1 август сәгать 10.17дә 112 бердәм номерына республиканың Буа районы Мещеряково авылында ике ир-атның шакшы сулар чокырын чистарткан вакытта аңын югалтып, чак кына үлемнән калганнары хакында хәбәр килгән.  Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.

1нче зона янгын-коткару отряды хезмәткәрләре урында ачыклаганча, чокырга иң элек бер кеше төшкән һәм шунда ук аңын югалткан. Аңа икенче ир-ат ярдәмгә ашыккан, әмма анысы да һуштан язган. Шул тирәдән узып барган өченче ир-ат аларның икесен дә өскә чыгарган. Коткаручылар һәм табибларны да ул чакырткан.

Чыганак: Татар Информ сайты

Запись Буада пычрак су чокырында ике ир-ат аңын югалта, МЧС килә [фото] впервые появилась Tatar Today - татар яңалыклары..

Мәгълүмат ТатарИнформ

Запись Зөядә су күтәрелүе нинди аяныч нәтиҗәләргә китергән? впервые появилась Tatar Today - татар яңалыклары..

«ЯЛВАРСАМ ДА, АШЫГЫЧ ЯРДӘМ ЧАКЫРМАДЫ»

Бу видеоны Буа шәһәрендә яшәүче 21 яшьлек Лилия Галимҗанова төшергән. Без кызның телефон номерын табып, аның белән элемтәгә чыктык. Хәзерге вакытта ул үзен уртача дәрәҗәдә хис итә:

– Бу хәлләр 18нче февраль, сишәмбе көнне булды. Минем эштән соң һава сулап, җәяү йөри торган гадәтем бар. Ул көнне дә, эштән соң, сәгать кичке сигезенче яртылар тирәсендә шәһәребез үзәгендәге паркта йөрергә уйладым. Якында гына Буа драма театры да бар. Ул урынга машиналарга, транспортка керү тыелган – анда җәяүлеләр генә йөри ала. Бу хакта кисәтеп, хәтта юл билгесе дә тора. Сәламәтлегеңә зыян килергә мөмкинлеген уйламыйча, курыкмыйча йөри аласың. Шуңа күрә мин дә үзем белән нәрсә дә булса булырга мөмкин дип башыма да китермәдем. Инде караңгы төшкән, урамда беркем юк, кешеләр эштән соң өйдә… Атлап барган җиремнән, көчле итеп арттан бәрделәр. Мин очтым. Никадәр еракка очканмындыр, белмим, бәрдерү булганнан соң, колагымнан алкам ычкынып, ун метр читкә очкан иде. Очып барып, битем белән асфальтка килеп төштем. Ятам – яныма килгән кеше юк, машинадан да чыкмыйлар. Күңелем сизенде – бу юктан түгел. Шуңа күрә, тиз генә торып, машинаның маркасын һәм дәүләт номерларын карап, ятлап калдым. Бу «Киа Рио» машинасы иде. Автомобиль мине бәргән җирдә туктаган, тик тора. Бераздан пассажир утыра торган яктан ишек ачылып китте, бер ир-ат чыкты. Яныма килде дә: «Сезнең бар да тәртиптә бит инде?» – ди. Ул бу сорауны минем үземне ничек хис итүемне беләсе килгәнгә яки сәламәтлегем белән кызыксынганлыктан сорамады, аның тел төбеннән «Синең белән бар да тәртиптә, син исән, без китсәк тә буладыр», – дигән мәгънә аңлашыла иде. Минәйтәм: «Сез нәрсә, көләсезме әллә? Бөтен йөзем изелгән, ничек тәртиптә була алсын? Чакыртыгыз ашыгыч ярдәм», – дим. Үземнең беркемгә дә шалтыратырга мөмкинлегем юк. Машина бәргән вакытта сумкам, телефоным да очкан, сумкам эчендәге әйберләр таралып чәчелгән… Якын-тирәдә кеше дә юк… Ә бу кеше миңа караган да, басып тик тора. Мин аңлыйм: ашыгыч ярдәм чакырту кирәк, чөнки шокта булуым сәбәпле хәзер үземне бәлки яхшы да хис итәмдер, ә бәлки башыма каты зыян килгәндер минем? Бәлки аңымны югалтырмын бераздан?! Аңымда булган чакта табиблар чакыртып калырга кирәк, дип уйладым. Бу ир беркемгә дә шалтыратмады, басып торуын дәвам итте. «Алайса үзем чакыртам, телефонымны эзләп табарга гына ярдәм итегез?» – дип сорадым. Ул миңа тавыш күтәрә башлады: «Бәлки синең телефоның бөтенләй булмагандыр яныңда, мин каян белим?!» – ди. Мин күпме генә ялварсам, ялынсам һәм үтенсәм дә, ашыгыч ярдәм чакыртмады. Машина йөртүче дә яныма чыкмады, урынында утыруын дәвам итте. Минем бөтен йөземнән кан ага иде, шуңа ярдәм сорау өчен тизрәк театрга таба киттем. Мин театрга таба борылгач, бу ир-ат та каядыр китеп барды, ә машина урыныннан кузгалып, тизрәк күздән югалды, мине ялгыз калдырдылар, – дип аңлата Лилия Галимҗанова.

