Архивы музыка - Tatar Today - татар яңалыклары.

Татар музыка белгече Мәхмүт Нигъмәтҗанов 90 яшендә безнең арадан китеп барды… [видео]

kadria — Tue, 04 Aug 2020 14:11:01 +0000

4 август Мәхмүт Нигъмәтҗанов 90 яшендә вафат булган. Мәрхүмне Осиново бистәсе зиратында, хатынының әниләре янына җирләгәннәр.

Казанда музыка белгече, профессор, фольклорчы галим, Татарстанның атказанган сәнгать эшлеклесе, Габдулла Тукай исемендәге Дәүләт бүләге лауреаты, сугыш ветераны Мәхмүт Нигъмәтҗанов 90 яшендә вафат булган.

“Соңгы атнада хәле бик авыр иде. Бүген төнлә китеп барды. Иртән Осиново бистәсе зиратына җирләдек. Үзе шулай әйтеп калдырды. Ул зиратта минем әниләр җирләнгән”, дип сөйләгән галимнең тормыш иптәше Альбина ханым Татар-информга.

Мәхмүт Нигъмәтҗанов татар халык музыкасы белгече, халык көйләрен, җырларын экспедицияләргә йөреп туплаган, өйрәнгән, алар турында фәнни хезмәт язган галим. Казан музыка училищесында укыта, 1984-2003 елларда Казан педагогика университетының татар музыкасы һәм халык музыка уен кораллары кафедрасы мөдире була. 1960-67, 1974-84 елларда Галимҗан Ибраһимов исемендәге Тел, әдәбият һәм сәнгать институтының фәнни хезмәткәре.

1967–1973 елларда Мәхмүт Нигъмәтҗанов Габдулла Тукай исемендәге Татар дәүләт филармониясенең сәнгать җитәкчесе булып эшли.

Галимне татар музыкасының сыйфаты, аның киләчәге проблемнары борчый. 2017 елда ул “Милләтем чын сәнгатькә лаек” дигән исем астында зур күләмле хезмәт бастыра.

2016 елда Азатлык белән әңгәмәсендә Мәхмүт ага “Салих Сәйдәшев белән аралашып яшәдек, Заһид Хәбибуллин, Рөстәм Яхин кебек шәхесләр иң якын дусларым булды” дип сөйләгән иде. Ул татар җәмгыятенең рухи кыйбласы җуелуына, консерваториядә милли җанлы укытучылар калмавына борчылуын белдерде.

Видео Азатлык радиосы сайтыннан

Запись Татар музыка белгече Мәхмүт Нигъмәтҗанов 90 яшендә безнең арадан китеп барды… [видео] впервые появилась Tatar Today - татар яңалыклары..

Алия Карачурина «бәхетле кояшы»н эзли [видео]

Чулпан — Thu, 04 Jan 2018 19:56:18 +0000

Ришат Төхвәтуллин төркемендә иҗат итүче җырчы кыз Алия Карачурина үзенең тәүге клибын тәкъдим итте. “Син кемнең бәхетле кояшы” җырына төшерелгән видеоклипны сезгә дә тәкъдим итәбез. //Tatar today//

Запись Алия Карачурина «бәхетле кояшы»н эзли [видео] впервые появилась Tatar Today - татар яңалыклары..

Җырчы Иркәнең кызы Брамс, Рихтер сыман даһи пианист булмакчы [видео]

Редактор1 editor1 — Fri, 03 Mar 2017 18:34:30 +0000

“Карлыгачта хәбәрем юк” дип җырлаучы Иркәнең кызы Әминә әнисе кебек иҗат юлыннан китәргә тели, ахрысы.

Бүген Иркә үзенең Инстаграмдагы битенә түбәндәге видеоны элә. Видеодан күренгәнчә, аның кызы Әминә яшь җырчы Рамил Әйметдиновны пианинода уйнап җырлата. Болайга барса, берничә елдан Әминәне даһи композиторлар рәтендә күрергә насыйп булыр.

View this post on Instagram

A post shared by Иркә | Певица (@irke_official)

Запись Җырчы Иркәнең кызы Брамс, Рихтер сыман даһи пианист булмакчы [видео] впервые появилась Tatar Today - татар яңалыклары..

Oscar & c7c5 төркеменең Камалда “Буяулар” тамашасы ничек үтә?

Редактор1 editor1 — Fri, 21 Oct 2016 18:23:01 +0000

(Казан, 21 октябрь, “Татар-информ”, Гөлүзә Гыймадиева). Кичә Казанда ирекле татар музыкасы тарафдарлары Oscar & c7c5 татар төркеме башкаруында концертын арады. “Буяулар” дип аталган әлеге программа перфоманс рәвешендә әзерләнгән иде.

