Архивы ярдәм кирәк - Tatar Today - татар яңалыклары.

Яшел Үзән районы Татар Әҗәлендә тулаемы белән йорт янып бетә [фото]

Лейла — Thu, 09 Sep 2021 09:51:57 +0000

9 сентябрь төнге сәгать 2дә Яшел Үзән районы Татар Әҗәле авылында йорт янып бетә.

Йорт яна башлаганда хуҗалар бөтенесе дә өйдә булалар. Бәхеткә каршы, бөтенесе дә уттан чыгып өлгерә. Әмма йортларыннан бернәрсә дә калмый.

Хәзерге вакытта уттан зыян күргән гаиләгә ярдәм итү бара. Кирәкле әйберләр:
– Ирләргә 41нче үлчәмле аяк киеме, 50-52нче үлчәмле өс киеме;
– Хатын-кызларга 37, 38, 40, 41нче үлчәмле аяк киеме һәм 48,50-52нче өс киеме.

Татар Әҗәлендә яшәүчеләр киемнәрне Рус Әҗәле авылы башкарма комитетына илтеп бирә алалар. Ә шәһәрдә яшәүчеләр «Яшел Үзән» газетасы редакциясенә алып килә ала (адресы Гоголь урамы, 23а йорты).

Материаль ярдәм күрсәтергә теләүчеләр зыян күргән гаиләнең Сбербанктагы исәп-хисап счетларына акча күчерә алалар. Счет номеры: 42307 810 5 6248 6700406.

Запись Яшел Үзән районы Татар Әҗәлендә тулаемы белән йорт янып бетә [фото] впервые появилась Tatar Today - татар яңалыклары..

Тереләй чери: нигә шундый хәлгә калган?

kadria — Fri, 10 Jul 2020 09:25:17 +0000

Уфа волонтерлары үлем чигендәге ялгыз әбине тапкан.

Башкала волонтерлары кичә 85 яшьлек Евдокия Чиглинцева белән очрашкан. Хатын коточкыч хәлдә, ә аның фатиры чүплеккә охшаган. Кызганычка каршы, өлкән яшьтәге хатын-кызны тәрбияләр кеше юк. Пенсионерның сүзләренә караганда, аның оныгы бар, әмма ул аның адресын да, телефонын да белми. Ул ир белән элемтәгә керә алмый.

Әбинең яшәү шартлары мактанырлык түгел. Мөмкин булганда, аңа күршеләре булыша. Волонтерлар аны “баба Дуся” дип атады. Әби бик аралашучан, ләкин начар ишетә. Әби үз фатиры буенча бер кофтада гына йөри. Ул һәрвакыт ашарга һәм эчәргә тели, чөнки үзенең аш-су бүлмәсенә якын килә алмый, ул чүп-чар белән күмелгән. Рәсемдә аның аягы ни дәрәҗәдә начар булуы аңлашыла.

Күршеләре сөйләвенчә, ач көннәрдә хатынның коры макарон ашавын күргәннәр. Әбинең хәле авыр: аның тәне кипкән, аяклары чери башлаган. Уфалылар бу хәлгә опека органнарын җәлеп итәргә тырышса да, ярдәм итә алмыйлар: әбинең туганнары табылганчы, алар берни дә эшли алмый. Закон шундый.

Шулай да волонтерлар өметен өзми. Беренче эш итеп фатир җыештырырга, аннары чүп-чар чыгарырга һәм бөҗәкләрне агуларга карар итте алар.

“Дуся”га ярдәм итү өчен, акчаны волонтерлар картасына күчерү дә җитә 4817-7601-1761-0430 (Лилия Я.). Ахырда “для бабы Дуси” дип куярга гына кирәк.

Фото: bash.news.ru

Чыганак: Кызыл Таң

Запись Тереләй чери: нигә шундый хәлгә калган? впервые появилась Tatar Today - татар яңалыклары..

“Кызымның янына һәр көнне барам. Аның тилмерүен күреп йөрәгем өзгәләнә”

Габдулла Тукай — Thu, 06 Jun 2019 11:47:10 +0000

Мәдинә

Игезәк кызлары туасын әйткәч, Казанда яшәүче Фирзия һәм Рамил Шаһитовлардан да бәхетле кеше булмый. Тик Фирзия йөклелек чорын авыр кичерә. Берни ашый алмый. Карынындагы сабыйларның үсмәгәнен күреп алган табиблар 7 айдан бәби таптыра.

