– Язылушын ни өчен соңга калдырдыгыз?

– Яз көне ЗАГСка бармакчы идек, коронавирус килеп чыкты. Ә аннары инде улым туды. Менә хәзер уңайлы вакыт дип уйладык. Күп кеше бармадык. Өчәү генә. Улым Даниярны да иярттек.

– Син бәхетлеме?

– Мин «әйе» дияргә дә куркам. Үземнең гаиләм, янымда ирем, кызым, улым булу бу кайчандыр минем хыялым гына иде. Кызым авыру тугач, тормышым җиңел булмады. Авырлыклар күп килде. Әмма мин ничек тә түзәргә, сабыр итәргә тырыштым. Күңелем сизенде – кайчан да булса, матур көннәр киләсен көттем мин. Шөкер, ул көннәрне миңа ирем бүләк итте. Фагыйл – Аллаһы Тәгаләдән бирелгән иң зур бәхетем. Берүк күзләр тимәсен. Мин Фагыйлне бик яратам. Безнең сөю – яшьлек җүләрлеге генә түгел. Чын ярату, хөрмәт итү, гаиләне саклап яшәү. Миңа хәзер һәр көнем кадерле.

– Фагыйл сине ничек эзләп тапты?

– Мин “Адәм белән Һава” тапшыруында катнаштым. Шунда бар күңелемне ачарга туры килде. Кызым Мәрьям хакында да сөйләдем, авырлыкларны да яшермәдем. Баксаң, тапшыруны каенанам белән каенатам карап утырган. Фагыйл бу вакытта мунчадан чыккан. Телевизор каршына баскан да, берни әйтмичә бик озак безне караган. Ә аннары исем-фамилиямне җыеп, инстаграмнан эзләп тапкан. Бары тик 5 ай узгач кына, миңа аннан сәлам хаты килеп төште. Моңарчы бер генә ир-атка да җавап бирми идем. Фагыйлгә җавап яздым. Ул озакка сузмады, очрашуга да чакырды. Анысына да бардым. Июль аенда таныштык, августта әти-әнисенә күрсәтергә алып кайтып китте. Юл буе бик борчылдым. Кабул итәрләрме, дип уйладым. Мин генә түгел бит әле, авыру балам да бар. Әмма юкка кайгырганмын. Кайтып туктауга булачак кайнанам йөгереп чыкты да, кочаклап алды. Мин менә шулчакта бик тә яхшы гаиләгә эләккәнемә инандым.

– Белгәнемчә, иреңнең әти-әнисе кызыңны да үз иттеләр.

– Аллага шөкер. Аларга мең рәхмәт. Мәрьямне «Ходай бүләге» дип торалар. Данияр тугач та, икесен бер төсле итеп яраталар. Бала ияртеп килгән әнигә тагын ни кирәк? Изге күңелле гаиләгә эләктем. Гомерем буе әти-әниле буласым килде. Шөкер, алар янәшәмдә. Үземнең әтием исән түгел инде. Узган ел 65 яшетулырга 1 ай калгач, вафат булды. Аның бик тә мине кияүгә бирәсе килде. 2018 елның декабрендә әтием кияү белән кайчан таныштырасың әле, диде. Шунда авызымнан август аенда дигән сүз килеп чыкты. Ничек булгандыр ул. Фәрештәләрнең «амин» дигән вакытына туры килгәндер. Августта минем Фагыйлем бар иде. Тик әти генә күрә алмады. Әмма ул хәзер мине күкләрдән күзәтәдер. Әниемә исә, исәнлек телим. Мин аңа гомерем буе рәхмәтле. Баламны тәрбияләргә әле дә булыша. Улыбыз кечкенә булгач, Мәрьям әниемдә яши. Бик сагынабыз үзен.

