Май ае бакчачы өчен — «иртәрәк утыртасы килә» белән «кырау сугар дип куркам» арасында сайлау вакыты. Бу бигрәк тә күпчелек бакчалардагы төп культуралар булган помидор һәм бәрәңгегә кагыла.
Мәскәү бакчачылар берлеге рәисе Андрей Туманов май суыкларының гадәти күренеш булуын һәм утыртылган орлыкларга зур куркыныч тудырмавын әйткән.
«Курыкмыйча чәчегез һәм ашыгыгыз: никадәр иртәрәк чәчсәгез, шулкадәр иртәрәк яңа витаминлы уңышка сөенерсез», — дип киңәш иткән ул.
Белгеч бәрәңге һәм помидор утырту буенча үз серен дә ачкан.
«Мин бәрәңгене берьюлы утыртмыйм, берничә рәтләп кенә утыртам. Шулай итеп яшь бәрәңге ашау вакытын озайтам. Тагын эшне дә алыштырып торам: бер рәт утырттым — барып чөгендер утыйм. Нәтиҗәдә азрак арыйсың. Помидорның берничә төп куагын теплицага иртәрәк утыртырга мөмкин, әмма саклык белән. Мин аларны төбе киселгән биш литрлы шешәләр белән каплыйм. Хәтта -4 градус булса да, исән калалар», — дип уртаклашкан Туманов.
Белгеч шулай ук шәһәр кешеләренең яз көне физик эшкә ияләшмәгән булуын искәрткән.
«Пенсионер дачага килә дә эшлисе килеп китә, көрәк ала да үзен тәмам хәлдән тайдыра. Аннары кан басымы күтәрелә, йөрәге авырта башлый. Шуңа күрә артык ашыкмагыз, кан басымын үлчәү җайланмасын һәм даруларны үзегез белән алыгыз», — дип йомгаклаган ул.
ЧЫГАНАК: https://radio1.ru/articles/obschestvo/sadovod-nazval-vred-populyarnogo-udobreniya-v-ogorode/