– 2015 елның 14 декабрендә ике кызым дөньяга килде. Мәдинә 1 килограммнан артык, Мәликә 900 грамм гына иде. Аларны шундук Республика балалар хастаханәсенең реанимация бүлегенә күчерделәр. Башка әниләр кебек, сабыйларымны кулыма алып сөя дә алмадым, – дип искә ала Фирзия.

Шаһитовлар гаиләсе көн саен хастаханә юлын таптый башлый. Нәни кызларның икесен дә кислород аппаратына тоташтыралар. Мәдинәне 1 яшь тулып киткәч кенә өйгә алып чыгалар. Бала махсус аппарат аша сулый. Аннары өй һавасына да ияләшә. Әнисе аны тернәкләндерү үзәкләренә йөртә. Кызга массаж да ясаталар, ЛФК курслары да үткәрәләр.

– Кая гына йөрсәк тә, кызымның хәлләре мактанырлык түгел. Дүрт яшенә нибары 6-7 сүз белә. Нигәдер күзләре начар күрә башлады. Табиблар, тугач та кислородка тоташтырган сабыйлар шулай була, ди. Шушы көннәрдә башын тикшертәчәкбез. Тагын ни диярләр инде, – дип борчыла Фирзия.

Мәликә

Ә менә Мәликә инде дүртенче елын хастаханәдә дәвалана.

– Быел февраль аенда, Аллага тапшырып, Мәликәне дә өйгә алып чыккан идек. Тик бер атна да тора алмады, сулыш алуы авырлашты, хәле начарланды. Шуннан соң тизрәк табиблар чакыртып, яңадан хастаханәгә салдык, – дип сөйли Фирзия. – Кызымның янына һәр көнне барам. Аның тилмерүен күреп йөрәгем өзгәләнә. Зонд аша гына ашаталар. Үпкәләре бик начар эшли. Табиблар бер генә дә җылы сүз әйтми. Мәскәү профессоры да ярдәм итә алмаячагын, мондый хәлдәге баланы беренче тапкыр күрүен әйтте. Әмма, бераз булса да, күңелдә өмет уятты. Мәликәнеке кебек авыруларны дәвалый торган клиника табып булмасмы, дип чит илдәге хезмәттәшләре белән сөйләшергә вәгъдә бирде. Кызыма үпкә күчереп утыртырга мөмкиннәр. Аннан соң донор йөрәге дә кирәк булачак.

Берьюлы ике авыру бала өчен җаны телгәләнгән әти-әнигә тормыш алып бару җиңел түгел.

– Үз әти-әнием моннан алты ел элек бакыйлыкка күчте. Ирем ягы таянычым да, терәгем дә булды. Бергә яшибез. Алар булмаса, нишләр идек. – ди Фирзия. – Социаль челтәрләрдә халыкка үтенечемне җиткереп хат язган идем. Шөкер, ярдәм итүчеләр бар. Туганнарыбыз, дусларыбыз, бергә эшләгән хезмәттәшләребез ярдәм итеп тора. Аларга чиксез рәхмәтлебез. Әмма дәвалану өчен акча күп кирәк. Шуңа да мәрхәмәтле кешеләрдән ярдәм сорарга булдык.

Булышырга теләүчеләр өчен Шаһитова Фирзия Илдус кызы исемендәге Саклык банкы картасы номеры: 4276620044942880

Ватаным Татар газетысы// автор Гөлгенә Шиһапова

Фото Ватаным Татарстаннан алынды

Запись “Кызымның янына һәр көнне барам. Аның тилмерүен күреп йөрәгем өзгәләнә” впервые появилась Tatar Today - татар яңалыклары..

Кукмарада янгын вакытында ике сабыен югалткан әни: “Бернәрсә кирәкми, балаларым гына кирәк”

Гузель — Sun, 24 Feb 2019 19:32:12 +0000

21 февральдә Кукмара районы Яңа Сәрдек авылында чыккан янгында Ләйлә белән Фәнзил Минемуллиннарның ике сабый балалары вафат булды. Минемуллиннарның туганы Васил абый “Шәһри Казан”га 23 февральдә балаларны җирләүләре, аларны озатырга кеше бик күп килүен сөйләгән.

