Архивы тел - Tatar Today - татар яңалыклары.

“Солянка” ясау максаты юк” – Ришат Төхвәтуллин туган көн концерты, стадион җыючыларга фикере [яңа интервью]

Гузель — Mon, 25 Feb 2019 23:51:28 +0000

Популяр җырчы Ришат Төхвәтуллин Филүс Каһиров кебек Америкага иҗади сәфәр белән барырга тели. “Үзгәреш җиле”нә дә чакырган булганнар, әмма ул график туры килми дип баш тарта. Татар теле пропагандаланмаса, биш елдан да тизрәк бетәчәк дип саный җырчы. 30 яшьлек юбилее алдыннан Азатлык аның белән әңгәмә корган.

– Февральдә үткән матбугат очрашуында син “яшьләр телне начар белә, урысча сөйләшәләр”, дип әйттең. 2017 елда да, татар теле укытылмаса, 5-10 елда тамашачы калмаячак, дип әйткән идең. Әле дә шул фикердә каласыңмы?

– Телебез бетсә, фәннәребез бетсә, татар телен пропагандалау бетсә, ул 5 елда гына түгел, тизрәк тә бетәргә мөмкин. Шуңа күрә үземнең фикеремдә калам. Чөнки үзебезнең телне, гореф-гадәтләрне үзебез саклап калырга тиешбез. Бу беренче чиратта гаиләдән килә.

– Данир Сабиров “тел өчен көрәшергә түгел, тел өчен сөйләшергә кирәк” дип белдерде. Синең бу фикергә карашың?

– Данир күпмедер дәрәҗәдә хаклы. Тел өчен сүз ярыштырырга кына түгел, нәрсәдер эшләргә, сөйләшергә, аралашырга, күбрәк үрнәк күрсәтергә кирәк. Шулай да әти-әни үзе урысча сөйләшсә, гаиләдә булмаса, без генә бу мәсьәләне чишә алмыйбыз. Үземнең бергә уйнап үскән дусларым, татар егетләре гаиләләрендә урысча сөйләшә. Хәтта мин үземнең туганнарым белән, туганнарымның балалары белән дә кайчакта урысча сөйләшеп китәм, үзем дә шуны сизмим. Менә бу зур проблема. Гаиләдә моны аңлап, балаларга җиткерергә кирәк. Чөнки тел югалса, безнең милләт юкка чыга. Ә юкка чыккач, соңыннан терсәгеңне тешләсәң дә, соң булырга мөмкин. Әлеге вакытта безнең телебез бар, җырларыбыз, моңнарыбыз, биюләребез, традицияләребез бар. Шуларны онытмаска кирәк.

– 2017 елда Азатлыкка интервьюларыңның берсендә“без үз телебездә җырларга, моңланырга, сөйләшергә хокуклы милләт”, дип әйткәнсең. Ул хокукларны татарлар таләп итәме соң? Үзең таләп итәсеңме?

– Үзебезнең концертларда мин гореф-гадәтләр, җыр, моң, биюләрне беренче урынга куям. Мин Кавказ, Чечня якларына барып кайттым. Андагы яшьләр үзләренең милли җырын куеп, рәхәтләнеп бииләр, җырлыйлар. Берсе дә исерек тә түгел, наркотик кулланудан да түгел бу. Бары тик үзенең культурасын саклап калган. Безнең халык та шуңа омтылырга, шундый булырга тиеш. Бездә үзебезнең татар биюләре, татар җырлары булырга тиеш. Бердәм булып, бер-беребез өчен җан атып, бер халык булырга тиешбез.

View this post on Instagram

A post shared by Азатлык Радиосы (@azatliq)

– Башкортстан белән Татарстанны, башкортлар белән татарларны чагыштырсак, кемдә милли хис күбрәк дип уйлыйсың?

