“Иҗат минем өчен тормыш рәвеше. Үземне белгәннән бирле, мин сәхнә белән бәйле”, – ди җырчы Рамил Закиров

“Эх, дәрт бар иде!” – Рамил Закировны таныткан иң популяр җыр шулдыр, мөгаен… Иҗаты ташып торган җырчы белән сәхнәгә илткән юллар буйлап атладык.

– Чаллыдан чыккан сәләтле, танылган җырчылар шактый. Салават, Хәния, Резеда Шәрәфиева шунда канат ярды. Моның сәбәбе нәрсәдә дип уйлыйсың?

– Чаллы, беренчедән, Татарстанның, Казаннан кала, иң зур шәһәрләренең берсе. Анда татар мохите бар. Милли мәктәпләр, төрле оешмалар күп. Моның йогынтысы да бардыр. Мин үзем Гали Акыш исемендәге лицейда укыдым. Ул татар милләтен үстерүгә зур өлеш кертә торган мәгариф учреждениесе. Анда милләткә карата мәхәббәт тәрбиялиләр. Милләтне ярату исә мәдәнияткә дә мәхәббәт уятадыр, дип уйлыйм.

– Үзең шәһәр малае, әмма шундый чиста, матур итеп татар телендә аралашаң. Шәһәр җирендә татар рухын, татар телен саклап калу өчен нәрсә эшләргә соң? Телне саклау нәрсәгә бәйле?

– Миңа калса, моңа бер генә фактор йогынты ясамыйдыр. Бу төрле әйберләр бер үк вакытта үтәлгәндә генә тормышка ашырыла. Телеңә, милләтеңә мәхәббәт булырга тиеш. Беренче урында гаилә тора, әлбәттә. Гаиләдә әти-әни, бер-берең белән нинди телдә аралашуга бәйле. Дөрес, әти-әни, гадәттә, эштә була. Абый-апаларың, урамда дусларың белән татар телендә сөйләшү, минемчә, югары күрсәткеч. Гаиләдән соң мәктәпнең роле зур. Ул баланың уй-фикерләрен, үз-үзен тотышын формалаштыра. Хәзер татар теле дәресләрен азрак кыстылар, әлбәттә. Сәясәткә кысылырга яратмыйм. Әмма, миңа калса, бу факторларның берсе генә булса да үз вазифасын үтәсә, кеше рәхәтләнеп татарча сөйләшә алачак.

– Ә иҗатка килүдә сиңа кем тәэсир ясады?

– Иҗат минем өчен тормыш рәвеше. Үземне белгәннән бирле, мин сәхнә белән бәйле. Күпчелек артистлар шулайдыр инде ул. Бәләкәй чактан үз сәләтләрен үстерү белән шөгыльләнәләр. Әнием ягыннан әбием бик матур җырлый иде һәм иҗатка булган мәхәббәтне дә миндә ул сеңдерде. Студент вакытта ул да бик актив булган, әмма иҗат юлын сайламаган. Үзенең тормышка ашмаган хыялын миндә ашырырга теләгәндер, күрәсең. Әти-әниемә дә рәхмәтле. Алар мине бик күп түгәрәкләргә йөртте. Бала чакта барысын да аңлап та бетермисең: тегене эшлисе килми, монда барасы килми, дип киреләнәсең. Шуңа да карамастан, әти-әнием сәнгать белән шөгыльләнү кирәк, синең сәләтең бар, дип миңа бу юлдан тайпылмаска ярдәм итте. Хәзер инде үземне иҗатсыз күз алдына китерә алмыйм.

– Беренче тапкыр зур сәхнәгә чыккан вакытларны, нинди хисләр кичергәнеңне хәтерлисеңме?

– Зур сәхнәнең мәгънәсе һәр кеше өчен төрле була бит ул. Мисал өчен, сәхнә белән бик бәйле булмаган кеше өчен авыл клубы сәхнәсендә чыгыш ясау да зур сәхнә дип тоела. Зур сәхнәгә мин әле, бәлки, чыкмаганмындадыр. Белмим. Бәлки ул Кремль сәхнәседер. Алай дисәң, минем “Крокус сити холл”да (Мәскәүдә иң зур концерт залларының берсе – Л.Л.) чыгыш ясаганым бар.

Әти-әнинең бер гадәте бар. Алар күпчелек вакыйгаларны видеотасмаларга яздырып, фотога төшереп, истәлеккә калдыра. Мине генә түгел, ә башка туганнарым, икетуган апа-абыйларныкын да саклыйлар. Икетуган апаларым, иҗат юлыннан китмәсә дә, түгәрәкләргә йөрде, 90нчы елларда Чаллыда бик популяр булган “Айгөл” ансамбленә чыгыш ясады. Шулар ниндидер бәйгедә катнашканда, аларны карарга без дә барганбыз. Конкурста чыгышлар беткәч, алып баручы тамашачыларга мөрәҗәгать итеп, сәхнәгә чыгып җырларга теләүче юкмы, дип сорагач сәхнәгә чыгып киткәнмен. Зур сәхнәгә беренче менүем шул рәвешле булган. Аны бик яхшы хәтерләмим дә. Әмма миңа бик охшаган.