Театрга кергәч, шунда каравылчы булып эшләгән ир-аттан ярдәм сораган кыз. Ашыгыч ярдәм чакырттырган. Шәфкать туташлары килеп җиткәнчегә кадәр, каравылчы белән урамда чәчелеп калган шәхси әйберләрен җыйганнар.

– Рәхмәт каравылчыга, битараф калмады. Ярдәм килгәнчегә кадәр, урамда өшеп торма дип, театрга, җылыга алып керде, – дип аңлата әңгәмәдәшем.

«ПОГОНЛЫЛАР БЕЛӘН КӨРӘШҮ ҖИҢЕЛ ТҮГЕЛ»

Һәлакәт булган урынга ашыгыч ярдәм шактый тиз: 7-8 минут эчендә килеп җиткән. Кызның борыны сынуы һәм башында зур гематома барлыгы ачыкланган. Ашыгыч ярдәм исә үз чиратында ЮХИДИ хезмәткәрләрен, полицияне чакырткан.

– Табиблар миңа әйтте: әле ярый арт чүмечең яки чигәң белән очып төшмәгәнсең, баш сөягең сынар иде, ә болай бөтен авырлыкны борының үзенә алган, диде. Хәзерге вакытта исә, күзләрем, йөзем шешкән, бөтен җирем авырта. Медицина тикшеренүе узган вакытта, мин хәтерләп калган номерлар буенча табып, машинаның хуҗасын чакырттылар. Ул районыбызның Пенсия фондында эшләүче ханым Лилия Габбазова булып чыкты. Мин бит рульдә кем булганлыгын күрергә җитешми калган идем. Бу ханым бөтен гаепне үзе өстенә алып, «Сине мин бәрдердем», – диде. Вакыйгаларны болай аңлаткан: аның ире Росгвардиядә эшли. Иренең шулай ук Росгвардиядә эшләгән дусты белән бергәләп кайдадыр утырганнар, соңыннан шушы дустын өенә кайтарырга дип, юлга чыккан булган. Ни өчен тыелган урынга машина белән кергәндер, анысын белмим, тик мине бәрдерүе сәбәбен «Газ белән тормоз педален бутаганга күрә», – дип аңлатты. Дөресен әйткәндә, рульдә ул хатын булуына ышанып та бетә алмыйм. Ник дигәндә, ул кеше бәрдергәннән соң килгәнгә охшамаган иде: бик тыныч сөйләште, дулкынланмады. Хәзерге вакытта рульдә чынлап та ул булу-булмавын тикшерүчеләр ачыклый, – дип аңлата кыз.

Лилия Галимҗанова әйтүенчә, хастаханәдә күрешкәч, бәрдерүче ханым үзенең телефон номерын калдырып, аралашырга тәкъдим иткән. «Мине караңгыда, кеше йөрми торган урында бәрдереп, ашыгыч ярдәм дә чакыртмыйча үләргә дип калдырып киткәннән соң нәрсә турында аралаша алабыз?» – дип баш тарткан кыз.

Лилия Галимҗанова әйтүенчә, бәрдерүче ханым аның әтисе белән дә элемтәгә чыккан, кирәк булса матди ярдәм күрсәтергә теләвен әйткән:

– Миңа алардан бер нәрсә дә кирәкми. Үзем хастаханәгә йөреп дәваланып бетәчәкмен, ә калган мәсьәләләрне суд аша хәл итәрбез. Тик бу суд гадел булырмы? Монысын белмим. Ник дигәндә, иминлек сагындагылар миннән сорау алган вакытта: «Ярый әле ире бәрдермәгән, ире бит Росгвардиядә эшли, шулай булгач без аннан хәтта сорау да ала алмас идек», – дигән сүзләр әйтте. Моны ишеткәч, мин дә бу хәл турында җәмәгатьчелеккә чыгарырга булдым, йомып калдырмасыннар. Тормышның ничек корылган булуын яхшы аңлыйбыз бит – погонлылар белән көрәшү җиңел түгел. Безнең Буа шәһәре кечкенә, ә әшнәлек теләсә нинди мәсьәләне уңай якка хәл итәргә мөмкин. Аларның әшнәлекне эшкә җигәргә җае калмасын өчен шулай эшләдем, – ди Лилия Галимҗанова.

