Архивы министр - Tatar Today - татар яңалыклары.

“Хатын да мин, ир дә мин. Кирәк икән, янып торган өйгә дә керәм…”

Гузель — Wed, 26 Sep 2018 09:31:41 +0000

Пенсия алды яшенә җитеп килүче гүзәл затларыбызга эшсез калудан куркасы юк! Әйтик, минем кебек массакүләм мәгълүмат чараларында хезмәт куючыларга мөхәррирләре, каләмең тутыгып килә кебек, дип эштән китәргә ым какса, тотасың да… бульдозер яки экскаватор машинисты булып төзелешкә эшкә керәсең.

Әлеге өлкәгә гомер бакый эшчеләр җитми, рәхәтләнеп алачаклар! Тузга язмаган нинди сүзләр яза соң бу дип гаҗәпләнеп калмагыз. Шушы көннәрдә генә РФ хезмәт һәм социаль яклау министры Максим Топилин “Интерфакс” агентлыгы хәбәрчесенә сөйләгән сүзләр бу. Баксаң, озакламый министрлык моңа кадәр хатын-кызлар өчен тыелган эшләр исемлеген кыскартмакчы икән.

Хәзер бит инде пенсия реформасы аларны да 60 яшькә кадәр эшләтүне таләп итә. Шул яшькә кадәр бил бөгү өчен миллионлаган хатын-кызга эшне каян табып бетерәсең ди? Күтәрми-төшерми торган урыннарда эш бирүчеләр инде кырык яшькә җиткәннәребезне дә, алыр идем дә, картаебрак киткәнсең шул, дигән кыяфәт белән каршы алганны, алтынчы дистәгә чыгучыларга ни кала? Шуңа күрә Топилин безнең ишеләрне, эшсез калмассыз, һич югында зур йөк машиналары руленә утырырсыз, дип юата. Максим әфәнде “Интерфакс” агентлыгы хәбәрчесенә тәгаен болай дигән: “Хатын-кызларга икмәк пешерү производствосында, һава, диңгез, елга һәм тимер юл транспортында, зур йөк автомобильләре йөртүчеләре һәм махсус техника машинистлары сыйфатында эшләргә рөхсәт ителә. Яңа исемлек кабул ителгәч, гүзәл затларның эшкә урнашу мөмкинлеге арта, шулай ук гадел хезмәт шартлары тәэмин ителә”.

Министр хатын-кызларны ирләргә тиңләргә маташа, ахры. Маташмый хәле юк, Путин аңа пенсия алды яшендәге хатын-кызларны ничек тә эшсез калдырмау юлларын эзләргә кушты бит.

Алга таба эретеп ябыштыручы, корыч коючы кебек эшләргә дә чикләү бетәргә мөмкин. Безнең хатын-кызлар булдыра алмаган эш юк! Некрасов бабай әйтмешли, “кирәк икән, янып торган өйгә дә керә, кирәк икән, чабулап килгән атны да туктата”. Хатын да мин, ир дә мин, дип урам буйлап күкрәк кагып йөрсәк тә, безгә беркем берни әйтә алмый.

Тик мине иң борчыганы эшсез калгач берәр нинди машинист булып китү ихтималы түгел, ә бөтен ил проблемасын хатын-кыз көче белән хәл итәргә маташу. Дәүләт ирләре башына юньлерәк идеяләр кайчан килә башлар икән? Гомумән, без аларны күрербезме икән?

Чыганак: Ватаным Татарстан

Фото: pixabay.com

Запись “Хатын да мин, ир дә мин. Кирәк икән, янып торган өйгә дә керәм…” впервые появилась Tatar Today - татар яңалыклары..