– Мәктәптән соң КамПИга укырга кергәнсез. Ни сәбәпле техник югары уку йортын сайларга булдың?

– Тормышым бик кызыклы. Минем бер нәрсә дә кешечә түгел. Гадәттә, кеше мәктәпне тәмамлагач, уку йортына керә, белем ала, диплом алып чыга. Минем алай булмады. 10-11 сыйныфларда “Мизгел” җыр театрында актив эшли башладым. Төрле илләрдәге фестивальләргә йөри идек. 11 сыйныфтан соң “Мизгел”не ташлап, Казанга китәргәме, әллә инде Чаллыда калып, иҗат белән бәйләнмәгән уку йортында белем алыргамы дигән сайлау алдында калдым. Чөнки Чаллыда иҗат буенча белем бирә торган югары уку йорты юк. “Мизгел”дә чыгыш ясауны туктатмаска булдым. Казанга да укырга керәсе килгән иде. Казан, студент тормышы үзенә башка төрле бит инде ул. Бу теләк минем күңелемдә калды. Ике ел мин “КамПИ”да укыдым. Беренче курстан соң тагын БДИ бирдем һәм Чаллыда ике курс укыганнан соң, Казан дәүләт Педагогика университетының музыка факультетына укырга кердем. Бер ел Миңгол Галиевта белем алдым. Студент буларак Казан тормышы минем бер елга сузылды һәм шуннан соң мин Америкага киттем. Шул рәвешле уку процессым 1,5 елга тукталып торды. Әмма аннан КамПИда укуны яңарттым. Мәдәният һәм сәнгать институтында да, Венера Ганиева классында укыдым.

– Венера Ганиевада уку җиңел түгел, диләр…

– Кем өчендер җиңел түгелдер. Ул һәрбер укучысына үз ачкычын эзли. Мине ачуланганы булмады. Барысына да балаларына караган кебек карый. Берәр нинди авырлык туса, Венера Әхәтовнага теләсә кайсы вакытта шалтыратырга була. Һәр укучысына ул: “Сез булачак йолдызлар, бу образга сез туры килергә тиеш”, – дигән киңәшен бирә. Аны беркайчан да арыган кыяфәттә, таралмаган чәч белән күргәнем юк. Үзе ул һәрвакыт “йолдыз” булып кала белә.

– Америкада яшәдем, дидең. Барысын да ташлап, ничек анда китәргә батырчылык иттең?

– Ул вакытта студентлар арасында бу бик популяр булды. Студентлар өч-дүрт айга укырга, эшләргә китә иде. Ә миңа ул вакыт кына җитмәде һәм мин озаккарак калырга булдым. Әйтәм бит, бар нәрсә дә минем кешечә түгел. Ел ярым тирәсе Америкада яшәдем, эшләдем, тел өйрәндем, төрле штатлар буенча сәяхәт иттек. Андагы тормыш белән, бездәгесен бөтенләй дә чагыштырып булмый. Мисал өчен, кайбер гаиләләрдә, әби-бабай оныклары белән торырга кала икән, аның өчен балалары аларга акча түли. Уку процессында да, Америка университетларында төрле партияләр, үзләренең “дәүләтләрен” булдыра. Студентларны яшьтән үк сәяси тормышка әзерли. Америкада калу теләгем дә бар иде, әмма җирле халыкны, менталитетны яхшырак белә башлаганнан соң, ул теләк юкка чыкты. Анда капитализм, барысы да акчага корылган. Аларда беренче урында акча тора. Күпмедер дәрәҗәдә, бәлки бу дөрестәдер. Әмма ул безнең өчен мөһим булган кыйммәтләрне юкка чыгара торган әйбер. Мин боларны кабул итә алмадым.

Лилия ЛОКМАНОВА.

Чыганак: Шәһри Казан
 сайт архивыннан 2020 ел

Запись Җырчы Рамил Закиров: “Америкадагы тормыш белән, бездәгесен бөтенләй дә чагыштырып булмый” впервые появилась Tatar Today - татар яңалыклары..

View this post on Instagram

A post shared by ТАТАР ТУДЕЙ / ТАТАР БҮГЕН (@tatar_today_116)

Әлеге дуэтны күпләр бик ошатты, тулысынча җырны каян табарга була дип сорап та яздылар.

Нәркис Зиннәтуллин һәм Азалия Яфясова “Яратам, сагынам” җыры белән кабат Казанда да чыгыш ясаганнар.

“Яратам, сагынам” җыры барлык музыкаль мәйданнарда.

– Бер уйламаган җирдән, яз бәйрәмендә авылдашым – Азалия Яфясова @iafiasova5 белән бергә “Яратам, сагынам” җырын башкардык. Кабатламаган да идек, тоттык та җырладык. Авылдашлар бик ошатканнар иде, – дип елмая җырчы, алып баручы Нәркис Зиннәтуллин @zinnatullinnarkis

Гөлфия Шакирова сүзләре.
Илдар Низамов көе.

