Архивы яңалыклар - Tatar Today - татар яңалыклары.

Бер хатын-кыз урамда бәби тапкан

Рамиля Валиахметова — Wed, 10 Jun 2026 10:38:44 +0000

Новосибирск шәһәрендә бер хатын-кыз баласын урамда тудырган.

Төбәкнең Сәламәтлек саклау министрлыгы әлеге мәгълүматны раслады, дип хәбәр итә “РИА Новости”.

Телеграм-каналлар шәһәрнең Ленин районында Вертковская урамындагы йортлар арасында җирдә бер хатын-кызның бала табуы турында язганнар. “Урамда бала табучыга ашыгыч ярдәм чакыртылган. Пациентның хәле табиб сере булып кала”, – дип аныклап үтелгән Новосибирск өлкәсенең Сәламәтлек саклау министрлыгында.

ЧЫГАНАК: https://vatantat.ru/news/ber-xatyn-kyz-uramda-babi-tapkan-115890

Запись Бер хатын-кыз урамда бәби тапкан впервые появилась Tatar Today - татар яңалыклары..

Әнвәр Нургалиев китә…

Рамиля Валиахметова — Sat, 06 Jun 2026 15:38:02 +0000

Башкортстанның халык артисты Әнвәр Нургалиев социаль челтәрләрдә үзенең язылучыларына мөрәҗәгать итте.

Ул Урал аръягындагы турның һәм концерт сезонының тәмамлануы турында хәбәр итте. Артист җәен ялга китә.

Әнвәр Нургалиев үз тамашачыларына җылы каршы алулары һәм ярдәм итүләре, шулай ук үз командасына эшләре өчен рәхмәт белдерде.

– Гастрольләр, сәхнә, команда — ул минем тормышымның зур өлеше. Монда барысы да бар: соклану, шатлык, борчылу һәм хәтта күңел кайту минутлары, ләкин нәкъ менә шул безне көчлерәк итә һәм бер-беребезгә якынайта.

Ул үзенең җанатарларына көз көне аларны яңа җырлары белән сөендерергә вәгъдә итте.

ЧЫГАНАК: https://kiziltan.ru/articles/kultura/2026-06-06/nv-r-nurgaliev-kit-4712979

Запись Әнвәр Нургалиев китә… впервые появилась Tatar Today - татар яңалыклары..

Рөстәм Нәбиев рекорд куйган

Рамиля Валиахметова — Wed, 03 Jun 2026 11:53:23 +0000

Күптән түгел ул тормышында тагын бер җиңү яулады: кулларында Эверест тавыныд түбәсенә күтәрелде. “ВТ” хәбәрчесе рекорд куйган Рөстәм Нәбиевнең хәлләрен белеште.

– Иң зур җиңүем гаиләм янына исәнсау кайту булды. Балаларым да сагынган, Индирам да көткән. Үземнең дә кәефем бик яхшы. Тауга менеп төшкәннән соң сәламәтлекккә бәйле күңелсезлекләр булмаса ярар иде, дигән идем. Шөкер, бернигә дә зарланмыйм, –ди Рөстәм. –Эверестка кулларымда гына менәр адыннан Аллаһы Тәгаләдән исәнлек сорап, үзем белгән догаларны укыдым. Анда чакта могҗизалар күп булды. Бәлки күкләрдәге әти-әнием дә көч биргәндер. Хәзер менә өйгә кайткач, баштан узганнарны уйлап утырам. Шуның кадәр биеклеккә күтәрелер өчен каян килде икән моның кадәр көч? Яшермим, тауга менгәндә төрле чаклар булды. Утырып елаган вакытлар да булды. Ниләр күргәнемне, нәрсәләр кичергәнемне үзем генә беләм. Тауда күп еллар элек һәлак булган кешеләрнең мәетләре дә очрады. Мин дә исән кайтмау куркынычы барлыгын белеп чыгып киттем. Бар да яхшы булачак, дигән уй яшәтте мине. Янымдагы дусларыма рәхмәт. Без бергә барлык авырлыкларны да җиңә алдык. Хәзер менә уйлыйм: мактанып әйтүем түгел – Эверестка минем кебек кулларында гына күтәрелүче башка булмастыр инде ул.

Рөстәм барысын да сөйләп бетерми. Әмма тауга менү җиңел түгеллеген, бик авыр булганын да яшерми.

