Архивы республика ифтары - Tatar Today - татар яңалыклары.

Республикакүләм ифтарда катнашучылар өчен бушлай поездлар йөриячәк

Рамиля Валиахметова — Tue, 04 May 2021 11:45:17 +0000

2021 елның 11 маенда Татарстан мөселманнары Казанда Россиядә иң танылган ифтар-мәҗлесләренең берсе – 9 Республикакүләм ифтарына җыелачак. Республикакүләм ифтар ТР мөселманнары Диния нәзарәте, «Ак Барс Арена» стадионы дирекциясе һәм «Туган авылым» милли-туристлык комплексы көче белән үткәрелә.

Быел ифтар «Казан ЭКСПО» халыкара күргәзмәләр үзәге мәйданында узачак һәм бер өстәл артында 5 мең кешене җыячак, алар арасында гади мөселманнар да, азкеремлеләр дә, җитәкчеләр дә, эшмәкәрләр дә, төбәкләрдән килгән кунаклар да бар.

9 Республикакүләм ифтарда катнашучылар өчен «Казан ЭКСПО» халыкара күргәзмәләр үзәгенә кадәр шәһәр яны поездларында бушлай махсус рейслар оештырылачак. Поездлар ике маршрут буенча хәрәкәт итәчәк:

• Беренче шәһәр яны поезды «Казан-Пасс» станциясеннән 11 май көнне 17:07 сәгатьтә китә. Кире кайтканда поезд «Казан халыкара аэропорты» станциясеннән 21:30 сәгатьтә кузгала.

• Икенче шәһәр яны поезды «Казан-Пасс» станциясеннән 11 май көнне 17:47 сәгатьтә китә. Кире кайтканда поезд «Казан халыкара аэропорты» станциясеннән 22:30 сәгатьтә кузгала.

Әлеге бушлай маршрутлардан Республикакүләм ифтарга чакыру билетын күрсәтеп файдаланырга мөмкин. 9 Республикакүләм ифтарга билетларны Татарстан мәчетләрендә, шулай ук ТР мөселманнары Диния нәзарәте резиденциясендә алырга мөмкин. Куркынычсызлык чараларын үтәү зарурлыгына бәйле рәвештә, урыннар чикләнгән.

Республикакүләм ифтарда катнаша алмаучылар өчен https://iftar.ru/ адресы буенча урнашкан сайтта (әлегә ул эшләнә) турыдан-туры трансляция оештырылачак. Ә “Ак Барс Арена” стадионында мохтаҗлар өчен ифтар җыелмалары таратылачак.

Чыганак: ТР Диния нәзарәте матбугат хезмәте

Запись Республикакүләм ифтарда катнашучылар өчен бушлай поездлар йөриячәк впервые появилась Tatar Today - татар яңалыклары..

Республика ифтарына чакыру кемнәр алды, керә алмаучылар нишләр?! [мөфти җавабы]

Чулпан — Tue, 13 Jun 2017 20:16:26 +0000

Республика ифтарына чакыру кәгазьләре мөхтәсибәтләргә таратылган. Мөфти әйтүенчә, чарага халыкның төрле катлавы чакырылган. //Аzatliq.org//

15 июнь Татарстанның теннис академиясендә узачак республика ифтарына билетларны мөхтәсибәтләр аркылы имамнар тараткан. Бу хакта бүген узган матбугат очрашуында Татарстан мөфтие Камил хәзрәт Сәмигуллин белдерде. Билгеле булганча, социаль челтәрләрдә билетны кайдан алып була дигән сораулар күренә башлады. Мөфти сүзләренчә, билетлар инде таратылып беткән.

“Мохтаҗларга, гарипләргә бирелде. Бу безне берләштерә торган чара һәм шуңа анда төрле кешеләр булырга тиеш. Хәзрәтләр дә, җырчылар да бар. Татарстан митрополиты Феофан, Татарстан раввины Ицхак Горелик та көтелә. Ифтар 100 кешегә әзерләнгән булса, анда бит 200 кеше сыя алмый. Билет җитмәгән кешеләр үпкәләмәсен, чөнки без 10 мең кешене генә кабул итә алабыз. Чакыру кәгазен бер кешедән алып икенчесенә бирә алмыйбыз”, диде мөфти.