Запись Нәркис Зиннәтуллин һәм Азалия Яфясова яңа җыр тәкъдим иттеләр [видео] впервые появилась Tatar Today - татар яңалыклары..

Җырчы Лилия Хәйруллина инстаграмда сөйгәне белән төшкән фотоларын урнаштырган. «Бәхет тынычлыкны ярата», — дип язып куйган. 

Ләкин Лилия монда интригага урын калдырган —  фотоларда Лилия белән сөйгәненең йөзләре күренми, яшьләрнең серле образлары гына күренә.

Инстачылар Лилиянең сөйгәнен таный алмаганнар. Пост астында шундый комментарийлар язып калдырганнар:

«Шәп»

«Ел интригасы»

«Бөтен серләр дә вакыты җиткәч ачыла ул».

Күбесе җырчыга сөйгән яры белән матур тормыш һәм бәхет теләгән.

View this post on Instagram

A post shared by 🅻🅸🅻🅸🆈🅰️ 🅺🅷🅰️🅸🆁🆄🅻🅻🅸🅽🅰️ (@liliya_khairullina_official)

Фото: Лилия Хәйруллина инстаграмыннан

Чыганак: Лилия Хәйруллина инстаграмыннан

Запись Җырчы Лилия Хәйруллина үзенең сөйгән ярын күрсәтте впервые появилась Tatar Today - татар яңалыклары..

Чәчкә яңа җырының тарихын сөйләде. Бу җырны ул авыр тормышлы хатын-кызларга багышлаган. 

“Биш-алты ел элек Татарстаннын бер районында җитәкчеләр генә жыелган бер банкетта жырладым. Шунда бер җитәкче кешенең тормыш иптәше минем яныма килеп, кулыма хат тапшырган иде.

“Юк, мин бүтәнн болай яши алмыйм. Түзәр хәлем калмады. Тормышыбызның асты өскә килде. Нәрсә булды безгә? Ә без, кайчандыр яратышып өйләнешкән парлар идек. Хәер, читтән карап, күзәтеп торучыларга безнең тормыш ал да гөл, оҗмахта яшибез! Ә чынлыкта исә җәһәннәм белән бер”

Бу чибәр ханым шушы темага җыр язуымны үтенде. Бик озак язылды бу җыр. Әзер булгач, биш ел тик ятты.
Яздырырга батырчылык итмәдем, курыктым.

Ниhаять, бүген яздырдым! Хит булсын дип түгел. Күпләр, бәлки, шушы җыр аша үзләренең тормышын күрерләр, дидем.

“Күңелне кузгаттыгыз җырыгыз белән. Күз яшьләремне тыеп бу сүзләрне язам”, – дип язган инстачылар.

View this post on Instagram

A post shared by ЧЭЧКЭ (@chachka_official)

Фото: Чәчкә инстаграмыннан

Чыганак: Чәчкә инстаграмыннан 

Запись Җырчы Чәчкә: “Тормыш чынлыкта җәһәннәм белән бер” впервые появилась Tatar Today - татар яңалыклары..

− Айдар абый, Роберт абый белән соңгы арада элемтәдә идегезме?
– Роберт абыйның китүен авыр кичердем. Дөресен әйткәндә, үземне начар төш күргәндәй хис итәм. Хәзер уянырбыз да, барысы да үзгәрер, мыек астыннан гына елмаеп, юморга бай сүзләре белән Роберт абый килеп чыгар төсле. 8 Мартта бер чарада булган идем, җырладым. Шунда Таңсылуны күреп алдым, бу җырны тыңлаганда елап утырды ул. Шул вакытта ук күңелгә шом кергән иде инде… Безгә барысын да әйтеп бетермәделәр бит. Авыру – авыру, үтәр, җиңәр дигән өметтә булдык. Телефоннан аралашканда да Роберт абый берни сиздермәс иде! Ай-һай, ничек шундый көчле рухлы булырга кирәк?! Егет икән! Мин Роберт абыйны яхшы беләм дип уйлыйм идем, белеп бетермәгәнмен шул… Роберт абый белән гел элемтәдә булдык. Әмма соңгы вакытларда аралашу җитмәде дип уйлыйм. Соңарып үкенәбез шул. Их, сөйләшәсе, серләшәсе булган. Мин аңа гел: «Роберт абый, син – дустым да, тәнкыйтьчем дә, терәгем дә», − дип әйтә идем. Тәнкыйтьнең төрлесе була. Роберт абый булышу йөзеннән, миңа, иҗатыма уңай булсын өчен тәнкыйтьли иде. Аны бөек шәхес дип әйтүдән дә курыкмыйм.

– Җырланмаган җырлар калдымы?
– Җырлар калды. Җырлар дигәннән… Роберт абыйның «Сөюләрем инде үткәннәрдә» шигыренә Башкортстаннан Вилдан Фәйзуллин көй язган иде. Бу җырны күптән якын итеп йөргән идем инде, бигрәк тә Роберт абыйныкы булгач. Шушы җырны ничек тә булса эшләп чыгарга дигән карарга килдек. 27 мартта, йоклар алдыннан, шуны тыңлап: «Тизрәк эшкәртеп, Роберт абыйга тыңлатасы иде», − дип уйлап яттым. Иртән торуга, Инстаграмны ачам, шомлы хәбәр… Бу җырны әле барган концерт программасына өстисем килә. Аның истәлекләре, фотолары белән үрелеп барачак ул. Бу җыр булырга тиеш дип уйлыйм, чөнки Роберт абый – минем иҗатка зур йогынты ясаган кеше. «Минем җырларымны җырлап кеше булдың, Айдар», − дип, шаяру катыш әйтә иде ул. Хак та әйткән бит!

