Радик Фәрхуллин озак вакытлар авырган, дип хәбәр итә телеканал.

Радик Фәрхуллин рус теле һәм әдәбияты укытучысы булып эшли, аннары «СТС-Казань» телеканалында корреспондент, аннары «Время новостей» яңалыклар тапшыруы алып баручысы була. 2003 елда ТНВ каналына килә, 2005 елда рус телендәге яңалыклар программалар дирекциясенең баш редакторы итеп билгеләнә, 2012 елда – «ТНВ-Планета» каналының яңалыклар хезмәтен җитәкли. 2016 елдан «Новости Татарстана» тапшыруы проюсеры. 2023 елда аңа Татарстан Республикасының атказанган матбугат һәм массакүләм коммуницияләр хезмәткәре дигән мактаулы исем бирелә.

— Татарстанның беренче президенты Минтимер Шәймиевның чит илгә визитлары, президент Рөстәм Миңнеханов катнашындагы халыкара чараларны яктырткан материалларын республика җитәкчеләре белән ничек эшләргә икәнен күрсәткән мисаллар дип күрсәтергә була. Ул үзен мөстәкыйль, җаваплы, тырыш, инициативалы хезмәткәр итеп күрсәтте. Ул эшенә намуслы карады, профессиональ үсешкә омтылды, аналитик фикер йөртте, вәзгыятьне тиз генә бәяли алды. Коллективта максатлар куеп, хезмәткәрләрнең эшләрен тәртип белән алып барды. Аның үз профессиясенә мәхәббәте карьерасын гына түгел, язмышын да билгеләде, диелә ТНВ хәбәрендә.

 

“Синең безнең белән булмавыңа ышануы кыен. Хуш, дустым, бәхил бул. Очрашканга кадәр. Беркем дә безгә язмыш күпме вакыт биргәнен белми. Син озак көрәштең һәм чәчәк атып торган чагыңда киттең. Безне бүген искиткеч кеше, хезмәттәшебез Радик Фәрхуллин ташлап китте”, – дип язган дусты Владислав Зиновьев.

Радик Фәрхуллин озак еллар яман шеш белән авырган иде. Хезмәттәшләре әйтүенчә, ул берара каты итеп авырган, аңа химиотерапия дә ясаганнар, әмма ул яшәп, эшләп китәргә көч тапкан. Әмма соңгы ярты елда  кабат авырый башлый һәм бүген төнлә китеп тә барган. Радик Фәрхуллин өйләнгән, беренче класста укучы кызы бар иде.

Радик Фәрхуллин белән хушлашу бүген, 10 апрельдә, 13.00 сәгатьтә ТНВ бинасы каршында (Шамил Усманов урамы, 9 йорт) узачак. Ул Тынычлык бистәсендәге зиратка җирләнә.

ТАТАР ТУДЕЙ ТЕЛЕГРАМ КАНАЛЫ - https://t.me/tatartoday

Запись ТНВ яңалыклар хезмәте продюсеры Радик Фәрхуллин вафат впервые появилась Tatar Today - татар яңалыклары..

Коронавирус таралу куркынычы һәм өлкәннәрнең бу вируска күбрәк дучар булуы сәбәпле, “Яңа Гасыр” телеканалы 30 марттан “ТНВ – өлкәннәр өчен” сәхифәсен башлап җибәрә. Көн саен 11:00 сәгатьтән “ТНВ-Татарстан” һәм “ТНВ-Планета” каналларында сез яраткан фильмнар, спектакльләр, концертлар күрсәтеләчәк.

View this post on Instagram

A post shared by Телеканал ТНВ (@tvtnv)

Бу көннәрдә бергә булыйк, күңелне төшермик, өйдә булган вакытны кызыклы уздырыйк, диде Татар Тудейга ТНВ каналының матбугат хезмәте.

View this post on Instagram

A post shared by Телеканал ТНВ (@tvtnv)

Запись Коронавирус сәбәпле ТНВ каналы эфирында үзгәрешләр булачак впервые появилась Tatar Today - татар яңалыклары..

“Яңа гасыр” (ТНВ) телеканалының “Хәбәрләр” тапшыруында журналистлар кытлыгы сизелә. Бу хакта каналда даими реклам әйләндерелә. Хәбәрчеләр бер-бер артлы китә, аларның урыннары буш кала. Бу проблем яңалыклар хезмәтенең татар һәм урыс бүлегендә дә күренә.

