1 нче ысул. Боз формасына вак итеп туралган яшел суганны салырга, өстенә су салырга. Туңдыргычка алып куярга. Каткач, бу боз кисәкләрен контейнер яисә пакетка салып, яңадан туңдыргычка «озатырга».

2 нче ысул. Суган, укроп, петрушка һәм башка төр яшелчәлекләр тулы банкага үсемлек мае салырга. Болгатырга. Өстен капрон капкач белән ябарга, шул килеш сакларга.

Чыганак: Ватаным Татарстан 

Запись Яшел суганны кышын ничек сакларга? впервые появилась Tatar Today - татар яңалыклары..

– Фарсель абый, күпләр суган һәм сарымсак кыяклары саргаеп бетте, дип зарлана. Бу нәрсәдән шулай?

– Тузганак чәчәк аткан вакытта ук, суган һәм суганчаларны зарарлый торган аксыл төстәге чебен чыга. Аны суган чебене дип атыйлар. Ул суган, сарымсак түтәлләрен эзләп таба да, аның барлык урыннарына – кыякларына, суганчаның күренеп торган өлешенә, үсеш ноктасына йомырка сала. Бер атна чамасы вакыт үткәч (күп булса 8-9 көннән), шул йомыркалардан личинкалар чыга һәм алар суганчаның эченә үтеп керәләр. Гадәттә, алар суганчаның төбе – тамыр тирәсеннән ашый башлый. Зарарланган суган чери, кыяклары саргая һәм кибә.

– Ә суган һәм сарымсакны бу чебеннән сакларга мөмкинме?

– Әлбәттә, ләкин эшне саргаюның беренче билгеләре күренә башлауга ук, май айларында башларга кирәк. Бу бөҗәктән саклану өчен баштагы чорда түтәлләрне тоз эремәсе белән эшкәртү яхшы нәтиҗә бирә. Моның өчен 8 литр суга 300 грамм тоз алына, яхшылап эретелә. Аның белән 70-80 сантиметр киңлектәге, 6-7 метр озынлыктагы суган түтәлен эшкәртергә мөмкин. Әйткәнемчә, бу ысул бары тик башлангыч чорда гына ярдәм итә. Әгәр дә суган кыяклары саргаеп беткән икән, аны коткарып булмаячак. Суган чебененә каршы башка ысуллар да бар. Бу очрак бөҗәкне куркытудан гыйбарәт. Әйтик, суганны утыртканда ук кишер белән аралаштырып утыртырга мөмкин. Чебен кишер исен яратмый, шуңа түтәлгә килми. Аннары чебеннәр очыш ясаганда, суган түтәлләре арасына бәрхет гөле ботаклары куйсаң да, чебен түтәлне читләтеп үтәчәк.

– Быел кышкы саклауга калдырылган суганнар череде, сарымсаклар кипте, диләр…

– Шул зарарланган суган һәм сарымсакны киптереп, саклауга калдырганнар, димәк. Аларга ниндидер авыру тигән булган, шуңа шулай начар сакланган.

– Ә аларны ничек дөрес итеп сакларга соң?

– Кыяклары күпләп саргая башлагач һәм сөрлеккәч, безнең тирәлектә, башлыча, июль ахырында суганны җыеп алуга керешәләр. Көн кояшлы һәм җылы булган очракта, суганны алып, кишәрлекләргә тараталар һәм 5-6 көн киптерәләр. Ә һава дымлы булса, яхшы җилләтелә торган келәт яки сарай сайлыйлар. Киптерелгән суганны 3-4 сантиметр чамасы муентык калдырып кисәләр. Ә саклауга куелырга тиешлеләрен 1 ай чамасы өстәмә рәвештә 30-35 градустагы температурада җилләтелә торган биналарда киптерәләр. Суган әйбәт саклансын өчен температураның даими булуы шарт. Сарымсакны, суган кебек үк казып алгач, 1 атна чамасы кояшта киптерәләр, шуннан муентыгын 3 сантиметр калдырып кисәләр һәм салкын подвал, кар базларында саклыйлар. Саклау вакытында сарымсак өчен иң куркынычы – яшел күгәрек. Ул сарымсакны киптерергә сәләтле. Моны булдырмас өчен аны –1–3 градустагы температурада сакларга киңәш ителә.

