Архивы кредит - Tatar Today - татар яңалыклары.

Вәгъдә ителгән кредит каникуллары бушлай түгел ди?..

Лейла — Sun, 05 Apr 2020 11:29:09 +0000

Бар да җиңел генә хәл ителми икән шул: Россия банкы авыр тормыш хәлендә калган гражданнар өчен кредит каникуллары чорында заемнар буенча процентлар исәпләү дәвам итәчәк, дип аңлатты. Аларны ташламалы чор беткәннән соң түләргә кирәк булачак икән.

Россия Үзәк банкы сайтында хәбәр ителгәнчә, кредит картасы буенча ташламалы чорда исәпләнгән процентларны ике ел дәвамында айлык түләүләргә туры киләчәк. Беренче түләүне ташламалы вакыт узганнан соң 30 көн эчендә кертергә кирәк.

Кулланучылар һәм ипотека кредитлары буенча да процентлар исәпләнелә. Аларны түләүнең дә үз тәртибе билгеләнгән.

Чыганак: Шәһри Казан

Запись Вәгъдә ителгән кредит каникуллары бушлай түгел ди?.. впервые появилась Tatar Today - татар яңалыклары..

Кредиты булган кешеләргә бүгенге көндә нишләргә? Дәүләт Думасында яңа закон кертелә

Лейла — Thu, 02 Apr 2020 07:43:17 +0000

Россиядә коронавирус инфекциясе таралу сәбәпле «кредит каникулы» кертелде: Дәүләт Думасы бу җәһәттән тиешле закон кабул итте, дип хәбәр итәләр.

Вирустан зыян күргән һәркемгә – гади кешеләргә, хосусый эшмәкәрләр, кече һәм урта бизнеска кагыла бу.

Моңа кадәр Президент Владимир Путинның илдә «кредит каникулы» кертү зарурилыгы турында әйткән иде. Шул вакытта ул законга физик затлар һәм хосусый эшмәкәрләр өчен кредит түләүне алты айга кадәр кичектерү турында төзәтмә кертергә кушты. Бу вакыт эчендә банкларга штраф һәм пенялар исәпләргә, шулай ук вакытыннан алда түләүне таләп итәргә ярамый.

1 апрельгә алынган мәгълүматларга караганда, коронавирустан йогышлануның 2777 очрагы ачыклаган: 24 кеше үлгән, 190 кеше тулысынча савыккан. Инфекция йоктыручыларның күбесе – Мәскәүдә. Башкалада һәм күпчелек төбәкләрдә, шул исәптән Татарстанда үзеңне изоляцияләү режимы кертелде. Бу чорда чүп ташлау, йорт хайваннарын һава сулату яки якындагы кибеткә, аптекага барып килү өчен генә урамга чыгарга ярый.

Чыганак: Ватаным Татарстан

Запись Кредиты булган кешеләргә бүгенге көндә нишләргә? Дәүләт Думасында яңа закон кертелә впервые появилась Tatar Today - татар яңалыклары..

Кредит алучыга юрист киңәшләре

Alfia — Mon, 09 Mar 2020 11:28:22 +0000

Юрист Рәзил Билданов киңәшләре

Кредит алганчы нәрсәләргә игътибар итәргә?

Процентларга игътибар итәргә кирәк. Нинди банктан алырга телисез, аның хакында да мәгълүмат эзләргә кирәк. Кайбер җиһаз кибетләре аерым банклар белән эш итә. Һәм әйбер сатып алганда шул банкка мөрәҗәгать итә. Шуңа да аеруча игътибарлы булу кирәк. Ә микрофинанс үзәкләргә бөтенләй мөрәҗәгать итмәвең хәерлерәк. Чөнки анда процентлары да югары, бурычны кайтару көннәре дә аз.

Кредит алганда ничек алданмаска?

Кредит килешүен җентекләп өйрәнеп чыгарга кирәк. Төрле шартлар була. Кайбер очракта процентлары ай саен үсә торган, кайберләре киресенчә кими. Вакытында түли алмаган очракта пеня күпмегә артып барачак, моны да белеп торырга кирәк.

