– Лилия, синдә нәрсә үзгәрде?

– Дөньяга карашым, иҗатыма карата фикерем һәм сәхнәдәге образым үзгәрде.

– Тамашачыны нинди шоу белән шаккаттырмакчы буласың?

–  Әле моңарчы татар эстрадасында булмаган үзенчәлекле концерт белән. Элек мин башка җырчылар кебек күп халыкчан стильдә иҗат итә идем. Шушы бер төрлелек туйдырды һәм үзгәрергә булдым. Концертта яңгыраячак җырлар, минем киемнәрем, сәхнәдә куелачак биюләр барысы да үзгә хәзер. Сәхнә куелышына аерым игътибар бирдек.

– Нурминский белән дуэт башкарасызмы?

– Әйе, яңа җыр. Тиздән әзер булачак, көтәбез.

– Ничек таныштыгыз?

– Аның иҗаты кызыклы тоелды. Егетнең үз юлы, үз стиле, фикере бар. Дуэт җырлап карыйк әле, дип яздым.

View this post on Instagram

A post shared by 🅻🅸🅻🅸🆈🅰️ 🅺🅷🅰️🅸🆁🆄🅻🅻🅸🅽🅰️ (@liliya_khairullina_official)

– Альберт, Лилия сиңа язганчы аны белә идеңме?

– Юк. Мин татар эстрадасы белән танышып кына киләм әле. Җырчыларны аз беләм.

– Кемнәрне беләсең?

– Салават абыйны, Элвин Грейны, Илназ Гариповны…

– Татар сәнгате белән кызыксынмавыңны әйттең. Җырчыларны да, җырларны да белмим, дидең. Сиңа яшәргә дә, иҗат итәргә дә җиңел, миңа калса, чөнки сиңа барыбер. Әгәр син элеккеге җырчыларны белсәң синдә комплекс барлыкка килер иде, шулаймы?

– Әйе, шулай. Мин татар җырларын белмим, тыңламыйм, алар минем өчен үрнәк түгел. Миңа ул җырчыларны белү кирәк тә түгел иде. Аларның үз юлы, минем үземнеке. Үземә ничек ошый шулай иҗат итәм. Миңа лайк куегыз әле, репост ясагыз әле, дип дусларга ялынып утырмыйм. Кемгә ошый шул тыңлый минем җырларны.

– Милли азатлык турында җырлар булачакмы?

– Минем уйлавымча, хәзерге яшьләргә әлеге тема бөтенләй кызык түгел. Чөнки тормышлар яхшы, тамак тук, рәхәт заманда яшибез. Хәзер яшьләргә нәрсә кирәк? Клубларда ял итү, кызлар, егетләр, яхшы машина, яхшы кием. Аларга татарның милләте кирәк түгел. Мин ул җырны язсам да, “Шәп, шәп җырлыйсың, тавышың матур” – дип кенә әйтәчәкләр. Бетте. Җырның темасы, мәгънәсе алар өчен мөһим түгел.

– Татарда мондый юнәлешләр озак яшәми, кызганыч. Синең дә иҗатың кайчан да булса сүнәчәк, аңлыйсың бит?

– Әйе, килешәм.

– Банкетларга йөрисеңме?

– Булгалый.

– Сине туйларда чыгыш ясарга еш чакыралармы?

– Әйе, хәзер яшьләр күп өйләнешә. Россиянең башка төбәкләренә дә чакыралар. Тик миңа туйларда җырлап йөрүне тыялар. Берничә җыр җырлар өчен генә үземнең дә барасы килми.

– Элвин Грейныкы шикелле яшерен продюсерың бар мәллә?

– Әйе, бар.

– Гүзәл Уразова белән Элвин конфликтына ни диярсең? Кем яклы син?

– Миңа барыбер. Нәрсә бүлүләрен дә белмим. Азагы яхыш бетсен. Бу безгә автор-башкаручы буларак сабак булды.

– Лилия, әлеге концертны оештыру күпмегә төшә? Чыгымнарны кем күтәрә?

–  Әйтә алмыйм, санап утырган юк. Барлык чыгымнарны да үзем күтәрәм.

– Ничек уйлыйсың, бу концерттан акча эшли алачаксыңмы?

– Белмим, чыгымнарны каплый алсам иде әле.

– “Мин Үзгәрдем SHOW“ белән гастрольләргә дә чыгачаксызмы?

– Әлегә әйтә алмыйм. Халык монысын ничек кабул итә бит әле…

 Юлия Насыйбуллина //Tatar-today.ru//

Запись Лилия Хәйруллина үзендәге үзгәрешне, Нурминский белән нәрсә бәйләвен яшермәскә булды [интервью-видео] впервые появилась Tatar Today - татар яңалыклары..

