Архивы татар артистлары - Tatar Today - татар яңалыклары.

Илсөя Бәдретдинова Казан үзәгендә меңләгән халыкны татарча җырлата [видео]

Лейла — Sun, 12 Sep 2021 14:40:57 +0000

11 сентябрь Казаннаң Камал театры каршында грандиоз тамаша булды. Бәйрәмдә җырчы Илсөя Бәдретдинова @ilsiiabadretdinova да катнашты.

View this post on Instagram

A post shared by ТАТАР ТУДЕЙ / ТАТАР БҮГЕН (@tatar_today_116)

– @domdruzhby.tat браво!
@gulnazshrp браво!
Бик грандиоз чара оештырдыгыз!
Ничә мең халыкның һәрбер җырымның сүзләрен яттан белеп җырлауларына күңелем тулды! Мондый хөрмәтне бернинди исем дә алыштыра алмый!
Кадерле тамашачым, йөрәгем түреннән рәхмәт сезгә, – дип яза Инстаграмда Илсөя.

Запись Илсөя Бәдретдинова Казан үзәгендә меңләгән халыкны татарча җырлата [видео] впервые появилась Tatar Today - татар яңалыклары..

Ләйсән Мәхмүтова: “Әти-әни рухлары шат, тыныч булсыннар”

Лейла — Sat, 11 Sep 2021 06:58:24 +0000

Татарстанның халык артисткасы Исламия апа Мәхмүтова кабер ташы куйганнар.

View this post on Instagram

A post shared by ТАТАР ТУДЕЙ / ТАТАР БҮГЕН (@tatar_today_116)

– Искә төшергәнегез өчен, догаларыгыз өчен мең рәхмәт. Әнигә дип, таш эзләгәндә, “Әйдә матурракны, зурракны куябыз, хәзер ниндиләре генә юк” – дигән идем Лилия апага.
“Кирәкми, әтигә әни ташны үзе ошатып сайлаган иде, аерылып тормасыннар икесе дә бер булсыннар, парлы булсын”, – диде.

“Кыр казлары артыннан” дип, әнинең почергы белән язылган, ди Татарстанның атказанган артисткасы Ләйсән Мәхмүтова @laismaxm

Исламия һәм Хәлил Мәхмүтовлар Самосырово мөселман зиратына җирләнгән.

Запись Ләйсән Мәхмүтова: “Әти-әни рухлары шат, тыныч булсыннар” впервые появилась Tatar Today - татар яңалыклары..

“Шәһри Казан” өеннән чыга алмый яткан җырчы Дәниф Шәрәфетдинов белән елатырлык әңгәмә яза

Габдулла Тукай — Thu, 05 Jul 2018 18:43:35 +0000

Дәниф Шәрәфетдиновның көчле тавышы барыбызга да таныш. Күпләргә ул Хәния Фәрхи белән башкарган дуэтлар аша якын. Аның яңгырап торган тавышын беркемнеке белән дә бутап булмый. Әйе, ул шундый үзенчәлекле… Язмышы да башкаларныкына охшаш түгел… //Шәһри Казан гәҗите//

Тулы исеме: Дәниф Данил улы Шәрәфетдинов.
Туган көне: 19 апрель 1975 ел.
Туган җире: Актаныш районы, Киров авылы.
Гаилә хәле: өйләнгән, хатыны – Зәринә, балалары – Динар, Диана.
Яраткан ризыгы: барлык хәләл ашлар.
Тормыш девизы: «Булганына шөкер итеп!»

– Дәниф, тамашачы сезне берникадәр югалтып торды. Сәламәтлегегез турында да начар хәбәрләр ишетелде. Сәхнәдән китүнең сәбәпләре дә шул булдымы?

– Әйе, үз вакытында «Бәйрәм» төркемендә Хәния Фәрхи белән җырлап, халык алдында танылу яуладым. Берничә ел сәхнәдә булганнан соң югалдым. Дөресен генә әйткәндә, хезмәт хакы җитеп бетми иде. Ул акчага гаиләне ашату, ниндидер материаль теләкләрне үтәү, югары уку йортында белем алу барып чыкмый иде, шуңа күрә Себер якларына эшкә киттем. Нижневартовск шәһәрендә ярты ел эшләгәннән соң, Татарстанга кабат әйләнеп кайттым. Себер салкыннарына чыдый алмадым. Кызганычка, безнең организм андый шартларга ияләнмәгән. Кайткач, бер табибтан икенчесенә йөгердем. Диагнозны озак куя алмадылар. «Бәйрәм» ансамблендә эшли башлаганчы, юл һәлакәтенә очраган идем. Берничә елдан соң гына умыртка сөягемдә өч җәрәхәт таптылар. Шул һәлакәт сәламәтлегемә зур йогынты ясаган булган, тик аны вакытында сизмәгәнмен.

– «Урын өстендә генә ята, йөри алмый», – дип, халыкның сөйләвендә хаклык булган, димәк.

– Әйе, өйдән өч ел бөтенләй дә чыга алмадым. Хастаханәдә ятып чыкканнан соң әйбәтләнгән кебек идем. Тикшеренүләр үттем, аны-моны тапмадылар. Белмим, дөрес дәваламау нәтиҗәсе булдымы, әллә инде авариягә кадәр дә булганмы… «Бехтерев авыруы» дигән куркыныч диагноз куйдылар. Хәзер аена бер тапкыр кыйммәтле укол ясатып торам. Җил-бураннар булганда, атмосфера басымы тотрыклы булмаса, авырракка туры килә, ике ампула да эшләтәм. Аягымда йөреп торгач, зарланмыйм. Нинди авыртулар кичергәнемне берүзем генә беләм. Әмма бернигә карамастан, якыннарымның күңеле булсын, аларга авыр булмасын дип, һәрвакыт яшәргә тырыштым. Янымда терәк-таяныч булган әти-әнием, хатыным, балаларым тормышка кабат кайтарды.
Инде бар да җайлашып, әйбәтләнеп кенә килгән кебек идем, күзләр сукырая башлады. Күз алдым томаланып, күрү сәләтем югалып бара. Август аенда операция ясатырга иде. Шул операциягә зур өметләр баглап торам.

Бүгенге көндә авылларда концертлар куябыз. Заллар шыгрым тула дип әйтә алмыйм, 30 кешегә генә дә концерт куйган чаклар була. Шуннан бераз акча керә, аранжировкалар ясыйм, берникадәр пенсиям дә бар. Даруга җиткерәм дип әйтәсем килә. «Дәваланырга акча бирегез әле», – дип ярдәм сорамыйм. Гомумән, ярдәм сорап йөри торган кеше түгел мин. Ир-атка бу килешми дә.

Чаллы артистларына рәхмәтлемен. Сул ягым параличланып, хәлем бөтенләй начарлангач, хәйрия концерты куеп, алар матди ярдәм күрсәтте. Мине зарлана икән димәгез. Бар да яхшы. Бераз аксабрак торсам да, сәхнәгә чыгып баскач, барлык сызлаулар да онытыла.

– Гаиләм – иң зур терәгем, дисез. Гаиләгез белән дә таныштырсагыз иде.

– Тормыш иптәшем Зәринә балалар бакчасында өлкән тәрбияче булып эшли. Улым Казанда укый, музыка колледжының II курсын тәмамлады. Диана кызым медицинаны сайлады, ул да колледжда белем ала. Булачак һөнәрләрен үзләре хәл итә, ә мин бары тик үз киңәшләремне генә бирәм.
Хатыным гел янымда булды. 20 елдан артык бергә гомер итәбез. Әлбәттә, савыт-саба ватылмый тормый, тавыш та чыга… Ачуланышмый, дус кына яшибез дигән гаиләләрне аңламыйм, алар алдыйлар төсле. Тормыш булгач, барысы да була. Гел генә дә аңлашып бетеп булмый. Гадәттә, хатын-кыз горур була, бик гафу үтенеп бармый. Хатынмы, минме – кем генә гаепле булса да, башымны ия белдем. Кулга-кул тотынып, күзгә-күз карап сөйләшкәннән соң, гаилә өстендәге болытлар шундук тарала.

