Татарстан Дәүләт Советы Рәисе Фәрит Мөхәммәтшин бүген “Халыклар дуслыгы — Татарстан байлыгы” форумы кысаларында журналистлар белән аралашу вакытында Россия икътисади үсеш министры Алексей Улюкаев белән килеп чыккан вакыйгага үз мөнәсәбәтен белдерде.
“Беренчедән, бу шок булды. Шундый дәрәҗәдәге, федераль Хөкүмәт югарылыгындагы министр ришвәтчелектә генә түгел, ә янап акча таләп итүдә гаепләнә. Бу бик зур үкенеч һәм әгәр дә ул расланса, бу безнең илнең бөтен хөкүмәтенә, вертикаль хакимияткә зыян салачак. Кешеләрнең ышанычы кискен кимиячәк. Алар тулаем сәясәтне, илебезнең сәяси икътисадын тәшкил итүчеләр. Әгәр дә алар бер нәрсә сөйләп, икенче нәрсә эшли икән, бу хакимиятнең әлеге вәкилләре өчен зур борчу тудыра”, — диде Фәрит Мөхәммәтшин.
Искә төшерик: кичә Улюкаевка 2 млн доллар күләмендә ришвәт алуда гаепләү белдерелгән иде.