– Иреңне Мәрьям дә ярата бугай…

– Ярата гынамы соң, бик ярата! Сабый күңелен алдап булмый бит ул. Ул барысын да сизә. Шөкер, балам әтиле булды. Ирем үзе дә Мәрьям бигрәк матур инде ул безнең, ди. Иремне дөрес тәрбияләгән әти-әниемә рәхмәт. Бар да гаиләдән килә. Башкаларны бәхетле итә белә торган Фагыйл төсле ир-атлар күбрәк булсын иде ул. Миңа өйләнәм дигәч тә, берни әйтмәгәннәр. Үзеңә ышансаң, без каршы түгел дигәннәр.

– Сәхнәгә кайтырга җыенасыңмы?

– Әлбәттә! Ирем каршы түгел. Машинада да минем җырларны тыңлап йөри. Башкаларга да тыңлата. Әле хәзер тәмләп кенә Данияр улымны үстерәм. Җырларга өлгерермен әле.

– Нинди хыяллар белән яшисең?

– Әкренләп бар да тормышка ашып бара. Башта фатир дигән идек, уйламаганда йорт алып куйдык. Казан читендә, бик рәхәт җирдә яшибез. Балаларга да һавасы әйбәт. Казанга да 15 минутта барып җитәбез. Бар теләгем – булган бәхетемне саклау. Миңа шул җитә. Иң мөһиме – балаларым авырмасын, ирем янәшәмдә булсын, әти-әниләрем озак яшәсен. Аллаһы Тәгалә көндә рәхмәт укыйм. Тормышыма шөкер итәм. Һәр хатын-кызга бәхет телим.

Чыганак: Ватаным Татарстан

Запись Җырчы Миләүшә Сафина: “Кайтып туктауга булачак кайнанам йөгереп чыкты да …” впервые появилась Tatar Today - татар яңалыклары..

16 ноябрь җырчы Миләүшә Сафинаның никахы булды. Аның әлеге бәхетле мизгелләрен иҗатташ дуслары да ямьләндерде, үзләренең изге теләкләрен юллады.

Без дә Миләүшә Сафинаны әлеге истәлекле көне белән тәбриклибез. Тормыш иптәше белән бер-берләрен аңлап, хөрмәт итеп, тигезлектә матур гомер кичерергә насыйп булсын! һәрчак йөзләре шулай шатлыктан балкып торсын! Чиксез мәхәббәт телибез аларга!

View this post on Instagram

A post shared by ⚡️TATAR TODAY агентлыгы⚡️🌍 🔊📺 (@tatar_today)

Запись Миләүшә Сафина тормышында шатлыклы вакыйга [фото-видео] впервые появилась Tatar Today - татар яңалыклары..

Җырчы Миләүшә Сафина инстаграмында тормышындагы бәхетле мизгелләре белән бүлеште. Ул кияүгә чыга.

“Бәхет тынычлыкны ярата диләр, ләкин бу бәхетем белән уртаклашмый булдыра алмыйм”, – ди ул.

Һәрвакыт үзенең әни статусына ия булуы белән горурланып, бернигә дә карамыйча, алга барырга көч тапкан Миләүшә Сафинага гаилә тормышында да, иҗат юлында да уңышлар теләп калабыз.

View this post on Instagram

A post shared by Миляуша Сафина | Певица Казань (@milya__safina)

Мәгълүмат Миләүшә Сафина инстаграмыннан

Запись Җырчы Миләүшә Сафина тормышында шатлыклы вакыйга [фото] впервые появилась Tatar Today - татар яңалыклары..

6 апрель көнне Миләүшә Сафинаның әтисе вафат булган. Бу хакта җырчы инстаграмында хәбәр итте, 8 апрель көнне иртә белән видеомөрәҗәгать урнаштырды.  Миләүшә, моңа кадәр, кызы һәм әтисе белән төшкән фотоларны куйган. 

“Һәммәгезгә дә аерым зур рәхмәтемне белдерәсем килә. Бик күп яздыгыз, бик зур рәхмәт. Уйламаганда, көтмәгәндә, 6сы көнне кич әтиебез, йоклаган җиреннән, инфаркт нәтиҗәсендә, арабыздан китеп барды. Бүген әтиебезне күмәбез. Бер үтенечем бар дуслар – Сафин Рөстәм Гайфуллович исеменә догалар кылсагыз, мин бик шат булыр идем. Рәхмәт”, ди җырчы видеомөрәҗәгатьтә.