Иминиятләштерүдән баш тартып буламы?

Закон буенча иминият бәясен кайтартып була. Үзәк банк карары буенча, бу эш 14 көн эчендә эшләнергә тиеш. Мисал өчен, әйтик, сезгә кибеттән кредитка берәр техника яки җиһаз сатып алганда иминиятләштерү тәкъдим итәләр. Үзегез дә теләмичә ризалашсагыз, әмма соңыннан уегыздан кире кайткан очракта, ике атна эчендә кредит килешүендә күрсәтелгән иминиятләштерү үзәкләренә барып гариза язарга тиеш буласыз. Төрле очраклар була. Сезнең гаризаны кире кагарга да мөмкиннәр. Шуңа да әлеге эшне башлаганда килешү белән җентекләп танышып чыгарга кирәк.

Кредит килешүен юкка чыгарып буламы?

Кредит килешүенә кул куйганнан соң акчаны алу вакыты 3–5 эш көнгә сузыла. Килешүне бу стадиядә өзү җиңелрәк, чөнки хезмәт әле күрсәтелмәгән, ә банк Гражданнар кодексының 821 нче маддәсенең 2 нче пункты нигезендә клиентның карарын кире кага алмый. Тик моның өчен банкка акча счетка күчерелгәнче хәбәр итәргә кирәк. Әгәр автокредит алырга уйлаган булсагыз, беренче кертем дә керткәнсез икән, автосалон бу акчаны кире кайтарырга тиеш. Вакытында кайтарылмаган акча өчен салонны судка биреп була. Сезгә банкка документларны рәсмиләштерү һәм счет ачкан өчен түләргә туры киләчәк. Бу эш сезнең кредит тарихына йогынты ясамаячак.

Түли алмаган очракта нишлисе?

Кредит ул – процентлар дигән сүз. Шуңа да, бушка яки процентсыз кредитка акча бирәбез дисәләр, ышанмаска кирәк. Мондый очракта кредит килешүен юкка да чыгарып булмый, түләргә генә кала. Ләкин ай саен түли торган сумманы, әйтик, киләсе айны тулысы белән түли алмыйсыз икән, паникага бирелмәгез. Күп кенә кешеләр мондый очракта әлеге бурычны каплар өчен, яңадан кредит ала. Болай эшләү дә дөрес түгел. Сезгә бурычыгыз булган банкка барып, күрсәтелгән сумманы түли алмавыгыз турында гариза язарга кирәк. Һәм банк алдан куелган сумманы киметә. Әмма кредит вакытын озынайтачак. Әйтик, мисал өчен, сез кредитны 2 елга алдыгыз, ай саен 7 мең түли идегез. Ә хәзер 4 мең түлисез һәм инде 3 ел.

Хәзерге вакытта физик затларның банкротлыкка еш чыгуы аркасында, банк аларның хәленә керә. Әгәр дә кеше киләсе айда тиешле сумманы түли алмый икән, аңа шулай ук банкка барып, кредит каникулы бирүне сорап гариза язарга кирәк. Мондый очракта кайбер банклар процент суммасын гына түләргә калдыра, ә кайберләре, гомумән кредит һәм ипотека суммасына каникул бирә.

Мәгълүмат: vatantat.ru

Запись Кредит алучыга юрист киңәшләре впервые появилась Tatar Today - татар яңалыклары..

Белгечләр кредит сазлыгына батмас өчен нәрсә киңәш итә?

Alina — Fri, 06 Mar 2020 04:00:22 +0000

Ташламалы товар, бушлай медицина күзәтүе, процентсыз кредит дигән сүзләр кешене әллә нишләтә. Мондый вәгъдәләргә ышанырга ярамый, дип күпме генә сөйләп торсалар да, алданучылар кимеми. Хатыннар бурычка матурлык һәм сәламәтлек эзләсә, ир-егетләр арзангарак машина алам дип капкынга эләгә икән. “ВТ” журналисты кредитлы тормыш ачысын татучылар белән сөйләште.