– Аерып әйтеп булмый. Әлбәттә, халыклар бер-берсенә охшаш. Башкортстанда да, Татарстанда да, гомумән Русиядә дә милләттәшләребез бер үк. Әмма бездә традицияләр, колорит, татар халкына гына хас булган менталитетыбыз бар.

– Милли стратегия турында ишеткәнең бардыр инде. Төп эшли торган инструмент итеп нәрсәне атый аласың? Нинди тәкъдим кертер идең бу стратегиягә?

– Монда татар телен модага кертергә кирәк. Балалар бакчасында, мәктәптә кеше татарча сөйләшергә оялмасын. Әлбәттә күп нәрсә хөкүмәттән дә тора. Хөкүмәт тарафыннан күп кенә мәсьәләләр куелырга тиеш һәм төгәл тикшереп барырга кирәк. Без барысын да аңлап бетерә алмыйбыз, бәлки, берәр авырлыклары да бардыр. Шулай да бүгенге көнгә кадәр татар теле булу белән без иң беренче чиратта Илһам Шакировка рәхмәтле булырга тиешбез. Ул безгә үрнәк күрсәтте, татар телен онытып баручылар арасында Илһам абыйның җырын ишеткәч, кире татар телен өйрәнүчеләр күп булды. Менә шундый үрнәккә тукталыйк бу мәсьәләдә. Җыр, сәнгать белән татар телен алып калырга кирәк.

View this post on Instagram

A post shared by Ришат Тухватуллин 🎶 (@rishat_thv)

– Хәзер 9-10 мең тамашачы җыеп стадионда концерт куйган татар җырчыларына шаккаталар. Аны син дә җыя аласыңдыр. Андый концерт куючыларга атказанган артист исеме бирергә, премияләр тапшырырга кирәк дигән фикерләр яңгырый. Синең моңа карашың нинди?

– Лаеклы икән, бирергә кирәк. Дәүләт системында бу мәсьәләне генә чишә алырдай кешеләр утыра, әлбәттә. Минем моңа бернинди кагылышым да юк. Халык әйтсә – хак әйтә. Стадион җыючы артистларга – афәрин диюдән кала, бер сүзем дә юк. Әмма минем концертка килгәндә, минем үз фикерем бар, ул боз сарайлары, ареналар, концерт өчен яраклы итеп төзелмәгән. Анда акустика да начар, суык, урындыклар да уңайсыз, йә басып, йә ерактан карарга кирәк. Минем өчен тамашачылар санын күбрәк итеп күрсәтү мөһим түгел. Тамашачы саны артыннан чабу ярышында минем катнашасым килми. Әгәр меңләгән кеше өчен концерт заллары төзелсә, ул залларда без концертлар куярбыз дип уйлыйм. Тамашачы барып җитә алырдай урын буламы, кайда була, мин анысын әйтә алмыйм, дөресен әйткәндә, белмим дә. Әмма шундый концерт заллары булдырылса, әлбәттә, аларда без үзебезнең концертларыбыз булыр дип уйлыйбыз.

–Юбилей концертыңда милли төсмерле чыгышлар булачакмы? Җырчыларны ничек сайладың?

– Безнең күп артистлар җыеп “солянка” ясау максаты юк иде. Иң хөрмәт иткән, тугры дусларымны чакырдым. Филүс Каһиров минем өчен сәнгать юлында һәрвакытта яраткан, хөрмәт иткән иҗатташ абыем булды. Бүгенге көнгә кадәр мин аңа рәхмәтлемен. Минем юбилей концертларымда ул булмаса, дөрес булмас иде. Аның килүенә мин бик шатмын. Шулай ук бик талантлы җырчы кызлар Алия Карачурина, Гөлназ Асаева һәм Чулпан Йосыпова белән күпмедер дәрәҗәдә бер жанрда, бер дулкында йөрибез һәм алар белән концертларымны уздырып җибәрәбез. Бала чактан ук горурланып үскән, биюләрен карап үскән Фәйзи Гаскәров исемендәге дәүләт бию ансамбленең минем концертта чыгыш ясавы белән чиксез горурланам һәм тамашачылар күңеленә дә хуш килер дип ышанып калам.

