Мәдәни сулыш, сәнгать дәрьясының, әдәбият, музыка әсәрләренең киләчәге күпләрне борчый. Әмма әлеге төшенчәләр үзебезнең карамакта. Тамашачы булганда гына тамаша да бар, алар икесе дә тыгыз бәйләнештә һәм аерылгысыз! Хикмәт, әдәби-мәдәни чараларда, нәфис кичәләрдә, спектакль-тамашаларга еш йөргән, үз иткән кешенең күзаллавы, тел байлыгы, галәмгә карашы да киң һәм тулы була.
11 сентябрь көнне без дә бер төркем фикердәшләр, шул исәптән “Рәйхан” клубы, “Чакмагыш чаткылары” әдәби берләшмә әгъзалары Уфаның “Нур” театрының “Көзге моңнар” концерт программасында булып кайттык. Театральләштерелгән зур һәм күркәм концерт тамаша һичбер кечкенә спектакльдән ким булмады. “Нур”ның, Башкортстанның йөзек кашлары чыгышлары дәррәү алкышларга лаек булды. “Мәдәни шимбә” чарасы гүзәл җырлар, нәфис шигъри юллар белән үрелеп барды.
Гомумән, Россия буенча игълан ителгән “Мәдәни шимбә” проектлар комплексы бик эчтәлекле үтте, күпләргә матур, күтәренке кәеф бүләк итте.
Юлай Низаев.

Запись Башкортстан “Нур”ында “Мәдәни шимбә” гөрләде [фотолар] впервые появилась Tatar Today - татар яңалыклары..

Шушы көннәрдә Казанның “ГоркиПарк” сәүдә үзәгендәге “Облепиха” кафесында, авариядән соң инвалидлар арбасына утырырга мәҗбүр булган, Миләүшә Зарипова белән очрашу узды. Хәзерге вакытта Миләүшә ханым актив тормыш алып бара, үзенең мисалы белән кешеләргә ярдәм итә, моңа өстәп, ул эшмәкәр, хатын, әни дә. Әлеге очрашуда ул интернетта әйтеп бетермәгән серләрен чиште, сорауларга ачыктан-ачык җавап бирде. Теләгән һәрбер кеше аның белән аерым аралашты.

Беренче тапкыр күргән кунакларын да Миләүшә Зарипова кочаклап, ачык йөз, тәмле сыйлары белән каршы алды. Интернетта күрешүләрен сорап язучылар күп булганлыктан, мондый очрашуны үткәреп карарга була ул. Дуслары да бу фикерен хуплап, оештырырга ярдәм итә. “Бер генә кешегә ярдәм итә алсам да, бу минем өчен зур шатлык. Ә миннән ярдәм сорап бик күпләр яза. Инвалидлар түгел, таза-саулар ярдәм сорый”, диде. “Әлбәттә, начар фикер белән тегеләй дә, болай да бәйләнеп караучылар бар. Мин андыйларга игътибар итмим”, дип уртаклашты.

View this post on Instagram

A post shared by ⚡️TATAR TODAY агентлыгы⚡️🌍 🔊📺 (@tatar_today)

Бүгенге көндә дөньясы җитеш, байлык артыннан кумый Миләүшә ханым. Күптән түгел  “Безбарьерная среда” исеме астында коммерцияле булмаган фонд оештырган. “Лотореяга акча отсам, шушы фонд аша инвалидларга ярдәм итәр идем”, диде ул.

Очрашуда ире Мөнир белән мөнәсәбәтләре турында да сүз булды. Аның аралашучан булмавын, мондый очрашулар яратмавын, интернетта блог алып баруын да өнәп бетермәвен әйтте.

Миләүшә Зарипова кызы Алия белән бәйле сорауларга да җавап бирде. Аны артык иркәләмәве һәм ул тугач нинди куркулары барлыкка килүе турында сөйләде. “Бүгенге көндә кызым мул тормышта яшәгәнен аңлап бетерми. Мин аны артык иркәләмим, ул сораган әйберләрне дә алып бетереп бармыйм. Мәктәптә дә артыгын киендермим”, дип сөйләде әни кеше.

