алып бара ки, хәтта эссе көнне кондиционерларның булмавы да сизелми.

Бүген минем иң якын дустым – Вентилятор! “Туган авылым” ресторанында 2 нче катта туй бара. Кондиционерлары юк! Позор!!! Һава юк, ә тәнәфестә биегәннән соң кеше суына алмый интегә. Но кунаклар Саба белән Теләчедән. Аларны моның белән генә сындырып булмый, не дождешься, “Туган авылым” рестораны!!! #зөлфәтзиннуров #алыпбаручы #туганавылым

Фото опубликовано Зульфат Зиннуров (@zulfat_zinnurov) Июл 30 2016 в 10:20 PDT

Запись Зөлфәт Зиннуров “Туган авылым” ресторанын нәрсәгә тәнкыйтьли? [фото] впервые появилась Tatar Today - татар яңалыклары..

Зөлфәт Зиннуров Кукмара районына барып сыер сауган? [видео]

Редактор1 editor1 — Thu, 28 Jul 2016 10:50:51 +0000

“Башваткыч” тапшыруын алып баручы, җырчы Зөлфәт Зиннуров телефонына кызыклы фотолар төшерергә, төрле чаралардан репортажлар ясарга ярата.

Менә 27 июль көнне дә Зөлфәт “инста дусларын” Кукмара районының Вахит күмәк хуҗалыгы сыерлары белән таныштырды, ничек сөт савулары турында сөйләде.

Зөлфәт Зиннуровның инстаграм битенә язылучылар әлеге видеоны югары бәяләде. “Оста һәм хис белән сөйлисең.Сиңа Рәсәйнең җыелма футбол командасы уеннарын комментировать итәргә кирәк-алар да нәкъ менә шулай басып торалар!”, дип язучылар да булды.

Кукмара районы Вахит күмәк хуҗалыгында.

Видео опубликовано Зульфат Зиннуров (@zulfat_zinnurov) Июл 27 2016 в 1:40 PDT

Запись Зөлфәт Зиннуров Кукмара районына барып сыер сауган? [видео] впервые появилась Tatar Today - татар яңалыклары..

Интернетта халык яңа табышмакка җавап эзли, ә син биремне үти алырсыңмы? [фото]

Редактор1 editor1 — Wed, 13 Jul 2016 11:53:07 +0000

Интернетта халык яңа табышмакка җавап эзли. Кайбер кешеләр, әлеге башваткычны чишәргә теләп, көне буе экраннар каршында утыра.

Күптән түгел интернет челтәрендә яңа табышмак барлыкка килде. Аклы-каралы коверда чехол киертелгән смартфон табарга кирәк. Беренче карашка, бирем җиңел кебек тоелса да, эш күпкә авыррак булып чыга. Кешеләр көннәр буе смартфон эзли. Әлеге бирем инде төрле илләр буенча таралган, социаль челтәрләрдә әлеге темага сөйләшүләр бара.

Элек интернетта халык куртканың төсе нинди булуы ачыкларга тырышса, хәзер тагын да авыррак табышмакны чишмәкче була. Ә син рәсемдә смартфон күрәсеңме?

Мәгълүмат Газета.ру сайтыннан алынды

Запись Интернетта халык яңа табышмакка җавап эзли, ә син биремне үти алырсыңмы? [фото] впервые появилась Tatar Today - татар яңалыклары..

Зөлфәт Зиннуров тормыш иптәшен һәм кечкенә кызын бала тудыру йортыннан алып кайткан [фото]

Редактор1 editor1 — Tue, 12 Jul 2016 12:26:29 +0000

“Башваткыч” тапшыруын алып баручы Зөлфәт Зиннуров Казанның 1нче бала тудыру йортыннан тормыш иптәше Гөлназны һәм кечкенә кызын алып чыкты.

Инстаграм челтәрендә: “Әнә,шыпырт кына ята “зур” кеше!)) Кайтып барабыз!” – дип, шатлыгы белән бүлеште бәхетле әти.

Исегезгә төшерәбез, 8 июль – Гаилә, мәхәббәт һәм тугрылык көнендә Зөлфәт Зиннуровның гаиләсендә икеләтә бәйрәм булды: икенче сабыйлары дөньяга килде. Нарасый иртәнге 6 cәгать 23 минутта туган.

– Аллага шөкер, хатыным Гөлназның да, нәни кызыбызның да хәле яхшы. Баланың авырлыгы – 3570 грамм, буе – 53 см, – дип сөенече белән уртаклашкан иде Зөлфәт Зиннуров. Кызларына Зифа дип исем кушканнар. Сүз уңаеннан, олы кызлары Зәлиягә 12 октябрьдә 5 яшь тулачак.+

Запись Зөлфәт Зиннуров тормыш иптәшен һәм кечкенә кызын бала тудыру йортыннан алып кайткан [фото] впервые появилась Tatar Today - татар яңалыклары..

Зөлфәт Зиннуровның гаиләсендә олы бәйрәм – икенче сабыйлары дөньяга килгән

Редактор1 editor1 — Fri, 08 Jul 2016 07:24:52 +0000

8 июль – Гаилә, мәхәббәт һәм тугрылык көнендә “Башваткыч” тапшыруын алып баручы Зөлфәт Зиннуровның гаиләсендә икеләтә бәйрәм: икенче сабыйлары дөньяга килде. Нарасый Казанның 1нче бала тудыру йортында иртәнге 6 cәгать 23 минутта туган.

– Аллага шөкер, хатыным Гөлназның да, нәни кызыбызның да хәле яхшы. Баланың авырлыгы – 3570 грамм, буе – 53 см, – дип сөенече белән уртаклашты бәхетле әти. Зиннуровлар кызларына нинди исем сайлавын әлегә әйтмәде. Сүз уңаеннан, олы кызлары Зәлиягә 12 октябрьдә 5 яшь тулачак.

Без дә чын күңелдән Зиннуровларны котлыйбыз, гаилә бәхете һәм балаларының сау-сәламәт үсүләрен телибез!

Интертат

Запись Зөлфәт Зиннуровның гаиләсендә олы бәйрәм – икенче сабыйлары дөньяга килгән впервые появилась Tatar Today - татар яңалыклары..