Соңгы ике елда егермеләп хезмәткәр телеканал белән элемтәләрен өзгән. Аларның күбесе – мәгълүмат, яңалыклар хезмәтендә эшләүчеләр. Гомер буе урысча яңалыклар алып барган Илфат Абдрахманов эштән җибәрелгән. Аның белән килешү көтелмәгәндә өзелгән. “Новости” хезмәтендә эшләүче Альбина Полищук, Тимур Шәйдуллин, Арсений Маврин, Юлия Казанцева, Лира Сәхапова, Евгения Андреева, Ринат Әсхадуллин, Александра Севостьянова, Илья Таһиров, Эмилия Хаким, Анна Величко, Эльмира Шәймәрдәнова һәм башка журналистлар киткән. “7 дней” тапшыруында хезмәт иткән Рәмис Латыйпов та “ТНВ” белән хушлашты.

Озак еллар Татарстан телевидениесендә хезмәт иткән, аның йөзе саналган Илфат Абдрахманов яңа җитәкчелек килү белән эштән алынган. Ни сәбәпле икәнен үзем һаман да аңламыйм, миңа берни әйтмәделәр, документларны тоттырдылар да чыгырып җибәрделәр дип сөйләде ул Азатлыкка. “Яңа гасыр”да милли кадрлар үксез, кадерсез кешеләр дигән фикердә ул.

“Телевидениедән киткәнемә инде ике ел. Яңа җитәкчелек үз такымы белән килде, аның үз эшләү ысулы, минем инде кирәклегем калмады. Ни сәбәпле эштән алынуым, нәрсәм белән ошамаганымны һаман да аңламыйм. Миннән сорап тормадылар. Кадрлар бүлегенә чакырдылар, сезнең белән килешү озайтылмый, кул куегыз диделәр дә вәссәләм. Кем беләндер аңлашу, дуслар-танышларымнан ярдәм сорауны түбәнчелек дип санадым. Чыктым да киттем, шуның белән телевидение белән арам өзелде. Минем белән ямьсез хушлаштылар, кешегә дорфа караш булган коллективта үземнең дә эшлисем килмәде.

Хәзер телевизор карамыйм. Яңалыкларны белер өчен интернет бар. Телевидениедәге хәбәрләргә ышанмыйм, аның эчке кухнясын, сәясәтен беләм бит. Кызык түгел, туйдым дисәң дә була. Мин эшләгән телевидениедә рух бар иде, кеше кыйммәте булды. Хәзер исә бар нәрсә дә акча эшләүгә корылган. Проект ачасың килә икән, рәхим ит, әмма иганәчесен тап. Акча китерәчәкме ул дип сорыйлар.

Элек мондый систем юк иде. Эшкә алынасың икән, син эшлисең дә эшлисең. Кагыйдәләр үзгәрде, бер елга килешү төзелә, кеше килешү яңадан имзаланырмы дип борчылып эшли. Хезмәт хакы да бермә-бер кимеде. Элек акчаның күләме стаждан, категориядән, нинди ставкага эшләгәнеңә бәйләп түләнгәнен аңлый идек, яңа җитәкчелек килгәч берни аңлашылмый. Көнбатышка карап эшләргә телиләр, әмма килеп чыкмый бит. Иреклек тә, кешене, хезмәткәрләрне дә кадерләү юк. Милли кадр, аеруча телевидениедә эшләүче хезмәткәр – берәмтекләп исәпләнгән тауар. Аңа ике куллап тотынырга кирәк. Ә ТНВда кешегә, аның иҗатына карата битараф мөнәсәбәт сизелә. Акча эшлибез дип кешеләрне кадерсезләү – хаталы эш алымы. Кадрларны кадерләү, аларда эшкә кызыксыну булдыру мөһим.

Көнбатышны алыйк, анда өлкән, карт кешеләр дә эшли, гәүдә калынлыгына да исләре китми. Ә бездә телевидение яшьләрне, матурларны ярата диләр. Әмма менә сәясәт, социаль проблемнар турында тапшыру ди, яшь матур курчак ышандырып, теманы аңлап сөйлиме? Аудиториянең аңа ышанычы бармы? Русия, дөнья, Татарстанда булган вакыйгалар турында тәҗрибә туплаган, тормышны белгән кеше җиткерсә, дөресрәк бит”, дип сөйләде ул.