Бала тапкач, яшь әни куркып калган була. Баласы үсәр дә, аннан кыенсыныр, “Әни белән беркая бармыйм”, дип әйтер, дип борчыла. Шуңа күрә дә, кызына 3 яше тулуга, вокалга, конкурсларга йөри башлыйлар. Алия: “Әни, бөтен җиргә синең белән генә йөрер идем, синең белән генә барыр идем”, ди.

“Әгәр хәзер дә берәр җиргә барсак, “Бу минем әнием. Ул – иң матуры”, ди. Бу вакытта миннән дә бәхетле кеше юк”, дип уртаклашты Миләүшә ханым.

Ул кызының мәктәп чараларында да актив катнаша. Күптән түгел узган ата-аналар җыелышыннан соң, үзенең ник коляскада утырганлыгы турындагы сорауларга кызының ничек җавап бирүе турында кызыксына. “Юк әнием, нишләптер сорамадылар ул турыда. Кызык, ни өчен сорамыйлар икән?” , диеп әйтеп куя кызы.

Шулай да бер вакыт Миләүшә ханымның ни өчен инвалидлар арабасында утырганлыгын кызыннан кибеттә сорыйлар. Ә Алия: “Авариягә эләккән, күрмисең мени?”, дигән җавап кайтара. Әнисенең коляскада булуына кызы игътибар да итми икән.

Язмыш сынавына бирешмичә, үз тырышлыгы белән бәхетен корган, актив тормыш алып баручы ханым, бер кешегә дә ачу сакламый, рәнҗеми. “Минем әбием шундый булды. Шунда ук кешене сүгеп атар иде дә, аннан, “Әй, кердең мени, җаным”, дип кочаклап алыр иде. Мин дә нәкъ шундый”, дип белдерде ул. Әлбәттә, андый вакытлары да булган. Бүлмәдә торган вакытта күршесенә, бертуганнарына рәнҗегән, әмма хәзер барсын да гафу иткән.

Якынча 5 сәгатькә сузылган очрашуда бик күп темалар күтәрелде. Мондый очрашуларны Миләүшә Зарипова алга таба да үткәрергә уйлый. Монысын күреп, киләсе юлы күбрәк кеше килергә батырчылык итәчәгенә ышана.

Фото Гөлнара Габдуллина

Запись Миләүшә Зарипова кызын тапкач, нәрсәдән курыккан? Кешеләргә нинди юллар белән ярдәм итә? [видеорепортаж] впервые появилась Tatar Today - татар яңалыклары..

Яшьләрне һәр ике ел саен узучы вакыйга – Бөтендөнья татар яшьләре форумы җыйный. Әлеге форум быел 8 нче тапкыр уздырыла. Бөтендөнья татар конгрессы сайтында: “Форумда халкыбызның телен, мәдәниятен саклау һәм үстерү, яшь буынның милләтебезнең үзенчәлеген саклауда тоткан роле каралачак”, – дип хәбәр ителә.

Форумга 30 чит илдән, Россиянең 60 төбәгеннән, Татарстанның районнарыннан яшьләр чакырулы. Алар тел,милләт мәсьәләләрен, үз төбәкләрендәге татар яшьләре оешмаларының эшчәнлеге турында фикер алышып, тәҗрибә уртаклашып кына калмаячаклар, ә Казанның, Татарстанның истәлекле урыннарына да сәяхәт кылачаклар, Теләче, Саба, Арча, Балтач районнарында кунак булачаклар.

Фото: nazaccent.ru сайтыннан

Запись Казан кабаттан дөньякүләм кунаклар кабул итә впервые появилась Tatar Today - татар яңалыклары..

