Мордовиядә мәктәп укытучыларына эшкә яулык бәйләп килүне тыю белән бәйле вакыйгалардан соң Интернетта хиҗабны тыюга каршы петиция янә игътибар үзәгенә чыкты. Соңгы берничә сәгать эчендә генә дә интернет-мөрәҗәгатьне берничә йөз кеше хуплаган.//Азатлык радиосы//
Интернет кулланучылар Русия президенты Владимир Путинга «Русиянең бөтен уку йортларында хиҗаб киюне рөхсәт итәргә» дип аталган петиция юллады.
Петицияне 1 200дән артык кеше имзалаган. Әммә бу сан минут саен үзгәреп тора. Авторлар имза санын 2 меңгә кадәр җиткерергә тели.
«Тышкы кыяфәтләренең аерылгысыз өлеше хиҗап булган мөселман хатын-кызларның хокукларын яклау. Русия Конституциясенең 28нче маддәсендә һәркемгә вөждан иреге, дин иреге, һәр кешегә аерым яисә башкалар белән берлектә дин тоту яки бер динне дә тотмау, диннәрне ирекле рәвештә сайлау, дини һәм башка карашларда булу һәм аларны тарату һәм шулар нигезендә гамәл кылу гарантияләнә. Бу маддәгә нигезләнеп, мөселман хатын-кызлар дини карашлары нигезендә хиҗаб кия ала, шул исәптән – уку йортларында да», диелә Avaaz.org сәхифәсендә урнаштырылган петициядә.
Мордовиянең Азюрка авылы мәктәбе укытучылары яулыкларын салмаса, җирле түрәләр аларны эштән куу белән яный.
Азюрка мәктәбенең мактау тактасы