Республика ифтарына Татарстан президенты Рөстәм Миңнехановның килүе дә көтелә. Сәмигуллин әйтүенчә, түрәләр дә барлык килгән халык белән бөр өстәлдә утырачак.

“Узган ел түрәләр безнең белән бергә утырды һәм ашады. Ифтар югары түрәләр, элита өчен аерым түгел. Без барыбыз да Аллаһ каршында тигез”, диде. мөфти.

Җәмәгать намазы ачык һавада спорт мәйданчыгында укылачак. Ифтар үзе теннис академиясе эчендә булачак.

Ифтарда бер кешене ашату 500 сумга төшә. Өстәлдә су, җимеш сулары, киптерелгән җиләк-җимеш, пылау, ит һәм яшелчә кабымлыклары, өчпочмак, бөккән, чәкчәк, конфетлар булачак. Боларны әзерләү өчен 1,3 тонна сыер ите, 600 килограм дөге, өч тонна җиләк-җимеш, 800 килограмм киптерелгән җиләк-җимеш, 10 кисәк чәкчәк, 400 килограм конфет һәм бер тонна колбаса кабымлыклары әзерләнгән. Ифтарга керә алмыйча читтә калучылар өчен тагын бер мең ланчбокс әзерләнәчәк, диелә пресс-релизда.

Ифтар өчен 20ләп иганәче һәм шулай ук гади кешеләр дә акча биргән.

Запись Республика ифтарына чакыру кемнәр алды, керә алмаучылар нишләр?! [мөфти җавабы] впервые появилась Tatar Today - татар яңалыклары..

Быелгы республика ифтары ничә сумга төшәчәк? [видео]

Редактор1 editor1 — Mon, 20 Jun 2016 15:38:57 +0000

22 июньдә “Kazan-Arena” стадионында уздырылачак IV Республика ифтары бюджеты 10 млн сум тәшкил итә. Бу хакта бүген Россия мөселман эшкуарлары ассоциациясе президенты Айдар Шаһимәрданов хәбәр итте. Очрашуда шулай ук ТР Мөселманнары Диния нәзарәте рәисе, мөфти Камил хәзрәт Сәмигуллин һәм “Kazan-Arena” стадионы директоры Радик Миңнәхмәтов катнашты.

Татарстан мөфтие беренче республика ифтарының 2011 елда Казанның Меңьеллык мәйданында 1 меңләп кеше катнашында узганлыгын искәртте. 2012 елда чара башкаланың “Казан-Арена” стадионында үткәрелде һәм анда барлыгы 2,5 меңләп кеше җыелды. Былтыр республика ифтарында 5 меңгә якын мөэмин мөселман катнашса, быел ул 10 мең кешегә исәпләнгән, дип билгеләп үтте ул. Чакыру билетларын мөхтәсибәтләр аша республиканың күп балалы, аз керемле гаиләләренә, ятим балаларга, сәламәтлеге буенча мөмкинлекләре чиклеләргә өләшкәннәр.

“Ифтарда катнашу бушлай, әмма халык уйлаганнан күбрәк булса, бу билгеле бер уңайсызылыклар китереп чыгарачак”, – диде Камил хәзрәт Сәмигуллин. Аның сүзләренчә, әлегә чакыру билетлары бар. Чарада катнашырга теләге булганнар 264-64-19 номеры буенча ТР Мөселманнары Диния нәзарәтенең кабул итү бүлмәсенә шалтыратып, билетлы була ала.

Оештыру эшләре 3 ай дәвамында көн саен алып барыла. Шуңа чараның югары дәрәҗәдә үтәчәгенә шик юк, дип ышандырды Айдар Шаһимәрданов. Менюга килгәндә, ул пылау, кыяр һәм помидор салатыннан, табынга турап чыгарылган иттән, хөрмә, күрәгә һәм башка җиләк-җимешләрдән, яшелчәләрдән гыйбарәт булачак. Моннан тыш, һәр мөэмин мөселманга 1 литр күләмендә су каралган, дип билгеләп үтте Россия мөселман эшкуарлары ассоциациясе президенты.

Татар-информ, Бизнес онлай

Запись Быелгы республика ифтары ничә сумга төшәчәк? [видео] впервые появилась Tatar Today - татар яңалыклары..