“Казан Банкы” 57 яшьлек халык артисты Салават Фәтхетдиновны банкрот дип тануны таләп итеп, Арбитраж судына гариза язган. Беренче суд утырышы 17 февральгә билгеләнгән //Tatar Today//.
“Салават Фәтхетдинов башка затка бирелгән кредитның поручителе. Акча алучы банкка әҗәтен кайтара алмаган, шуңа күрә җаваплылык поручительләр өстенә ятты. Алар берничә”, дип хәбәр итте Казан банкының пресса сәркатибе Денис Шишканов.
“Вечерняя Казань” журналисты татар эстрадасы сандугачыннан аны кем куркыныч астына куйганлыгы белән кызыксынды. Җырчы исә иң элек үзен алдаучыны “матур” гына бер рус сүзе белән атады, әмма гаепле кешенең чын исемен атамады, янәсе “аны болай да бөтен дөнья белә”. Халык артисты бу вакыйга турында сөйләшәсе дә, ишетәсе дә килмәгәнлеген әйтте. Журналистларга да: “Ни теләсәгез, шуны языгыз”, диде.
Шул ук журналист дәрәҗәгә тап төшү турында сүз кузгата башлаган иде, халык артисты үз абруена беркайчан да зыян килмәячәген әйтте һәм, фикерен дәлилләп,“Мин беркемне үтермәдем дә, таламадым да, кредит та алганым юк”, дип белдерде.
Кредит алган кешенең җырчының дусты булу-булмавы да билгесез калды. Салават әфәнде бу сорауга бары тик: “Ул беркем дә түгел”, дип җавап бирде.
Раилә Вәлиуллина тәрҗемәсе
(“Вечерняя Казань”)