– Ярдәм итүчеләр дә бик күп. Белгәне, белмәгәне дә булыша. Күмү кирәк-яраклары белән дә ярдәм иттеләр, чардуганнарны да бушка эшләп китерәбез диделәр. Туганнарыбызга Аллаһы Тәгалә сабырлык бирсен инде. Аларга бик нык авыр. Уколлар белән генә тоттык. Янгын булган көнне алар Кукмарага киткәннәр иде. Социаль яклау бүлегенә, аннары хастаханәгә дип чыгып киткәннәр. Ләйлә көндез барып дәваланып йөри иде. Олы балалары Казанда эшлиләр. Берсенә 23, икенчесенә 21 яшь. Уртанчылары өченче сыйныфта укый. Ул мәктәптә иде. Янгын көндезге уннар тирәсендә чыкты. Өч һәм алты яшьлек Сәйдәш белән Нурисламны әбиләре белән калдырганнар. Ул малларга печән салырга дип чыгып киткән. Шунда өйне бик тиз ут ялмап алган. Утның нәрсәдән чыкканын әлегә белмибез. Кыска ялганыштан түгелме икән дибез. Яңа гына йорт салып, яңа абзар, мунчалар төзеп куйганнар иде. Абзарда өч сыер, өч үгез тора иде. Бөтен нәрсә янып бетте. Өсләрендәге киемнәреннән генә калдылар. Сәйдәш белән Нурислам бик тере, акыллы, тәртипле балалар иде, – дип сөйләгән “Шәһри Казан”га Васил абый.

Күршеләре Чулпан янгын чыкканда өйдә булган.

– Без күреп алганда тәрәзәдән ургылып төтен чыга иде. Йорт-каралты бик тиз янды. Балаларны карарга килгән әбиләре маллар янына чыккан булган, янгынны күреп, күршеләренә йөгергән. Алар да, соң иде, балаларны коткарып калырлык түгел иде, диделәр. Ләйлә апа белән Фәнзил абый чыгып киткәндә, балаларны карарга әбиләре килә иде. Бу юлы да ул килеп калган. Ләйлә апа, бернәрсә кирәкми, балаларым гына кирәк дип елый ди. Ул үзе өйдә генә тора иде. Берничә ай элек кенә үзләре карап-тәрбияләп торган 100 яшьлек сукыр әбиләрен җирләделәр.

Фәнзил абый төзелештә эшләде. Яңарак кына ул эшләгән оешма ябылып, ул да эшсез калган иде. Күп итеп маллар тоттылар. Бик тырыш, үрнәк гаилә, – дип уртаклашкан Чулпан.

Шәһри Казан

Запись Кукмарада янгын вакытында ике сабыен югалткан әни: “Бернәрсә кирәкми, балаларым гына кирәк” впервые появилась Tatar Today - татар яңалыклары..

Татарстанда аягы киселгән танылган баш мөхәрриргәр ярдәм кирәк

Габдулла Тукай — Tue, 27 Nov 2018 14:21:32 +0000

Татарстанда чыгып килгән бәйсез “Звезда Поволжья” газеты хуҗасы һәм баш мөхәррире Рәшит Әхмәтов гангрена көчәю сәбәпле аяк табанын кистерергә мәҗбүр булган.

Рәшит Әхмәтов хәзер култык таягы белән йөрсә дә, “Звезда Поволжья” газетын чыгаруны дәвам иттерә. Аның сүзләренчә, операцияне 10 октябрь ясаганнар. Баш мөхәрриргә газетның бер санын хастаханәдә ятканда чыгарырга туры килгән.

“Звезда Поволжья” татар халкы һәм Татарстан мәнфәгатьләрен яклау юнәлешендә кыю мәкаләләр бастыруын дәвам иттерә.

Хастаханәдән аны 25 октябрь чыгарганнар. “Аягым авырлык белән төзәлә. Чөнки шикәр чире белән интегәм. Йөрәгем дә сәламәт түгел. Дөнья хәлен белеп булмый, бер хәл була калса, мине демократ дип санагыз”, диде ул Азатлыкка.

Үзе турыдан-туры ярдәм сорарга теләмәсә дә, аңа операциядән соң дәвалану өчен ярдәм кирәк икән. Ярдәм итәргә теләүчеләр Рәшит Әхмәтовка акча җибәрә ала.