Элек гастрольләрдә йөргән чакта ул миннән көнләшә иде. Ә аннары – мин аны. Мин бик көнчел кеше, дөньяда миннән дә көнчелрәк кеше юктыр ул. Кайчак күңел түрендәге кыллар шакылдап куя… Күрсәтмәскә тырышсам да, читтән сизеләдер инде ул.
Мин хатынымнан гына көнләшәм, ә көнчелек, кеше әйберенә кызыгу кебек сыйфат хас түгел. «Эх, ул әйбер миндә дә булсын иде», – дип, беркайчан да әйткәнем юк.

– Дуслык төшенчәсенә карашыгыз нинди? Чын дусларыгыз бармы?

– Җилкәмә авырлыклар төшкәндә, алар бик сыналды. Дистәләгән дуслардан бары тик берсе генә калды. «Парацетамол булса да кертеп чыгыгыз әле», – дип сораганда, 100 төрле сәбәп табып, төрле якка качтылар. Аякка басып, радиоларда интервьюлар биреп, җырларым яңгырый башлагач, «Брат, син кайда?» – дип шалтыратырга тотындылар. Тик минем генә алар белән хәзер аралашасым килми.
Әйтәм бит, бары тик бер дустым калды. Илдар һәрчак янымда. Йөри алмаган чакларда да ул мине урамга алып чыкты, һәрвакыт янымда булды, ярдәмен кызганмады.

«Хәниянең телефоны җавап бирми…»

– «Бәйрәм» ансамблендә эшләгән еллар сагындырамы?

– Үткәннәрне сагына торган гадәтем юк. Әле бит Виталий Агапов, Зөһрә Шәрифуллина, Гөлдания Хәйруллина белән дә эшләп йөрдем. Әлбәттә, ул елларны хәтергә төшерәм, әмма юксынып түгел. «Хәния Фәрхи белән шул шәһәрләрдә булдык бит әле», – дип уйлап куям.

«Бәйрәм»дә эшләгән еллар күңелле дә, җаваплы да иде. Төркем булгач, барыбыз да бер төрле фикерләргә, бер вакытта йокларга ятарга, бер вакытта уянырга тиеш… Җитәкчебез Гәбделхәй бик таләпчән кеше иде. Телисең-теләмисеңме – эшеңә карата җитди булырга кирәк. Ансамбль барлыкка килеп, халыкка таныла башлаган еллар иде бит, ә ул тагы да җаваплылык өсти. Бөтен төркемгә – бер җиңел машина, башка бер әйбер дә юк. Илгиз Закиров, Фәрит Әхсәнов, Радик Нигъмәтҗанов, Фәрит Миннибаевлар белән эшләү – зур бәхет иде ул.

Ул елларда Хәния Фәрхинең тәүге альбомы – «Онытылыр димә»не әзерләгән идек. Анда акча турында уйлау бөтенләй юк иде, бирелеп, студиядә куна калып эшләдек. Һәм, миңа калса, ул иң отышлы альбомнарның берсе булды. Профессиональ күзлектән карасаң да, анда бар да дөрес, ничек кирәк – шулай. Хәзер бит альбомнар бик җиңел һәм тиз эшләнә. Җырчы кичтән җыр ятлый да икенче көнне студиягә барып яздыра. «Обкатка» дигән әйбер юк. Ә җырны еллар буе сәхнәдә җырлап, соңыннан студиягә барып яздырсаң, ул бөтенләй башкача яңгыраячак.

– Ул елларда сезнең белән булган берәр кызыклы хәлне сөйли аласызмы?

– Сезонның соңгы тамашасы артистлар телендә «яшел концерт» дип атала. Ул концертта артистлар бер-берсен шаярта, программаның үзгәреп китүе дә бар, әмма тамашачы моны сизмәскә тиеш. «Стамбул» дигән җырны башкарганда, режиссер сүзе буенча, кара күзлек киеп җырларга тиешмен. Синтезатор өстендә торган күзлекне алып кидем, әмма бер әйбер дә күрмим. Җырларга, сәхнәдә селкенергә кирәк. Тамашачыга сиздерми, күзлекне салып карадым: анда кара изолента беркетелгән. Изолентаны тиз генә куптардым да күзлекне киеп куйдым, җырлавымны дәвам итәм, әмма барыбер бер нәрсә дә күрмим. Селкенмичә, бер урында гына басып җырладым. Баксаң, Урал Рәшитов мине шулай шаярткан. Изолента гына түгел, күзлекнең пыяласын кара маркер белән буяган да булган.

Урал – бик күңелле кеше ул. Бергә эшләгәндә озак сөйләшеп утыра идек. «Бәйрәм» ансамбленә, шундый зур шәхесләр белән очраштырганы өчен, аеруча рәхмәтлемен.

– Миңа калса, Хәния Фәрхинең иң уңышлы дуэтлары – сезнең белән башкарылганнары.

– Дуэтларга карата мин бик җитди карашта. Аны бит теләсә кем белән җырлап булмый. Дуэтта бер кеше икенчесен ишетеп җырларга тиеш. Бу эшкә алынгансың икән, аны җиренә җиткереп эшләргә кирәк. Дуэтны өстән-өстән тиз генә яздырып булмый. Дуэт башкарыйк әле, дип, әле дә шалтыратучылар бар. Әмма алынмыйм, авыр эш ул.
Уңышлы дуэтның сере гади – Хәния апаның тавышына комачауламыйча, кушылып җырлау. Дуэтта хатын-кыз белән ир-ат җырлый икән, ирләр югары яки түбән ноталарны хатын-кыз тавышын басмыйча, әмма үзләрен дә ишеттерерлек итеп җырлый алырга тиешләр. Дуэтның аранжировкасын Хәния апаның тавышына эшлиләр иде, мин соңыннан иярә идем.

– Хәния Фәрхинең ачуланган чаклары була идеме?

– Юк. Ул андый кеше түгел иде. Кайчак кәефе булмый иде. Сәхнәгә кәефсез чыга да… Бер-беребезгә карап дуэт җырлаганда, мин күзләрне акайтып карый идем дә, ул көлеп җибәрә. Шуннан соң кәефе күтәрелә иде.

Хәния ападагы иң матур сыйфатларның берсе – ул беркайчан да «уратып» йөрми, әйтергә теләгәнен шундук йөзеңә карап әйтә иде. Уйлаган эшен, планнарын җиренә җиткереп эшли иде. Кайчак ул әйткәннәр фантастика булып тоела, моны тормышка ашырырлык кебек түгел иде. Күпмедер вакыт үткәннән соң карыйсың, ул инде теләгәненә ирешкән! Аннары, чын күңелдән көлә белә иде. Берәр кызык булса, бөтен дөньясын онытып көлә иде.

Аның үлеменә ышану кыен булды. Ниндидер шаяру булды дип кабул иттем. Берничә кат шалтыраттым. Шалтыраттым… Әмма телефонга җавап бирүче булмады.

«Ә мин түзәм!»

– Иңнәрегезгә авырлыклар төшкәннән соң, тормышка карашыгыз үзгәрдеме?

