Архивы Рәшит Ваһапов - Tatar Today - татар яңалыклары.

Илһам Шакиров & Әлфия Авзалова Филүс Каһировка “…малае” дигәннәр? Ришат Төхвәтуллин белән “конфликт” кайда була? [видео]

Лейла — Thu, 19 Sep 2019 14:01:50 +0000

Татарстанның атказанган артисты Филүс Каһиров белән зур әңгәмәне дәвам иттерәбез. Әлеге өзектә аның ничек Ваһапов фондына килеп эләгүен, Илһам Шакиров, Әлфия Авзалова кебек милләтнең бөек шәхесләре белән күрешкән мизгелләрен искә алдык.

– Син сәхнәгә җитди җырлар белән күтәрелдең, җырчыларны җиңел пародиялисең, нишләп шулай капма-каршылык ул?

– Кечкенә чакта минем актер буласым килә иде. Укыганда фольклор бүлегендә укыдым, кыска спектакльләр куя идек. Монда укыганда да, җырчылар белән аралашканда да тәҗрибә җыйганмындыр инде. Сәхнә образым классик җырлардан башланып китте бит. Музыка училищесыннан ук шулай инде. Укырга кергәч, беренче курстан ук конкурска йөртә башлады укытучым, анда катнашу өчен халык җырлары, классик җырлар кирәк иде. Рөстәм Маликов дигән шәхесне белми идем. Ул конкурста жюри әгъзасы булды һәм безнең алда Салават ариясен башкарды. Менә ничек җырларга кирәк икән дип, һушларым китеп тыңладым! Шул чакта мөгаен, классикага мөкиббән киттем.

– 16-17 яшьтәме?

– Әйе. Телевидение аша мондый җырлар юк бит инде, күбрәк эстрада. Менә кеше нинди дәрәҗәдә башкару осталыгын җиткерә икән дип шаккаттым. Шул чакта гашыйк булдым арияләргә, классик җырларга.

– Шуннан тыңлый башладыңмы?

– Тыңладым дип, хәзерге кебек мөмкинлекләр юк иде бит. Интернет юк, диск юк. Бәлки, Казан, Уфа кебек шәһәрләрдә булгандыр инде. Кассетада нинди җыр табасың, шуны тыңлыйсың.

Дустым Алик Мәхмүтов, ул Уфада конкурслар алып бара иде, “Шәрыкъ” радиосында эшләде, миңа бик күп җырчыларның язмаларын туплап бирде. 150 ләп җыр – Хәйдәр Бигичев, Илһам Шакиров, Зилә Сөнәгатуллинаның. Казанда яшәгән чор, арендага алынган фатирда җыештырганда, ашарга пешергәндә тыңлап өйрәндем. Ул база бик булыша.

– Ваһапов фондына ничек килдең? Салават Фәтхетдинов чакырган, Айдар Галимов белән дә эшләп китәргә була кебек…

– Дөрес, Салават абый Татар җырында чакырган иде. Училищедагы укытучым Зилә Сөнәгатуллина классына, консерваториягә укырга кер дип, киңәш бирде. Килдем, ышанмыйм, кем алсын инде, фольклор бүлеген тәмамлап. Бюджетка, түләүсез үттем! Хәзер укырга керү хаклары арткан дип ишеттем, 250 меңгә җиткән ди мәдәният университетында уку. Кемнең акчасы бар, радио-телевидениедән әйләндерәләр. Хәзер башыннан ук шундыйга әверелә икән.

Консерваториягә укырга кердем, Зилә Даяновна Ульяновскийда фестиваль була диде. Анда Илһам Шакиров, Әлфия Афзалова катнаша диделәр, мин аларны күрергә дип бардым. Бер автобус артистлар белән бардым, шаклар катып. Бу Рәшит Ваһапов фестивале булып чыкты. Мин чыгып җырладым Ваһапов репертуарыннан “Китмә сандугачым” белән татар халык җыры “Урман”ны. 2006 ел, 20 яшь булган, халык дәррәү алкышлап кабул итте.

– Сиңа классик җырларны башкару кыенмы, җырлаганда нык тирләп чыгасың. Илһам абыйның җырларын башкарганда ул үткән юлларны уйда үтәсеңме? Сүз уңаеннан, беренче тапкыр аны тереләй күрү кайда булды?

– Белмим, чыгам да җырлыйм, классик әсәр дип башкарам. “Урман”ны башкарганда, ул урманга кереп чыгасың, билгеле. Ульяновскийда, шул фестивальгә әйләнеп кайтыйк әле. Гриммеркада Илһам Шакиров утыра. Мин кергәнче, каян, кем икәнемне белешкән. Әңгәмәнең азагын гына ишеттем, Башкортстан татарының хәлен белер өчен, татар булып, Башкортстанда яшәргә кирәк дигәнен генә. Мин авылдан чыктым, безнең авыл татарлар үзәге, ниндидер кысрыклау булмады. Октябрьский Татарстан чигендә урнашкан, шунда укыдым. Анда да татарлар белән аралаштым.