Күзләребез очрашкач, тетрәнеп киттем: Ходаем, Рәлиф ич бу! Курсташым Рәлиф! Кеше үзе никадәр үзгәрсә дә, күз карашлары үзгәрми икән. Һаман да шул, эчеңә үтеп, төбәп карый торган коңгырт күзләр…

Әй Рәлиф, Рәлиф! Нәрсә булды, дөнья нишләтте сине? Безнең курстагы иң шәп егетләрнең берсе идең бит син!

– Рәлиф?!

Ир мине танымаган рәвеш чыгарып, адымнарын кызулатты. Юк инде, апаңнан алай җиңел генә котылырмын димә. Йөгереп диярлек барып, каршына төштем:

– Син бит бу, Рәлиф?!

Рәлиф теләр-теләмәс кенә тукталып, битараф карашы белән миңа төбәлде:

– Бәлки. Ләкин бу исем җисеменә туры килми инде хәзер.

Ул яңадан китәргә талпынды. Кулларымны сузып, янә туктаттым.

– Тукта инде, Рәлиф. Әйдә, менә бу кафега кереп утырыйк әле бераз.

Рәлиф кесәсеннән тәмәке алып кабызды, берничә тапкыр йотлыгып суыргач, читкә карап “черт” итеп төкереп куйды:

– Кафеларга кереп сыйланып йөрергә… Акча юграк чак әле.

– Үзем сыйлыйм!

– Хе! Хатын-кыз чутыннан ашап йөрергә… Син мине бөтенләй бетереп үк ташлама инде.

– Нишләп бетереп ташлыйм ди?! Тормышта төрле вакыт була инде ул. Икенче юлы син мине сыйларсың. Күптән күрешкән юк бит, бераз сөйләшеп утырыйк дигән идем.

Дәлилем саллы булды ахры, Рәлифнең йөзенә “ярый соң алай булгач” дигән кыяфәт чыкты. Якындагы кафега кереп утырдык. Очрашу хөрмәтенә алган нәрсәне бераз тотып куйгач, Рәлифемнең теле ачылды. Эчен бушатасы килгәндер күрәсең. Яңадан тәмәке алып кабызды да, күзләрен каядыр читкә төбәп, сөйли башлады:

– Их, Илһамия. Үз бәхетен үзе җимергән кешене күргәнең бармы синең? Булмаса, күр! Менә, синең каршыңда утыра ул ахмак бәндә!

Әйткәнемчә, Рәлиф курста иң күзгә күренгән егетләрдән иде. Күп кызлар, шул исәптән үзем дә бик ошатып йөрдек аны. Әмма Рәлиф Зәлиядән башка беркемгә дә карамады. Институтта аларга сокланмаган кеше юк иде. Икесе дә бик актив студентлардан булып, бәйрәм-кичәләрдә сәхнә күрке булып парлап биеп, җитәкләшеп дигәндәй, гел бергә йөрделәр. Бишенче курста укыганда студент туе ясап, өйләнешеп тә куйдылар. Биш елдан соң очрашуга килгәндә – бер, ун елдан соң очрашканда ике кызлары бар иде инде. Фотоларын күрсәтә-күрсәтә, горурланып сөйләштеләр. Тормышларыннан да, эшләреннән дә канәгать иделәр: өч бүлмәле фатир, аннан машина алганнарына куанып бетә алмадылар. Очрашу кичәләребезне ямьләп, парлы матур биюләрен дә бүләк иттеләр. Быел институтны тәмамлавыбызга унбиш ел була, тагын күрешербез әле дип йөри идем. Әллә күзләр тидеме икән үзләренә?!.. 

– Әле өч ел элек кенә миннән дә бәхетле кеше юк иде бит, – дип сүзен дәвам итте Рәлиф. – Янымда сөйгән хатыным, яраткан балаларым, лаеклы эшем, менә дигән фатирым – тагы нәрсә кирәк җирдә адәм баласына! 

