29 июньдә “Голос” телепроектының финалисты Эльмира Кәлимуллина “Алтын каләм” фестивалендә катнашучылар белән очрашты.
Эльмира Кәлимуллина яшь журналистларга уңышка ирешү серләрен ачты, үзенең иҗат юлы турында сөйләде.Катнашуылар җырчыга кызыклы сораулар бирделәр һәм әңгәмәдә бик актив катнаштылар.
Эльмира Кәлимуллина кечкенәдән җыр-моңга гашыйк булуын, җырчы булырга теләвен әйтте. Шуңа да, ул музыка мәктәбендә белем алган, соңыннан, Казан консерваториясенә укырга кергән. Төрле бәйгелләрдә, фестивальләрдә катнашып, ул шактый тәҗрибә туплаган һәм бу аңа “Голос” проектында уңышлы чыгыш ясарга булышкан.
Әлбәттә, яшьләрнең телепроект турында сораулары күп булды. Эльмира да хатирәләре белән бик теләп уртаклашты: “Пелагея төркемендә булуыма мин бик тә шат, чөнки ул мине күпкә өйрәтте һәм минем уңыш яулавымда аның да элеше зурдан.” Җырчы Константин Хабенскийның “Поколение Маугли” дип аталган балалар спектакле турында да сөйләде. Эльмира анда Багира ролен башкарган. Хәзерге вакытта милләтәшебез “Бим-радио”да алып баручы булып эшли. Эльмираның күптәнге хыялы – актриса булу, шуңа да ул укырга кергән.
Очрашу азагында Эльмира Кәлимуллина яшь журналистларга иҗади уңышлар теләп калды.
(мәгълүмат Татар-информ сайтыннан алынды)