– Тормышка караш әллә кайчан ук үзгәрде инде. V сыйныфтан соң, Миңгол Галиев тәкъдиме буенча, Казанга укырга киттем. Шул елларда зурайдым, акыл тупладым дип әйтә алам. Тик Казанда озак яши алмадым. Авылны сагынып кире кайттым. Тик шулай да бу – балачакның бер этабы, аерым бер мәктәбе булып калды.

Тормышка караш тәрбиядән дә тора. Әни, һәрчак: «Кеше арасында булырга, яшәргә тырышырга кирәк», – дип үстерде. Нишлисең, Ходай синең тәкъдиреңә шулай язган икән… Аллаһы Тәгалә бит үзенең сөйгәннәренә генә авырлыклар җибәрә. Авырлыклары белән беррәттән, җиңеп чыгарга көчен дә бирә.

Ә безнең халык кызык: яңгыр яуса да, җил чыкса да зарлана. Һәрвакыт зарлана. Һәм һәрвакыт кемдер гаепле. Гомер буе кеше гаепләп яшәгәннәр бар. Кызганыч.

Ә мин түзәм. Миңа ничек кенә авыр булса да, якыннарыма җиңел булсын. Алар борчылып яшәмәсен иде!

Запись “Шәһри Казан” өеннән чыга алмый яткан җырчы Дәниф Шәрәфетдинов белән елатырлык әңгәмә яза впервые появилась Tatar Today - татар яңалыклары..

Халык җырларын башкаручы, “Үзгәреш җиле”ндә катнашкан Зәринә Вилданованы әбиләр нигә сүгә? [видео]

Габдулла Тукай — Fri, 02 Jun 2017 12:42:12 +0000

31 май Казанда “Татар утары” комплексында автор-башкаручы Зәринә Вилданованың The CheekLaWeek (“Чикләвек”) төркемен тәкъдим итү тамашасы узды. Ишек алдында үткән концертта Зәринәнең туган көнен дә билгеләп үттеләр. Тамаша алдыннан Азатлык хәбәрчесе аның белән аралашып алды. //Азатлык радиосы//

– Зәринә, синең репертуарыңда башлыча татар халык җырлары, әмма алар үзгә стиль белән башкарыла. Барысы да җанлы. Андый җырлауны бездә альтернатив саныйлар. Ни өчен халык җырларын альтернатив белән кушарга булдыгыз?

– Татар халык җырларына бүгенге эстрадага альтернатива буларак карарга кирәктер. Без татар халык җырларын бераз башка форматта тәкъдим итәбез. Халык җырларын заманчарак, яшьләргә якынрак итеп яңгыратырга телибез. Һәрвакыт әйтеп киләм: татар җырларын татарлар гына түгел, руслар, башка милләт вәкилләре дә тыңлый. Татар җырларын без башкарган форматта алар яратып кабул итә. Киресенчә, татар телле тыңлаучыга безнең яңгыраш сәеррәк булып тоела әле. Кайбер җырларның бирелеше аларга ошый, кайберләре күңелләренә ятмый. Ә менә татар булмаганнар бик тиз отып ала, “татар җырының болай яңгырый алуын белмәгән дә идек”, диләр.

– Нигә татарлар авыррак кабул итә, бу милләтнең консерватив булуына бәйлеме?

– Халык җырлары бик күптәннән үзенең яңгырашын үзгәртмәгән, гасырлар буе сакланган һәм татарларның күпчелеге аларны нәкъ шул яңгырашта ишеткән һәм тыңлаган, күңел түрендә саклаган. Бу яңгыраш татарның канына сеңгән. Шуңа татар тыңлаучысы, аларның әниләре, әбиләре җырлаганча ишетүне көтәләрдер. Шулай да, мин репертуарымны туплый башлаганда иң беренче итеп әбиемнең яраткан ике җырын үзгәрттем. Вокал, аранжировкасы башкача булды. Җыр үзгә, кызыклы яңгыраш алды. Бу рәвешле җырны эшкәртү татар халкын артык үпкәләтәдер дип уйламыйм. Мин үзем дә бит татар мәдәниятенең бер вәкиле. Бу җырлар үземә якын һәм кадерле.

– Әбиең яратканнары – нинди җырлар иде?

– “Олы юлның тузаны”, “Зәңгәр күлмәк”, керәшен татарлары җыры “Урманнарга керсәм”. Әбием бу җырларны башкарганымны ишетеп өлгермәде, ул инде вафат. Икенче әбием “ошады” дип ачыктан-ачык әйтмәсә дә, тыңлаганда истәлекләргә чума, елый башлый. Күңеленә барып тигәнен аңлыйм. Олы яшьтәге туганнарым исә “Нигә болай үзгәрттең?” дип сорыйлар. Мин аларга аңлатырга тырышам, тыңлаганнан соң алар күпчелек очракта яңа форматның чыннан да кызык булуын таныйлар. Яраталар.

_{Зәринә Вилданова һәм “Чикләвек” төркеме башкаруында “Уф, йөрәгем” җыры:}

– Алар әбиләр җырлаган белән чагыштырамы, әллә хәзерге эстрада беләнме? Чөнки эстрада белән чагыштырганда синекеләр күпкә отышлырак, сыйфатлырак яңгырый кебек.

– Алар әбиләренең җырлаганы белән чагыштыра. Халык җырларын үзгәртергә ярамый, изге бер әйбер итеп кабул ителә. Башкача кабул итү аларга авыр. Бу татарларга кагыла. Ә менә татар җырларын бер дә ишетмәгән кешеләр өчен мондый проблем юк.

Татар җырларын таратырга кирәк, һәм ничектер моны заманча караш аша җиткерәсе иде. Бу максатны үземә ничек һәм ни өчен куйганмындыр, хәзер төгәл әйтә дә алмыйм. Бөтен кешегә дә ошап бетеп булмый, бу аңлашыла, ләкин еш кына мин социаль челтәрләрдә иҗатыма карата уңай бәяләмәгә тап булам. Бер егет әнисе үлгәннән соң минем башкаруымдагы бер җырны очратканын язды һәм бу җыр өчен миңа кайнар рәхмәтләрен белдерде. Әлбәттә, мондый хатлар, фикерләрне уку күңелле, хезмәтем юкка түгеллеген аңлыйсың.

“Чикләвек” коллективы белән башкарыла торган җырлар бераз җиңелрәк итеп иҗат ителгән, шаяннар.

– Син Башкортстанның Октябрьски шәһәрендә тугансың. Бәләкәй чагыңда әти-әниең Казанга күченеп кайткан. Сәбәпләре нинди?

– Тумышым белән Башкортстаннан, Казанга миңа 9 яшь булган вакытта кайттык. Әтием һөнәре белән урманчы, аны Татарстан урман хуҗалыгы министрлыгына эшкә чакырдылар. Әммә ул эшне яратмады, бизнеска чумды. Ә менә Казанны яратты. Без дә туган җирдә кебек яши башладык, тамыр җәйдек. Әбием дә Башкортстан белән Татарстан арасын таптый, әле монда, әле күрше республикада.

– Казанда татар булып яшәү, иҗат итүнең уңай һәм тискәре яклары нинди?

– Миңа Казанда бик ошый. Белем алу сәбәпле айлар буена Мәскәүдә яшәргә туры килә. Анда ГИТИСны тәмамлыйм. Озакламый дипломлы эстрада артисты булачакмын. Тормышымны җыр, сәхнә белән бәйләргә телим. Менә анда татарлык җитмәве бик сизелә. Үз халкым юк, Татарстандагы кебек мәчетләр адым саен очрап тормый. Казанга туган телемне сагынып кайтам. Соңгы елларда татарлыкка караш та уңай якка үзгәрде дип саныйм. Республика җитәкчелеге татар мәдәнияте тармагында үзгәрешләр кирәк булуын аңлый башлады.

