Мәскәү өлкәсенең Домодедово суды актриса Аглая Тарасованы шартлы рәвештә өч елга хөкем итте.
Аңа ике ел сынау срогы һәм 200 мең сум штраф билгеләнде. Аны гашиш мае белән вейп алып кайткан өчен наркотиклар контрабандасында гаепле дип таныдылар (Җинаять кодексының 229.1 мәддәсе). Прокуратура шартлы рәвештә 3,5 ел ирегеннән мәхрүм итү билгеләүне сораган иде.
Соңгы сүзендә актриса гаебен таныды һәм һәрвакыт законны үтәве, ә теге вейпны очраклы рәвештә багажга алуы турында сөйләде. Ул судьядан якыннары белән иректә калырга һәм кинода төшүен дәвам итәргә мөмкинлек бирүен сорады.
Тарасова «Балаларны наркотиклардан якла» хәйрия фондына зур сумма иганә итте һәм алга таба бу өлкәдә хәйриячелек белән шөгыльләнергә планлаштыруы турында сөйләде. Аның кешеләргә ярдәмгә керткән өлешен утырышта «Маяклы йорт», «Күбәләк балалары», «Гомер бүләк ит» фондлары раслады.
Шулай ук яклау ягыннан актерлар Леонид Ярмольник, Евгений Цыганов һәм Юлия Снигирь чыгыш ясады. Тарасовага уңай характеристиканы актерлар Милош Бикович, Сергей Безруков, Евгений Миронов язган. Дмитрий Нагиев хәтта аңа актриса һәм кеше буларак мәхәббәтен белдерде.
Аглая Тарасованы Домодедово аэропортында Израильдән кайткач тоткарлаганнар. Аңарда гашиш мае белән вейп тапканнар. Актрисага карата РФ Җинаять кодексының 229.1 мәддәсе буенча наркотик чаралар контрабандасы омтылышы буенча җинаять эше кузгаттылар. Бу мәддә буенча аңа җиде елга кадәр ирегеннән мәхрүм ителү янаган, әмма ул реаль срок алмады.
ЧЫГАНАК: https://kiziltan.ru/articles/obchestvo/2025-11-27/tanylgan-aktrisa-narkotiklar-chen-h-kem-itelde-4483381 ТАТАР ТУДЕЙ ТЕЛЕГРАМ КАНАЛЫ - https://t.me/tatartoday