БӘРДЕРҮЧЕ СӨЙЛӘШЕРГӘ ТЕЛӘМӘДЕ

Буада яшәүчеләр генә түгел, кызның видеосын караган бөтен республика халкы да аның бу гамәлен хуплаган гына. Ахырга кадәр барырга, гаделлек җиңсен өчен көрәшергә киңәш иткәннәр.

– Мин ахырга кадәр барачакмын да. Чөнки бу гамәлне болай гына калдырырга ярамый. Кешене үләргә калдыру бит инде бу. Мондый тавышны чыгармаган да булыр идем, тормышта төрле хәлләр була, ялгыш бәрдергәндер, ниндидер проблемалары булып, уйланып баргандыр да, ялгыш тыелган җиргә килеп кергәндер, мине күрмәгәндер, дияр идем… Үзем дә машина йөртүче буларак, аны гафу да иткән булыр идем. Үзара килешеп кенә хәл итәр идек. Тик бәрдерүченең бу очрактагы кешелексезлеген, мәрхәмәтсезлеген акларлык сәбәп юк, дип саныйм. Мине ташлап киткән вакытта башына: «Бу кыз бала нишләр? Аның белән бар да тәртиптәме?» – дигән уй ничек килмәде икән, шуңа аптырыйм. Бәлки мине машина номерын хәтерләп кала алмас, дип өметләнгәннәрдер. Мин белмим, нәрсә уйлап шушы эшне эшли алганнардыр, – ди кыз.

Бу язманы әзерләгән вакытта бәрдерүдә шикләнелүче ханым – Лилия Габбазованың үзе белән дә элемтәгә чыктык. Ул бу уңайдан бернинди дә шәрехләмә бирергә теләмәвен кат-кат әйтте. «Кызны чынлап та сез бәрдердегезме соң?» – дигән сорауга гына кыска итеп «Әйе», – дип җавап бирде.

Хәзерге вакытта ЮХИДИ хезмәткәрләре һәлакәтнең нечкәлекләрен ачыклау өстендә эшли. Татарстан Республикасының Эчке Эшләр министрлыгы мәгълүматларына караганда, Киа Рио машинасы белән идарә иткән ханым 2019нчы елдан алып, әлеге вакытка кадәр 14 мәртәбә юл йөрү кагыйдәләрен бозганы өчен җаваплылыкка тартылган. Күп очракта – тизлекне арттыруы сәбәпле. Хәзерге вакытта бәрдерүченең машинасы штрафстоянкада. Якын арада Госавтоинспекциядә булган хәлләрне тикшерәчәкләр, ә соңыннан суд булачак. Мәхкәмә утырышында «Киа Рио» машинасы йөртүчесенең ни дәрәҗәдә гаепле булуы каралачак һәм аңа җәза төре билгеләнәчәк.

Хәзерге кануннар буенча караганда, «кирпеч», ягъни машинада керү тыела, дигән билге булуга да карамастан, анда кереп хәрәкәт иткән өчен 5000 сум штраф яки 4 айдан 6 айга кадәр машина йөртү таныклыгыннан мәхрүм итү каралган. Шулай ук, кагыйдә буенча, машина йөртүче җәяүлене бәрдергәннән соң, беренче чиратта аңа ярдәм күрсәтергә, ашыгыч ярдәм белән полицияне чакыртырга һәм алар килгәнчегә кадәр беркая да китмәскә тиеш. Бу очракта югарыдагы таләпләрнең берсе дә үтәлмәгән, шуңа күрә җәзаның шактый саллысы бирелер кебек күренә… Әмма карарны бары тик мәхкәмә чыгара, шуңа күрә без дә Лилия Галимҗанова белән бергәләп, суд утырышы булуын көтәбез. Ахыры ничек тәмамлануы хакында янә язып чыгарбыз. Вакыйганы күзәтеп барачакбыз.

Айгөл Закирова

Мәгълүмат: beznen.ru

Запись “Күпме генә ялварсам да…” – Буада 21 яшьлек кызны машина белән бәрдереп, ташлап киткәннәр впервые появилась Tatar Today - татар яңалыклары..