Бер генә мисал – “Үзгәреш җиле” эстрада фестивале. Мин катнаштым, аңлау бар. Үзем турында әйтә алам: канатланып эшлим! Бу концерттан соң Мәскәүдә Вадим Эйленкриг концертларында катнаштым, татарча җырладым. Татар җыры бөтенләй яңа аудитория алдында яңгырады. Беренче проект уңышлы килеп чыкты дип саныйм. Әлбәттә, тәнкыйть тә күп булды. Һәрвакыт каядыр үсәргә, үзгәрергә урын бар. Икенче проект буенча әлегә ачыклык юк, язмышы билгеле түгел.

– Зәринә, син бит классик фестивальләрдә, концертларда да катнашасың. Кайсысы якынрак, менә шундый кечкенә яшьләрчә концертлармы, әллә зур тамашалармы?

– Рәсми концертларда да мин татар җырларын үзгәртелгән итеп, үзем күргән, тойган бизәлештә башкарам. Бу – минем стиль, аннан тайпылмаска тырышам. Мин күбрәк эстрада-джаз җырчысы. Тыңлаучыга ошыймы дигәннән, оештыручылар чакыра, бу – иң мөһиме. Ә тыңлаучылар да, зәвыклары да төрле. Татар халкы көчле бит ул, үзенең мәдәниятен, җыр сәнгатен саклый, үзгәрешләргә саграк, шикләнебрәк карый. Әмма бер урында таптанырга теләмим. Классик башкаручыларны да үстерергә кирәк. Шул ук вакытта татар җырларына яңа сулыш өреп, баетырга да кирәк дип саныйм. Безнең төп аудитория – яшьләр.

* * *
_{Белешмә. Зәринә Вильданова 1993 елның 31 маенда Башкортстанның Октябрьски шәһәрендә туган. Татар халык җырларын World music (этник музыка) рәвешендә башкара. Ул татар музыкасын гомуми дөнья мәдәнияте кысаларына кертергә тырыша. Репертуарында үзе язган җырлар да бар. Зәринә Казан дәүләт университетының фәлсәфә факультетын тәмамлаган. Хәзерге вакытта ГИТИСның эстрада факультетында Русия халык артисткасы Надежда Бабкина остаханәсендә һәм Казан музыка көллиятенең эстрада-джаз бүлегендә белем ала. Күпсанлы фестиваль һәм конкурсларда катнашкан.}

Запись Халык җырларын башкаручы, “Үзгәреш җиле”ндә катнашкан Зәринә Вилданованы әбиләр нигә сүгә? [видео] впервые появилась Tatar Today - татар яңалыклары..

Илсөя, Иркә, Гүзәлия, Дилә, Алсу, Гөлназларны бизәнмәгән килеш танырлыкмы [фотолар]

Габдулла Тукай — Wed, 10 May 2017 23:22:00 +0000

Без эстраданың иң кыю кызлары-йолдызларын тупладык. Сәхнәдә без аларны һәрвакыт матур образларда, купшы күлмәкләрдә күреп өйрәнгән, ә көнкүрештә алар нинди соң, безнең танылган кызларыбыз? //Шәһри Казан//

Дилә Нигъмәтуллина иренендә һәм кашында татуаж барлыгын яшермәде. Бу, күрәсең, вакыт экономиясе өчен эшләнгән: озак вакыт бизәнеп утырасы түгел.

Иркә бары тик сәхнәгә генә бизәнеп чыга. “Əни, бизәнмәсәң, син күпкә яшьрәк күренәсең”, – дип әйтә икән өлкән кызы. Иркә маңгаендагы сырларга укол ясатырга ярты ел саен косметологка йөри. Соңгы вакытта битенә массаж ясата башлаган, ул да җыерчыклардан шәп ярдәм итә, ди ул.

Алсу Фазлыевага профессиональ макияж белән бик авыр икән. “Битем “сулый” алмый, кайту белән юынам”, – ди җырчы.

Гел җырчылар янында йөрүче Гөлназ Сәфәрова: “Еш эшләгәч – еш бизәнәм. 12 ел дәвамында мине бизәндерүче визажистым бар, бу эшне аңа ышанып тапшырам. Гади тормышта бары тик керфек белән иренне генә буярга тырышам”, – ди.

Əлбәттә, үзенең макияжсыз чын йөзен күрсәтергә теләмәүчеләр дә булды. Без гел чибәр итеп күрергә ияләшкән бер җырчы ханым: “Мине танымаслар дип куркам”, – диде.

Ə биредәге фотолардагы җырчыларны таныйсызмы? Косметикасыз да чибәрләрме?!

Запись Илсөя, Иркә, Гүзәлия, Дилә, Алсу, Гөлназларны бизәнмәгән килеш танырлыкмы [фотолар] впервые появилась Tatar Today - татар яңалыклары..

Элвин Грейга “скорый” килә [фото]

Габдулла Тукай — Wed, 10 May 2017 10:55:43 +0000

Бүген иртүк Элвин Грейның кинәт хәле начарланып, җырчыга “ашыгыч ярдәм” чакыртканнар. Радикның хәлен белергә теләп, аның продюсеры белән элемтәгә кердек. //Интертат//

“Гастрольләр графигының тыгыз булуы, йокы туймау организмның хәлсезләнүенә китерде. Радикның кан басымы 190га 120гә кадәр менде. “Ашыгыч ярдәм” килеп, уколлар ясап китте. Хәзерге вакытта Радикның хәле яхшы, ул ял итә, көч җыя”, – дип белдерде Intertat.ru хәбәрчесенә Элвин Грейның продюсеры Александр Слюсаренко.

Аның әйтүенчә, бу хәл аркасында Элвин Грейның гастрольләр графигында үзгәрешләр көтелә. “Берничә концертны июнь аена күчерергә туры килде”, – ди Александр.

Запись Элвин Грейга “скорый” килә [фото] впервые появилась Tatar Today - татар яңалыклары..

Венера Ганиева бер егеткә гашыйк булуын һәм аның хыянәтен сөйли [архив фотолары]

Габдулла Тукай — Sun, 16 Oct 2016 10:35:32 +0000

ВЕНЕРА ГАНИЕВАНЫҢ БӨТЕН ҖЫРЛАРЫ МӘХӘББӘТ ТУРЫНДА. ӘММА НИНДИ МӘХӘББӘТ! УЛ СӨЕМБИКӘ МАНАРАСЫДАЙ БИЕК ТӘ, ЗӘҢГӘР ТОМАНДАГЫ ШӘҮЛӘДӘЙ БИЛГЕСЕЗ ДӘ, Ә КАЙВАКЫТ ОПЕРА АРИЯСЕ КЕБЕК КАТЛАУЛЫ, ТИК НӘКЪ ШУНЫҢ БЕЛӘН ҮЗЕНӘ ТАРТУЧЫ ДА…

Миңа отличниклар гашыйк була иде!

Беренче класска мин Казаннын 48нче татар гимназиясенә бардым. Шунда ук үземә карата малайлар игътибарын сизә башладым. Ничек сиздемме? Минем бантиклы юка гына ике толымым бар иде, шуларны дәрестә дә, тәнәфестә дә әй тарталар! Мәхәббәт булмый нәрсә булсын инде бу?! Аннары, самолётиклар ясап, партама һөҗүмнәр башланды, малайлар арасыннан берсе аеруча зур игътибар белән күзәтеп йөрде мине… Ул яшьтә дә егетләрнең күз атуларын сизә алганмын икән. Нәкъ менә беренче класста өлгерә башлый инде ул кыз халкы. Туганнарымның балалар бакчасына йөри торган балаларын күзәткәнем бар. Бакчадан кайткач, бер-берсеннән «Сиңа кем ошый?» – дип сорый башлыйлар… Яратырга һәр яшьтә ярый дип уйлыйм мин. Аннары безгә барак урынына Восстание урамында фатир бирделәр. Икенче сыйныфка мин инде 89нчы татар мәктәбенә бардым.