Ярдәм итәргә теләүчеләр 6390 0262 9006 774714 номерына (сбербанк картасы Рашит Ракипович исемендә) Рәшит Әхмәтовка ярдәм җибәрә ала. Карта 8917 239 7409 телефон номерына беркетелгән.

Азатлык радиосы язмасы һәм фотосы  (чит ил агентлыгы)

Запись Татарстанда аягы киселгән танылган баш мөхәрриргәр ярдәм кирәк впервые появилась Tatar Today - татар яңалыклары..

83 яшьлек Гөлфирә әби: “Балаларымны, оныкларымны үстерешергә ярдәм иттем, ә хәзер беркемгә дә кирәкмим”

Гузель — Thu, 18 Oct 2018 17:29:50 +0000

Редакциягә иртән иртүк шалтыратты ул. Гөлфирә әбигә – 83 яшь, Казанда яши. Балалары булса да, картаймыш көнендә игътибарсызлыктан интегә ул. Безгә дә үзенә иптәш булмасмы дип шалтыратуы икән.

– Тормыш юлым җиңел булмады. Ике ул үстердем. Балаларымны бик яраттым. Әмма аларның тормышына сөенеп яшәргә язмаган икән. Олысы, әфган сугышына эләгеп, һәлак булды. Бар игътибарны икенчесенә бирергә тырыштык. Өйләнгәч, оныкларымны үстерешергә ярдәм иттем. Музыка мәктәбенә дә, бию түгәрәгенә дә йөрттем. Тик менә хәзер, картайгач, беркемгә дә кирәгем калмады, – дип сөйли Гөлфирә әби. – Алар миннән ерак тормый. Үз йортлары белән яшиләр. Улым мине ташламый. Тик киленем генә усал булды. Үзләренә бер көнгә барсам да, минем белән сөйләшми. Улымның көн саен минем янга килеп кунып йөрүенә бер яктан сөенсәм, аңа гаиләсеннән аерылып йөрү авыр икәнен дә аңлыйм. Балаларга ышанып, социаль яклау бүлегеннән дә ярдәм сорамадым. Караучы да билгеләтмәдем. Балаларым ташламас дип яшәдем. Шуңа күрә бергә яшәргә иптәш эзлим.

Гөлфирә әбинең сәламәтлеге мактанырлык түгел икән. Инде урамга чыгып йөри алмый. Шикәр авыруыннан интегә. “Кәефем булмагач, ашыйсым килми. Әгәр берәр хатын-кыз яныма килеп йөрсә, хәлемне белеп торса, күңелем күтәрелер иде, – ди ул. – Картлык көнемдә мондый хәлгә калырмын дип уйламадым. Ялгызлыктан да читен нәрсә юк икән. Олыгайгач, яныңда бер кешең булмаудан да кыены юк. Ярый әле, изге күңелле кешеләр ташламый. Әле менә бүген бер дустымның кызы килеп, өемне җыештырып китте. Минем кебек авыру кеше белән бергә яшәргә теләүче булмасмы?”

Гөлфирә әбинең адресы да, телефоны да редакциядә. Әгәр аңа иптәш булырдай кеше табылса, 222-09-67 яки 222-09-70 телефон номерына шалтыратырга мөмкин.

Чыганак: Ватаным Татарстан

Фото: pixabay.com

Запись 83 яшьлек Гөлфирә әби: “Балаларымны, оныкларымны үстерешергә ярдәм иттем, ә хәзер беркемгә дә кирәкмим” впервые появилась Tatar Today - татар яңалыклары..

31 яшьлек Рамилә хәрәкәтсез ята, сөйләшә алмый һәм шлангалар аша туклана[ярдәм кирәк]

Алина — Wed, 17 Oct 2018 08:11:35 +0000

Питрәч районыннан Галиуллиннар гаиләсе ярдәмгә мохтаҗ. 2015 елда аларның кызлары Рамиләне юл аркылы чыкканда машина бәрдерә. Менә инде дүртенче ел ул урын өстендә ята.

Җәяүлеләр өчен билгеләнгән юл аркылы чыгу урынында машина бәрдереп киткәннән соң, аның баш мие җәрәхәтләнә, кул-аяклары сына. Рамиләнене бәрдерүчегә карата җинаять эше ачыла, судлар була. Тик җинаятьче әле дә тиешле сумманы түләп бетерә алмый. Кыз хастаханәдә комага китә, башына берничә тапкыр операция ясала, илнең төрле клиникаларында дәвалану уза.