Фото:  sornyakov.net

Чыганак: Безнең гәҗит

Запись Суган кыякларын саргаюдан ничек саклап калырга? впервые появилась Tatar Today - татар яңалыклары..

БАШКОРТОСТАННАН ДА ЭЗЛӘГӘННӘР

– Шушы гомер яшәп, сенчик белән проблема булганын бер дә хәтерләмим. Үзем үстереп, үзем утырткач, беркайчан да сенчик кирәк дип, эзләнеп йөргән булмады. Былтыр утырта алмый калдым, әмма бер дә мыжгып йөрмәдем, чөнки һәрвакыт базарга барсаң – әбиләрнең кулында, орлык сата торган кибеткә керсәң – анда капчык-капчык өелеп тора иде. Нинди сорты кирәк – агымы, кызылымы, сарысымы. Туганым да: «Алып торма, үземнең дә бик күп булды быел сенчик, сиңа да бирермен!» – дигәч, бигрәк тә тынычланып яттым. Килде бер вакыт, апрель аенда кире шалтыратты: «Гафу ит, бөтенесе кибеп беткән, ике-өч чиләктән берничә түтәллек кенә сенчик калган», – диде. Менә шуннан соң эзли башладым да инде мин аны. Һәм аңладым: миңа гына түгел, бөтен дөньяга кирәк икән ул сенчик, һәм быел дефицит та икән әле – дип сөйли ул.

Башта район үзәге – Актанышка барып караган Зилә ханым. Анда бары тик кызыл суганныкы гына булган. Бәясе – 250 сум. Берничә мәртәбә барып та, сары суганныкын таба алмагач. Орлык сатучылар белән сөйләшкән:

– «Кайчан килим соң, кайчан була?» – дидем. «Көтмәгез, быел сенчик булмаячак, базаларда да юк, беркайда да калмады ул хәзер. Безгә Чувашиядән кертелә иде, анда узган елгы уңыш начар булган, шуңа күрә быел кытлык бар», – дип аңлаттылар. Аннан соң Чаллыга, Минзәләгә барып карадык, тапмадык. Чаллыда яшәүче туганнарымнан: «Сенчик юкмы, караштырып торыгыз да, хәбәр бирегез әле», – дип сорадым. Башта 400 сумга тапканнар иде, без бардык – алып та бетергәннәр. Соңыннан 600 сумга күтәрелгән ул, анысы да санаулы сәгатьләрдә сатылган. Инде өченчесендә туганнар: «Бер җирдә мең сумга саталар, алыйкмы сиңа? « – дип сорады. «Мең сумга сенчик алып утыртып тормабыз, ул акчага ике-өч еллык суган алып куеп була бит!» – дип уйладым да, башка эзләп тә тормадым. Бездә нәрсә юк, шуның бәясен күтәрү гадәте бар инде ул, шуңа быел сенчикнең кыйммәтләнүенә аптырамадык та. Бервакыт тоз булмады, 80 сумга кадәр күтәргәннәр иде. Быел бигрәк галәмәт булды – кешеләр Башкортостан республикасына кадәр чыгып эзләде сенчикне хәтта. Анда да таба алмаганнар, – дип сөйләде ул «Безнең гәҗит»кә.

Чынлап та, Актанышта яшәүче Ирина Заһретдинова, әйтик, сенчикны Башкортостанның Нефтекама шәһәреннән эзләп караган булган.

– Быел сугансыз калдык, бугай. Сенчикне үзең ясарга кирәк икән. Бигрәк кыйммәтләнде бит, күп кеше зарлана. Әле юк та ул. Без менә Нефтекама шәһәренә чыктык шуны эзләп. Ышанасызмы юкмы, элек базар сенчик белән туп-тулы була, эте дә бете дә сата иде. Быел ник бер почмагында булсын базарның. Адәм гыйбрәте. Үзем дә аптырадым. Ә ник шулай булды икән? – ди ул.

