Красноярск краеның Канск шәһәрендә 3 баласын балта белән чабып үтергән хатын-кыз җинаять кылган вакытта үз-үзен белештерми торган хәлдә булган. Бу хакта Тикшерү комитетының төбәк идарәсе телеграм-каналында хәбәр ителә.
14 апрельдә Канск шәһәрендәге шәхси йортларның берсендә балта белән чабылган 3 бала мәете табылган. Бу – 4 яшьлек кыз һәм 7 айлык һәм 8 яшьлек ике малай бала булган.
Балаларның әнисен, үтерүдә шикләнү сәбәпле, кулга алганнар. Хатын-кызга карата җинаять эше ачылган.
Тикшерү комитетының төбәк идарәсендә хәбәр итүләренчә, хатын-кызның хроник психик тайпылышлары булуы ачыкланган.
Җинаять турындагы эш материаллары судка юлланган. Анда хатын-кызны мәҗбүри дәвалануга җибәрү мәсьәләсе хәл ителәчәк. Моңарчы суд хатынны сак астында калдырган булган, диелә хәбәрдә.
ЧЫГАНАК: https://intertat.tatar/news/oc-balasyn-balta-belan-cabyp-utergan-ana-uz-uzen-belestermi-torgan-xalda-bulgan-5875569 ТАТАР ТУДЕЙ ТЕЛЕГРАМ КАНАЛЫ - https://t.me/tatartoday