“Буа мәдәният йортында ел саен шундый салкын була. Аның түбәсе җылытылмаган, астында су җыелган диләр эшчеләре. Шуңа күрә анда җылы түгел, җылылык юкка чыга бара. Ә болай ягу системасы эшли. Буа шәһәренең мәдәният йортында әбиләрнең калын киемнәрдән утыруы бер дә матур түгел инде”, – диде Данир Сабиров.

Буа районы башлыгы Марат Җәббаров, әлеге сүзләр белән килешеп: “Безнең мәдәният йорты авария хәлендә, бер тапкыр да ремонтланмаган, 1973 елгы булса кирәк. Түбәсеннән су үтеп керә, подвалы тулы су. Ул Буаның иң хурлыклы объекты булып тора. Әлегә берни дә эшләп булмый, бик күп акча кирәк”, – дип белдерде.

Аның сүзләренчә, клубның реконструкция проектын инде эшли башлаганнар. Проект эшен бетергәч, хөкүмәткә мөрәҗәгать итәчәкбез. Аны реконструкцияләү өчен генә дә 270 млн күләмендә акча кирәк.

Татар-информ

Запись “Әбиләрнең калын киемнәрдән утыруы бер дә матур түгел” – Данир Сабировның Буа мәдәният йортын тәнкыйтьләвенә башлык җавап тота впервые появилась Tatar Today - татар яңалыклары..

Тик экономия ясарга булышучы бу җайланманы урнаштыруның нюанслары турында гына әйтеп тормыйлар. Соңыннан гына билгеле була: мондый бәхет өчен йөз мең сумнан артык акча түгәргә, ул акчаң булмаса, җиде ел кредит түләп яшәргә кирәк, ди шул.

ТАЛЫЙЛАР!

Буада яшәүче Дәрдәния апа Йосыпова безгә сентябрь аеннан бирле шалтырата инде. «Без – бер төркем әбиләр, зар елашып утырабыз, талыйлар кызым, ярдәм итегез!» – дип шалтыраткан иде ул. Җай туры килмәгәч, Буага берничә айдан соң гына кайта алдык.

Арефьев урамының тугызынчы йортында яшәүчеләр журналист килүне дүрт күз белән көткән. Зарлары күп һәм бу зарларның һәммәсе дә йортларындагы җылыту системасын үзгәртергә теләүләренә бәйле.

Быел август ахырында бу йортта яшәүчеләрне хакимият җитәкчеләре ишек алдына чакырып чыгарган да, җыелыш уздырган. Сөйләгәннәр, аңлатканнар, болай дигәннәр: һәр фатирга ике контурлы мичләр куелачак, элеккеге система белән җылытулар бетә, эссе кирәк булса – ачасыз, суык кирәк булса – кысасыз, үзегез көйләп тора алачаксыз, бу зур экономия ясарга булыша торган җылыту төре, имеш.

Җылыту системасын үзгәрткәндә фатирлардагы торбаларны алмаштырырга кирәк булачак. Моны ишетеп, Буа карчыклары йөрәгенә тотынган:

– Әле биш ел элек кенә, капиталь ремонт үткәрәбез дип, торбаларны бер алыштырганнар иде. Шуны алыштырганда балконнарыбызга кадәр җимереп чыгып киттеләр. 30 мең сумга балкон ясаттык, бөтен обойларны әшәкеләттеләр – аларны яңадан ябыштырттык, тәрәзәләрне җимереп бетерделәр, бөтен тишек-тошыклары калды, җаныбыз чыкты алар артыннан фатир ремонтлап, – дип сөйли мәсәлән Дәрдәнә апа. Аны күршеләре дә җөпли. Әйе, диләр, ул вакыттагы торба алмаштыруларыннан соң, җан чыкты фатирны ремонтлап, дип авыр сулыйлар.

Тик хакимият җитәкчелегенең «яхшы» хәбәре бу гына булмаган. Яңа котел куйдыруның бәясен әйтеп тә шатландырганнар.

– Бер фатирга шушындый мич кертү – 120 мең сум диделәр сеңлем! Бу акчаны көнендә түләп бетерә алмасаң, 7 елга бүләләр дә, кредит итеп бирәләр икән. Әллә яшим мин тагын җиде ел, әллә юк, – ди әбиләр. Шуңа өстәп пенсияләренең дә әз булуын сөйлиләр, гел «кирәксез» булган бу котелга чыгармасак та, ул акчаны тотар урын табылыр иде әле, дип уфтаналар. – Бик кайгырабыз! Гомер буе кара эштә эшләп алган пенсиябезне шулай теләсә нәрсәгә тотыйкмы? Безнең дә ашыйсы килә! – ди алар. Ә араларыннан иң кыюы – Дәрдәнә апа. Ул бу акча мәсьәләсен җитәкчелекнең үзенә дә әйткән булган:

– Мин туры сүзле кеше, сеңлем! Шул хакимият җитәкчеләренә бәреп әйттем: кай җирләремнән алыйм аның кадәр акча, дим. Бер түрә мыскыл итеп ташлады: «Һәр йортта сезнең кебек бер начар хатын була инде ул, каршы килә торган», – ди. Бөтен кеше алдында мыскыл итте мине! Мин бит карчык кеше, каян аның кадәр акчалар алыйм?! Ярый да алар елына фәлән кадәр миллионнар эшли, – дип сөйли ул.

АЛТЫН БӘЯСЕ ТОРА

Бу индивидуаль җылыту системасына күчүгә каршы түгел зарланучылар. Аларның җавап таба алмаган берничә соравы гына бар. Беренчедән, моннан биш ел элек, кемнәрнеңдер балкон-тәрәзәләрен җимерә-җимерә торбаларын алыштырган вакытта, йортта яшәүчеләр үзләре үк сорап чыккан булган: «Зинһар, бер пычранган вакытыгызда индивидуаль җылыту системасына да күчерегез инде безне», – дигәннәр. Ул вакытта күчермәделәр дә, хәзер кыйммәтле ремонтлар ясагач, тагын кереп фатирларыбызны мәхшәргә әйләндереп чыгачаклар бит инде, ди алар.

Икенчедән, карчыклар яхшылап аңлап бетерми: бу индивидуаль җылыту системасы дигән әйбер ул чынлап та файдалымы, әллә аның зыяны да бармы? Өченчедән, ни өчен моны керттерү ул кадәр кыйммәт соң? 120 мең сум сорыйлар! «Кибетләрдә мондый ике контурлы мичләр 22 мең сумга да бар. Ә безгә шушы мичне 120 мең сум итеп китереп куялар. Каян алганнар бу бәяләрне?! Ничек шуның кадәр талап була кешене», – ди Буа әбиләре.

…Индивидуаль җылылык системасына күчерү белән Татарстанның газификация фонды шөгыльләнә. Әйе, мондый җылылык миче кую – чынлап та, экономия ясарга булыша. Ләкин аны куйдыру өчен йөзәр мең сум акча сорау – бу халыкны талауның яңа төр формасы һәм моның өчен газификация фонды җитәкчесе Җәүдәт Мидхәтовичкә рәхмәт әйтик. Чөнки мондый бәягә мич урнаштыруны талау димичә, башка сүз белән атап булмый. Әле Буалыларга «повезло». Менә Җәлил бистәсеннән бер укучыбыз шалтыратып зарланган иде – аларда бу хезмәт өчен 150 мең(!) сум сорыйлар икән. Кеше шушы җылыткычны урнаштырам дип, фатирының да астын-өскә китерә, ремонт та ясый, 7 елга кредитка да чума… Һәм бу бәяләрнең чынбарлыктагы бәяләрдән берничә мәртәбә югары икәнен бөтен кеше аңласа да, газификация фондына ни прокуратураның, ни башка берәүләрнең дәгъва белдергәне юк… Ә нигә?

Бу төр җылыту системасына күчүнең тагын бер минусы – җылылык котельный аша, подвал аша уздырылмагач, подъездлар салкын булачак. Беренче катта яшәүчеләрнең идәннәре кыш көннәрендә суык булыр, чөнки подвалдан узган җылылык торбалары алып ташланачак. Безнең әллә кайчан төзелгән иске типтагы күп фатирлы йортлар мондый индивидуаль җылыту системасына җайлашып төзелмәгән, Хрущев заманы йортларының нигезе – подвал. Алардагы җылылыкны өзү бу йортларны какшатачак, монда суыктан соң дымлылыкка, соңрак гөмбәләр үсә башлауга, иң ахырда нигезнең какшавына китерәчәк. Бер көндә генә бу хәл булыр, димибез, әмма иске йортларны индивидуаль җылыту системасына күчерүнең нәтиҗәсе менә шулайрак дип фаразларга мөмкин.

Менә шуларның барысын да исәпкә алып карасаң, мондый нәтиҗә: иртәгә-бүген үләм, дигән кеше өчен бу яхшы. Чөнки үзе үлгәч тә, кредиты туганнарына кала. Өенең җимерелүен дә күрми кала. Ә әле пенсиягә чыкканчы яшим дигән кешегә болардан тыш тагын берничә проблема бар: газификация фонды тәкъдим иткән бу мичләр алтын бәясе торса да, Кореяда гына эшләнгән. Аның гомере озын булыр, дип, ышанып әйтеп булмый. Ватылган саен акча түләп ремонтлатасың икән, тагын кесәңә сугачак. Һәм аның белән күпме интегәсең билгеле түгел.