ИТ БӘЯСЕНӘ ҖИТКӘН

Чаллы шәһәрендә яшәүче Эльвира Йосыпова исә, бер килограммын 400 сумга сатып алган. «Күзләрем маңгайга менде, сатучылар белән талашып кайттым әле! Бу бит талау!» – дип сөйли ул:

– Сенчикне әле февраль аенда ук әнием алырга кушкан иде. Ярар, зәм-зәм суы түгел, алырмын, дип сузып йөрттем. Безнең монда бер әби бар иде. Үзе үстергән әйберләрне сата. Май бәйрәмнәре алдыннан авылга кайтырга кирәк булгач, шуңа шалтыраттым. «Әллә кайчан сатып бетердем инде мин, 250дән саттым», – ди. Быел кыйммәтләнгән икән әле, дип уйлап, базарга барган идем, көчкә бер урыннан таптым, анысы да 400 сум! Күзләрен дә йоммыйлар. «Кит, минәйтәм, бу акчага ике кило тавык ите алып була бит, шушы бәягә сенчик саталармыни?!» Талаша-талаша 300 сумга бирде. Бер кило гына алдым. Бу акчага бер кыш чыгарлык суган сатып алып була. Үземә булса, алып та тормас идем. Авылда яшәгән әнигә эш кирәк, шуңа гына алдым. Гомер буе утыртып гадәтләнгән бит инде ул, быел гына утыртмый калса, кыен булыр иде, – дип сөйли Эльвира Йосыпова.

Кукмара районында махсус сенчик үстереп сатучылар бар. Татарстанның шактый өлешен суган орлыгы белән нәкъ менә кукмаралылар тәэмин итә. Алар бу дефицитның каян килеп чыгуын беләме икән? Үзләре ничә сумга саткан һәм уңышлары узган ел нинди булган? Кукмара районының Зур Сәрдек авылында яшәүче Рүзәл Йосыпов белән сөйләштек. Шактый еллар 6 гектар җирдә суган сенчиге үстерү белән шөгыльләнә аларның гаиләсе.

– Бу дефицитның төп сәбәбе шул: Голландиядән кертү тоткарланды һәм узган ел Чувашиядә уңыш аз булды. Тиешле күләмнең яртысын гына үзебездә җитештерәләр бит безнең. Калганы читтән кертелә. Ә менә импорт булмагач, бездәге сенчикнең генә җитмәве аңлашыла да. Узган ел бездә уңыш начар булмады ул, анысы. Ләкин иртәрәк саттык без – даими клиентларыбыз бар, килограммын 50-100 сумнан җибәрдек. Хәзер сатуда калмады инде ул. Май башларына бәясе 800 генә түгел, 1000 сумга ук җиткән, дип сөйләделәр Кукмарада. Ләкин шулай булса да, сенчикнең бәясе кыйммәт булу кибеттәге суганның бәясе күтәрелүгә китермәс, дип уйлыйм. Чөнки агрооешмалар бу суганны сенчиктән түгел, кара орлыктан чәчеп үстерә. Ә орлык белән проблема юк. Быел сенчик уңышы нинди булыр – алдан әйтүе авыр. Апрель ахырында чәчкән идек. Яңгырлар булды әлегә кадәр, җылысы да бар. Тик якын арада яңгыр булмаса, проблема килеп туарга мөмкин. Чөнки орлык корыда ята икән, үсми, – дип сөйләде ул безгә.

ТӘРБИЯ ДӘ КИРӘК

Балтач районының Яңгул авылында яшәүче халык синоптигы Әмир абый Шәрәфиев тә, майның артык җылы килүе хәерлегә түгел, ди.