– Концертыңда татарның бөек шәхесләренең дә җырлары яңгыраячакмы?

– Әлбәттә, Илһам Шакиров репертуарыннан Филүс Каһиров белән дуэтлар да уйлап торабыз әле. Күп нәрсәне сөйләмим. Концертка килегез, күрерсез.

View this post on Instagram

A post shared by Ришат Тухватуллин 🎶 (@rishat_thv)

– Иҗат студиясе булдыру нияте бар дигән идең. Гүзәл Уразова да әйткән иде, җыр мәктәбе ачарга телим, дип. Бу синең әле хыялмы?

– Минем студия төзелеп бетеп бара. Студия ачтым да, анда кеше булмау гына түгел, безгә төпле проект кирәк. Мин үземне җырлый башлаганнан бирле студия эшләре белән бәйлим. Аранжировка, көй язу, яздыру мәсьәләләре минем өчен кызык, хобби дисәм дә була. Киләчәктә гел җырлап йөреп булмас, яшь җырчыларны табу, шулай ук, бик матур яңгырый торган продюсерлык үзәге түгел, ә татар җырчылары чыгару өчен ниндидер мәктәп булдыру уйларыбыз бар.

– Америкага барырга хыяллануың дөресме?

– Әйе, минем күптәннән андый хыялым бар. Америкага барып, ул атмосфераны, мәдәниятне күреп кайтасым килә. Чөнки мин шуңа инандым: нинди генә сыйфатлы аудиоязма, җыр булмасын, алар Америкада яздырылган. Шуңа күрә иң беренче чиратта Америкадагы яздыру студияләрен барып карыйсым килә.

Филүс менә Америкага барып кайтты, студияләргә барды микән, юк микән, мин белмим, әмма минем төп хыялым, төп максатым шундый. Аларның җырларының сыйфат ягы күпкә югарырак, шуңа күрә өйрәнергә, камилләшергә дигән максат бар. Әле Филүсне күрмәдем, күрсәм, безнең дә Америкага барып кайтырга нинди мөмкинлекләр булуын сорыйм.

– Берничә ел элек Азатлыкка “Евровидениедә катнашырга теләгем бар”, дип әйткән идең. Әлегә Русия төбәкләрендә концертлар кую белән күбрәк шөгыльләнәсең. “Евровидение” кебек халыкара җыр бәйгеләрендә катнашмавың нәрсәгә бәйле?

– Һәрбер нәрсәнең үз вакыты. Ашыгырга кирәкми, бар нәрсәне төптән уйлап эшлибез. Ходай кушса, ул якларга да барып чыгарбыз. “Евровидение”дә дә катнашып карыйсым килә. Тормышка ашырмы, анысы соңрак ачыкланыр. Әлегә хыял булып кала.

– Урыслашкан районнарда халык концертларыгызга тулы заллар белән киләме? Башлаганда һәм хәзерге гастрольләрдә үзең тәрәккыят сизәсеңме?

– Без, әлбәттә, тамашачылар саны артуын сизәбез. Мәсәлән, мин беренче тапкыр Менделеевскида булдым. Тулы зал белән каршы алдылар. Аларга беренче тапкыр килгәч, “бу татар районымы яки урысмы?” дип сорадым. Чөнки урыс шәһәренә килеп кергән кебек иде. Зал тулы татарлар иде. Һичшиксез, монда татарларның барлыгы сизелә. Сез беләсезме, татарлар бөтен җир шарында. Хәтта Африкага барып концерт куйсаң да, анда да татарлар бик күп. Менә Филүс бер ачык мисал күрсәтте, Америкага барып, татарча концертлар куеп кайтты. Безнең татарлар бөтен җир шарында.