Илфат Абдрахманов ниләр белән шөгыльләнүен анык кына әйтә алмады. “Үземне каядыр күк белән җир арасында кебек хис итәм”, диде. Концерт алып барырга чакырсалар, баш тартмыйм, диде ул.

Урыс телле кадрларны туплауда авырлык әллә ни юк, профессиональ белгечләргә кытлык сизелми. Вакансия булса, кешесе дә табыла. Әмма татар телле журналистлар, өстәвенә телевидениедә эшләрлек сәләте булучылар күп түгел. “Яңа гасыр” телеканалында татар телле контент ясаучыларның сафлары да сирәгәя.

Татар телендәге “Хәбәрләр” тапшырыуында хезмәт куйган, журналистикада исем ясаган хезмәткәрләр бер-бер атлы эштән китәргә мәҗбүр булган. Гөлнур Хәбибуллина, Альфред Мөхәммәтрәхимов, Марсель Әскәров, Гөлнур Әминова белән хушлаштылар, күптән түгел Гөлназ Мирхәлилова, Ләйсән Сабирова да ТНВдан эштән китте. Хәбәрчеләргә ияреп “Хәбәрләр” тапшыруыннан режиссер Илүзә Апанаева да телеканал белән араларны өзгән.

“Хәбәрләр”дә элегрәк уннан артык хәбәрче булса, хәзер 6-7 кешегә генә калган. ТНВда эшләүче, ләкин исемен әйтергә теләмәгән хезмәткәр редакциягә кешеләр җитми дип сөйләде Азатлыкка. “Ел дәвамында телеканалда хәбәрчеләрне эшкә чакырып игълан әйләндерелә. Ләкин яңа өйрәнчек кешеләр килә дә китә. Тәҗрибәле бер журналистның да килгәне юк”, диде ул. Алай гына түгел, хәбәрләр киләчәктә бөтенләй чыгудан туктау, яки “Новости”ның тәрҗемә варианты булу куркынычы алдында.Телеканалда үзгәрешләр 2016 ел башында “Яңа гасыр” җитәкчелегенә Мәдинә Тимерҗанова килгәннән соң башланды.

Аңарчы ул җитәкләгән KZN каналы ябылды һәм аңа нәкъ хәбәрләр белән идарә дилбегәсе тапшырылды. Телеканалның баш продюсеры Миләүшә Айтуганова Мәдинә ханым килү белән эштән китте. Татарстан премьер-министрының элекке беренче урынбасары, хәзер президент ярдәмчесе Равил Моратовның бертуган сеңлесе, Татарстандагы федераль инспекторның элекке хатыны Мәдинә Тимерҗанова яңа вазифага керешү белән яңалыклар хезмәтен үзгәртә башлады. Аның логотибы да Русия байрагы төсмерләрен алды.

Азатлык Мәдинә Тимерҗанова белән элемтәгә кереп кадрлар белән эш итү, эш ысулы турында сөйләште. Аның күзлегеннән хәлләр алай ук куркыныч түгел. Эштән китәм диючеләрнең һәрберсенең үз сәбәбе, кемдер алга таба үсә алмады, алар белән юллар аерылды, дип сөйләде ул Азатлыкка. “Хәбәрләр” хезмәтендә бүген ничә кеше эшләгәнен, ничә кеше китүе хакында төгәл саннар аталмады.

Илшат Әминев (с), Мәдинә Тимерҗанова

​”Әйе, безгә хәбәрчеләр кирәк, әмма бу гадәттән тыш хәл түгел. Әдәби татар телендә фикерләүче, шул ук вакытта телевизион журналистика нигезләрен белүче һәм эшкә иҗади карашы булган кешеләр аз икәне билгеле. Әмма бу проблем урыс теллеләргә дә кагыла. Озак еллар дәвамында эшлим, каядыр тагын татар телле тележурналистлар бар дип ышанам, аларны табасым, өйрәтәсем килә. Без эзләнүдә. Иҗат потенциалын арттыру – төп максатыбыз. Коллективны көчле кадрлар белән тулыландыру проблемы бүген барлыкка килмәде, иртәгә дә хәл ителмәячәк. Кеше килә, китә. Кемдер тиз өйрәнә, кемгәдер бу һөнәр авыр, кемдер моны үзе аңлап китә.