– Роберт абыйга бәйле истәлекләр сездә күптер…
– Бер җәйне Роберт абый белән Башкортстан якларына кайтып килдек. Мин рульдә, ул минем янымда. Шулай икәүдән-икәү туган якларны әйләнеп кайттык. Бишбүләк, Миякә, Акмулла, Фатих Кәримнең туган авылларында булдык… Моңа да сөенеп туя алмыйм, ярый шуңа өлгергәнбез әле. Шул чакта аның чын-чынлап халык шагыйре икәнен аңладым инде. Безнең өебездә булды, әти-әнием белән очрашты, икәүдән-икәү генә калып сөйләшеп утырдык. Бу истәлекләрне күңел дәфтәрендә саклап, киләчәктә кәгазьгә дә төшереп булса иде. Күңелем бер нәрсәгә тыныч: соңгы юбилей программама Роберт абыйны чакыра алдым һәм ул килде. Концертны башыннан ахырынача карап утырды. Аның «Өянкеләр-тупыллар»ын җырлаганда, залга төштем, күрештек, кочаклаштык. Якыннан күреп, соңгы кочаклашуыбыз булган икән. Халык арасында, җыр аша күрешеп хушлашканбыз. Роберт абый гаилә җанлы кеше иде. Клара апа, балалары, оныклары дип янып торучы, үрнәк кеше. Аның туган авылына, әнисенә, иленә, теленә булган мөнәсәбәтен әйтеп аңлатырлык түгел. Шундыйлар безне данлый да, тарихта эзле итеп калдыра да инде.

Чулпан Гарифуллина

Чыганак: Ватаным Татарстан сайты

Запись Роберт Миңнуллин Айдар Галимовка: «Минем җырларымны җырлап, кеше булдың син» [видео] впервые появилась Tatar Today - татар яңалыклары..

«Башка җырчыларга язу авыррак…»

– Бик актив иҗат итәсез. Автор, композитор Илнат Фәрхуллинны нәрсә яки кем илһамландыра?

– Беренче чиратта, Ходай. Барысы да аның кулында. Икенчедән, алдыма куелган максатлар. Айдар абый Фәйзрахманов белән ансамбльдә (ТР Дәүләт фольклор ансамбле. – Ред.) эшләгәндә, ул безне болай дип өйрәтә иде: кеше көн саен ни дә булса эшләргә, нинди дә булса яңалык ачарга тиеш. Әле дә мин шуңа омтылам, бу – минем тормыш девизым. Үземне, ялкаулыгымны җиңеп, көн дә профессиональ яктан үсәргә тырышам. Әлбәттә, минем дә башкалар кебек үк ял итәсем, күңел ачасым килә, тик әлегә менә шушы үсеш – беренче урында.

– Иҗат «бармый» торган, авыр чорларсыз да булмыйдыр. Аларны ничек кичерәсез?

– Булганның кадерен белер өчен андый чорлар да кирәк. Авыр чакларда үземне яхшы эмоцияләргә, хисләргә «көйлим». Шул ук җыр үзе дә бик ярдәм итә: мин барыбер язам. Гадәттә, андый вакытларда салмак, моңсу, күңелгә үтеп керердәй җырлар туа.

– Заказга җыр язып бирергә кирәк, ләкин теләк тә, көч тә юк. Мондый очраклар буламы? Ничек җиңәсез үзегезне?

– Юк. Мин йә алынам һәм, бөтен күңелемне биреп, эшне ахырына кадәр җиткерәм, йә алынмыйм. Һәм бу кагыйдә бар кешегә дә кагыла. Гади студент килеп сораса да, танылган җырчы булса да – барысына да күңелем кушканча, яхшы итеп эшләп бирергә тырышам.

– Кем өчен язу кыенрак: үзегезгәме, әллә башка җырчыгамы?

– Башка җырчыларга язу авыррак. Миңа киләләр дә: «Менә болай булырга тиеш, менә шулай сизәм», – дия башлыйлар. Соң сизгәч, үзең яз инде аны (көлә). Кешеләр төрле бит, текстларны да, көйне дә төрлечә кабул итәләр. Ә мин үзем – ничек тоемлыйм, шуннан тайпылмыйча иҗат итә торган кеше. Аннан соң, бер язган әйберне кат-кат үзгәртү дә авыр бирелә. Алай иткәнче, яңа җыр язам мин, чөнки беренче язган әйбер иң яхшысы булып тоела.