– Читләү булмады инде…

– Уфага барып укысаң, бәлки, тояр идең. Уфада барысы да бар. Башкортстанның башкортлар яшәгән Зиянчура, Хәйбулла, Әбҗәлил районнары бар. Ике милләт сәнгатен тыңлап үстек, озын көй дигән нәрсә бар башкортта. Бер авазны ярты минут сузып торалар. Тын, бормалар, диапозон – яхшы мәктәп. Бер колакта башкорт җыры булса икенчесендә – татарныкы. Халыкта да бар бит инде шундый сүз, җырчылар Башкортстаннан чыга.

– Син башкорт, мин татар дип аеру, без яхшырак дип көнләшү бармы ?

– Сәнгать кешеләре арасында андый нәрсә сизмәдем, күрмәдем.

– Башкортлаштыру…

– Анысы булды, телевидениегә җырны башкортча җырларга кирәк булды. Мин моны әллә нигә күрмим, Америкада алты телдә җырладым.

– Илһам Шакиров тагын нәрсә әйтте?

– Анда мин гомумән сөйләшмәдем. Чыгышлар тәмам, артистларга өстәл әзерләгәннәр. Их, Илһам абыйга берне җырлап күрсәтер идем дип уйлап утырдым. Сүзен ишетәсе килә бит! “Җанкай-җанаш” җырын башкаруын теләр идем дип сорады алып баручыбыз Луара Шакирҗанова. Менә шул сүзне көтеп утырдым. Башка табын артында сорасалар, җырларга теләмәс тә идем. Рөстәм абый Вәлиев уйнап җибәрде, җырладым. “Кулыңнан килә дип”, дип куйды Илһам абый. Миңа шул сүзе яңа сулыш өрде. Аннары озак кына мине хәтерендә калдыра алмады ул. Узып барганда, “Кем әле син?” дия, исемемне әйткәч, “Ә чәчен алга тараган чуваш малаемы?” ди. Модасы шул иде бит, чәч үстерү иде. Аннан соң Рәшит Ваһапов конкурсында катнашып, гран-при алдым, бүләге машина бит инде. Җиделе жигули машинасы ачкычларын Илһам абый кулыннан алдым. Шунда сәхнәдән ни әйтер микән дип көттем, “Үткән-сүткәндә мине дә утыртырсың!” – диде. Чынлыкта, кайсыдыр бер концерттан соң шул машинага утыртып, өенә кадәр илттем, гозерен үтәдем.

– Әлфия апа белән сөйләшүләр булдымы?

– Аның белән шаяртып кына сөйләшеп була иде бит. Миңа җитдисен, артыгын сөйләмисең диләр. Әлфия апа халыкчан, Илһам абый җитди итеп җырлый, сәхнә артында мәзәкләр белән көлдерә иде. Шулай булмаса күңелсез булыр иде, арытыр иде мөгаен.

– Нигә үзеңнең видеоблогыңны эшләмисең, мәзәк вакытларыңны күбрәк күрсәтмисең?

– Социаль челтәрләр бар бит инде, хатын төшер ди, сүгә. Ул сүккәннән соң гына, күңеле булсын дип төшереп куям инде аны.

– Әлфия апага кире кайтсак …

– Бер Мамадыш ягына концертка китеп барабыз, анда бар бит инде, ашый торган җир, апалар бәлешен, сумсасын, өчпочмагын сатып тора бит инде. Төштем дә, Әлфия апа басып тора. Исәнләштем дә, әллә таныды ул мине, әллә танымады да ул вакытта “Энекәш, мин бит Себергә барам, себерелеп кайтам әле!” – ди. Салават абый концерты белән йөргән чагы иде. “Мине таныйсыңмы соң?” димен, Илһам абыйча, “Таныйм, чуваш малае димәсенме!” Шулай итеп, чуваш малае дип исем кушканнар иде.

– Нәрсә бирде соң Ваһапов фестивалендә җиңү?

– Таный башладылар, минем турыда сөйли башладылар. Яшь җырчы. Шушы фондның җитәкчесе Рифат Фәттахов миңа эш, контракт тәкъдим итте.

– Ничә елга инде?

– Башта өч ел, аннан кризис дип.. Алты елга сузылды бугай.

– Аннан Ришат Төхвәтуллин килдеме. Сезне фондның иң җете йолдызлары диләр иде. Хәзер күзәтеп барасыңмы аларны?

– Ришат белән ике еллап концертлар куеп йөрдек әле. Йолдызлар бетте дип инде, әйе, күзәтеп барам, Гөлсирин Абдуллина, Ранис Габбасов, Азат Абитов – матур тавышлары.

– Үзеңне ничек бәялисең? Тормышта Әлфия апа, Илһам абыйлар белән очрашу болай да мөмкин булыр иде кебек. Ник Салават абый белән эшләп китмәдең?