Әти-әниемә мине татар мәктәбенә җибәргәннәре өчен хәзер дә рәхмәтлемен.

Энеләрем каршыдагы рус мәктәбендә укыдылар, әмма моңа карамастан, татар телен онытмадылар. Гаиләдә без гел татарча гына сөйләштек. Телне белү, беренче чиратта, гаиләдән тора. Ул вакытта татар мәктәпләре аз иде, шуңадыр мәктәбебез һәр өлкәдә дә актив булды. Һәр атна саен әдәби-музыкаль кичәләр уздырыла иде, әдәбият дәресләрен безгә, университеттан практикага килеп, Роберт Миңнуллин укытты. Бездә, башкалардан аермалы буларак, 100 кешелек хор да бар иде. Музыка белән бәйләнешем шушы хордан башланды. Безне ул мәктәптә һәр яктан кайгырттылар, һәр яктан тәрбияли алдылар.
Мәхәббәт… Бу мәктәптә миңа, нишләптер, гел отличниклар гашыйк була торган иде. Үзем күбрәк иҗатка, гуманитар якка тартылып, математика белән алай ук дус түгел идем. Аның белән дус түгеллегемне сизеп, теге отличниклар дәрес алдыннан миңа шпаргалкалар язып биреп, игътибарымны яуларга теләп йөри инде. Ләкин миңа отличниклар түгел, үзсүзлерәкләр, кыюрак егетләр күбрәк ошый иде…

Болконский үләргә тиеш түгел иде!

Китаптагы мәхәббәткә ышана идем. Рус әдәбияты дәресләрендә Толстойның «Война и мир»ындагы геройлары Наташаны һәм Болконскийны бик кызгана идем. Мәхәббәт тарихларының шулай моңсу тәмамлануына борчыла идем. Беркөнне рус теленнән инша язабыз. Мин, ирекле тема сайладым да, Болконский белән Наташаны кавыштырдым. Үзем Толстойга булган ачудан кайныйм, Болконский үләргә тиеш түгел бит инде, алар Наташа белән бер-берсен яратып, тигез гомер итәргә тиеш…
Фантазиям шулкадәр яхшы эшләгән ки, икенче көнне укытучы, инша билгеләрен әйткәндә: «Бик күбегез яхшы язган, ләкин минем бер эшне аерып, аның турында берничә сүз әйтәсем килә», − диде. Без барыбыз да тынып калдык. «Ул иншаны Ганиева Венера язды», − диде дә иншамны бөтен класска укый башлады. И, түбәм күккә тиде инде шул чакта!

Гранатаны минем кебек ыргытучы булмады!

Класста минем кушамат бар иде – Кәрлә. Иң кечкенә кешеләрне кәрлә дип атыйбыз бит инде. Физкультура дәресендә тезелеп баскач, иң соңгы бала булып мин тора идем. Шундый кечкенә идем, ләкин кечкенә генә булсам да, төш булганмын икән. Бөтенесе озын аяклылар, кем яхшы чаба, кем «кәҗә»дән яхшы сикерә… Ә мин шул «кәҗә»дә гел утырып кала идем. Бу хәл тәмам туйдыргач: «Мин нәрсәдер белән булса да танылырга тиешмен!» − дип, спорт ярышларында катнашырга булдым.
Чабыш килеп чыкмады, чираттагы ярыш – граната ыргыту. Шул чакта үз-үземә нинди ачулы булуымны белсәгез! «Нишләп син шулкадәр булдыксыз соң?! Бөтенесе ата, сикерә, йөгерә, син алардан кимме?» Ачуымнан теге гранатаны шундый көчле итеп ыргыттым, име, тегенең кая очып, кая төшкәнен күрми калдым хәтта. Линейкада физрук ярышларның нәтиҗәләрен үзе дә гаҗәпләнә-гаҗәпләнә әйтте: «Граната ыргыту буенча 1нче урынны Ганиева Венера алды».
Миндә балачактан килгән үз-үземне күрсәтү, үземә игътибар җәлеп итү теләге, күрәсең, шулкадәр көчле булган, максат куеп, әле мәктәп укучысы гына чакта да теләгәнемә ирештем бит. Менә шул максатчанлык булмаса, кешедән бернәрсә килеп чыкмый да.

Чәчәкләр, помидорлар һәм ярату турында

Нишләп миңа күз төшерәләр иде икән? Яшь чактагы фотоларны карыйм да… Шундый ямьсез кыз идем инде, валлаһи! 9-10нчы классларга гына «оеша башладым», ә аңарчы «гадкий утенок» сыманрак идем. Хәзерге белән чагыштырганда… җир белән күк арасы! Кызлар бит алар чәчәк кебек: башта ул бөре генә, нинди булуы, нинди төскә керәчәге билгеле түгел, аңа көн дә су сипсәң, иркәләп торсаң, шунда гына чәчәк атачак. Шуңа да күпчелек хатын-кызлар өлгергәнлек чорына кергәч, чын матурлыгында ачыла.
Без үз өебез белән торабыз, җәй буе бакчада әвәрә киләм мин. Чәчәкләрнең үзенчәлеген дә шунда өйрәндем. Помидорлар, кыярлар үстерергә яратам. Миңа аларның бөреләнү чорын, аннан ничек үсеп китүләрен күзәтү ошый. Яратып, күңел биреп карасаң, тәрбияләсәң, шундый уңа бакча җимеше! Бу схема кешеләрдә дә эшли. Наз кирәк, ярату кирәк кешегә.

Дисциплина!

Әнием җырлый, әтием гармунда уйный, мине дә урындыкка бастырып җырлаталар, шигырь укыталар инде. Өебездән кунак өзелми. Миңа, чыгыш ясаганнан соң, кәнфит, җиләк-җимеш эләгә иде. Шушы бүләк алу процессы аеруча нык ошый иде.
Гаиләбездә дисциплина бик көчле иде, сүзебездә тормасак, ялгышып биш минутка гына соңласак, әни ишегалдыннан үк безне каршы алып, «тапочка» белән кирәкне бирә иде.

Ә бер көнне мин гашыйк булдым…

Авыл малае, чибәр инде каһәр, озын дулкынлы чәчле, «Биттлз»лардан калган мода булгандыр, күрәсең. Яшь чакта матурлыкка гына игътибар итәбез бит. Аннары, хаталангач кына, кешедә акыл, тормыш тәҗрибәсе барлыкка килә. Тугрылык ише төшенчәнең дә күпкә мөһимрәк икәнлегенә акыл кергәч кенә төшенәбез. Хыянәт итте миңа ул егет, башка кыз белән йөри башлады. Шул чакта гына минем ике күзем дә ачылды һәм мин кешеләрдә беренче чиратта эчке матурлыкны эзли башладым. Һәм язмыш минем юлыма тормыштагы иң зур мәхәббәтем – Камилне чыгарып куйды…

Мин – елак җырчы

Миңа иң нык тәэсир иткән чыгыш мәктәп елларында булды. 100 кешелек хорыбыз О.Воронец исемле җырчының космонавтларга багышланган: «Я земля, я своих провожаю питомцев, сыновей, дочерей, долетите до самого солнца и назад возвращайтесь скорей!» җырын җырлый. Хор запевны суза, ә мин, кечкенә генә Венера Ганиева, ике адым алга чыгам да нечкә-нечкә куян тавышы белән кушымтаны җырлый башлыйм… Бу чыгыш хәзер дә миңа үзенең ихласлыгы, эмоцияләре белән кадерле. Гел исемдә…
Ул эмоциональлек дигән нәрсә калды миндә, беркая да китмәде. «Гомерләрне үлмәс җыр итик», «Очмыйча син түзеп кара» дигән җырларны башкарганда, мин елыйм. Гомумән, мине елак җырчы дип әйтеп була. Бик җитди опера партияләрен җырлаганда да елыйм. Бәлки, бу сыйфат кемгәдер бик сентименталь, мәгънәсез тоеладыр. Әмма үз табигатеңә каршы барып булмый бит. Аңа ышанырга кирәк.
Азат абый Аббасов мине гел: «Син кара аны, елама!» − дип орыша иде. Елау – бик зур бәхет, дип уйлыйм, шуңа күрә күз яшьләремнән оялмыйм.