Буада индивидуаль җылыту системасына Арефьев урамындагы 9нчы йортны киләсе елның җәендә күчерәчәкбез, дип «куркытканнар». Бу йортта яшәүче яшь гаиләләр белән дә аралашкан идем, алар да, бу кадәр сумманы күтәрә алмабыз, баш тартып кына булмасмы, дип кызыксына. Мәсәлән, Зөһрә Хәкимова, «Бездән сез ризамы дип сорап торучы да булмады, факт алдына гына куйдылар. Мәҗбүр итәләр. Ул Корея котелларыннан халык белсәгез ничек зарлана! Төзәтеп җитешә алмыйбыз, гел ватылалар», – диләр».

Ә карчыклар алай ук кырт кисми: бу ике контурлы мичләрне кертсәләр, кертсеннәр, тик башта аңлатсыннар, мондый ат бәясен каян уйлап табып куйган алар! – дип кызыксына.

Буа карчыклары җиде ел кредитка батудан курка

УЛ КАДӘР СОРАМЫЙЛАР

Буа карчыкларының бу зарларын ишеттерү һәм кайбер сорауларына җавап бирү өчен, без Буа районы башкарма комитеты җитәкчесе Ранис Камартдиновка шалтыраттык. Ул беренче чиратта бу төр җылыту системасының халык өчен уңайлы булуын сөйләүдән башлады. Әйтик, җәйге чорда ремонт өчен дип, җылылыкны һәм җылы суны аерып куялар, ә ике контурлы мичләр ярдәмендә ел буе теләгән вакытыңда фатирда җылың да, кайнар суың да була, – диде ул.

«Кайбер йортларда яшәүчеләр зарлана: җылылык өчен күп түлибез, әмма өй салкын, – ди. Мондый кешеләргә аеруча да уңайлы булачак бу», – дип аңлата җитәкче.

– Индивидуаль җылытуга күчүдән баш тартып булмый, чөнки котельныйлардагы җылылыкны аергач, аерым бер фатирларга гына җылы килердәй итеп көйләп калдыру мөмкин түгел. 120 мең сум исә, халык арасына чыккан сүз генә ул. Бөтен кешедән дә моның кадәр сорамыйбыз, бөтен фатирларга да бәя андый түгел. Аннан соң, бу бәягә бары тик котел гына түгел, торбаларны алыштыру да, җылылыкка тоташтыру хезмәте дә керә, – дип аңлатты ул миңа.

Халыкның йокысын качырган бу бәяләрнең ни өчен төрле районда төрлечә булуы гына сәер. Әлегә безгә килгән шалтыратулар арасында – Сарман лидерлыкта, бу хезмәтнең бәясе анда 150 мең сум, дип әйттек инде. Җиде елдан соң, кредиты түләнеп беткәч, файдасын күрә дә башлыйсыңдыр, чөнки чынлап та, җылылык өчен түләү кими диләр. Әмма икенче мәсьәлә бар: бу Корея котеллары чыдамаса, аны алыштыру бушлай булачакмы соң? Монысын әлегә хакимияттәгеләр белми… Аннан соң шул 120 – 150 меңеңне елларга бүлеп чыксаң, бүгенге җылылык өчен түләүләр шалкан бәясе генә калмыймы?!

Айгөл ЗАКИРОВА

Казан – Буа – Казан

Безнең гәҗит

Запись “Буалыларга повезло”: халык бу хәбәрне һәм бәяне ишеткәч йөрәгенә тотына впервые появилась Tatar Today - татар яңалыклары..

View this post on Instagram

A post shared by Liliana Irnazarovа (@liliana_irnazarova)

“Кичә @guzelurazova и @ihakimov концертында булдым. Фикерем чуалды… Әллә инде яхшы гына, әллә бик яхшы үтте тамаша. Белмим. Иң башта шуны әйтәсе килә. Шоу-бизнеста артык индивидуальлек тә, уңышка ирешү дә хупланмый. Бәлки шуңа күрә дә, йолдызларның чыгыш костюмнары, җырлары, биюләре һәрчак бәхәс уятып торды…

Тәнкыйтьчеләрне кайгыртырмын дип куркам, әмма бу юлы (һәрвакыттагыча кебек) чыгыш костюмнары бик нәфис һәм купшы иделәр. Шуны да әйтеп китәргә кирәк, быелгы киемнәре теге елгы костюмнардан күпкә аерыла. Минемчә, Гүзәл 10 гына тапкыр кием алыштыргандыр. Сәхнә дә бик шәп әзерләнгән. Дөресен генә әйткәндә, зур шәһәрләрдә “солянка” концертлары да болай бизәлми. Ә җырлары…Мин чын ләззәт алдым. Тавышлары да матур. 15 ел эчендә тупланган барлык хитлар. Яңа трэклар да әйбәт. @ildus_davlyanov , әфәрин! Кыскачы, барыгыз, дуслар! Бик матур һәм затлы тамаша!”, дип язган.