– Минем уку йорты сайланган иде бит инде. Ә эшләү, 22 яшьтә беренче концерт, беренче концертка Миңтимер Шәрипович килде.

– Сәкинә апа беләнме?

– Әйе. Бәлки, Миңтимер Шәриповичның килүе Сәкинә апа белән күбрәк бәйле булгандыр дип уйлыйм. Ул сәнгать, милләт өчен җан атып, кызыксынып күзәтеп бара иде бит. Телевидениедә күреп калгандыр, дәүләт концертларында да катнаша идем.

– Син аларның күзәтүен тоя идеңме? Каушатмый идеме?

– Аларга чыгып җырларга рәхәт. Безнең якта андыйлар турында ипи өсте диләр. Кемнәндер өркәсең, ничек җырларга дисең. Алар каршында җырлау да матуррак чыга, алар матур итеп, яратып карыйлар.

– Рөстәм Миңнехановка ничек?

– Шаяртып әйткәндә, монда син тиеш! (көлә) Беренче концерт Камал театрында булды. Керделәр чәйгә икесе дә, “Синең тавышың, тембрың классик әсәрләрдә, халык җырларында аеруча матуррак чыга, эстрадада җырлаучылар күп булыр, син моны сакла әле!”– диде Миңтимер Шәрипович. Сәкинә апа баш бармагын күрсәтеп “Шулай дәвам ит!”- диде.

– Аркаңнан да кактылармы?

– Аркадан кагучылар да булды, шуңа юмыйм бит инде!

– Республикадан тыш билгеле шәхесләр килеп эндәшкәне булдымы ?

– Булды. Безнең иҗат белән таныш булмаган кешеләр дә дәшкәне бар. Чит илдә, Америкада чыгыш ясаганда, бөтенләй телне белмәүчеләр дә килә. Үз көчемә ышанып бетмимме, бәяләп бетермимдер инде. Татарларның басынкылыгы, оялчанлыгы бар бит инде. Карнеги холларда җырларга тиешсең диләр, ярар, мин Филармониядә җырлыйм дим.

– Кайда сине күреп булачак быел ? Концертың буламы аерым.

– 18 октябрьдә Уфада, Яшьләр сараенда. Концерт гомумән 11 октябрьдә башлана, Арчадан. 12 октябрь Балтачта. Казан тамашачасына 12, 13 ноябрь, гадәткә кергәнчә инде.

– Кайсы залда ?

– Камал театры бик ошый инде миңа. Филаромония минем өчен бик җылы, тамашачы белән бик якын мөнәсәбәт урнаша.

– Бюджетын аклау ничек ?

– Филармония залы 600гә якын кеше сыйдыра. Уникста бер концертта каплап булыр иде чыгымын. Концерт сыйфатын өстенрәк күрәм, шуңа күрә филармониядә куям. Бәлки, башка залларда да булыр, киләчәктә.

– Чакырасыңмы соң фондтагыларны ?

– Чакырган идем, беренче концертка да чакырдым. Тавыш-гауга күтәрделәр инде, фондтан киткәч. Низагны халыкка чыгарасы килмәгән иде дә… Без капчыкта ятмый инде. Рифат Фәттаховка бер ел үтте бит инде, дип чакырдым. Ваһаповта эшләгәндәге җырлар, костюмнар, аранжировкалар барысы да фондта калды.

– Интернетта Ришат Төхвәтуллин белән икегезнең сөйләшкән мәзәк видео йөри. Бик кызып сөйләшәсез, ни турында иде?

– Илнур Ганиевның юбилее иде, Лаеш районының мәдәният бүлеге җитәкчесе, бик яхшы кеше. Анда Ришат та, Данир Сабиров та булды, Салават абый да кереп чыкты. Биюләр вакытында, сәнгать турында булдымы икән, концертлармы микән, әллә берәрсен сүгеп тордыкмы икән ?

– Конфлик булмады, бер-берегезгә видеодагы кебек ризасызлык белдермәдегез димәк?

– Ю-юк. Без бер-беребезгә претензияләр белдермибез. Без дуслар.

– Алайса ник бер-берегезнең концертларына йөрмисез ?

– Узган ел гына юбилей концертларында катнаштым. Казанда, Уфада җырладым.

– Ә синең концертларда ? Юбилей булмагач чакырмадыңмы ?

– Минем бит, үземнең команда гына эшли.

– Катлаулыракмы кеше чакырырга ?

– Юк, Ришатка әйтсәң, баш тартмас иде, килә ул. Абзый, абзыем, дип кенә тора ул, хөрмәт белән.