– Быелгы яз бернинди законнарга да буйсынмый бит. Тиешле суыклары да булмады аның. Шуңа күрә әнә – уҗымнар да череп бетте. Югыйсә, әйбәт кенә чыкканнар иде, алар үләрлек салкын булмады да. Туфракта туң бар иде анысы, ләкин ул да бик тиз эреп бетте. Бүгенге көндә туфрак ярлы, әле бүген генә бер алмагачка су сипкәндә игътибар иттем, су төшә дә китә сипкән уңайдан. Туфрак бик коры. Әйе, сенчик уңсын өчен җылы кирәк, әмма бу кадәр үк түгел. Яңгырлар яумаса, эш харап. Ә быел сенчикнең бәясе кыйммәтләнүгә килгәндә… Базар экономикасында андый хәл булгалый инде ул. Бәясе төшкәч, кайбер әйберләрне үстерми башлыйлар да, килеп чыга дефицит. Аннан соң тагын үстерәләр. Икенче елга алай булмый инде ул. Әнә карабодай белән дә шулай булды бит. Бәясе төшеп беткәч, авыл хуҗалыгында бик үстерми башладылар. Бәясе күтәрелгән иде, яңадан үстерә башладылар, – диде ул. Халык синоптигы, киләсе елларда мондый дефицит булмаячак дигән фикердә.

Бакчачы-галим Фарсель ага Зыятдинов белән дә сөйләштек. Ул сенчик белән килеп чыккан кытлыкны, халыкның моның белән мәшәкатьләнмичә, кибеттән генә әзер сенчик сатып алырга гадәтләнүе белән бәйле, дип саный:

– Хәзер бәрәңгене дә сатып кына алырга өйрәнеп барабыз – арзан бит. Үстерүчеләр ел саен азая бара, сатып алучылар күбәя. Менә шуңа күрә җитми ул. Татарстанда сенчик уңышы начар булмады, чәчкән кешенеке үсте бит. Шунысы гына бар – аны чәчтең дә, оныттың түгел, тәрбияли белергә дә кирәк. Беренче чиратта утырта торган туфрагын яхшылап әзерләргә, баетырга. Җирне казый башлаганчы ук, башта бер квадрат метрына кимендә бер чиләк тирес черемәсе һәм бер чиләк компост кертергә кирәк. Бу – органик ашламалар. Минераль ашламалар да сибү мөһим: һәр квадрат метрына суперфосфат – 150 грамм һәм 180 грамм калий сульфаты. Шулай ук, 80-100 грамм чамасы «Нитрофоска» сибәсең. Болар – минераль ашламалар. Аннан соң минераль һәм органик ашламалар катышсын өчен, яхшылап җирне казып чыгасың. Бу инде туфракның өске өлешен баету дип атала. Яңа ашламалар да кулланырга кирәк. «Агрикола» дигән ашлама бар. Орлыкны утыртканнан соң, һәр квадрат метрына шуны сибәргә була. «Агрикола»ны ун литр суга ике аш кашыгы кушып эретәләр. Болай эшләгәндә орлык әйбәт булып тишелеп чыга. Аннан соң тәрбия чараларына да игътибар итәргә кирәк. Тишелеп чыкканнан соң, вегетация чорында кимендә ике тапкыр ашлау чарасын күрәсе, тукландырасы. Беренчесе: «Агрикола»ны су белән эретәсең дә, шытып чыккан төпләренә сибеп чыгасың. Икенче тапкырында «Нитрофоска» дигән минераль ашлама белән тукландырасы. Аны да ун литр суга бер ике кашык саласы. Сенчик үсә төшкәч, тамырдан тыш та тукландырасы – сабакларга, өске өлешенә генә «Энергин» дигән препарат сиптерергә кирәк. Биш литр суга 1 капсула, ун литрга ике капсула салып эретәсең. Сугаруга килгәндә, дымны һәрвакыт даими тәэмин итәргә, корып китүенә юл куймаска. Корып китсә, аннан соң уңыш яхшы булмый. Әмма шунысы мөһим, суганга да, сенчиккә дә суны май һәм июнь айларында гына сибегез. Июльдә, өлгерер чагы җиткәч, су сибүне туктатырга кирәк, – дип сөйләде бакчачы-галим.