Рамзан Кадыров яулыклы кызларны яклап Русия министрына каршы чыкты

Редактор1 editor1 — Thu, 26 Jan 2017 13:19:27 +0000

Чечня башлыгы Русия мәгариф министрының мәктәпләрдә хиҗап киеп йөрү дөрес түгел дигән сүзләренә гаҗәпләнүен белдерле һәм яулык темасы башка проблемнарны яшерү өчен генә күтәрелә дип саный. //Azatliq.org//

Чечня башлыгы Рамзан Кадыров Русия мәгариф министры Ольга Васильеваның мәктәпләрдә яулык бәйлүне тыюны хуплавы белән килешми.

“Министр җирле җитәкчеләрне дөресләр урынга үзенең “шәхси карашын” миллионлаган кешегә тага. Минем өч кызым мәктәптә укый, яулык ябалар, яхшы билгеләр алалар. Ольга Васильева алардан яулыкларын салуны таләп итәме? Кызлар беркайчан да моны эшләмәячәк”, дип язган Кайдыров үзенең Instagram сәхифәсендә.

http://www.instagram.com/p/BPscjm1gy8-/?taken-by=kadyrov_95

Чечня башлыгы фикеренчә, “яулык темасы җәмәгатьчелекнең игътибарын мәктәпләрдәге башка проблемнардан читкә юнәлтү өчен күтәрелә”. “Наркомания, эчкечелек, укытучыларның балаларның җенси иминлегенә кул сузуы… Менә ниләр борчырга тиеш хиҗап белән көрәшүчеләрне”, ди Кадыров.Чечня җитәкчесе “яулык – атрибутика түгел, ә мөселман киеменең бер өлеше” дип яза.

Сишәмбе матбугат очрашуында Русия мәгариф министры Ольга Васильева Мордовиянең Азюрка авылында мөслимәләргә яулык бәйләүне тыюны хуплавын белдергән иде.

Министр сүзләренчә, тирәнтен ышанган кешеләр дини атрибутиканы беренче урынга куярга тиеш түгел, бигрәк тә мәктәптә.

Запись Рамзан Кадыров яулыклы кызларны яклап Русия министрына каршы чыкты впервые появилась Tatar Today - татар яңалыклары..

Баланы районда табарга ярамый диләр, ә тулгагы башланган хатыннар кайда барыр? [министр белән видео]

Редактор1 editor1 — Fri, 16 Dec 2016 16:12:20 +0000

Татарстан сәламәтлек саклау министры Гадел Вафин сигез районда бала табу урыннарының ябылуы әниләр һәм бәбиләр үлемен киметү өчен эшләнде дип белдерә. Балалар табибәсе Рафия Аксакова фикеренчә, табу урыннары ерагайган саен риск артырга мөмкин. //Azatliq.org//

Татарстанда Мөслим, Апас, Югары Ослан, Балык Бистәсе, Кайбыч, Кама Тамагы, Чирмешән, Яңа Чишмә район үзәкләрендәге хастаханәләрдә бәбиләү урыннары ябылды. Татарстан сәламәтлек саклау министры Гадел Вафин бу әниләр һәм бәбиләр үлеме кимесен, хатын-кызлар яхшырак дәрәҗәдәге урыннарда күренергә йөри алсын һәм бала тапсын өчен эшләнде дип белдерә.

Аның сүзләренчә, республикада авырлы хатын-кызларның 40 проценты сәламәт бала таба, калганнарында исә ниндидер җитешсезлекләр була тора. Әнә шул сәбәпле Вафин бала тапканда куркыныч туу мөмкинлеге булган урыннарның ябылуын һәм 1 декабрьдән әлеге сигез районнан хатын-кызларның техник яктан да яхшырак җиһазланган, яхшы табиблар да эшләгән районара табу һәм күренү үзәкләренә килә башлаганын белдерә. “Уңышлы бәбиләүне 95 процентка җиткерү өчен тырышабыз”, ди министр.

Вафин сүзләренчә, ябылган урыннарда атнага 1-4 бала туып торган һәм бу күрсәткеч түбән. Авырлы ханымнарны табу урыннарына илтү өчен һәр районга яңа машина бирелүен дә әйтә ул.