Программаның сценаристы Рәдиф Кашапов сценарийны Ирек Мусин, Ленар Әхмәтов, Ирина Антонова, Хәмзә Шәрипов, Альфрид Шәймәрданов һәм башка татар рәссамнарының фикер, хис-кичерешләренә нигезләнеп язган. Программаның нигезен рәссамнарның картиналарына тәгаенләнгән монологлар тәшкил итте. “Бу концерт-спектакль рәссамнарның һәм киң мәгънәдә артистларның эчке дөньясына багышланган. Концерт барышында актерлар документаль моноглардан өзекләр укый. Һәрбер монолог реаль шәхестән яздырып алынган. Мәсәлән, бу юлы бездә Татарстан рәссамнары. Алар арасында яшьләр дә, олылар да, ирләр дә, хатыннар да, рус теллеләр дә, татар теллеләр дә бар. Гомумән, күптөрле юнәлеш вәкилләре. Без аларның истәлекләреннән, хикәяләреннән бер тәмамланган фикер чыгарырга булдык”, – дип сөйләде тамашаның режиссеры һәм продюсеры Ильяс Гафаров.

Концертны К.Тинчурин исемендәге Татар дәүләт драма һәм комедия театры артистлары Гүзәл Галиуллина һәм Зөлфәт Закиров алып барды.

“Бу проектны без үзебез уйлап чыгардык. Уйлап чыгару авыр да түгел, кешесе генә кирәк. Рәссамнәр белән танышып, без шушы чараны берләштердек. Аларның ризалыгы белән рәсемнәрен алдык. Шул картиналарга карата үзебезнең җырларыбызны чиратлаштырдык”, – дип уртаклашты Oscar & c7c5 төркеме солисты Оскар Юнысов.

Концерт-перформанс җанлы яңгырашта үтте. “Җанлы тавыш белән җыр башкару татар эстрадасында киң таралмаган икәнен һәрберебез белә. Бөтен дөньяда, Россияда ул бер стандарт булып санала һәм әгәр дә без үзебезнең мәдәниятебезнең үсешен телибез икән, без югары стандартларда эшләргә тиеш, алардан түбән төшәргә ярамый. Бу стандартны без күтәрмибез. Татарларда да мондый матур үрнәкләр бар. 10 ел элек Г. Камал театрының зур залында матур яңгырашлы җанлы музыка фестивале үткән иде. Зөлфия Камалова, Әнвәр Измайлов, Дәниз Бәдретдин һ.б. катнашында. Менә шундый кешеләр безне илһамландыра”, – дип сөйләде Ильяс Гафаров.

Оскар Юнысов үзе исә җанлы тавыштан башка икенче тавышны белмим, ди. “Башканы якын да күрә алмыйм, чөнки җанлы музыка – ул ихласлык. Һәрбер төркем үзенчәлекле. Һәрбер концерт төрлечә үтә. Һәрбер җырчы үз нотасын үзенчә ала. Шуны берләштергәндә мондый музыка туа”, – дип аңлатты ул.

Ильяс Гафаров әйтүенә караганда, Oscar & c7c5 төркеме стилен, гади итеп әйткәндә, татарча рок дип атарга мөмкин. “Алар үзләренең музыкаларына рокның барлык төрләрен сеңдереп баралар”, – ди ул.

Оскар исә үз иҗат юнәлешен ул берничек тә атамый. “Без җырлыйбыз гына, ә аны кеше атый. Һәрбер кешенең үз юлы. Мин халык җырларын да бик хөрмәт итәм. Кеше күрмәгәндә мин аларны җырлыйм да. Ул җырларны җырлар өчен артистларыбыз бар һәм алар җырласыннар, ә минем үз юлым”, – ди ул.

Концерт-перформанска җыелган даирә арасында тамашачыларның күбесе яшьләр иде.

Татар тамашачысын Ильяс Гафаров ялкау дип атады. “Аларның һәрберсенә шушы чара турында аерым аңлатып тормасаң, кешеләр таралышып бетә, ләкин бу чарага килгән кешеләр үкенмәсләр дип ышанасы килә”, – диде ул.

Запись Oscar & c7c5 төркеменең Камалда “Буяулар” тамашасы ничек үтә? впервые появилась Tatar Today - татар яңалыклары..

“Вконтакте”да җырларны тыңлаган өчен акча түләргә туры киләчәк

Редактор1 editor1 — Wed, 20 Jul 2016 06:52:16 +0000

“Вконтакте” социаль челтәрендә аудиоязмалар бүлеге кулланучылар өчен түләүлегә әйләнәчәк.

Дөрес, яраткан җырларыңны бушка да тыңларга була. Ә җырларны үз шәхси битеңә куша башласаң, акча түләргә тиеш буласың.

“Башкаручыларны яратасыз икән, аларга ярдәм дә итәргә тиешсез. Музыкантлар безне яңа иҗат җимешләре белән сөендерсен өчен, акча да эшләргә тиеш бит. “Вконтакте” челтәрендә моның өчен бер чынаяк кофе бәясе генә акча түләргә туры киләчәк”, – дип белдергән “Warner Music Group”ның Россиядәге генераль директоры Александр Блинов.

Аудиоязмаларны түләүле итү ел азагына кадәр кертелергә тиеш. Мөгаен, айлык түләү системасы кулланылыр.

Интертат

Запись “Вконтакте”да җырларны тыңлаган өчен акча түләргә туры киләчәк впервые появилась Tatar Today - татар яңалыклары..