“Бурыч түләр өчен… хезмәтче булып эшлим”

Казанда яшәүче Гүзәл Нуриәхмәтовага (исеме үзгәртелде) бер тапкыр матурлык салонына барып кайту 108 меңгә төшә. Хәзер ул банкка кредитын түләр өчен ике эштә эшли. Ял көннәрендә исә байларга хезмәтче булып тора. 7 һәм 5 яшьлек ике улын ялгызы тәрбияли, әтиләре узган ел юл һәлакәтендә вафат булган.

– Мондый көнгә калырмын дип уйламаган идем, – ди Гүзәл. – Бер ай элек таныш түгел номердан шалтыратып, бер матурлык салонына чакырдылар. Бары сезнең өчен генә бүгенге процедуралар бушка диделәр. Кызыктым инде. Матур буласы килә бит!

Гүзәлне салонда бик җылы каршы алалар. Чәй эчертәләр, кунак итәләр. Аннан косметолог дигәннәре битендә 40 минуттан артык нидер эшли һәм нәтиҗә чыгара: тирегез начар, башка процедура кирәк, тик ул хезмәт 15 мең сум тора ди. Матурая торгач, бәя 35 меңгә кадәр күтәрелә. Түләр акчасы булмагач, кредит алырга тәкъдим итәләр. Артык төпченеп тормыйча, Гүзәл берничә документка кул куя. Өенә кайткач, ачып караса – елына 35 процентлы кредит рәсмиләштерелгән. 35 мең өчен 108 мең түлисе булачак!

– Башта бу хакта кешегә сөйләргә дә курыктым. Юристларга мөрәҗәгать итәргә акчам юк. Болай да очын-очка ялгап яши идем. Бер ай кредит түләгәч, дус кызыма ачылырга булдым. Ул өстәмә эш эзләргә киңәш бирде. Хәзер шимбә һәм ял көннәрендә байларга өй җыештырам, ашарга пешерәм, – ди Гүзәл.

“Хәзер авырсам да, зарланмыйм”

Сания апа Вәлиева Кукмара районында яши. Гомер буе сыер сауган. Аякларына салкын тиеп, умырткаларына зыян килүе дә – шул хезмәт нәтиҗәсе.
– Без эшләгән вакытта җылы киемнәр булмады. Резин итек харап итте, – ди ул. – Улым Казанга алып килде. Бер клиникада умырткалыкны бушлай карыйлар, диде. Капка төбенә хәтле машина кайткач, утырып чыгып киттем. Клиника дигәннәре подвал шикелле җирдә урнашкан иде. Мине бер аппаратта карадылар. Аркада бүсер, остеохондроз барлыгын әйттеләр. Бер туташ үзләренә кыйммәтле җиһаз кайтуын, шунда 20 минут ятканнан соң, аркадагы авыруларның бетәсен әйтте. Ышандык…

Әлеге 20 минут рәхәтлек аңа 80 меңгә төшә. Шул арада кулына берничә язу да бирәләр. Үзе дә ике-өч җиргә кул куйганын яшерми. Бу кредит кәгазьләре булып чыга.

– Түләп бетерәбез инде. Тагын ике ай түлисем калды. Шул кредит аркасында улым өйләнә алмыйча йөрде. Аны да сүкмәдем. Минем сызлануыма түзә алмыйча алып барды бит. Хәзер сызлансам да, авырыйм димим. Минем кебек алдана күрмәгез! – ди Сания апа.

“Дога булышты”

Газетаның даими укучысы Балык Бистәсендә яшәүче Илшат Кәримов та ташламага кызыгып төп башына утырган. Яңа ел алдыннан интернетта бер автосалонда машина бәясен 200 меңгә киметәләр дигән язу күргән.