Министр, бәбиләү урыннары ерагайгач, көтелмәгән хәлләр булу мөмкинлеген дә кире какмый.

“Була, була. Көтелмәгән хәлләр дә була. Йөрәк, шикәр, бөер авырулы хатын-кызлар арта бара. Дөрес күзәтү булырга тиеш. Хатын-кызлар консультациясеннән аларны икенче, өченче дәрәҗәдәге (яхшырак – ред) консультация урыннарына вакытында җибәрергә тиешләр. Без хәзер республикада яңа мәгълүмати система кертәбез, куркыныч туу (риск) мөмкинлеге булганнар икенче һәм өченче дәрәҗәдәге урыннарга барачак. Безнең максат – әниләр үлемен һәм шулай ук нәниләр үлемен дә киметү”, ди Вафин.

Бәбиләү урыннары ябылган районнардагы авырлы хатын-кызлар хәзер 30-100 чакрым ара үтеп күренергә йөрергә һәм бала табарга барырга тиеш булачак.

Арча хастаханәсенең балалар табибәсе Рафия Аксакова фикеренчә, ерак арага йөрү рискларны арттыра.

“Үзем дә дүрт бала әнисе буларак, әйтеп узасым килә, күзәтелү урыннары ераграк булган саен, йөрү кыенрак. Авырлы хатын-кыз табиблар кулына ничек тизрәк барып җитә – шулкадәр әйбәтрәк булачак дип саныйм. Мин үзем шуның аша кичкән кеше.

Сүз дә юк, ара ерагайган саен рисклар арта. Хатын-кыз вакытыннан соңрак килә икән, аңа операция ясала. Бу – хатын-кызның хәлен авырайта дигән сүз. Бала су йота калса, су китеп һава җитми башласа, туганнан соң үпкәсе кабарырга мөмкин. Мондый очраклар була калганда, безгә, балалар табибларына ул балаларны дәвалау да авыррак була”, ди Аксакова.

Татарстан сәламәтлек саклау өлкәсендә эшләүчеләрнең һөнәр берлеге рәисәсе Гөлнур Хөснетдинова фикеренчә, бәбиләү урыннары акча кытлыгы сәбәпле ябылган.

“Сентябрь аенда Казанда РКБда заманча җиһазлар белән бик яхшы перинаталь үзәк ачылды, әмма сәламәтлек саклауны финанслау арттырылмады. Әнә шул сәбәпле, бала табу урыннары оптимизациягә эләкте. Алга киткән илләрдә тулаем җитештерү күләменнән сәламәтлек саклауга 6 процент бирелә, безнең илдә 3 кенә процент”, диде Хөснетдинова “Вечерняя Казань”га.

Запись Баланы районда табарга ярамый диләр, ә тулгагы башланган хатыннар кайда барыр? [министр белән видео] впервые появилась Tatar Today - татар яңалыклары..

Камал театрының юбилеена гади тамашачы белән бергә министр, кинорежиссер, атказанган артистлар да киләчәк [видео]

Редактор1 editor1 — Fri, 16 Dec 2016 08:55:44 +0000

Хөрмәтле театр сөючеләр! 22 һәм 23 декабрьдә Г.Камал исемендәге Татар дәүләт Академия театры 110-еллык юбилеена багышланган тантаналы бәйрәмгә чакыра! Россиянең иң олы милли театрларының берсе булган Г.Камал театры сәхнәсендә тамашачыларны татар театрының тарихы һәм бүгенгесе белән истәлекле очрашулар көтә. Урын һәм бәяләрне дә алдан интернет аша гына сайлый һәм түли аласыз.

Камал театры юбилее уңаеннан, театрны яраткан һәм һәрдаим спектакльләрне калдырмыйча йөреп торган кадерле кунаклар, тамашачылар рәхмәт сүзләрен видеога яздырганнар.

