Франциядә теракт: һәлак булучылар арасында Русия кешесе дә бар [фото-видео]

Франциянең Ницца шәһәрендә Бастилияне алу бәйрәменә җыелган халык өстенә йөк машинасы килеп кергән. 80гә кадәр кешенең һәлак булуы хакында хәбәр итә.

Һәлакәт салют вакытында, кичә кич сәгать 23ләр (Мәскәү вакыты белән 00 сәгать) тирәсендә булган. Йөк автомобиле зур тизлек белән фейерверкны күзәтүче халык өстенә килеп кергән һәм берничә йөз метр барган. Йөк машинасының йөртүчесе полиция тарафыннан атып үтерелгән.

Кайбер мәгълүматларга караганда, атомобиль йөртүче кабинадан чыккан һәм җыелган халыкка ата башлаган. «Le Figaro» газетасы автомобильдә ут белән ату коралы һәм гранаталар табылган дип яза.

«Рейтер» агентлыгы хәбәр иткәнчә, Ницца префектурасы әлеге вакыйганы «атака» дип атаган һәм шәһәр халкыннан өйләреннән чыкмавын үтенгән. Һәлакәт урынында полиция ябык зона булдырган. Зыян күргән кешеләргә медиклар һәм полиция хезмәткәрләре ярдәм күрсәтә.

Вакыйга террорчылык акты буларак тикшерелә. Бу минутка бер генә террорчылык оешмасы да әлеге атака өчен җаваплылыкны үз өстенә алмады.

Франциянең Ницца шәһәрендәге теракт вакытында Россия гражданины һәлак булган, тагын берсе тән җәрәхәтләре алган.

Франция Президенты Франсуа Олланд теракт вакытында 77 кеше һәлак булуын, алар арасында балалар да булуын белдерде.

Олланд Франциядә 26 июльгә кадәр гадәттән тыш хәл игълан итте.

Татар-информ

Загрузка...

Бәйле

Добавить комментарий