Тәравих намазында Коръәнне нинди тизлектә укырга, тәсбихне ничек башкарырга? Бу хакта Intertat.ru электрон газетасына Татарстан мөселманнары Диния нәзарәте рәисе урынбасары Мансур хәзрәт Җәләлетдин сөйләде.
“Моны тәравихны укучы кеше генә аңлый ала”
Тәравих – Пәйгамбәребезнең сөннәте, ул ял итү. Без көне буе ашамый-эчми ураза тотабыз, кеше бераз арый. Кемдер ифтар вакытында күбрәк ашый, корсагы тула. Аңа бераз хәрәкәт кирәк. Тәравих намазы 20 рәкәгәть, Пәйгамбәребез шулай укыган. Тәравих намазы башка намазларга караганда тизрәк укыла.
Элек-электән әби-бабаларыбыз тәравих укырга мәчеткә килә иде. Тәравих намазын укыгач, хәл керә, күңелләр ачыла, күкрәк киңәя. Моны тәравихны укучы кеше генә аңлый ала.
“Кемдер Рамазан аенда Коръәнгә ияләнә, кемдер намазга кереп китә”
Рамазан ае төгәлләнгәндә, тәравихка йөрүчеләр: “Иртәгә буламы?” – дип сорый. Мәчетләргә йөрү, тәравих намазында катнашу, тәсбихлар әйтү, авыз ачуларга шулкадәр күнегәләр. Кемдер Рамазан аенда Коръәнгә ияләнә, кемдер намазга кереп китә.
“8 яисә 12 рәкәгать кенә дә укырга мөмкин”
Һәрвакыт каядыр ашыга торган кешеләр бар. Кемдер өлкән яшьтә, тәһарәтне боза торган авырулы. Алар 8 яисә 12 рәкәгать укырга мөмкин. Кеше эшкә бармаса да, укучы укырга бармаса да, тәравих намазына килә иде. Чөнки бу аңа дәрт бирә, тәкъвалыгын, иманын арттыра торган ай.
“Дүрт рәкәгать саен тәсбих әйтәләр”
Тәравих намазы укыганда, дүрт рәкәгать саен тәсбих әйтелә.
“Сүбхәәнә зил-мүлки үәл-мәләкүүт. Сүбхәәнә зил-гиззәти үәл-гәзамати үәл-кудурати үәл-кибрийәә’и үәл җәбәруут. Сүбхәәнәл-мәликил-хәййил-ләзи лә йәмүт. Сүббуухүн күддүүсүр-раббул-мәләә’икәти үәр-руух. Ләә иләәһә илләллааһу нәстәгъфирул-лааһ. Нәс’әлүкәл-Җәннәтә вә нәгүүзү бикә минән-нәәр”.
“Җирдәге һәм күктәге мәхлукатның хуҗасы булган Аллаһы Тәгаләне данлыймын. Көч, кодрәт һәм бик олуглык иясе булган Аллаһы Тәгаләне данлыймын. Бөтен галәмнең патшасы һәм беркайчанда үлмәячәк, һәрвакыт терек булучы Аллаһы Тәгаләне данлыймын. Ул Аллаһы Тәгалә бөтен кимчелекләрдән бик пакь һәм мөкатдәс Зат, бөтен фәрештәләрнең һәм Җәбраил фәрештәнең Раббысы. Бер Аллаһы Тәгаләдән башка илаһи зат юк. Без гөнаһларыбызның ярлыкавын сорыйбыз. Йә Рабби, без Синнән Җәннәтне сорыйбыз һәм тәмугътан Сиңа сыгынабыз”.
Кем яттан белә – шул тәсбихне укый, кем белми – рәхәтләнеп тыңлап тора, ял итә, көч ала. Соңгы ун көндә Әлвидагъ. Әлвидагъ – Рамазан ае белән саубуллашу тәсбихларын әйтәбез.