Бу сенчик проблемасы Белоруссиядә дә булган. Анда кытлыкны Русиядә уңыш начар булу һәм шулай ук Голландиядән вакытында кертелмәүгә бәйлиләр. Бәяләр 4-5 мәртәбә арткан. Инде ышанып калыйк, кайберәүләр фаразлаганча, кибеттәге суганның бәясенә бу берничек тә йогынты ясамас. Хәер, белмәссең… Күп очракта безнең сатучыларга бәя күтәрергә сәбәп кенә бир бит…

Айгөл ЗАКИРОВА, Безнең гәҗит

Запись “Суган сенчигының килосын 1000 сумга саталар”: бәяләр ник арткан? впервые появилась Tatar Today - татар яңалыклары..

Әлеге ысулның яхшы нәтиҗәләренең сере – соданың антисептик үзлегендә һәм эремәнең температурасында. Су кайнар булырга тиеш! Минимум 45 градус, ә 55-60 булса тагын да шәп. Бу очракта җебетүнең файдасы тагын да күбрәк.

Алабыз 1 литр кайнар су (45-60 градус), 1 чәй кашыгы өеп аш содасы. Җебетү вакыты – 30 минут. Эремә бик тиз суынмасын өчен, өстен каплап, калын чүпрәк белән төреп куегыз.
Җебетергә салыр алдыннан кул белән әвәләгәндә салынган кадәрен җиңелчә генә кабыгыннан арындырыгыз. Бөтенләй чистартып төшерергә дә ярамый. Көз көне утыртканда суганны кисмәгез, чөнки бу төрле авыруларга сәбәп була.

Сода, шулай ук, туфракның әчелеген дә киметә. Аны суган утыртканда көл яки доломит оны урынына да кулланырга мөмкин. Чокырларны җиңелчә генә «пудралап» тиз генә суганны төртергә кирәк.

Илсөя Завилейская фотосы. Яшел Үзән

Запись Суган «стрелка»га китмәсен өчен, болай итеп утыртыгыз впервые появилась Tatar Today - татар яңалыклары..

8-14 миллиметрлы вак суган. Көздән утыртып калдыру өчен иң яхшысы. Туклыклы матдәләр туплап өлгермәгәнлектән, ул өмәкләнми. Әмма яз утыту өчен кулай вариант түгел. Беренчедән, кыш чыкканчы күбесе инде кипкән була, икенчедән, ул тиз генә үсеп китә алмый, өлгереше артка кала, Кечкенә бозау үстергән кебек инде… Гәрчә минем үземә шушындый вак суган ошый, чөнки ул яз көне утыртканда да бабайланмый, аннары, җиңел булганга, килога бик күп керә. Артык зур суган яратмасагыз, уртача гына үскәненә канәгать булсагыз, вак суган алырга була.

14-24 миллиметрлы уртача суган. Монысы бик яхшы суган була инде. Бармак башыннан чак кына ваграк, тыгыз, гәрәбә бөртекләре диярсең… Көздән утырту өчен дә, яз утырту өчен дә бер дигән,. Тиз үсеп китә, өмәкләнми. Әмма… базарда мондый суганның бәясе дә кыйммәтрәк.

21-24 миллиметрлы эрерәк суган. Көздән аны фәкать кыягы өчен генә утыртырга була. Яз көне утыртканда, баш җибәрә, Ә менә утыртыр алдыннан төбен крестка крест киссәң, алай итми, Баш җибәргән сабагын да кисеп алырга була, ул очракта да суган зур булып үсә. Миңа шәхсән мондый суган ошамый. Килога бик аз керә, утырта башласаң, алган суганың бер түтәллек кенә була.

24-30 миллиметрлы, тавык йомыркасы сарысы кадәр дип әйтерлек суганны кыяк өчен генә утыртырга мөмкин. Ул арзан тора, әмма башлы суган чыкмый аннан.

