Согуд Гарәбстанның мөселманнар өчен изге саналган Мәдинә шәһәрендә көчле шартлау яңгырады. Террорчы Пәйгамбәр мәчете янында үзен шартлатып, ике полиция хезмәткәрен үтерде. //Азатлык радиосы//
«Әл-Җәзира» хәбәр иткәнчә, ике кеше һәлак булды, берничә кеше яраланды. Террорчы ахшам намазына Пәйгамбәр мәчетенә керергә теләгән, анда керә алмагач, машиналар парковкасында үзен шартлатты, дип хәбәр ителә.
«Әл-Гарәбия» телеканалы мәгълүматларына күрә, шартлаудан соң берничә машина янгыны башланды. Әлегә шартлау өчен бернинди оешма җаваплылык алмады.
Моңа кадәр Согуд Гарәбстанның көнчыгышында урнашкан Әл-Катиф шәһәрендә дә интихарчы һөҗүме булды. Һәлак булучылар юк, дип хәбәр ителә.
Шартлау бәйрәм көне алдыннан булды. 5 июль көнне мөселманнар Ураза бәйрәмен билгели.