 «Начар әтидер дә мин…»

– Ә үзизоляция чорын ничек кичердегез соң? Аңлавымча, бу чорда сезнең иҗат күпкә активлашты гына…

– Һәр начар әйбернең яхшы ягы булган кебек, үзизоляциянең дә минем өчен яхшы яклары булды. Бу чорны студиядә уздырдым: бик күп җырлар иҗат иттем, яздырдым, аранжировка эшләргә өйрәндем, клиплар төшердем. Гомумән, бу соңгы дүрт ай гел иҗатта гына үтте.

«Мин җырчылар тарафыннан әйтелгән «подписчиклар» сүзен кабул итмим. Мыскыллый торган сүз кебек тоела ул миңа хәтта. Сиңа язылганнар икән, алар – синең тамашачың. Бигрәк тә бүгенге вазгыять шартларында тамашачыларны шул «Инстаграм залы»на гына җыеп була бит».

– Көнозын студиядә эшлим, дисез. Гаиләгезнең моңа мөнәсәбәте нинди?

– Үз алдыма максатлар куйгач, бернигә карамастан, мин аларга ирешергә тиеш инде. Гаиләм моны аңлый дип беләм. Дөрес, минем белән бер дә җиңел түгел. Күпмедер дәрәҗәдә начар әтидер дә мин, чөнки балаларыма тулысынча игътибар бирә алмыйм. Үзем белән студиягә алып барырга, алар белән булырга тырышам тырышуын, шулай да аз тоела. Тик хәзер миңа бар көчемне биреп эшләргә кирәк. Бу вакытлыча булыр дип уйлыйм. Ә радио, телевидениедә эшләү балачак хыялым иде. Шуңа Байбулат белән («Татар радиосы»нда алып баручы Булат Фасахов. – Ред.) сөйләштек тә, «Татар радиосы» җитәкчеләренә «Авыл яшьләре» исемле тапшыру башлап җибәрергә тәкъдим иттек. Менә хәзер атнага бер тапкыр кичке тугыздан унбергә кадәр республикабызның төрле авыллары турында сөйләшәбез. Яшьләр форматын кулланырга булдык: һәр авылның үз тарихы, үз танылган кешеләре бар бит, тыңласыннар, белсеннәр, дидек.

«Шәхси әйберен беркем дә башкаларга калдырып китми…»

– «Казан егетләре»ннән киткәч, тамашачы аптырашта калды. Бу адым егетләр белән шәхси мөнәсәбәтләр бозылу аркасында булдымы, әллә эш бары тик аерым җырчы буларак иҗат итү теләгендә генәме?

– Егетләр белән мөнәсәбәтләр бозылды, дип әйтә алмыйм. Мин киткәч, димәк, бу – минем генә теләк. Бу турыда инде бик күп сөйләдем: беркемне дә гаеплисем килми, бу адымым бер урында озак тукталып тору ошамаганлыктан, яңалыкка омтылганлыктан ясалды. Үсәсе килгән кеше бер урында тукталып тормый ул. Бигрәк тә иҗат өлкәсендә.

– Ә бүген егетләр белән аралашасызмы?

– Безнең хәзер карашлар төрле, аралашыр темалар да юктыр инде. Үткәндә-киткәндә исәнләшеп китәбез, шул.

 «Инстаграмда һәркемгә җавап бирергә тырышам…»

– Төркемнән киткәндә, тамашачы үземне генә кабул итмәс, дигән уйлар килмәдеме?

– Киткәндә, мин бер нәрсә турында да уйламадым. Нинди генә профессияне алсак та, бар көчен биреп, тырышып эшләгән кешеләр барыбер игътибарсыз калмый. Аларны йә начар, йә яхшы бәялиләр. Начар бәяләсәләр – яхшы, яхшы бәя бирсәләр, тагын да яхшырак булсын дип тырышасың. Тәнкыйтьтән курыкмыйм. Аның да бит төрлесе була. Көнозын диваннан тора алмыйча гомерен үткәргәннәр тәнкыйтьли икән, аны тыңлаган буласың инде, тик игътибар бирмисең. Бәхәсләшкән чаклар да була. Әгәр тәнкыйть сүзләрен үз максатларына ирешкән, тормыш күргән, минем һөнәрне аңлый торган кешедән ишетәм икән, әлбәттә, аларга колак салачакмын, уйланачакмын.

– Социаль челтәрләргә, бигрәк тә Инстаграмга карап, үз тамашачым формалаша башлады, дип әйтә аласызмы?

– Әйе, тамашачым хәйран гына артты. Монда «Татар радиосы» һәм «TMTV» музыкаль каналының өлеше зур. Шул ук Инстаграм аша да бик күп фикерләр ишетәм. Язган һәр хатны, бәяләмәне укып, җавап бирергә, миңа язган һәр кеше белән аралашырга тырышам. Тамашачымның һәркайсын бик яратам, һәркайсына мең рәхмәтле. Алар – минем терәгем.

Әңгәмәдәш – Лилия Гыймазова

Чыганак: Ватаным Татарстан

Запись Җырчы Илнат Фәрхуллин: “Начар әтидер дә мин…” впервые появилась Tatar Today - татар яңалыклары..