31 яшьлек Рамиләнең ике югары белеме бар. Фаҗигагә кадәр ул фортепианода бик матур уйнаган. Хәзер ул хәрәкәтсез ята һәм сөйләшә алмый.

“Безнең һәр минутыбыз санаулы. Чөнки баш миенә бик нык зыян килгән. Бик зур акчалар кирәк. Миллион сумга өйне сатсак, Рамиләне кайда карарбыз? Машинаны да сата алмыйбыз, Рамиләнең бик еш приступлары була. Әтисе машина белән тиз арада, табибларны алып килә, дарулар алып кайта. Тик бу гына бик аз.”, ди Рамиләнең әнисе Фирдәвес ханым.

Рамилә Мәскәүдә дә, Санк-Петербург шәһәрен дә реабилитация үтә. Кызны шлангалар аша ашаталар. Юындыру өчен, ванна бүлмәсен дә кызга көйләп куялар. “Юындыру да, көннән – көн авырая. Үзем дә күптән түгел, операция кичердем, авыр күтәрергә ярамый. Тик өйдә ир-атлар булмаганда, Рамиләне үземә генә күтәрергә туры килә” , ди кызның әнисе.

Бүген Галиуллиннар гаиләсенең Рамиләне Испаниядә дәвалау мөмкинлеге барлыкка килгән, анда аны терелтү өмете бирәләр. Әмма моның өчен 4 800 000 сум акча кирәк. Бу әлеге гаилә өчен бик зур сумма. Алар барлык булган акчаларын алдагы дәвалауга тотканнар.

Әйдәгез, Рамиләгә бергәләп аякка басарга ярдәм итик. Акчаны банк карталарына күчерергә була.
Ак барс банк: 5209 3512 2564 8224, Сбербанк: 5336 6900 6391 7886 (Галиуллина Фирдәвес Мансуровна – Рамиләнең әнисе).

https://www.instagram.com/p/BogqX4RASVO/?taken-by=ramilya_help

Запись 31 яшьлек Рамилә хәрәкәтсез ята, сөйләшә алмый һәм шлангалар аша туклана[ярдәм кирәк] впервые появилась Tatar Today - татар яңалыклары..

“Төтен исенә уянган Марсель, энесен ишеккә өстери, әмма чыгып өлгермиләр…” [фаҗига]

Гузель — Fri, 21 Sep 2018 18:07:48 +0000

13 сентябрьдә Апас районының Чүри-Бураш авылында Гыйсмәтуллиннар йортында янгын чыгып, 19 яшьлек Раилнең гомере өзелә, аның 35 яшьлек абыйсы Марсельне табиблар коткарып кала.

Ут кичке якта килеп чыга. Ул вакытта ир-атлар өйдә икесе генә була. Марсельнең хатыны кечкенә улы белән хастаханәдә ята, олы кызлары исә дәү әниләренә кунакка китә. Төтен исенә уянып киткән Марсель йокысыннан айный алмаган энесен ишек төбенә кадәр өстерәп бара, әмма тышка чыгарга өлгерә алмыйлар. Тиз арада килеп җиткән “ашыгыч ярдәм” табиблары бертуганнарның олысын коткарып кала, ә менә энесенә ярдәм итәргә өлгермиләр.

Раилне авылдашлары гел яхшы яктан искә ала. Чаңгы ярышларында беренчелекне беркемгә дә бирмәгән, акыллы, тырыш, спорт белән дус булган. Колхозда эшләп йөргән. Егетне фаҗиганең икенче көнендә җирләгәннәр. Марсельнең дә хәле акрынлап җайланып килә икән.

Гыйсмәтуллиннар гаиләсе бернәрсәсез калган. Аларга ярдәм итү өчен күршеләре Лилия Низамиева акча җыюны оештырган. Аның Саклык банкы картасы номеры: 639002629010789021. Булышырга теләүчеләр “Ватаным Татарстан” газетасы редакциясенә дә мөрәҗәгать итә ала.

Чыганак: "Ватаным Татарстан" 
Фото: pixabay.com

Запись “Төтен исенә уянган Марсель, энесен ишеккә өстери, әмма чыгып өлгермиләр…” [фаҗига] впервые появилась Tatar Today - татар яңалыклары..