Рәлиф бармакларын пешерә башлаган тәмәкесен көл савытына басып сүндерде дә, шунда ук икенчесен алып кабызды. Мин дәшми генә сүзнең дәвамын көттем.

– Сөйгән кешең белән арага хыянәт җиле керүдән дә авыр хәл юк икән. Хыянәт тә түгел әле, яраткан кешеңне ахмакларча көнләшү харап итте.

– Уф, Рәлиф,– дидем мин. – Ә мин әллә нәрсәләр уйлап бетердем: үлем-китем белән бәйле фаҗигалар күз алдыма килеп китте. Зәлия сиңа хыянәт итә торган кешеме соң инде? Килешерсез!

Рәлиф бер ноктага төбәлеп, шактый гына сүзсез утырды. “Каян кысылдым инде, кеше үз җае белән сөйли иде бит” дип, үземне эчтән генә битәрләп утыра башлагач кына кабат сөйләп китте:

– Зәлия белән авылдашлар икәнебезне беләсеңдер инде. Без аның белән мәктәп эскәмиясеннән бирле бергә. Ул көнне авылдагы абыйларга ашка кайткан идек. Кунаклар парлап килә тора: хатын-кыз эчкә үтә бара, без – ир-атлар, тәмәке көйрәтеп, тегене-моны сөйләшеп таптанабыз. Минем Зәлия дә шунда аш-су әзерләүчеләргә булышып йөри. Бераздан безне дә өйгә керергә чакырдылар. Башкаларны үткәреп, арткарак калганмын икән. Аргы урам Нәҗип җиңемнән тотып, читкә дәште. Әйтер сүзе бар, имеш:

– Ну, малай, кайнар да икән Зәлияңнең кочагы! Гомерләрең рәхәттә үтә икән, мала-ай!

Ярым пышылдап шул сүзләрне әйтте дә, тиз-тиз өйгә кереп тә китте. Мин тораташ шикелле баскан урынымда катып калдым. Башта бөтен тәнемне пешереп, кайнар дулкын йөгереп узды. Шабыр тиргә төштем. Аның артыннан өстемә бозлы су сипкән кебек булып, өшетеп җибәрде. Тешләр тешкә тими, калтырата ук башлады. Ул арада яңадан теге кайнар дулкын китереп бәрде. Шул кайнарлык белән өйгә бәреп керсәм, Зәлиям кухня яктан аш тулы тәлинкә күтәреп чыгып килә. Каршына басып кулыннан тәлинкәсен алдым да, кайнар ашны йөзенә сибеп тә җибәрдем. Зәлиям ачыргаланып йөзен каплап, башкалар ах-ух килеп калдылар, мин башымны югары күтәреп, горур басып өйдән чыгып киттем: булдырдым бит, молодец!..

Рәлиф башын иеп бераз тын утырды. Аннары чираттагы тәмәкесен алып кабызды да, сүзен дәвам итте:

– Ачу алдан, акыл арттан йөри диләр. Нәҗипнең мәктәп елларыннан бирле Зәлиягә гашыйк икәнен белми идеммени мин?! Зәлия бит аны түгел, мине сайлады. Һаман ярата күрәсең аны Нәҗип. Кирәк бит, минем кулым белән ничек итеп үч алды. Хәер, ул үзе дә болай ук булыр дип көтмәгәндер. Монда мин ахмак: Нәҗипнең үзен сугып егасы урында…

Рәлиф күз яшьләренә тыгылып, читкә борылды. Бу хәлләрнең нәрсә белән беткәнен бик беләсем килсә дә, дәшми генә сүзнең дәвамын көттем.