“МЕГА” кибете ачылган. Дилә ачылуын зарыгап көткән. Шатлыгын шигырь юллары аша белдерә. 

“Тәрәз төбенә утырып шигырь яздым әле. Бик матур килеп чыкты кебек.. Тик.. Иптәш кызга укыткан идем дә, нәрсәдер җитеп бетми диде. Үзгәрткәннән соң сезгә дә укытырмын. Тик шулай да, бер сәгатьтән менә шундые туды.

Сине сагынганмын бит беләсеңме?
Югалткач кына аңладым кадерен..
Син дә мине шулай ук көтәсеңдер,
Озакламый киләм сиңа , бәгърем!

Язлар үтте синнән башка,
Сизелми дә җәй керде.
Очрашу мизгелләрен көтеп,
Киемнәрем тузып бетте.

Бара белерменме икән сиңа таба?
Юллар бит буталган, онытылган…
Керер юлларын да башкача дип,
Хәбәр килде кичә бер дус кыздан.

Әмма теләк көчле, дәрте дә бар
Кесә генә сайрак, акча аз.
Бары синең рәхимлеккә ышанычым
Ташламалары гына булса бераз.

Бүген үк барырмын дигән идем,
Туктаттылар, җанымны телгәләп.
Бераз суын, нәпсенне тый диеп,
Болай да яшәдек бик рәхәт.

Ә мин инде хыялымда
Сумкаларымны тутырып.
Чыгып барам, бәхетемнән
Кредиткамны туздырып.

Озак булмады очрашулар…
Сагынылган!
Барам иртән иртүк!
Төннәрен ничек йоклармын инде,
Бирче Аллам түземлек!

Сез дә минем кебек өзелеп көттегезме “МЕГА” ачылганын? Кемнәр барып җитте? Уртаклашыгыз әле. Ничек анда ситуация? Барыргамы яки юкмы?”

View this post on Instagram

A post shared by Диля Нигматуллина (@dilyanig)

Күпләр шигырьне ошаткан. Кайберәүләр рифмага туры килеп бетми дип язган.

“Шәп килеп чыккан!!! ”

“Болай эчтәлеге әйбәт. Рифмага бик туры килеп бетми”, – дигәннәр инстачылар.

Запись Дилә Нигъмәтуллина: “Югалткач кына аңладым кадерен…” впервые появилась Tatar Today - татар яңалыклары..

Видео Гөлназ Шәйхинең инстаграм битеннән алынды

Запись Хәния Фәрхи истәлеге: телне, мәдәниятны саклап калырга күп урын яулап алган ул… [видеоинтервью] впервые появилась Tatar Today - татар яңалыклары..

“Режиссерга буйсынучан актерлар кирәк…”

– Сезнең гаилә – театраль династия. Әлбәттә, горурланырлык  урыны бик күп, тик театрда эшләү – җиңел хезмәтләрдән түгел. Кечкенә чакта әти-әни тәрбиясе, назы җитмәде, дигән авыр уйлар калмадымы?

– Калмады, чөнки әти белән әни мине һәрвакыт диярлек гастрольләргә үзләре белән алып чыгып китә иде. Үзем дә кечкенәдән спектакльләрдә уйнадым. Ул яктан миңа, апага (К.Тинчурин театры артисты Лилия Мәхмүтова, – ред.) караганда, бәхет күбрәк елмайды. Мин үскән чорда гастрольләр башкачарак, җиңелрәк шартларда уза иде. Әти-әни белән бөтен Россияне әйләнеп чыктым, дисәм дә, ялгыш булмас. Шуңа күрә бүген наз, тәрбия җитмәде, дип һич зарлана алмыйм.

– Иҗат юлын сайлавыгызда әти-әниегезнең өлеше күп булдымы?

– Әлбәттә.

– Әгәр шул чакта “бу юлны сайламыйсың” дип кырт кискән булсалар?

– Барыбер сайлар идем. Кеше әйткәнне тыңлый торганнарга охшаганмы инде мин?! Башка берәр уй килсә, яки берәр теләгем булса, катгый рәвештә үти торган кеше мин. Бигрәк тә яшь чакта бу ягым көчле иде. Олыгайган саен ниндидер адым ясар алдыннан уйлый башладым башлавын. Яшь үзенекен итә (көлә).

Ә апам андый ук үзсүзле түгел. Башта ул, әти-әни сүзен тыңлап, бөтенләй башка юлны сайлаган иде. Тик соңыннан ул да барыбер шушы юлга басты.

– Сез дә Тинчурин театрында эшләп алдыгыз бит. Озакка гына сузылмады…

– Мин театрда эшләгәндә, бары тик бер генә режиссер бар иде. Ул чакта вакытлыча килеп китүче режиссерлар булмады. Шулай итеп, бөтен актерлар белән бер Рәшит Заһидуллин гына эшләде. Дөрес, әнигә дә (Татарстанның халык артисты Исламия Мәхмүтова – ред.) режиссер буларак берничә спектакль куярга рөхсәт бирделәр. Аның “Резидәкәй”, “Сынган беләзек” кебек спектакльләрендә уйнаганым исемдә.

