“Индива нинди килен соң?” – дип еш сорыйлар. Күз тидерермен дип куркам,  шуңа бик мактамыйм да. Әмма улымның бәхете булды! Моңа кадәр дусларымның, башка артистларының киленнәренә карап, “Илмир улыма нинди хатын эләгер микән?” – дип, үз-үземне борчуга сала торган гадәтем бар иде. Киленем белән уртак сүз таба алмам дип тә курка идем. Хәзер бит пөхтәлекнең нәрсә икәнен белгән, ашарга пешерә торган кызлар юк диярлек. Индива – искәрмә. Киленем шәп! Улым белән бер-берен аңлап, юл куешып, бәхетле тормышта озак-озак бергә яшәсеннәр иде.

“Килен каенана туфрагыннан ярала”, – дип, юкка гына әйтмиләр икән. Сәхнә образларыннан тыш, охшаш сыйфатларыбыз, гадәтләребез күп. Килен белән каенананы шулкадәр охшатып сайлагач, Аллаһы Тәгаләнең барлыгына ышана башлыйсың. Бервакыт Индива белән көндезге төш вакытында бер караватта йоклап киткәнбез дә, улым бик озак безгә карап торган. “Сезнең бит йоклавыгызга кадәр бертөрле!” – дип шаккаткан иде.

Балалар Яңа елга Казанга кайтырга тиеш. Каникуллар вакытында Башкортстан шәһәр-районнарында концертларыбыз булачак, анда Индива да катнаша. Килен белән сөйләшергә, серләшергә вакыт күп булачак, Алла боерса!

Шәһри Казан