– Нигә син “Үзгәреш җиле”ндә күренмисең? Тәкъдим булмадымы?

– Башта бер-ике ел тәкъдим булды, әмма безнең графиклар бер ел алдан төзелә һәм без ул көнне берничек тә була алмыйбыз, репетицияләрдә дә катнаша алмыйбыз. Алдан әйтсәләр, әлбәттә, катнашыр идек.

– “Тыңлачы, сандугач”ны джаз стилендә башкара алыр идеңме?

– Юк, мин аны берничек тә джаз стилендә күрмим. Гомумән, мин джаз стилендә җырлый да алмыйм. Мин экспериментларга бик яхшы карыйм, шулай да, миңа калса, ул безнең җырларга килешми, бозу гына кебек тоела. Миңа калса, “Тыңлачы, сандугач” менә шул килеш кала инде ул хәзер. “Үзгәреш җиле”н урыс режиссерлары әзерли, сизелә. Алар көчле, сүз дә юк. Әмма безнең халыкка хас стильне, моңны аңлап бетерә алмыйлар. Моңны беренче урынга куярга кирәк, аны урыслаштырырга кирәкми. Монда бик нечкә генә эшләргә кирәк. Шуңа күрә мин режиссерлар эзләгәндә, кызганыч, таба алмыйм. Мәскәүгә мөрәҗәгать итә алмыйм, чөнки безнең сәнгатьне аңлап бетерә алмыйлар. Татар теллеләр арасында югары дәрәҗәдә бөтен нечкәлекләрне аңлаганнар бик аз.

Чит ил агентлыгы Azatliq Radiosi

Запись “Солянка” ясау максаты юк” – Ришат Төхвәтуллин туган көн концерты, стадион җыючыларга фикере [яңа интервью] впервые появилась Tatar Today - татар яңалыклары..

Минтимер Шәймиев телләрне ихтыярига калдыруны тәнкыйтьли

Лэйсирэ — Fri, 25 May 2018 05:19:49 +0000

Татарстан Дәүләт шурасы Русиянең Мәгариф канунына милли телләрне укытуны ихтыярига калдыруны күздә тоткан үзгәрешләр кертүгә каршы чыкты. Депутатлар бу мәсьәләдә Русия думасы һәм төбәкләр белән сөйләшүләр алып барырга чакырды.

24 май үткән утырышта Татарстан Дәүләт шурасы депутатлары урта мәктәпләрдә милли телләрне укытуны ихтыярига калдыру турында канун өлгесен хөкем итеп, әлеге документ кире кагылырга тиеш дип тавыш бирде.

Утырышта канун өлгесе турында чыгыш ясаган депутатлар аңа каршы булуын белдерде. Депутат Ксения Владимирова әлеге канун өлгесен хупламаска чакырып, аны Думада төбәкләрнең үзенчәлекләрен белмәгән депутатлар әзерләгән дип белдерде.

“Бу канун беренче сыйныфта (республиканың дәүләт телен – ред.) бөтенләй укымауны, ноль сәгать укуны күздә тота. Икенче сыйныфта атнасына бары бер сәгать кенә каралган. Өченче сыйныфта да бер генә сәгать, дүртенче сыйныфта ярты сәгать укылачак.

Ә (федераль уку стандартының – ред.) дүртенче вариант нигезендә гомум белем бирү мәктәбендә бишенче сыйныфта ике сәгать, алтынчы сыйныфта бер сәгать. Җиденче, сигезенче, тугызынчы сыйныфларда атнасына икешәр сәгать уку каралган. Бу әгәр дә бала һәм аның әти-әнисе икенче тел буларак үзләренең туган телен укуны сайлаган очракта булачак. Әгәр сайламаса, ул аны бөтенләй өйрәнмәячәк. Хөрмәтле коллегалар, мин бу канун өлгесен хупламаска чакырам”, диде Владимирова.