– Тормышыңның өстен-аска әйләндерергә, барысын да җимерергә – бер ялгыш адым, бер мизгел җитә икән… Зәлиям озаклап хастаханәдә дәваланып чыкты. Пешкән эзләрдән битендә шадраланып җөйләр калган. Алларына тезләнеп, һәр шадрасын бөртекләп үбәр идем. Тик гафу үтенеп янына күпме генә барып карасам дә, ул мине күрергә дә теләми. “Йөрәгем бик каты пеште, җөйләре төзәлерлек түгел, – ди. Хастаханәдән чыккан көнне үк, өйгә дә кайтып күренмичә, балаларның берсен мәктәптән, икенчесен бакчадан алып, районга китеп урнашкан. Минем кылган кабахәтлекне “этлек” дип бәяләп, хәленә кергәннәр: яшәргә бүлмә биргәннәр. Өч бүлмәле фатирыбызда берүзем яшәп ятам. Әмма Зәлиям белән кызларым булмагач, тормышның ни яме бар?! Эштә дә гамь калмады…

Рәлифнең кабат күз яшьләренә тыгылып, кесәсенә тәмәкегә тыгылды.

– Чү-чү, Рәлиф, – дидем мин тыелып кына. – Бу кыяфәткә калгач, Зәлияң жәлләп кире кайтыр дип көтәсеңме әллә?! Юк инде, мескенлеккә төшкән кешене яратып булмый аны!

Рәлиф миннән башка сүзләр көткән иде ахры. Беркавым аптырап карап торды. Аннары җәһәт кенә урыныннан торды да, бер генә җөмлә ыргытып, җилтерәп чыгып та китте:

– Ә син бит хаклы! Хаклы, шайтан алгыры!

Нишләргә уйлады? Белмим… Әмма йөрешендә элекке Рәлиф: булдыклы, шәп Рәлиф чалымнары чагылып калды. Гафу итәрсең микән, Зәлия? Гаиләгез бәхете бүген синең кулда! 

Зөлфия Мансур

Запись «Үз бәхетен үзе җимергән кешене күргәнең бармы? Булмаса, күр!» впервые появилась Tatar Today - татар яңалыклары..

— И, бер юне дә булмады инде бу ир дигән нәрсәнең, — озак еллар буе гаиләле булып яшәгән ханым шулайрак дип башлый да, ашыкмыйча гына тәмләп кенә хурлагач, беркадәр күңеле булып ахирәтенә төбәлә.

— Менә син ялгыз башың. Ә үзең миннән күпкә бәхетлерәк. Колагыңда алтын алка, өстеңдә затлы тун. Машинаң бар, фатирыңа ремонт ясаткансың… Озак еллар буе ялгыз яшәгән ахирәте аны чын күңелдән кызганып тыңлап тора. Ара-тирә гаҗәпләнүен белдереп, тел шартлатып ала. Шулай да үзенең шатлыгы белән бүлешми түзә алмый.

— Ни бит, мин дә ул кадәр ялгыз түгел бит хәзер… — ахирәтенең гаҗәпләнүен күреп бераз тынып тора да дәвам итә, — Берничә ел инде… Бер кешем бар бит… Нигә әйтмәдең дип… Үзең соң?!. Законлы ирең белән дә бер тапкыр очраштырганың юк бит.

— Соң, аның кешегә күрсәтер җире бар мени?! — дип кул селти тегесе.

— Минекенең бар. Тик четереклерәк нәрсә… Кычкырып йөри торган нәрсә түгел бит, малай, ни бит… Хатыны бар аның, кыскасы. Болай хурлавын хурламый, аерылырга да җыенмый бугай. Миңа ансы бик мөһим дә түгел, иң мөһиме ул мине дә ярата. Минем өчен дә өзелеп тора.

Шуннан бу бик ашыкмыйча гына, тәмләп кенә үзенең сөяркәсен мактый башлый. Бу тиклем мактагач, ахирәтенең дә кызыксынуы арта һәм ул танышу теләге белдерә:

— Һич югы синекенә карап сокланыйм әле бер, таныштыр әле.

— Яхшы, — ди ахирәте, — Ул тиздән шушы тирәдән узып китәргә тиеш.