Анда чакта иң гади әйберләрне дә сагындым. Бөтен тормышымның кадерен аңладым. Җаем булган саен гаиләм белән элемтәгә керергә тырыштым. Алар да миңа көч бирде, – ди Рөстәм. – Бөтен кеше миңа соклана. Кирәкми, миңа түгел, Индирага сокланырга кирәк ул. Мин тауларда чакта берүзе өч бала белән калды. Бар тормыш аның өстендә иде. Телефон аша сөйләшкәндә дә мин аны гел юатып тордым. Индиракаем, мин кайткач, берәр җиргә ялга барырсың, дидем. Безнең гаиләдә эшләр бүленгән инде. Ике кызны мәктәпкә, бакчага, түгәрәкләргә йөртү минем өстә, ә хатыным үзен кечкенә улыбызга багышлады. Хәзер инде мин кайттым, бар да яхшы булыр, дип уйлыйм. Барлык якыннарымны сагындым. Бөтенесе шалтырата, үзем дә хәлләрен беләм. Ә иң рәхәте – балаларымның шат елмаюларын күрү. Ә менәсе таулар тагын бар әле ул. Насыйп булса…

ЧЫГАНАК: https://vatantat.ru/news/rekord-kuigan-rostam-nabiev-menase-taular-tagyn-bar-ale-ul-115693

Запись Рөстәм Нәбиев рекорд куйган впервые появилась Tatar Today - татар яңалыклары..

Киләсе атнада Татарстан халкы өч көн рәттән ял итәчәк

Рамиля Валиахметова — Mon, 01 Jun 2026 11:20:37 +0000

Июньдә, Россия көне билгеләп үтелү уңаеннан, кыскартылган эш атнасы көтелә.

Аның әйтүенчә, 12 июнь – Россия көне җомгага туры килә. Шуңа күрә безне кыска эш атнасы көтә. Ул дүрт көн – 8еннән 11 июньгә кадәр дәвам итәчәк.

Ә инде 12-14 июньдә ял итәчәкбез.
Моңа кадәр Социаль фондта кисәтеп әйтелгәнчә, июньдә өч көнлек ял көтелү сәбәпле, пенсиясе һәм социаль түләүләре 12-14 июньдә банк счетына күчерелергә тиеш булганнарның акчасы алданрак – 11июньдә үк киләчәк.

ЧЫГАНАК: https://vatantat.ru/news/kilase-atnada-tatarstan-xalky-oc-kon-rattan-ial-itacak-115618

Запись Киләсе атнада Татарстан халкы өч көн рәттән ял итәчәк впервые появилась Tatar Today - татар яңалыклары..

“Үзгәрдең, Илсөя…”

Рамиля Валиахметова — Sun, 24 May 2026 07:52:10 +0000

“Тормыш үзгәртте”, – дип җаваплый Илсөя Бәдретдинова.

“– Үзгәрдең, Илсөя…

– Тормыш үзгәртте. Миңа хәзер 45 яшь. Әле менә хәзер генә «юк» дияргә өйрәндем. Бу – безнең авыл менталитетыдыр инде, гадилек. Ошыймы, ошамыймы – син барысына да елмаясың, тегендә, монда барырга кирәк. Юк, дип әйтә башладым. Холкым шундый: әгәр «әйе» дип әйтәм икән, димәк, аны эшләргә тиешмен. Ә мин өлгерә алмыйм.

– «Юк» дигәнне яратмыйлар бит, дошманнарың арта…

– Син күп тапкырлар кемгәдер ярдәм итеп, бер тапкыр гына «юк» дисәң, шунда ук начар кешегә әйләнәсең. Мин моны аңламыйм. Тагын шундый нәрсәгә тап булдым. Янәшәмдәге кешеләр белән дуслашырга теләүчеләр күп. Бу дуслык өчен түгел, минем турыда мәгълүмат алу өчен. Алардан: «Кем белән очраша, кем белән йоклый, кайда яши, күпме акча эшли?» – дип сорыйлар. Серләремне беркемгә дә сөйләмим. Нигә кирәк ул кешеләргә күпме акча эшләвем? Анысын саныйлар, ә шул ук сәхнәгә күпме туздырганны санамыйлар. Матур күлмәгемне күрәләр, ә төннәр буе акырып елап чыккан төннәремне белмиләр. Ялларда алар балалары, оныклары белән шашлык пешереп ял иткәндә, минем кемгәдер ялварып, нәрсәдер эшләп йөргәнемне күрмиләр. Безнең һөнәрнең төп үзенчәлеге шунда: без бу нәрсәләрне күрсәтергә тиеш тә түгел. Без кешеләргә матурлык алып киләбез. Зарланып утырырга хакым юк, чөнки тамашачы аны үзенчә кабул итә. «Авыр булгач, заводка эшкә бар», – диләр. Яисә: «Чирләгәч, нигә концертларыңны туктатып тормыйсың?» – дип язалар.