Мәгариф, фән, мәдәният һәм милли мәсьәләр комитеты утырышка кадәр канун өлгесен кире кагу тәкъдиме белән чыккан иде. Комитет рәисе Разил Вәлиев депутатлар алдында чыгыш ясап: “Бу канун өлгесе кабул ителергә тиеш түгел. Башка республикалар да безгә кушылыр, Русия думасындагы Татарстаннан сайланган депутатларга да өметебез зур. Һәр тавыш мөһим. Безне ишетерләр дип ышынам. Русия Контитутциясендә дә хакимият күпмилләтле халык кулында дип язылган. Бу канун өлгесе кабул ителсә, Русия горурланган күптеллелек, дустанә мөнәсәбәт юкка чыгачак. Безнең комитет бу канун проектын хупламаска өнди”, диде.

Вәлиев фикеренчә, мәктәптә телне өйрәнмәү ата-аналар арасында, ата-ана һәм мәктәпләр арасында низаг тудырырга мөмкин. “Бер елда өйрәнәм дияр, икенче елда баш тартыр, ягъни бернинди дә системлы эш булмаячак. Туган телләрне мәҗбүри өлештән төшереп калдыру педагогларны да югалтуга китерәчәк. Татарстанның дәүләт теленең кулланылуы, аның яшәп калуы да мәктәпләрдә өйрәнелүгә бәйле”, диде Разил әфнде.

Татарстан фәннәр академиясе президенты, депутат Мәгъзүм Сәлахов Русиядәге халыклар телләрен яклау хәрәкәтен булдыру ихтыяҗы туды дип белдерде.

“Бу канун өлгеләре безнең ватанның бердәмлегенә һәм татулыкны, толерантлыкны саклап калуга куркыныч тудыра. Республика фәнни җәмәгатьчелеге, Фәннәр академиясе бу өлкәдәге белгечләрне туплау өчен платформа булырга әзер. Анда төрле милли республикадан галимнәр катнашып бу мәсьәләне хәл итә алыр иде”, диде Сәлахов.

Галим Мәскәүнең бу канун өлгесен кабул итү өчен әзерлек эшләрен 10-15 ел элек үк тотынуын әйтә.

“10-15 ел элек булган хәлләрне анализласак, кайдадыр юл харитасы эшләнгән. Аның максатын аңлау авыр, бәлки монодәүләт булдыру, бәлки башка нәрсәдер. Әмма професионаллар системлы рәвештә шул юл харитасы белән эшләгән. Без башта провокацион мәкаләләр күрдек. Аннары барыбызга да билгеле Ольга Артеменко Дәүләт шурасына килде. Аның белән яхшымы, яманмы фикер алышу булды. Шуннан соң алар БДИ кертте. БДИны татарча бирүне тыю милли телләрдәге югары белем бирү системын җимерде.

Бу милли югары мәгарифне җимерү булып тора
Фән өлкәсендә шулай ук хәйләкәр юл кулландылар. 2013 елдан диссертацияләрне яклауга үзгәрешләр кертү нәтиҗәсендә, милли телләрдә фәнни эшне яклау тыелды. Мисал өчен, татар филологиясен алсак, ничек инде татар теле нечкәлекләрен урысча аңлатасың. Бу шулай ук милли югары мәгарифне җимерү булып тора. Без тикшергән канун өлгесе әлеге юл харитасының чираттагы этабы”, диде Сәлахов.

Татарстан Дәүләт киңәшчесе Минтимер Шәймиев үзенең чыгышы вакытында бу эшләр Дәүләт шурасының һәм Татарстанның күпмилләтле халыкның, башка республикаларның фикерен исәпкә алмыйча башкарыла дип тәнкыйтьләде.