– Хөрмәт итә, мактап сөйли чынлап та. Ах, диеп карап тора идем Филүскә җырлаганда дип еш искә ала сине әңгәмәләрендә…

– Булганын сөйли ул. Училищега ул баянчы булырга, музыкаль белемен арттырырга дип килгән иде. Аннары тартылып китте җырга, укытучылар да тембрын да, сәләтен дә күреп алды. Үзенең тырышлыгы, фантазияләре белән, үз көче белән чыкты, танылды ул.

– Яшерен продюсеры бар түгелме соң ? Читтән торып кына.

– Уфада яши дип беләм.

– Синең яшерен продюсерың бармы ?

– Минем ачыктан-ачык, хатын инде. Продюсерның эше нәрсәдә? Җырчының эшен җиңеләйтү бит инде.

– Хатының сиңа ничек ярдәм итә башлады ?

– Әкренләп, фондтан киткәч, “Мирас” ансамбле, дустым Рөстәм Рәхмәтуллин дусларым ярдәм итте. Хәтта бушка эшләргә дә риза иделәр.

– Димәк, дусларың йөз чөермәде?

– Киресенчә, хупладылар, ярдәм иттеләр. Көчлерәк хис иттем үземне, без синең белән диде дусларым. Бер ел эчендә репертуар, җырлар, радио-телевидение белән бөтен нәрсәне яңадан булдырганда, хатын ярдәм итте. Булмас инде дигән фикер тудырмыйча, торасың да эшлисең. Иртән уятып эшкә чыгарып җибәрергә кирәк иде. Аллага шөкер, без начар яшәмибез хәзер. Концертлар да бар, җырлар да бар, тамашачы да бар. Хәтта чит илгә, Америкага да бардык. Европага чыгу турында да уй-планнарыбыз бар. Конкрет сөйләшү бара, январь айларына дип торабыз.

– Ихтыяҗ бар димәк.

– Бар, чакыралар, анда татар концерты карап өйрәнмәгәннәр. Тагын киләсез дип сүз алып калдылар. Финанс мәсьәләсе кала. Океан аша очарга кирәк, мәдәният министрлыгы булышты, рәхмәт Ирада Хафизьяновнага. Уңышлар, теләп, ярдәм күрсәтеп тора.

– Син бюджетта түгел инде.

– Юк, шәхси эшмәкәр. Сәгнатьне күрсәтү, географияне арттыру өчен эшләнә. Акча эшләү өчен бару түгел. Анда Татарстанда гына түгел, Россиядә бер дә булмаган милләттәшләр яши бит. Интернеттан карыйлар билгеле, тик күзгә-күз карашып аралашу түгел инде ул. Европага, Америкага кабаттан барырга да, Австралиядә чыгыш ясарга дигән уйлар бар. Гомумән, мин сәяхәт итәргә бик яратам.

[ДӘВАМЫ БАР]

ФИЛҮС КАҺИРОВ БЕЛӘН ТАТАР ТУДЕЙДА ЗУР ИНТЕРВЬЮ МОНДА - https://tatar-today.ru/2019/09/50853/

Запись Илһам Шакиров & Әлфия Авзалова Филүс Каһировка “…малае” дигәннәр? Ришат Төхвәтуллин белән “конфликт” кайда була? [видео] впервые появилась Tatar Today - татар яңалыклары..

Нигә Ваһапов фестивале 15шенә 15не туры китерә, хикмәт сандамы, әллә гала-концерттамы? [видео]

Гузель — Tue, 07 May 2019 16:30:06 +0000

7 майда бөек татар җырчысы, ТАССР халык артисты Рәшит Габделваһап улы Ваһапов туган көн. Рәшит Ваһапов – татар халык җырларын һәм татар композиторлары әсәрләрен иң оста башкаручыларның берсе.

Ул матур тембрлы көчле тавышка, милли музыка мирасының алтын фондына кергән әсәрләрне тыңлаучыга бөтен тирәнлеге белән җиткерү сәнгатенә ия була. Милли вокал-концерт сәнгатенә нигез салучыларның берсе буларак, ул татар музыка культурасын үстерүгә зур өлеш кертә, актив концерт эшчәнлеге алып бара.

2004 елдан башлап, ел да, Рәшит Ваһапов истәлегенә халыкара фестиваль оештырыла.

Быел Ваһапов фестиваленә – 15 ел! Конкурсының җиңүчеләре, фестивальның танылган лауреатлары һәм махсус кунаклар – 15 май С. Сәйдәшев исемендәге Зур концерт залында Ваһапов фестиваленең ХV юбилей Гала – концертында чыгыш ясаячак.

Ваһапов фестивале – хәзерге заман татар җыр сәнгатенең иң мәшһүр брендларының берсе. Фестивальның төп бурычы – профессиональ җыр сәнгатен һәм сыйфатлы милли эстраданы үстерү. Гала-концертта татар сәнгатенең легендалары белән беррәтән фестивальның популяр лауреатлары һәм Ваһапов фестивале конкурсының яңа, өметле җиңүчеләре чыгыш ясаячак.