Көтәләр. Ир боларны искә алмыйча узып китә. Аны күрү белән гомер буе гаилә тормышында яшәгән ханым кычкырып җибәрә:

— Шушымы сөяркәң?! Кит аннан! Бу бит минем ир… Ике ахирәт шул арада көндәшкә әверелә. Ләкин әле көнләшүдән бигрәк, гаҗәпләнү өстенлек итә.

— Ахмак бит ул. Үзе саран, үзе ике йөзле. Белмим, нәрсәсенә исең киткәндер инде, — ди хатыны.

— Юк, син ялгышасың, дип каршы төшә сөяркәсе, — Шундый кыю, зирәк кеше. Саран да түгел ул. Менә алтын алкаларым, йөзегем, туным, машинам.

— Кит инде, юкны сөйләмә. Бәйрәмдә чәчәк тә күтәреп кайта белми бит ул, бичара. Хәтта хезмәт хакының да яртысын гына бирә.

— Юк ла инде, — ди сөяркәсе, — Акыл иясе ул. Аралашу, сөйләшү рәхәт аның белән. Барсын аңлап тора, бөтен эч серләреңне чишәргә була. Аны тыңласаң, яңа дөньялар ачкан кебек буласың.

— Сөйләп торган буласың тагын… — дип мәсхәрәле елмая хатын, — Сүз рәте белә мени ул?!. Һәрвакыт ниндидер эчпошыргыч нәрсә турында мыгырдый. Тыңларлык та түгел. Ә үзе шундый булдыксыз. Беркайчан мине яклашу турында уйламас. Хәтта ярты төнгә калсаң да килеп каршы алмас. Хулиганнар өзгәләп китсә дә аңа барыбер. Ә өйдәге эш турында әйтмим дә инде мин. Чүкеч тотмаганына гына да биш былтыр.

— Алай түгел бит, — дип елмая сөяркә, — Миңа килсә, ул бер генә дә тик тора белми. Кайда нәрсәне төзәтәсе бар, шундук эшләп куя. белмәгән эше юк үзенең. Нәрсәгә тотынса, шул көлеп тора. Бигрәк уңган ир инде! Хатыны бераз гаҗәпләнеп карап тора да башын чайкап куя:

— Карале, син мине үртәр өчен юри шулай сөйләнәсең бугай ул.

— Әле өч көн элек кенә миңа бәйләнеп маташкан егетнең арт сабагын укытты. Көчкә качып котылды теге бахыр. Әйтеп торам бит, ул шундый кыю йөрәкле, юмарт күңелле, акыллы һәм кешелекле.

— Җанымны үртәп торма әле, — дип кул селти хатыны, — Инде ун елдан артык бергә яшим бит, аны миннән дә әйбәтрәк белгән кеше юк. Беткәнбаш инде шунда. Исәпкә бар, санга юк. Нәрсәсенә исең китәдер. Ир кеше буларак та әлләни гайрәте юк бит, ходаем. Атнага бер исенә төшсә ярый инде.

— О, бик хаталанасың, — сөяркәнең тавышында татлы газап чалымнары яңгырап китә, — Бик ялгышасың син…

Шул рәвешле, ике хатын ике төрле сөйли, ике хатын ике ирне күрә. Ә ир – берәү генә. Могҗизалар күп инде бу дөньяда…

Марат Кәбиров

Запись «Менә син ялгыз башың. Ә үзең миннән күпкә бәхетлерәк…» впервые появилась Tatar Today - татар яңалыклары..

Вәлиулла Якупов Татарстанда традицион исламны саклауга, элекке китапларны яңадан нәшер итүгә күп көч куйган шәхес. 1990 елда “Иман” ислам мәдәниятенең яшьләр үзәге дә нәкъ менә аның тырышлыгы белән ачыла. Шушы үзәктә хәзрәт меңнәрчә китап бастыра. Шул ук вакытта ул рус һәм татар телләрендәге төрле матбугат чараларын оештыра, җитәкли. 1992 елдан — «Иман» газетасы, 1993 елдан «Вера» газетасы һәм «Иман нуры» журналы, 1998 елдан «Мусульманский мир» журналы мөхәррире була.