“Болай ашыгу гаҗәпләндерә һәм аңлашылмый. Һәм иң төп мәсьәлә – Русиянең хәзер эшләп килгән Конституциясен бозып башкарыла, безнең республиканың Конституциясе бозылу турында әйтеп тә торасы юк. Татарстан парламенты бу өлгегә карата уңай карар кабул итә алмый”, диде Шәймиев.

Депутатлар күпчелек тавыш белән Русия мәгариф канунына үзгәрешләр кертүгә каршы чыкты, ана телләрен мәктәпләрдә укыту мәсьәләсендә сөйләшүләрне дәвам итәргә дигән карар кабул итте.

10 апрель Русия думасының алты депутаты парламентка республикаларның дәүләт телләрен ихтыяри укыту турында канун өлгесен кертте. Анда республикаларның дәүләт телләрен бары тик укучылар һәм аларның ата-аналары теләге белән генә укыту тәкъдим ителә, милли телләрне укытуны факультатив итү карала.

21 май Мәскәүдә үткән “Туган телләрнең гомуми белем бирү системында үсеше: сәяси-хокукый аспектлар” дип аталган түгәрәк өстәл сөйләшүендә галимнәр, депутатлар, җәмәгать эшлеклеләре милли телләрне саклау өчен “Русия халыклары демократик конгрессы” иҗтимагый хәрәкәте булдыру турында карар кабул итте.

Дәүләт думасының Мәгариф комитеты вәкиле Алексей Майоров әлеге сөйләшүдә чыгыш ясап хәзерге вакытта канун өлгесенең төбәкләргә юллануын, 45 көн эчендә өлгегә фикерләр җибәреп булачагын әйтте. Канунны карау якынча сентябрь аенда узачак ди ул.

Татарстан Дәүләт шурасының туган телләрне мәктәпләрдә мәҗбүри укытуны калдыруны яклап Русия думасы рәисе Вячеслав Володинга язган мөрәҗәгатен Калмыкстан, Кабарда-Балкар республикалары парламентларының рәисләре үзләрендә хуплаячакларын белдергән иде.

23 май Дагыстан парламентының Мәгариф комитеты туган телләрне укытуны ихтыярига калдыру турындагы Русия кануны өлгесен хуплап чыкты.

Азатлык

Запись Минтимер Шәймиев телләрне ихтыярига калдыруны тәнкыйтьли впервые появилась Tatar Today - татар яңалыклары..

Илшат Әминов Конституцияне үзгәртүне сорый

Лэйсирэ — Wed, 23 May 2018 08:21:36 +0000

21 май көнне Мәскәүдә мәктәпләрдә туган телләрне укытуга багышланган “түгәрәк өстәл” уздырылды. Анда апрель аенда Дәүләт Думасы карамагына кертелгән туган телләрне ирекле укытуга кагылышлы закон проекты турында фикер алышканнар. Чараны туган телләрне мәҗбүри укытуны яклаучы инициатив төркем оештырган.

“Түгәрәк өстәл”дә Дәүләт Думасы, шулай ук Якутия, Башкортстан, Татарстан, Чуашстан, Алтай, Дагыстан һәм башка милли республикалардан килгән депутатлар чыгыш ясаган. Бу вакытта проектка каршы петициягә 32 мең имза куелган булган. Билгеле булганча, аңа кадәр Казанда, туган телләрне яклап, митинг оештырылган иде. Дәүләт Думасының мәгариф комитеты әгъзасы Алексей Майоров сүзләренә караганда, комитетка 600 гә якын хат килгән. Закон проектына каршы булучылар биш тапкыр күбрәк. Чарада бары Россия немецларының федераль милли-мәдәни автономиясе президенты Генрих Мартенс кына закон проектын хуплаган. Әмма шул ук вакытта дәүләт телләренең мөһимлеген дә ассызыклаган ул. Җәмәгать эшлеклесе, журналист Максим Шевцов фикеренчә, туган телләрне ирекле укыту җинаятькә тиң санала. Ул үзе исә иң аз санлы халыкларның да хокукларын якларга әзер булуын белдергән. “Закон проекты илдәге күпмилләтле халыкларның гражданлык хокукларын кыса. Бу законны кабул итү теләге аңлашылмый. Урыс телен беркайда да кысмыйлар. Мин татар яки кабарда телен өйрәнеп, урыс булудан туктаган бер генә кешене дә белмим”, – дигән ул.