Бу кичтә оркестрга кушылып җырланган классик әсәрләрне дә, халык җырларының яңача яңгыравын да ишетергә мөмкин булыр. Сәхнәдә Рәсәй һәм СССРның легендар баритоны Ренат Ибраһимов, Урта Азия сандугачы Роза Рымбаева, дөньякүләм танылган Ла Скала опера театры солисты Рүзил Гатин, “Алтын битлек” театраль премиясе лауреаты Илһам Вәлиев, популяр җырчылар Рөстәм Асаев белән Гөлназ Асаева, Гөлсирин Абдуллина белән Азат Абитов, Руслан Сәйфетдинов, Сиринә Зәйнетдинова, Илүсә Хуҗина, Рәнис Габбазов, Илгиз Мөхетдинов, Рөстәм Насыйбуллин, Әмир Әхмәдишин һәм конкурсның яңа җиңүчеләре чыгыш ясаячак!

Югары җыр сәнгате бәйрәменә рәхим итегез!

Билетлар сатуда

Онлайн: https://kzn.kassir.ru/koncert/gbkz-im-ssaydasheva/gala-kontsert-vagapovskogo-festivalya_2019-05-15

Касса: 8 (843) 292-17-17

Запись Нигә Ваһапов фестивале 15шенә 15не туры китерә, хикмәт сандамы, әллә гала-концерттамы? [видео] впервые появилась Tatar Today - татар яңалыклары..

“Юмор хисле мишәр” – Ваһапов фестивале конкурсантлары бөек җырчыны кем итеп күрә? [видеосораштыру]

Лэйсирэ — Fri, 19 Apr 2019 09:10:59 +0000

Шушы көннәрдә Рәшит Ваһапов исемендәге XV Халыкара татар җыры фестивале яшь башкаручылар конкурсы үтте. Tatar Today татар яңалыклары порталы бәйгедә катнашкан конкурсантлар, оештыручылар һәм жюри әгъзалары белән әңгәмә корды. Сөйләшү барышында аларга “Рәшит Ваһаповны кем, нинди кеше буларак күзаллыйсыз?” дигән сорау бирдек. Җаваплар мондый иде:

Игорь Дмитриев, Питрәч районы Пановка авылыннан, Ваһапов фестивалендә беренче тапкыр катнаша: “Мин Рәшит Ваһаповны беркем белән дә чагыштыра алмас идем, мөгаен. Ул – универсаль җырчы“.

Мамадыш районында туып-үскән, Алабуга мәдәният һәм сәнгать көллиятенең 4 курс студенты Ләйсән Рәхимова конкурста 2нче тапкыр көчен сыный: “Югары, көчле тембрлы тавыш иясе. Төз кеше. Калын тавышлыдыр кебек. Сөйләшүе салмак, һәр сүзен уйлап әйтә торган кеше булгандыр дип уйлыйм”.

Алабуга мәдәният һәм сәнгать көллиятендә аккомпониатор булып хезмәт куючы Рәзил Габбасов: “Миңа калса, тавышы буенча Рәшит Ваһапов артык биек булмаган гәүдәле, Голливуд актеры кебек чибәр ир булгандыр. Юмор хисле мишәр, артыннан бик күп кызлар йөгереп йөргәндер дип күзаллана“.

Илдар Насыйров, Ульяновск өлкәсеннән, беренче тапкыр конкурста катнашыр өчен алты ел көткән: “Тыйнак, интеллигент кеше булгандыр. Әгәр дә аны үз гомеремдә бер генә күреп, биш кенә минут сөйләшә алсам да, мин бик бәхетле кеше булыр идем“.

Башкортстаннан килеп, икенче тапкыр катнашучы Илүзә Гайсина: “Зәңгәр күзле булып күзаллыйм. Узган ел фестивальдә катнашкан Марат Яруллин исемле егетне Рәшит Ваһаповка бик охшаган диделәр. Уртача буйлы, мишәрчә акцентлы, кызлар гашыйк булырдай ир-ат”.

Россиянең атказанган, Татарстанның халык артисты Венера Ганиева: “Безнең чор кешеләре аны күреп өлгермәсә дә, фотосурәтләре аша күзалыйбыз: шундый буй-сынга, төскә-биткә матур, дулкын-дулкын чәчле, чын мәгьнәсендә, чибәр ир-ат. Бүген Рәшит Ваһапов конкурсында аның җырларын бозмыйча, җиренә җиткереп җырлаучы, тыйнак, матур, сыйфатлы тавышлы конкурсантларда да легендар җырчының образын күрергә телибез”.

Татар дәүләт академия опера һәм балет театры артисты, профессор Зилә Сөнгәтуллина: “Тәрбияле, югары культуралы кеше ул. Культурасы тавышында, тембрында ук чагыла. Әйтәләр бит, “Җырчы авызын ачуга ук интеллекты күренә” дип. Менә Ваһаповның да музыкасы аша бар дөньясы күренә“.