– Мин дә үзгәрдем! Гомер узган саен дөньяга карашым, иҗатка карата фикерем үзгәрде. Үзгәрү өчен җитди сәбәпләр булмады, барысы да яхшы. Бертөрлелек туйдырды дисәм дөрес булыр. Хәтерләсәгез, моннан берничә ел элек президентыбыз да татар эстрадасының аяныч хәлен күреп, үзгәрергә кушкан иде. Уйланырлык сүзләр әйтте ул, – диде Лилия Хәйруллина.

– Сез алып киләчәк үзгәреш җилләренең яңалыгы нидә?

– Мин Үзгәрдем SHOW” концертында тамашачы мине бөтенләй башка форматта күрәчәк. Моңарчы татар эстрадасында берәүнең дә клуб форматында сольный концерт куйганы булмады. Хәзерге иҗатым элеккесеннән бик аерыла. Сәхнә куелышына аерым игътибар бирдек. Без алып киләчәк яңалыклар җырларга да, образларга да кагыла. Сәхнәдә куелган биюләр дә үзгә. Бу инде без карарга күнеккән гадәти биюләр генә түгел. Кыскасы, әлеге шоу-программа татар эстрадасына яңа сулыш өрүгә бер адым булачак.

– Концертны басып карыйсы буламы, утырыпмы?

– Басып. Без тамашачыга ирек бирергә булдык. Алар үзләрен иркен тотсын, биесеннәр, күңел ачсыннар. Теләгән кеше тамашаны өстәл артына утырып та күзәтә ала.

– Аңлавымча, бу концерт күбрәк яшьләр өчен. Чөнки 50не узган ир белән хатынны танцполда күз алдына китерү кыен. Үзгәрәм дип, өлкән буын тамашачыңны югалтмассыңмы соң?

– Иң беренче чиратта безгә үсеп килүче яшь буынга игътибар юнәлтергә, аларда татар телендәге җырларга карата мәхәббәт уятырга кирәк. Бу очракта юнәлеш мөһим түгел миңа калса. Хип-хоп булсынмы, рэпмы, теләсә кайсы юнәлештәге җырларны татар телендә тыңлаулары кыйммәт. Шулай итеп тел сакланачак. Яшьләрнең 90% хәзерге эстрада җырларын тыңламый. Алар өчен ул кызык түгел. Килешәм, бу юлны сайлап мин үземнең күп кенә өлкән буын тамашачымны югалтачакмын. Ләкин барысын да түгел.

– Шоу белән Татарстанның шәһәр һәм районнарына да чыгачаксызмы?

– Әлегә әйтә алмыйм. Концертыбызны тамашачы ничек кабул итүенә карап.

– Концертта тере тавышка җырлаячаксызмы?

– Әлбәттә! Фонограмманы кабул итмибез.

– Иҗат сүзен ничек аңлыйсыз?

– Үзең теләгәнчә эшләп, үз фикереңне җиткерә алганда, эшләгән эш иҗат дип атала, минемчә. Ә менә халыкка яраклашып, тамашачыга фәлән җыр ошый, шундый җырлар башкарыйм әле мин дә, дигәне коммерция дип атала.

– Теләсә нинди үзгәрү чыгымнар сорый. Сезнең очракта әлеге чыгымнарны кем күтәрә?

– Барысын да үзем күтәрәм.

– Тамашачы бер хәл, бу үзгәрешләрне ирегез, балалар һәм бигрәк тә кайнанагыз ничек кабул итте соң?

– Гаиләм минем өчен һәрвакыт терәк. Җитди карарлар кабул итәр алдыннан иң беренче булып алар белән киңәшләшәм, аларның фикерен тыңлыйм.

– Концертка ирегез дә киләчәкме?

– Юк, ирем булмый.

– Якыннарыгыздан кемнәр була?

– Әнием киләчәк…

– Куркасыңмы?

– Яңалыклар куркыта әлбәттә, ләкин туктап калырга ярамый. Тормыш алга бара теләсәк тә, теләмәсәк тә үзгәрешләр керә дөньяга. Без һәммәбез үзгәрәбез. Кайсы якка үзгәрәсен кеше үзе сайлый.