– Хатыным белән шундук барырга булдык. Дөрес, Зөләйханың күңеле сизенгән иде, тик кая инде ул хатын сүзенә колак салу! Үземнең дә акча бар, әмма 330 мең җитми иде. Кредит рәсмиләштерүче кыз банктан мин әйткән сумманы түгел, күбрәк итеп сорады. Ике минут эчендә акча бирәләр дигән хәбәр килеп төште. 330 мең урынына 400 мең бирделәр. Шул арада теге кыз әллә ниләр исәпләде, бушка дигән дүрт көпчәк тә, иминиятләштерү дә үз хисабыма булып чыкты, – дип сөйли Илшат. – Мин салонга киресенчә ташлама эзләп килгән идем. Үзем дә сизмәстән, капкынга эләктем. Өйгә кайткач кына, башыма барып җитте. Салонга да кире бардым. “Килешүдә сезнең паспорт мәгълүматлары тора, кул куйгансыз. Без сезне мәҗбүр итмәдек”, – диделәр. Әле ярый намаз укыйм. Догалар гына күңелемә тынычлык бирде. Алайса чиргә сабыша идем. Танышларым да, 6 ай түләгәч, башка банктан азрак процентлы кредит алырсың, дип тынычландырды…

Берәү – алдана, икенчеләр – алдый. Казанның бер сәүдә үзәгендә эшләүче Гөлназ Саттарова, кешегә кредит бирсәң, премия язалар, ди.
– Мин кәрәзле телефоннар сатам. Безнең максат – кешегә ничек тә кредит алдыру. Мәсәлән, телефон карый башлыйлар. Кайсы яхшы дигәндә, кыйммәтрәкне тәкъдим итәбез. Акчасы булмаган кеше, кредитка риза була. Безгә оста психолог та булырга кирәк. Мине аңламаучылар да табылыр, әмма без шулай итеп акча эшлибез, – ди ул.

Психолог Эльвира Сафина кредит алырга ашыкмаска куша.
– Кеше банкка барганчы кат-кат уйларга тиеш. Бурычка батып, алган әйбере аңа кирәкме? Бу сумманы ай саен түләп бара алачакмы? Хезмәт хакы җитәме? Әгәр әйе дип җавап бирәсез икән, әлбәттә, алыгыз. Күңелегездә бераз гына булса да икеләнү бар икән, алмый торырга да була. Шунысын да онытмагыз: кредит алгач, каешлар кысыла. Яшәү рәвешегез үзгәрә, – ди ул.

Юрист Рәзил Билданов киңәшләре

Кредит алганчы нәрсәләргә игътибар итәргә?
Процентларга игътибар итәргә кирәк. Нинди банктан алырга телисез, аның хакында да мәгълүмат эзләргә кирәк. Кайбер җиһаз кибетләре аерым банклар белән эш итә. Һәм әйбер сатып алганда шул банкка мөрәҗәгать итә. Шуңа да аеруча игътибарлы булу кирәк. Ә микрофинанс үзәкләргә бөтенләй мөрәҗәгать итмәвең хәерлерәк. Чөнки анда процентлары да югары, бурычны кайтару көннәре дә аз.

Кредит алганда ничек алданмаска?

Иминиятләштерүдән баш тартып буламы?

Кредит килешүен юкка чыгарып буламы?

Түли алмаган очракта нишлисе?

Мәгълүмат Ватаным Татарстан

Запись Белгечләр кредит сазлыгына батмас өчен нәрсә киңәш итә? впервые появилась Tatar Today - татар яңалыклары..

Барып җитү шушымы? Әби утын ягыр өчен 80 меңлек кредит ала һәм башлана хәлләр…

Alina — Mon, 24 Jun 2019 22:26:11 +0000

Вологод өлкәсендә яшәүче карчык кышны ничек исән-имин яшәп чыгарга икән дип баш вата. Вячеславова Валентина Александр кызы шуңа утын өчен кредит ала. Авырлык белән бер ел ул аны 9 меңлек пенсияеннән түләп бара.

“Утынга пенсия генә җитми. Шуңа күрә кредит алырга булдым, утын калмаган иде. Мин 80 мең алдым”дип, искә ала карчык.

Валентина ханым кызы һәм оныгы белән яши.

“Бернинди уңайлыклар да юк. Аларны без үзебез ясыйбыз. Суны коедан алам” дип, елмаеп сөйли ул.

