Русиянең халык артисткасы Зилә Сөнәгатуллина Кыйгы районының Югары Кыйгы авылында туган. Әнисе атаклы Еникеевлар нәселеннән була. Морза кызы булуына бер ишарәне яхшы хәтерли ул: алар гаиләсендә кызлар, авыл халкын аптыратып, «канатлы» җиңле ак батист күлмәкләр кия торган була.
«Мин сөйләшә башлаганчы ук җырлый идем, ахрысы», — дип хәтерли ул. Җырлавы белән башкаларның теңкәсенә тимәс өчен ул еш кына урманга чыгып китә торган була. Кыйгы урманнарындагы кайтавазлар бүген дә аның сандугач кебек челтерәп аккан тавышын саклыйдыр әле…
Бу кабатланмас тавышны Мәскәүдәге Зур театрда да ишетергә телиләр, эшкә чакыралар. Соңгы тапкыр мондый чакыру ул вакыттагы ил җитәкчесе Борис Ельциннан була. Әмма җырчы үзенең туган йортына әйләнгән М. Җәлил исемендәге Татар дәүләт опера һәм балет театрында кала.
Монда ул 40 елга якын эшли, төрле операларда 40лап партия башкара.
Опера «сандугачы», РСФСРның атказанган, Русиянең, Татарстан һәм Каракалпакстан республикаларының халык артисты Зилә Даян кызы шушы көннәрдә матур гомер бәйрәмен билгеләде. Без аны ихлас тәбриклибез һәм туган ягында көтеп калабыз.
Фото: соцсети