Ялкын журналы

Запись Венера Ганиева бер егеткә гашыйк булуын һәм аның хыянәтен сөйли [архив фотолары] впервые появилась Tatar Today - татар яңалыклары..

22 октябрь Казанда нинди “Ап-ак төн” тамашасы ул?

Габдулла Тукай — Mon, 10 Oct 2016 06:47:56 +0000

22 октябрьдә Казанда ап – ак төн көтелә.

“Ап-ак төн” – елның иң зур “МУЗЫКАЛЬ ДЕСАНТ” дискәтүген шулай атадылар.

22 октябрьдә, 20:00 сәгатьтә “Эрмитаж” клубына килүче һәрбер кеше музыка һәм аклык дөньясына чума алачак.

Салкын һәм соры көннәрдә оештыручылар җылыту төне ясарга булганнар. Ак утлар, дәртле җырлар, күңелле бәйгеләр һәркемне җылытачак. Барлык артистлар да үз чыгышларында ак төскә игътибар бирәчәк, ә актан киенеп килүче кунакларны бүләкләр көтә. Әйтик, тамашага актан киенеп килүчеләр, һәрбер билетка 50 сум күләмендә, ташлама алачак.

Казанның иң зәвыклы кичәсен күрми калма!

Белешмә: “Музыкаль десант” татар эстрадасы тарихында иң зур гастрольле проект булып санала.

“Музыкаль десант” – ул 2007 елдан эшләп килүче, татар эстрадасы йолдызлары катнашындагы зур концерт.

Хәрәкәтчән музыкаль прект елдан – ел яңа шәһәрләр һәм яшьләр күңелен яулый. Өч ел рәттән, 30 танылган җырчы татар эстрадасын сөючеләр белән очрашуларга чыгып китә. Алар республиканың иң зур шәһәр – районнарында чыгыш ясый. Яр Чаллы, Алабуга, Түбән Кама, Зәй, Әлмәт, Бөгелмә, Норлат, Арча, Мамадыш, Буа һәм ниһаять! Алар Казанда! Тиздән 22 октябрь, 20:00 сәгатьтә күп артистлар катнашындагы тамаша “Эрмитаж”да. Гүзәл Уразова, Илдар Хәкимов, Алсу һәм Азат Фазлыевлар, Мөнир Рахмаев, Ландыш Нигъмәтҗанова, Илназ Минвәлиев, Руслан Кирамутдинов, Ранил Нуриев, Илдар Әхмәтов, Илназ Сафиуллин, Сөмбел Билалова, Илназ Гарипов, Ленар Яшен, Айгөл Рәхимова, Ришат Фазлыйәхмәтов, Чәчкә, Дамир Зиннатуллин, Ринат Гыйлфанов, Гөлназ Халикова, “Кыю кызлар”, Илшат Сафин, Регина Тимербулатова, Ләйсән Мухиева һәм башкалар.

“Музыкаль десант” проекты алдында зур максат тора: сәламәт яшәү рәвешен пропагандалау һәм яшьләрне туган телгә, татар теленә тарту.

Узган еллардагы “Музыкаль десант” тамашачысы – 200 меңгә якын Татарстан халкы. Тагын да зуррак аудиторияләрне колачлау нияте белән, әлеге тамаша бушка ачык мәйданнарда да үткәрелде.

Запись 22 октябрь Казанда нинди “Ап-ак төн” тамашасы ул? впервые появилась Tatar Today - татар яңалыклары..

Татар артистлары мәктәптә ничәле алып укыган?

Габдулла Тукай — Wed, 05 Oct 2016 11:49:08 +0000

Бүген Россиядә Халыкара Укытучы көне билгеләп үтелә. Укытучы – дөньяны танып-белергә омтылучы, балаларның керсез пакь күңелләренә гыйлем орлыклары чәчүче һәм аларның тигез матур шытымнар бирүен сабыр гына көтүче остаз, әниләр белән бер үк дәрәҗәгә куярлык изге зат. Татар эстрадасы артистлары беренче укытучыларын хәтерлиме, мәктәптә ничек укыганнар икән? Бу хакта Intertat.ru хәбәрчесе үзләреннән сорашты.

Булат Нигъмәтуллин: Беренче укытучым – Сәрия апа. Бүгенге көндә, Аллага шөкер, исән-сау. Күптән күрешкәнебез юк. Үзем мәктәптә әйбәт укыдым: “4”ле һәм “5”ле билгеләренә.

Зәйнәб Фәрхетдинова: Минем беренче укытучым икәү. Укырга керүем дә бик кызыклы булды. Мин Ташкент өлкәсендәге Красногорск шәһәренең рус мәктәбендә укый башладым. Кая анда кемнеңдер исемен истә калдыру?! Үземнекен көчкә әйтә идем! Бик зур тырышлык белән сынаулар үтеп, беренче сыйныфны тәмамлагач, мине кире авылга кайтардылар. Анда укытучым Мәгъфия апа каршы алды. Беренче укытучым күптән юк инде. Ә 4нче сыйныфтан 10нчыга кадәр Хәдия апа җитәкләде. Ул, Аллага шөкер, исән, хәлен белеп торабыз, очрашканыбыз бар. Мәктәптә яхшы билгеләргә укыдым. Читтә укып алуым бушка китмәде, рус телен үзләштерүдә ярдәм итте.

Салават Миңнеханов: Беренче укытучым Зөлфия Абдулловна исемле. Мәктәпкә бик еш керәм, укытучыларым белән аралашам. Кайбер бәйрәмнәрдә чыгыш ясарга да туры килә. Хәзер анда Хәйруллин Ленар Хабибуллович исемле яшь һәм өметле егет директор булып эшли. Без аның белән бик дус, тату мөнәсәбәтләрдә. Үзем мәктәптә яхшы укыдым. Начар билгеләр дә булгалады, аның өчен әти-әнине мәктәпкә чакыргаладылар.

Гүзәл Идрисова: Беренче сыйныфка рус мәктәбенә бардым, аннары татар гимназиясенә күчтем. Рус мәктәбендә татар телен укыткан укытучымны хәтерлим. Азия Гатиевна Чаллыдан Казанга телевидениегә, 8 март уңаеннан татар телендә шигырь сөйләргә алып барды. Ул чакта үземне бик бәхетле итеп хис иттем. Татар гимназиясендәге укытучым Дания Гарифовна исемле иде. Ул бүгенге көндә исән-сау, лаеклы ялда. Бик таләпчән булды. Музыкадан Талия Раисовна укытты. Мин һәрвакыт аның кебек булырга хыялландым. Дәресләрне мавыктыргыч итеп алып баруы ошый иде. Чаллыда яшәгәндә аның белән кунакка йөрештек. Гомумән, гимназиядәге укытучыларның барысы да диярлек олы яшьтә иде, укучыларны элекке заман буенча тәрбияләделәр. Мәктәптә яхшы укыдым. Тормышымда зур урын алган, зур сәхнәгә юл ачкан тагын бер укытучым – остазым Луиза Ахмадулловна. Кызганычка каршы, йөрәк өянәгеннән вафат булды. Кыяфәте белән Әлфия Авзаловага охшаган иде. Ул мине укытып кына калмады, Гөлдания Хәйруллина төркеменә дә урнаштырды. Гомерен музыкага багышлаган зур шәхес!