“Янгын өйгә үрмәли, мунча янып бетә, кызлары пешә…” [ярдәм кирәк]

Гузель — Mon, 17 Sep 2018 09:09:11 +0000

15 сентябрь киче Иске Чүпрәле авылында Ленин урамында яшәүче Шәрәфетдиновлар гаиләсе өчен олы кайгы алып килә.

Күз ачып йомганчы, янгын гомер буе җыйган мал-мөлкәтне юк итә. Бүген алар, хуҗаларыннан рөхсәт алып, күршедәге буш йортны ачып кергәннәр һәм вакытлыча шунда яшәргә мәҗбүрләр.

Мизгел эчендә сарайлар юк булды…

Роза апа һәм Чулпан абый Шәрәфетдиновлар гомереләрен туган туфрак белән бәйләп, тырыш хезмәтләре, кешеләргә һәрвакыт ярдәмнәре белән Иске Чүпрәле авылында гомер кичергән гаилә. Бүгенге көндә икесе лаеклы ялда, олы яшьтәге кешеләр.

– Бакча артында малларга печән чабып торам. Бервакыт колагыма “Шарт-шорт” килгән тавыш ишетелә. Башлап, печән чапкычымнан чыгардыр бу тавыш дип торам. Сүндереп куйдым, кисәк артыма борылып карасам, инде терлекләрнең сарай түбәсе кып-кызыл янгын эчендә. Ә сарай тулы печән – мизгел эчендә булды бу хәл. Үз-үземне аңышмыйча өйгә чабам, бер каян да керә алмыйм. Документлар янса, янсын дип, тизрәк абзардан терлекләрне чыгарып җибәрдем. Малкайлар кая барганнарын белми, чабып чыктылар, – ди Чулпан абый.

Терлек абзарыннан янгын өйгә үрмәли. Мунча, тулысынча янып бетә. Хәер тышкы яктан стеналар сакланып калса да, эчке якта бар нәрсә тулысынча юкка чыга. Кием, җиһазлар, документлар да яна. Иң аянычы, янгында кызлары Гөлфия шактый зыян күрә. Тәненең 20 проценты пешә. Бүгенге көндә ул хастаханәдә, дәвалану, аннан соң реабилитация узу өчен кыйммәтле препаратлар таләп ителә.

“Беркемнән дә берни сораганыбыз булмады”,- ди Роза апа күз яшьләре белән. –Гомеребез хезмәттә узды. Балалар үстердек, аларга ярдәм иттек. Инде картлыгыбызда рәхәтләнеп яшәрбез дип, үзебезнең йортыбызны да хәлдән килгәчә заманча, матурайтырга тырыштык. Кыш өстеннән менә бернәрсез утырып калдык. Ярдәм кулы сузучыларга иң олы рәхмәтләребезне җиткерәбез. Янгын вакытында да күп кеше килде, җыештырышты, эшләде, әле дә булышып торалар, Ходай Тәгалә үзләренә дә әҗерен бирсен.

Билгеле, гомере буе абзар тулы мал асрап, үз көннәрен үзләре күрергә өйрәнгән Роза апа белән Чулпан абый Шәрәфетдиновларга олыгайган көннәрендә ярдәм сорап кемгәдер мөрәҗәгать итү бер дә җиңеллләрдән бирелми. Тик, туган нигезләрен бер дә ташлап та китәсе килми аларның, балаларның да үз гаиләләре, үз мәшәкатьләре дигәндәй… Ә салкын кыш айларына санаулы вакыт калды. Шуңа кадәр өйне рәтләп, урамдагы малларга кечкенә генә булса да абзар ясап куярга исәпләре. Кызлары Гөлфияләре өчен дә ата-ананың йөрәгеге өзелә, аңа да шактый ярдәм кирәк.

Без дә үз чиратыбызда, газета укучыларыбызга, мәрхәмәтле кешеләргә мөрәҗәгать итәбез. “Тамчыдан күл җыела диләр бит”. Бу гыйбрәтле һәм фаҗигале язмышка битараф булмаучылардан ярдәм кулы сузуларын сорыйбыз.

Булышырга теләүчеләр өчен Роза апаның исәп-хисап, карта номерлары: 5336 6900 4588 6928; 40817810862002654681, шулай ук Чулпан абыйның карта номеры: 2202 2003 4995 9054.