Ваһапов фестиваленең матбугат хезмәте вәкиле Айбикә Фәттахова: “Рәшит Ваһапов турында бик күп укыдым, биографиясен, тарихын да беләм. Шуңа күрә ул миңа сылу гәүдәле, матур йөзле, ут күзле ир-ат буларак күзаллана. Аңа бик күп хатын-кызлар гашыйк булган, бу аның репертуарында да ачык чагыла”.

Рәшит Ваһапов исемендәге XV Халыкара татар җыры фестивале яшь башкаручылар конкурсы җиңүчеләре:

“АКАДЕМ ВОКАЛ”

1 урын:

– Айзат Адылгәрәев (Октябрьский музыка көллияте, Башкортостан);

– Камилә Шакирова (Октябрьский музыка көллияте, Башкортостан).

2 урын:

– Алмас Сирусин (Уфа сәнгать институты, Башкортостан);

– Нурзия Сабитова (Казан дәүләт консерваториясе, Татарстан).

3 урын:

– Илһам Сираев (Уфа сәнгать институты, Башкортостан);

– Миләүшә Миңнуллина (Казан музыка көллияте, Татарстан);

– Юлиана Шәрәпова (Уфа сәнгать училищесы, Башкортостан);

– Азат Кадыров (Уфа сәнгать училищесы, Башкортостан).

“ХАЛЫКЧАН БАШКАРУ”

1 урын:

– Булат Закиров (Казан дәүләт консерваториясе, Татарстан);

– Инсаф Бәдретдинов (Казан мәдәният институты, Татарстан);

– Сөмбел Заһидуллина (Арча, Татарстан).

2 урын:

– Ленар Шәймөхәммәтов (Октябрьский музыка көллияте, Башкортостан)

– Алмас Хөсәенов (Татарстан Республикасының Дәүләт камера хоры);

– Нәфисә Наҗарова (Татар дәүләт җыр һәм бию ансамбле).

3 урын:

– Илсур Сабитов (Казан мәдәният институты, Татарстан);

– Ленар Солтанов (Уфа сәнгать институты, Башкортостан);

– Илназ Гималтдинов (Әлмәт драма театры, Татарстан);

– Фәридә Шәйхетдинова (Татар дәүләт җыр һәм бию ансамбле);

– Рузилә Бәдретдинова (Алабуга мәдәният һәм сәнгать көллияте, Татарстан);

– Әлфис Галиуллин (Казан мәдәният институты, Татарстан).

“ЭСТРАДА ЖЫРЫ”

1 урын – бирелмәде.

2 урын:

– Эдуарда Марченко (Октябрьский музыка көллияте, Башкортостан);

– Илмир Арсланов ( Казан мәдәният институты, Татарстан).

3 урын:

– Лилия Сәрвәрова (Алабуга мәдәният һәм сәнгать көллияте, Татарстан);

– Морат Гайсин (Ленин исемендәге мәдәният йорты, Казан, Татарстан);

– Раушан Сөләйманов (Сибай музыка көллияте, Башкортостан);

– Илдар Насыров (Казан мәдәният институты, Татарстан).

“ВОКАЛЬ АНСАМБЛЬ”

1 урын:

– “Караван” төркеме (Башкорт дәүләт филармониясе).

2 урын:

– “Җәннәт” ансамбле (Уфа сәнгать училищесы, Башкортостан).

3 урын:

– “Шатлык нуры” ансамбле (Алабуга мәдәният һәм сәнгать көллияте, Татарстан).

“ИНСТРУМЕНТАЛЬ БАШКАРУ”

1 урын:

– Ильяс Шәрипов (Казан дәүләт консерваториясе, Татарстан)

2 урын:

– Рамазан Гыйниятов (Казан дәүләт консерваториясе, Татарстан);

– Кубызчылар ансамбле (Октябрьский музыка көллияте, Башкортостан).

3 урын:

– Илнур Галиев (Казан дәүләт консерваториясе, Татарстан);

– Тальянчылар ансамбле (Алабуга мәдәният һәм сәнгать көллияте, Татарстан).

Үзешчән сәнгать вәкилләре арасында

“Эстрада җыры”

1 урын:

– Ринат Салихҗанов (Краснокама район мәдәният йорты, Башкортостан);

3 урын:

– Илдар Харисов (Казан).

Махсус призлар

“Иң яшь катнашучы”

– Рөстәм Егоров (Казан музыка көллияте, Татарстан)

“Рәшит Ваһапов репертуарын иң яхшы башкаручылар”

– Булат Закиров (Казан дәүләт консерваториясе, Татарстан);

– Инсаф Бәдретдинов (Казан мәдәният институты, Татарстан);

– Алия Шамукова (Нефтекама дәүләт филармониясе, Башкортостан).

III турга узган барлык катнашучылар “Дипломант” исеменә лаек.