Мөнир Рахмаев: Беренче укытучым Марина Евгеньевна исемле иде. Аны бик яратып искә алам. Кызганычка каршы, ул вафат. Тормым иптәше дә, улы да, үзе дә кыска гомерле булдылар. Урыннары җәннәттә булсын… Мәктәптә әйбәт укыдым, 3леләр булмады. Алгебра фәненнән бераз “тарттылар”, чөнки концертларда еш чыгыш ясагач, аны үзләштерергә вакыт калмый иде. Тарих, әдәбият кебек гуманир фәннәрне күбрәк яраттым.

Люция Мусина: Лениногорск районы Туктар Урдаласы авылында беренче сыйныфка укырга кердем. Безнең авылга тумышы белән Актаныш районыннан булган яшь, бик чибәр укытучы килде. Ул минем беренче укытучым Авзалова Ирина Назыймовна иде. Мин аны бик яратып, хөрмәт белән искә алам. Ирина апа белән күрешеп аралашып торабыз. Концертлар булса, ул мине чәчәккә күмә. Җыр өлкәсенә кереп китүемә дә Ирина апаның өлеше зур. Ул ансамбль оештырып безне биергә һәм җырларга өйрәтте. Мең рәхмәт аңа! Мин мәктәптә “4”ле, “5”ле билгеләренә генә укыдым. Мине укыткан барлык укытучыларны да бәйрәм белән кайнар котлыйм, зур рәхмәтләремне җиткерәм! Барлык укытучыларга авыр хезмәтләрендә сабырлык һәм түземлек телим!

Рамил Шарапов: Беренче укытучым – Айгөл апа. Бүгенге көндә Казанда күрше йортларда гына яшибез. Мәктәптә 3ле, 4ле билгеләренә укыдым. Мәктәптән 9нчы сыйныфны тәмамлагач киттем.

Гөлназ Сираева: Беренче укытучым – Иванова Светлана Ивановна. Биш ел тирәсе күргәнем юк үзен. Мәктәптә укырга бик ярата идем, отличница булдым. Каникул вакытында тизрәк уку башлансын дип, елаганым истә. Институтны да кызыл дипломга тәмамладым.

Илнар Сәйфиев: Тукай районы Биклән авылы мәктәбендә укыдым. Беренче укытучым – Әлфия Саитовна. Мәктәпне тәмамлап, шактый еллар узгач, Чаллыда күрешкән идек. Бик рәхмәтлемен үзенә. Гомумән алганда, әйбәт укыдым. Төрле чаклар булды, “өч”ле дә алып кайткаладым.

Алсу Фазлыева: Беренче укытучым Минһаҗева Гөлнара исемле. Аны 20 ел күргәнем юк инде. Ә 4 сыйныфтан алып безне Гөлнур Габделфәртовна җитәкләде. Ул – минем остазым, аның белән гел күрешеп торабыз. Немец теле укытучысы булса да, музыканы бик яратты. Хәтта сыйныфыбыз Зәйнәб Фәрхетдинова исемен йөртте. Җырга, тәрбиягә бик нык басым ясады.

Рамил Закиров: Беренче укытучым Дания Яхъивна исемле. Башлангыч сыйныфларда бишлеләргә генә укыдым.

Алинә Сафиуллина: Беренче укытучым Сания апа исемле иде. Хәзер инде вафат, урыны оҗмахта булсын! Бик тыныч холыклы кеше иде. Сыйныфта 4әү генә идек, бик яхшы укыдык.

Рәсим Фасыйхов: Беренче укытучым Зиннәтуллина Миләүшә Мансуровна иде. Башлангычта юньләп укырга теләк булмады. Үсә төшкәч, инглиз теле керә башлагач кына укуга карата мәхәббәт уянды. Аны уяткан укытучы апаларыма рәхмәтлемен! Авылга кайткач, әти аркылы мәктәп турында кызыксынам, минем күңелле чагым шунда үтте бит. Йә булмаса үзем кереп чыгам. Безнең мәктәп олимпиадалар буенча гел беренче урыннарда иде. Кайбер укытучыларыбыз да президент бүләгенә лаеклы булды. Укытучыларны хәзер күрсәм, күңел тула, алар бит миңа күпме белем бирде, әти-әниләр кебек алар! Гомумән, мине кеше иткән укытучыларыма рәхмәт! Өч абыем, апам – белемнәре буенча укытучы. Нияз абыем бездә – физкультура, әти музыка укытты. Тормыш иптәшемнең әнисе дә – татар теле укытучысы. Аларны барысын да һөнәри бәйрәмнәре белән котлыйм! Раяз абый Арчада укыганда, практикага безнең мәктәпкә кайтты. Җырлый торган егетләрдән ансамбль оештырды. Шул чакта абыйның йогынтысы нык тәэсир итте, баянда уйнау, җырлау кебек әйберләргә өйрәнә башладым.

Котлы булсын күркәм бәйрәмегез
Саулык теләп, зурлап дәшәбез.
Игелекле хезмәтегез өчен
Хөрмәт тоеп озак яшәгез!

Эльвира ШАКИРОВА

Запись Татар артистлары мәктәптә ничәле алып укыган? впервые появилась Tatar Today - татар яңалыклары..

Фирдүс Тямаев: “Репетициядән чыктым, өйгә кайтып барам, аккошым!”

Габдулла Тукай — Thu, 29 Sep 2016 09:12:15 +0000

Фирдүс Тямаев – бүгенге көндә популяр җырчылар рәтендә. Ә кеше никадәр популярлык казана, аның турындагы имеш-мимешләр дә шулкадәр күбрәк була. Соңгы арада Фирдүс турында тискәре фикерләр еш ишетелә башлады. Моны “тикшерү” максатыннан җырчы белән очрашу оештырырга булдык.

Хәзерге вакытта Фирдүс Тямаев гастрольләрдә йөри, ягъни аны бер урында “тоту” җиңел түгел. Intertat.ru хәбәрчесе шалтыратканда исә җырчының Казанга килүе иде. Очрашуны Казанның бер ресторанында билгеләдек. Фирдүсне күрү белән аның турындагы сүзләр искә төште. Беренчедән, җырчыны артык горур, мактанчык диләр. Әмма биредә ул җитәкчедән алып гади хезмәткәрләргә кадәр исәнләште, хәл-әхвәл белеште. Шунысы да анык күренеп тора: биредә аны яхшы беләләр. Чәй өстәле янында Фирдүс белән әнә шул горурлык, мактану, кешеләр, туганнар белән мөнәсәбәтләр турында сөйләштек.

– Мин хәлемнән килгәнчә туганнарга ярдәм итәргә тырышам. Туган булмаса да, якын күргән кешеләремә булышам. Ләкин бу турыда сөйләшергә яратмыйм, ул мактанып йөри торган әйбер түгел. Байлык – бер көнлек, туганнарның, дусларның кадерен белеп яшәргә кирәк. Мин көн саен Аллаһы Тәгаләгә рәхмәт әйтеп уянам һәм йокларга ятам, – диде ул.