Узган елгы бер тәҗрибәм хакында да языйм әле. Кибеткә керсәм, арзанга гына утырту суганы саталар. Голландиядән кайтартылган «Штутгартен ризен»! Шундый эре, яхшы булып үсә торган сорт ул. Әмма боларның сата торган суганы яхшы ук үбашлаган инде. Урамда февраль, түтәлгә утырту өчен өч айга якын вакыт бар. Комсызлык биләде, ни булса шул булыр дип, ике кило алдым мин моны. Булмаса, чыгарып ташлармын, килосына кырык сум түләдем, мин әйтәм. Кайткач, суганнарымның яшел кыякларын кайчы белән кисеп аттым. Энә буе үскәнен дә, әле борын төрткәнен дә калдырмадым. Аннары коры чүпрәккә тарытып салып, кухня идәнендә атнадан артык озаклап киптердем. Суганның бер хәйләсе бар аның: селкетә башласаң, уяна ул, яз җитте дип уйлый, ахрысы. Шуңа да суганны вакыты җитми торып, бик селкеткәләргә ярамый да. Теге кипкән суганны чүпрәгенә генә төреп, өстәл астына караңгыга тыгып куйдым. Утыртуын утыртам, нәрсә үсәр инде болардан, дигән идем, шалкан кебек эре суганнар үсте шулардан. Өмәкләнмәделәр дә, черемәделәр дә. Ә суган чебене тимәсен дип, утырткач та бер, аннары үскәндә тагын бер тапкыр тозлы су сиптем. Бер чиләк суга бер уч тоз салганмындыр.

Сөембикә

Запись “Суганның бер хәйләсе бар”: ничек дөрес сайларга? впервые появилась Tatar Today - татар яңалыклары..

– Минем бакчада казынырга яратуымны күргән иде, беркөнне ирем, кисәктән генә: «мин сиңа теп­лица ясап бирәм», – диде. Мин, әлбәттә, ризалаштым. Көтәм-көтәм моның теплица ясаганын, бу ашыкмый һаман. «Кайда соң вәгъдә иткән теп­лицаң?» – дим моңа. «Мин сиңа гадәти булмаганын төзим», – дип күз кыса бу. Менә шулай төзелеш эшләре башланып китте дә инде. Барысын да ирем үз куллары белән эшләп чыкты. 2016 елның декабрь аенда салып бетерде, инде 2017 елның гыйнварында беренче уңышыбызны алдык, – ди Зилә Вафина.

Теплица тулысынча аның карамагында – нәрсә утыртасын, нинди эшләр башкарасын ул барлап, хуҗа булып йөри.

– Теплицага нәрсә утыртыйк икән дип озак уйладык. Ахырдан яшел тәмләткечләр үстерергә булдык. Суган, кинза, салат, петрушка яхшы үсә анда, – ди хуҗабикә.

250 квадрат метрлы теп­лицалары җир астыннан җылытыла икән, шуңа да яшел тәмләткечләр ел әйләнәсе яхшы үсә монда. Март аенда гомумән җылытмыйлар икән. Хәзерге вакытта да 30 градус эссе иде. Кояш астында шулай җылына икән. Корылманы каплау өчен поликарбонатның да калынын – 16 миллиметрлысын алганнар, як-ягын суык кермәсен өчен пенопласт белән япканнар. Үсемлекләр тизрәк һәм яхшырак үссен өчен, утлар һәм вентиляция куйганнар.

– Суган үстерү отышлырак. Ул башкаларга караганда тизрәк өлгерә. Утырткач сатуга чыкканчы якынча ике, күп дигәндә, өч тәүлек вакыт китә. Укроп авыррак үсә. Ул бит җәй көне дә бер айсыз күтәрелми. Ләкин бәясе базарда кыйммәтрәк йөри, шул уңай ягы бар. Кинза, петрушкалар да яхшы үсә теплицада. Руккола, салат яфракларын да яратып, сорап алалар, – ди Зилә.

Суган өчен орлыкны хуҗалар көзге ярминкә вакытында алып калырга тырыша. Быел, мәсәлән, килосын алты сумнан сатып алганнар.

– Махсус теплицада үстерә торган суган сортлары бар. Ләкин алар бик кыйммәт. Әйтик, шалот дигән сортның килосы – 300 сум. Бер караганда, аның уңышы гади суганга караганда күбрәк була. Бер тамырдан өч, дүрт, биш кыяк та чыгарга мөмкин. Гади суган орлыгыннан, күп дигәндә, ике кыяк кына чыга. Бәясе кыйммәт булганга, без гади суган утыртабыз, – ди Зилә.