Әмма коллективка кеше җитми, кытлык, кризис кичерәбез дип әйтә алмыйм. Әйе, китүчеләр бар, төгәл санын әйтә алмыйм. Бездә бит хатын-кызлар күп, алар арасында декретка китүчеләр күп. Кадрларга кытлык алар аркасында да барлыка килә. Безгә вакытлыча эшләргә кеше кирәк. Ике телдә дә эшләүче кадерле хезмәткәр бар иде –​ Ләйсән Сабирова, ул кияүгә чыгып Зәйгә күченеп китте. Китүчеләрнең һәркайсында объектив сәбәпләр. Озак еллар буына эшләп арыганнар да бар, алар тормышларын үзгәртергә тели. Андый кешене ничек тоткарларга була? Без аларның карарларына ихтирам белән карыйбыз.

Яңа эш системын кабул итәлмәүчеләр дә булгандыр, моны кире какмыйм, әмма мин яңача эшләргә, үсеш, хәрәкәт итәргә теләүчеләр белән эшләргә телим. Аларны хуплыйм, ярдәм итәчәкмен. Үпкәләүчеләр турында миннән сорамагыз, мин пәрдә артында чыш-пыш килүчеләр турында сөйләшергә яратмыйм. Мин теләсә нинди хәбәрчегә ачык булдым. Дөресен әйтим, аерым кешеләрдән бу кадәр тискәре карашны, мөнәсәбәтне беркайчан да үземдә татыганым булмады. Әмма кешеләрнең үзенчә фикерләргә хакы бар”, диде ул.

Яңа җитәкчелек килгәч логотип та үзгәрде

“Яңа гасыр” телерадикомпаниясенең баш мөдир урынбасары Мәдинә Тимерҗанова татар телендәге “Хәбәрләр” бервакытта да урыс телле “Новости”ның тәрҗемә версиясе булмаячак дип ышандырды.

“Бездә бер редакция, әмма ике аерым тапшыру бер-берсен кабатламый диярлек. Бер вакыйга “Новсти”да бер төрле, “Хәбәрләр”дә икенче төсмер белән чыга ала, иҗади алымнар аерыла. Татар тапшыруы үзаллы булып калачак. Телеканалда татар телле журналистиканы үстерергә кирәклеген аңлыйлар”, диде ул безгә.

Азатлык “Яңа гасыр” телеканалында татар телендә яңа сәяси-иҗтимагый, аналитик тапшырулар чыгачакмы дип кызыксынды. Мәдинә ханым атнага бер тапкыр чыга торган татар телендә “Адымнар” тапшыруы бар, тагын берне ачуга ихтыяҗ юк, аның өчен ресурслар күп таләп ителә, әлегә “Адымнар” җитә дип уйлыйм”, диде.

Дәрәҗәле журналистлар, алып баручылар да башта эфирдан югалды, аннары гомумән бер-бер артлы “Яңа гасыр”дан китте. Мәсәлән, телеканалның йөзе булып саналган хезмәткәрләр Миләүшә Сибгатуллина, Энҗе Шәйхетдинова, Раил Өметбаев та телеканал белән хушлашты.

Азатлык “Яңа гасыр” телерадиокомпаниясенең башкарма мөдире Айрат Сибагатуллиннан милли кадрлар белән эш итү турында кызыксынды. Каналдан хезмәткәрләр китүе турында фикерен Айрат әфәнде кыска тотты. Кеше китә икән, аның урынына телевидениегә керү теләге белән янган, шул сәбәпле нинди дә шартларга риза булган өйрәнчекләр чират тора дигән фикердән чыгып эш ителә. Урыслар әйтмешли, изге урын буш тормый.

​”Мәсәлән, Миләүшә Сибгатуллинаның үз эше бар. Ул бизнеска кереп китте. Һәрбер кеше юлын үзе сайлый. Кеше китә икән, алар урынына башкасы килә. Кемдер эшли-эшли арый. Аларның берсен дә эштән куучы булмады”, диде Айрат Сибагатуллин.​

Энҗе Шәйхетдинова Азатлыкка ” Яңа гасыр”дан китү сәбәпләрен аңлатты. “17 ел дәвамында эшләдем, әмма үпкәләп түгел, ә арып киттем” диде ул.