Запись Камал театрының юбилеена гади тамашачы белән бергә министр, кинорежиссер, атказанган артистлар да киләчәк [видео] впервые появилась Tatar Today - татар яңалыклары..

Экология министры Казан күлләрендә көзен дә үлгән балык-үрдәкләр өчен җавап тотты [видео]

Габдулла Тукай — Sat, 10 Sep 2016 11:06:54 +0000

Татарстан елга-күлләрендә көзгә кергәч тә балык-үрдәкләр үлүеннән экологлар да, республиканың экология министры да хәбәрдар. Министр Фәрит Абдулганиев журналистларга бу хәлне агулы матдәләр белән аңлатса да, моның өчен кем җаваплы булуы әйтелмәде, күлләрне чистарту мөмкинме дигән сорау да ачык калды. //Азатлык радиосы//

Казан һәм Татарстан елга-күлләрендә балыклар үлүен, Чуйков урамындагы күлнең яр буен күсе басуын, Җиңү паркындагы күлдә дә күпләп балыклар үлеп, тирә-якка авыр үлек исе таралудан соң чират башкаланың Харовое күлендә ничә ел дәвамында кышын да җылы якка китмичә яшәгән үрдәкләргә җиткән, алар да үлә башлаган.

Татарстанда Парк һәм скверлар елы кысаларында төзекләндерелгән әлеге күл өсте суүсемнәреннән ямь-яшел төскә кергән. Сулыкның ярга якын җирләрендә алюминий һәм пыяладан сыра шешәләрен күрергә мөмкин. Үрдәк мәетләре исә су өстендә йөзеп йөри.

Татарстан сулыкларында балыкларның үлүе быел гына күзәтелми. Мондый хәл алдагы елларда да булган, әмма бу кадәрле балык, үрдәкләрнең үлүе республикада беренче тапкыр күзәтелә икән. Эколог Нәфисә Минһаҗева фикеренчә, бу һәлакәт сулыкларда эссе һава шартларында яшкелт-зәңгәр суүсемнәр барлыкка килү белән бәйле.

Нәфисә Минһаҗева

“Әлеге үсемлекләр 0,5-1 метр тирәнлектә үрчи һәм шуның нәтиҗәсендә су өсте “чәчәк ата”. Әлеге үсемлекләрдән микотоксиннар бүленеп чыга һәм алар балыкларга, үрдәкләргә, хәтта кешегә дә тәэсир итәргә мөмкин. Әлеге суны йоткан очракта, агулану ихтималы бар”, диде ул Азатлыкка.

Нәфисә Минһаҗева сулыкларның пычрануын, табигый юл белән чистарына алмавын Казансу яр буйларына ком салу, яр буйларына бетон түшәү нәтиҗәсе дип атый. Бу шулай ук суга пычрак матдәләр эләгүгәдән дә килеп чыга ди.

“Елганың яр буйларына ком һәм таш түшәлгәнлектән, түбән агымда хәзер Казансу елгасы бик сай. Суда сазлык үсемлекләре булмау да үзен сиздерә. Чөнки әлеге үсентеләр миротоксиннарга каршы тора алырга сәләтле”, ди Минһаҗева.

Хоровое күлендәге очракка килгәндә, эколог монда суүсемнәрнең артык күп булуы һәм аларның кислородны бетерүе белән аңлата. Мондый хәл килеп чыкмасын өчен, Нәфисә ханым сулыкларны пычратмаска, яр буйларына бетон түшәмәскә киңәш итә. Әгәр суүсемнәре күбәеп, су өсте “чәчәк ата” башлаган икән инде, сулыкларны кислород белән баетырга кирәк ди.

“Бу мәсьәлә дөньяда 1950нче елларда ук калкып чыккан иде, шуңа да әлеге өлкәдә дөньякүләм тәҗрибә шактый зур. Европаның көньягында, Украина җирләрендә СССР вакытында ук әлеге проблемга каршы көрәш алып барылды. Бездә дә, сулыклар шул дәрәҗәгә килеп җитмәсен өчен, су саклау зоналарын контрольдә тоту белән ныклап шөгыльләнергә кирәк”, ди белгеч.