Аларның йортларында 3 мич ягалар. Әмма стеналардагы тишекләр аркасында, өйдәге температура 17 градустан югарырак күтәрелми икән.

“Йорт инде искергән, җылы тәрәзәдән дә чыга. Нигез эчергән, шуңа да өйдә җылы тормый. Тишекләрне томалыйбыз, әмма барыбер җылылык юк”, – ди ул.

Валентина Александровна яшәгән авылга газ кергән. Якында гына өч этажлы йөртлар күренеп тора. Түрәләр бу гаиләгә инде башка җиргә күчеп китәргә тәкъдим иткән булган. Әмма пенсионерка “фатирлар юк, кая күчерергә телиләрдер” дип кенә җавап кайтара. “Булса да әнә күпме түләргә кирәк бит. Безгә андый акча каян килсен? Һәр ай саен шуның хәтле түли башласаң, шул утынга киткән акча кебек үк булачак. Андый очракта мин мич өстендә генә ятам инде”, – дип, көлә карчык.

Җирле телевидениедә Валентина әби турында репортаж күрсәткәннән соң, шактый кеше аңа ярдәмгә ашыккан. Әбигә берничә машина утын төяп алып килгәннәр, кредитын да ябырга акчалата ярдәм иткәннәр.

Шуннан соң түрәләр тагын игътибарын Валентина әбигә юнәлткәннәр. Әбигә йортын рәтләргә сүз биргәннәр. Шулай ук фатир алырга чиратка да бастыру турында әйткәннәр.

View this post on Instagram

A post shared by ⚡️TATAR TODAY агентлыгы⚡️🌍 🔊📺 (@tatar_today)

Мәгълүмат социаль челтәрләрдән

Запись Барып җитү шушымы? Әби утын ягыр өчен 80 меңлек кредит ала һәм башлана хәлләр… впервые появилась Tatar Today - татар яңалыклары..

Банктан кредит алганда белергә кирәкле 5 кагыйдә

Гузель — Wed, 10 Apr 2019 06:52:15 +0000

1. Кредитны бары ышанычлы, Үзәк банк реестрына кергән оешмалардан гына алыгыз.

2. Кредит алыр алдыннан, бурычны кайтара алу турында ныклап уйлагыз. Психологлар кредит рәсмиләштерергә уйлаган кешенең өч айлык хезмәт хакы күләмендә акчасы булырга тиеш дип саный.

3. Кредитны түләп бара алмыйсыз икән, аны каплау өчен икенче бер кредит алмагыз. Иң яхшысы: бу хакта банк хезмәткәрләренә хәбәр итү. Кредит түләүне, килешеп, кичектереп торып та була.

4. Үзегезнең шәхси мәгълүматларыгызны саклагыз. Документларның төп нөсхәләрен, күчерелмәләрен бары ышанычлы банкларга гына тапшырыгыз.

5. Банк кредит бирергә дип карар кылган икән, клиент килешү документларын берничә көнгә өенә алып торып та укый ала. Килешү, кредит шартлары турында белгечләр белән киңәшләшсәң яхшы.

Шәһри Казан

Запись Банктан кредит алганда белергә кирәкле 5 кагыйдә впервые появилась Tatar Today - татар яңалыклары..

Үзәк банк ипотека түли алмаучыларга вакытлыча чыгу юлын тәкъдим итә

Гузель — Wed, 30 Jan 2019 14:53:38 +0000

Ипотека алучының финанс хәле катлаулы булган очракта, аңа ипотека каникуллары алырга мөмкин булачак. Бу хакта Русиянең Үзәк банк рәисенең беренче урынбасары Сергей Швецов РИА “Новости”га сөйләгән.

Аның сүзләренә караганда, бурычка алучы бу мөмкинлектән эшен югалткан очракта файдалана ала. Әлеге канун проекты 6 айга кадәр кичектерүне күздә тота.

Бер кредит буенча берничә тапкыр мондый каникулларны алып булачак. Шул ук вакытта бурычлыга түләүләрне тулысынча туктату яки суммасын гына киметү мөмкинлеге дә биреләчәк.