Артур Хәйруллин әлеге концертның директоры – режиссер, хореограф, кыскасы Лилиягә төрле образлар уйлап табучы, аны үзгәртүче кеше. Кайчандыр үзе дә җырлап йөргән. Хәзер менә үзенчәлекле концертлар оештыру белән шөгыльләнә. Артур – кыю фикерле егет, яңалык эзләргә ярата. Татар эстрадасындагы җырчыларның бер-берсенә охшарга тырышып җырлауларына эче поша. Тик үзе Лилиягә образларны чит ил йолдызларыннан күреп тәкъдим итә кебек тоелды…

– Лилия, сезгә Леди Гагага охшагансыз дип әйткәннәре булмадымы?

Лилия:

– Мине кемгә генә охшатмыйлар. Темникова кебек, дип тә әйтәләр, Аврорага да охшаталар…

Артур:

– Ә безнең татар эстрадасының 99% бер-берсенә охшаган булуы беркемне дә борчымый. Татар эстрадасында үзенчәлекле образ барлыкка килсә, тизрәк аның кемгә охшаган булуын эзләргә тотыналар. Татар җырчылары бер үк шәхесләрне карап еллар буе үз казанында кайный. Минем Илһам абый кебек җырлыйсым килә, диләр. Безнең мең дә биш йөз Салават абыебыз чыкты сәхнәгә, Айдар Галимовлар да санап бетергесез. Ләкин болар берәүне дә борчымый! Кешегә охшарга тырышып җырлаучылар беркайчан да үсеп китә алмаячак, дип саныйм. Әйе, без дә иҗат иткән вакытта ниндидер шәхесләр белән илһамланып, аларның кайсыдыр әйберләрен алабыз. Ләкин бу баштанаяк аларны кабатлау түгел!

Лилия үзенең концертына махсус кунак итеп Нурминсий белән Хәкимне чакырган. Әлеге ике башкаручы бер-берсеннән бик аерыла. Хәким Гүзәлия кул астында эшли. Лилия белән аларны сыйфатлы һәм заманча яңгырашлы музыка берләштерә. Күп кенә татар җырчылары кебек, Хәким дә татарчаны авырдан сөйләшә. Нурминскийның фикерләве ошады. Күренеп тора – аның үз фикере бар.

– Альберт, Лилия белән ничек таныштыгыз?

– Дуэт җырлыйк әле, дип минем директка язды. Шуннан танышып киттек.

– Ул язганчы Лилия Хәйруллина дигән җырчы барлыгы турында белә идеңме?

– Юк, белми идем. Мин татар җырларын тыңлап үсмәдем, җырчыларны да белмим. Татар эстрадасы белән танышып кына киләм әле. Миңа чит ил музыкасы ошый.

– Берәүне дә белмисеңме?

– Салават абыйны, Илназ Гариповны, Элвин Грейны һәм тагын берничә җырчыны беләм. Дөресен генә әйткәндә, миңа аларны белү кирәк тә түгел иде. Кемдер татар җырларын тыңлап илһамлана, ә мин менә чит ил музыкасын яратам. Татар эстрадасында кемнәр барлыгы, аларның нинди җырлар җырлавы минем өчен мөһим түгел.

Минем хыялым – үз музыкамны язып карау иде. Яздым һәм социаль челтәрләргә керттем. Миңа “лайк куегыз әле”, йә булмаса, “минем җырымны үзегезнең стенагызга репост ясап куегызчы” дип дусларга ялынып утырмадым. Күңелем ничек куша шулай эшләдем һәм минем иҗатым яшьләргә ошады. Үз иҗатларын булдырып, шуның өстендә кайнаучы татар җырчыларына афәрин, дип кенә әйтә алам. Ләкин алар минем өчен үрнәк түгел…

– Синеңчә, татар эстрадасына нәрсә җитми?

– Татарча рэп укучы кызлар. Кайчан да булса кызлар арасында да татарча рэп җырлаучы табыласына ышанам.

Автор: Юлия НАСЫЙБУЛЛИНА
Фото: Салават Камалетдинов

intertat.tatar

Запись “Минем өчен үрнәк түгел” – Лилия Хәйруллинаның сольный концертына ире килми, ә әнисе? [фото] впервые появилась Tatar Today - татар яңалыклары..