Җиргә утыртканчы, суганны бер-ике тәүлек марганцовкалы суда тоталар. Зилә ханым сүзләренчә, болай эшләү аны авырулардан саклый, тизрәк баш калкытырга ярдәм итә. Тамыр җибәрсен өчен, гади суда гына да тотып була икән. Кайвакыт, тизрәк үссен дип, суганның кыяк чыга торган ягын бераз гына кисеп тә ала икән хуҗабикә.

– Бакчага кеше вак суган чәчәргә тырыша. Теплица өчен 3–4 сантиметрлы зурлык­тагы суганнарны утыртыр­га кирәк. Орлыкка дигән суган үсенте җибәрмәскә һәм коры булыр­га тиеш, – ди Зилә.

Хуҗабикә суган утыртыр алдыннан җирне ат тиресе, корым һәм ком белән уңдырышлы итә. Мондый туфракта суган яхшырак үсә икән.
– Суганга кортлар, паразитлар куркыныч түгел. Артык күп су сипсәң генә вак чебен чыгарга мөмкин. Бездә, теплица артык дымлы булмасын өчен, махсус вентиляторлар эшли. Суган чебене бик чыкканы юк. Күренә башласалар, мин тәмәке шашкасы (табачная шашка) кулланам. Ул зыянлы түгел, химиясез продукт. Вак чебен аның исен яратмый, – ди Зилә.

Суган артык су да яратмый икән әле.
– Беренче атнасында ике көнгә бер тапкыр су сибәргә ярый. Икенче атнасында сипмәскә тырышам. Әйтик, кичтән су сипкән суганны иртән сатуга алып чыгасың икән, ул суган озак тормый, шиңәчәк. Күп кенә оптовиклар, су сибеп, суганның авырлыгын арттыра. Ләкин мондый суган түбән сыйфатлы була. Сатуга чыгарасы суганга мин бер атна алдан су сипми башлыйм. Ул озаграк та саклана, тәмлерәк тә була, – ди Зилә ханым.

Хуҗабикә суганнан кергән табышын да яшермәде. Бер түтәлдән чиста 30 мең керем ала икән. Барлыгы биш түтәл суган үстерә.

– Яңа ел, 8 Март бәйрәм­нәренә суганны бик күп алалар. Ә менә Пасхага үстерелгән суган җитмәскә дә мөмкин. Чехов базары эшләгән вакытта Пасха бәйрәменә үзем дә суган сатып караганым бар. Иртәнге тугыздан көндезге икегә кадәр 5 мең сум акча эшләдем. Ике көндә кулга 10 мең акча керде, – ди Зилә Вафина.

Хуҗабикә: «суганны элек помидор, кишер, чөгендер, бак­лажан утыртылган җиргә төртсәң, яхшырак үсә», – ди. Ул үзе дә шулай алмаш утыр­тып, җирне ял иттерә икән.

Алисә Шәрәфиева, Шәһри Казан

Запись Суган кыягы сатып баеп буламы? – Шәһри Казан впервые появилась Tatar Today - татар яңалыклары..

“Быелыг урожай! Аллага шөкер! Зөлфиякәемә рәхмәт!” дигән язу белән шушы фотосын Инстаграмга элгән Җәвит Шакиров. Шунда ук кишер, җиләкләрен дә керткән. Халык фотолар астына “Ничек өлгерәсез? Бер чүп тә юк!”, “Күз тимәсен!”, “Зөлфия ханымның куллары алтын” дигән мактау сүзләрен дә җиткергән. 

View this post on Instagram

A post shared by Я В И Т Ш А К И Р О В (@javit_shakirov_official)

View this post on Instagram

A post shared by Я В И Т Ш А К И Р О В (@javit_shakirov_official)

View this post on Instagram

A post shared by Я В И Т Ш А К И Р О В (@javit_shakirov_official)

Запись Җәвит Шакиров бакчасында үскән суганы белән мактана [фото] впервые появилась Tatar Today - татар яңалыклары..