Алар концертның вакытын үзгәртүнең нинди зур проблема икәнен күз алларына да китерми. Беренчедән, синең йөзләгән, миллионлаган сумлык арендаң түләп куелган һәм ул яначак. Икенчедән, синең төркемдәге артистларың акчасыз кала, өченчедән, кассирлар кешеләргә билетларын кире кайтарып азаплана. Күпме тамашачы концертка килергә эшләрен алдан планлаштырган, самолетларга билетларын алган. Чирләсәң дә, үлсәң дә чыгып эшлисең. Әни үлеп китте, җирләдек. Икенче көнне концерт иде. Бу хакта тамашачыга ахырдан гына әйттем. Апа үлде, икенче көнне зур чарада чыгыш ясарга тиеш идем. «Апа үлде, авыр чагым», – дип хәбәр иттем. «Ярар, син үлмәгәнсең бит, апаң үлгән», – дигән җавап килде. Бу – артист тормышындагы медальнең икенче ягы… “

ЧЫГАНАК: https://vatantat.ru/news/ilsoia-badretdinova-kaberem-ianynda-matur-suzlar-soilap-kylanmagyz-115376

Запись “Үзгәрдең, Илсөя…” впервые появилась Tatar Today - татар яңалыклары..

Эсседә организмга нинди ризыклар булыша?

Рамиля Валиахметова — Sun, 24 May 2026 07:45:23 +0000

Эссе һава торышында рационга банан, күрәгә һәм чикләвекләр өстәргә кирәк. Бу ризыклар сәламәтлекне сакларга һәм электролитлар югалуны тутырырга булыша. Бу хакта табиб, медицина фәннәре кандидаты Ольга Уланкина сөйләгән.

Хәтта кеше үзен яхшы хис итсә дә, эсседә иминлек кагыйдәләрен сакларга кирәк, дип киңәш итә белгеч.

«Иң мөһиме – су эчү режимын саклау. Суны көн дәвамында еш һәм тигез күләмдә эчәргә кирәк. Моннан тыш, электролитлар югалуны да тутырып тору зарур. Моның өчен рационга банан, күрәгә, чикләвекләр һәм минераль су өстәргә кирәк. Ә менә кофе, алкоголь һәм авыр ризыктан баш тартып тору яхшырак. Эссе һава торышы көтелә икән көн тәртибен киредән карарга кирәк: урамдагы эшләрне кичкә калдыру яхшы булыр», – дигән табиб.

Эссе кояшка чыгарга туры килгәндә дөрес киенергә кирәк, башка кию һәм кояштан саклый торган крем сөртү мәҗбүри, дигән табиб.

ЧЫГАНАК: https://radio1.ru/news/zdorove/stalo-izvestno-kakie-produkti-pomogayut-organizmu-v-zharu/

Запись Эсседә организмга нинди ризыклар булыша? впервые появилась Tatar Today - татар яңалыклары..

Мошенниклар ешрак кемне алдый?

Рамиля Валиахметова — Thu, 21 May 2026 06:29:11 +0000

Россия банкының Татарстан буенча Милли банк бүлекчәсенең икътисад бүлеге башлыгы Елена Кирсанова кырыгалдарлар тозагына эләгүчеләрнең уртача портреты белән таныштырды.

– Мошенниклар ешрак олы яшьтәгеләрне алдый, дип уйлыйбыз. Әмма статистика буенча, гадәттә бу урта белемле, уртача кереме булган 25–44 яшьлек, шәһәрдә яшәүче эшли торган хатын-кызлар. Акча эшләү яшендәге кешеләр күбрәк кызыксыну тудыра аларда.

2025 елда банкларның саклык хезмәте тарафыннан 134 миллион шикле операция туктатылган, 14 триллион сумга якын акча саклап калынган. Әмма саклап кала алмаган 30 миллиардка якыны да – халыкның бөртекләп җыйган сумнары бит.

Нинди генә шикле шалтырату кабул итсәгез дә, СМС-хәбәр килеп ирешсә дә, аек акыл белән уйлагыз. Карарларны тиз кабул итмәгез. Үзегез өчен бизмәнгә салып үлчәрлек вакыт калдырыгыз, якын кешегез белән киңәшләшегез. Шул чакта алданганыгызны аңлап алырсыз бәлки.

ЧЫГАНАК: https://vatantat.ru/news/mosenniklar-esrak-kemne-aldyi-115342

Запись Мошенниклар ешрак кемне алдый? впервые появилась Tatar Today - татар яңалыклары..

Илзидә Госман хыялын чынга ашырган

Рамиля Валиахметова — Mon, 18 May 2026 08:35:02 +0000

Җырчы Илзидә Госманның өр-яңа җыры дөнья күрде. «Хисләр сүнгән димә» җырын аңа Венер Котдусов бүләк итеп биргән. Илзидә Госман бу җырына клип төшерергә дә өлгергән инде. Әлеге клип өчен җырчыга, балачакларын искә төшереп, атка атланырга да туры килгән. Җырчыдан яңа клибы турында сорадык.