Яшермим, баш режиссерның яраткан актерлары булды. Ә миңа килгәндә, үзгә характерлы кеше буларак, уйлап тормыйча, турысын да ярып әйттем, буйсынучан да булмадым, сыгылмадым. Өстәвенә күп мәсьәләләрдә режиссер белән фикерләребез төрле булды. Шулай юлларыбыз аерылды да инде.

Дөресен генә әйткәндә, мине баштан ук Камал театрына алмакчылар иде. Яшьлегем белән шушы мөмкинлекне кулдан ычкындырып ялгыштым. Үкенеп әйтүем түгел, димәк, шулай булырга тиеш булган инде ул. Театрдан киткән юллар мине эстрадага алып килде.

– Аның каравы, татарча фильм, сериалларда еш күренәсез. Мөмкинлек булса, нинди фильмда һәм нинди роль башкарыр идегез?

– Полиция хезмәткәрен уйнар идем. Тик белмим, җитешә алырмын микән, чөнки бу рольнең дә үз яшь чикләүләре бардыр, ә мин ел саен яшәрмим шул. Аннан соң, безнең менталитетны исәпкә алсак, мондый рольне башкарырдай фильм төшерергә алынырлар микән. Безнең фильм, сериалларда төшсәң дә, җәелеп китеп, рәхәтләнеп уйнап булмый шул, үзеңне тыярга туры килә.

Тагын бер кимчелек бар икән әле: татар фильмнары гади халыкка соң барып җитә, яки гомумән барып җитми. Күбесен төшергәнгә инде күпме, тик караучылар саны һаман аз. Һәр әйбернең үз бәхетле сәгате була бит.

– “Тискәре рольләрне уйнарга рәхәт” дигәнсез. Тамашачыда “тормышта да шундыйдыр бу” дигән фикер урнашуыннан курыкмыйсызмы?

– Беләсезме, мин бертөрле генә рольләр башкарудан куркам. Сериаллар, фильмнар күбрәк һәм төрлерәк булса, бу курку хисе булмас та иде кебек. Бик күп рольләр тәкъдим иттеләр, итәләр, тик алар барысы бер типта, шуңа баш тартырга да туры килә.

Бигрәк тә “Яланаяклы кыз” сериалыннан соң бер-ике ел бик авыр булды. Ямьсез сүзләр дә  ишетергә туры килде. Уңай рольләр белән киресен, моны да булдыра алуымны исбатлыйсым килә иде. Шулай да, характерым тыйнак, тыныч холыклы геройларны уйнарга комачаулый бераз. Уйный алам, тик эмоцияләремне “кысарга” туры килә.

“Бу адымга Лилия Муллагалиева этәрде…”

– Ә тормышта нинди сез? Бик көчле кешегә охшагансыз.

– Физик яктан шулайдыр. Эмоциональ яктан төрле чаклар була. Бер урында озак таптана алмыйм мин. Һәрвакыт яңалык эзлим. Озаграк тукталып торсам, үз эчемдә казына башлыйм, мораль яктан бик авыр кичерәм.

“Зә-ләй-лә”ле чорны гына алыйк. Баштан ук без үзебезне дәртле җырлар белән таныттык. Репертуарыбыз төрле җырлардан торса да, күбесенчә торып биеп китәрдәйләрен башкардык. Уй-фикерләр, караш үзгәрми тормый бит, гел болай уйнап-көлеп йөреп булмас, дип тә уйлап куясың. Тик “Зө-ләй-лә”дән башканы көтәләр икәне искә төшә. Менә шушы икеләнүләр чорын авыр кичерәм.

Инде хәзер үземне аерым җырчы буларак та күрсәткәч, җиңеләеп киттем. Бу адымга мине җырчы Лилия Муллагалиева этәрде. Бер җырыма клип төшерергә тәкъдим итте ул. Шуннан соң чынлап торып уйлана башладым. Бәлки, минем үзем булдырган төркемнән аерылып җырлап йөрүемне аңлап та бетермиләрдер, хыянәт буларак кабул итәләрдер. Тик “Зө-ләй-лә”нең башка солистлары да төркемдә генә эшләмәде бит: Зөлфия (К.Тинчурин театры артисты Зөлфия Вәлиева – ред.) театрда уйнады, Ләйсән (Ләйсән Закирова – ред.) төрле бәйгеләрдә жюри әгъзасы иде.

– Шулай да, “Зө-ләй-лә” озак эшләде. Башка төркемнәрдән аермалы буларак, составы да үзгәрмәде, ялгышмасам…

– Состав берничә тапкыр үзгәрде ул. Әйткәнемчә, Зөлфиянең, театр артисты булгач, үз графигы да бар иде. Аның урынында җырлап торучылар булды. Үземнең Лилия апа да, Чулпан Закированың да алыштырган чаклары булгалады. Графиклар белән проблемалар еш чыга иде. Гомумән, бу 15 ел эчендә ни генә булмады инде…

– Төркемдә җырлаганнан соң, аерым җырчы булып китү кыен булмадымы?

