Инде утызга җитеп килүче, җырчы егет Илназ Гариповка, ниһаять, әбиләр әйтмешли бераз акыл керә башлаган бугай.
Чөнки ул быелдан җитди итеп өйләнү, башлы-күзле булу турында сөйләнгәли башлаган. Хәер, Илназның үзенә пар эзләве тавыш-тынсыз гына үтмәгән. Узган сезонда Илназ берара Илсөя Бәдретдинова белән уртак концертлар ясап йөргәнгә, халык арасында: ”Болар арасында нидер бар”, дигән сүзләр таралып алды. Аннан, аны җырчы Айсылу Габдинова белән дә “ярәштереп “алдылар. Тик … Илназ һаман ялгыз һәм әлегә аның янында даими пар күренми бугай. Хәер,бу турыда җырчының үзенннән сораштык.
– Илназ, сине өйләнергә йөри дип сөйлиләр. Дөресме бу?
-Йөри дип… Вакыттыр инде.Гел шуның турында уйланам.Бигрәк тә үзем киемнәремне үтүкләгәндә, мәсәлән (көлә). Ә җитди итеп әйткәндә, чыннан да бу яшьтә гаилә корасы килә. Быел утызга чыгам бит инде. Әнине, әбине оныклар белән дә сөендерәсе килә.
– Сезнең турында, бергә эшләгән Илсөя, Айсылу турында төрле сүзләр йөреп алды..
– Дөрес түгел. Эш буенча гына аралаштык. Аралашабыз. Айсылу Габдинова белән быел да бергә эшлибез. Безне берләштерүче – продюсерыбыз Илфак Шиһапов, бары шул гына.
– Булачак хатыныңны ниндирәк дип күз алдына китерәсең?
– Чибәрлеге дә,зифалыгы да мөһим түгел. Иң төп нәрсә – мине аңлардай кеше булсын иде.
-Сез Казанда яшисез. Белүебезчә,авылга да еш кайтасыз. Сагындырамы туган авыл?
– Арча районындагы Хәсәншәех авылы малае мин. Яратам туган авылымны. Бакчалы, сыерлы, тузанлы басулы авыл якын миңа. Белмим, бәлки берәркайчан авылга кайтып яшәрмен дә: сыер асрап,бакча утыртып…
– Сыерны бит аны әле савырга да кирәк..
– Соң, мин бит сөттән ерак кеше түгел (көлә). Шактый гына “Вамин” системасында да эшләп алдым.
– Булачак хатының сыер сава белергә тиешме?
– Сыер сава белсә, әлбәттә, бик яхшы булыр иде.
– Булачак тормыш иптәшеңне кайда очратырмын дип уйлыйсың?
– Концертлардадыр инде… Быелга, сентябрдан тотынып бик күп концертлар планлаштырылган.Көн саен диярлек. Нигәдер күңелем дә шулай сизенә. Шуңа, быелгы гастрольләргә үземә тормыш иптәше эзләп чыгам диюдән дә курыкмыйм.
– Быелгы программаң ниндиерәк? Син бит искиткеч фокусчы да әле.Фокуслар буламы быелгы тамашада?
– Алары да була. Яңа җырлар да күп, шактые – үзем язган җырлар. Кыскасы – күңелсез булмаячак. Гастрольләрне 19 сентябрьдан Балтачтан башлыйбыз. Аннан Арча, Саба, Кукмара, Сарман-Мөслим якларына китәм. 15 ноябрьдә Казанда филармония залында узачак. Аңа кадәр Яр Чаллы, Түбән Кама, Әлмәт һәм чит төбәкләрдә төбәкләрдә концертларым була.
– Әгәр шушы гастролләреңдә үзеңә тиң ярны тапсаң өйләнәсеңме?
– Әлбәттә.Туй үткәрү белән проблема булмастыр дип уйлыйм. Үзебез шуларны оештыру белән дә шөгыльләнәбез бит…(көлә)
– Яхшы.Эшегездә, иҗатыгызда,тормышыгызда уңышлар телибез сезгә.
– Рәхмәт!