Туган тел хокукларын яклау активлыгы хәрәкәткә әйләнергә тиеш, дигән фикерләр дә яңгыраган.

– Мин хәрәкәтне ничек атарга кирәклеген беләм – Россия Конституциясен яклаучылар хәрәкәте! Без монда барыбыз да илнең Төп законын якларга килдек, – дип белдергән “Яңа Гасыр” телеканалы генераль директоры, Татарстан Дәүләт Советы депутаты Илшат Әминов.

Илшат Әминов фикеренчә, туган телләрне ирекле укыту турындагы закон проекты Россия Конституциясенә каршы килә. “Конституция нигезендә республикалар үз дәүләт телләрен билгели һәм аны урыс теле белән тигез дәрәҗәдә куллана ала. Россия халыкларына туган телләрне саклауны, үстерүне гарантияли. Бөтен стандартлар, мәгариф законына кертелгән үзгәрешләр Конституциягә каршы килә. Дәүләт телен ирекле укыту башка сыймый. Ул очракта Конституцияне үзгәртегез! Милли республикалар туган телне ирекле укыту проектын хуплый алмый! – ди депутат. – Мин редакция комиссиясенә Россия Конституцион судына милли республикаларның уртак мөрәҗәгатен әзерләргә кирәк булыр дип куркам. Безгә шул юлдан барырга туры килмәгәе. Бу – җиңел юл түгел. Моның өчен яхшы юристларның ярдәме кирәк булачак. Законны укысак, хаклыкның безнең якта булуын аңларбыз. Анда бу хакта төгәл, аңлатуларга урын калдырмыйча әйтелгән”.

Сәрия Мифтахова, Ватаным Татарстан

Запись Илшат Әминов Конституцияне үзгәртүне сорый впервые появилась Tatar Today - татар яңалыклары..

Айдар Шәйхин тел мәсьәләсе турында: «Бәхил бул, Татарстан Җөмһүриятем!»

Чулпан — Wed, 29 Nov 2017 17:34:52 +0000

Татарстанда татар телен өйрәнү ихтыяри булачак, моның өчен ата-аналарның рөхсәте кирәк. Бу яңалык тиз арада Татарстан халкын “уятты”. //Tatar today//

“Гыйлем.tatar” порталы редакторы, Гарри Поттер турындагы романнарны татарчага тәрҗемә итүче Айдар Шәйхин үзенең Инстаграмына түбәндәге сүзләр белән пост элеп куйган: “Бүгенгә кадәр син Дәүләт идең, үтерделәр. Син хәзер үле дәүләт. Бүгенгә кадәр син Телле идең, кистеләр. Син хәзер телсез…”

View this post on Instagram

Бәхил бул, Татарстан Җөмһүриятем. Көне җитәр, иншәАллаһ, кайтырсың әле. Кайтарырбыз әле. Бүгенгә кадәр син Дәүләт идең, үтерделәр. Син хәзер үле дәүләт. Бүгенгә кадәр син Телле идең, кистеләр. Син хәзер телсез. Кайтыйм дисәң, юк илем, кайгы-сагыш күл, имди, Башым исән – юк халкым, инде хәлем бел, имди. Сак-Сок булдык читләрдә, күрше булдык читләргә…

A post shared by A. R. Shaykhin (@olivershaykh) on Nov 29, 2017 at 1:46am PST

Запись Айдар Шәйхин тел мәсьәләсе турында: «Бәхил бул, Татарстан Җөмһүриятем!» впервые появилась Tatar Today - татар яңалыклары..