“Беркемгә дә үпкәм дә, ачуым да юк, телевидениедән китү – үземнең карарым. Минем килешү дә еллык түгел иде, ягъни, озайтмадылар, шуңа киттем дип әйтә алмыйм. “Мәдәният дөньясында” тапшыруын биш ел дәвамында алып бардым, аннары ике ел дәвамында “Кара-каршы” тапшыруында эшләдем. Икесе дә зур һәм кызыклы проект булды. Яратып эшләдем, тәҗрибә тупладым.

Соңгы өч елда мин “Хәбәрләр” редакциясендә продюсер булып эшләдем. Бу – дары мичкәсендә утырып эшләү. Төн уртасында да, тапшыру эфирга чыгуга ике сәгать кала берәр мөһим вакыйга була ала, син аны яктыртыр өчен хәбәрчесен дә табып җибәрергә тиеш, аңа ярдәм итәргә дә кирәк, чөнки өлгертү мөһим. Атна дәвамында коточкыч ритмда эшлисең дә аннары бер атна дәвамында ял итәсең. Бер атна берни эшләмәү арыта. Бу рәвешле эшләү чыннан да авыр, мин китәргә кирәк дигән карарга килдем. Мин иҗат кешесе, миңа кешеләр белән эшләү кызыклы.

Телеканалда, бәлки, зуррак, кызыклырак проект тәкъдим ителсә, китү карары булмас иде дә. Ләкин ни миңа тәкъдим итүче булмады, ни үзем тәкъдим итмәдем. Минем телевидениедән китүем җәй булды, ул вакытта инде көз көне яңа сезонда эфирга нинди тапшырулар чыгуы билгеле була.

Кадрларга карата мөнәсәбәткә килгәндә, үземә бервакытта да ниндидер аерым үзгә караш таләп итмәдем дә, көтмәдем дә. Минем өчен тамашачы бәясе, аларның мәхәббәте, игьтибары кадерлерәк. Яратып, дәртләнеп эшләдем”, дип сөйләде Энҗе Азатлыкка.

Миләүшә Сибгатуллина исә күптән үземнең проектымны булдырасым килә иде, диде Азатлыкка. Телевидениедә эшләп “Оста татар” проектын тормышка ашыру авыр булыр иде дип аңлатты.

Мәктәпләрдә татар телен укыту кимегәч, түрәләр дәррәү кубып аны популярлаштырырга кирәк дип сөйли башлады. “Яңа гасыр” да яңа сезонда үзгәрергә – татарлашырга тиеш иде. Телеканалда урыс телле тапшырулар кыскаруы, төгәлрәк әйткәндә “Здравствуйте!” дип аталган тапшыру ябылачагы хакында алып баручы Ассоль Мөхәммәтҗанова Facebook битендә хәбәр иткән иде. Урысча чыгучы иртәнге тапшыруга инде ясин укылырга тиеш иде, әмма ниндидер сәбәп белән Татарстан президенты аппаратыннан башка күрсәтмә килгәнме, әллә Мәскәү каршында кискен адым ясарга курку өстенлек иткәнме, нәтиҗәдә урыс телле тапшырулар эфирдан алынмаган.

Прайм-тайм вакытында үтерешләр, җинаятьләр, машина бәрелешләрен күрсәткән урыс телле “Вызов 112” тапшыруы бара. “Без тарихта эзлебез”, “Переведи”, “Батырлар” кебек татар тапшырулары ябылды. Аның каравы эфирга “Сәхнәдәш”, “Әй, язмыш, язмыш”, “Юлчы” кебек яңа програмнар чыгуы турында игълан ителде. Телеканалны тулысынча татар телле итү турында сүз кузгатылмый.

Азатлык радиосы язмасы (чит ил агентлыгы)

Запись ТНВ хезмәткәрләрен эштән куалар дигән хәбәр дөресме? впервые появилась Tatar Today - татар яңалыклары..

“Экспедицияне “Без тарихта эзлебез” проектының дәвамы буларак планлаштырабыз. Казаннан Уфа, Оренбургка кадәр машина белән барачакбыз. Төрле татар авылларынының тарихын, яшәешен сурәтләргә уйлыйбыз. Тапшыруга иң кызыклы һәм иң күп тарихлы авыллар керәчәк. Бертуктамый эшләргә уйлыйбыз. Материалны төшереп кайтып, монтаж ясап, дизайн уйлап, тапшыру форматына китерергә иде исәп”, – дип сөйләде Альберт Шакиров.