РИА "Новости"

Запись Үзәк банк ипотека түли алмаучыларга вакытлыча чыгу юлын тәкъдим итә впервые появилась Tatar Today - татар яңалыклары..

Дилә Нигъмәтуллина: “Миллионерга кияүгә чыксам ярар иде…”

Гузель — Sat, 15 Sep 2018 05:25:35 +0000

Бу көннәрдә танылган җырчы Дилә Нигъмәтуллина тормыштан чыккан кечкенә генә хикәяләре белән бүлешә. Хәтта алар өчен аерым хештег та уйлап чыгарган. Бу юлы тәкъдим иткәне – җырчының беренче машина алу тарихы белән бәйле икән.

View this post on Instagram

A post shared by Диля Нигматуллина (@dilyanig)

“Белмим, кызыкмы икән инде сезгә, әмма нишләптер бүлешәсе килеп китте. Мәдәният һәм сәнгать университетын бетергәндә, мин инде татар эстрадасына көчле аяк белән басып килгән яшь жырчы идем. Амбицияләр зур, ихтияр бар, көч күп, курку хисе бөтенләй юк диярлек. Шәп чаклар. Тик кесәдә генә җил сызгыра иде. Машина алырга инде күптәәән хыялланып йөргән идем, акчасын гына каян алырга белмәдем. Әмма зур теләк булганда, Ходай да ничектер ярдәм итә бит ул. Оскар Усманов @oscar_usmanov белән чираттагы очрашуда (ул вакытта мин аның белән нәкъ менә беренче җырларымны эшләп йөргән вакыт иде) сүздән сүз чыкты да, үзенең машинасын сатуы турында әйтте. Минем берникадәр җыеп куйган акчам да бар иде. Әмма ул акча әз… Бер генә вариант бар – кредит алырга. Әти-әнинең финанс яктан бик авыр вакытлары. Алардан сорарга да кыюланмадым. Шулай да, авылга кайткач, үземнең теләгем турында сөйләдем. Ә алар нәкь шул вакытта үзләренә кредит алып яталар икән. Мин әтидән кредитны күбрәк итеп, минем өчен дә алырга дип үтендем. Казанга мин инде акча белән кайткан идем. Шунда ук, Оскарга шалтыратып машина алырга әзер икәнне белдерттем. Шул ук кичне Оскар машинасын алып та килде! Бәхеттән баш әйләнә иде. Уррра! Мин машиналы булдым. Ул эмоцияләр бүгенгедәй әле дә исемдә. Кредитны әкренләп биреп бетердем, кайткан саен әз-әзләп бирә идем. Шуңа күрә дә, мин акчаның биик тә кадерен беләм. Күктән төшми иде шул. Һәрбер тиене үз көчем белән эшләп алынган”, дип яза Дилә хатирәләре белән бүлешеп.

Ахырдан Инстадусларына мөрәҗәгать итеп, киңәшләре белән дә уртаклаша. “Беләсезме, хыяллар чынлап та тормышка аша! Беренче курстан бирле үк, тукталышта тролллейбус килгәнен өшеп көтеп торганда, мин көн саен эчтән уйлый идем: “Кайчан да булса, минем үземнең машинам булачак! Мин барыбер аңа ирешәчәкмен! Мин бүтән туңмаячакмын! – дип. Ул көннәрдә минем ашханәдә дә ашарга акчам юк иде. Әмма бу инде бөтенлэй икенче хикәя…

P.S. Әле шуны уйлап утырам, бер дә: “Миллионерга кияүгә чыксам ярар иде”,- дип хыялланмаганмын, ә, чукынчык…”, дип әйтә җырчы.

Фото Дилә Нигъмәтуллинаның Инстаграмыннан алынды

Запись Дилә Нигъмәтуллина: “Миллионерга кияүгә чыксам ярар иде…” впервые появилась Tatar Today - татар яңалыклары..

Ана капиталы: балага тотыласы акчамы, әллә кредитлардан котылу чарасымы?