Чыганак һәм фото: Чүпрәле районы "Туган як" газетасы

Запись “Янгын өйгә үрмәли, мунча янып бетә, кызлары пешә…” [ярдәм кирәк] впервые появилась Tatar Today - татар яңалыклары..

Берьялгызы кечкенә оныкларын үстерүче Альвера Фәләхова: “Кызым йортсыз калдырды…”

Гузель — Fri, 14 Sep 2018 07:06:18 +0000

Казанда яшәүче Альвера Фәләхова берьялгызы өч бала үстерә. Шушы көннәрдә 55 яшен тутырган бу ханым үз балаларын аякка бастырган инде. Хәзер ул 35 яшьлек кызының сабыйларын тәрбияли.

Начар булсын дип үстермәдем

Альвера апаның ире үлгәнгә дә 26 ел икән инде. Тормыш иптәше вафат булганда, аның кулында ике яшь бала кала. “Балаларым кеше булсын дип тырыштым. Аларның тамаклары тук, өсләре бөтен булсын өчен, кайда гына эшләмәдем. Бер көн ял да күрмәдем”, – дип сөйли ул. Ул елларны аңа урам себерергә туры килә. Эшләгәне өчен башта бер бүлмә, аннан икенчесен ала. Шул арада балалары да буй җитә. Улы әнисенә борчулар китерми. Ә менә кызы күрсәтмәгәнне калдырмый. Урам себереп алган бүлмәләрен сатып, алар йорт төзиләр. Тик, бәхетсезлеккә, Альвера апаның кызы әнисен йортсыз калдыра. Аларны “кара” риэлторлар алдалый. Сату-алу килешүе төзесәләр дә, йорт өчен тиешле акча түләнми. Алар йорт бәясенә ике-өч сутый җир алалар.

“Ул чакта кызым тәртипсез тормыш алып бара иде инде. Акчам җитми бит, түлим мин аны, дип әллә ничә кредит та алдырды. Мин ышандым. Алып биргәләдем. Хәзер өстемдә әле дә бетмәгән 90 мең сум бурыч бар. Кызым аркасында өч сутыйлы бер җиремнән колак кактым. Ул аны кредит алганда милеге итеп күрсәткән. Үз балам бит, мин аңа ышандым. Мондый хәлләргә төшәрбез дип кем уйлаган?” – ди бичара ана.

Башта олы кызы качты

“Авыр хәлләргә юлыккач, тормыш итү җиңел булыр дип, бергә яши башладык. Әмма кызымның минем белән торасы килмәде. Әле анда дүрт онык та бар иде бит. Үз тормышымны кора алмыйм дигәч, мин башка фатирга күчендем. Болар бер ир белән яши башлады. Кызымның аралашуы кимеде. Мин кунакка киләм дигәч тә, йә өй җыештырылмаган, йә мин өйдә түгел, дип төрле сәбәпләр таба иде. Баксаң, алар ире белән эчеп ятканнар. Бу җәйне кызым өч ай эчкән. Фатирына кемне генә җыймаганнар. Шул вакытта олы онык, өйләреннән качып, миңа килде. Күп тә үтмәде, кызым миңа тагын ике баласын китереп ташлады. Өченче булып туган кызын улыма илткән. Аны хәзер алар үстерә. Миңа китергәндә икенче кызының авызы ертылган иде. Сабыйны табибларга алып барып күрсәттем. Әнисе ник бер тапкыр хәлен сорасын. Дүртенче бала миңа килгәндә әле күкрәк сабые иде. Аны нишләтергә дә белмәдем. Пенсиягә чыкмаган, бала тотып утырып булмый. Эшләргә, башка балаларны аякка бастырасы бар. Кеше фатирында гына яшим бит әле. Мин ПДН чакырттым. Алар исә опека бүлегенә җибәрделәр. Алар, кызымны аналык хокукыннан мәхрүм итеп, мине опекун ясап куйды. Кечкенә сабыйны ике яклы килешү төзеп, балалар йортына тапшырдым. Бер елдан соң аны барып алдым. Улыма хәзер – 2 яшь тә 8 ай. Бакчага йөртәм. Зур кызым Настяга – 14 яшь. Матур итеп бии. Иптәшләреннән аерып калдырасым килми инде. Кешегә бурычка кереп булса да, бию ярышларына җибәрәм. Әле менә укытучысы 14 мең сум әҗәткә акча биреп торды. Аны кайтара алмыйм. Озакламый тагын ярышка барасы бар. Анысына 16 мең сум кирәк, – ди Альвера апа. – Элегрәк әниләре балаларга бераз булыша иде. Ана хокукыннан мәхрүм ителсә дә, мин аларны очрашудан тыя алмыйм. Әмма быел җәй буена килмәде дә, хәлне дә белмәде. Олы кызымны мәктәпкә әзерләр өчен, бер ай ялымда бер генә көн дә буш утырмадым. Башка эшкә чыктым. Улым гаиләсе бик булыша. Киленемә мең рәхмәт! Кайчак мин балаларны мәктәптән, бакчадан алырга соңга калсам, ул алып кайта. Мин кайтканчы көтеп утыра. Кызыма бер ышаныч калмады. Абыем үлгәч, балаларны карап тор, дип киткән идем, миңа килеп тә эчеп яткан”.