Фото: Лилиана Ирназарованың Инстаграмыннан алынды

Запись Лилиана Ирназарова Уразова-Хәкимовларның 15нче сезон концертларында нигә бәхәс уятуларын ачыкларга тырыша впервые появилась Tatar Today - татар яңалыклары..

65 ел бергә гомер иткән карчыгы Җәвидә апа белән Дәр­вишләр бистәсендә үз йортларында яши алар. Каралты-куралары, кош-кортлары, мунчасы-сарае дигән­дәй, һәркайсының төзеклеген көн саен диярлек карап-тикшереп тормасам, кү­ңелем булмый,  ди йорт хуҗасы.

Аларның яшелчә бакчалары да әйләнеп чыккысыз. Ниләр генә үстермиләр анда. Рәттән саный калсаң, озак вакыт кирәк булыр иде. Иртә яздан башлап, кара көзгә кадәр икәүләшеп бакчада кайнашудан ямь һәм ләззәт табып яшиләр.

Алар үстергән яшелчә, җиләк-җимештән инде үзләре дә күптән мөстәкыйль тормыш белән яшәүче ул-кызлары, кияү-киленнәре, ике дистәдән артык онык-туруннары гына түгел, Дәрвишләр бистәсендә яшәү­челәрнең күбесе авыз итми калмыйдыр. Төрле орлык һәм үсен­теләрне дә күпләр алардан алырга тырыша. Куллары җиңел яки бушлай булганга гына түгел, нинди туфракта нәрсә уңганлыгын белеп биргәнгә.

Киңәш-табыш итәргә кирәк булганда да, яшьләр Солтан ага белән Җәвидә апалары янына килә. Нәрсә-нәрсә, икесенең гомерен бергә кушканда 175 елда  тормыш тәҗрибәсе байтак җыел­ган.

Аларның балачагы да бергә узган. Икесе дә – Буа районы, Иске Тинчәле авылыннан. Бер урамда яшәп, бер мәктәптә белем алганнар. Икесе дә – сугыш чоры балалары.

Бөек Ватан сугышы елларында авылда яшәгән үсмерләрнең нинди язмышка дучар булуы турында китаплардан укыганда да, җан өшеп куя. Сугыш башланганда, нибары 11 яшендә булган Солтан исә ул вакытларның һәр көнен диярлек хәтерендә саклый. Ишле гаи­ләдә өлкән бала буларак, үзәккә үткән салкыннарда ат җигеп, дүрт ел буе иртә таңнан кичке караң­гыга кадәр колхозның иң авыр эшләрендә катнашырга туры килә. Унбише дә тулмаган килеш “Фидакарь хезмәт өчен” медаленә лаек булуы да – шуның нәтиҗәсе.

Үзеннән бары бер яшькә ке­че­рәк Җәвидәне колхозда бер­гәләп эшләгән елларда ук күңеленә беркетеп куйса да, дуслыкның мәхәб­бәткә әйләнүен  һәр икесенә шактый еллар көтәр­гә кирәк була. Солтан баштарак Буа ветеринария техникумын тәмамлап, юллама буенча эшкә урнашырга да өлгерми, армия сафларына алына.

Җәвидә исә Казан дәүләт университетына читтән торып укырга керә. Бер үк вакытта авыл элемтә бүлегендә эшли һәм мәктәптә укыта. Солтан да армия сафларында хезмәт итеп кайтканнан соң, Казан дәүләт ветеринария институтына укырга керә.

Яшьлек үзенекен итә. Торырга урын булмауга, икесе дә укып йөрүгә  карамастан, авырлыкларга баш имичә, бер елдан алар инде гаилә булып яши башлый.