“Кайсы авылларда нинди кызыклы әйбер табарга була, шуларны эзләячәкбез. Бәлки изге шифалы чишмәләре, борынгы мәчетләре бардыр. Татар авылларының кызыклы урыннарын танытасы, бер яктан авыл тарихын ачып салу, икенчедән, туристик ягын күрсәтү кирәк. Мәсәлән, осталары кем, җыр-тел осталары бармы бу авылда. Фольклор, риваять, такмакларын күрсәтү. Элеккеге аш-сулар ничек булган. Иттән нинди ризыклар пешергәннәр. Мәсәлән, бер авылда үзенчәлекле уха пешерәләр ди”, – дип планнары белән уртаклашты Альберт Шакиров.

“Татар дөньясы Финляндия татарлары, Австралия татарлары белән генә чикләнми бит. Кечкенә генә авыллар да зур тирән тарихлы була. Шулай ук авылда булган риваятьләрне тикшерергә уйлыйбыз. Мәсәлән, риваятьтә бу авылда кеше ашаучы яшәгән дип язылган ди. Архив документларын тикшереп, дөресме-юкмы икәнен күрсәтергә уйлыйбыз”, – дип сөйләде Альберт Шакиров.

Экспедиция барышында 14 тапшыру эшләргә дигән план корылган. Тапшыруның һәрберсе 26 минут булачак.

“Тапшыруны әзерләгәч, “ТНВ” каналына бирергә уйлыйбыз. Анда хәзер “Талант” конкурсы бара. Шунда катнашып, җиңәргә иде исәп. Программа интернетта да чыгачак. Әлеге тапшыруны үз исәбебезгә төшерәбез. “ТНВ” идеяне хуплады. Сөйләшүләр күп булды. “Без тарихта эзлебез” проектының дәвамы буларак яхшырту ягын да карадык. Әлегә шул финанс эше бар инде”, – диде Шакиров.

Экспедициягә өч кеше: сценарий авторы, алып баручы буларак Альберт Шакиров үзе, режиссер Артур Набиуллин һәм оператор барачак. Оператор әлеге төгәл билгеле түгел икән.

Тапшыру коптерга һәм профессиональ камерага төшереләчәк.

“Сәмрух” иҗат төркеме егетләре сәяхәт барышында палаткада яшәргә ниятли.

“Татар-информ”, Назлыгөл Мәсәлимова

Запись ТНВдан күрсәтү өчен татар авылларында нинди кызыклы әйбер табып була, шуны эзлиләр впервые появилась Tatar Today - татар яңалыклары..

– Айгөл, үзең белән таныштыр әле. Кайда тудың, нинди гаиләдә үстең?

– Мин Казанда тудым. Әтием – төзүче, әнием – сатучы. Бүген инде икесе дә лаеклы ялда, әмма һаман да эшлиләр. Абыем да әти эзеннән китте, төзелештә эшли. Ике улы бар.

– ТНВ каналына ничек ур­наш­тың? Ни өчен “Татарстан хә­бәр­ләре”н сайладың?

– ТНВ каналына, ялгышмасам, университетның 2-3нче курсында укыганда, практика узарга дип килдем. Ул чагында “Хәерле иртә“ (бүген ул “Манзара“) тапшыруына сюжетлар эшли идем. Укуны тә­мам­лагач, рәсми эшкә урнаштым. 3 ел һава торышын алып бардым. Аннары “Хәбәрләр” тапшыруында кастинг уздырдылар, үземне шунда сынадым. Шулай итеп, “Татарстан хәбәр­ләре” тапшыруын алып бара башладым.

– Тележурналист нинди сыйфатларга ия булырга тиеш?

– Үз эшен чынлап торып яратырга тиеш, чөнки ул бик күп вакытны ала. Яллар турында онытырга туры килә. Хәбәрләр һәр­вакыт позитив булмый, шуңа күрә үзеңне кулда тоту, хисләргә, про­вокацияләргә би­рел­мәү, тыныч караш, аек акыл ки­рәк.

– Туры эфирда эшләгәндә көтелмәгән хәлләрнең булганы бармы? Андый хәлдән ничек чык­тың?