Запись Миләүшә Сафина: “Бүген әтиебезне күмәбез. Бер үтенечем бар…” [фото-видео] впервые появилась Tatar Today - татар яңалыклары..

— Бик авыр чаклар булды, төннәр буе елап, әллә кайларга качасы килгән вакытлар бар иде. Аллага шөкер, ул еллар, караңгы төш кебек, артта калды. Кызым да бераз тернәкләнә башлады. Әкренләп алга барабыз, — ди Миләүшә.

— Җырлыйсым, иҗат итәсем килә. Киләчәккә якты хыяллар баглыйм. Мин хәзер элекке җебек Миләүшә түгел. Тормыш шушы берничә елда үземне нык көчле итте!..

— Мәрьямдә уңай якка үзгәреш бармы?

— Мәрьямгә 7 яшь. Туганда баш мие һәм умыртка сөяге җәрәхәтләнгән. “Синдром Веста” дигән диагноз куйдылар. Дүрт айлык чагында өянәкләре башланды. Эпилепсия үсеш процессын тоткарлады. ДЦПдан да интегә.

Тернәкләндерү үзәкләренә күп йөрү нәтиҗәсендә, Мәрьям яхшы якка үзгәрә башлады. Өянәкләре бетте. Шуннан соң бераз үсеш киткәндер. Сөбханалла, дип карыйбыз. Ул бик акыллы. Тик теле ачылып китә алмый әле. Дөрес, үзенчә күп сөйли, аңлап кына булмый. Бөтен нәрсәне сизә, белә, реакциясе тиз. Шуңа сөенәбез. Холкын да күрсәтә. Ачуы чыкса да белгертә. Балакайның сәләтләре дә күптер, әлегә җыеп кына барадыр. Бөтен җире хәрәкәтләнә, әмма баш миеннән әмер озаграк килә.

“Кызым, моны алып бир әле”, — дисәң, шуңа үрелә, тик кулы озак бара. Аягына бастырсаң, катып кала. Дәвалау авыр… Тернәкләндерү үзәкләренә гел йөртергә кирәк. Түләүлеләре нык кыйммәт. Кыйбат булса да, ярты елга бер тырышабыз. Хәзер кешедән ярдәм сораганым юк. Элек бер-ике мәртәбә мөрәҗәгать иттем, чөнки башка чарам калмаган иде. Сорарга кыен, мескенләнәсем килми. Инвалид бала карау җиңел түгел. Пәрдә артын күрсәтмим. Интернетка кызымның матур, елмаеп төшкән фотоларын гына куям. Оялып түгел, ә жәлләттерәсем килми. Кызгансалар, үз-үземне жәлли башлыйм. Миңа көчле торырга, бирешмәскә кирәк…

— Элек сине “Саф хисләр” төркеме җырчысы дип йөртә идек. Анда бик аз эшләгәнсең икән?

— “Саф хисләр” Арчада оешкан иде. Казанда укыган чагымда, тавышың безгә туры килә дип, мине җырчы Алсу Фазлыева чакырды. Шунысы кызык: анда бер атна гына чыгыш ясап киттем. Чөнки аерым җырлыйсым килә иде. Халык шуны исендә калдырган. Һаман “Саф хисләр” белән бәйләп йөртәләр…

Лилия ЙОСЫПОВА

Чыганак һәм фото: Ирек мәйданы

Запись Җырчы Миләүшә Сафина: “Инвалид бала карау җиңел түгел, ләкин жәлләттерәсем килми…” впервые появилась Tatar Today - татар яңалыклары..

View this post on Instagram

A post shared by Миляуша Сафина | Певица Казань (@milya__safina)

View this post on Instagram

A post shared by Миляуша Сафина | Певица Казань (@milya__safina)

//Tatar Today//

Запись Миләүшә Сафина кызын принцессалар сыеннан авыз иттерә [фото] впервые появилась Tatar Today - татар яңалыклары..