Монда өчпочмак пешерү, тәҗрибә уртаклашу өчен татар хатын-кызлары җыелды. Мастер-классларны үткәрүнең максаты – онытыла барган татар милли ризыкларын өйрәнү һәм аны яшь буынга җиткерү.

Биредәге “Ак калфак”лылар аш-су остаханәсен беренче тапкыр оештырдылар, өчпочмак ясарга өйрәнделәр. Бик күңелле, сыйфатлы һәм файдалы чара булды. Мастер-класс бер сулышта үтте. Остаханәбездә кунаклар: Кукмарадан Гөлүсә Аюпова һәм Казахстаннан Илсөя белән Аднан Садретдиновлар гаиләсе дә бик теләп катнашты.

Мастер-класс ахырында биредәге татарларның икенче әтисе, милләтпәрвәр эшмәкәр, киң күңелле, ачык йөзле “Казан” ресторанының директоры Исмәгыйл Каләметдин улы Шәңгәрәев барча остаханәдә катнашкан калфаклы ханымнар һәм туташларга роза чәчәге бүләк итеп “Ак калфак”лыларга хәер-фатыйхасын бирде.

Гүзәл затлар, ханымнар! Әгәрдә сезнең Берләшкән Гарәп Әмирлекләрендәге “Ак калфак” татар хатын-кызлары иҗтимагый оешмасына кушылып, мастер-классларда катнашасыгыз килсә,  Шарджа шәһәрендәге “Казан” ресторанына рәхим итегез.

Көтеп калабыз!

Алсу Җиһаншина
Шарджа, Берләшкән Гарәп Әмирлекләре

Запись Гарәп Әмирлекләрендә татар кызлары өчпочмак пешерергә өйрәтә [фото] впервые появилась Tatar Today - татар яңалыклары..

Күренеш авыл фельдшеры Илсияр Гыйлметдинованың елгыр пешерүеннән башланып китте. Ул килгән кунакларга мастер-класс күрсәткән арада килен йортындагы катнашучылар театраль күренешкә әзер тордылар. Иң зур игътибарны сандыкка салынган чиккән сөлгеләр җәлеп итте. Шулай ук кунакларга да сөлге чиктереп, осталыкларын тикшерделәр. Кияү килгәнче җырлар җырлана, биюләр биелә торды. Озак та көттермичә ат арбасына утырган кияү егете дә җырлап килеп төште. Менә шуннан соң кияүне сынап караулар, такмаклар күрсәтелде.

Икенче өлештә билгеле булганча, кызны кияү өенә алып кайту булды. Ат арбасына сандыкны куеп, яшь парларны шунда утырттылар. Өйгә кадәр килеп җиткәнче элеккеге татар җырлары җырланды. Ә яшьләр артыннан кунаклар атлады. Кияү йортында каршы алган кода-кодагыйлар киленне мендәргә бастырып, яшьләрне бал-май, икмәк каптырып каршы алдылар. Аннан соң җыр-биюләрдән соң, киленгә токмач кистерделәр. Казанда пешкән аштан авыз итү өчен капка төбенә махсус мул табын җәелгән иде. Икенче өлеш шул күренеш белән тәмамланды.

Бәйрәмнән соң катнашкан халык һәм кунаклар мәдәният йортына пленар утырышка җыелдылар. Авыл халкына рәхмәт сүзләре белән беррәттән төрле киңәшләр дә әйтелде. Мәсәлән, “Ак калфак” оешмасы рәисе Кадрия Идрисова яшьләргә аерым юнәлештән китәргә тәкъдим итте. Ләкин күбрәк игътибарны тарихка бирергә кирәклеген кисәтте. Аның фикеренчә, һәр яшь буын үзенең шәҗәрәдәге җиде буын ата-бабасын белергә тиеш. Баланың үз-үзен тотышы бары тик гаиләдән генә тора дип билгеләде. Чөнки 3 яшьтә аның холкы формалашкач кына, ата-ана баласын балалар бакчасына бирә. Шул чакта баланың холкын үзгәртү бик авыр булганлыктан, гыйлемен арттырырга гына мөмкин була. Бу тел буенча караганда да шулай. Төп тәрбияне бала гаиләсендә ала,- диде ул.

Быел “Ак калфак”лылар Саба районында бары тик Явлаштау авылына гына килделәр. Ә сәбәбен Кадрия Идрисова халыкның бердәмлегендә һәм яшьләрнең катнашуында дип саный.

Рәфидә Галимҗанова // Tatar-today порталы

Запись Сабада авыл халкы “Ак калфак” рәисе Кадрия Идрисованы шаккатырырга була [фото] впервые появилась Tatar Today - татар яңалыклары..