Ул вакыттан соң инде шактый еллар узган. Армия сафларында чагында ук партиягә кергән, яңалыкка омтылучы яшь белгечне хуҗалык  җитәкчесе булып берни­чә ел эшләгәч, КПССның Нурлат район комитетына икенче секретарь итеп билгелиләр. Аннары – Татарстан Авыл хуҗалыгы һәм азык-төлек министрлыгында һәм 20 елдан артык Татарстан Халык контроле комитетында авыл хуҗалыгы бүлеге җитәкчесе булып эшли. Аның белмәгәне юк, – диләр Солтан ага Алиев турында.

Җәвидә апа исә 60 ел дә­ва­мында мәктәптә математика укыта. Озак еллар Казанның 10 нчы интернат-мәктәбендә эшли. Лаеклы ялга чыккач та, мәктәп җи­тәкчелеге үтенече буенча 75 яшенә кадәр интернат-мәктәптә тәрбияче вазифаларын башкара. Укучылары арасында кемнәр генә юк: республика күләмендә дан алган хезмәт алдынгылары, галимнәр, зур җитәкчеләр, хәтта генераллар да бар. Яраткан тәрбиячеләренең хәлен сораштырып, кунакка килеп йөриләр.

– Мин – укучыларымны, укучыларым мине яратты. Һәркайсы үз балам кебек якын, – ди Җәвидә апа.

Без килгәндә, Җәвидә апа белән Солтан ага бакча артындагы бә­рәңге кишәрлегендә иде. Бу кишәр­лекне чүп-чардан арындырып, үзләре ясаган. Барыбер буш тора, дип.  “Орлыкны ел саен алыштырып торабыз. Быел уңышы бер­мә-бер яхшырак”, – диләр.

– Монда ничә сутый соң?

– Кем үлчәгән инде аны. Ел саен бераз арттыра барабыз. Чүп-чардан да котылабыз, үзебезгә бер шөгыль дә, – диләр, елмаеп.

Юк, нидер җитмәүдән эш­ләү­ләре түгел. Балаларның һәркайсы югары белем алып, тормышта үз урынын тапкан.  Пенсияләре дә җитәрлек, диләр.

Солтан ага белән Җәвидә апа исә сәбәбен эш-мәшәкатьнең сә­ламәт яшәр­­гә мөмкинлек бирүе белән аңлата.

Чыганак һәм фото: "Ватаным Татарстан" газетасы

Запись Туксанга җитеп килгән Солтан ага белән Җәвидә апа яшь калуның серен ачты впервые появилась Tatar Today - татар яңалыклары..

Юбилярны котларга Айгөл Бариева, Фәридә-Алсу, Гөлназ һәм Илсур Шәрипҗановлар килгән.

View this post on Instagram

A post shared by Айгуль Бариева засл Артист РТ (@aigul_barieva)

Энергияләре ташып торган Данир Сабиров һәм Фирдүс Тямаев та монда!

View this post on Instagram

A post shared by Лейла Давлетова (@leyla_davletova)

View this post on Instagram

A post shared by Лейла Давлетова (@leyla_davletova)

Салават, Раил Садриевлар да юбилярны котлый.

View this post on Instagram

A post shared by Раиль Садриев (@sadriev_rail_66)

View this post on Instagram

A post shared by Раиль Садриев (@sadriev_rail_66)

Запись Фирзәр Мортазинның 60 яшьлегеннән мизгелләр [фото, видео] впервые появилась Tatar Today - татар яңалыклары..

Бу куркыныч хәл Раштуа бәйрәме алдыннан Буаның мәдәният йорты янында була.

Шаһитләрнең сүзләре буенча егет белән кыз талашкан мәлдә, егет ачуланып, башка берәү белән аңа хыянәт итүен әйтә. Шуннан соң, кыз аңа уйламыйча да пычак кадый.

Егетне ашыгыч рәвештә Буа районының хастаханәсенә алып китәләр. Операция ясыйлар.

Хәзерге вакытта кызга “Аңлы рәвештә сәламәтлеккә авыр зыян салу” маддәсе буенча җинаять эше кузгатылган. Аңа 10 елга кадәр иректән мәхрүм итү җәзасы каралган.

Запись Егетләр генә түгел, кызлар да көнләшеп җинаятькә бара ала… [Буадагы фаҗига] впервые появилась Tatar Today - татар яңалыклары..

«Карак берне ала, уттан берни калмый» дигән мәкаль йөри безнең халыкта. Соңгы араларда янгын телләре аеруча да усал. Бина-корылмаларны гына түгел, гомерләрне дә юк итә ут. Аллаһ сакласын! //Интертат.ру//

Запись “Өстәл лампасыннан чыккан янгын әти-әнине алып китте…” [Буада булган фаҗига] впервые появилась Tatar Today - татар яңалыклары..