Редактор1 editor1 — Mon, 06 Mar 2017 13:29:44 +0000

10 ел эчендә Ана капиталы программасы кысаларында 225 мең кеше сертификатка ия булган. Аларның күбесе дәүләт тарафыннан бүленгән акчадан файдаланырга өлгергән инде. Акчаны, нигездә, кредитларны каплауга сарыф иткәннәр. //Интертат.ру//

Программа гамәлгә ашырыла башлаган вакыттан алып, 2007 елның гыйнварыннан республикага федераль бюджеттан 62 миллиард сум акча бүлеп бирелгән, аны 166 мең гаилә алган. Сертификат акчасын тормыш шартларын яхшыртуга, ананың булачак пенсиясенә, балаларны укытуга яки инвалид балаларны тернәкләндерүгә юнәлдерергә мөмкин.

– Сертификатны алып та, безгә мөрәҗәгать итәргә ашыкмаган гражданнар бар. Бәлки, кирәкмидер, бәлки, нәрсәгәдер саклыйлардыр: балалар үсеп килә, укуларына түлисе бар… Әмма күбесе беренче елны ук килә. Гаиләләрнең 90 процентка якыны сертификат акчасын займ һәм кредитларны каплауга юнәлтә, – ди Россия Пенсия фондының Татарстан буенча идарәсенең социаль түләүләр бүлеге башлыгы Гөлсинә Сабирова.

Сертификатны алып та, аннан файдаланырга өлгермәгән 28 процент гаиләнең акчасы артты. Программа гамәлдә булган дәвердә түләүләрнең күләме 250 меңнән 453 мең сумга җитте, шунлыктан акчага әйләндерелмәгән капитал да индексацияләнә. Шул ук вакытта сертификатның «гамәлдә булу вакыты» турында берни дә әйтелми, акчадан теләсә кайсы вакытта файдаланырга мөмкин. Программа, ким дигәндә, 2018 елның 31 декабренә кадәр эшләячәк.

– Бездә сертификатны 2007 елда, аның күләме 250 мең сум тәшкил иткән чагында алып та, әлегәчә файдаланмаган гаиләләр бар. Бүген инде аның күләме 453 мең сумга җитте, ул хәзерге вакытка кадәр индексацияләнә, – дип аңлата Гөлсинә Сабирова.

Узган елдан башлап акчаларны инвалид балаларны тернәкләндерүгә дә юнәлтергә мөмкин. Биредә гаиләдәге мөмкинлеге чикләнгән теләсә кайсы бала хакында сүз бара. Әмма бу хезмәттән Татарстанда әлегә беркем дә файдаланмаган.

– Ана капиталы акчаларын әлеге юнәлештә куллану тәртибе бар. Бездә теркәлгән гаризалар юк, әмма Ана капиталын бу максатларда ни рәвешле файдаланырга икәнлеген сорап мөрәҗәгать итүчеләр булгалый. Тернәкләндерү чараларына килгәндә, инвалид балалар өчен махсус ванналар, техник чаралар, телевизор, компьютерларны мисал итеп китерергә мөмкин, – ди белгеч.

Ел саен Пенсия фондында Ана капиталы алырга килгән 80-90 гаиләне кире боралар. Кагыйдә буларак, әлеге исемлеккә тулы булмаган документлар пакеты тәкъдим итүчеләр эләгә. Мошенниклык очракларына килгәндә, 2012 елда полициягә 200дән артык гариза тапшырылган.

– 2012 елда чегәннәргә бәйле очраклар булды. Балалары булмаса да, алар игезәк сабыйлары дөньяга килүе хакында белешмәләр алып, туу турында таныклыклар күтәреп килделәр. Без хокук саклау органнарына мөрәҗәгать иттек, 12 җинаять эше ачылды – әлеге башбаштаклыкка чик куйдык, – ди Гөлсинә Сабирова.

Пенсия фондында искәртүләренчә, быел Ана капиталының бер өлешен түләячәкләр. 2009 елдан бирле әлеге акчаларны дүрт тапкыр өләштеләр, узган елда аның күләме 25 мең сум тәшкил итте. Бу максатларга федераль казнада зур күләмдә акча таләп ителсә дә, гаиләләр аңа бик тә мохтаҗ.