– Гөлдания ханым, берара югалып торгандай булдыгыз…

– Әйе, соңгы вакытта тамашачылар мине югалтты. Ләкин үземне татар эстрадасыннан бөтенләй читләштем дип әйтә алмыйм, һәрдаим иҗат дөньясында кайнадым. Яңа җырлар яздырдым, яңа программа эшләдем. Төрле район һәм шәһәрләр буенча гастрольләргә дә йөрдем. Чит илләрдә дә чыгыш ясарга туры килде. Ун елдан артык телевидениегә генә төшә алмадым мин. Экраннардан күренми торгач, тамашачы югалтты. Тапшыруларга катнашырга чакырсалар, ризалашмый идем. Берара бик нык битем бозылды минем, бу хакта күпләр белә инде. Бармаган җирләребез, күренмәгән белгечләребез калмады. Нәрсәдән шулай килеп чыккандыр, төгәл әйтүче булмады. Аллаһыга мең шөкер, хәзер барысы да җайланды. Тырыша торгач, акрынлап тәртипкә килде. Үземне бик яхшы хис итәм, хәзер телевидение-радиодагы тапшыруларда да катнашам. Хәлемне белергә теләп, сәламәтлегем өчен кайгырып шалтыратучылар күп булды. Тугры тамашачыларыма рәхмәт, алар миңа иҗат итү өчен көч бирде.

Төп таянычым булган, тормыш иптәшем Рөстәмнең дә якты дөньядан китүен бик авыр кабул иттем. Акылым белән аның юклыгына ышанам, күңелем белән ышанмый идем. Төш кенә кебек тоелды. Якын кешеләрен югалтканнар мине аңлар, берара тормыш туктап калган төсле була. Ләкин яшәргә, ничек тә булса тормышны дәвам итәргә кирәк иде. Тамашачы алдына чыккач авыр булуын сиздермәскә кирәк, шуңа күрә яңа баштан елмаерга өйрәндем. Рөстәм белән 23 ел бергә яшәп калдык. Беренче тапкыр Казанда, Ленин мәдәният сараенда очраштык без. Ул вакытта ул баянчы, мин хорда җырлап йөрим. Алты ел йөрдек, 21 мартта гаилә кордык.

– Төшегезгә кергәне бармы?

– Рөстәмне уйламаган бер генә көнем дә юк, шуңа күрә дә төшемә еш керә. Шатланып та, кырыс булып та кергәне бар. Аны онытырга мөмкин түгел, без һәрдаим бергә булдык. Тормышта да, иҗатта да таяна алырлык иң якын кешем иде. Та­лант­лы ком­по­зи­тор, му­зы­кант кы­на тү­гел, кеше бу­ла­рак та из­ге кү­ңел­ле, мәрхәмәтле ке­ше иде. Мине хөрмәт итеп яшәде, ан­дый­лар бик сирәк. Миңа атап иҗат иткән беренче җыры “Бәллүр чишмә” булды. Сүзләрен Шәрига Таһирова язды. Иҗатым да шул җырдан башланып китте. Өйдә бер ялгызым гына булганда бик моңсу. Рөстәмне генә түгел, вафат булган иҗатташ дусларымны да сагынып искә алам. Үзегез беләсез, соңгы вакытта арабыздан нинди якты йолдызлар китте. Гомер – мизгел генә шул…

– Кызыгыз Лилия дә эстрадада матур гына адымнар ясап килә. Репертуар, сәхнә киемнәре буенча киңәшләр бирәсезме?

– Киңәшләр бирәм. Мактанып әйтүем түгел, ләкин ул бик тырыш һәм эш сөючән. Кайвакыт мине дә уздыра, шулкадәр үҗәтләнеп эшли. Күп очракта аннан үзем үрнәк алам, өйрәнәм әле (көлә). Иҗади гаиләдә үссә дә, татар эстрадасы сәхнәсенә җиңел генә кереп китмәде. Лилия үз җырларын, образын, репертуарын тудыру өчен бик күп хезмәт куйды. Мин аның репертуарында бары тик татар халык җырлары булуын гына теләгән идем. Шуңа күрә баштарак татар халык җырларын гына башкарды , ләкин аңа: “Син нәкъ әниең кебек җырлыйсың”, – дип әйтүчеләр күп булды. Шуннан соң ул үзенә башка индивидуаль, заманча юнәлеш сайлады. Аллаһы Тәгалә теләсә, үзенең хыял-максатларын чынга ашырыр. Лилия: “Әни, синең исем белән сәхнәгә чыгасым килми. Әнисе аркасында җырлап йөри, дип сөйләүләрен теләмим”, – дия иде. Шуңа күрә аның иҗатына катнашмыйм, барысын да үзе булдыра.

– Лилиянең җырчы булуына каршы килмәдегезме?