– Ууу, бихисап! Нинди генә хәл­ләр булмый, кайсыларын сер итеп калдыру да кирәктер (көлә). Әйтәсе сүзне онытып, камерага карап бер­ничә секунд аптырап утыру да була. Беркөнне спорт алып баручысы эфирга чак килеп җит­те. Мин бер­ни булмагандай сөйлим, ә спорт алып баручысы кабалана-ка­балана микрофон каптыра. Аннары режиссер икебезне дә эфирга биргәч, көләсе генә килә бит, ярамый. Иягемне көчкә кысып түздем.

– Кадрда үзеңне тоту буенча киңәшләрең?

– Табигыйлек кирәк. Текстны аң­лап, үзең аша кичереп сөйләү мө­һим. Бу вакыт белән килә. Һәр­вакыт нәрсәгәдер өйрәнергә ки­рәк. Әле хәзер дә кайбер чакларда камера алдында йөрәк жу итә.

– ТНВ каналында яратып караган тапшы­руың?

– “Хәбәрләр”, әлбәттә, “Таяну ноктасы”. Калганына өлгермим. Телевизор карамыйм мин.

– Журналист булма­саң, кем булыр идең?

– Эколог булыр идем. Табигатьне яратам, аны кызганам да.

– Хәбәрчеләр арасында дуслык ни дәрә­җәдә көчле? Бәй­рәм­нәр­не бергә үткәрә­сез­ме?

– Әйе, бәйрәмнәрне бергә үт­кәрәбез – эштә. Дуслык – зур байлык ул. Хезмәттәшләр арасында – хөр­мәт, дустанә мөнәсәбәт. Коллегаларымда юмор хисе көчле, эш­ләү күңелле, рәхәт. Алай булмаса, эшләп тә булмас иде. Уртак шаяртулар бе­лән көн сизелми дә үтеп китә.

– Ни өчен син ТНВны ярата­сың?

– ТНВ ул – мине университеттан ук сыендырган икенче йортым. Ул миңа яраткан эшем белән шөгыль­ләнергә мөмкинлек бирә. Ышаныч тудыра, чөнки аның тарихы, төпле нигезе бар.

– Тормышта һәрвакыт мак­сат­ларыңа ирешәсеңме?

– Минем начар ягым бар: мин булдыра алмаган әйберләр турында хыялланмыйм, каядыр ашкыну, омтылу юк. Бу начар сыйфат дип саныйм, чөнки үзеңә ышану – уңыш­ның 50 проценты.

– Әлегә кадәр кияүгә чыкма­выңның сәбәбе нидә? Гомумән, бу хакта фикерләрең белән ур­таклаш әле.

– Кияүгә чыкмавыннан оялган кешене аңламыйм. Гомумән, аларга елмаеп карыйм. Татарларда фә­лән яшьтә шулай, фәлән яшьтә болай булырга тиеш, дигән үзенә кү­рә бер программа бар. Бернинди “тиеш” тә юк, андый әйберләр бернинди законда да, кодекста та язылмаган. Кеше иртә кияүгә чыгарга тели икән, чыксын. 15 яшьтә бала табарга тели икән, тапсын. Кешене гаеп­ләргә ярамый. Кеше үз хаталарын үзе танырга, тормышын үзе көй­ләргә тиеш.

– Бүген очрашып йөргән ке­шең бармы?

– Сөйгән егетем бар, мөнәсә­бәт­ләребез турында сөйләргә те­ләмим, бу – шәхси. Ләкин шуны әйтә алам: мин хыялымдагы кешемне, чын мә­хәббәтемне очраттым. Менә инде дүрт ел очрашып йөрибез.

– Бүләкләр кабул итәргә яра­та­сыңмы?

– Яратам. Ә шулай да минем өчен иң зур бүләк – игътибар, вакытында әйтелгән сүз.

Ватаным Татарстан

Запись ТНВ алып баручысы Айгөл Бәдретдинова шәхси серен ача впервые появилась Tatar Today - татар яңалыклары..

“Яңа Гасыр” (ТНВ) телевидениесе сентябрьдән татар халкына яңа тапшырулар тәкъдим итәргә җыена. Бу хакта 15 майда узган матбугат очрашуныда “Яңа Гасыр”ның мөдире Илшат Әминов белдерде.