Ваһапов фестивале фотолары

Запись “Юмор хисле мишәр” – Ваһапов фестивале конкурсантлары бөек җырчыны кем итеп күрә? [видеосораштыру] впервые появилась Tatar Today - татар яңалыклары..

Атик Али: “Хәйдәр Бигичевка һәйкәл куелган көнне дә күрдем” [видеохәбәр]

Габдулла Тукай — Tue, 19 Jul 2016 16:04:33 +0000

Финляндия татар җәмгыяте рәисе Атик Али Татар тудей хәбәрчесенә мәшһүр җырчы Хәйдәр Бигичевка һәйкәл ачылуга сөенүен белдерде. Ул бу чарага махсус кайта, Түбән Новгород өлкәсе Уразавылда Рәшит Ваһапов исемендәге халыкара җыр фестивален дә тамаша кыла.

Узган атна азагында Түбән Новгород өлкәсе Уразавылда үткән Рәшит Ваһапов исемендәге халыкара җыр фестивалендә без җирле халык, танылган җырчылар арасында Финляндия татар җәмгыяте рәисе Атик Алины да очраттык. Ул бу чарага махсус килүен, бөек җырчыларны шушылай зурлауларын берничә ел көтүен әйтте.

“Хәйдәр абый минем якын дустым иде. Без 1985 еллардан башлап, аның соңгы көннәренә кадәр элемтәдә тордык. Рәшит абыйның әтисе һәм минем әбиемнең әбисе алар бертуганнар. Ул минем бабай белән икетуган (двоюродный). Һәм аларны шулай фестивальләр белән искә алу, һәйкәлләр кую, туган якларын бизәү йөрәккә май булыр ятты. Мин бу проект турында өч ел элек ишеткән идем һәм әлеге һәйкәлләр булачагына иманым камил иде. Аллага шөкер, мәшһүр татар җырчыларына да һәйкәл куелган көнне күрдем”, диде ул Татар тудей хәбәрчесенә шатлыгы белән уртаклашып.

Халык арасына килеп керүгә, җирле халыкның да якташларына багышланган җыр бәйрәмен көтеп алуларын тойдык. Уразавылда Ваһапов фестивале тамашачылары бер тавыштан, мондый чараларның татар халкы өчен бик кирәк булуын җиткерде. Ваһапов белән Бигичевка һәм оештыручыларга рәхмәтләрен әйттеләр.

“Мондый бөек җырчылар 50 яки 100 елга бер генә туалардыр. Мин инде Хәйдәр абый үлгәннән бирле аның тормышын һәм иҗатын күзәтеп киләм.”, диде Хафиз Әләүтдинов.

Ул әлеге чарага буш кул белән килмәгән, үзе белән Хәйдәр Бигичев турында җыйган мәгълүматларын да алган, алар белән безне дә таныштырды. Хафиз әфәнде әлеге материалны киләчәктә китап итеп бастырырга ниятли.

Бәйрәмгә Рәшит Ваһапов һәм Хәйдәр Бигичевнең җырларын тыңлап үскән урта һәм өлкән буын, балаларыбыз да татар җырларында тәрбияләнсеннәр иде, дип яңа буынны да алып килгәннәр.

“Рәшит Ваһапов , Хәйдәр Бигичев кебек шәхесләр безнең һәрбер төбәктә диярлек бар. Алар турында кайгырту, исемнәрен мәңгеләштерү Татарстанның максаты һәм бурычы”, диде безгә әлеге бәйрәмнең төп оештыручысы, Рәшит Ваһапов вакыфы рәисе Рифат Фәттахов.

Татар җыр сәнгате йолдызлары туган ягында сәхнә тотучы җырчылар арасында күпчелекне Ваһапов фестивале лауретлары тәшкил итте.

“Рәшит Ваһапов репертуарыннан “Рамай” җырын башкардым һәм җыр аша халыкка гореф-гадәтләребезне күрсәтәсем, Ваһаповның моңын җиткерәсем килде. Андый җырлар безнең өчен кирәк. Рәшит абый да Хәйдәр абый да минем өчен үрнәк, иҗат итәргә этәргеч бирүчеләр”, диде җырчы Рәнис Габбазов.

Яшь җырчылардан тыш, Хәйдәр Бигичевның сеңлесе Халидә Бигичева, тормыш иптәше Зөһрә Сәхәбиева, Ринат Вәлиев, Рамил Курамшин, Илһам Вәлиев кебек билгеле җырчы, баянчылар да чыгыш ясады. Тамашачылар башкарылган милли, моңлы җырларны көчле алкышларга күмде.

“Бу вакыйга бик куандыра, яшьләрне дә, өлкәннәрне дә. Әлбәттә, оештыру ягыннан кечкенә генә җитешсезлекләр, эшләнәсе эшләр бар, алар һәрбер чарада була. Тик мондый җыеннар кабатлана барса, ешрак оештырылып килсә, тагын да камилләшәчәк”, дип белдерде Уразавылда яшәүче Рифат әфәнде.