Алга таба нишләрмен?

Альвера апа шушы көннәрдә пенсиягә чыгу мәшәкате белән йөри. 17 мең сум хезмәт хакы ала икән. Аның яртысын кызының кредитлары өчен тотып баралар. Фатир хуҗасына да бурычы җыелган. “Кызым хәзер бер ир белән яши. Эчәренә акча сорап шалтыратырга да оялмый. Икенче елга икенче оныгым Сафия укырга бара. Ул Диана киленем белән улымда яши. Малаебызның исеме – Клим. Урыска кияүгә чыккач, бер татар исеме дә куймады шул. Бу балалар белән алга таба нишләрмен? Аларны бик яратам. Төннәрен аз йоклыйм, юам, үтүклим, пешерәм. Сафия оныгым әнисендә чакта ач торган. Суыткычны карап кына тора хәзер. Әзрәк бушаса, “Без ачка үлмибезме?” – дип сорый. Балакаемның йөрәгенә үткән икән. Казанда пропискасыз да калган идем бит мин. Әле ярый ясатып булды. Хәзер менә балага бирелә торган җир кишәрлеге артыннан йөрим. Яхшы күңелле кешеләр белән таныштым. Әгәр җирне рәсмиләштереп булса, ничек тә сабыйларыма йорт салырга иде”, – ди ул.

Миңа хәзер рәхмәт әйтәләр

Әнисе эчәргә яраткач, бу сабыйлар берсе дә рәхәт күрмәгән. Хәтта үсешләренә зыян килгән була. Әмма Альвера апа тырыша, сабыйларга тәрбия бирә. Балаларга матур булсын дип, үзе яшәгән фатирда ремонт ясый. Обойларын алыштырып чыга. Олы оныгы Настяның дус кызларының әниләре килеп рәхмәт әйтә. “Һәрвакыт чиста-пөхтә йөртәсез. Акыллы булып үсә. Без кызларыбызга аның белән дус булырга кушабыз”, – диләр икән. Балалар бакчасындагы тәрбиячеләр дә әбиләренең хезмәтен күрә. Оныкларын гел мактап торалар.

“Президентка да хат язармын дип торам. Балалар артыннан йөри торгач, кич була. Һич кенә дә вакыт таба алмыйм. Тыңлар иде ул мине. Аңлар иде. Аның кеше хәленә керә торган икәнен беләм”, – ди ул. Альвера апа яхшы күңелле кешеләргә дә рәхмәтле. Әле менә бер кеше Сафиягә букча китергән, кемдер киемнәр биргән. Кеше почмагында гомер итүче олы йөрәкле бу ханым үзенә сәламәтлек тели. “Аяк-кулларым йөреп торса, мин аларны ташламам. Ничек тә аякка бастырырмын”, – ди.

Әлеге гаиләгә ярдәм кулы сузарга теләүчеләр өчен Альвера апаның телефон номеры: 89061153819.

Автор: Гөлгенә Шиһапова

Язма һәм фото “Ватаным Татарстан” газетасы сайтыннан алынды

Запись Берьялгызы кечкенә оныкларын үстерүче Альвера Фәләхова: “Кызым йортсыз калдырды…” впервые появилась Tatar Today - татар яңалыклары..