-Беренчедән, бу җырда «Ярсу аттай чапкан язмышкайлар» дигән сүзләр бар. Икенчедән, атта чабып клип төшерү күптәнге хыялым иде. Тик, атны чаптыра алсам да, төшерүчегә җайсыз булыр дип, әкрен йөрергә туры килде. Киләчәктә атта юртаклап төшү теләгем дә бар. Чөнки мин балачактан атлар яраттым, атланып та, арбасына утырып та күп йөрдем. Безнең ат юк иде ,әти комбайнда эшләде. Ә күрше Нургали абыйлар ат асрады. Аның кызы белән бергә уйнап үстек. Бер җәйне, миңа 12-13 яшь булдымы икән, көн дә Нургали абый эшләгән фермага барып, атта йөрергә ияләштек. Аты матур, тыныч. Безне иярле дә, иярсез килеш тә утырта иде. Без исә бәхеткә чумып, чиратлашып, әллә кайлардан уратып киләбез.

Берсендә, шулай рәхәтләнеп атта барганда, әллә кайдан эт килеп чыкты. Бик каты итеп өргән эттән куркып, атыбыз каты итеп чабып китте. Мин йөгәнгә ябыштым – Сабантуй батырымыни! Җил тизлегендә очам гына. Ат бик еракка, урманга кадәр чапты, эт артта калгач кына, тынычланып туктады. Йөгәненнән тартып, көчкә кайтып җиткән идем. Шул хәлдән соң атка атланганым булмады. Атлар акыллы хайван дисәләр дә, бик ышанып бетәргә ярамый. Әтинең үлеме аттан килеп чыккач та күңелем кайткан иде… Әтием пенсиягә чыккан гына иде әле. Яшь ат сатып алды. Ул ат никтер куркак, дуамал булып чыкты. Такталар төяп таудан төшкәндә чабулап китте дә, әтием йөк астында калып, фаҗигале төстә һәлак булды… Атка бәйле менә шундый күңелсез хәлләр дә булган иде тормышымда.

Ә минем видеода төшкән «Шарлотка» исемле атны сөеп-сыйпап кына тордык, – дип сөйләде ул.

ЧЫГАНАК: https://intertat.tatar/news/ilzida-gosman-xyyalyn-cynga-asyrgan-5879395

Запись Илзидә Госман хыялын чынга ашырган впервые появилась Tatar Today - татар яңалыклары..

Быел кемнәр пенсиягә чыга ала?

Рамиля Валиахметова — Fri, 15 May 2026 08:31:36 +0000

2026 елда картлык буенча пенсиягә 59 яшьлек хатын-кызлар һәм 64 яшьлек ир-атлар чыга ала. Моның өчен ике шарт үтәлергә тиеш. Бу хакта Татьяна Подольская сөйләгән.

Белгеч сүзләренчә, 2026 елда иминият пенсиясе алу өчен билгеләнгән яшькә җитү һәм кимендә 15 ел хезмәт стажы булу кирәк.

Ул шулай ук быел балалар карау чорының хезмәт стажына кертелүенә бәйле чикләүләр бетерелүен әйткән. Хәзер һәр балага яшь ярым тулганчы караган вакыт тулысынча гомуми стажга кертелә, ә ике яки аннан күбрәк бала булган очракта, бу вакытлар бергә кушып исәпләнә.

Моннан тыш, пенсия билгеләү өчен 30 пенсия баллы җыярга кирәк. Подольская аңлатуынча, быел пенсия күләмен исәпләү өчен кулланыла торган бер пенсия баллының бәясе 156,76 сум тәшкил итә.

ЧЫГАНАК: https://intertat.tatar/news/byel-kemnar-pensiyaga-cyga-ala-5879358

Запись Быел кемнәр пенсиягә чыга ала? впервые появилась Tatar Today - татар яңалыклары..

Май ахырында кыска эш атнасы була

Рамиля Валиахметова — Fri, 15 May 2026 08:20:15 +0000

Май ахырында Корбан бәйрәме ял көн була, шул сәбәпле Татарстан халкын кыска эш атнасы көтә.

Чәршәмбе, 27 май ял көне була, бәйрәм алдыннан, 26 майда, эш көне бер сәгатькә кыскартыла.

Шулай итеп, атнасына 5 көн эшләп 2 көн ял итүче хезмәткәрләр бу атнада барлыгы 4 көн генә эшләячәк.

ЧЫГАНАК: https://intertat.tatar/news/mai-axyrynda-kyska-es-atnasy-bula-5879352

Запись Май ахырында кыска эш атнасы була впервые появилась Tatar Today - татар яңалыклары..