Татарстанда кыш соры һәм карсыз һава торышы белән башланды. Ә чын кышны кайчан көтәргә? Гомумән, быелгы кыш нинди булачак? Бу сорауларга Балтач районының Янгул авылында яшәүче “халык синоптигы” Әмир Шәрәфиев җавап бирде.
Аның фаразларына караганда, быелгы кыш узган елгыдан җылырак булачак. “Әмма ике мәртәбә кыш кышлыгын күрсәтеп алачак. Яңа ел алдыннан кыска вакытлы суыклар булырга мөмкин. Ә кыш азагында суыклар шактый озакка сузылырга охшаган”, – дип сөйләде ул.
Әмир Шәрәфиев әйтүенчә, быелгы кыш, соң башланса да, озакка сузылырга мөмкин. “Суыклар март аенда да дәвам итәргә мөмкин”, – ди ул.
“Халык синоптигы” фаразлавынча, кар 10 декабрьдән соң явачак. “Әмма карның күп өлеше февральгә калачак. Хәтерләсәгез, быелгы августның 20 көне яңгырлы булды. Бу нәкъ менә февральнең 20 көненә туры килә. Ул чорда кар шактый булыр”, – диде Әмир Шәрәфиев.
Чыганак: https://vatantat.ru/2024/12/157516/ ТАТАР ТУДЕЙ ТЕЛЕГРАМ КАНАЛЫ - https://t.me/tatartoday