Ксения ЖАРКОВА

Запись Ана капиталы: балага тотыласы акчамы, әллә кредитлардан котылу чарасымы? впервые появилась Tatar Today - татар яңалыклары..

Үзең өчен яшәргәме, әллә баланың кредитын түләргәме… [булган хәл]

Редактор1 editor1 — Sat, 28 Jan 2017 10:34:51 +0000

Бер хатын белән танышкан идем, башта шалтыратышкалап тордык та, бүтән шалтыратмадым. Мәйтәм нәрсәгә ул миңа: пенсиясе болай да бәләкәй икән, җитмәсә, шуннан балаларының кредитын түләп ята. Тормышка җитмәгәч, хөкүмәт оешмасына идән юарга кергән. Андый хатынар күп – булдыксыз балаларының кредитларын түләп ятучылар //Безнең авыл гыйбрәте//.

Балаларын да әйтер идем, түли алмагач, ник алырга ул кредит-ипотекаларны. Аналарының сыртларына асып куялар да, иркенләп яшәп яталар, җитмәсә. Яшьләргә матур киенергә дә, бәйрәмнәренә дә йөрергә кирәк, тәмле ашау, кафеларга да йөрү кирәк! Бер дә үзләреннән шуны кысып, кредитларын түләргә ашыйкмыйлар. Аналары кысылып, балаларына гына яшәргә җиңелрәк булсын дип, тырышып-тырмаша. Ана кеше картаймыш көнендә тынычлап яшәргә тиеш бит инде ул, ә балаларның кредитын интегеп түләп түгел. Миңа андый корбан хатыннар кирәк түгел. Аларга әйттең ни, әйтмәдең ни – барыбер бала хакы дип, кадала-кадала ярылып эшләячәкләр.

Миңа үзе өчен генә яши торган кеше кирәк. Мәсәлән, мин үзем алты почмаклы йортта торам, газы-суы кергән. Балаларга үзем дә ярдәм итмичә тормыйм анысы, ләкин алар минем сыртта утырмыйлар. Әле менә күптән түгел онык өчен бирелгән ана капиталына акча алыр өчен йортымны балаларга “саттым”. Моның өчен миңа яңа ишек-тәрәзәләр куйдылар, телевизор-суыткычларны яңарттык. Дөрес, кайбер әче телле авылдашлар: “Абзый, хәзер йортың үзеңнеке булмаячак бит, саташма инде. Иртәгә ни буласын кем белгән, әллә яшиләр бергә, әллә юк, сине урамга чыгарып, өйне сатсалар нишләрсең?” дип тә әйткәләде. Ләкин аларына кадәр уйлап утырган юк инде, яхшы булыр әле, Алла теләсә. Үзем шул йортта яшәгәч, үз аклымда булганда, ни булсын тагын?

Өйләнергә танышкалап караганда, хатыннар беренче чиратта ипләп кенә йорт белән кызыксына. Кемнеке, кем хуҗа, кемнең исемендә? Алар аны читләтеп кенә сораган була инде үзенчә, ләкин тел төпләрен мин шундук аңлап алам. Бөтенесе диярлек шул сорауны бирә. Аларны булачак тормыш иптәше түгел, минем каралты-кура кызыксындырган кебек килеп чыга. Алай дөрес түгелдер инде ул. Йорт оныкка яздырылган дип әйткәч, шундук сөмсерләре коела. Ник кирәк аларга минем йорт? Уртак тел табып, үлгәнче бергә-бергә яшәргә генә бит. Пенсия тормышка җитеп бара. Пенсияне алам да, балалар белән зур кибеткә барып, бер-ике атналык, йә берәр айлык азык-төлек төяп кайтабыз. Ул миңа муеннан җитә, артыгы да кала әле. Киемгә һаман саен тотмыйсың бит инде. Газга-суга, утка түләгәч тә кала әле.

Мәҗит, Тукай районы.

Запись Үзең өчен яшәргәме, әллә баланың кредитын түләргәме… [булган хәл] впервые появилась Tatar Today - татар яңалыклары..