Запись Атик Али: “Хәйдәр Бигичевка һәйкәл куелган көнне дә күрдем” [видеохәбәр] впервые появилась Tatar Today - татар яңалыклары..

Түбән Новгородта Рәшит Ваһапов белән Хәйдәр Бигичев һәйкәлләре ачылды [видео]

Редактор1 editor1 — Sun, 17 Jul 2016 18:40:11 +0000

16 июльдә Түбән Новгород өлкәсе Краснооктябрьский районы Уразавыл (Уразовка) авылында мәшһүр татар җырчылары Рәшит Ваһапов һәм Хәйдәр Бигичевка һәйкәл ачылды. Тантанага Татарстан президенты Рөстәм Миңнеханов та килде. //Азатлык радиосы//

Уразавыл халкы, милли мохит тудыручы шушындый чараларга сусаган икән. Һәйкәл ачу тантанасына килгән татарстаннарны каршы алганда сөенеч-шатлыклары йөзләренә чыккан иде. Рәшит Ваһапов белән Хәйдәр Бигичевне мәңгеләштерү тантанасындагы йөзләп кеше, шул исәптән Мәскәүдән кайткан Рушания Габдрахимова да бу вакыйганы күптән көткән.

“Без Рәшит Ваһапов һәм Хәйдәр Бигичевнең җырында, аларның мәдәниятендә үстек. Әлеге вакыйга мине яшьлегемә алып кайтты”, диде ул.

Чараның төп авторы, Рәшит Ваһапов вакыфы башлыгы Рифат Фәттахов, Уразавылда атаклы якташларга багышланган тулы бер тарихи-мемориал комплекс булдыру нияте бар дип белдереп, проектның дәвамлы булачагына ишарәләде.

“Башта Рәшит Ваһапов белән Хәйдәр Бигичевкә багышланган зур гына һәйкәл куярга иде исәп, аннары киңәшә торгач, аерым бюстлар куеп, территорияне тарихи-мемориаль комплекс итү отышлы дип килешенде.

Милләтне саклау һәм үстерү коры сүз белән генә хәл ителми, ул эшләрдән тора. Шушы бөек шәхесләр мисалында яшьләрне тәрбияләү, аларның күнелендә горурлык уяту – ул инде милләтне үстерү юлында конкрет эш”, диде Фәттахов.

Кызыл Октябрь районының мәдәният бүлеге җитәкчесе Максуд Яруллин сүзләренчә, алга таба яшьләрнең язылышуы да шушы урында үтәчәк. Әлеге аллея мәдәни чараларның үзәге булыр дип көтелә.

Тантананың иң башында да, барышында Рәшит Ваһапов һәм Хәйдәр Бигичев җырлары яңгырап торды, тормыш иптәше Зөһрә Сәхәбиева да монда иде. Әлеге шәхесләр белән якташларының горурлануы сизелде. Һәйкәл ачу бәйрәмендәге халыкны татарлык, туганлык хисе берләштерде. Бигрәк тә бу Татарстан президенты Рөстәм Миңнехановның сәламләвен алкышлауда күренде. Түбән Новгород татарлары аңа дәррәү кул чапты. Төбәк губернаторы Валерий Шанцев та, “Исәнмесез, кадерле дуслар!” дип сүзен татарча исәнләшүдән башлады.

“Түбән Новгород җирлегендә туган талантлы шәхесләр бик күп. Тик алар сафында Рәшит Ваһапов һәм Хәйдәр Бигичев аерым урын алып тора. Татар мәдәнияте Новгород өлкәсен генә түгел, ә бөтен Идел буе төбәген баетты”, диде губернатор.

Рөстәм Миңнеханов үз чыгышында, әлеге бөек җырчыларның татар халкының рухи мирасына гына түгел, Русия мәдәниятенә дә зур өлеш кертүен әйтте. Һәйкәл куюга, татар гореф-гадәтләрен саклауга, үстерүгә өлеш керткәне өчен Валерий Шанцевка рәхмәтләрен җиткерде.

Ваһапов белән Бигичека бюстларны күренекле татар сынчысы Мәхмүт Гасыймов ясаган иде. Казанда әлеге авторның Салих Сәйдәшев, Бакый Урманче һәм Державин һәйкәлләрен күрергә була. Проектның архитекторы – Герман Бакулин.

Рәшит Ваһапов белән Хәйдәр Бигичевкә бюстлар Татарстан президенты Рөстәм Миңнеханов һәм Түбән Новгород губернаторы Валерий Шанцев, өлкә татар конгрессы, Кызыл Октябрь районы хакимияте, Ваһапов вакыфы ярдәмендә булдырылган.

Запись Түбән Новгородта Рәшит Ваһапов белән Хәйдәр Бигичев һәйкәлләре ачылды [видео] впервые появилась Tatar Today - татар яңалыклары..