“Яңа башкарма җитәкче килде – Айрат Сибагатуллин (элекке мәдәният министры). Хәзер ул телевидениедәге иҗади редакцияләр белән очраша, яңа програмнар әзерлиләр. Минем уйлавымча, сентябрьдә яңалыклар булырга тиеш”, диде Әминов артыгын сөйләми генә.

Аның әйтүенчә, “Мәйдан” каналы хәзер “Яңа Гасыр” җитәкчелегендә эшләячәк. Шул сәбәпле “Мәйдан”да җыр-биюләр калса, “Яңа Гасыр” җитдирәк тапшыруларга нигезләнер дип уйларга кирәк. Әмма бу хакта тулырак итеп якын көннәрдә хәбәр ителәчәк дип ышандырдылар.

Матбугат очрашуында татар журналистикасына күбрәк кызлар килү мәсьәләсе дә күтәрелде. “Әйдә ТНВга кил” бәйгесендә өч җиңүченең өчесе дә кызлар булган. ТНВ киләчәктә бу кызларны үз акчасына журналистика факультетында укытачак.

“Менә хәзер беренче курста бары ике генә егет укый”, диде шактый еллар журфакта укытучы Васыйл Гарифуллин.

Ул 1990-2000 елларда да, хәзер дә журналистика бүлегендә укучыларның 90 проценты кызлар булуын әйтте.

Моны татар журналистикасында эшләүчеләрнең хезмәт хаклары түбән булу белән аңлатучылар да бар. Татар теле мәсьәләсенә килгәндә, Русия Думасы милли телләрне укытуны ихтыярига калдыру турында канун өлгесен кабул иткән очракта, Әминов хәлләрнең тагын да катлауланачагын әйтә.

“Инде сентябрьдән татар телен факультативка калдыра торган канун кертергә уйлыйлар. Хәлләр авыр. Аны кабул итәчәкләрдер, эш шуңа таба бара. Без, әлбәттә, аны кабул иттермәү өчен тырышырбыз.

Бу проблемны җәй айларында күтәрергә кирәк. Булдыра алганча аңа каршы эшләргә кирәк. Хатлар язарга, башкасы… Һәр кеше үз мөмкинлегенә карап нәрсәдер эшләсә дә, зур эш булачак. Канунны кабул итсәләр, шартлар тагын да авыраячак.

Ул канунны тәкъдим итүчеләр төрле фракцияләрдән җыелган. Чуашстаннан да, Чечнядән да бар. Милли республикалар вәкилләренең шундый тәкъдим белән чыгуы – аптыраш. Үз ана телеңә ничек каршы чыгып була?”, диде Әминов.

Әлбәттә татар теленең шундый хәлгә калуына сыйфатлы татар тапшырулары юклыгы, инде ничә ел сөйләп тә, татар балалары каналын эшләтә алмау да сәбәп булып тора дип әйтүчеләр бар.

Әминов балалар өчен “Шаян ТВ” дип исемләнгән аерым канал октябрьдә эшли башларга тиеш дип ышандырды.

“Акча күчте. Техникага бәйге игълан ителде. План нигезендә беренче кешеләрне эшкә ала башладык. Җиде кеше эшкә алына. Баш инженер, програм җитәкчесе, баш мөхәррир һәм башкалар. Атна саен безне мөдирләр шурасы җитәкчесе Әсгать Сәфәров җыя. Аңа хисап бирәм. “Шаян ТВ”ның төп студиясе Горький урамындагы радио бинасында булачак”, диде ул.

Күпләр “Шаян ТВ”ны интернетта күрергә хыялланса да, Әминов моны ышандырмады.

“Интернетта тулаем булмаячак, чөнки тапшыруларга хокук алу проблемы бар. Хокук бирелгән һәрбер тапшыру интернетта булачак”, диде Әминов.

Татарларның күп өлеше Татарстаннан читтә яшәгәнне һәм хәзерге буынның күбрәк интернетта утыруын искә алсаң, иң беренче чиратта тапшыруларны интернетка чыгару турында уйлау мөһим кебек.

“Интернет мәйдан гына. Эчтәлекне эшләүче кирәк. Интернеттамы, радиодамы контент кирәк. Фикерле, акыллы, телле кешеләр кирәк”, ди Әминов.

Запись “Мәйдан” каналын ТНВ “йота”, татар каналларында үзгәрешләр көтелә впервые появилась Tatar Today - татар яңалыклары..