Фирдүс Тямаевтан башка артистлар турында фикерен сорашам, чөнки аның популярлыгы күпләрнең “эчен пошыра”. Тик ул кырт кисеп, җавап бирүдән баш тартты. “Шоу-бизнеста синең янда бертөрле, артыңда икенче төрле сөйләшү очраклары еш була. Шуңа да кемгәдер ачылып сөйләшергә яратмыйм”, – диде җырчы.

Ул арада Фирдүс сәгатенә күз салды һәм репетициягә ашыгуын белдерде, мине дә үзе белән чакырды. Әлбәттә, ризалаштым. Рестораннан чыкканда, җырчыны ике кеше туктатып үз йомышын сөйләде. Фирдүс берсен дә “вакыт юк, ашыгам” дип кире какмады, һәркайсын тыңлап, телефон номерын биреп саубуллашты. Бу җырчының гадилеге сәхнәдән үк күренеп тора, анысында шигем юк иде, анысы.

Машинада барганда, Фирдүс яңа җырларын тыңлатты. Аның репертуарында дәртле җырлар да, күңелне актарып чыгара торганнары да бар. “Кайбер артистлар үземнең җырлавымны тыңлый алмыйм, дип әйтә. Син үзеңне тыңларга яратасыңмы?” – дип сорыйм. “Әлбәттә! Мин һәр җырымны яздырып тыңлыйм. Җитешсез яклары булса, яңадан яздырам”, – ди Фирдүс. Ә җырлары шәп, тирән мәгънәле.

Репетицияләр “Татар радиосы”ның туган көненә багышланган концерт уңаеннан үткәрелә икән. Концерт инструменталь ансамбль белән оештырыла. Фирдүс салкын тидергән һәм бу аның тавышында да чагылды. Шулай да җырчы баш тартмыйча репетициягә килгән. Фирдүсне күзәтеп тору кызык. Күңелле кеше ул! Шул ук вакытта шаяра, шундук җитдиләнә. Шушы кыска вакытлы репетициядә музыкант егетләрнең кәефен дә күтәрде, продюсер белән сүзгә дә килде, әмма ахыр чиктә уртак фикергә килделәр. Шунысын әйтергә кирәк: Фирдүскә үз эше бик ошый, ул аннан тәм таба. Репетициядән дә күтәренке рух белән чыкты.

– Фирдүс, “солянка” ише җыелма концертлардан акча керәме сиңа?

– Юк. Без “Барс-Медиа” оешмасы белән дустанә мөнәсәбәтләрдә. Һәр чарага чакыралар, хөрмәт итәләр. Алардан акча алганым юк. Әле киресенчә, төркемемне алып килеп, үз акчама ашатам, урнаштырам.

– Синең кеше үпкәләткәнең бармы?

– Әйе, бар. Кайвакытта кинәт кенә кызып китеп берәрсенең кәефен бозырга мөмкинмен. Кырыс булган, турыдан әйткән чакларым була. Үпкәләткәнмен икән, барысыннан да чын күңелемнән гафу үтенәм. Шалтыратмаган вакытлар да була. Туганнарым да, дусларым да үпкә сакламасын иде.

– Синең турында “Фирдүс җырлый белми, ничек халык җыя?” диләр. Чыннан да, ни өчен халык сине ярата?

– Тормышта нинди, сәхнәдә дә шундый мин. Залда утырган һәр кешене күрәм. Тамашачым белән һәрвакыт элемтәдә торам. Әгәр авырып киткән чагым булса, халык алдына чыгып гафу үтенәм, бүген миңа җырларга ярдәм итсәгез иде, дим. Халык минем концертка мине күрергә яки тыңларга түгел, ә яшәргә килә!

– Соңгы арада телевизор экраннарында яңа клипларың күренми башлады. Бу өлкәдә яңалыклар көтеләме?

– Быел ике клип өстендә эшлибез. “Язмыш төеннәре” җырының клибы тормыш иптәшем Резеда белән Нурлатта төшерелде. Ул чын мәхәббәт, чын ярату турында. Бу дөньяда күзеңне акайтып акча артыннан чабарга түгел, ә гаиләгә, балаларга тиешенчә игътибар бирергә кирәк. Биш көн гастрольдә йөреп кайтып, бүген көне буе улым Раян белән уйнадым. Аның һәрбер хәрәкәте, елмаюы минем өчен зур сөенеч. Мине сагынуы күренеп тора, миңа улым белән рәхәт, күңелле. Икенче клип “Алыштырмам сине беркемгә” җырына төшерелде. Анысы шаян рухта. Ике клип та якын арада дөнья күрәчәк.

Ул кадәр үк “начар” кеше түгел икән бит Фирдүс Тямаев! Аның белән үткәргән 2-3 сәгать дәвамында бу җырчының гади, эчкерсез, ярдәмчел булуына инандым. Әлбәттә, кырыслыгы да юк түгел, әмма ничек тиз кабынса, шундук тынычлана. Андагы энергетика! Ничек йөрәге түзә икән дим?! Телефоны бер мәлгә дә тынмый. Әле берсе йомыш белән шалтырата, әле икенчесе. Шул ук вакытта проблема да чишә: кемнеңдер дусты юлда бәлага юлыккан, ЮХИДИга шалтырата. Хатыны Резеда шалтыраткач, ягымлы сүзләрен җәлләмичә: “Репетициядән чыктым, өйгә кайтып барам, аккошым!” – дип җавап бирде.

Эльвира ШАКИРОВА

Запись Фирдүс Тямаев: “Репетициядән чыктым, өйгә кайтып барам, аккошым!” впервые появилась Tatar Today - татар яңалыклары..

Архивы татар артистлары - Tatar Today - татар яңалыклары.

Илсөя Бәдретдинова Казан үзәгендә меңләгән халыкны татарча җырлата [видео]

Ләйсән Мәхмүтова: “Әти-әни рухлары шат, тыныч булсыннар”

“Шәһри Казан” өеннән чыга алмый яткан җырчы Дәниф Шәрәфетдинов белән елатырлык әңгәмә яза

Халык җырларын башкаручы, “Үзгәреш җиле”ндә катнашкан Зәринә Вилданованы әбиләр нигә сүгә? [видео]

Илсөя, Иркә, Гүзәлия, Дилә, Алсу, Гөлназларны бизәнмәгән килеш танырлыкмы [фотолар]

Элвин Грейга “скорый” килә [фото]

Венера Ганиева бер егеткә гашыйк булуын һәм аның хыянәтен сөйли [архив фотолары]

Миңа отличниклар гашыйк була иде!

Әти-әниемә мине татар мәктәбенә җибәргәннәре өчен хәзер дә рәхмәтлемен.

Болконский үләргә тиеш түгел иде!

Гранатаны минем кебек ыргытучы булмады!

Чәчәкләр, помидорлар һәм ярату турында

Дисциплина!

Ә бер көнне мин гашыйк булдым…

Мин – елак җырчы

22 октябрь Казанда нинди “Ап-ак төн” тамашасы ул?

Татар артистлары мәктәптә ничәле алып укыган?

Котлы булсын күркәм бәйрәмегез Саулык теләп, зурлап дәшәбез. Игелекле хезмәтегез өчен Хөрмәт тоеп озак яшәгез!

Эльвира ШАКИРОВА

Фирдүс Тямаев: “Репетициядән чыктым, өйгә кайтып барам, аккошым!”

Эльвира ШАКИРОВА

Котлы булсын күркәм бәйрәмегез
Саулык теләп, зурлап дәшәбез.
Игелекле хезмәтегез өчен
Хөрмәт тоеп озак яшәгез!