– Төркемдә җырлаганда җыр сүзләрен оныттым, дип тә курыкмыйсың, башка кеше тотып ала, сәхнәдә үзеңне тоту да җиңелрәк. Менә шушы техник яклар гына кыенлык тудырды. Элек төркемдә җырлаганнар мине яхшы аңлар. Беренче чыгышлар вакытында бик дулкынландым. Җитмәсә, җыр сүзләре оныта торган гадәтем бар. Ярый инде мин генә андый түгел икән (көлә). Дөресен генә әйткәндә, сәхнәдә яңа җырны тәүге тапкыр башкарганда, фонограммага җырлыйм. Сүзләрне авызым булса да истә калдырсын өчен. Күнеккәч, әлбәттә, тере тавышка башкарам.

– Клипларыгыз шактый кызыклы, үзенчәлекле. Сценарийларын үзегез язасызмы?

– Әйе, үзем язам. Театр белән бәйле булгач, андыйга фантазия ярыйсы гына эшли. Аннан соң клиплар өчен материаль яктан әллә ни зур өлеш чыгарырга мөмкинлек юк – үзеңә уйларга туры килә. Кайбер клиплар өчен әллә ни кайгырмыйм: әгәр җыр уңышлы икән, артык купшы клип кирәк тә түгел.

– Улларыгызда да театрга, сәнгатькә мәхәббәт сизелмиме? Гомумән, иҗат белән бәйле булуларын теләр идегезме?

– Балаларым бу өлкәдән ерак. Олысының да, кечесенең дә, сәләтләре булса да, иҗат белән шөгыльләнергә теләкләре юк. Тик ахыргы вакытта шуңа игътибар иттем: улларым монтаж белән кызыксына башлаган. Мин аларныкын аңлап бетермим инде: компьютерда уйнаганнарын яздырып, тавышландыралар болар. Бөтенләй башка формат булса да, сәнгатьнең бер төре инде бу. Шуның белән булса да мавыгуларына сөенәм үзем.

“Сәләтең, матурлыгың булмаса да, артист булырга мөмкин ул. Иң мөһиме – теләгең булсын. Сәхнә бит кешене бөтенләй башка яктан күрсәтә. Тамашачыга ошарга теләгән, күзләре янып торган артистларны тамашачы үзе дә җылы кабул итә”.

Әңгәмәдәш – Лилия Гыймазова

Чыганак: Ватаным Татарстан

Запись Ләйсән Мәхмүтова: «Яшьлегем белән шушы мөмкинлекне кулдан ычкындырып ялгыштым…” впервые появилась Tatar Today - татар яңалыклары..

Җырчы Мурат Гайсин тирәсендә коточкыч гайбәт сүзләр йөри башлады. Гайбәтнең дә ниндие – кеше ышанмаслыгы! Янәсе, җырчы Дилә Нигъмәтуллинаның кызы Сәфинә – Муратның кызы икән. Мурат “ШК” аша бу акылга сыймаслык гайбәткә нокта куярга булды. – Миңа “Дилә Нигъмәтуллинаның кызы сезнекеме әллә?” дип бик күп кеше яза һәм шалтырата башлады. Дөрес булмаган бу мәгълүматка бик аптырадым, чыганагын эзләргә керештем. Кешеләрдән сораша торгач, бер әйбер ачыкланды. Быел үземнең “10 ел Татарстанда” дигән сольный концертым алдыннан билет сатучы кассирыбыз тамашачылар сөйләшкәнен ишеткән. Минем афиша янында башка бер концерт афишасы һәм анда Дилә Нигъмәтуллина фотографиясе булган. Шунда бер тамашачы икенчесенә “Дилә Нигъмәтуллинаның кызы Мурат Гайсинныкы бит, Инстаграммда фотографиясенә карагыз – аның копиясе бит ул!” дигән”, – дип сөйләде Мурат.

Халыкка “чәйнәргә” сүз генә булсын. Моны ишетеп, башка тамашачылар да афишалар янына җыела башлаган. “Башкалар “юк, ул кыз Марат Мухинныкы бит” дигән. Теге хатын “мин точно беләм, Мурат Гайсинныкы ул” дип һаман үз сүзендә тора икән. Менә бит! Нәрсә генә ишетмәссең?! Бу гайбәт Диләгә дә килеп җитәр, шуңа күрә ачуланмасын, бу сүзнең каян килеп чыкканын сезгә сөйләдем”, – ди җырчы. “Миңа язган һәм шалтыраткан һәркемгә рәсми рәвештә әйтәм: “Диләнең кызы берничек тә минеке була алмый. Диләне гомердә бер-ике тапкыр күргәнем бар, анысы да сәхнә артында. Минем аны кочаклаганым да юк. Бәлки, кешеләр Мурат Гайсин белән Марат Мухин исемнәре охшаш булганга бутыйдыр, әмма бу гайбәтне туктатсыннар иде”, – дип белдерде Мурат.

Лена Рәхимова

Фото: Шәһри Казан

Чыганак: Шәһри Казан

Запись “Дилә Нигъмәтуллинаның кызы Сәфинә – Мурат Гайсинныкы ул!”: чынмы яки гайбәтме? впервые появилась Tatar Today - татар яңалыклары..