– Юк, мин аның теләгенә каршы төшмәдем. Гомумән, берәүгә дә каршы сүз әйтә алмыйм мин. Һәркем үз юлын үзе сайлый. Лилия артист тормышының нинди булуын күреп үсте, шуңа күрә әлеге юлны сайлаганда үзен нәрсәләр көтәчәген алдан ук белде. Кечкенә вакытта аны бөтенләй җырлатып булмый иде. Дөрес, ике яшьлек чагында минем репертуардагы “Эх, күңел ачабыз” һәм “Мамадыш” дигән җырларымны отып алып, җырлый башлады. Аның язмасы да бар, Рөстәм белән дискка күчерергә теләгән идек. Кызганыч, ниндидер сәбәпләр аркасында бу эшне сузып йөрдек. “Җырламыйм, шофер булам!” дип кенә әйтә иде Лилия. Беренче тапкыр алты яшендә сәхнәгә чыкты, шуннан соң җырлаштыргалап йөри башлады. Бераздан күчеш чоры дип тагын туктады. Ләкин язмыш барыбер иҗат юлына алып килде аны, җырчы булды. Яр Чаллы шәһәренең 54 нче гимназиясен тәмамлаганнан соң, Лилия Казан Дәүләт Финанс һәм Икътисад институтында укыды. Әлеге юнәлеш буенча эшләр дип уйлаган идем. Бервакыт Рөстәмнең бер җырын яздырып карадык, менә шуннан барысы да башланды инде. Күптән түгел генә Новосибирск, Хабаровск, Казахстан өлкәләрендә узган Сабан туй бәйрәмнәрендә катнаштым. Кая гына барсам да, барысы Лилия хакында сорый. Чит төбәкләрдәге тамашачылар да аның җырлары һәм иҗаты белән таныш. Миңа бик рәхәт, Лилия өчен куанам.

– Лилияне яратучылар белән беррәттән, аны яратмаучылар да шактый. Һәрдаим киенү стилен тәнкыйтьлиләр…

– Киенү стиле хакында Лилиягә үз фикеремне җиткердем. Халык кабул итмәс, яратмас дип әйттем. Чыннан да образларын яратучылар да, тәнкыйтьләүчеләр дә булды. Бөтен кешегә дә ярап бетеп булмый. Һәр кешенең үз зәвыгы була. Шунысы ачык аңлашыла – Лилиянең җырлары, киенү стиле яшьләргә ошый. Иң мөһиме ул татар эстрадысына яңалык кертергә тели, башкаларны кабатламый. Үзе дә “Минем киләчәк өчен эшлисем килә”, – диде. Ул дөрес фикер йөртә, чөнки заман белән бергә атларга кирәк. Хәзер үзем дә социаль челтәрләрдә утырам, яшьләрдән артта каласы килми.

– Гөлдания ханым, сез һәрвакыт матур, бер дә үзгәрмисез. Моның сере нәрсәдә?

– Картаймаска тырышам инде… Сәхнә матурлыкны ярата. Мине һәрвакыт озын буйлы, таза гәүдәле дип уйлыйлар. Чын тормышта күргәч аптырыйлар. Хәзер озак кына паузадан соң, кабаттан сәхнәгә күтәрелдем. Бары тик алга барырга гына исәп, Аллаһы Тәгалә ярдәменнән ташламасын. Җырчылар күп, тамашачыга сайлау мөмкинлеге зур. Җырларымны яратып тыңлаучылар өчен иҗат итәргә телим, эшләргә теләк һәм көч бар әле. Мин сәхнәдә генә түгел, тормышта да матур булырга тырышам. Үземне карап, тәрбияләп йөрим. Матур булуның сере бик күп нәрсәгә бәйле. Спорт белән шөгыльләнәм, файдалы итеп тукланырга тырышам, режим буенча йокларга ятам.

– Якын киләчәккә нинди планнар белән яшисез?

– Планнар зурдан. Иң беренче чиратта, Рөстәмнең тәмамланмый калган эшләрен ахырына җиткерергә телим. Бу минем бурычым. Язылып та дөньяга чыкмаган җырлары бик күп аның. Якын киләчәктә шуларны кайсы җырчыга туры килүен чамалап, башкарырга тәкъдим итәргә уйлыйм. Рөстәм 3000нән артык җыр язып калдырды. Хәзер аның иҗатына багышланган китап әзерлим, 100гә якын җыры керәчәк. Китап ноталары белән бергә җыр текстлары да була. Көзгә өлгертә алмадык, шуңа күрә китап яз көне чыга. Әзер булгач, җырчылар белән бергә китапның презентациясен үткәрергә хыялланам. Китап чыгару эшендә Татарстанның халык артисты Виталий Агапов ярдәм итә.

Автор: Ләйлә ХӘКИМОВА
Фото: Солтан Исхаков, Социаль челтәрдән

intertat.tatar

Запись Гөлдания Хәйруллинаның күренмәгән табибы калмый: җырчы телевизордан югалу сәбәбен сөйли впервые появилась Tatar Today - татар яңалыклары..