Сүз уңаеннан, шушы көннәрдә генә экологлар балыклар үлгән күлләрдәге суны тикшерде. Нәтиҗәләр күрсәткәнчә, су нормада, көнкүреш калдыклары агызу күзәтелмәгән. Әмма балыклар үлү дәвам итә һәм бу хәлдән Татарстанның экология министры хәбәрдар.

“Быел сез үзегез дә күзәтеп торгансыздыр, һава торышы эссе иде. Кояшлы көннәрдә суның температурасы 25 градустан артты. Цианопсик матдәләр суда булу сәбәпле, балыкларның үлүен күрдек. Күреп торасыз, бүген суның температурасы төште, бу фактлар да азайды. Балык, үрдәк үлүгә зәңгәр-яшел суүсемнәр черү, шуның аркасында кислород йотылу һәм сероводород бүленеп чыгу сәбәп булып тора”, диде Азатлык хәбәрчесенә экология министры Фәрит Абдулганиев. Моңа каршы чаралар күреләчәкме, күлләрне чистарту мөмкин эшме дип сорый башлауга министрлыкның матбугат сәркәтибе Айгөл Әмирова сүзне бүлеп, “Министрга ашыгыч рәвештә китәргә кирәк, бу сорауларга башка белгеч җавап бирер, министрлыкка килегез”, диеп китеп бардылар.

Запись Экология министры Казан күлләрендә көзен дә үлгән балык-үрдәкләр өчен җавап тотты [видео] впервые появилась Tatar Today - татар яңалыклары..

Авыл хуҗалыгы министры Марат Әхмәтовның Мәскәүгә китү-китмәве билгеле булды

Редактор1 editor1 — Wed, 31 Aug 2016 16:18:29 +0000

17 ел дәвамында Татарстанның авыл хуҗалыгы министры булган Марат Әхмәтов Русиянең Дәүләт думасына депутат булып китәчәк. Бу хакта Татарстан Президенты Рөстәм Миңнеханов үзе хәбәр итте.

Рөстәм Миңнеханов авыл хуҗалыга министры эшен дәвам итәргә 5-6 кеше теләк белдергәнен дә әйтеп узды.

Алар арасында авыл хуҗалыгы университетында белем алган, 15 ел дәвамында Актаныш районы башлыгы булып торган, хәзер мәгариф һәм фән министры Энгель Фәттәхов.

Икенче кандидат – Татарстан авыл хуҗалыгы фәнни-тикшеренү институты директоры Марсель Тагиров. Әлеге институт нигезендә ел да “Кыр көннәре” уза. Шуны да әйтергә кирәк, Марсель Тагиров ике ел дәвамында Марат Әхмәтовның урынбасары булып торган.

Марат Әхмәтовның хәзерге урынбасарлары да министр эшен дәвам итә ала. Мәсәлән, 33 яшьлек Марат Җәббәров.

Лаеш районы башлыгы Михаил Афанасьев та эш урынын алмаштырырга мөмкин дигән фараз бар. Михаил Афанасьев Марат Әхмәтов кебек Казан дәүләт ветеринария медицинасы академиясен тәмамлаган.

“Рөстәм Миңнеханов әле үзе дә яңа министрның кем булуын хәл итмәгәндер дип уйлыйм. Чөнки Марат Әхмәтов кебек җитәкчене табу шактый авыр,” дип фекерләре белән бүлеште Русия Дәүләт Думасының Аграр мәсьәләләр комитеты рәисенең беренче урынбасары Айрат Хәйруллин.

Вечерняя Казань

Фото: realnoevremya.ru

Запись Авыл хуҗалыгы министры Марат Әхмәтовның Мәскәүгә китү-китмәве билгеле булды впервые появилась Tatar Today - татар яңалыклары..