Татар халкында дәрәҗә казанган «Мөселман календаре» еллык басмасының авторы да –Вәлиулла хәзрәт. Әлеге календарь озак еллар йөзләрчә мең тираж белән чыга.

Ислам дине турында интернетта татар телендә мәгълүмат алу мөмкинлеге бөтенләй юк дәрәҗәсендә икәнлеген белеп, Вәлиулла хәзрәт актив рәвештә татарча сайтлар ачу эшен башлап җибәрә. Ул Musulman.su, tayanallaga.ru, muslem.ru дип аталган берничә сайтның хуҗасы булып торган.

Исегезгә төшерәбез: 5 ел элек нәкъ шушы көнне, ягъни 2012 елның 19 июль иртәсендә Вәлиулла хәзрәт үз өеннән чыгып барганда атып үтерелде. Һөҗүмнән соң ул урамга чыгып, аны күрше йорт ишегалдында көтеп торган эш машинасы янына хәтле килә, шунда вафат була.

Раилә ВӘЛИУЛЛИНА

Запись Казанда Вәлиулла хәзрәт Ягъкубны искә алачаклар впервые появилась Tatar Today - татар яңалыклары..

Рөстәм Миңнеханов белән бергә ишегалдын карауда Россия президентының Идел буе тулы вәкаләтле вәкиле Михаил Бабич тә, президент ярдәмчесе Наталия Фишман һәм башка җитәкчеләр дә  катнашты. 

Көн саен ишегалдыңа мондый мәртәбәле кунаклар килми бит, шунлыктан биредә яшәүчеләр түрәләрне урап ала. Күпләр балалары белән истәлеккә фотосурәткә төшәргә сорый. Республика лидеры да, мэр да, Бабич та, әлбәттә, каршы килми.   

Запись Миңнеханов һәм Метшин урамда балалар белән фотога төшеп йөри [фото] впервые появилась Tatar Today - татар яңалыклары..

Россия фән һәм мәдәният үзәге концертлар залында Татарстаннан килгән кунакның тормышы һәм иҗаты турында сөйләделәр. Гөлсинә Галимуллина 35 елдан артык “Саба таңнары” район газетасында эшләгән. Эштән бушаган араларда әдәби журналлар өчен әсәрләр язган.

Аның әсәрләренең персонажлары уйлап чыгарылган геройлар түгел, алар чынбарлыктан алынган. Бельгия язучысы Дави Де Витте Гөлсинә Галимуллинаның укучылар белән очрашуларга үз повестьлары һәм романнарының протиплары белән килүен белүен белгәч,гаҗәпләнүен белдерде.

Язучы беренче әсәрләрен пенсиягә чыгар алдыннан гына иҗат иткән һәм алар бик тиз арада татарстанлылар күңеленә юл тапкан. Очрашуга килгән Нәҗип Җаббаров әйтүенчә, Гөлсинә ханымның китаплары өйнең бизәгенә әверелгән. Туган телдә китаплар уку алу – “Татарлар Бельгиядә” җәмгыятенең зур казанышы. Туган телне балаларга тапшыру ата-ананың бурычы булса да, дәүләт ярдәменнән башка мондый зур бурычны хәл итеп булмый дип белдерде ул.

Китап авторлары белән очрашулар тарихи ватаннан читтә туган тел турында кайгыртырга рухландыра, Европаның төрле шәһәрләренә яшәүче татарларны берләштерү өчен көчле чара булып тора. “Татарлар Бельгиядә” җәмгыяте язучының укучылар белән очрашуын Льеж шәһәрендә дә үткәрергә ниятли.

Татар-информ

Запись Язучы Гөлсинә Галимуллина Брюссельдәге очрашуда Бельгия язучысын бик гаҗәпләндергән впервые появилась Tatar Today - татар яңалыклары..