Фитыр – ул һәр мохтаҗ булмаган мөселманның мохтаҗларга бирелә торган сәдакасы.
Ул вәҗиб гамәл (ягъни бирсәң – саваплы, бирмәсәң – гөнаһлы буласың) булып тора. Һәм аны һәр мөселман кешесе, ураза тоту-тотмавына карамастан, тапшыра.
Мохтаҗ кешеләр Ураза гаетендә гаиләсен куандыра, бәйрәм оештыра алсын өчен бирелә бу садака. Фитыр сәдакасын Рамазан ае дәвамында бирергә була. Гаеткә кадәр бирү тиешле. Әгәр Гает намазына кадәр биреп өлгерелмәсә, ул гади сәдака булып санала.
Фитыр сәдакасын мохтаҗларга һәм ярлыларга гына бирәләр. Фитыр сәдакасын мәчет, мәдрәсәләргә, әти-әниләргә, әби-бабайларга, балаларга, оныкларга, үз гаиләңә бирергә ярамый.
Ә фидия – ураза тотмаган көннәр өчен бирелә торган сәдака. Ягъни әгәр мөселман кешесе билгеле бер сәбәпләр аркасында ураза тота алмый икән, ул фидия сәдакасы бирә. Фидия сәдакасын Рамазанның башында да, уртасында да, азагында да бирергә була. Фидия акчалата да, товар белән дә түләнә ала. Аны үзең теләгәнчә бер генә фәкыйрь кешегә бирергә яисә берничә кешегә таратырга мөмкин.
«Хозур дин турында» телеграм-каналы ТАТАР ТУДЕЙ ТЕЛЕГРАМ КАНАЛЫ - https://t.me/tatartoday
